Andũ Aingĩ Nĩmaekete Kũĩkĩĩa Atongoi ma Siasa—Mbivilia Yaĩtye Ata?

Mwakanĩ wa 2024 nthĩ mbingĩ nĩsyĩkwĩthĩwa na ũsakũani kwĩ mwaka ũngĩ o na wĩva. Ĩndĩ o na vailye ũu, andũ aingĩ nĩmaekete kũĩkĩĩa atongoi ma siasa.

• Andũ aingĩ ma nthĩ ya Amelika ala makũlilwʼe maisye kana “atongoi aingĩ ma siasa mekaa maũndũ matongoewʼe nĩ ĩtomo” vandũ va kwĩthĩwa na wendi wa kũthũkũma ene nthĩ.a—Pew Research Center, Matukũ 19, Mwei wa 9, 2023.

O na andũ aingĩ ma mũika maikũĩkĩĩa atongoi ma siasa.

• “Andũ aingĩ ma mũika mendaa kwona maũndũ ala ma vata maithĩnĩkĩwa, ĩndĩ yĩla makũlwʼa maasya kana mayonaa atongoi ma siasa maithĩnĩkĩa mavata moo.”—The New York Times, Matukũ 29, Mwei wa 1, 2024.

• “Kwosana na ũkunĩkĩli ũmwe, andũ ma mũika maĩkĩĩaa mũnango ala mekĩaa vitio na syĩndũ ingĩ isesenĩ ta YouTube, kwĩ ũndũ maĩkĩĩaa atongoi ma siasa.”—The Korea Times, Matukũ 22, Mwei wa 1, 2024.

Yo no twĩkwatye atongoi ma siasa maseũvye maũndũ maitũ ma ĩvinda yũkĩte? Nũũ ũtonya kwĩkwatwʼa?

Sisya nesa ũla ũkũĩkĩĩa

Nũseo andũ masisye nesa meĩkĩĩa ũũ. Mbivilia yaĩtye kana “ũla ũte ũmanyi nĩwĩtĩkĩlaa kĩla ndeto; Ĩndĩ ũla wĩ kĩlĩko asiasya ũndũ ũendaa.”—Nthimo 14:15.

• Wenda kwona maũndũ matonya kũũtethya kũthiana ũvoo ũla wakwata, soma kĩlungu kĩ na kyongo, “Jilinde Dhidi ya Habari za Uwongo.”

Kwongela kĩu, o na atongoi ma siasa ala aĩkĩĩku na mendeaa andũ ũseo, mayĩthĩawa na ũtonyi wa kwĩka maũndũ onthe ala mekwenda. Nĩkyo kĩtumi Mbivilia ĩnenganĩte ũkanyʼo ũũ:

• “Ndũkaĩkĩĩe anene me mbee ũsumbĩnĩ, kana mwana wa mũndũ, ũla ũtatonya kũtethya.”—Savuli 146:3.

Mũtongoi ũtonya kwĩkwatya

Mbivilia yĩeleetye kana Ngai nũnyuvĩte mũtongoi wĩ ũtonyi na wa kwĩkwatwʼa, ũla nĩ Yesũ Klĩsto. (Luka 1:32, 33) Yesũ nĩwe Mũsumbĩ wa Ũsumbĩ wa Ngai, ũla nĩ silikalĩ ĩsumbĩkĩte ĩtunĩ.—Mathayo 6:10.

• Ĩmanyĩsye wone nĩkĩ ũtonya kũmũĩkĩĩa Yesũ na ũimanya kĩla ũkeka nĩ kana amine mathĩna maitũ. Soma ilungu “Mũsumbĩ wa Ũsumbĩ wa Ngai Nũũ?” na “Ũsumbĩ wa Ngai Ũkeanĩsya Kyaũ?”