Kĩsese kya Satellite kya JW Nĩkĩkwataa Kũla Kũte Indaneti

Kĩla mwei nĩtwĩthĩawa tweteele mũno vitio sya maũndũ ma kĩ-veva ila syumawʼa nthĩnĩ wa JW Broadcasting. O na vailye ũu, ana-a-asa maitũ aingĩ ma Africa mayĩthĩawa matonya kũkwata syĩndũ isu Indanetinĩ. Nĩkĩ?

Nthĩ mbingĩ sya Africa iyĩthĩawa na Indaneti. Na vala ve Indaneti, wĩthĩaa ndĩũkwata nesa kana ũkethĩa yĩtũmĩa mbesa mbingĩ. Kwa ngelekanyʼo, ve ĩvinda yĩmwe mũsyaĩĩsya ũmwe wa mũthyũlũlũko wa nthĩ ya Madagascar waendie vandũ ve Indaneti aumye vitio ya kĩla mwei ya JW Broadcasting. Aĩvĩthiwʼe ndola 16 sya Amelika, ila nĩ mbingĩ kwĩ mũsaala wa kyumwa kĩmwe wa andũ amwe!

Ĩndĩ andũ milioni mbingĩ Africa yu nĩmatanĩaa kwĩloela JW Broadcasting mateũtũmĩa Indaneti. Ũu ũtonyekete ata?

Kuma 2017, JW Broadcasting nĩyĩthĩĩtwe ĩtonya kũvikĩa andũ ala mekalaa nthĩ sya Africa ila syĩ ĩtheo wa Sahara kwĩsĩla kĩsese kya televiseni kĩtũmĩaa satellite. Methĩawa matonya kwĩloela kĩsese kĩu masaa 24 kĩla mũthenya, na kwa ithyomo 16, vate ndĩvi.

Nĩ kenda Ngũsĩ sya Yeova ianĩsye ũndũ ũsu, nĩsyĩwʼanaa na kĩsese kĩmwe kya televiseni kyonanyʼe vitio sitũ kwĩsĩla satellite. Isionĩ ila syĩ ngalĩko ya ĩtheo ya Sahara, satellite ĩsu ĩtũmĩkaa nthĩ 35. Ngalama ya kwĩka ũu yĩthĩawa ndola sya Amelika mbee wa 12,000, kĩla mwei. O na ĩngĩ, mavinda kwa mavinda, ve mbesa ingĩ syendekaa nĩ kenda maũndũ ala maendeee ma Ngũsĩ matangaaswe ĩmwe kwa ĩmwe kwĩsĩla kĩsese kĩngĩ kya televiseni. Ũu nũtumaa andũ ngili mbingĩ matanĩa maũmbano manene kana vulongulamu sya mwanya ila syĩthĩawa yĩla ana-a-asa matũmwa mathokee movisi ma ũvonge.

Andũ aingĩ, o na ala mate Ngũsĩ, nĩmeloelaa kĩsese kya satellite kya JW kwĩsĩla televiseni me mĩsyĩ kwoo. Ĩndĩ, ana-a-asa amwe maitũ maitonya kũthooa syĩndũ ila syendekaa nĩ kana meloele. Nĩ kana matetheewʼe, Nyũmba sya Ũsumbĩ mbee wa 3,670 nĩsyĩkĩĩtwe ĩsaani ya kwosa satellite nĩ kenda wĩthĩe ana-a-asa na eĩtu-a-asa no meloele Broadcasting me vau. Ethĩwa Nyũmba ya Ũsumbĩ yĩ televiseni kana projector, ngalama ya kũthooa ĩsaani yĩu vamwe na kũyĩete yĩthĩawa vakuvĩ ndola sya Amelika 70. Ĩndĩ ethĩwa vai televiseni kana projector, ngalama no ĩvike ndola 530.

Ana-a-asa na eĩtu-a-asa maitũ nĩmatũngaa mũvea mũno nũndũ wa kĩsese kĩu. Mũtumĩa ũmwe wa kĩkundi wa nthĩ ya Cameroon aĩtye atĩĩ: “Mũsyĩ witũ wĩwʼaa ta wanengwa mana wĩ weũnĩ.” Nake mwana-a-asa wĩtawa Odebode, kuma Nigeria, aĩtye: “Mũsyĩ witũ wʼonthe nĩwĩloelaa kĩsese kĩu katatũ kwa kyumwa. Ĩvinda yonthe syana syakwa syĩthĩawa syeteele mũno kwĩka ũu. O na mavinda amwe, nikũlasya tũkĩvingũe.” Nake Rose kuma Nigeria aĩtye atĩĩ: “Mwa no nasye kana kĩsese kya satellite kya JW nĩkĩtumĩte nĩeka kwendeewʼa mũno nĩ kwĩloela isese sya maũvoo. Yĩla natindĩaa kwĩloela maũvoo asu, nĩmanthatasya na mĩtũkĩ na ũu ũituma nthakame yakwa yambata. Ĩndĩ JW Broadcasting yĩthĩawa na maũndũ ma kwaka na matheu! Nĩkyo kĩsese kĩla nendete vyũ. Ũsu nĩ ũathimo mũnene mũno kuma kwa Yeova.”

Mũsyaĩĩsya ũmwe wa mũthyũlũlũko nthĩ ya Mozambique aĩtye kana nthĩnĩ wa mũthyũlũlũko wake, Nyũmba sya Ũsumbĩ nĩsyĩkĩĩtwe ĩsaani yĩu ya satellite. Ana-a-asa na eĩtu-a-asa ikundinĩ nĩmavikaa ĩsaa yĩmwe kana mbeange ũmbano ũtanamba kwambĩĩa nĩ kenda meloele JW Broadcasting kwĩsĩla satellite.

Nthĩnĩ wa ũmbano wa nthĩ mbingĩ ũla weekiwe Johannesburg, South Africa, mwaka wa 2019, kĩsese kĩu kya satellite nĩkyatũmĩiwe kwonanyʼa maũvoo ma vata isionĩ kenda, o vamwe na ala maumawʼa nĩ mwana-a-asa wa Nzama Ĩla Ĩtongoesye. Sphumelele, ũla wĩthĩawa mũvĩanĩ wa kũũngamĩa maũndũ ma wasya na vitio ovisinĩ wa ũvonge wa South Africa, aĩtye: “Navu ĩtina yaĩ no nginya tũtũmĩe Indaneti kwonanyʼa maũvoo asu. Ĩndĩ kwĩka ũu kwendaa Indaneti nzeo na kwĩ ngalama nene. Kĩsese kya satellite kya JW kĩyendaa ngalama mbingĩ na kĩyĩthĩawa na mathĩna.”

Nũndũ wa mĩvothi ya ũlau ĩla wumasya kwondũ wa wĩa wa nthĩ yonthe, ana-a-asa na eĩtu-a-asa aingĩ ma Africa nĩmeloelaa JW Broadcasting kwĩsĩla satellite. Nĩtũũkũtũngĩa mũvea mũno kwondũ wa mĩvothi ĩla wumasya kwĩsĩla nzĩa syĩ kĩvathũkanyʼo ila syĩ nthĩnĩ wa donate.jw.org.