Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
7-13 SEPTEMBRE
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 23-24
“Taatɩŋ ɛyaa sakɩyɛ”
(Ejipiti Lɩʋ 23:1) “Pɩtɩpɔzɩ se ŋyɛlɩnɩ tɔm ndʋ tɩtɩkɛ toovenim yɔ. Taapɩsɩ aseɣɖe tʋ weyi ɛyɔɔdʋʋ lalaa yɔɔ tɔm kɩdɛkɛdɩtʋ yɔ nɛ ŋɖʋ nesi ɛyʋ kɩdɛkɛdʋ.
Ŋtazɩ camɩyɛ nɛ ŋna se pɩkɛ toovenim na?
7 Ŋkɛ ɛyʋ weyi ɛsɔɔlɩ tiyinuu message waa nɛ tɔm lɛɛtʋ ɛ-taabalaa nɛ ɛ-ɛyɩsɩmaa yɔ? Ye ɛɛɛ yɔ, pɩtʋʋ fɛyɩ se alɩwaatʋ ndʋ ŋnaɣ tɔm kɩfatʋ natʋyʋ yaa ŋnɩɣ kɛdaɣ kɩfalaɣ nakɛyɛ tɔm susuu wondu yɔɔ yɔ, pɩlakɩ-ŋ ɛzɩ ŋtɩŋnɩ nʋmɔʋ nakʋyʋ yɔɔ nɛ ŋkɛ kajalaɣ tʋ weyi etiyini-tʋ yɔ. Paa mbʋ yɔ, pʋcɔ nɛ ŋtiyini tɔm natʋyʋ yaa message nakʋyʋ lɛ, pɔzɩ ña-tɩ se: ‘Man-taa tɛma se mbʋ mancaɣ tiyinuu yɔ pɩkɛ toovenim na? Mantazɩ camɩyɛ nɛ mana mbʋ pɩwɩlɩɣ se pɩkɛ toovenim yɔ?’ Ye ña-taa ɛtɩtɛ se tɩkɛ toovenim, ɛlɛ ŋtiyini-tʋ yɔ, pɩtɩla cɛtɩm tɔm ŋwɛɛ nɛ ŋtiyiɣni ño-koobiya mbʋ yɔ. Ye ŋpɩtɩɣ tɔm natʋyʋ yɔɔ yɔ, hɩzɩ-tʋ kpaagbaa.
8 Ye ɖɩnɩ tɔm kɩfatʋ natʋyʋ nɛ ɖɩsɔɔlɩ se ɖitiyini-tʋ lalaa lɛɛ lɛɛ yɔ, ɖɩpɩzɩɣ nɛ ɖɩkatɩ kaɖɛ naɖɩyɛ ɖɔɖɔ. Ajɛɛ naayɛ taa pɛwɛɛ pomuluu ɖo-koobiya nɛ paɖɩkɩ-wɛ nʋmɔʋ se pataala ɖɛ-Ɛsɔ sɛtʋ tʋmɩyɛ. Mba papaɖɩɣ-ɖʋ ajɛɛ ana a-taa yɔ, papɩzɩɣ nɛ pɛcɛtɩ ɖɔ-yɔɔ tɔm se paɖʋ-ɖʋ sɔɔndʋ yaa piyele nɛ ɖɩtaatasɩ ɖama taʋ liu. Payaɣaɣ ɛjaɖɛ naɖɩyɛ ɖooo lɛ se Union Soviétique; yele nɛ ɖɩna mbʋ pɩɩlabɩ ɖɩ-taa yɔ. Mɛsaɣ tɛɛ polisi ɛgbɛyɛ nɖɩ payaɣaɣ-ɖɩ se KGB yɔ, ɖiyeba nɛ cɛtɩm tɔm yɛlɩ se ɖo-koobiya mba pɛɖɛɣaɣ nɔɔ ɛgbɛyɛ taa yɔ, pa-taa nabɛyɛ lɩ Yehowa samaɣ wayɩ. Koobiya sakɩyɛ tisi tɔm ndʋ tɩ-yɔɔ nɛ mbʋ pɩlɩ pɩ-taa yɔ lɛ se pɔkɔm nɛ poposini Yehowa ɛgbɛyɛ. Pʋtɔdɩyɛ tɔm kpem! Pɩlabɩ ɖeu se lalaa kɔm nɛ papɩsɩ, ɛlɛ nabɛyɛ ñekizaa kpem. Tisuu mbʋ paawɛna yɔ, pɩɖʋ lɩm. (1 Tim. 1:19) Ɛbɛ pɩwɛɛ se ɖɩla nɛ pɩtaatalɩ-ɖʋ mbʋ wiɖiyi? Ye ɖɩnɩ tɔm natʋyʋ nɛ ɖɩɩsɩŋ se tɩkɛ toovenim yaa cɛtɩm yɔ, ɖitaatiyini-tʋ lalaa. Taatisi tɔm ndʋ ŋnɩɣ yɔ, tɩ-tɩŋa payɩ tɩ-yɔɔ yem. Ɛlɛ tazɩ nɛ ŋna se tɩkɛ toovenim na.
