Onanʼya Wendo Waku kwa Ngai

Nĩ kenda ũendeee kwĩthĩwa na mũnyanya, waĩlĩtwe nĩ kũneena nake. We nũmwĩthukĩĩasya, nake nũkwĩthukĩĩasya. O na nũneenaa maũndũ maseo kwa andũ ala angĩ ĩũlũ wa mũnyanyau. Ũu nĩwʼo kũilyĩ ngalĩko ya kwĩthĩwa mũnyanya wa Ngai. Vindĩĩsya ũndũ Mbivilia yaasya ĩũlũ wa ũndũ ũũ:

Neena na Yeova nthĩnĩ wa mboya vate kũtĩa. “Mũkĩkala na ũlũmu mboyanĩ.”—Alomi 12:12.

Soma Ndeto ya Ngai, Mbivilia. “Kĩla Ũandĩko nĩwaveveewe nĩ Ngai, nawʼo nĩwaĩle wa kũmanyĩsya, na kũĩkĩĩthya andũ mavĩtyo, na kũmatũngĩĩa.”—2 Timotheo 3:16.

Manyĩsya andũ angĩ ĩũlũ wa Ngai. “Endai ĩndĩ mũkatwʼĩkĩthye mbaĩ syonthe amanyĩwʼa, . . . mũkĩmamanyĩsya kũkwata maũndũ onthe o na meva ala namwĩaĩe.”—Mathayo 28:19, 20.

Thengeea vakuvĩ na anyanya ma Ngai. “Endaa na andũ oĩ, ũkeethĩwa mũĩ.”—Nthimo 13:20.

Ĩthĩwa mawũmbanonĩ nthĩnĩ wa Nyũmba ya Ũsumbĩ. “Nĩtũlilikananʼye ithyĩ kwa ithyĩ kũthangaanʼya wendonĩ na mawĩanĩ maseo; . . . tũkĩtaana.”—Aevelania 10:24, 25.

Tetheesya kũendeesya wĩa wa Ũsumbĩ. “Kĩla mũndũ nĩeke o tondũ ũtwʼĩte ngoonĩ yake: ti kwa kũlea kwenda, kana kwa kũingĩĩwʼa: nũndũ Ngai endete mũndũ ũnenganae na ũtanu.”—2 Akolintho 9:7.