Ebree mba
12 Ye mbʋ, ɖɩwɛnɩ aseɣɖe tɩnaa mba pɛwɛ ɛzɩ ɛsɔmɩnʋʋ sɔsɔʋ nɛ pɔcɔ-ɖʋ nɛ pata yɔ; pʋyɔɔ lɛ, iyele ɖɔɖɔ nɛ ɖɩlɔ sʋʋtʋ kpeekpe nɛ kɩwɛɛkɩm mbʋ pɩkaɣdɩɣ-ɖʋ kɛlɛʋ yɔ,+ nɛ ɖise seya wena pasɩ ɖɛ-ɛsɩndaa yɔ nɛ laŋɩyɛ ɖɔkʋʋ,+ 2 nɛ ɖɛ-ɛsa wɛɛ Ðiyiyu Sɔsɔ nɛ Weyi ɛlakɩ se ɖe-tisuu ɛtalɩ pilim yɔ ɛ-yɔɔ, ɛnʋ lɛ Yesu.+ Taa leleŋ weyi paasɩ ɛ-ɛsɩndaa yɔ, ɛ-yɔɔ lɛ, ɛɖɔkɩ ɛ-laŋɩyɛ nazɩm sizika* yɔɔ, nɛ eni fɛyɛ, nɛ ɛcaɣ Ɛsɔ kewiyaɣ kpelaɣ nɩwaŋ yɔɔ.+ 3 Toovenim taa lɛ, ɩmaɣzɩ camɩyɛ weyi ɛɖɔkɩ ɛ-laŋɩyɛ kɩwɛɛkɩm laɖaa tɔm kɩdɛkɛdɩtʋ taa yɔ ɛ-yɔɔ,+ tɔm ndʋ tɩkaɖɩɣnɩ pa-maɣmaɣ pɛ-kɛzɛsɩ yɔ, se pɩsa nɛ pɩtaanɩɩ-mɩ nɛ ɩlɔ nɛ ise.*+
4 Lʋbɩyɛ nɖɩ ɩwɛɛ nɛ ɩlʋkɩnɩ kɩwɛɛkɩm mbʋ yɔ ɖɩ-taa lɛ, ɩtɩtɩɩlʋbɩtɩ kaaʋ nɛ pɩtalɩ ɖenɖe pɩpɔzʋʋ se ɩkpɛdɩ mɩ-calɩm yɔ. 5 Nɛ ɩsɔ tɔm ndʋ pɔyɔɔdaa se peseɣtini-mɩ ɛzɩ pɩyalaa yɔ tɩ-yɔɔ caɣ caɣ: «Man-pɩyalʋ, taani Yehowa* lɔŋ sɩɣzʋʋ, pitaatibi-ŋ ɖɔɖɔ yɔɔɔ alɩwaatʋ ndʋ ɛñɔɔzʋʋ-ŋ yɔ; 6 mbʋ pʋyɔɔ yɔ mba Yehowa* sɔɔlɩ-wɛ yɔ, ɛsɩɣzɩɣ-wɛ lɔŋ; toovenim taa lɛ, ɛmakɩ weyi ɛmʋʋ-ɩ ɛzɩ pɩyalʋ yɔ.»*+
7 Pɩpɔzʋʋ se ɩɖɔkɩ mɩ-laŋɩyɛ mbʋ pʋyɔɔ yɔ pɩkɛ mɩ-lɔŋ sɩɣzʋʋ* hɔɔlʋʋ nakʋyʋ. Ɛsɔ lakɩ-mɩ ɛzɩ ɛ-pɩyalaa yɔ.+ Mbʋ pʋyɔɔ yɔ pɩyalʋ weyi wɛɛ nɛ ɛ-caa ɛɛsɩɣzɩɣ-ɩ lɔŋ?+ 8 Ɛlɛ ye mɩ-tɩŋa ɩtɩmʋ lɔŋ sɩɣzʋʋ mbʋ yɔ, toovenim taa ɩtɩkɛ e-piya maɣmaɣ, ɛlɛ ɛyʋ lɛlʋ piya. 9 Pɩtasɩ lɛ, ɖa-caanaa mba pɛkɛ ɛyaa yɔ* pasɩɣzaɣ-ɖʋ lɔŋ, nɛ ɖɩñaŋaɣ-wɛ. Pɩfɛyɩ se ɖiluzi ɖa-tɩ faaa ɖe-fezuu taa wezuu Caa tɛɛ nɛ pɩkɩlɩ nɛ ɖɩcaɣ wezuu yaa we?+ 10 Mbʋ pʋyɔɔ yɔ, paba lɛ, pasɩɣzaɣ-ɖʋ lɔŋ alɩwaatʋ pazɩ nɛ pɩlakɩ nɔɔ kʋɖʋmaɣ nɛ mbʋ pamaɣzɩɣ se pɩwɛ ɖeu yɔ; ɛlɛ ɛnʋ lɛ, ɛlakɩ mbʋ se pɩwazɩ-ɖʋ nɛ ɖɩpɩzɩ ɖihiɣ ɖɔɖɔ e-kele kele wɛtʋ.+ 11 Toovenim lɛ, nɩŋgbaŋʋʋ hɔm* nabʋyʋ fɛyɩ se pɩkɛ taa leleŋ pʋyʋ lɛɛlɛɛyɔ, ɛlɛ pɩkɛ wɩzasɩ;* paa mbʋ yɔ, pʋwayɩ lɛ, mba pɩfalɩsɩ-wɛ yɔ pɩlʋlʋʋ-wɛ siɣsiɣ wɛtʋ laŋhɛzɩyɛ piye.
