Mũndũũme wa mũika asyaĩĩsye andũ malikĩte Nyũmbanĩ ya Ũsumbĩ

ANDŨ MA MŨIKA MAKŨLASYA

Nĩkĩ Waĩle Kũthi Maũmbano Nyũmbanĩ ya Ũsumbĩ?

Mavinda elĩ kĩla kyumwa Ngũsĩ sya Yeova nĩsiendaa maũmbano nyũmbanĩ syoo sya ũthaithi, ila syĩtawa Nyũmba sya Ũsumbĩ. Nĩ kyaũ kĩendeeaa maũmbanonĩ asu, na ũkatetheka ata wathi?

Nĩ kyaũ kĩendeeaa Nyũmbanĩ ya Ũsumbĩ?

Nyũmbanĩ ya Ũsumbĩ andũ nĩmamanyĩawʼa maũndũ matonya kũmatethya kuma Mbivilianĩ. Maũmbano ala mekĩawa vo nĩmatonya kũũtetheesya:

wĩmanyĩsye ũwʼo ĩũlũ wa Ngai.
ũmanye kĩla kyonanawʼa nĩ maũndũ ala maendeee ũmũnthĩ.
ũtwʼĩke mũndũ mũseango.
wĩthĩwe na anyanya ma wʼo.

We nĩwĩsĩ? Vala Ngũsĩ sya Yeova syũmbanĩaa kwondũ wa ũthaithi vetawa Nyũmba ya Ũsumbĩ, nũndũ Ũsumbĩ wa Ngai nĩwʼo ũneeneawa mũno vo.—Mathayo 6:9, 10; 24:14; Luka 4:43.

Nĩkĩ waĩle kũthi maũmbanonĩ ma Ngũsĩ sya Yeova?

Maũndũ ala mamanyĩawʼa vo no maũtethye. Myolooto ya Mbivilia ĩla ĩneeneawa maũmbanonĩ ma Ngũsĩ sya Yeova no ĩũtetheesye ‘ũkeyosea ũĩ.’ (Nthimo 4:5) Ũndũ ũsu wĩonanyʼa kana Mbivilia no ĩũtetheesye ũkeka motwi maseo thayũnĩ. O na no ĩũtetheesye ũkakwata mosũngĩo ma makũlyo amwe mathĩnasya andũ mũno, ta:

Ii nĩ syongo sya maũvoo amwe ala maumawʼa maũmbanonĩ maitũ mũthyanĩ wa kyumwa:

Nĩkĩ Waĩle Kũtongoewʼa Nĩ Mbivilia?
Ũtonya Kũkwata Ũtethyo Va Mavindanĩ ma Thĩna?
Maũndũ Ala Ũsumbĩ wa Ngai Ũendeee Kwĩka Kwondũ Witũ.

“Kĩmwana kĩmwe twasomaa nakyo nĩkyookie maũmbanonĩ maitũ. Kyekalile vakuvĩ na mũsyĩ witũ, na kwoou twatũmĩa mavuku maitũ vamwe nakyo. Ĩtina, kĩmwana kyu kyandavisye kana nĩkyendeeiwʼe mũno nĩ maelesyo ala andũ maumisye ilungunĩ ila tumasya maelesyo. O na kyambĩie kana kanisanĩ kwoo mayĩthĩawa na mavuku ma kwĩmanyĩsya taitũ.”—Brenda.

We nĩwĩsĩ? Andũ mayĩĩvĩthawʼa mailika maũmbanonĩ maitũ o na nthembo iyosanawʼa.

Ũkeekĩwa vinya mũno watindanyʼa na Ngũsĩ sya Yeova maũmbanonĩ moo. Mbivilia yonanĩtye kana ũndũ ũmwe ũtumaa Aklĩsto mombana vamwe nĩ ‘kũthangaanyʼa.’ (Aevelania 10:24, 25) Kũtindanyʼa na andũ mavĩtasya Ngai mbee vamwe na mavata ma ala angĩ nĩkũtũthangaasya mũno, o na kau tũtwĩe nthĩ yusĩe andũ meyendete mo ene.

