Kwĩmanyĩsya Mbivilia nĩkũetae moathimo maingĩ mũno. Ĩndĩ o na vailye ũu, kũyĩthĩawa kwĩ laisi mavinda onthe. Mavinda amwe, nũtonya kwĩwʼa ta ũtetonya kũendeea kwĩmanyĩsya Mbivilia. Ĩndĩ nĩkĩ nĩ ũndũ wa vata kwĩkĩa kĩthito ũendeee kwĩmanyĩsya? Nĩ kyaũ kĩtonya ũkũtetheesya ũendeee kũmĩĩsya o na wakomana na mawetu?

1. Nĩkĩ nĩ ũndũ wa vata kwĩmanyĩsya Mbivilia?

“Ndeto ya Ngai yĩ thayũ na yĩ ũtonyi.” (Aevelania 4:12) Mbivilia nĩ ya vata mũno nũndũ nĩkũtavasya mosũanĩo ma Ngai na ũndũ ũkwendete. Nĩkũtetheeasya wĩthĩwe na ũmanyi, ũĩ wa wʼo, na wĩkwatyo. Na ũndũ ũla wa vata vyũ, Mbivilia nĩkũtetheeasya wĩthĩwe mũnyanya wa Yeova. Yĩla weemanyĩsya Mbivilia, wĩthĩawa weetĩkĩlya ũtonyi wayo ũũtetheesye thayũnĩ waku.

2. Nĩkĩ waĩle kwĩkalaa ũlilikene vata wa ũwʼo ũla wĩ Mbivilianĩ?

No tũelekanyʼe ũwʼo ũla wĩ Mbivilianĩ na ũthwii wa vata mũno. Na nĩkyo kĩtumi Mbivilia ĩtwĩkĩĩte vinya ĩkatwĩa atĩĩ: “Thooa wʼo, na ndũkothoosye.” (Nthimo 23:23) Yĩla twekala tũlilikene vata wa ũwʼo ũla wĩ Mbivilianĩ, tũkekĩaa kĩthito tũendeee kwĩmanyĩsya o na yĩla twakomana na mawetu.—Soma Nthimo 2:4, 5.

3. Yeova atonya ũkũtetheesya ata ũendeee kwĩmanyĩsya?

Nũndũ Yeova nĩ Ngai Mwene Vinya Wʼonthe, nĩ Mũmbi waku, na nĩ Mũnyanyau, nũkwenda kũũtetheesya nĩ kana ũendeee kwĩmanyĩsya ĩũlũ wake. Nũtonya kũũnenga “wendi na ũtonyi” wa kũendeea kwĩmanyĩsya. (Soma Avilivi 2:13.) Kwoou, ethĩwa mavinda amwe ũkewʼaa ũyenda kũthangaawʼa ũendeee kwĩmanyĩsya, kana ũatĩĩe kĩla weemanyĩsya, e vo nĩ kana aũtetheesye. O na yĩla wenda vinya mwingangĩ wa kũsinda matatwa ala ũkomanaa namo kana ũvĩnganĩsya, akaũnengae vinya ũsu. Kwoou, mũvoyae Yeova kĩla ĩvinda aũtetheesye ũendeee kwĩmanyĩsya Mbivilia.—1 Athesalonika 5:17.

ĨMANYĨSYE MŨNANGO

4. Onaa kwĩmanyĩsya Mbivilia wĩ ũndũ wa vata thayũnĩ waku

Mavinda amwe nĩtũtonya kũkwatana mũno ũkethĩa ti ta twĩ na ĩvinda yĩanĩtye ya kũsoma Mbivilia. Nĩ kyaũ kĩtonya kũtũtetheesya? Somai Avilivi 1:10, na ĩndĩ mũineenea makũlyo aa:

• We wĩona amwe ma “maũndũ ala ma vata” thayũnĩ nĩ ta meva?

• Ũtonya kwonanyʼa ata kana kwĩmanyĩsya Mbivilia nĩ ũndũ wa vata thayũnĩ waku?

