Kroniiki takayaɣ kajalaɣ ñɩŋga

17 Daviid tɩɩkɔm nɛ ɛwɛɛ ɛ-maɣmaɣ ɛ-ɖɩɣa* taa lɛ, eheyi nayʋ Naataanɩ+ se: «Na, mɛwɛ sɛɛdrɩ tɩŋ ɖɩɣa taa,+ ɛlɛ Yehowa ɛgbɛyɛ ɖʋʋ aɖakaɣ ñɛwɛ kizinziku pɩsaŋ tɛɛ.»+ 2 Naataanɩ cosi Daviid se: «La mbʋ payɩ pɩwɛ ña-laŋɩyɛ taa yɔ, mbʋ pʋyɔɔ yɔ Ɛsɔ toovenim tʋ wɛ ñɔ-cɔlɔ.»

3 Ðoo ana maɣmaɣ, Ɛsɔ tɔm talɩ Naataanɩ se: 4 «Wolo nɛ ŋheyi ma-lɩmɖʋyʋ Daviid se: “Tɔm tʋnɛ Yehowa yɔɔdʋʋ: ‘Pɩtɩkɛ ñakaɣnɩ-m maʋ ɖɩɣa se mancaɣ ka-taa.+ 5 Mbʋ pʋyɔɔ yɔ mantɩcaɣ ɖɩɣa nakɛyɛ taa kpaɣnɩ kɩyakʋ ŋgʋ malɩzɩ Izrayɛɛlɩ nɛ pɩkɔɔ pɩtalɩnɩ kɩyakʋ kʋnɛ yɔ, ɛlɛ maawɛɛ nɛ mowoki kpaɣ kizinziku nɛ ŋwolo kizinziku, nɛ kpaɣ Ɛsɔ sɛtʋ kɩɖanɖʋʋ nɛ ŋwolo lɛɛkʋ.*+ 6 Alɩwaatʋ ndʋ payɩ ma nɛ Izrayɛɛlɩ kpeekpe ɖɩɖɔŋaɣ yɔ, wiɖiyi mɛntɛm pɔzʋʋ Izrayɛɛlɩ tɔm hʋyaa mba malɩzaa se peɖiyi man-samaɣ yɔ pa-taa nɔɔyʋ se: “Ɛbɛ yɔɔ ɩtɩma-m sɛɛdrɩ tɩŋ ɖɩɣa?”’”

7 «Lɛɛlɛɛyɔ lɛ, heyi tɔm tʋnɛ ma-lɩmɖʋyʋ Daviid: “Tɔm tʋnɛ yoyaa tɛ Yehowa yɔɔdʋʋ: ‘Mankpaɣ-ŋ nɛ lona wena a-taa kpɩna tɔkɩ ñɩtʋ yɔ, ŋtɩŋaɣ kpɩna lɛ, se ŋpɩsɩ man-samaɣ Izrayɛɛlɩ ɖiyiyu.+ 8 Nɛ mankaɣ wɛʋ ñɔ-cɔlɔ paa le ŋwoki yɔ,+ nɛ mankaɣ ɖɩzʋʋ ño-koyindinaa tɩŋa ñɛ-ɛsɩndaa;+ nɛ mankaɣ yebu nɛ ña-hɩɖɛ sɛɛ ɛzɩ ɛyaa sɔsaa mba pa-hɩla sɛ tɛtʋ yɔɔ yɔ.+ 9 Mankaɣ lɩzʋʋ man-samaɣ Izrayɛɛlɩ lone naɖɩyɛ nɛ mansɩɩ-kɛ peeɖe, nɛ kakaɣ wɛʋ peeɖe nɛ nɔɔyʋ ɛɛkaɣ-kɛ tasʋʋ cɛyʋʋ; nɛ ɛyaa kɩdɛkɛdaa ɩɩkaɣ-kɛ tasʋʋ nazʋʋ* ɛzɩ paalabʋ-kɛ nɛ pɩɖɛɛ yɔ,+ 10 kpaɣnɩ kɩyakʋ ŋgʋ malɩzɩ tɔm hʋyaa se peɖiyi man-samaɣ Izrayɛɛlɩ yɔ.+ Nɛ mankaɣ luzuu ño-koyindinaa kpeekpe ñɛ-tɛɛ.+ Pɩtasɩ lɛ, meheyiɣ-ŋ se Yehowa kaɣ-ŋ maʋ ɖɩɣa.*

