We Satani Nĩ Ũthũku wĩ Nthĩnĩ Witũ?

Nĩ ũndũ ũtonyeka andũ amwe masoma Mbivilianĩ ĩũlũ wa Satani makasũanĩa kana we nĩ ũthũku wĩ nthĩnĩ witũ. Ĩndĩ kwa w’o ũu nĩw’o Mbivilia ĩmanyĩasya? Kethĩwa ũu nĩ w’o, nĩkĩ Mbivilia yonanasya kana Satani nĩwaneenie na Yesũ Klĩsto na Ngai Mwene Vinya W’onthe? Ekai tũsisye mavinda elĩ weekie ũu.

ĨVINDA YĨLA SATANI WANEENIE NA YESŨ

Ĩla Yesũ wambĩĩie kũtavany’a, Satani nĩwamũtatie mavinda atatũ. Ũtato wa mbee, Satani nĩwatatie kũmũthing’ĩĩsya Yesũ atũmĩe naĩ ũtonyi ũla wanengetwe nĩ Ngai nĩ kana aseũvye kĩmũtũ aye. Kelĩ, Satani endaa Yesũ elikye mũisyonĩ na andũ maimũtaĩa. Na mũthya Satani eeie Yesũ nũkũmũnenga mosumbĩ ma nthĩ onthe ethĩwa nũkũmũthaitha. Mavinda asu onthe Yesũ nĩwatũmĩie Maandĩko kũleana na motato asu.—Mathayo 4:1-11; Luka 4:1-13.

Yesũ aneenaa naũ nthĩnĩ wa motato asu? Aneenaa na ũthũku waĩ nthĩnĩ wake? Kwosana na Maandĩko, Yesũ ‘nĩwatatiwe maũndũnĩ onthe o tondũ tũtatawa, ate na naĩ.’ (Aevelania 4:15) O na ĩngĩ, Mbivilia yaĩtye kana Yesũ ‘ndaaĩka naĩ, o na ũseleke ndwaaoneka kanyw’anĩ wake.’ (1 Vetelo 2:22) Yesũ aendeeie kwĩthĩwa e mwĩanĩu na e mũĩkĩĩku kwa Yeova. Ndaaeka ũndũ o na wĩva mũthũku wĩthĩwe nthĩnĩ wake. Kwoou, no twasye kana Yesũ ndaneenanasya na ũthũku waĩ nthĩnĩ wake, ĩndĩ aneenanasya na kyũmbe kĩ thayũ.

Ũneenany’a ũsu katĩ wa Satani na Yesũ ũĩkĩĩthĩtye nesa vyũ kana Satani nĩ kyũmbe kĩ thayũ.

• Lilikana Ndevili amwĩie Yesũ kana akamũnenga mosumbĩ onthe ma nthĩ ethĩwa akamũthaitha. (Mathayo 4:8, 9) Watho ũsu ndwĩthĩwa waĩ wa w’o takethĩwa Satani ndaĩ kyũmbe kĩ thayũ. O na ĩngĩ, Yesũ ndaalea kana Satani nĩwe waĩ na ũkũmũ ĩũlũ wa mosumbĩ asu.

• Ĩtina wa Yesũ kũleana na matatwa asu, Ndevili ‘nĩwamũtiie kwa ĩvinda.’ (Luka 4:13) Twasũanĩa ndeto isu, no twasye Satani nĩ ũthũku wĩ nthĩnĩ witũ, kana we nĩ mũmaitha wĩthĩawa eyumĩtye na ũtakusaa ngoo mĩtũkĩ?

• Mbivilia yaĩtye kana ‘alaĩka nĩmookie na mamũthũkũma’ Yesũ. (Mathayo 4:11) Mo alaĩka asu mookie kũmwĩkĩa Yesũ vinya na kũmũtetheesya maĩ syũmbe sya w’o sya veva? Ĩĩ vate nzika. Kwoou, no twasye kana o nake Satani nĩ kyũmbe kĩ thayũ kya veva.

ĨVINDA YĨLA SATANI WANEENIE NA NGAI

Ũvoo wa kelĩ ũla tũũneenea nĩĩũlũ wa mũndũ ũmwe wamũkĩaa Ngai weetawa Yovu. Ũvoo ũsu nĩwonanĩtye mavinda elĩ ala Ndevili waneenanisye na Ngai. Mavinda asu elĩ, Ngai nĩwamũkathie Yovu nũndũ wa ũĩkĩĩku wake. Ĩndĩ Satani aisye kana Yovu amũthũkũmaa Ngai e mũĩkĩĩku nũndũ wa moathimo ala wakwataa. Kwoou Satani endaa kwonanany’a kana nĩwe wamwĩsĩ Yovu nesa kwĩ Ngai. Yeova nĩwamũnengie Satani mwanya amũtate Yovu.a Na matatwa asu matumie Yovu asya malĩ, syana, na akwatwa nĩ ũwau mũthũku. Ĩtina wa ĩvinda, nĩvamanyĩkie nesa kana Yeova aneenete w’o ĩũlũ wa Yovu, ĩndĩ Satani aneenete ũvũngũ. Ngai nĩwamũathimie Yovu nũndũ wa ũĩkĩĩku wake.—Yovu 1:6-12; 2:1-7.