1. Ũkosa ndoo na ũyĩkĩa kĩthangathĩ na ĩndĩ ũitata kwĩkĩa mavia vo, mavia asu mayĩsa kwĩanĩa

2. Ĩndĩ ũkamba kwĩkĩa mavia mbee, wĩthĩa ve na mwanya wa kwongela kĩthangathĩ kingĩ. O ta ũu, waiaa mbee “maũndũ ala ma vata” thayũnĩ waku, ũkethĩawa na vinya wa kũmeanĩsya, na ĩvindanĩ o yĩu ũyĩthĩwa na ĩvinda yĩanĩtye ya kwĩkaa maũndũ ala angĩ

Kwĩmanyĩsya Mbivilia nĩkũtumaa twĩanĩsya nzaa yitũ ya kĩ-veva, ĩla nĩ vata ũla twĩthĩawa nawʼo wa kũmũmanya, na kũmũthaitha Ngai. Somai Mathayo 5:3, na ĩndĩ mũineenea ĩkũlyo yĩĩ:

• Tũtonya kũtetheka ata ethĩwa tũkonaa kwĩmanyĩsya Mbivilia wĩ ũndũ wa vata thayũnĩ witũ?

5. Endeea kũmĩĩsya o na yĩla wavĩngwa

VITIO: Nĩmaathimiwe Nũndũ wa Kũmĩĩsya (5:22)

• Kwosana na ũndũ twoona vitionĩ, anyanyae ma Francesco na andũ make ma mũsyĩ, meekie ata yĩla wamatavisye kĩla weemanyĩasya?

• Aathimiwe ata nũndũ wa kũmĩĩsya?

Somai 2 Timotheo 2:24, 25, na ĩndĩ mũineenea makũlyo aa:

• Anyanya na andũ maku ma mũsyĩ maasya ata ĩũlũ wa maũndũ ala wĩmanyĩasya?

• Kwosana na mĩsoa ĩno, ũtonya kwĩka ata yĩla andũ angĩ mathata nĩkwĩthĩwa ũendeee kwĩmanyĩsya Mbivilia? Nĩkĩ wasũngĩa ũu?

6. Mwĩkwatye Yeova aũtetheesye

VITIO: Yeova Nũtũtetheeasya Kwĩka Moalyũku (3:56)

• Kwosana na vitio ĩsu, Jim eekie moalyũku meva nĩ kana amwendeesye Yeova?

• Nĩ kyaũ kyakwendeesya mũno wasũanĩa ngelekanyʼo yake?

Somai Aevelania 11:6, na ĩndĩ mũineenea makũlyo aa:

• Yeova ekaa ata kwondũ wa “ala mamũmanthaa na kĩthito,” kana kwa ndeto ingĩ, ala mekaa kyonthe kĩla matonya mamũmanye na maimwendeesya?

• Kwosana na kĩu, we wĩona Yeova ewʼaa ata oona kĩthito kĩla wĩkĩĩte nĩ kana ũendeee kwĩmanyĩsya Mbivilia?

KĨLA TWEEMANYĨSYA

O na kau kwĩmanyĩsya Mbivilia kũyĩthĩawa kwĩ laisi mavinda onthe, no kũũtetheesye ũkesa kũtanĩa thayũ tene na tene. Endeea kũmwĩkwatya Yeova na akakũathima mũno.

Makũlyo ma Kũsyokeleela

• Nĩkĩ wonaa ũwʼo ũla wĩ Mbivilianĩ wĩ wa vata kwaku?

• Ũtonya kwĩka ata ũĩkĩĩthye nĩweeka “maũndũ ala ma vata” thayũnĩ waku?

• Nĩkĩ waĩle kũmũkũlya Yeova aũtetheesye ũendeee kwĩmanyĩsya Mbivilia?

MAŨNDŨ ANGĨ MA KWĨMANYĨSYA

Soma wone maũndũ ana matetheesye andũ aingĩ makamanya kũtũmĩaa ĩvinda yoo nesa.