12 Pʋyɔɔ lɛ, ɩkpazɩ ɖoŋ nesi nzɩ sitibi yɔɔɔ nɛ nʋmbɔla wena ayɔba yɔ,+ 13 nɛ itaayele ɖʋʋ nʋmɔŋ weyi ɩtʋʋzaa yɔ mɩ-nɩŋgbanzɩ,+ se pɩsa nɛ mbʋ pɩcamaa yɔ pitaaposini ɖɩdanɖɛ, ɛlɛ pɩpɩzɩ nɛ pɩwaa. 14 Ɩñaɣ pana nɛ laŋhɛzɩyɛ wɛɛ mɩ nɛ ɛyaa kpeekpe mɩ-hɛkʋ taa,+ nɛ ɩñɩnɩ kele kele wɛtʋ;+ ye nɔɔyʋ ɛfɛyɩnɩ-tʋ yɔ, ɛɛkaɣ naʋ Kɩbaɣlʋ. 15 Ifeŋ camɩyɛ nɛ nɔɔyʋ ɛtaawɛɛ nɛ eehikiɣ Ɛsɔ lootiye, se pɩsa nɛ sɔtʋ liɖe naɖɩyɛ ɛtaañɔ nɛ pɩkɔnɩ kaɖɛ nɛ ɖipisi ɛyaa sakɩyɛ;+ 16 nɛ ifeŋ ɖɔɖɔ nɛ nɔɔyʋ ɛtaawɛɛ mɩ-hɛkʋ taa nɛ ɛkɛ weyi ɛcakɩ kʋzʋʋ kɩdɛkɛdʋʋ* wezuu yɔ, nɛ nɔɔyʋ ɛtaawɛɛ ɖɔɖɔ nɛ ɛɛkpakɩɣ wondu kiɖeɖetu nɛ ɛyaɣ pʋyʋ, ɛzɩ Ezaawuu weyi ɛkpaɣ kajalaɣ pɩɣa waɖɛ nɛ ɛlɛɣzɩnɩ tɔɔnaɣ kʋɖʋmaɣ yɔ.+ 17 Mbʋ pʋyɔɔ yɔ ɩsɩm mbʋ se pʋwayɩ, alɩwaatʋ ndʋ ɛñɩnaɣ se ehiɣ wazaɣ yɔ, pɔlɔ-ɩ; mbʋ pʋyɔɔ yɔ paa ɛɛñaɣ pana siŋŋ nɛ ɛsɩtɛɣlɩm se ɛla nɛ ɛ-caa lɛɣzɩ lɩmaɣza yɔ,+ ɛtɩpɩzɩ.
