Syo Ngũsĩ sya Yeova Nimwĩtĩkĩlaa Yesũ?

Ĩĩ. Nĩtũmwĩtĩkĩlaa Yesũ nũndũ aisye atĩĩ: “Nyie ninyie nzĩa, na ninyie wʼo, na ninyie thayũ: vai mũndũ wũkaa kwa Asa, atesĩle kwakwa.” (Yoana 14:6) Twĩ na mũĩkĩĩo kana Yesũ nĩwookie kũũ ĩũlũ wa nthĩ kuma ĩtunĩ na aumya thayũ wake ũte na naĩ weethĩwa nthembo ya wovosyo. (Mathayo 20:28) O na nĩtũĩkĩĩaa nũndũ nĩwakwie na athayũũka, ũu nũtumaa wĩthĩa ala mamũĩkĩĩa makakwata thayũ ũtathela. (Yoana 3:16) Ĩngĩ nĩtũĩkĩĩaa kana Yesũ yu nũsumbĩkĩte e Mũsumbĩ wa Ũsumbĩ wa Ngai ĩtunĩ, Ũsumbĩ ũla ũkilyĩ ũnaete mũuo kũũ nthĩ yonthe. (Ũvuanʼyo 11:15) Ĩndĩ, nĩtwĩtĩkĩlaa ndeto ii Yesũ waneenie vala waisye atĩĩ: “Asa nĩ mũnene kwĩ nyie.” (Yoana 14:28) Kwoou, tũimũthaithaa Yesũ nũndũ ti we Ngai Mwene Vinya Wʼonthe.