Kwĩka Mĩvango Mĩseo ya Kũtavanyʼa Isionĩ Ila Andũ Maneenaa Ithyomo syĩ Kĩvathũkanyʼo

Mavinda maingĩ andũ nĩmethukĩĩasya nesa yĩla matavwʼa ũvoo mũseo na kĩthyomo kyoo.Nĩvatonyeka ũkethĩa kyu nokyo kyatumie Yeova eka mũvango mũthenya wa Vendekosito ya mwaka wa 33, nĩ kana ‘Ayuti ala makĩaa Ngai, na maumĩte mbaĩnĩ syonthe sya andũ ĩtheo wa ĩtu,’ mewʼe ũvoo mũseo kĩla mũndũ na “kĩthyomo kyake mwene,” o na kau no methĩwe onthe meesĩ kĩthyomo kya Kĩevelania kana Kĩkiliki. (Meko 2:5, 8) Ũmũnthĩ, ikundi ila syĩthĩawa isionĩ andũ maneenaa ithyomo syĩ kĩvathũkanyʼo, na syĩkaa maũmbano ma ithyomo isu, nitonya kwĩthĩwa itavanasya kĩsionĩ kĩmwe. Ĩndĩ yo atavanyʼa kuma ikundinĩ isu matonya kũkwatĩanĩa ata ĩla meũtavanyʼa nĩ kana matavye kĩla mũndũ ũvoo mateũsyokeleela kũla kĩkundi kĩla kĩngĩ kĩtavanisye na kũthatya ene nyũmba?

• 

  Oanyʼai (Nth 15:22): Asyaĩĩsya ma ũthũkũmi ikundinĩ isu nĩmaĩle kwĩka mũvango mwaĩlu wa ũndũ isio isu siũtavanwʼa. Ethĩwa kĩsio kyoo nĩ kĩnini, no maamũe atavanyʼa makĩlae nyũmba sya andũ ala mataneenaa kĩthyomo kĩla meũtavanyʼa nakyo. Ĩndĩ ethĩwa kĩkundi kĩmwe kĩ na kĩsio kĩnene na kĩyĩsaa kũkĩtavanyʼa kĩkathela, no metĩkĩlye atavanyʼa ma kĩkundi kĩngĩ matavanyʼe mateũkĩla nyũmba o na ĩmwe, na meethĩa mũndũ ũkwendeewʼa ũtaneenaa kĩthyomo kyoo, maimũnengane kĩkundinĩ kyu. (od-SW 93 ¶37) O na ĩngĩ, kĩkundi kĩna no kĩkũlye atavanyʼa ma kĩkundi kĩngĩ mamatetheesye kũmantha andũ ala maneenaa kĩthyomo kya kĩkundi kyoo, na mamakwata maimaathĩĩa. (km 7/12 5, ĩsandũkũ) Nĩtwaĩle kũlilikana kana mavinda angĩ, no wĩthĩe andũ ma mũsyĩ ũmwe maneenaa ithyomo syĩ kĩvathũkanyʼo. Mĩvango ĩla mũkwĩka nĩyaĩle kwosana na mĩao ĩla yĩkĩĩtwe ĩũlũ wa kũnengane ũvoo ũkonetye andũ ala mũkwĩthĩa kĩsionĩ.

• 

  Atĩĩa mĩvango ĩla yeekwa (Aev 4:16): Atĩĩa nesa kyonthe kĩla watavwʼa nĩ mũsyaĩĩsya wa ũthũkũmi wa kĩkundi kyenyu. Nĩwĩthĩwa ũyĩmanyĩsya Mbivilia na mũndũ ũtatũmĩaa kĩthyomo kya kĩkundi kyenyu? Mũmanyĩwʼa ũsu wa Mbivilia nũtonya kwĩka maendeeo na mĩtũkangĩ wamũnengane kĩkundinĩ kya kĩthyomo kĩla ũneenaa.

• 

  Ĩyũmbanyʼe nesa (Nth 15:28; 16:1): Ethĩwa mũndũ ũla wakitya nyũmba ũitavanyʼa aneenaa kĩthyomo kĩ kĩvathũkanyʼo, tata ũndũ ũtonya ũmũtavye ũvoo mũseo. Sũanĩa tene nĩ ithyomo syĩva andũ kĩsionĩ kyenyu matũmĩaa, na ũyumya Mbivilia na vitio sya ithyomo isu kĩsesenĩ. O na nũtonya kũtũmĩa JW Language kwĩmanyĩsya kũkethanyʼa na ithyomo syĩ kĩvathũkanyʼo.