Kroniiki takayaɣ naalɛ ñɩŋga

5 Nɛ Salomɔɔ tɛ Yehowa ɖɩɣa tʋma wena payɩ pɩɩwɛɛ se ɛla yɔ.+ Pʋwayɩ lɛ, Salomɔɔ sʋnɩ wondu ndʋ ɛ-caa Daviid kaapɩsɩ-tʋ kiɖeɖetu yɔ ka-taa,+ nɛ ɛkpaɣ liidiye ñɩɣtʋ, sika nɛ wondu lɛɛtʋ kpeekpe nɛ ɛsɩɩ Ɛsɔ toovenim tʋ ɖɩɣa ñɩm ɖɩzɩyɛ taa.+ 2 Alɩwaatʋ ndʋ tɩ-taa lɛ, Salomɔɔ kpeɣli Izrayɛɛlɩ ɛzʋtʋyaa, cejewe ñʋndɩnaa kpeekpe, Izrayɛɛlɩ ɛjaɖɛ taa caanaa ɖɩsɩ ñʋndɩnaa. Pɔkɔɔ Yeruzalɛm se pakpaɣ Yehowa ɛgbɛyɛ ɖʋʋ aɖakaɣ Daviid Tɛtʋ taa,+ pʋ-tɔbʋʋ se Siyɔŋ,+ nɛ pakpanɩ-kɛ. 3 Izrayɛɛlɩ ɛyaa kpeekpe kpeɣli wiyaʋ ɛsɩndaa kazandʋ* taa, fenaɣ 7 ñɩŋga taa.+

4 Nɛ Izrayɛɛlɩ ɛzʋtʋyaa kpeekpe kɔɔ, nɛ Leevi mba kʋsɩ Aɖakaɣ.+ 5 Pakpanɩ Aɖakaɣ, kediɣzaɣ kizinziku,+ nɛ wondu kiɖeɖetu ndʋ tɩɩwɛ kizinziku tɛɛ yɔ tɩ-tɩŋa. Cɔjɔnaa nɛ Leevi mba* pakpaɣnɩ pɩtɩŋa nɛ pakpana. 6 Wiyaʋ Salomɔɔ nɛ Izrayɛɛlɩ samaɣ kpeekpe taa ñɩma, mba paayawa se pakatɩ-ɩ yɔ, paawɛ Aɖakaɣ ɛsɩndaa. Nɛ paawɛɛ nɛ palaɣ heŋ nɛ naŋ sakɩyɛ+ nɛ pataapɩzɩɣ se pakalɩ-ɩ yaa patɩlɩ ɩ-ñʋʋ. 7 Pʋwayɩ lɛ, cɔjɔnaa woni Yehowa ɛgbɛyɛ ɖʋʋ aɖakaɣ ko-lone taa, ɖɩɣa tɛ ɖooo pɩ-taa kuduyuu taa, Lone Kiɖeɖeye nɖɩ ɖɩkpaɖaa yɔ ɖɩ-taa, kerebimwaa keŋ tɛɛ.+ 8 Nɛ kerebimwaa keŋ posi lone nɖɩ ɖɩ-taa pasɩ Aɖakaɣ yɔ ɖɩ-ñʋʋ yɔɔ, piyeba nɛ kerebimwaa huuzi Aɖakaɣ nɛ ka-ɖaŋ+ yɔɔ nɛ hayo kiŋ. 9 Ðaŋ ɛnɩ ɩɖaɣlɩ siŋŋ nɛ ye ɛyʋ ɛwɛ Lone Kiɖeɖeye taa ɖooo pɩ-taa kuduyuu ɛsɩndaa yɔ, ɛpɩzɩɣ nɛ ɛna ɖaŋ ɛnɩ ɩ-nɔsɩ, ɛlɛ ye ɛyʋ ɛwɛnɩ awayɩ yɔ, ɛɛpɩzɩɣ nɛ ɛna-sɩ. Nɛ ɩwɛ peeɖe halɩ nɛ sɔnɔ. 10 Nabʋyʋ taawɛɛ Aɖakaɣ taa nɛ pɩtasɩnɩ pɩtaahalanzɩ 2 nzɩ Moyizi kaaɖʋ ka-taa Orɛɛbʋ egeetiye taa yɔ,+ alɩwaatʋ ndʋ Yehowa ɖʋ ɛgbɛyɛ+ nɛ Izrayɛɛlɩ samaɣ, kalɩnɩ Ejipiti lɛ.+

11 Cɔjɔnaa lɩnɩ lone kiɖeɖeye taa lɛ (mbʋ pʋyɔɔ yɔ cɔjɔnaa mba payɩ paawɛ peeɖe yɔ papɩsɩ pa-tɩ kiɖeɖema,+ paa pɩtɩɩkɛ tindimiye nɖɩ ɖɩ-taa pɛwɛɛ yɔ),+ 12 Leevi mba hendu teyaa tɩŋa,+ mba Azaafʋ,+ Hemaanɩ,+ Yedutuunɩ,+ nɛ pa-pɩyalaa nɛ po-koobiya peɖiyaɣ-wɛ yɔ, paasu pɩsaŋ kɩbaŋ wondu, pɔɖɔkɩ ŋgbamɛɛ, cɩmʋʋ wondu ndʋ tɩ-yɔɔ wɛ nimasɩ yɔ, nɛ cɩmɩŋ; paasɩŋ altaaru wɩsɩ ɖɩlɩyɛ hɔɔlʋʋ taa, nɛ cɔjɔnaa 120 kaawɛ pɔ-cɔlɔ nɛ pahʋlʋʋ aganda.+ 13 Aganda hʋlɩyaa nɛ hendu teyaa pɛkpɛndaa nɛ pasaŋ Yehowa nɛ pɛsɛɣ-ɩ se ɛlabaɣ lɛ, nɛ aganda, ŋgbamɛɛ, nɛ minziiki wondu lɛɛtʋ wiɣ, alɩwaatʋ ndʋ pɛwɛɛ nɛ pasaŋ Yehowa nɛ pɔtɔŋ se, «mbʋ pʋyɔɔ yɔ ɛwɛ ɖeu; ɛ-sɔɔlɩm siɣsiɣ ñɩmbʋ wɛ tam»+ yɔ. Alɩwaatʋ ndʋ lɛ, ɛsɔmɩnʋʋ tii nɛ kisu ɖɩɣa taa, Yehowa ɖɩɣa taa.+ 14 Ɛsɔmɩnʋʋ ŋgʋ kɩ-yɔɔ lɛ, cɔjɔnaa taapɩzɩɣ se pasɩŋ nɛ pala pa-tʋmɩyɛ, mbʋ pʋyɔɔ yɔ Yehowa samtʋ kaasu Ɛsɔ toovenim tʋ ɖɩɣa taa.+