Kroniiki takayaɣ naalɛ ñɩŋga

2 Nɛ Salomɔɔ ha nɔɔ se pama ɖɩɣa ŋga keyeki nɛ Yehowa hɩɖɛ sɛɛ yɔ*+ nɛ ɛ-maɣmaɣ e-kewiyaɣ ɖɩɣa.+ 2 Salomɔɔ kaalɩzɩ abalaa 70 000 se pɛkɛ wondu sɩɣlɩyaa,* abalaa 80 000 se pɛkɛ pɛɛ saɣyaa pʋŋ taa,+ nɛ abalaa 3 600 se pɛkɛ pɔ-yɔɔ cɔnɩyaa.+ 3 Pɩtasɩ lɛ, Salomɔɔ tiyaa se peheyi Tiirɩ wiyaʋ Hiram+ se: «Labɩ-m ɛzɩ ŋŋlabʋ man-caa Daviid alɩwaatʋ ndʋ ŋtiyini-i sɛɛdrɩ ɖasɩ se ɛma ɖɩɣa* nɛ ɛwɛɛ ka-taa yɔ.+ 4 Lɛɛlɛɛyɔ lɛ, mɛwɛɛ nɛ mamaɣ ɖɩɣa ŋga keyeki nɛ mɛ-Ɛsɔ Yehowa hɩɖɛ sɛɛ yɔ,* se manpɩsɩ-ɩ kɛ kiɖeɖeɣa, se mɔnsɔ miŋ ŋgee tɩlaaɖɩ sɔzɩŋ ñɩŋgʋ+ ɛ-ɛsɩndaa, nɛ ɖɔɖɔ se pasɩɩ tam kpɔnɔnaa mba patɩnɩɣ-wɛ ɖama yɔɔ yɔ*+ nɛ kɩlaŋ kɩñaɣzɩŋ, tanaŋ nɛ ɖanaɣ,+ Sabaatɩwaa yɔɔ,+ fenasɩ kɩfasɩ yɔɔ,+ nɛ ɖɛ-Ɛsɔ Yehowa kazandʋ alɩwaatʋ yɔɔ.+ Pɩkɛ Izrayɛɛlɩ tamtam paɣtʋ. 5 Ðɩɣa ŋga mɛwɛɛ nɛ mamaɣ yɔ kakaɣ kɛʋ sɔsɔɔ, mbʋ pʋyɔɔ yɔ ɖɛ-Ɛsɔ paɣlaa nɛ ɛkpaɖɩ ɛsɔnaa lalaa tɩŋa. 6 Nɛ apɩzɩɣ nɛ ɛma-ɩ ɖɩɣa? Mbʋ pʋyɔɔ yɔ ɛɛmakɩ ɛsɔdaa, ɛɛɛ, ɛsɔdaa kpeekpe;+ pʋyɔɔ lɛ ma yɔ anɩ nɛ mamaɣ-ɩ ɖɩɣa? Mbʋ manpɩzɩɣ nɛ mala yɔ lɛ se mama lone naɖɩyɛ nɛ palakɩ nɛ kɩlaŋ ñɔsɩ kpaɣ ɛ-ɛsɩndaa. 7 Lɛɛlɛɛyɔ lɛ tiyini-m nesi tɛɛ tʋmlaɖʋ weyi ɛwɛ niye sika, liidiye, ñɩɣyʋʋ kɩsɛɛmʋʋ,+ ñɩɣtʋ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ nɛ pɩsatʋ ndʋ tɩwɛ pʋlɔɔ yɔ tɩ-tʋmɩyɛ labɩnʋʋ taa yɔ, nɛ weyi ɛsɩm ɛzɩma palɩzɩɣ wondu nabʋyʋ yɔɔ yɔ. Ɛ nɛ me-nesi tɛɛ tʋmlaɖaa mba pɛwɛ niye nɛ man-caa Daviid kaalɩzaa yɔ,+ pakaɣ labʋ tʋmɩyɛ Yuuda nɛ Yeruzalɛm. 8 Nɛ tiyini-m ɖɔɖɔ Libaŋ sɛɛdrɩ ɖasɩ, jenevriyee ɖasɩ,+ nɛ algumim+ ɖasɩ, mbʋ pʋyɔɔ yɔ mansɩm camɩyɛ se ña-lɩmɖʋyaa wɛ niye Libaŋ+ tɩŋ tim taa. Ma-lɩmɖʋyaa nɛ ña-lɩmɖʋyaa pakaɣ kpɛndʋʋ nɛ pala tʋmɩyɛ+ 9 nɛ pɔñɔɔzɩ-m ɖasɩ sakɩyɛ, mbʋ pʋyɔɔ yɔ ɖɩɣa ŋga mancaɣ maʋ yɔ kakaɣ paɣlʋʋ siŋŋ. 10 Na! Mankaɣ haʋ tɔɔnaɣ ña-lɩmɖʋyaa,+ tɩŋ sɛtɩyaa mba petiŋ tɩŋ yɔ: blee kɔɔrwaa* 20 000, orjɩ kɔɔrwaa 20 000, vɛɛ batwaa* 20 000, nɛ num batwaa 20 000.»

