‘Mayaaona Ũu Tondũ’
KŨLEA kwĩwʼa ũkanyʼo nĩkũtonya kũete mũisyo.
Andũ ma mũsyĩ wa Darwin kũya Australia maendee na ũvanga sikũkũ sya mwaka wa 1974 yĩla ingʼola syaĩie ikanyʼe andũ kana ve na kĩseve kĩnene kyũkĩte. Ĩndĩ mũsyĩ ũsu wa Darwin ndwaĩ ũĩla kwanangwa nĩ kĩseve kĩu kĩnene kwa ĩvinda ya myaka ta 30. Mayoonaa ta wanangwa? Andũ aingĩ ma mũsyĩ ũsu mayaaona mũisyo ũsu ta ũndũ mũnene nginya ĩla kĩseve kĩnene kyambĩĩie kũuutana na kũthasya iala sya nyũmba na kũomboanga mokũta ma nyũmba ila moombanĩe mevithe. Kũivika kĩoko mũthenya ũla waatĩĩe mũsyĩ ũsu waĩ mwanange vyũ.
Kũya Kolombia mwei wa 11 mwaka wa 1985, ve kĩĩma kyavũlĩkile. Mbalavu ndweku na ĩa syavaũũkisye mũtondo wavwʼĩka andũ mbee wa ngili 20 ma mũsyĩ ũsu wa Armero. Andũ asu maĩ akanyʼe? Kĩĩma kĩu nĩkyatetemete ĩvinda ya myei mingĩ. Ĩndĩ nũndũ nĩmamanyĩĩte kwĩkala ũtee wa kĩĩma kĩũthingithanga andũ aingĩ ma Armero mayaaũnga. Anene ma silikalĩ nĩmamanyĩthiwʼe mbee kana mũisyo ũkilĩlye kũvika ĩndĩ mayaakanyʼa andũ ũndũ kwaaĩlĩte. Matangaso ma letiũ nĩmaĩĩkĩthye wanda ndũkakĩe. Makanisa nĩmatũmĩiwe matavye andũ maikakĩe. Ĩndĩ, ĩa wĩoo kĩĩma kĩu kyavũlĩka mavinda elĩ. We wĩthĩwa waĩ ũtiie syĩndũ syaku ũkasemba ũkakĩa? Nĩ andũ avũthũ mũno meekie ũu matanaselewa.
Mavinda maingĩ andũ ala mena ũmanyi wa mavia na mũthanga nĩmaweetaa mateũvĩtya mũno vala itetemo sya nthĩ syĩĩthĩwa. Ĩndĩ maitonya kũweta ki ikeethĩwa ĩndĩĩ. Mwaka wa 1999, itetemo sya nthĩ syooaie andũ ta ngili 20. Aingĩ ma ala makwie masũanĩaa kana ũu ndwĩsa kũmakwata.
Wosaa Mokanyʼo Ala Maumĩte kwa Ngai Mwene Ata?
Mbivilia yaeleisye nesa mbee, maũndũ ala makonanyʼa mĩthenya ya mũminũkĩlyo. Kwosana na ũu, ĩtwĩaa tũsũanĩe ĩũlũ wa “matukũ ma Noa.” “Matukũ asu ala maĩ mbee wa kĩla kĩwʼũ kingĩ” andũ maendeee na maũndũ moo o ta tene o na kau nomathĩnĩkaa nũndũ wa ũngʼendu kwongeleka. Ĩndĩ ĩũlũ wa ũkanyʼo wa Ngai ũla wamanengie kwĩsĩla mũthũkũmi wake Noa “matyeesĩ [“mayaaona ũu tondũ,” NW] mũvaka kĩla kĩwʼũ kingĩ kyooka, kyamatwaa onthe.” (Mathayo 24:37-39) We wĩthĩwa weethukĩĩisye ũkanyʼo ũsu? Nĩwĩkaa ũu ũmũnthĩ?
Nata ĩndĩ keka wekalaa Sotomo, vakuvĩ na Ũkanga wa Mũnyũ, matukũ ma Loto mwana wa mwana-a-inyia wa Avalaamu? Nthĩ ĩsu yailyĩ ta valatiso. Ndũa ĩsu yaĩ na maendeeo manene. Andũ mayaũngaa. Matukũnĩ ma Loto “nĩmaĩsaa, nĩmanyusaa, nĩmathooaa, nĩmathooasya, nĩmavandaa, nĩmaakaa.” Andũ ala Loto wekalaa katĩ wamo maĩ avuku mũno. We wĩthĩwa weethukĩĩisye na kĩthito ĩla Loto wakanisye andũ ĩũlũ wa meko mathũku? We wĩthĩwa weethukĩĩisye aũtavya kana Ngai nũtwʼĩte kwananga ndũa ya Sotomo? Kana wĩthĩwa woonie o ta ĩthaũ, o tondũ ala mesaa kũtwʼĩka athoni make meekie? Wĩthĩwa wambĩĩie kũsemba ũkĩe na ũisyoka kũsisya ĩtina tondũ mũka wa Loto weekie? O na kau andũ ala angĩ mayaaosa ũkanyʼo ũsu kwa ũito, mũthenya ũla Loto waumie Sotomo, “kwauie mwaki na mũvĩlĩtĩ kuma ĩtunĩ, wamananga onthe.”—Luka 17:28, 29.
Andũ ala aingĩ ũmũnthĩ mayonaa ũu tondũ. Ĩndĩ ngelekanyʼo isu ieketwe nthĩnĩ wa Ndeto ya Ngai ta ũkanyʼo kwitũ, itwongeleele vinya tũendee na KŨSYAĨĨSYA!
[Ĩsandũkũ/Visa ĩthangũnĩ ya 22]
Kwa Wʼo Ki Kwaaĩthĩwa Kĩwʼũ Kingĩ Nthĩ Yonthe?
Akananĩi aingĩ nĩmaleanaa na ũndũ ũsu. Ĩndĩ Mbivilia yaasyaa kyaĩkwʼo.
Yesũ Klĩsto nĩwaneenie ĩũlũ wakyo, na aĩ thayũ kĩwʼũ kyu kĩyũka, na nĩwakyonie e ĩtunĩ.
[Ĩsandũkũ/Visa ĩthangũnĩ ya 23]
Sotomo na Ngomola kwa Wʼo Nĩsyaanangiwe?
Andũ ala mavukũaa syĩndũ mũthanganĩ na kũsoma maũndũ ma tene monanasya nĩsyaanangiwe.
Mavuku ma isitoli nĩmawetete ũu.
Yesũ Klĩsto nĩwaĩkĩĩthisye ũndũ ũsu, na nũwetetwe nĩ mavuku 14 ma Mbivilia.