“Ũndũ Ũtonya Kũtũmĩa Ĩvinda Yaku Nesa” (Amkeni!, Mwei wa 2, 2014)

Sisya wone ũndũ Yeova watetheeisye mũndũ mũka ũmwe ũla mũũme wake ũtaeleawa nĩkĩ wĩkĩaa kĩthito kingĩ amwendeesye Ngai.

Yeova Nũtũnengae Vinya wa Kũmĩĩsya Mathĩna (5:05)

Sisya wone ũndũ wũmĩĩsyo wa mũndũ mũka ũmwe watetheeisye mũũme wake.

Nendaa Kũmanya Kana Ngũsĩ Imanyĩasya Wʼo (6:30)

Mavinda amwe Ngũsĩ sya Yeova nĩsilĩĩlawa ũvũngũ wa kana nĩsyanangaa mĩsyĩ. Ĩndĩ ũu nĩ wʼo?

“Syo Ngũsĩ sya Yeova Syĩkĩaa Andũ Vinya Malũlũmĩĩlye Mĩsyĩ yoo-ĩ, Kana Syĩkaa Kũmyananga?” (Ũvoo wĩ kĩsesenĩ)

Ithyonthe nĩtwĩthĩawa na motwi ma kwĩka. Motwi asu no manange kana makaseũvya ngwatanĩo yitũ vamwe na Yeova. Kwa ngelekanyʼo, no tũamũe vala tũkwenda kwĩkala, ũndũ tũtonya kũkwata mbesa, kana ethĩwa nĩtũkwenda kũtwaana kana o kũtwawa. Yĩla tweeka motwi maseo, tũkekalaa twĩ atanu na tũimũtanĩthya Yeova.

1. Ũtonya kũtũmĩa Mbivilia ata nĩ kana ĩkũtetheesye kwĩka motwi maseo?

Ũtanamba kwĩka ũtwi, mũvoye Yeova akũtetheesye, na ũisoma Mbivilia nĩ kana wone woni wake ĩũlũ wa ũndũ ũsu. (Soma Nthimo 2:3-6.) Mavinda amwe Yeova nũnenganae mwĩao wĩ ũtheinĩ ĩũlũ wa ũndũ mũna. Kwoou, ũtwi ũla mũseo nĩ kũatĩĩa mwĩao ũsu.

Wĩona ata ethĩwa vaiĩ mwĩao mũna wa Mbivilia wĩ ũtheinĩ ũla ũkũeleetye ũndũ waĩlĩte kwĩka? Yeova nũkũendeea kũũtongoesya “nzĩanĩ ĩla waĩle kũthi nayo.” (Isaia 48:17) Ata? No vethĩwe myolooto ĩla ĩtonya kũũtongoesya. Myolooto ya Mbivilia nĩ momanyĩsyo ma wʼo ma mũsingi ala matũtetheeasya kũmanya mosũanĩo ma Ngai na ũndũ wĩwʼaa. Mavinda maingĩ nĩtwĩmanyĩasya ũndũ Ngai wĩwʼaa ĩũlũ wa ũndũ mũna twasoma ngewa ĩeleetwʼe Mbivilianĩ. Twamanya woni wa Yeova, no twĩke motwi ala matonya kũmwendeesya.

2. Nĩ maũndũ meva waĩlĩte kũsũanĩa ũtanamba kwĩka ũtwi?

Mbivilia yaĩtye: “Ũla wĩ kĩlĩko asiasya ũndũ ũendaa.” (Nthimo 14:15) Ũu wonanasya kana tũtanamba kwĩka ũtwi, nĩtwaĩle kwosa ĩvinda na kũsũanĩĩa ĩũlũ wa maũndũ ala tũkwenda kwĩka. Ũisũanĩĩa maũndũ asu no wĩkũlye: ‘Nĩ myolooto yĩva ya Mbivilia naĩlĩte kũtũmĩa? Nĩ ũndũ wĩva ũtonya kũnenga mũuo wa kĩlĩko? Ũtwi wakwa ũtonya kũtuma angĩ mewʼa ata? Na ũndũ ũla wa vata vyũ, no ũtume Yeova atana?’—Kũtũngĩlĩlwa Kwa Mĩao 32:29.

