Yesũ Nĩwathayũũkisye Mwanake wa Kĩveti Ndiwa

Ĩvinda ĩnini kuma Yesũ avosya mũthũkũmi wa mũnene wa asikalĩ, nĩwaumie Kavelinaumi na athi ndũanĩ ya Naini. Ndũa ĩsu yaĩ ngalĩko ya ĩtheo ya Kavelinaumi na waĩ ũtonya kũthi ũasa wa kĩlomita mbee wa 32 ũivika vo. Yesũ ndaendete e weka, aendanĩtye vamwe na amanyĩwʼa make na ĩkomano ĩnene ya andũ. Na nĩvatonyeka kũkethĩwa kũkilyĩ kũtuka nĩwʼo mambĩĩie kũthengeea ndũanĩ ya Naini. Me nzĩanĩ nĩmakomanie na andũ meana ũna maĩ Ayuti maendete kũthika mũndũ. Makuĩte mwĩĩ wa mwanake maendete kũũthika nza wa ndũa ĩsu.

Ũla waĩ na kyeva mũno katĩ wa andũ asu nĩ inyia wa mwanake ũsu. Aĩ ndiwa, na mwana ũla waĩ nake e ũmwe aĩ anakwʼa. Ĩvinda yĩla mũũme wakwie, vaĩ kavaa nũndũ nĩwatiĩtwe na mwanake ũsu wake. No nginya mũndũ mũka ũsu ndiwa ethĩwe endete mwana ũsu wake mũno, nũndũ no we waĩ nake e weka na no we wesaa kũmũsũvĩa ĩvinda yũkĩte. Ĩndĩ ũndũ wa kũmakya nĩ kana mwana ũsu aĩ anakwʼa. Yu nũũ wesaa kwĩkalanyʼa na kĩveti kĩu ndiwa na aikĩsũvĩaa?

Yĩla Yesũ woonie mũndũ mũka ũsu, nĩweewie akiitwa ngoonĩ nũndũ wa kyeva kĩla mũndũ mũka ũsu waĩ nakyo na nũndũ wa ũndũ ũsu mũthũku waĩ ũnamũkwata. Yesũ nĩwaneenie na kĩveti kĩu e na tei ĩndĩ kwa nzĩa ĩtonya kũtuma kĩmũĩkĩĩa. Akĩie atĩĩ: “Eka kũĩa.” Nĩwasyokie eeka maũndũ angĩ maingĩ. Kwa ngelekanyʼo, nĩwakiitie mũsekeseke ũla wailĩĩlwe mwĩĩ wa mwanake ũsu. (Luka 7:13, 14) Ũneeni wa Yesũ na meko make maĩ ma kũsengyʼa mũno nginya andũ ala maĩ vau maũngama mamũsyaĩĩsye. No nginya andũ aingĩ methĩwe meekũlasya-ĩ, ‘Nĩkĩ wasya ũu, na eenda kwĩka ata?’

Namo andũ ala maendanĩtye na Yesũ na moonete ayĩka mawĩa manene na aivosya mowau maingĩ meekie ata? Mayaĩ maaona Yesũ aithayũũkya mũndũ. Ĩndĩ ĩkũlyo nĩ, O na kau ĩvinda ya tene ve andũ mathayũũkiwʼe, we Yesũ aĩ atonya kũthayũũkya mũndũ? (1 Asumbĩ 17:17-23; 2 Asumbĩ 4:32-37) O maũngeme vau, Yesũ aisye atĩĩ: “Mwanake, nĩkwĩa, ũkĩla!” (Luka 7:14) Na ũu nĩ wʼo kweethĩiwe. Mwanake ũsu nĩwookĩlile, ekala nthĩ na ambĩĩa kũneena! Yesũ nĩwamũnenganie kwa inyia wake ũla wasengʼie mũno oona ũndũ ũla weekĩka na atana mũno. Na kwoou kĩveti kĩu kyaeka vyũ kwĩmakĩa.

Yĩla andũ moonie mwanake ũsu athayũũkwʼa, nĩmamũtaĩie Yeova, ũla nĩwe Mũnengani wa Thayũ. Maisye atĩĩ: “Mwathani mũnene nĩwũkĩlĩtwʼe katĩ witũ.” Namo andũ angĩ ala moonie ũndũ ũsu wa kũsengyʼa Yesũ weekie maisye: “Ngai nũlilikanĩte andũ make.” (Luka 7:16) Ngewa ĩsu ya ũndũ ũsu Yesũ weekie nĩyanyaĩĩkie na mĩtũkĩ isionĩ syonthe ila syaĩ vakuvĩ, na nĩvatonyeka ĩkethĩwa yavikie ndũanĩ ĩla Yesũ weanĩie ya Nasaleti, ĩla yaĩ ta kĩlomita 10 kuma Naini. O na ũvoo ũsu nĩwavikie kĩsionĩ kya Yutia kĩla kyaĩ vaasa mũno na Naini.

Ĩvindanĩ yĩu, Yoana Mũvatisi aĩ o yela, na nĩwendeeawʼa mũno kũmanya maũndũ manene ala Yesũ ũkwĩka. Amanyĩwʼa ma Yoana nĩmamũtavasya ĩũlũ wa syama ila Yesũ weekaa. Ĩndĩ Yoana atavwʼa maũndũ asu eekie ata?