Nĩkĩ Siasa Iaanasya Andũ Mũno?—Mbivilia Yaĩtye Ata?

Nthĩ mbingĩ niaanĩkĩte kĩ-siasa. Livoti ĩmwe yaumĩtwʼe mwaka wa 2022 nĩ kĩkundi kya kwĩka ũkunĩkĩli kĩtawa Pew Research Center yoonanisye kana “kĩlungu kya 65 ĩũlũ wa 100 kya andũ aima makũlilwʼe makũlyo kuma nthĩ 19 syĩ kĩvathũkanyʼo, maisye kana ve mũaanĩko mũnene, kana o mũnene mũno, nthĩ yoo katĩ wa andũ ala makwataa mbau syama syĩ kĩvathũkanyʼo sya siasa.”

We nĩwonete kana andũ aingĩ vala wĩkalaa maendeee kũaanĩka mũno nũndũ wa siasa? Nĩkĩ kwĩthĩawa kũilyĩ ũu? Nĩ kyaũ kĩtonya kũmina thĩna ũsu? Sũanĩa kĩla Mbivilia yaĩtye.

Nguma ila ietae mũaanĩko

Mbivilia nĩyathanie kana ĩvindanĩ yĩĩ twĩkalĩte, kana “mĩthenyanĩ ya mũminũkĩlyo,” andũ aingĩ makeethĩwa na mawoni makatuma wĩthĩwa ne ũndũ wĩ vinya kwĩthĩwa na ũũmwe.

• “Mĩthenyanĩ ya mũminũkĩlyo kũkeethĩwa mavinda ma mũisyo na momũ. Nũndũ andũ makeethĩwa makĩyenda ene, . . . mate na wĩwʼano.”—2 Timotheo 3:1-3.

O na kau andũ aingĩ nĩmekĩĩte kĩthito mũno nĩ kenda silikalĩ ianĩsye mĩvango yasyo, ũndũ ũsu nũemelete. Andũ methĩawa na mawoni me kĩvathũkanyʼo, na kwoou mewʼaa ve vinya kana o na vatatonyeka kũthũkũma me ngwatanĩo nĩ kenda mamine mathĩna. Thĩna ũla wumĩlaa wĩĩkĩĩthya kĩla Mbivilia yawetie tene mũno.

• “Andũ ĩũlũ wa nthĩ nĩmatũmĩaa ũtonyi ũla me nawʼo kũthĩnyʼa andũ ala angĩ.”—Mũtavanyʼa 8:9, The Holy Bible in Current Kikamba Language.

O na vailyĩ ũu, Mbivilia nĩnenganĩte ũsũngĩo wa thĩna ũsu, nawʼo nĩ silikalĩ ĩtongoewʼe nĩ mũndũ ũtonya kũmina mathĩna ala makwataa andũ ũmũnthĩ.

Mũsumbĩ waĩlĩte na ũthĩnĩkĩaa andũ

Mbivilia nĩwetete mũtongoi wĩ na ũtonyi wa mwanya, nake nĩ Yesũ Klĩsto, ũla wĩ na vinya, ũkũmũ, na wendi wa kũete ũũmwe na mũuo katĩ wa andũ onthe.

• “Mĩthenyanĩ yake ala alũngalu makaaĩlaa, na kũkeethĩwa mũuo mwingĩ.”—Savuli 72:7.

• “Mbaĩ syonthe ikamũthũkũma.”—Savuli 72:11.

Yesũ nĩwe mũtongoi ũla waĩlĩte vyũ nũndũ nũthĩnĩkĩaa andũ na nĩwendaa kũmatetheesya, na mũno mũno ala mekawa maũndũ mate na ũsili wa katĩ.

• “Akavonokasya mũthĩni yĩla wĩkayaa, na ngya, ĩla ĩte mũtethya. Akeewʼĩa tei ngya na athĩni, na mathayũ ma athĩni akamatangĩĩa. Akoovosya mathayũ moo kuma thĩnanĩ na ũngʼendunĩ.”—Savuli 72:12-14.

Ĩmanyĩsye maũndũ maingangĩ ĩũlũ wa Ũsumbĩ wa Ngai, kana silikalĩ ya ĩtunĩ ĩla ĩtongoewʼe nĩ Yesũ. Ĩmanyĩsye ũmanye ũndũ silikalĩ ĩsu ĩtonya kũũtetheesya na ũndũ ũtonya kũkwata mbau ũsumbĩki wayo.

• Ĩloele vitio yĩ na kyongo, Ũsumbĩ wa Ngai Nĩ Kyaũ?

• Soma kĩlungu kĩ na kyongo, “Ũsumbĩ wa Ngai Nĩ Silikalĩ Ndĩkĩĩku.”