Mbua Mbingĩ Ĩla Ĩendeee Kũete Wanangĩko—Mbivilia Yaĩtye Ata?

Andũ aingĩ ĩũlũ wa nthĩ nĩmakwatĩte wasyo nũndũ wa mbua mbingĩ. Sisya livoti ii:

• “Mĩthenyanĩ mĩvũthũ mĩvĩtu, mbua ĩla nene vyũ yaaoneka China kwa ĩvinda ya myaka 140 nĩnauie taoninĩ ĩla nene nthĩ ĩsu. Mbua ĩsu ĩnaĩ ya milimita 744.8 (inzi 29.3) na ĩnauie katĩ wa Wathanthatũ na Wakatatũ.”—AP News, Matukũ 2, Mwei wa 8, 2023.

• “Wakana waĩ mũthenya wa kelĩ ũla kĩuutani kĩnene kĩtawa Khanun kyatumie kwĩthĩwa na mbua mbingĩ na kĩseve kyaĩ na vinya mũno ngalĩko ya ĩtheo ya Japan. Nũndũ wa ũu, andũ matanyiva elĩ nĩmanakwie. . . . Kĩuutani kĩu nĩkĩtonya kũete mbua ya vakuvĩ mita 0.6 (vuti 2) kĩsionĩ kĩ iĩma kĩla kĩ katĩ katĩ wa Taiwan.”—Deutsche Welle, Matukũ 3, Mwei wa 8, 2023.

• “Wanangĩko ũla ũneethĩiwe wikendi [kĩsionĩ kya Nova Scotia] unaetiwe nĩ mbua ĩla mbingĩ vyũ yaaua kĩsionĩ kya Atlantic Canada ĩvindanĩ ya myaka 50 mĩvĩtu.”—BBC News, Matukũ 24, Mwei 7, 2023.

Mbivilia yaĩtye ata ĩũlũ wa maũndũ ta asu?

Wonanyʼo wa ‘mĩthenya ya mũminũkĩlyo’

Mbivilia yonanĩtye kana tũtwĩe ĩvindanĩ yĩla yĩtĩtwe ‘mĩthenya ya mũminũkĩlyo.ʼ (2 Timotheo 3:1) Yesũ athanie kana mĩthenyanĩ ĩno tũtwĩe, kwaĩ kwĩthĩwe na “maũndũ ma kũtelemya,” kana maũndũ ma kũkĩwa. (Luka 21:11) Moalyũku ma nzeve nĩmatumĩte maũndũ ma kũtelemya ta mbua mbingĩ mongelekeela, na maũndũ asu maumĩlaa matataĩĩwe na maiete wanangĩko mũnene.

Kĩtumi kya kwĩthĩwa na wĩkwatyo

Mbivilia ĩtũtavĩtye kana maũndũ maingĩ ma kũtelemya ala mekwĩkĩka ĩũlũ wa nthĩ ũmũnthĩ nĩmaĩlĩte kũtũnenga wĩkwatyo. Nĩkĩ? Yesũ aisye atĩĩ: “Mwoona maũndũ asu mayĩkĩka, manyai kana Ũsumbĩ wa Ngai wĩ vakuvĩ.”—Luka 21:31; Mathayo 24:3.

Maũndũ ala tũkwona mayĩkĩka meonanyʼa kana o mĩtũkĩ Ũsumbĩ wa Ngai nũkũete ũalyũku wĩthĩe maũndũ ta ũalyũku wa nzeve, o vamwe na mũthyũlũlũko wa kĩwʼũ, ũikũete wanangĩko o na ũmwe.—Yovu 36:27, 28; Savuli 107:29.

Nĩ kana wĩmanyĩsye mũnango ũndũ Ũsumbĩ wa Ngai ũkaseũvya maũndũ vaa ĩũlũ wa nthĩ, sisya kĩlungu kĩ na kyongo, “Ni Nani Atakayeiokoa Dunia?”