2023: Mwaka Andũ Manaĩ na Mawĩmakĩo Maingĩ—Mbivilia Yaĩtye Ata?

Maũndũ ala maneekĩkie mwakanĩ wa 2023, nĩmanoonanisye ũtheinĩ kana tũtwĩe ĩvindanĩ yĩla Mbivilia yĩtĩte ‘mĩthenya ya mũminũkĩlyo.’ (2 Timotheo 3:1) Sisya wone ũndũ maũndũ ala mekĩkĩte mosanĩte na kĩla Mbivilia yathanie kĩkekĩka ĩvindanĩ yĩĩ.

Kĩla Mbivilia ĩwetete ĩũlũ wa maũndũ ala maendeee ĩũlũ wa nthĩ

“Makaũ na kũwetangwa kwa makaũ.”—Mathayo 24:6.

• “Ithokoo na makaũ iendeee kwongeleka isionĩ mbingĩ ĩũlũ wa nthĩ.”a

“Ithingitho sya nthĩ kũũ na kũũ.”—Maliko 13:8.

• “Kuma mwaka wa 2023 wambĩĩa, ĩũlũ wa nthĩ nĩkwĩthĩĩtwe na ithingitho 13 syĩ na vinya ũvĩtũkĩte kĩthimo kya 7, kĩla nĩ kĩmwe katĩ wa ithimo sya ĩũlũ vyũ kuma lekoti ikonetye ithingitho sya nthĩ syambĩĩa kũiwa.”b

“Maũndũ ma kũtelemya.”—Luka 21:11.

• “Ĩvinda ya kwasya kwĩ ũvyũvu mwingĩ ĩũlũ wa nthĩ nĩ ĩthelu; yu kĩla kĩ kwʼo no ta kũtheũka kwa nzeve.”—António Guterres, Mũandĩki mũnene wa Ngwatanĩo ya Nthĩ.c

“Ũnyivu wa lĩu.”—Mathayo 24:7.

• “Mwaka wa 2023: Wĩĩ mwaka mũmũ mũno kwa ala mangʼangʼanaa kũmanthĩa mĩsyĩ yoo lĩu.”d

“Mavinda ma mũisyo na momũ.”—2 Timotheo 3:1.

• “Ĩũlũ wa nthĩ, mũndũ ũmwe katĩ wa andũ nyanya ethĩawa na thĩna mũna wa kĩlĩko.”e

Maũndũ matonya kwĩthĩwa mailye ata Mwaka wa 2024?

Vai mũndũ wĩsĩ nesa ũndũ mwaka wa 2024 maũndũ makethĩwa mailye. Ĩndĩ maũndũ ala maendeee ĩũlũ wa nthĩ meonanyʼa kana o mĩtũkĩ Ũsumbĩ wa Ngai, kana silikalĩ yake ya ĩtunĩ, nĩkũvetanga silikalĩ sya andũ na ĩimina vyũ mathĩna na mawĩmakĩo.—Ndanieli 2:44; Ũvuanyʼo 21:4.

Ĩndĩ o tweteele kĩu, yĩla twakwatwa nĩ mawĩmakĩo, no tũmwĩkwatye Ngai atũtetheesye. Mbivilia yaĩtye atĩĩ:

“Ĩvinda yĩla ngũkĩa, Ngakũĩkĩĩa.”—Savuli 56:3.

Tũtonya kwonanyʼa ata kana nĩtũmwĩkwatĩtye Ngai? Nĩtũũkũthokya wĩmanyĩsye mũnango ĩũlũ wa watho wa Mbivilia ũla wonanĩtye kana ĩvinda yũkĩte mathĩna nĩmeũthela. Tata mũvango witũ wa kwĩmanyĩsya Mbivilia na andũ vate ndĩvi wone ũndũ we na mũsyĩ waku mũtonya kũtetheka nĩ mawatho ala me Mbivilianĩ.