“Ĩtina wa kũthũkũma mũthenya mũima nĩndonya kwĩwʼa nĩnoete mũno na nĩkwʼĩte ngoo, ĩndĩ nathi maũmbano Nyũmbanĩ ya Ũsumbĩ nĩnĩwʼaa neekĩwa vinya mũno. O na nĩ nzĩanĩ numĩte maũmbanonĩ, nĩwʼaa nĩ mũtanu mũno na nĩ na vinya wa kũendeea na mbee.”—Elisa.

We nĩwĩsĩ? Ĩũlũ wa nthĩ, ve ikundi sya Ngũsĩ sya Yeova mbee wa 120,000 ila syĩkĩaa maũmbano isionĩ mbee wa 60,000. Kĩla mwaka Nyũmba sya Ũsumbĩ ta 1,500 nĩsyakawa, nũndũ ũtalo wa ala mokaa maũmbanonĩ maitũ ũendeee kwongeleka mũno.a

Kĩla andũ angĩ ma mũika maasya

“Yĩla naĩ sekondalĩ, kelĩtu kamwe twasomaa nako nĩkookie maũmbanonĩ maitũ mavinda meana ũna, na kendeeiwʼe mũno kwona andũ ma yĩika yĩ kĩvathũkanyʼo mayĩmanyĩsya Mbivilia me vamwe. O mĩtũkĩ mbosi wakwa nũnookie ũmbanonĩ witũ, na asengʼa mũno kwona ũndũ tũtũmĩaa Mbivilia kaingĩ tũimanyĩsya. Kwona ũndũ wendeeiwʼe nĩ maũmbano maitũ kwatumie o nakwa nĩmenda mũnango!”—Jessica.

“Nĩnonete kana maũmbano nĩmatumaa nĩeka kwĩmakĩa mũno nũndũ wa mathĩna ala ngomanaa namo kĩla mũthenya. Nĩtwĩmanyĩasya ũndũ tũtonya kwĩthĩwa twĩ eanĩe thayũnĩ, ũndũ tũtonya kwĩthĩwa andũ aseango, na maũndũ angĩ maingĩ. Kĩla ĩvinda numaa Nyũmbanĩ ya Ũsumbĩ ndyĩwʼa nĩmwĩkĩe vinya na nĩmũkiakisye mũno.”—Timothy.

“Mũndũũme ũmwe namũthokisye maũmbanonĩ maitũ aisye ũũ ĩtina wa maũmbano: ‘Nyie nũkie none vala ndonya kumanyʼa momanyĩsyo menyu. Ĩndĩ yu nĩona maũndũ ala nyie nĩĩkĩĩe nĩmo ma ũvũngũ!’ Nĩwendeeiwʼe mũno kwona ũndũ Ngũsĩ sya Yeova syĩthĩawa na wendo. Ongeleeile kwasya atĩĩ: ‘O na kau no ĩndĩ nĩmanyanie nenyu, mũnguie ta tũtwĩe twĩsene myaka mingĩ!’”—Jacob.

“Mavinda amwe nathi maũmbanonĩ, nĩsũanĩaa kana maũmbano mathela oou nĩĩka kumaala nĩnũkĩte. Ĩndĩ ũmbano ũendeee, o na ndimanyaa kũla woni ũsu wakwa ũthelelaa. Ũmbano wathela, nambĩĩaa kũea ngewa na andũ ala angĩ na ũyĩthĩa o na ndikũelewa nĩkĩ nĩĩ na woni ta ũla nĩĩ nawʼo mbeenĩ. Keka ti kũthi maũmbanonĩ, ndyĩsa kwĩthĩwa na anyanya aseo ta ala nĩ namo oyu.”—Madison.

a Nĩ kana ũmanye vala Ngũsĩ syũmbanĩaa vakuvĩ na kĩsio kyenyu, lika kĩsesenĩ kitũ vala vaandĩkĩtwe “Maũmbano ma Kĩkundi ma Ngũsĩ sya Yeova” na ũivinyĩĩa vala vaandĩkĩtwe “Mantha Vandũ Vakuvĩ na Vala Wĩkalaa.”