(Ejipiti Lɩʋ 23:2) Taatɩŋ ɛyaa sakɩyɛ se ŋsɩnɩ-wɛ kɩdɛkɛdɩm labʋ, nɛ taalɩzɩ aseɣɖe kɩdɛkɛdɩyɛ weyi ɛsʋ tɔm natʋyʋ yɔ ɛ-yɔɔ, nɛ taatɩŋ ɛyaa sakɩyɛ wayɩ se pomuli-i.
it-1 11 § 3
Aarɔɔnɩ
Pɩkɛ toovenim se pɩyʋtɩnɩ Aarɔɔnɩ tam nabudozo, ɛlɛ pɩtɩkɛ ɛnʋ kaaɖɛnɩ nɔɔ kɩwɛɛkɩm laɖaa. Pɩtʋʋ fɛyɩ se eeyeba nɛ lalaa wɛtʋ nɛ pa-lakasɩ wɛɛnɩ ɖoŋ ɛ-yɔɔ nɛ ɛla mbʋ pɩtɩtʋʋzɩ yɔ. Kɔzɩ kɔzɩ alɩwaatʋ ndʋ pɩcalɩ-ɩ yʋtɩnʋʋ yɔ, pɩɩwɛɛ se ɛlabɩnɩ tʋmɩyɛ paɣtʋ kiɖe ɖɩnɛ: “Taatɩŋ ɛyaa sakɩyɛ se ŋsɩnɩ-wɛ kɩdɛkɛdɩm labʋ.” (Ejl 23:2) Paa mbʋ yɔ, pɔyɔɔdɩ tɔm kɩbandʋ ɛ-yɔɔ Masɩ taa pʋwayɩ, nɛ Ɛsɔ Pɩyalʋ kaakɔm tɛtʋ yɔɔ lɛ, ɛyɔɔdaa se Aarɔɔnɩ liɖe taa cɔjɔtʋ kaakɛ cɔjɔtʋ ndʋ tɩmʋ ñɩm Ɛsɔ ɛsɩndaa yɔ.—Keɣa 113B:10, 12; 117:3; 132:1, 2; 134:19; Mt 5:17-19; 8:4.
(Ejipiti Lɩʋ 23:3) Nɛ taasa kʋñɔndʋ weyi ɛsʋ tɔm yɔ.
it-1 410 § 2
Yʋlʋmtʋ
Papɩzɩɣ pala tɔm hʋyaa kʋjɔŋ se pɩsa nɛ pataahʋʋ tɔm camɩyɛ, pʋyɔɔ Paɣtʋ kizaa se pataala mulum kʋjɔŋ nɛ pataa num ɛyaa nɔsɩ mbʋ pʋyɔɔ yɔ pɩpɩzɩɣ pɩyʋlʋsɩ tɔm hʋyʋ ɛsa nɛ pɩwɛɛnɩ ɖoŋ ɛzɩma ɛhʋʋ tɔm yɔ pɩ-yɔɔ. “Taamʋ kʋjɔʋ, mbʋ yɔ kʋjɔʋ yʋlʋsʋʋ aseɣɖe tɩnaa mba pana tɔm nɛ pɛ-ɛsa yɔ.” (Ejl 23:8) “Kʋjɔʋ yʋlʋsɩ lɔŋ tɩnaa ɛsa.” (Wp 16:19) Paa tɔm hʋyʋ ɛwɛ lɔŋ nɛ lɛɣtʋ ɛzɩma yɔ, ye mba pasʋ tɔm yɔ palabɩ-ɩ kʋjɔʋ yɔ, pɩpɩzɩɣ nɛ pɩyʋlʋsɩ ɛ-ɛsa, paa ɛsɔɔlaa yaa ɛtɩsɔɔlɩ yɔ. Ɛsɔtɔm yɔɔdaɣ ɛzɩma kʋjɔʋ pɩzɩɣ kihuuzi ɛyʋ lɩmaɣza nɛ ɛ-ɛsa yɔɔ yɔ pɩ-tɔm lɛ, tɩtɔm se: “Itaamuli tɔm tɩŋ tɛɛ. Taala ɛjam ɛsɩmɩyɛ yɔɔ nɛ taayele ña-tɩ nɛ sɔsɔ yʋlʋsɩ ñɛ-ɛsa: hʋʋ ñɛ-tɛtʋ taa tʋ tɔm tɩ-nɔsɩ taa.” (Lev 19:15) Ye mbʋ, pɩfɛyɩ se tɔm hʋyʋ nɔɔyʋ ɛkʋ ñɩm tʋ nɔɔyʋ tɔm, mbʋ pʋyɔɔ yɔ ɛlɛ kɛ ñɩm tʋ, se pɩsa nɛ samaɣ sɔɔlɩ-ɩ.—Ejl 23:2, 3.
