Nũũ Ũkatangĩĩa Laiaa Ite Mavĩtyo Ila Itelikasya Kaũnĩ?—Mbivilia Yaĩtye Ata?

Livoti ĩmwe ya Ngwatanĩo ya Nthĩ yaĩtye:

• Kuma Matukũ 7 nginya Matukũ 23, Mwei wa 10, 2023, kaũ wa Gaza na Israel nũnatumie andũ mbee wa 6,400 makwʼa na angĩ 15,200 maũmĩa, na aingĩ ma asu nĩ laiaa ite itanĩ sya kaũ. O na eka ũu, andũ ngili maana maingĩ nĩmalasimĩkĩte kũkĩĩa kũndũ kũngĩ.

• Tũivika Matukũ 24, Mwei wa 9, 2023, kaũ katĩ wa Russia na Ukraine nĩwatumĩte andũ mate itanĩ sya kaũ 9,701 makwʼa na 17,748 makaũmĩwʼa nthĩ ya Ukraine.

Mbĩvilia ĩnenganĩte wĩkwatyo wĩva kwa ala makwatĩtwe nĩ mathĩna nũndũ wa kaũ?

Kĩtumi kya kwĩthĩwa na wĩkwatyo

Mbivilia yathanĩte kana Ngai akatuma “makaũ mathela kũvika kĩtulu kya nthĩ.” (Savuli 46:9) akatũmĩa silikalĩ yake ya ĩtunĩ, kana Ũsumbĩ wake, kũmina silikalĩ syonthe sya andũ. (Ndanieli 2:44) Ũsumbĩ wa Ngai ũkaminĩa andũ mathĩna onthe.

Kwoona ũndũ Yesũ Klĩsto, ũla nĩwe Mũsumbĩ wa Ũsumbĩ wa Ngai, ũkeka:

• “Akavonokasya mũthĩni yĩla wĩkayaa, na ngya, ĩla ĩte mũtethya. Akeewʼĩa tei ngya na athĩni, na mathayũ ma athĩni akamatangĩĩa. Akoovosya mathayũ moo kuma thĩnanĩ na ũngʼendunĩ.”—Savuli 72:12-14.

Ngai akatũmĩa Ũsumbĩ wake kũmina vyũ mathĩna ala maetetwe nĩ kaũ na ũngʼendu.

• “Akavangũla methoi onthe methonĩ moo, na kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo. Maũndũ ma mbee nĩ mavĩtu.”—Ũvuanyʼo 21:4.

O mĩtũkĩ, Ũsumbĩ wa Ngai nũũvĩndũa maũndũ ĩũlũ wa nthĩ. Mbivilia nĩyaathanie “makaũ na kũwetangwa kwa makaũ” kũla tũkwona ũmũnthĩ. (Mathayo 24:6) Maũndũ asu na angĩ ala mekwʼo meonanyʼa kana tũtwĩe “mĩthenyanĩ ya mũminũkĩlyo” ya kũsumbĩka kwa andũ.—2 Timotheo 3:1.