18 Mbʋ pʋyɔɔ yɔ ɩtɩñɔtɩnɩ mbʋ papɩzɩɣ nɛ potukuna yɔ,+ mbʋ pɩmʋwaɣ miŋ pelu pelu yɔ,+ yaa ɛsɔmɩnʋʋ ŋgʋ kiiyu cɩkpɛndʋʋ yɔ yaa cɩkpɛndʋʋ sɔsɔʋ yaa tɛʋ sɔsɔʋ ŋgʋ kɩnɩɣaɣnɩ helim yɔ,+ 19 yaa ɛgandɩyɛ wiluu+ yaa nɔɔ ŋga kɔyɔɔdaɣ yɔ,+ ŋga samaɣ nɩ ka-taŋ nɛ ketendi se pataatasɩ-kɛ natʋyʋ heyuu yɔ.+ 20 Mbʋ pʋyɔɔ yɔ sɔɔndʋ kpaɣaɣ-kɛ siŋŋ nɛ paɣtʋ tʋnɛ: «Paa kpɩnɛ naɖɩyɛ etukunini pʋʋ yɔ, pɩwɛɛ se payaɣ-ɖɩ pɛɛ.»+ 21 Pɩtasɩ lɛ, mbʋ pɩɩlaba yɔ pɩɩwɛ sɔɔndʋ siŋŋ nɛ Moyizi yɔɔdɩ se: «Sɔɔndʋ kpaɣ-m nɛ menseliɣ.»+ 22 Ɛlɛ ɩñɔtɩnɩ Siyɔŋ Pʋʋ+ nɛ Ɛsɔ ɛsadʋ tɛtʋ, ɛsɔdaa Yeruzalɛm,+ nɛ Ɛsɔ tiyiyaa kudokiŋ kudokiŋ* 23 mba paakpeɣlaa yɔ,+ nɛ kajalaɣ piya nzɩ pama sɩ-hɩla ɛsɔdaa yɔ sɩ-ɛgbɛyɛ, nɛ Ɛsɔ weyi ɛkɛ paa weyi ɛ-Tɔm Hʋyʋ yɔ,+ nɛ ɛyaa siɣsiɣ tɩnaa mba palabɩ-wɛ nɛ patalɩ pilim yɔ+ pe-fezuu taa weziŋ,+ 24 nɛ Yesu weyi ɛkɛ ɛgbɛyɛ kɩfaɖɛ+ loliyu yɔ,+ nɛ calɩm mbʋ pamɩzaa yɔ, mbʋ pɩyɔɔdʋʋ camɩyɛ nɛ pɩkɩlɩ Aabɛɛlɩ calɩm yɔ.+
25 Ɩkpa mɩ-tɩ nɛ itaakizi welisinuu* weyi eɖiɣni yɔɔdʋʋ yɔ. Mbʋ pʋyɔɔ yɔ ye mba paakizaa se paawelisiɣni weyi ɛcɛlaɣ-wɛ Ɛsɔ paɣtʋ tɛtʋ yɔɔ yɔ patɩlɩɩ pɩ-taa yɔ, ɛzɩma ɖɩkaɣ lɩʋ pɩ-taa ye ɖɩha siɣye weyi ɛyɔɔdʋʋnɩ-ɖʋ nɛ ɛsɔdaa kiŋ yɔ!+ 26 Alɩwaatʋ ndʋ tɩ-taa lɛ, ɛ-nɔɔ kaañamsɩ tɛtʋ,+ ɛlɛ lɛɛlɛɛyɔ ɛlabɩ tamaɣ kanɛ: «Mankaɣ tasʋʋ ñamsʋʋ tɛtʋ, ɛlɛ pɩɩkɛɣnɩ ti-ɖeke, mañamsɩɣ ɛsɔdaa ɖɔɖɔ.»+ 27 Nɛ ɛyɔɔdʋʋ se «mankaɣ tasʋʋ» yɔ, pɩwɩlɩɣ se paɖɩzɩɣ wondu ndʋ pañamsɩ-tʋ yɔ, wondu ndʋ palabɩ-tʋ yɔ, se pɩsa nɛ wondu ndʋ patɩñamsɩ-tʋ yɔ tɩwɛɛ. 28 Ye mbʋ, ɖɩkaɣ mʋʋ Kewiyaɣ ŋga paapɩzɩɣ nɛ pañamsɩ-kɛ yɔ, pʋyɔɔ lɛ iyele nɛ ɖɩwɛɛ lootiye mʋʋ yɔɔ, nɖɩ ɖɩ-yɔɔ ɖɩpɩzɩɣ ɖɩtɩŋna nɛ ɖɩla Ɛsɔ tʋmɩyɛ kiɖeɖeye nɖɩ ɖɩkɛdɩɣnɩ-ɩ yɔ, Ɛsɔ sɔɔndʋ seu nɛ ñamtʋ sɔsɔtʋ taa. 29 Mbʋ pʋyɔɔ yɔ ɖɛ-Ɛsɔ kɛ miŋ weyi ɛɖɩzɩɣ wondu caɣ caɣ yɔ.+