11 «“‘Ña-kɩyakɩŋ kɔŋ nɛ ɩtɛ nɛ ŋwolo ŋwɛɛ ñɔ-cɔzɔnaa cɔlɔ lɛ, mankaɣ lɩzʋʋ ña-lʋlʋʋ taa tʋ nɔɔyʋ* ña-wayɩ, ña-pɩyalaa taa nɔɔyʋ,+ nɛ mankaɣ kam e-kewiyitu camɩyɛ.+ 12 Ɛnʋ kaɣnɩ-m maʋ ɖɩɣa,+ nɛ mankaɣ kam e-kewiyaɣ kpelaɣ camɩyɛ tam.+ 13 Mankaɣ pɩsʋʋ ɛ-caa, nɛ ɛkaɣ pɩsʋʋ man-pɩyalʋ.+ Maakaɣ mʋʋ mɔn-sɔɔlɩm siɣsiɣ ñɩmbʋ ɛ-cɔlɔ+ ɛzɩ maamʋʋ-pʋ weyi ɛɛlɛyɩ-ŋ wɛʋ yɔ ɛ-cɔlɔ yɔ.+ 14 Mankaɣ yebu nɛ ɛsɩŋ man-ɖɩɣa taa nɛ men-kewiyitu taa tam,+ nɛ e-kewiyaɣ kpelaɣ kaɣ wɛʋ tam.’”»+

