Wĩnyuva Ũũ Ethĩwe Mũtongoi Waku?—Mbivilia Yaĩtye Ata?

Andũ nĩmekwĩka ũtwi wa vata ĩũlũ wa naaũ mekwenda methĩwe atongoi moo.

Mbivilia yaĩtye ata?

Atongoi ma Andũ Methĩawa na Mawonzu

Mbivilia nĩwetete wonzu ũmwe atongoi ma andũ methĩawa nawʼo.

• “Ndũkaĩkĩĩe anene me mbee ũsumbĩnĩ, kana mwana wa mũndũ, ũla ũtatonya kũtethya. Mĩthũmũ yake nĩyumaa, nake nũsyokaa mũthanganĩ wake; mũthenya o ũsu mosũanĩo make nĩmaaa.”—Savuli 146:3, 4.

O na atongoi ala me na ũtonyi mwingĩ, mũthenya ũmwe makakwʼa. O na ĩngĩ, mayĩthĩawa na wĩkwatyo kana maũndũ maseo ala meekie makaendeewʼa nĩ ala moselelaa ũtongoi.—Mũtavanʼya 2:18, 19.

Ũwʼo nĩ kana, Mbivilia nĩyonanĩtye kana ũyaĩ mũvango wa Ngai andũ mesumbĩke.

• “Kũtongoesya matambya make kũti nthĩnĩ wa mũndũ ũla ũendaa.”—Yelemia 10:23.

Yo ũmũnthĩ ve mũndũ ũtonya kwĩthĩwa e mũtongoi mũseo?

Mũtongoi ũla wĩtĩkĩlĩtwe nĩ Ngai

Mbivilia nĩeleetye kana Ngai nũmũnyuvĩte mũtongoi ũla mũseo vyũ na wa kwĩkwatwʼa, nake nĩ Yesũ Klĩsto. (Savuli 2:6) Yesũ nĩwe Mũsumbĩ wa Ũsumbĩ wa Ngai, ũla nĩ silikalĩ ĩla ĩsumbĩkĩte ĩtunĩ.—Mathayo 6:10.

We nũũtwʼa kwĩtĩkĩla ũtongoi wa Yesũ? Mbivilia nĩyonanĩtye nĩkĩ ĩkũlyo yĩu nĩ ya vata:

• “Mũmumunyei [kana, Mũnengei ndaĩa] ũla mwana [Yesũ Klĩsto], ndakese ũthata, na inywʼĩ mũyaĩa nzĩanĩ, nĩkwĩthĩwa ũthilĩku wake ũkilĩlye kwakana. Nĩ aathĩme onthe ala mevithaa nthĩnĩ wake.”—Savuli 2:12.

Yĩĩ nĩyo ĩvinda yĩla waĩle kwĩka ũtwi. Wathani wa Mbivilia wonanĩtye kana Yesũ ambĩlĩĩilye kũsumbĩka mwaka wa 1914 na ũkonanyʼa kana o mĩtũkĩ Ũsumbĩ wa Ngai ũkasumbĩka vandũ va silikalĩ sya andũ.—Ndanieli 2:44.

Nĩ kana wĩmanyĩsye maũndũ maingangĩ ĩũlũ wa ũndũ ũtonya kũkwata mbau ũtongoi wa Yesũ, soma kĩlungu kĩ na kyongo, “Yĩĩ Nĩyo Ĩvinda Waĩle Kũkwata Mbau Ũsumbĩ wa Ngai”