Yo Nĩvatonyeka Masindano ma Mũvĩla ma Nthĩ Yonthe Makaete Ngwatanĩo Ĩũlũ wa Nthĩ?—Mbivilia Yaĩtye Ata?

Andũ ta mbillioni itano nĩmatonya kwĩloela Masindano ma Mũvĩla ma Nthĩ Yonthe (FIFA World Cup) ala mambĩĩe Matukũ 20, Mwei wa 11 na makathela Matukũ 18, Mwei wa 12, 2022. Andũ aingĩ monaa mathaũ ta asu nĩmatonya kwĩanĩsya maũndũ maingĩ eka o kũtuma andũ methĩwa me ngwatanĩo yĩla mekwĩloela mathaũ asu.

• “Mathaũ me ũtonyi wa kũalyũla nthĩ. Nĩmatonya kũthangaasya andũ. Me ũtonyi mũnene wa kũete ngwatanĩo kwĩ syĩndũ ingĩ mbingĩ.”—Nelson Mandela, ũla waĩ mũsumbĩ wa South Africa.

• “Mathaũ ma mũvĩla . . . nĩmatumaa andũ methĩwa me ngwatanĩo nũndũ nĩmanengae andũ wĩkwatyo, ũtanu, na wendi wa kwĩka maũndũ. O na nĩmatumaa methĩwa mendanĩte na mewʼa mate kĩvathũkanyʼo mũno na ala angĩ.”—Gianni Infantino, mũũngamĩi wa FIFA.a

Mo masindano ma Mũvĩla ma Nthĩ Yonthe kana o mathaũ angĩ no meanĩsye maũndũ asu manenevete ũu? No matũnenge wĩkwatyo wa kwĩsa kwĩthĩwa na mũuo na ngwatanĩo?

Mo nĩmaetae ngwatanĩo?

Masindano ma Mũvĩla ma Nthĩ Yonthe ma mwaka ũũ nĩmatumie andũ masũanĩa maũndũ angĩ maingangĩ eka o mũvĩla. Nĩmatumie andũ maneenea mũno siasa na mĩkalĩle ya andũ maũndũnĩ makonetye ũthasyo wa kĩla mũndũ, kĩmena kya mbaĩ, na andũ amwe kwĩthĩwa me athwii kwĩ ala angĩ.

O na vailye ũu, andũ aingĩ nĩmonete kana mathaũ ma nthĩ yonthe, ta Masindano ma Mũvĩla ma Nthĩ Yonthe, nĩmanengae andũ mwanya wa kwĩtanĩthya. Ĩndĩ o na kũtwʼĩka andũ nĩmendaa mũno mathaũ asu maete ngwatanĩo, mayĩsa kũete ngwatanĩo ĩtathela. Vandũ va ũu, mekaa kwonanyʼa nesa vyũ ũndũ andũ maanĩkĩte mekonĩ moo na ilĩkonĩ syoo. Kĩu nĩkyo Mbivilia yathanie kĩkethĩwa kĩendeee ĩvindanĩ yĩla yĩtĩtwe “mĩthenyanĩ ya mũminũkĩlyo.”—2 Timotheo 3:1-5.

Nĩ kyaũ kĩkaete ngwatanĩo ya wʼo nthĩ yonthe?

Mbivilia nĩtũnengete wĩkwatyo wa wʼo wa kwĩsa kwĩthĩwa na mũuo nthĩ yonthe. Yathanĩte kana andũ nthĩ yonthe makeethĩwa me ngwatanĩo masumbĩkĩtwe nĩ silikalĩ ya ĩtunĩ yĩtawa “Ũsumbĩ wa Ngai.”—Luka 4:43; Mathayo 6:10.

Yesũ Klĩsto, ũla nĩwe Mũsumbĩ wa Ũsumbĩ ũsu, akaĩkĩĩthya kana kũkeethĩwa mũuo kĩla vandũ ĩũlũ wa nthĩ. Mbivilia yaĩtye:

• “Ala alũngalu makaaĩlaa, na kũkeethĩwa mũuo mwingĩ.”—Savuli 72:7.

• “Akavonokasya mũthĩni yĩla wĩkayaa . . . Akoovosya mathayũ moo kuma thĩnanĩ na ũngʼendunĩ.”—Savuli 72:12, 14.

O na ũmũnthĩ, momanyĩsyo ma Yesũ nĩmatumĩte andũ milioni mbingĩ kuma nthĩ 239 methĩwa me ngwatanĩo. Nĩmemanyĩĩtye kũekana na kĩmena vyũ. Nĩ kana ũmanye maũndũ maingangĩ soma ilungu iatĩanĩe syĩ na kyongo “Ũndũ Ũtonya Kũsinda Kĩmena.”