Ithokoo sya Kĩ-siasa—Mbivilia Yaĩtye Ata?

Syĩko sya ũngʼendu kwelekela atongoi ma kĩ-siasa nĩsyongelekete mũno.

Nĩkĩ kwĩthĩĩtwe na ithokoo mbingĩ sya kĩ-siasa? Syo ikathela? Mbivilia yaĩtye ata?

Mũaanĩko wa kĩ-siasa nĩwaathanĩtwe

Mbivilia nĩyaathanĩte kana ĩvindanĩ yĩĩ tũtũĩe yĩla yĩtĩtwe “mĩthenya ya mũminũkĩlyo,” andũ aingĩ makethĩwa na mĩtuo ĩla ĩtonya kũete ithokoo na andũ kũema kwĩwʼana.

• “Mĩthenyanĩ ya mũminũkĩlyo kũkeethĩwa mavinda ma mũisyo na momũ. Nũndũ andũ makeethĩwa . . . mate mũvea, mate aĩkĩĩku, . . . mate na wĩwʼano, . . . ai, . . . avũnyanĩi, me na ngũlũ, me na mĩtũlyo.”—2 Timotheo 3:1-4.

O na ĩngĩ, Mbivilia nĩyaathanĩte kana mathĩna ta andũ kũvĩnga silikalĩ na ithokoo sya kĩ-siasa maĩ methĩwe vo ĩvindanĩ yĩĩ ya mũminũkĩlyo. (Luka 21:9) Ĩndĩ o na vailye ũu, ithokoo sya kĩ-siasa na mĩaanĩko ikathela.

Mũthya wa ithokoo sya kĩ-siasa

Mbivilia ĩeleetye kana Ngai akavetanga silikalĩ syonthe sya andũ na vandũ vasyo, ayĩũngamya silikalĩ yake ya ĩtunĩ.

• “Ngai wa ĩtunĩ akaũngamya ũsumbĩ [ũla] . . . ũkatilanga ilungu na kũmina mosumbĩ asu onthe, nawʼo ũkekalaa tene na tene.”—Ndanieli 2:44.

Kwa wʼo, Ũsumbĩ wa Ngai ũkaete mũuo ĩũlũ wa nthĩ yonthe na ũituma andũ methĩwa me ngwatanĩo.

• Yesũ Klĩsto, Mũsumbĩ wa Ũsumbĩ ũsu, etĩtwe “Mũnene wa Mũuo,” na akaĩkĩĩthya kana “mũuo ndũkethĩwa na mũminũkĩlyo.”—Isaia 9:6, 7.

• O na ũmũnthĩ, laiaa ma Ũsumbĩ ũsu nĩmaendee kwĩmanyĩsya kwĩthĩawa na mũuo. Nĩkyo kĩtumi Mbivilia yaĩtye: “Makatusya mbyũ syoo itwʼĩke mĩthya ya maembe ma ngʼombe, na matumo moo tũvyũ twĩ ngoto twa kũsea; mbaĩ ndĩkokĩlĩlya mbaĩ ũvyũ, o na itikemanyĩsya kaũ ĩngĩ.”—Isaia 2:3, 4.

Nĩ kana wĩmanyĩsye mũnango, soma kĩlungu kĩ na kyongo“Ũsumbĩ wa Ngai Ũkeanĩsya Kyaũ?” na ũyĩloela vitio yĩ na kyongoŨsumbĩ wa Ngai Nĩ Kyaũ?