Nthimo 16:3—“Mwiĩe MWĨAĨI Mawĩa Maku”

“Mwiĩe Yeova mawĩa maku, na mosũanĩa maku makalũlũmĩlwʼa.”—Nthimo 16:3, The Bible in Kikamba, 1974.

“Mwiĩe MWĨAĨI mawĩa maku, na mĩvango yaku ĩkaaĩla.”—Nthimo 16:3, New International Version.

Kĩla Ĩandĩko ya Nthimo 16:3 Yonanasya

Nthimo ĩno yĩĩkĩĩthasya ala mamũthaithaa Ngai wa wʼo kana mĩvango yoo ĩkaaĩlaa ethĩwa makamwĩkwatasya kwa kũmũmantha, na kwĩtĩkĩla amatongoesye.

“Mwiĩe Yeova mawĩa maku.” Matanamba kwĩka motwi, athaithi ma Yeovaa nĩmamũvoyaa menyivĩtye nĩ kana amatongoesye. (Yakovo 1:5) Nĩkĩ? Ũndũ ũmwe nĩ kana, mavinda maingĩ andũ mayĩthĩawa na ũtonyi wa kũsiĩĩa maũndũ ala mamakwataa thayũnĩ. (Mũtavanʼya 9:11; Yakovo 4:13-15) Kwongela ũu, no methĩwe mate na ũĩ wa kwĩanĩsya mĩvango yoo. Nũndũ wa itumi isu, aingĩ nĩmamwiĩaa kana kũmũnenga Ngai mavata moo. Mekaa ũu kwa kũmũvoya amatongoesye na kwĩka kwosana na kwenda kwake, o tondũ Ndeto yake Mbivilia ĩwetete.—Nthimo 3:5, 6; 2 Timotheo 3:16, 17.

Ndeto “mwiĩe MWĨAĨIb mawĩa maku” syaalyũlwa ĩmwe kwa ĩmwe syonanasya “kũmũnenga MWĨAĨI mawĩa maku.” Kwosana na ĩvuku yĩmwe, ndeto isu syonanasya “mũndũ ũkwaũa mũio na ayaĩkya mũndũ ũngĩ wĩ na vinya, na ũtonya kũũkua nesanga.” Ala mamwĩkwatasya Ngai menyivĩtye, no maĩkĩĩe vyũ kana akamatetheeasya na kũmatwʼĩĩka.—Savuli 37:5; 55:22.

Ndeto “mawĩa maku” iyonanasya kana Ngai akeetĩkĩlaa, kana akaathimaa mĩvango yonthe ĩla andũ matonya kwĩthĩwa nayo. Nĩ kana Yeova amaathime, no nginya mĩvango yoo yĩthĩwe yosanĩte na myolooto yake na kwenda kwake. (Savuli 127:1; 1 Yoana 5:14) Ngai ndesa kũathima andũ mate ewi. Vate nzika, “nzĩa ya ala athũku nũkulumanasya.” (Savuli 146:9) Na ĩvindanĩ o yĩu, nũmatetheeasya ala mamwĩnyivĩasya kwa kũnenga ndaĩa myolooto yake ĩla yĩ Mbivilianĩ.—Savuli 37:23.

“Na mosũanĩa maku makalũlũmĩlwʼa.” Mbivilia imwe ialyũlĩte ndeto isu ta, “mĩvango yaku ĩkalũlũmĩĩlwʼa.” Maandĩkonĩ ma Kĩevelania, kana ala kaingĩ metawa Ũtianĩo Mũkũũ, ndeto ĩla ĩalyũlĩtwe “ĩkalũlũmĩĩlwʼa”, yonanasya kwambĩĩsya mũsingi, na mavinda maingĩ yĩthĩawa ĩiweta ũndũ syĩndũ ila Ngai woombie ilũlũmĩĩlwʼe. (Nthimo 3:19; Yelemia 10:12) O ta ũu, Ngai akalũlũmĩĩlya mĩvango ya ala mekaa kĩla kyaĩle methonĩ make, na aimatetheesya methĩwe na thayũ wĩ na mũuo na ũtanu mwingangĩ.—Savuli 20:4; Nthimo 12:3.

Mĩsoa Ĩla Ĩthyũlũlũkĩte Nthimo 16:3

Nthimo ĩno yaandĩkiwe nĩ Mũsumbĩ Solomoni, ũla nĩwe waandĩkie kĩlungu kĩnene kya ĩvuku ya Nthimo. Aĩ na ũtonyi wa kũneena nthimo ngili mbingĩ nũndũ wa ũĩ ũla wanengetwe nĩ Ngai.—1 Asumbĩ 4:29, 32; 10:23, 24.

Kĩlungunĩ kya 16, Solomoni ambĩĩe kwa kũtaĩa ũĩ wa Ngai, na akonanyʼa ũndũ Ngai ũmenete mũno wĩana ala mekathĩĩaa. (Nthimo 16:1-5) Na ĩndĩ kĩlungu kĩu nĩkĩtetheesye mũsomi kũelewa ũwʼo ũũ wa vata ũtũngĩlĩĩlwe mũno ĩvukunĩ ya Nthimo. Nawʼo nĩ kana, andũ no methĩwe me oĩ na makaendeea nesa, o yĩla meethĩwa na wĩnyivyo na meetĩkĩla kũtongoewʼa nĩ Ngai. (Nthimo 16:3, 6-8, 18-23) Ũwʼo ũsu wa vata ũtũngĩlĩĩlwe mavinda maingĩ Mbivilianĩ.—Savuli 1:1-3; Isaia 26:3; Yelemia 17:7, 8; 1 Yoana 3:22.

Ĩloele vitio ĩĩ nguvĩ wone maelesyo makuvĩ ma ĩvuku ya Nthimo.