Nĩtwatwie Kũtheesya Kĩlasi

Madián na mũka wake, Marcela, maendeee nesa mũno yĩla mekalaa Medellín, Colombia. Madián athũkũmaa wĩa wĩ na mũsaala mũseo. Na nũndũ wa ũu, mekalaa nyũmba nene mbanake. Ĩndĩ ve ũndũ watumie me athũkũmi ma Yeova Ngai mavanga kũsũanĩa nesa kĩla maĩle kũvĩtya mbee thayũnĩ. Maĩtye: “Twĩ mwaka wa 2006, nĩtwaendie ũmbanonĩ mũnene wa mũthenya ũmwe waĩ na kyongo ‘Uwe na Jicho Rahisi’ (Eka Itho Yaku Yĩsisye Mbee). Maũvoo maingĩ ala maumiwʼe matwĩkĩie vinya tũolange syĩndũ ila twĩ nasyo twĩ na kĩeleelo kya kwongelanga ũthũkũmi witũ kwa Ngai.” Mongelete kwasya atĩĩ: “Ũmbano ũsu nĩwatũtetheeisye twoona kana twaĩ na syĩndũ mbingĩ mũno ite sya lasima. Twathooaa syĩndũ o na tũtavangĩĩe, na kĩu kyatumĩte tũlika makoaninĩ maingĩ ma mbesa.”

Madián na Marcela nĩmeewie mathangaawʼa vyũ nĩ ũmbano ũsu maolange syĩndũ ila maĩ nasyo. Maĩtye: “Nĩtwaolangile ngalama sitũ. Nĩtwathamĩĩe nyũmba ya mbesa nini, twathoosya ngalĩ yitũ, na twathooa kamota.” O na ĩngĩ, nĩmaekie kũthi ndukanĩ nene maikese kwĩthĩa mathooie syĩndũ matavangĩĩe. Kuma vau, mambĩĩie kũtũmĩaa ĩvinda yoo yingĩ maimanyĩsya atũi moo Mbivilia. Na ĩndĩ matuma ndũũ na mavainia ma mwanya mamũthũkũmaa Yeova Ngai na kĩthito.a

Ĩtina wa ĩvinda ĩkuvĩ, Madián na Marcela nĩmatwie kwĩyumya mũnango na mathamĩĩa kĩkundinĩ kĩnini kyaĩ vaasa na taoni, kĩla kyaĩ na vata wa atavanyʼa. Madián nĩwatiie wĩa wake nĩ kenda mathamĩĩe kĩsionĩ kĩu. Yĩla waisye nũkũtia wĩa, mũndũ mũka ũla wamongamĩĩte wĩanĩ oonie ateũtũmĩa kĩlĩko. Nũndũ wa ũu, nĩ kana amũelesye kĩtumi kya kũtia wĩa amũkũlilye atĩĩ: “O na kau nũĩvawa mũsaala mũseo, we no wasye wĩ mũtanu?” Nĩweetĩkĩlile kana nde na ũtanu nũndũ aĩ na mathĩna maingĩ waemetwe nĩ kũmamina. Nĩvo ĩndĩ Madián wamwĩie “Ũtanu wa wʼo ndũetawe nĩ mbesa mbingĩ. Ĩndĩ mũndũ ethĩawa na ũtanu wa wʼo amanya kĩla kĩtonya kũmũetee ũtanu. Kĩla kĩtũeteae ũtanu nĩ na mũka wakwa nĩ kũmanyĩsya andũ ĩũlũ wa Ngai. Na nũndũ twĩenda kwĩthĩwa twĩ atanu mũnango, nĩtũvangĩte kwongelanga ĩvinda yĩla tũtũmĩaa wĩanĩ ũsu.”

Madián na Marcela nĩmeeyĩkĩĩie mĩvango mĩseo ya kĩ-veva na meekĩa kĩthito mamĩanĩsye, na nũndũ wa ũu meethĩwa me atanu na me eanĩe. Methĩĩtwe maitetheesya ikundi ila syĩ na vata mũnene kĩsionĩ kĩ Colombia, ngalĩko ya ĩũlũ welekele ũthũĩlonĩ wa syũa, kwa ĩvinda ya myaka 13. Na nĩmatanĩaa mũno wĩa ũsu wa kũtavanyʼa me mavainia ma mwanya.