Nĩwatanĩthisye Ĩthe Wake na Atanĩthya Yeova

Nĩwene kana kaa ke visanĩ?— Kana kaa nĩ mwĩĩtu wa mũndũ weetawa Yevitha. Mbivilia ndĩwetete ĩsyĩtwa ya mwĩĩtu ũsu, ĩndĩ nĩtwĩsĩ kana nĩwatanĩthisye ĩthe wake na atanĩthya Yeova. Eka twĩmanyĩsye ĩũlũ wa mwĩĩtu ũsu, na ĩũlũ wa Yevitha ĩthe wake.

Yevitha aĩ mũndũ mũseo na nĩwatũmĩaa ĩvinda yĩasa aimũmanyĩsya mwĩĩtu wake ĩũlũ wa Yeova. O na ĩngĩ, aĩ mũndũ wĩ vinya na mũtongoi mũseo. Kwondũ wa ũu, Aisilaeli nĩmamũnyuvie amatongoesye kũkita na amaitha moo.

Yevitha nĩwamũvoyie Yeova amũtetheesye asinde kaũnĩ. Amwĩie kana asinda, akamũnenga mũndũ ũla wĩĩthĩwa e wa mbee kumaalũka akomane nake avika mũsyĩ kwake. Mũndũ ũsu aaĩle kwĩkala na kũthũkũma nyũmbanĩ ya Ngai nginya kĩkwʼũ kyake. Nyũmba ĩsu nĩ vandũ vala andũ moombanĩaa kũmũthaitha Ngai ĩvinda yĩu. O tondũ Yevitha wavoyete, nĩwasindie kaũnĩ! Ĩla wasyokie mũsyĩ, nĩwĩsĩ nũũ waĩ wa mbee kumaalũka nyũmba akomane nake?—

Mũndũ ũla waumaalile mbee aĩ mwĩĩtu wake! Yevitha ndaĩ na kana kangĩ, na yu nĩwaaĩlĩte kũmũnenga Yeova mwĩĩtu ũsu. Ũndũ ũsu nĩwatumie amaka mũno. Ĩndĩ, lilikana kana Yevitha aĩ anamwatha Yeova kĩndũ. Nũndũ wa ũu mwĩĩtu wake amwĩa atĩĩ: ‘Ethĩwa nũnamwathie Yeova, mbĩke o tondũ waisye.’

O nake mwĩĩtu wa Yevitha nĩwamakie ĩla weewie ũndũ ũsu. Nĩweesĩ kana athi nyũmbanĩ ya Yeova, ndakethĩwa atonya kũtwawa na kwĩthĩwa na syana. Ĩndĩ, nĩwendaa mũno kwĩanĩsya ũndũ ũla ĩthe wake wathanĩte kwĩka na aimũtanĩthya Yeova. Kũmũtanĩthya Yeova nĩwʼo ũndũ ũla mwĩĩtu ũsu woonaa wĩ wa vata kwĩ kũtwawa na kwĩthĩwa na syana. Kwoou mwĩĩtu ũsu oona nĩ ũndũ mũseo kuma mũsyĩ na aithi kwĩkalaa nyũmbanĩ ya Yeova nginya kĩkwʼũ kyake.

Wĩona ũndũ ũla mwĩĩtu ũsu weekie ta wamũtanĩthisye ĩthe wake na watanĩthya Yeova?— Ĩĩ, nĩwamatanĩthisye! Ethĩwa nũmwendete Yeova na nĩwĩkaa ũndũ weewa, nũtonya kwĩthĩwa ũilyĩ ta mwĩĩtu wa Yevitha, na ũimatanĩthya mũno asyai maku o vamwe na Yeova.