Makũlyo Ala Makũlawʼa Kaingĩ Nĩ Andũ Makwendeewʼa

Ethĩwa Ngai nĩ wendo, nĩkĩ ũekete ũthũku ũendeee?

NGAI nũekete ũthũku ũendee, na milioni nyingĩ sya andũ ĩũlũ wa nthĩ nĩ siwĩkaa kwa kwĩyendea. Kwa ngelekanyʼo, nĩ mambĩĩasya kaũ, makalekya mbomu ĩũlũ wa syana, kũvĩvya nthĩ, na kũete yũa. Milioni nyingĩ sya andũ ninyusaa sikala na kũkwatwa nĩ kanza ya mavũi, nĩmekaa ũlalai na kũkwatwa nĩ mowau ala maetawe nĩ molaalai, makanywʼa ũkĩ mwingĩ mũno na makakwatwa nĩ ũwau wa ĩtema, na maũndũ ta asu. Andũ asu vate nzika mayendaa ũthũku ũthele. Kĩla mendaa no mathĩna ala maetawe nĩ mothũku asu maminwe. Yĩla maketha kĩla maminĩte ũvanda, makayaa makyasya, “Nĩkĩ nonyie?” Na makyambĩĩa kũmwilĩĩla Ngai, tondũ Nthimo 19:3 yasyaa: “Ũtumanu wa mũndũ nũthũkasya mũendele wake; na ngoo yake nĩmũnyungunyĩasya Yeova.” Na keka Ngai nĩ wa mavatie wĩki woo wa naĩ, mateta mayasya nĩmaveniwe ũthasyo wa kũmeka!

Kĩtumi kĩnene kya Yeova kya kũeka ũthũku ũendee nĩ kũsũngĩa ũkananĩsya wa Satani. Satani ũla Ndevili aisye kana Ngai ndatonya kwĩthĩwa na andũ ĩũlũ wa nthĩ matonya kũlũmya wĩanĩu wa meko makwatwa nĩ matatwa. (Yovu 1:6-12; 2:1-10) Yeova nũmũekete Satani nĩkenda ethĩwe na ĩvinda ya kũĩkĩĩthya ũkananĩsya wake. (Kuma 9:16) Satani nũendee na kũetee andũ mawoo ĩvinda yĩĩ, amakusye mamũtie Ngai, aitata kũĩkĩĩthya ũkananĩsya wake. (Ũvuanyʼo 12:12) O na vamwe na ũu,Yovu nĩwakwatĩĩie ũlũmu mwĩanĩu wa meko. Nake Yesũ eekie oou. Nowʼo Aklisto mawʼo mekaa.—Yovu 27:5; 31:6; Mathayo 4:1-11; 1 Vetelo 1:6, 7.

Nyie no nende kũĩkĩĩa ĩũlũ wa valatiso ya kĩĩnthĩ vala andũ makekala tene na tene, ĩndĩ, ũsu ti ũndũ ũtaĩkĩĩka?

Ti kwosana na Mbivilia. Ũndũ ũũ wĩoneka wĩ mũseo mũno kũĩkĩĩka kĩtumi nũndũ andũ mamanyie ũthũku myaka mingĩ mĩvĩtu. Yeova oombie nthĩ na eea andũ mamyusũsye aũme na aka alũngalu ala maĩ masũvĩe mĩtĩ na mathayũ ma nyamũ na kũendeesya wanake wayo vandũ va kũmyananga. (Sisya ĩthangũ ya 12 na 17.) Vandũ va Valatiso ĩsu yathanĩtwe kwoneka yĩ nzeo mũno kũĩkĩĩka, maũndũ ma kũete kyeva ala mevo ĩvĩnda yĩĩ nĩ mathũku vyũ kũekwa maendee. Valatiso ĩkoosa mwanya wa mo.

Ndonya ata kũmasũngĩa andũ ala mavũthĩĩasya na kwasya kana Mbivilia nĩ ĩvuku ya mbano na ndyosanaa na saenzi?

Mũĩkĩĩo nthĩnĩ wa maũndũ aa mathanĩtwe ti ũndũ wa ũtalĩthya. “Kwa ũu mũĩkĩĩo wũkaa kwondũ wa kwĩwʼa.” Kwa kwĩmanyĩsya Ndeto ya Ngai, ũĩ wayo nĩwumĩlaa ũtheinĩ na mũĩkĩĩo ũkaendeea na kwĩana.—Alomi 10:17; Aevelania 11:1.