Yeova nĩwe waĩlĩte vyũ kũtũtavya nĩ kyaũ kĩseo na nĩ kyaũ kĩthũku. Yĩla twamanya nesa mĩao na myolooto yake na tweethĩwa tũtwʼĩte kũmĩatĩĩa, twĩthĩawa tũendeee kũmanyĩsya wasya witũ wa ngoo. Wasya witũ wa ngoo nĩwʼo ũtũtetheeasya kũmanya ũndũ ũla waĩlĩte na ũla ũtaĩlĩte. (Alomi 2:14, 15) Wasya wa ngoo mũmanyĩsye nesa ũkatũtetheeasya kwĩka motwi ala maĩlĩte.

ĨMANYĨSYE MŨNANGO

3. Eka Mbivilia ĩkũtongoesye

VITIO: Tongoeawʼa Nĩ Myolooto ya Mbivilia (5:54)

• Ũthasyo wa kwĩnyuvĩa nĩ kyaũ?

• Nĩkĩ Yeova watũnengie ũthasyo wa kwĩnyuvĩa?

• Nĩ kyaũ ũtũnengete nĩ kana kĩtũtetheesye kũtũmĩa ũthasyo witũ wa kwĩnyuvĩa nesa?

Nĩ kana mwone ngelekanyʼo ya mwolooto wa Mbivilia, somai Aeveso 5:15, 16. Na ĩndĩ mũineenea ũndũ ũtonya ‘kũtũmĩa ĩvinda yaku nesa’ kwĩka maũndũ aa:

• Kũsoma Mbivilia ũte kũtĩĩa.

• Kwaĩlangya nguma syaku wĩ kĩveti, mũũme, mũsyai, kĩmwana kana mwĩĩtu.

• Kũthi maũmbanonĩ ma kĩkundi.

4. Manyĩsya wasya waku wa ngoo kwĩkaa motwi maseo

VITIO: “Ĩthĩwai na Wasya Mũseo wa Ngoo” (5:13)

• Vitionĩ ĩsu, nĩ matambya meva mwĩĩtu-a-asa woosie nĩ kana amanyĩsye wasya wake wa ngoo na ayĩka ũtwi ũtonya kũmwendeesya Yeova?

Nĩkĩ tũtaĩlĩte kũkũlya angĩ matwĩkĩe motwi? Somai Aevelania 5:14, na ĩndĩ mũineenea makũlyo aa:

• O na ethĩwa no woneke wĩ ũndũ wĩ laisi kũkũlya angĩ matwĩkĩe motwi, nĩ kyaũ twaĩlĩte kwĩthĩwa tũtonya kwĩvathũkanĩsya?

• Nĩ kyaũ kĩtonya kũtũtetheesya kũmanyĩsya wasya witũ wa ngoo na kwĩka motwi maseo?

5. Nenga ndaĩa wasya wa ngoo wa andũ ala angĩ

Andũ me kĩvathũkanyʼo nĩmatonya kwĩka motwi matavwʼanene. Tũtonya kwonanyʼa ata kana nĩtũnengete ndaĩa wasya wa ngoo wa ala angĩ? Kwasũanĩa maũndũ aa elĩ matonya kwĩkĩka:

Ũndũ wa 1: Mwĩĩtu-a-asa wendete kwĩvaka syĩndũ sya kwĩyanakavya nũtonya kũthamĩĩa kĩkundinĩ kĩ na eĩtu-a-asa mewʼaa maũmĩa moona mũndũ wĩvakĩte syĩndũ isu.

