Thĩna wa Kwĩwʼa Ta wĩ Weka—Ũtonya Kũmĩanĩsya Nawʼo Ata?

• “Vakuvĩ nusu ya andũ aima nthĩ ya Amelika methĩawa na thĩna wa kwĩwʼa ta me oka, na aingĩ moo nĩ ala me na ũkũũ wa katĩ wa myaka 18 na 25.”—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

• “[Ngwatanĩo ya Ũima wa Mwĩĩ ya Nthĩ Yonthe] nĩnatangaasie kwambĩĩwʼa kwa mũvea mweũ wa kũthĩnĩkĩa na mĩtũkĩ ala me na thĩna wa kwĩwʼa ta me oka, o vamwe na kũthangaasya andũ methĩwe na ngwatanĩo nzeo na andũ ala angĩ na ũimantha nzĩa nzeo sya kũthĩnĩkĩa thĩna wa mũndũ kwĩwʼa ta wĩ weka nthĩnĩ wa kĩla nthĩ, yĩthĩwe yĩ na ũkwati mũnini kana mwingĩ.”— Ngwatanĩo ya Ũima wa Mwĩĩ ya Nthĩ Yonthe, Matukũ 15 Mwei wa 11, 2023.

Mbivilia nĩtũnengete ũtao mũseo ĩũlũ wa ũndũ tũtonya kwĩthĩwa na ngwatanĩo nzeo na andũ ala angĩ, na kĩu no kĩtũtetheesye tũikewʼe ta twĩ oka.

Myolooto ya Mbivilia ĩtonya Kũũtethya

Ndũkatũmĩe ĩvinda yingĩ ũyĩka maũndũ ala matonya kũtuma wĩvathana na andũ ala angĩ. Maũndũ asu nĩ vamwe na kũtũmĩa ĩvinda yingĩ isesenĩ sya kũea ngewa.Vandũ va ũu, mantha myanya ya kũtũmĩa ĩvinda vamwe na andũ ala me vakuvĩ naku,na kĩu no kĩũtetheesye kũkwata anyanya ma wʼo.

• Mwolooto wa Mbivilia: “Mũnyanya nĩwendanaa ĩndĩ yonthe;Na mwana-a-ĩthe asyaiwe kwondũ wa kũthĩnũkasya.”—Nthimo 17:17.

Mantha myanya ya kũtetheesya ala angĩ.Kwĩka andũ ala angĩ maũndũ maseo nĩkũlũlũmĩlasya ũnyanya witũ vamwe namo, na ũndũ ũla wa vata vyũ nĩkũtumaa tũkwata ũtanu.

• Mwolooto wa Mbivilia: “Kũnengane kwĩ ũtanu mwingĩ kwĩ kwosa.”—Meko ma Atũmwa 20:35.

Soma maũvoo ala me kĩsesenĩ kitũ nĩ kana ũkwate ũvoo mwingangĩ kuma Mbivilianĩ ũtonya kũũtetheesya kũkwata anyanya aseo.