Syĩndũ sya ũvukũa ila ikonanĩtye na Mbivilia iĩkĩĩthasya kana isitoli nyingĩ ya Mbivilia nĩ ya wʼo vyũ. Saenzi ĩla ya wʼo nĩyosanaa na Mbivilia. Ma ũũwʼo aa maatĩe maĩ nthĩnĩ wa Mbivilia ĩvinda ĩasa mbee wa matanamba ũvumbũwa nĩ asomi: ikĩlo ila nthĩ yesĩile ĩkĩseũvwa, kana nthĩ nĩ ya kilinge, kana ĩsuĩte vandũ vathei (yayayanĩ), na nyũnyi nithamaa.—Mwambĩlĩlyo, kĩlungu 1; Isaia 40:22; Yovu 26:7; Yelemia 8:7.

Kũveveewa kwa Mbivilia kwonanawʼa nĩ kwĩanĩa kwa mawathani. Ndanieli nĩ wathanĩte kũkĩla na kũvalũka kwa mosumbĩ manene ma nthĩ, o vamwe na ivinda yĩla Mesia waĩ oke na kũawʼa. (Ndanieli, kĩlungu 2, 8; 9:24-27) Ũmũnthĩ, kwĩ mawathani angĩ maendee na kwĩanĩa, makyonanyʼa kana twĩ “mĩthenyanĩ ya mũminũkĩlyo.” (2 Timotheo 3:1-5; Mathayo, kĩlungu 24) Ũmanyi ũsu wa maũndũ matanethĩwa ndwĩ nthĩnĩ wa ũtonyi wa mũndũ. (Isaia 41:23) Wenda ũmanya mũnango, nowone nthĩnĩ wa mavuku Biblia—Neno la Mungu au la Binadamu? na Je, Kuna Muumba Anayekujali?, maandĩkĩtwe nĩ Watchtower Bible and Tract Society.

Ndonya kwĩmanyĩsya kũsũngĩa makũlyo ma Mbivilia ata?

Nomũvaka wĩmanyĩsye Mbivilia na kũvindĩĩsya ĩũlũ wayo, o vamwe na ũkũlya veva wa Ngai ũũtongoesye. (Nthimo 15:28; Luka 11:9-13) “Ĩndĩ ethĩwa ũmwe wenyu nũtielye ũĩ,” Mbivilia yĩasya, “namũvoye Ngai, ũla ũnengae andũ onthe na ũlau na ndeũkanʼya; nake akanengwa.” (Yakovo 1:5) Na ĩngĩ kwĩ na mavuku maũtetheesya kwĩmanyĩsya Mbivilia matonya kũkunĩkĩlwa. Ũtethyo kuma kwa angĩ nĩ wendekaa mavinda maingĩ, o tondũ Vilivũ weemanyĩisye na Mũethiovia. (Meko 8:26-35) Ngũsĩ sya Yeova nimanyĩasya Mbivilia vate ndĩvi na andũ ala mekwendeewʼa mĩsyĩnĩ kwoo. Wĩmũthasye kũkũlya ũmanyĩwʼe.

Nĩkĩ andũ aĩngĩ mavinganĩasya Ngũsĩ sya Yeova na kũmbĩa nĩeke kwĩmanyĩsya nasyo?

Yĩla Yesũ watavanasya kwaĩ ũvinganĩsya, na aisye kana atĩĩi make o namo makavĩngwa. Yĩla amwe mendeeiwʼe nĩ ũmanyĩsyo wa Yesũ, avinganĩsya ma kĩndĩni nĩ ma makũthũkĩie makyasya: “O nenyu ko mwaĩtwʼe? Ve ũmwe wa ala anene, kana wa Avalisi ũmwĩtĩkĩlĩte?” (Yoana 7:46-48; 15:20) Aingĩ ala maũtaa ndũkemanyĩsye na Ngũsĩ mo maisyĩsĩ kana maimenaa o mana. We ĩmanyĩsye na Ngũsĩ ũsisye kana ũmanyi waku wa Mbivilia nũkwongeleka kana ndwĩongeleka.—Mathayo 7:17-20.

Nĩkĩ Ngũsĩ iendaa kwa andũ me na ndĩni syoo ene?