15 Naataanɩ heyi Daviid tɔm ndʋ tɩ-tɩŋa nɛ natʋ ndʋ tɩ-tɩŋa.

16 Peeɖe Wiyaʋ Daviid sʋwa nɛ ɛcaɣ Yehowa ɛsɩndaa nɛ ɛyɔɔdɩ se: «Hayɩ Yehowa Ɛsɔ, ma lɛ anɩ? Nɛ ɛbɛ man-ɖɩɣa kɛnaa nɛ ŋlabɩ-m pɩtɩŋa payɩ mbʋ yɔ?+ 17 Hayɩ Ɛsɔ, ñɛ-ɛsɩndaa lɛ pɩtɩmaɣta, nɛ ŋyɔɔdɩ ɖɔɖɔ mbʋ pɩkaɣ labʋ ña-lɩmɖʋyʋ ɖɩɣa yɔ pɩ-tɔm, nɛ pɩkɔɔ nɛ pɩtalɩ ɖooo cee wayɩ alɩwaatʋ taa,+ nɛ ŋcɔnɩ-m ɛzɩ mɛnkɛ ɛyʋ weyi pɩwɛɛ se pakpazɩ-ɩ ɛsɔdaa nɛ pɩkɩlɩ yɔ,* hayɩ Yehowa Ɛsɔ. 18 Suwe ma ña-lɩmɖʋyʋ Daviid manpɩzɩɣ nɛ mantasɩ-ŋ heyuu hɩɖɛ nɖɩ ŋɖʋ-m yɔ ɖɩ-yɔɔ, mbʋ pʋyɔɔ yɔ ŋsɩm ña-lɩmɖʋyʋ camɩyɛ siŋŋ?+ 19 Hayɩ Yehowa, ña-lɩmɖʋyʋ yɔɔ nɛ mbʋ ŋɖʋ ña-laŋɩyɛ taa yɔ* pʋyɔɔ lɛ, ŋlabɩ lakasɩ sɔsɔsɩ nzɩ sɩ-tɩŋa nɛ ŋlɩzɩ ñɔ-sɔsɔtʋ nɛ ŋwɩlɩ.+ 20 Hayɩ Yehowa, nɔɔyʋ fɛyɩ ɛzɩ ña yɔ,+ nɛ Ɛsɔ nɔɔyʋ fɛyɩ nɛ pɩtasɩnɩ-ŋ;+ tɔm ndʋ payɩ ɖɩnɩnɩ ɖa-nɩŋgbaaŋ yɔ tɩwɩlɩɣ se pɩkɛ toovenim. 21 Nɛ ɛjaɖɛ lɛɛɖɛ nɖɩ wɛ tɛtʋ yɔɔ ɛzɩ ña-samaɣ Izrayɛɛlɩ yɔ?+ Ña Ɛsɔ toovenim tʋ, ŋwoba nɛ ŋyabɩ-kɛ nɛ kɛkɛ ña-samaɣ.+ Ŋtɩŋnɩ lakasɩ sɔsɔsɩ nɛ maamaaci lakasɩ nzɩ ŋlabɩ-kɛ yɔ sɩ-yɔɔ nɛ ŋla nɛ ña-hɩɖɛ sɛɛ,+ nɛ ŋɖɔɔnɩ ajɛɛ, ña-samaɣ ŋga ŋyabɩ Ejipiti taa yɔ kɛ-ɛsɩndaa.+ 22 Ŋlaba nɛ ña-samaɣ Izrayɛɛlɩ kɛ ña-maɣmaɣ ña-samaɣ tam;+ nɛ ña lɛ, hayɩ Yehowa, ŋpɩsɩ kɛ-Ɛsɔ.+ 23 Lɛɛlɛɛyɔ, hayɩ Yehowa, yele nɛ lidaʋ tɔm ndʋ ŋyɔɔdɩ ña-lɩmɖʋyʋ nɛ ɛ-ɖɩɣa pɔ-yɔɔ yɔ tɩwɛɛ tam, nɛ ŋla ɖeyi ɖeyi ɛzɩ ŋyɔɔdʋʋ yɔ.+ 24 Ña-hɩɖɛ ɛwɛɛ tam* nɛ pasam-ɖɩ tam,+ se pɩsa nɛ ɛyaa yɔɔdɩ se: “Yoyaa tɛ Yehowa, Izrayɛɛlɩ tɛ Ɛsɔ, kɛ Ɛsɔ Izrayɛɛlɩ yɔɔ,” nɛ ña-lɩmɖʋyʋ Daviid ɖɩɣa ɛka camɩyɛ ñɛ-ɛsɩndaa.+ 25 Mbʋ pʋyɔɔ yɔ ña, mɛ-Ɛsɔ, ŋkuli ña-tamaɣ yɔɔ nɛ ŋwɩlɩ ña-lɩmɖʋyʋ se ŋmaɣ-ɩ ɖɩɣa.* Pʋyɔɔ ña-lɩmɖʋyʋ taa tɛma nɛ ɛtɩmɩɣnɩ-ŋ adɩma anɛ. 26 Nɛ lɛɛlɛɛyɔ lɛ, hayɩ Yehowa, ŋkɛ Ɛsɔ toovenim tʋ, nɛ ŋyɔɔdaa se ŋkaɣ labʋ lakasɩ kɩbanzɩ nzɩ ña-lɩmɖʋyʋ. 27 Ye mbʋ, tɛtɛ nɛ pɩkɛdɩnɩ-ŋ nɛ ŋwazɩ ña-lɩmɖʋyʋ ɖɩɣa yɔɔ, nɛ ŋyele nɛ kɛwɛɛ tam ñɛ-ɛsɩndaa; mbʋ pʋyɔɔ yɔ ña, hayɩ Yehowa, ŋwazɩ-kɛ, nɛ ña-wazaɣ wɛ kɔ-yɔɔ tam.»