ANDŨ MA MŨIKA MAKŨLASYA
Mbivilia Ĩtonya Kũndethya Ata?—Kĩlungu kya 2: Ũndũ Ũtonya Kwĩka Nĩ Kana Ũtanĩe Kũsoma Mbivilia
Mwanake wa mũika wĩtawa Will aĩtye, “No wĩwʼe kũsoma Mbivilia kũikũnosya ethĩwa ndwĩsĩ ũndũ waĩle kũmĩsoma.”
No wende kũmanya ũndũ ũtonya kwĩka nĩ kana ũtanĩe kũsoma Mbivilia? Ũvoo ũla wĩ kĩlungunĩ kĩĩ nũũkũtetheesya.
Ĩmanyĩsye kwa nzĩa ĩkũtuma wĩwʼa mũyo wa kĩla ũũsoma
Ĩlikye ngewanĩ ĩla ũũsoma. No wĩke ũu kwa nzĩa ii:
Nyuva ngewa yĩ Mbivilianĩ ĩla ũkwenda kwĩmanyĩsya. No ũnyuve ũndũ mũna weekĩkie ũwetetwe Mbivilianĩ kana kĩlungu kĩna kĩ nthĩnĩ wa ala Mavuku ma Ũvoo Mũseo. O na no ũvange kwĩthukĩĩsya ndulama ĩmwe ya Mbivilia ya kũsoma katĩ wa ila syĩ nthĩnĩ wa jw.org.
Soma ngewa ĩla wanyuva. No ũsome wĩ weka kana ũkavanga mũsome na wasya wĩ na anyanyau kana andũ ma mũsyĩ. Mũndũ ũmwe no asome tawe mũelesya na ala angĩ maisoma mayumanĩsya ndeto sya andũ angĩ ala maneenete.
Tata wĩke ũndũ ũmwe kana o maũndũ meana ũna katĩ wa aa monanĩtwʼe vaa ĩtheo:
Sola visa ikwonanyʼa kĩla ũũsoma. Ethĩwa ti ũu, no ũsole tũvisa twingĩ tũnini twonanĩtye ũndũ maũndũ ala ũũsoma maatĩanĩe. Ũtee wa kĩla kavisa, andĩka maelesyo makuvĩ ma kĩla kĩendeee.
Seũvya mĩsolo ta kyati, masandũkũ, kana syĩndũ ingĩ ta isu. Kwa ngelekanyʼo, ethĩwa wĩsoma ĩũlũ wa mũthũkũmi wa Ngai waĩ mũĩkĩĩku, no ũseũvye mũsolo wonanĩtye nguma ila waĩ nasyo, meko make, na moathimo ala wakwatie.
Vĩndũa ngewa ĩsu ũũsoma ũmĩtwʼĩkĩthye livoti ya maũvoo. Ũinengane livoti yaku, elesya ngewa ĩsu kwa nzĩa syĩ kĩvathũkanyʼo, na ndũkolwe nĩ kũseũvya ũneenanyʼa vamwe na andũ ala mawetetwe ngewanĩ ĩsu kana andũ angĩ matonya kwĩthĩwa meeyoneie maũndũ ala mawetetwe.
Ethĩwa mũndũ ũmwe ũeleetwʼe ngewanĩ ĩsu eekie ũtwi mũthũku, sũanĩa ũndũ waĩ atonya kwĩka nĩ kana eke ũtwi mũseo. Kwa ngelekanyʼo, twasye nĩ ngewa ya Vetelo yĩla wamũkaĩie Yesũ. (Maliko 14:66-72) No wĩkũlye, ‘We Vetelo aĩ atonya kwĩka ata nĩ kana ndakamũkaĩe Yesũ?’
Na weewʼa ta ũtonya, tũmĩa ngewa ĩla wasoma Mbivilianĩ kũseũvya ndeto na ũvoo ũtonya kũtũmĩwa nĩ athaũki ma sinema mekwonanyʼa kĩla kyaendeee ngewanĩ ĩsu. Na ndũkolwe nĩ kũelesya maũndũ ala mũndũ ũtonya kwĩmanyĩsya kuma ngewanĩ ĩsu.—Alomi 15:4.
No ũtanĩe kwĩmanyĩsya Mbivilia
Ĩnzĩĩa mũnango!
Wenzĩĩa ngewa ĩla ũũsoma mũnango, nũtonya kũmanya maũndũ angĩ ma vata mũno mevithanĩtye ngewanĩ ĩsu. O na mavinda amwe, no wĩthĩe ve ndeto o ĩmwe kana ilĩ itũmĩĩtwe ngewanĩ ĩsu ikuĩte maũndũ maingĩ mũno.
Kwa ngelekanyʼo, no ũsome Mathayo 28:7 na ũisianĩsya na Maliko 16:7.
Nĩkĩ Maliko wawetanĩisye amanyĩwʼa vamwe “na Vetelo” yĩla wawetaa kana Yesũ nũkũmaumĩlĩla ĩtina wa ĩvinda ĩkuvĩ?
Kaũndũ katonya kũũtetheesya: Maliko ndaaĩyonea maũndũ asu ũandĩkĩte; Veonekana Vetelo nĩwe wamũeleisye.
Ũndũ wa vata wĩvithanĩtye: Nĩkĩ Vetelo ũtonya kwĩthĩwa eekĩiwe vinya kũmanya kana Yesũ nũkwenda kũmwona ĩngĩ? (Maliko 14:66-72) Yesũ oonanisye ata kana aĩ mũnyanya wa wʼo wa Vetelo? Tũtonya kwĩthĩwa anyanya ma wʼo ata o ta Yesũ?
Weemanyĩsya Maandĩko kwa nzĩa ĩkũtuma wĩwʼa mũyo wa kĩla ũũsoma na ũitataa kwĩnzĩĩa maũndũ angĩ me vo, ũkatanĩaa mũnango kũsoma Mbivilia!