11 Peeɖe Tiirɩ wiyaʋ Hiram ma tɔm tʋnɛ nɛ etiyini Salomɔɔ: «Yehowa sɔɔlɩ ɛ-samaɣ, pʋyɔɔ ɛpɩsɩ-ŋ ke-wiyaʋ.» 12 Nɛ Hiram yɔɔdɩ se: «Pasa Izrayɛɛlɩ tɛ Ɛsɔ Yehowa, weyi ɛlabɩ ɛsɔdaa nɛ tɛtʋ yɔ, mbʋ pʋyɔɔ yɔ ɛha pɩyalʋ lɔŋsɩnɖʋ nɔɔyʋ Wiyaʋ Daviid,+ ɛha-ɩ lɛɣtʋ nɛ tɔm taa nɩʋ lɛɣtʋ,+ ɛnʋ kaɣnɩ maʋ Yehowa ɖɩɣa nɛ ɛ-maɣmaɣ e-kewiyaɣ ɖɩɣa. 13 Lɛɛlɛɛyɔ lɛ, mentiyiɣni-ŋ nesi tɛɛ tʋmlaɖʋ weyi ɛwɛ niye yɔ, weyi ɛwɛnɩ tɔm taa nɩʋ lɛɣtʋ yɔ, Hiram-Abi;+ 14 ɛkɛ halʋ Daanɩ tʋ nɔɔyʋ pɩyalʋ ɛlɛ ɛ-caa kɛ Tiirɩ tʋ; ɛwɛ niye sika, liidiye, ñɩɣyʋʋ kɩsɛɛmʋʋ, ñɩɣtʋ, pɛɛ, ɖasɩ, heŋ hʋndʋ kɩsɛɛmtʋ yuulee, pɩsatʋ ndʋ tɩwɛ pʋlɔɔ yɔ, pɩsaŋ kɩbaŋ, nɛ pɩsatʋ kɩsɛɛmtʋ cɩɩɩ+ pa-tʋmɩyɛ labɩnʋʋ taa. Ɛpɩzɩɣ nɛ ɛlɩzɩ paa wondu ndʋ nabʋyʋ yɔɔ, nɛ paa ɛbɛ patɩɩpɔzɩ-ɩ se ɛlɩzɩ yɔ ɛlɩzɩɣ-pʋ.+ Ɛ nɛ ña-maɣmaɣ ñe-nesi tɛɛ tʋmlaɖaa mba pɛwɛ niye yɔ nɛ man-kɩbaɣlʋ ña-caa Daviid nesi tɛɛ tʋmlaɖaa mba pɛwɛ niye yɔ pakaɣnɩ labʋ tʋmɩyɛ. 15 Lɛɛlɛɛyɔ lɛ, man-kɩbaɣlʋ etiyini blee, orjɩ, num, nɛ vɛɛ, mbʋ ɛɛyɔɔdaa se ɛhaɣ ɛ-lɩmɖʋyaa yɔ.+ 16 Nɛ ɖɩkaɣ tim Libaŋ tɩŋ+ nɛ ɩɖɔɔ ɛzɩ ŋsɔɔlʋʋ yɔ, nɛ ɖɩkaɣ-ɩ hɔkʋʋ hɔɔ hɔɔ nɛ ɖɩtɩŋnɩ teŋgu yɔɔ nɛ ɖitiyini-ŋ ɩ Yopee;+ nɛ ŋkaɣ-ɩ kpaɣʋ nɛ ŋkpanɩ Yeruzalɛm.»+

17 Nɛ Salomɔɔ kalɩ abalaa mba payɩ paakɛ agɔma Izrayɛɛlɩ ɛjaɖɛ taa yɔ pa-ñʋʋ,+ kɩgalʋʋ ŋgʋ ɛ-caa Daviid kaalaba yɔ kɩ-wayɩ,+ nɛ paakpɛndɩ 153 600. 18 Nɛ ɛlɩzɩ pa-taa 70 000 se pɛkɛ wondu sɩɣlɩyaa,* 80 000 se pɛkɛ pɛɛ saɣyaa+ pʋŋ taa, nɛ 3 600 se pɛkɛ mba pɔcɔŋnɩ ɛyaa yɔɔ se paba ɩla tʋmɩyɛ yɔ.+