MĨSOA YA MBIVILIA ĨELEETWʼE
Nthimo 17:17—“Mũnyanya Nĩwendanaa Mavinda Onthe”
“Mũnyanya nĩwendanaa ĩndĩ yonthe; na mwana-a-ĩthe asyaiwe kwondũ wa kũthĩnũkasya.”—Nthimo 17:17, The Bible in Kikamba, 1974.
“Mũnyanya nĩwendanaa mavinda onthe, na mwana-a-ĩthe asyaawa kwondũ wa ĩvinda ya thĩna.”—Nthimo 17:17, New International Version.
Kĩla Ĩandĩko ya Nthimo 17:17 Yonanasya
Anyanya ma wʼo methĩawa me ma kwĩkwatwʼa na me ma kũĩkĩĩka. O ta andũ masyaanĩwʼe, methĩawa malũmanĩtye na nĩmathĩnĩkĩanaa, na mũno mũno mavindanĩ ma thĩna.
“Mũnyanya nĩwendanaa ĩndĩ yonthe.” O na ĩngĩ ndeto isu no syonanyʼe kana “anyanya monanasya wendo mavinda onthe.” Ndeto ya Kĩevelania ĩla ĩtũmĩĩtwe kwonanyʼa “wendo” mũsoanĩ ũũ ĩkonetye maũndũ maingĩ eka o ũndũ mũndũ ũkwĩwʼa. Nĩ wendo wa wʼo ũla mũndũ wonasya ũngĩ kwĩsĩla meko. (1 Akolintho 13:4-7) Anyanya ala methĩawa mendanĩte kwa nzĩa ĩsu nĩmalũmanasya o na yĩla ndũũ yoo yalika mathĩna, ta yĩla malea kũeleanwa kana makwatwa no mathĩna angĩ. O na nĩmaekeanĩaa kuma ngoonĩ. (Nthimo 10:12) Na mũnyanya ta ũsu ndewʼĩaa ũla ũngĩ kĩwĩu yĩla maũndũ make mathi nesa. Vandũ va ũu, nũtanaa vamwe na mũnyanyae.—Alomi 12:15.
‘Mũnyanya nĩ mwana-a-ĩthe wasyaiwe kwondũ wa kũthĩnũkasya.ʼ Nthimo ĩsu yĩonanyʼa kana andũ masyaanĩwʼe no methĩwe na ngwatanĩo ya vakuvĩ. Kwoou yĩla tweeka kyonthe kĩla tũtonya tũtetheesye mũnyanya wĩ na mathĩna, twĩthĩawa tũyĩka o tondũ mwana-a-ĩthe wa mũndũ ũtonya kwĩka. O na ĩngĩ, ndũũ ya anyanya asu ndĩminawa nĩ matatwa. Vandũ va ũu, ndũũ yoo nĩlũlũmĩĩlaa nũndũ yĩla makwatwa nĩ mathĩna nĩmaendeeaa kwĩthĩwa mendanĩte na manenganĩte ndaĩa.
Mĩsoa Ĩla Ĩthyũlũlũkĩte Nthimo 17:17
Ĩvuku ya Nthimo yĩ na maũndũ maingĩ maandĩkĩtwe kwa ũĩ na yĩandĩkĩwe o kwa ũkuvĩ na kwa nzĩa ĩtonya kũtuma ũla ũkũsoma asũanĩa. Mũsumbĩ Solomoni nĩwe waandĩkie maũndũ maingĩ ala me ĩvukunĩ yĩĩ. Nzĩa yake ya kũandĩka yĩilye ũndũ voemu sya Kĩevelania syaandĩkawa. Vandũ va kũtũmĩa ndeto itutenyʼe, kũndũ kũmwe atũmĩie maũndũ mekwosana na kũngĩ atũmĩa maũndũ mavĩtũũkene. Nthimo 17:17 nĩ ngelekanyʼo ya voemu ĩkwosana. Kĩlungu kya kelĩ kya mũsoa ũsu kĩkwatĩte mbau ũvoo ũla wĩ kĩlungunĩ kya mbee na kĩkaeleangya mũnango. Nayo Nthimo 18:24 nĩ ngelekanyʼo ya maũndũ mavĩtũũkene nũndũ kĩlungu kya mbee kĩikwosana na kĩlungu kya kelĩ kya mũsoa ũsu. “Ũla ũtumaa ndũũ na andũ aingĩ ekaa ũu ũndũ wa wanangĩko wake mwene; ĩndĩ ve mũnyanya ũla ũlũmanasya mũno kwĩ mwana-a-inyia.”
Yĩla Solomoni waandĩkaa Nthimo 17:17, nĩvatonyeka akethĩwa asũanĩaa ĩũlũ wa ndũũ ngamu ĩla yaĩ vo katĩ wa ĩthe wake, Ndaviti, na Yonathani mwana wa Mũsumbĩ Saulo. (1 Samueli 13:16; 18:1; 19:1-3; 20:30-34, 41, 42; 23:16-18) O na kau Ndaviti na Yonathani mayasyaanĩwʼe, maĩ ndũũ mũno kwĩ andũ masyaanĩwʼe. O na Yonathani nĩweeyumĩtye akwʼe nĩ kana asũvĩe mũnyanyae.a
Ũndũ Mbivilia Ingĩ Ialyũlĩte Nthimo 17:17
“Mũnyanya nĩwendanaa mavinda onthe, na atwʼĩkaa mwana-a-ĩthe mavindanĩ ma thĩna.”—The Bible in Basic English.
“Mavinda onthe mũnyanya ethĩawa e mũnyanya, nĩ mwana-a-ĩthe ũsyaĩtwe kwondũ wa kũtetheesya thĩnanĩ.”—The Moffatt Translation of the Bible.
“Mũnyanya onanasya kana nĩwendete mũnyanyae mavinda onthe, na nĩ mwana-a-ĩthe ũsyaĩtwe kwondũ wa kũtetheesya mavindanĩ ma thĩna.”—The Complete Jewish Study Bible.
Ĩloele vitio ĩĩ nguvĩ wone maelesyo makuvĩ ma ĩvuku ya Nthimo.
a Sisya kĩlungu kĩ na kyongo “Ngoo ya Yonathani Yakwatana na Ngoo ya Ndaviti.”