We Ndevili nĩ Kyũmbe?

Ũndũ Mbivilia yaasya

Ĩĩ, Ndevili nĩ kyũmbe. Nĩ kyũmbe kya veva kĩla kyaleile kũmwĩwʼa Ngai na nĩ kyo “mũnene wa nthĩ.” (Yoana 14:30; Aeveso 6:11, 12) Mbivilia nĩvuanasya ũndũ Ndevili ũilyĩ kwa kũmwĩta masyĩtwa aa maatĩĩe:

• Satani, yĩla yonanasya “Mũvĩnganĩsya.”—Yovu 1:6.

• Ndevili, yĩla yonanasya “Mũsukani.”—Ũvuanʼyo

• Nzoka, ĩsyĩtwa yĩtũmĩĩtwe Mbivilianĩ yĩla yonanasya “Mũkengani.”—2 Akolintho 11:3.

• Mũtati.—Mathayo 4:3.

• Mũneeni wa ũvũngũ.—Yoana 8:44.

Ti ũthũku wĩ nthĩnĩ wa mũndũ

Andũ aingĩ monaa Satani ta ũthũku wĩ nthĩnĩ wa mũndũ. Ĩndĩ Mbivilia nĩyonanĩtye kana ve ĩvinda yĩmwe Ngai waneenaa na Satani. Ngai nĩ mũlũngalu vyũ, na kwoou vaitonyeka akethĩwa aneenaa na ũthũku wĩ nthĩnĩ wake. (Kũtũngĩlĩlwa Kwa Mĩao 32:4; Yovu 2:1-6) O ta ũu, Satani nĩwamũtatie Yesũ, na Yesũ ndethĩawa na naĩ. (Mathayo 4:8-10; 1 Yoana 3:5) Kwoou, Mbivilia nĩyonanĩtye kana Ndevili nĩ kyũmbe, ĩndĩ ti ũthũku wĩ nthĩnĩ wa mũndũ.

Yo nĩtwaĩle kũsengʼa nũndũ andũ aingĩ mayĩĩkĩĩaa kana Ndevili nĩ kyũmbe? Aiee, nũndũ Mbivilia nĩyonanĩtye kana Satani atũmĩaa ũvũngũ nĩ kenda eanĩsye wendi wake. (2 Athesalonika 2:9, 10) Nzĩa nene ĩla ũtũmĩaa nĩ kwasya mosũanĩo ma andũ nĩ kana maĩkĩĩe nde vo.—2 Akolintho 4:4.

Maũndũ angĩ mate ma wʼo ĩũlũ wa Ndevili

Ũvũngũ: Lũsiva nĩ ĩsyĩtwa yĩngĩ ya Ndevili.

Kĩla kya wʼo: Nthĩnĩ wa Mbivilia imwe, ndeto ya Kĩevelania ĩla ĩalyũlĩtwe “Lũsiva” yonanasya “ndata ya mũthenya.” (Isaia 14:12) Mĩsoa ĩla ĩthyũlũlũkĩte mũsoa ũsu yonanĩtye kana ndeto “ndata ya mũthenya” nĩ Asumbĩ ma Mbaviloni ĩla Ngai wesaa kũmyananga nũndũ wa ũngʼendu wayo. (Isaia 14:4, 13-20) Ndeto “ndata ya mũthenya” yatũmĩiwe kwondũ wa kũthekeea Asumbĩ asu ĩtina wa Mbaviloni kwanangwa.

Ũvũngũ: Ngai atũmĩaa Satani kũsilĩla andũ.

Kĩla kya wʼo: Ndevili nĩ mũmaitha wa Ngai, ĩndĩ ti mũthũkũmi wake. Satani nũmavĩngaa na akamaneenea ũvũngũ athũkũmi ma Ngai.​—1 Vetelo 5:8; Ũvuanʼyo 12:10.