Kwa kwĩka ũu maatĩĩaa ngelekanyʼo ya Yesũ. We nĩwamaendeie Ayuti. Ayuti maĩ na ndĩnĩ yoo, ĩndĩ kwa nzĩa nyingĩ nĩmaekete kũatĩĩa Ndeto ya Ngai. (Mathayo 15:1-9) Mbaĩ syonthe syĩna ndĩni sya mĩthemba mĩna, o na syeethĩwa nĩ ila syĩtawa sya Kĩklisto kana ite sya Kĩklisto. Nĩ ũndũ wa vata mũno kũlũmanyʼa na mĩĩkĩo ĩla ĩkwosana na Ndeto ya Ngai mwene, na kĩthingʼĩĩsyo kya Ngũsĩ kya ũmatetheesya andũ meke ũu nĩ wonanyʼo wa wendo kwa mũtũi.

Ngũsĩ iĩkĩĩaa kana ndĩni yoo noyo ya wʼo yĩ yoka?

Mũndũ ũla wĩ kĩthingʼĩĩsyo ndĩninĩ yake no asũanĩe nĩyo ya wʼo. Kethĩwa ti ũu, atinda ethingʼĩanĩsye nayo yakĩ? Aklisto nĩ mekwĩsũvwa: “Oasyai maũndũ onthe; lũmasyai ũla ũseo.” (1 Athesalonika 5:21) No mũvaka mũndũ aĩkĩĩthye kana maũndũ ala ũĩkĩĩa nĩmetĩkĩlanaa na Maandĩko, nũndũ mũĩkĩĩo wa wʼo no ũmwe tũ. Aeveso 4:5 yĩlũlũmĩlya ũũ, yĩiweta “Mwĩaĩi ũmwe, mũĩkĩĩo ũmwe, ũvatiso ũmwe.” Yesũ ndaaĩtĩkĩlana na woni wa ũmũnthĩ wa kwosa maũndũ kwo vũthũ, kana kwĩ nzĩa mbingĩ, ndĩni nyingĩ, syonthe syelekele wʼovosyonĩ. Vandũ va ũu, aisye: “Nũndũ mbingĩlo nĩ ntheke, na nzĩa nĩ nziĩĩe, ĩla ĩelete thayũnĩ, nao nĩ avũthũ ala mamyonaa.” Ngũsĩ sya Yeova iĩkĩĩaa kana nimyonete. Kethĩwa ti ũu, no mamanthe ndĩni ĩngĩ.—Mathayo 7:14.

Mo maĩkĩĩaa kana nomo me oka makatangĩĩwa?

Andũ milioni nyingĩ ala maaĩthĩwa thayũ myaka mingĩ mĩthelu na mayaĩ Ngũsĩ sya Yeova nĩmakathayũũka na methĩwe me thayũ ĩngĩ. Aingĩ me thayũ yu no mose ĩtambya kwelekela ũwʼo na ũlũngalu mbee wa “thĩna mũnene,” ũtanethĩwa na makoosa ũtangĩĩo. Na ĩngĩ, Yesũ aisye tũyaĩle kũsilĩlana. Twonaa mũvwʼanĩle wotheinĩ, no Ngai asiasya ngoonĩ. Onaa kwa nzĩa ya katĩ na asilĩlaa kwa ĩnee. Nĩwanenganie ũsilĩ kũla kwĩ Yesũ, ti kwĩtũ.—Mathayo 7:1-5; 24:21; 25:31.

Ala maendaa maũmbanonĩ ma Ngũsĩ sya Yeova mendekaa

maumye mĩvothi myaũ?

Maũndũ makonetye mĩvothi, mũtũmwa Vaũlo aisye: “Kĩla mũndũ nĩeke o tondũ ũtwʼĩte ngoonĩ yake: ti kwa kulea kwenda, kana kwa kũingĩĩwʼa: nũndũ Ngai endete mũndũ ũnenganae na ũtanu.” (2 Akolintho 9:7) Nthĩnĩ wa Nyũmba sya Ũsũmbĩ na kũla Ngũsĩ sya Yeova syĩkĩaa maũmbano manene, Kũiĩ ũmbanyʼa wa nthembo. Masandũkũ ma mĩvothi nĩ maiawa ũtheinĩ nĩkenda kwa ngenda ũla ũnũenda ũvotha eke ũu.Vaiĩ ũmanyaa kĩla ũngĩ waumya, na ũla ũtanaumya. Amwe nĩ matonya kũmya kũthonaka ala angĩ; na angĩ nĩ matonya kwĩthĩwa o mataumya kĩndũ. Yesũ nĩ woonanisye woni waĩlĩte yĩla waneenie ĩlũ wa ĩsandũkũ ya kĩnandũ ĩkalũnĩ ya Yelũsaleme: Nĩ ũtonyi wa mũndũ na wendi wake wa kumya wendekaa, na ti wingĩ wa mbesa.—Luka 21:1-4.