Yu no twĩkũlye-ĩ, ‘Ĩla Yeova waneenanasya na Satani, no ethĩwe aneenanasya na ũthũku waĩ nthĩnĩ wake?’ Mbivilia yaĩtye kana “nzĩa ya [Ngai] nĩ mbĩanĩu.” (2 Samueli 22:31) O na ĩngĩ Mbivilia yaĩtye ũũ ĩũlũ wa Ngai: “Mũtheu, mũtheu, mũtheu, nĩ Mwĩaĩi Ngai, Mwene Vinya W’onthe.” (Ũvuan’yo 4:8) Ndeto “mũtheu” yonanasya kĩndũ kĩte kĩvuku, kĩvathĩtwe vaasa na naĩ. Kwoou no twasye kana Yeova nĩ mũtheu nũndũ we ndekaa naĩ, na ndesa kwĩthĩwa na ũthũku nthĩnĩ wake.

O na ũu wĩ o vo, andũ amwe nĩmatonya kwasya Yovu ndaĩ mũndũ wa w’o, na kwoou ũneenany’a ũsu katĩ wa Ngai na Satani ĩũlũ wa Yovu no wano. Ĩndĩ woni ũsu no wĩthĩwe wĩ wa w’o? Mĩsoa ĩngĩ ya Mbivilia nĩyonanasya kana Yovu aĩ mũndũ wa w’o. Kwa ngelekany’o, nthĩnĩ wa Yakovo 5:7-11, Yovu awetetwe ta ngelekany’o ya kũtetheesya Aklĩsto kũmĩĩsya mathĩna na ya kũmalilikany’a kana momĩĩsya, Yeova akamaathima. Yo ngelekany’o ĩsu nĩtonya kũtetheesya Aklĩsto ethĩwa Yovu na mathĩna ala waeteiwe nĩ Satani no ngewa tũ? O na ĩngĩ, nthĩnĩ wa Esekieli 14:14, 20, Yovu nũwetanĩw’e vamwe na aũme angĩ alũngalu ta Noa na Ndanieli. O ũndũ ũmwe na aũme asu, Yovu nĩ mũndũ waĩ vo na waĩ na mũĩkĩĩo. Kwoou, ethĩwa Yovu aĩ mũndũ waĩ vo, no nginya o nake mũmaitha ũla wamũeteie mathĩna akethĩwa e kyũmbe kĩ thayũ.

Kwa w’o, Mbivilia yonanasya kana Satani nĩ kyũmbe kĩ thayũ kya veva. Ĩndĩ no wĩkũlye atĩĩ, ‘Ĩvindanĩ yĩĩ tũĩ Satani no atume nyie na mũsyĩ wakwa twĩka maũndũ mataĩle?’

NAO NATA ĨVINDANĨ YĨĨ YITŨ?

Kwasũanĩa kĩkundi kya ing’endilĩ kĩkalika kĩsionĩ kyenyu. Vate nzika andũ ala mekalaa kĩsionĩ kĩu methĩwa mate na mũuo o na mwĩkalĩle woo wambĩĩa kũthũka. Ve ũndũ ũvw’anene na ũsu ũendeee ĩũlũ wa nthĩ. Satani na ndaimoni syake me kũũ nthĩ. Ndaimoni nĩ syũmbe sya veva ila syamũleile Ngai. Yu no twĩkũlye-ĩ, ‘Maũndũ methĩĩtwe maĩlyĩ ata ĩtina wa Satani na ndaimoni syake kwĩkw’a kũũ nthĩ?’ Kwasũanĩa maũndũ ala wĩw’aa maiwetwa ĩũlũ wa kĩsio kyenyu kana nthĩ ingĩ isesenĩ sya maũvoo.

• We nũkwona ũndũ ũng’endu wongelekete o na kau silikalĩ nitatĩte kũũmina?

• Nĩwonaa ũndũ syĩndũ mbingĩ sya kwĩtanĩthya syonanasya maũndũ ma ũwe o na kau asyai aingĩ nĩmathĩnĩkaa nĩ maũndũ asu?

• Nĩwonete ũndũ nthĩ yĩendeee na kwanangwa o na kau ve andũ mekĩĩte kĩthito kũmĩsũvĩa?

• We nũkwona ta ve kĩndũ kĩthũku mũno kĩendeee kũsukuma andũ meke maũndũ mathũku?

Kwasisya wone ũndũ Mbivilia ĩwetete ĩũlũ wa ũla ũetae mathĩna asu: “Na mũkũnga ũsu mũnene wekw’a nthĩ, naw’o nĩ nzoka ĩla ngũũ, yĩtawa Ndevili, na ĩngĩ Satani, mũkengani wa nthĩ yonthe; ekw’a nthĩ, na alaĩka make mekw’a nthĩ vamwe nake. . . . Woo nĩ wa nthĩ na wa ũkanga: nũndũ ndevili nĩwamũtheeea inyw’ĩ, e na ũthilĩku mũnene, akĩmanya kana e na kavinda o kanini.” (Ũvuan’yo 12:9, 12) Ĩtina wa kũsũanĩa maũndũ asu, andũ aingĩ nĩmetĩkĩlaa kana Satani nĩ kyũmbe kĩthũku kya veva kĩla kĩendeee kũtongoesya andũ naĩ ũmũnthĩ.

Ethĩwa vailyĩ ũu, no wĩkũlye ũtonya kwĩka ata nĩ kana wĩsũvĩane na kyũmbe kĩu. Kwa w’o, ũsu nĩ ũndũ waĩle kũsũanĩwa. Kĩlungu kĩla kĩatĩĩe nĩkĩũtũnenga myolooto ĩtonya kũtũtethya.