Ũtheu Wonanasya Kyaũ?
Ũndũ Mbivilia yaasya
Kwĩthĩwa wĩ mũtheu kwonanasya kwĩvathana na maũndũ mavuku. Ndeto ya Kĩevelania ĩla ĩalyũlĩtwe “ũtheu” yumanĩte na ndeto yonanasya kwĩthĩwa wĩ “mũvathe.” Kwoou, kĩndũ kĩla kĩtheu kĩthĩawa kĩkĩvathe kwondũ wa kũtethya wĩa mũna wĩ wʼoka nũndũ nĩ kĩtheu vyũ.
Ngai nĩ mũtheu mũno kũvĩtũka kĩndũ o na kĩva. Mbivilia yaĩtye atĩĩ: “Vati ũngĩ mũtheu ta Yeova.”a (1 Samueli 2:2) Nũndũ wa kĩtumi kĩu, Ngai nĩwe waĩle kũtũtavya kĩla kĩtheu.
Ndeto “ũtheu” no ĩtũmĩke ũndũnĩ o na wĩva ũmũkonetye Ngai, na mũno mũno maũndũnĩ na kĩndũ o na kĩva kĩvathe kwondũ wa ũthaithi wake. Kwaekai twone maũndũ amwe katĩ wa asu:
Kũndũ kũtheu: Ngai atavisye Mose atĩĩ yĩla waĩ vakuvĩ na kala kakuthu kakanĩte mwaki: “Vau ũũngeme nĩ vandũ vatheu.”—Kuma 3:2-5.
Maũndũ matheu: Aisilaeli ma tene nĩmombanaa mavinda kwa mavinda kwondũ wa kũmũthaitha Yeova, na maũmbano asu meetawa “maũmbano matheu.”—Alivai 23:37.
Syĩndũ ntheu: Mĩio ĩla yatũmĩawa kũmũthaitha Ngai ĩkalũnĩ yĩla yaĩ Yelusaleme yeetawa ‘mĩio mĩtheu.’ (1 Asumbĩ 8:4) Mĩio isu mĩtheu yaĩle kũtũmĩwa kwa nzĩa ya ndaĩa nene, o na kau ndyaaĩle kũthaithwa.b
Yo mũndũ wĩ na naĩ no ethĩwe e mũtheu?
Ĩĩ. Ngai eaĩe Aklĩsto atĩĩ: “No nginya mwĩthĩwe atheu, nũndũ nyie nĩ mũtheu.” (1 Vetelo 1:16) Vate nzika, andũ me naĩ mayĩsa kwĩthĩwa me atheu vyũ ta Ngai. O na vailye ũu, andũ ala maatĩĩaa mĩao mĩlũngalu ya Ngai no methĩwe me ‘atheu na mayĩtĩkĩlĩka kwa Ngai.’ (Alomi 12:1) Mũndũ ũla wĩkĩaa kĩthito ethĩwe e mũtheu onanasya ũu kwa ndeto na meko. Kwa ngelekanyʼo, nĩ ũatĩĩaa ũtao ũũ wĩ Mbivilianĩ ũla waĩtye “mwĩthĩwe mwĩ atheu na mũyĩvathana na ũlaalai,” na ũla waĩtye “ĩthĩwai atheu mwĩkalĩlenĩ wenyu wʼonthe.”—1 Athesalonika 4:3; 1 Vetelo 1:1.
Yo mũndũ no aeke kwĩthĩwa e mũtheu methonĩ ma Ngai?
Ĩĩ. Yĩla mũndũ walea kũatĩĩa myolooto ya Ngai ya ũlũngalu, Ngai ndaendeaa kũmwona e mũndũ mũtheu. Kwa ngelekanyʼo, ĩvuku ya Aevelania yĩla yĩ Mbivilianĩ yaandĩkĩiwe “ana-a-asa atheu,” ĩndĩ nĩmakanĩtye mesũvĩe maikese kwĩthĩwa na “ngoo nthũku ĩte na mũĩkĩĩo nũndũ wa kũmũtia Ngai ũla wĩ thayũ.”—Aevelania 3:1, 12.
Maũndũ mate ma wʼo ĩũlũ wa ũtheu
Ũndũ ũte wa wʼo: Mũndũ ethĩawa e mũtheu kwa kwĩyĩima maũndũ mana.
Ũwʼo: Mbivilia ĩwetete nesa kana “kũthĩnyʼa mwĩĩ,” kana kwĩyĩima maũndũ mana, ‘kũitonya kũtetheesya mũndũ o na vanini’ ethĩwe e mũtheu methonĩ ma Ngai. (Akolosai 2:23) Vandũ va ũu, Ngai endaa tũtanĩe syĩndũ nzeo. Na ũu nĩwʼo nũndũ o nayo Mbivilia yaĩtye “nĩ mũthĩnzĩo wa Ngai kana kĩla mũndũ aye na kũnywʼa, na kũtanĩa ũseo wĩanĩ wake wʼonthe.”—Mũtavanʼya 3:13.
Ũndũ ũte wa wʼo: Kũlea kũtwaana kana kũtwawa nĩkũtumaa mũndũ ethĩwa e mũtheu.
Ũwʼo: Yĩla Aklĩsto matwʼa kwĩkala matatwaanĩte kana mate atwae, kĩu kĩ kyoka kĩyĩsa kũtuma methĩwa me atheu methonĩ ma Ngai. Nĩwʼo kana ala mekala matatwaanĩte kana mate atwae nĩmamũthaithaa Yeova mate kũvĩngĩĩsĩka. (1 Akolintho 7:32-34) O vamwe na ũu, Mbivilia yaĩtye kana o na ala matwaanĩte kana atwae no methĩwe me atheu. Na nĩwʼo nũndũ matũmwa ũmwe wa Yesũ ũla weetawa Vetelo nĩwatwaanĩte.—Mathayo 8:14; 1 Akolintho 9:5.
a Yeova nĩ ĩsyĩtwa ya Ngai mwene. Mĩsoa maana maingĩ ĩla yĩ Mbivilianĩ ĩkonanĩtye ĩsyĩtwa yĩĩ ya Ngai na ndeto “ũtheu.”
b Mbivilia nĩvatanĩte kũthaitha syĩndũ ila syatũmĩawa ũthaithinĩ tene.—1 Akolintho 10:14.