Yo Ndaimoni syĩ Kwʼo?

Ũndũ Mbivilia yaasya

Ĩĩ. Ndaimoni nĩ “alaĩka mavĩtisye,” nĩ syũmbe sya veva ila syaleanile na Ngai. (2 Vetelo 2:4) Mũlaĩka wa mbee kwĩtwʼĩkĩthya ndaimoni aĩ Satani ũla Ndevili, na Mbivilia ĩmwĩtĩte “mũnene wa ndaimoni.”—Mathayo 12:24, 26.

Ũlei wa ĩvinda ya Noa

Mbivilia nĩyĩeleetye ĩũlũ wa alaĩka maleile kũmwĩwʼa Ngai mbee wa ĩla Mbua ya kĩwʼũ kingĩ ya ĩvinda ya Noa: “Ana ma Ngai moona kana eĩtu ma andũ maĩ aseo; na meetwaĩa aka, onthe ala manyuvie.” (Mwambĩlĩlyo 6:2) Alaĩka asu athũku ‘nĩmatiie ũtũo woo ũla wamaĩle’ ĩtunĩ, na moosa mĩĩ ya andũ nĩ kana makome na aka.—Yuta 6.

Ĩla Mbua ĩsu ya kĩwʼũ kingĩ yauwie, alaĩka asu nĩmaumisye mĩĩ ya andũ na masyoka ĩtunĩ. Ĩndĩ, Ngai nĩwamalũngilye. Ta nzĩa ĩmwe ya kũikanyʼa, ndaimoni isu nisiĩĩwe ikaaĩse kwĩyosea mĩĩ ya andũ ĩngĩ.—Aeveso 6:11, 12.