Ngatwʼĩka ũmwe wa Ngũsĩ sya Yeova, o nakwa nendeka ngatavanasya tasyo?

Yĩla mũndũ wausũwa nĩ ũmanyi wa Valatiso ya kũũ nthĩ ĩla yathaniwe Ũsumbĩnĩ wa Klisto, nĩ wendaa kũmanyĩthya andũ. O naku ũkeeka o ũu. Ũsu ko nĩ ũvoo mũseoo!—Meko 5:41, 42.

Kwĩka ũu nĩ nzĩa yĩ vata ya kwonanyʼa kana wĩ mũmanyĩwʼa wa Yesũ Klisto. Nthĩnĩ wa Mbivilia, Yesũ etawa “ngũsĩ yĩ kĩthito na ya wʼo.” Yĩla waĩ vaa nthĩ nĩwatavanasya, ayasya: “Ũsumbĩ wa ĩtu nĩ mũthengeeu,” na atũma amanyĩwʼa makeke o ũu. (Ũvuanʼyo 3:14; Mathayo 4:17; 10:7) Na ĩtina wa ũu, Yesũ ameyĩaĩa aatĩĩi make: “Endai ĩndĩ mũkatwʼĩkĩthye mbai syonthe amanyĩwʼa, . . . mũkĩmamanyĩsya.” Na ĩngĩ nĩ wathanie kana mbee wa mũminũkĩlyo kũka, “ũvoo ũũ mũseo wa ũsumbĩ ũkatavanwʼa nthĩ yonthe wĩthĩwe ũkũsĩ kwa mbaĩ syonthe.”—Mathayo 24:14; 28:19, 20.

Kwĩ nzĩa nyĩngĩ sya ũtavanyʼa ũvoo ũũ mũseo. Kũeanga ngewa na anyanyau na andũ ala mwĩsene mavinda maingĩ nĩ myanya mĩseo ya kwĩka ũu. Amwe nĩ matũmĩaa nzĩa ya kũandĩka valũa, na angĩ kwa ũkũna simũ. Angĩ nĩ matũmaa mavuku mena ũvoo ũla meĩsilya nũtonya kwendeesya ala mesene namo kwa nzĩa ya vosita. Nũndũ maikwenda mũndũ ona ũmwe avĩtwe, Ngũsĩ nĩendaa kuma nyũmba kuthi ĩla ĩngĩ me na ũvoo ũsu.

Nthĩnĩ wa Mbivilia ve ũthokya ũũ wa ũtanĩthya: “Na veva na mũtwawa measya, Ũka. Na ũla wĩwʼaa nĩasye, Ũka. Na ũla wĩ na waũni, nĩoke: o ũla ũnũkwenda, nĩose manzĩ ma thayũ mana.” (Ũvuanʼyo 22:17) Kũtavasya angĩ iĩũlũ wa nthĩ yĩ Valatiso na moathimo mayo kwaĩlĩte kwĩkwa na ngoo ya kwenda, yusũĩtwe nĩ wendi wa kũtavanyʼa ũvoo ũũ mũseo.

Nĩ twĩsĩ vyũ kana wĩna makũlyo angĩ yĩũlũ wa Ngũsĩ sya Yeova na mĩĩkĩĩo yoo. No kwĩthĩwa amwe mamo me ma mũthemba wa ngananĩo. No twendeewe nĩ ũsũngĩa makũlyo maku. Kavuku kaa kena mwanya mũnini, kwoo nĩtũũkũthokya ũkũlye Ngũsĩ sya kũu kwenyu. Nũtonya kwĩka ũu maũmbanonĩ ala mekawa nthĩnĩ wa Nyũmba ya Ũsumbi yoo, kana yĩla mevika kũu mũsyĩ kwenyu. Kana nũtonya ũtuma makũlyo maku kwa Watch Tower, Ũitũmia namba sya masandũkũ ma vosita aa me vaa ĩtheo.