Mwaka wa Kelĩ Kuma Kaũ Ũla Ũendeee Ukraine Wambĩĩa—Mbivilia Ĩtũnengete Wĩkwatyo Wĩva?

Wakatano, Matukũ 24, 2023, nĩwʼo mwaka wa mbee ũkathela kuma kaũ ũla ũendeee Ukraine wambĩĩa. Kwosana na livoti imwe, vakuvĩ asikalĩ 300,000 ma Ukraine na Russia nĩmoaĩtwe kana makaũmĩwʼa, na vatwʼĩkĩkanaa andũ angĩ vakuvĩ 30,000 nĩmakwʼĩte nũndũ wa kaũ ũsu. Ĩndĩ o na ũu wĩ o vo, nĩvatonyeka ala makwʼĩte makethĩwa me aingangĩ kwĩ ũtalo ũsu.

Ũndũ wa kũmakya nĩ kana, nĩvatonyeka kaũ ũsu ũkalea kũthela mĩtũkĩ.

• “Vakuvĩ mwaka ũmwe kuma ita sya Russia syambĩĩa kũkita Ukraine, vai maũndũ mekwonanyʼa kana kaũ ũsu nũũthela mĩtũkĩ. Katĩ wa nthĩ isu syelĩ, vai ĩmwe ĩkwoneka tayo ĩkusinda, na o na nĩvatonyeka makalea kwĩsa kũvikĩĩa ũtwi ũmwe wa kũmina kaũ ũsu.”—NPR (National Public Radio), Matukũ 19, Mwei wa 2, 2023.

Andũ aingĩ nĩmeũthĩnĩka mũno nũndũ wa kaũ ũla ũendeee nthĩ isu, na ithokoo ingĩ ĩũlũ wa nthĩ yonthe ila itumĩte andũ mate na mavĩtyo mathĩna. Mbivilia ĩtũnengete wĩkwatyo wĩva? Yo ve ĩvinda kũtakethĩwa kaũ?

Kaũ ũla ũkamina makaũ onthe

Mbivilia nĩwetaa kaũ ũkatangĩĩa andũ vandũ va kũmamina. Kaũ ũsu wĩtawa Alimaketoni, na ũeleetwʼe ta “kaũ wa ũla mũthenya mũnene wa Ngai Mwene Vinya Wʼonthe.” (Ũvuanyʼo 16:14, 16) Ngai akatũmĩa kaũ ũsu kwananga ũsumbĩ wa andũ ũla ũtumĩte kwĩthĩwa makaũ maingĩ. Nĩ kana ũmanye ũndũ kaũ ũsu wa Alimaketoni ũkaetee andũ mũuo wa tene na tene, soma ilungu ii iatĩĩe:

• “Kaũ wa Alimaketoni Nĩ Kyaũ?”

• “Nĩtwĩthĩwe na Mea ma Kwona Alimaketoni!”