Somai Alomi 15:1 na 1 Akolintho 10:23, 24, na ĩndĩ mũineenea makũlyo aa:

• Kwosana na mĩsoa ĩsu, mwĩĩtu-a-asa ũsu atonya kwĩka ata? We ũtonya kwĩka ata ũkeyĩthĩa wĩ na mũndũ wasya wake wa ngoo ũũmũvata kwĩka ũndũ mũna, ĩndĩ wasya waku wa ngoo nũũkwĩtĩkĩlya kũwĩka?

Ũndũ wa 2: Kwasũanĩa mwana-a-asa wĩsĩ nesa kana Mbivilia ndĩvatanĩte kũnywʼa ũkĩ kwa kĩthimo, ĩndĩ aitwʼa kana ndakanywʼa ũkĩ o na vanini. Na yu mũthenya ũmwe aithokwʼa nĩ ana-a-asa maketanĩthye na ayona mainywʼa ũkĩ.

Somai Mũtavanʼya 7:16 na Alomi 14:1, 10, na ĩndĩ mũineenea makũlyo aa:

• Kwosana na mĩsoa ĩsu, mwana-a-asa ũsu atonya kwĩka ata? We ũtonya kwĩka ata woona mũndũ ũngĩ ayĩka ũndũ mũna ũla wasya waku wa ngoo ũtakwĩtĩkĩlasya kũwĩka?

Nĩ maũndũ meva matonya ũkũtetheesya kwĩka motwi maseo?

1. Mũkũlye Yeova aũtetheesye ũmanye kĩla waĩlĩte kwĩka. —Yakovo 1:5.

2. Ĩka ũkunĩkĩli Mbivilianĩ na mavukunĩ maitũ ala me na ũvoo umĩte Mbivilianĩ nĩ kana ũkwate myolooto ĩtonya ũkũtetheesya. O na no ũkũlye Mũklĩsto mũimu kĩ-veva aũnenge ũtao.

3. Sũanĩa kĩla kĩtonya kũetwe nĩ ũtwi waku. Ũtonya kũtuma we mwene wĩwʼa ata kana andũ ala angĩ?

KĨLA TWEEMANYĨSYA

Nĩtũtonya kwĩka motwi maseo twasũanĩa ũndũ Yeova wĩwʼaa ĩũlũ wa ũndũ mũna, na twavindĩĩsya ethĩwa meko maitũ nĩmeũtetheesya andũ ala angĩ kana meĩka kũmaũmĩsya.

Makũlyo ma Kũsyokeleela

• Ũtonya ata kwĩka motwi meũmwendeesya Yeova?

• Ũtonya kũmanyĩsya wasya waku wa ngoo ata?

• Ũtonya kwĩka ata ũkonanyʼa kana nũnengete ndaĩa wasya wa ngoo wa andũ ala angĩ?

MAŨNDŨ ANGĨ MA KWĨMANYĨSYA

Ũtonya kwĩka ata nĩ kana wĩke motwi meũlũlũmĩĩlya ngwatanĩo yaku vamwe na Ngai?

“Ĩka Motwi Matonya Kũmũtaĩa Ngai” (Mũsyaĩĩsya, Matukũ 15, Mwei wa 4, 2011)

Ĩloele vitio nĩ kana wĩmanyĩsye mũnango ĩũlũ wa ũndũ Yeova ũtũnengae ũtao.

Yeova Nũtongoeasya Andũ Make (9:50)

Ĩloele vitio wone kĩla kyatetheeisye mũndũũme ũmwe kwĩka ũtwi waĩ mũito.

Yeova Atũnengae Kĩla Kĩseo Vyũ (5:46)

Ĩmanyĩsye mũnango wone ũndũ ũtonya kũmwendeesya Yeova o na yĩla ũtanenganĩte mwĩao wĩ ũtheinĩ ũkonetye ũndũ mũna.

“We Mavinda Onthe Ũmanthaa Mwĩao wa Ĩmwe kwa Ĩmwe Mbivilianĩ?” (Mũsyaĩĩsya, Ĩtukũ 1, Mwei wa 12, 2003)