Mbivilia Yaasya Ata Ĩũlũ wa Andũ ma Ngo syĩ Kĩvathũkanyʼo Kũtwaana?

Ũndũ Mbivilia yaasya

Ngai nĩwĩtĩkĩlasya mũndũũme na mũndũ mũka ma ngo syĩ kĩvathũkanyʼo matwaane nũndũ methonĩ make andũ ma ngo syonthe nĩmeanene. Mbivilia yaĩtye ũũ: “Ngai ti mwendeesya wa andũ . . . , o na ethĩwa nĩ wa mbaĩ yĩva.”—Meko ma Atũmwa 10:34, 35, The Holy Bible in Current Kikamba Language.

Kwoona myolooto ĩngĩ ya Mbivilia ĩkonetye mũtwaano na yonanĩtye kana ngo syonthe nĩsianene.

Ngo syonthe syumĩte vandũ vamwe

Andũ onthe maumie kwa mũndũ wa mbee, Atamu, na mũka wake, Eva, ũla Mbivilia ĩmwĩtaa “inyia wa onthe me thayũ.” (Mwambĩlĩlyo 3:20) Nũndũ wa kĩtumi kĩu, Mbivilia yaĩtye kana Ngai “oombie mbaĩ syonthe sya andũ kuma mũndũnĩ ũmwe.” (Meko ma Atũmwa 17:26) Kwoou andũ onthe nĩ ta mũsyĩ ũmwe o na ethĩwa nĩ ma ũko wĩva. Ĩndĩ nata ethĩwa vala wĩkalaa ngo syĩ kĩvathũkanyʼo nimenanĩte, kana ngo imwe syonaa syĩ sya kĩlasi kwĩ ingĩ?

Andũ oĩ ‘nĩmataanaa’

O na kau Ngai nĩwĩtĩkĩlĩtye mũndũ kũtwaa mũndũ ũte wa ũko wake, ti andũ onthe monaa ũu waĩle. (Isaia 55:8, 9) Ethĩwa wĩsũanĩa kũtwaa mũndũ wa ũko ũngĩ, nĩwaĩle kũneenea maũndũ aa wĩ na ũsu mũkwenda kũtwaana:

• Mũkeekaa ata ĩla mwakwata mathĩna kuma kwa andũ ma ũko, kana ma mũsyĩ waku?

• Mũkatetheesya syana syenyu ata iikethĩwe na kĩmena kya mbaĩ?

‘Kũtaana’ kwa nzĩa ĩno nĩkũtonya kũtetheesya mũtwaano waku ũkaĩla.—Nthimo 13:10; 21:5.