Makũlyo Kuma Kwa Asomi Maitũ

Nĩkĩ Ngũsĩ sya Yeova ikũnaa visa wa mũtũmwa Vaulo e na mũtwe wĩ na ũvaa kana nzwʼĩĩ nini?

Tũineena ũla wʼo, vai mũndũ wĩsĩ nesa sula wa Vaulo. Visa syake ila twonaa mavukunĩ maitũ syĩthĩawa syĩkĩte o kũsolwa, ti visa itonya kũĩkĩĩthwʼa vyũ na syĩndũ mbĩnze sya tene.

Ĩndĩ ve ũvoo ũtonya kũtũtetheesya kũmanya ũndũ Vaulo wailyĩ. Kwa ngelekanyʼo, ĩkaseti ya Zion’s Watch Tower ya 01/03/1902 nĩyawetie ĩvuku yĩmwe yaeleetye o vanini wũmbo wa Vaulo. Yaisye: ‘Ĩvukunĩ yĩtawa “Acts of Paul and Thecla” nĩvaeleetwʼe ũndũ Vaulo wailyĩ. Ĩvuku yĩu yaandĩkiwe ta mwaka wa 150 ĩtina wa Klĩsto, na nĩvatonyeka asu makethĩwa no mo maelesyo ala ma kwĩkwatwʼa vyũ na ma wʼo. Ĩvukunĩ yĩu aeleetwʼe ta mũndũ “wĩ mwĩĩ mũnini, wĩ ũvaa, wĩ matengʼe, mũlũmu, wĩ syĩnzakuva itinene, na ĩnyũũ ĩasa.”’

Ĩvuku yĩtawa The Oxford Dictionary of the Christian Church (ya 1997) yĩneeneete maelesyo ma Acts of Paul and Thecla yĩkasya: “Nĩvatonyeka maelesyo ala me ĩvukunĩ ya ‘Acts’ makethĩwa me o na ũwʼo wĩ vandũ.” Ĩvuku ya Acts of Paul and Thecla yaĩ ya kwĩkwatwʼa mũno o na myaka maana meana ũna kuma yaandĩkwa. Twĩasya ũu nũndũ ũmũnthĩ mavuku ma tene 80 ma Kĩkiliki ma ĩvuku yĩu no makwatĩkane, na no yĩkwatĩkanaa na ithyomo ingĩ. Kwoou visa sya Vaulo ila syĩthĩawa mavukunĩ maitũ nĩsyosyanĩte na maelesyo ala me mavukunĩ amwe ma tene.

Ĩndĩ lilikana ve maũndũ angĩ ma vata ma Vaulo eka sula wake. O na ĩla waendeee na ũthũkũmi wake, andũ amwe masyaasya mũno wũmbo wake maisye kana “yĩla wĩ vo mwĩĩnĩ nĩ kyonze, na ũneeni wake ndwĩ ũndũ ũtonya.” (2 Ako. 10:10) Ĩndĩ lilikana kana Vaulo o ũsu no we ũla watwʼĩkie Mũklĩsto ĩtina wa kumĩlĩĩlwa nĩ Yesũ kwa nzĩa ya kyama. Kĩngĩ kya vata nĩ kĩla weanĩisye e “mũio mũnyuve [kwa Klĩsto], wa ũkua syĩtwa [ya Yesũ] kwa Andũ-ma-mbaĩ-ingĩ.” (Meko 9:3-5, 15; 22:6-8) Na eka ũu, no tũtetheke mũno twasoma mavuku ala waveveewe nĩ Yeova aandĩka.

Vaulo ndaatinda ayĩkathĩĩa nũndũ wa maũndũ ala weanĩĩtye atanamba kũtwʼĩka Mũklĩsto. O na vai vandũ ũeleetye wũmbo wake. (Meko 26:4, 5; Avi. 3:4-6) Aisye atĩĩ: “Nyie nĩ mũnini kwĩ atũmwa onthe, ũla ũtaĩle kwĩtwa mũtũmwa.” (1 Ako. 15:9) Na ĩtina esie kũandĩka ũũ: “Nyie ũla nĩ mũnini kwĩ ũla mũnini mbee katĩ wa atheu onthe, nĩnanengiwe mumo ũũ, kũtavanʼya kwa Andũ-ma-mbaĩ-ingĩ ũthwii wa Klĩsto ũla ũtatalĩka.” (Aev. 3:8) Vate nzika, ũvoo ũla Vaulo watavanasya nĩwʼo wĩ vata kwĩ kwĩthĩnyʼa tũyenda kũmanya sula wake.