MWĨKALĨLE WA AKLĨSTO
Ĩvuku Kũneenea Maandĩko Kĩla Mũthenya Nĩyĩũtethasya?
We nũsomaa ĩandĩko kĩla mũthenya na maelesyo mayo kuma ĩvukunĩ Kũneenea Maandĩko Kĩla Mũthenya nĩ kana wĩthĩwe na ngwatanĩo nzeo na Yeova? Ethĩwa ndwĩkaa ũu, wĩona ata ũkavanga kũsomaa ĩandĩko ya kĩla mũthenya? Andũ aingĩ masomaa ĩandĩko yĩu kwakya nĩ kana wĩthĩe matonya kũsũanĩa maũndũ ala meemanyĩsya maendeee kwĩka maũndũ moo ma kĩla mũthenya. (Yos 1:8; Sav 119:97) Ũtonya kũtetheka ata mũnango wasoma ĩandĩko ya kĩla mũthenya? Nĩ kana ũtetheke, nĩwaĩle kũsoma maandĩko ala mathyũlũlũkĩte ĩandĩko yĩla ũũsoma nĩ kana ũmanye yĩneenea kyaũ. Sũanĩa ngewa yĩ Mbivilianĩ ĩla yosanĩte nesa na mwolooto ũla wĩ ĩandĩkonĩ yĩu wasoma. Na ĩndĩ ũitũmĩa mwolooto ũsu. Yĩla watũmĩa Ndeto ya Ngai kwĩka motwi, ĩkaũtongoeasya na ũitetheka mũno.—Sav 119:105.
Athũkũmi ma Mbetheli ĩũlũ wa nthĩ yonthe masomaa ĩandĩko ya kĩla mũthenya maiya lĩu wa kwakya. Myaka mĩvĩtu, maũndũ maingĩ ala methĩĩtwe maineenewa ĩandĩkonĩ ya kĩla mũthenya nĩmekĩawa nthĩnĩ wa JW Broadcasting® ungu wa MAŨMBANO NA MAŨNDŨ MA MWANYA. Nĩ ĩndĩĩ wĩla kwĩthukĩĩsya maũvoo asu? Nĩvatonyeka ũkethĩa maũvoo amwe katĩ wa ala me vau matonya kũũtethya mũno. Kwa ngelekanyʼo, ngewa ya Loto ĩtonya kũũtetheesya ata yĩla ũkwĩka motwi?
ĨLOELEI VITIO YĨ NA KYONGO NDŨKAMYENDE NTHĨ (1YO 2:15), NA ĨNDĨ MŨISŨNGĨA MAKŨLYO AA MAATĨĨE:
Nĩ mwolooto wĩva wa Mbivilia waneenewa Ũthaithinĩ ũsu wa Kwakya?
Ngewa ya Loto yĩtũmanyĩsya kyaũ ĩũlũ wa mũisyo wa kwenda nthĩ kana syĩndũ ila syĩ nthĩnĩ wayo?—Mwa 13:12; 14:12; 19:3, 12, 13, 24-26
Twonanasya ata kana nĩtũmwendete Yeova na tũyendete nthĩ kana syĩndũ ila syĩ nthĩnĩ wayo?
Ndonya kwonanyʼa ata kana nĩnonaa Ndeto ya Yeova yĩ ya vata yĩla nĩendeee kwĩka maũndũ makwa ma kĩla mũthenya?