Syama sya Ũe na Ũoi Nĩ Nthũku

Satani eenda ũatĩĩe syama sya ũe. Andũ aingĩ nĩmaumĩasya nthembo momae na mosũe ma tene, kana maveva, nĩ kenda mesũvĩe kumana na ũũmĩsyo. Mekaa ũu nũndũ nĩmakĩaa mavinya ma nthĩ ya maveva. Andũ asu nĩmekĩaa mbete kana mbangili sya ũe. Nĩmanyusaa kana makevaka “ndawa” (mĩthea) mĩĩ yoo kwa kwĩsilya kana syĩ na vinya wa kũmekĩa syama sya ũe. Nthĩnĩ wa mĩsyĩ yoo kana mũthanganĩ nthĩ, andũ amwe nĩmavithaa twĩndũ twĩsilĩlawʼa kwĩthĩwa twĩ na vinya wa kũmasiĩĩa maikone naĩ. Angĩ nĩmatũmĩaa “ndawa” ya syama sya ũe nũndũ maĩkĩĩaa ĩkamaetee ũtandĩthyo nthĩnĩ wa viasala, ngelyo sya masomo ma sukulu, kana nthĩnĩ wa ndũũ ya mbĩvaanʼya.

Nzĩa ĩla nzeo vyũ kwĩsũvĩana na Satani nĩ kwĩthĩwa na Yeova e mũnyanyau. Yeova Ngai na alaĩka make me vinya mwingĩ ũthonokete vaasa vyũ ũla wa Satani na ndaimoni syake. (Yakovo 2:19; Ũvuanʼyo 12:9) Yeova e mea maingĩ ma kwonanʼya vinya wake kwondũ wa anyanyae—ala me ũĩkĩĩku mũlũmu vyũ kwake.—2 Mavinda 16:9.

Ndeto ya Ngai yaasya atĩĩ: “Mũtikeke maũndũ ma mowe.” Yeova nũleanaa vyũ na syama sya ũe na ũoi nũndũ imanyĩo isu nitonya kwia mũndũ uungu ki wa ũtonyi wa Satani Ndevili, amũtongoeasye o ũndũ ũnũkwenda.—Alivai 19:26.