Ðɩñɩnɩ fezuu taa ñɩm
(Ejipiti Lɩʋ 23:9) “Taala ñaŋ ɛgɔm. Ɩɖɩŋaa nɛ ɩna ɛgɔm kʋñɔŋ; mbʋ yɔ ɩɩcaɣ caɣyɩtʋ Ejipiti.
“Ɩtaasɔɔ ɛgɔndʋ mʋʋ yɔɔ”
4 Yehowa tɩɖʋ Izrayɛɛlɩ mba paɣtʋ yem se paña agɔma, ɛlɛ ɛñɩnaɣ se paɖʋ pa-tɩ agɔma lone taa nɛ panɩɩ pɔ-tɔm taa. (Kalɩ Egipiti Lɩʋ 23:9.) Izrayɛɛlɩ mba ‘kaaɖɩŋaa nɛ pana kʋñɔŋ’ ŋgʋ agɔma tɔkɩ yɔ. Halɩ pʋcɔ nɛ Izrayɛɛlɩ mba pɩsɩɣ yomaa lɛ, Egipiti mba niŋaɣ-wɛ, mbʋ pʋyɔɔ yɔ Egipiti mba ɖʋwaɣ tʋkaɣ ɛyaa hɛkʋ taa. (Kiɖe 43:32; Egl. 1:11-14) Izrayɛɛlɩ mba kaatɔɔ kʋñɔŋ alɩwaatʋ ndʋ paakɛ agɔma yɔ, paa mbʋ yɔ Yehowa sɔɔlaa se pakpaɣ agɔma ɛzɩ ‘pɛ-tɛtʋ taa piya’ yɔ.—Lev. 19:33, 34.
(Ejipiti Lɩʋ 23:20, 21) Mɔnkɔŋ ɖɛzʋʋ tiyiyu ñɔ-nɔɔ nɛ ɛɖaŋ ñɔ-yɔɔ nʋmɔʋ taa nɛ ɛlabɩ-ŋ nɛ ŋtalɩ ɖenɖe malɩzaa se ŋcaɣ yɔ. 21 Ñamɩ-ɩ nɛ ŋwelisi ɛ-nɔɔ; taanimi-i; mbʋ pʋyɔɔ yɔ ŋlabɩ kɩwɛɛkɩm kɔyɔ, ɛɛkaɣ kpeɣu, mbʋ yɔ ma-hɩɖɛ wɛ ɛ-yɔɔ.
it-2 280
Mikayɛɛlɩ
1. Ɛ nɛ Gabrɩyɛɛlɩ mba kɛnɩnɩ Ɛsɔ tiyiyaa kiɖeɖema mba paya pa-hɩla Bibl taa yɔ, nɛ e-ɖeke payawa se “Ɛsɔ tiyiyu sɔsɔ.” (Yuudi 9) Danɩyɛɛlɩ ñʋʋ hiu taa pacalɩ yɔɔdʋʋ Mikayɛɛlɩ tɔm. Ñʋʋ ŋgʋ kɩ-taa paya-ɩ se “kajalaɣ sɔsaa taa nɔɔyʋ” weyi ewoba nɛ ɛsɩnɩ Ɛsɔ tiyiyu weyi ɛɛwɛɛ nɛ eyouni “Pɛrɩsɩ mba tɛ sɔsɔ” yɔ. Paya Mikayɛɛlɩ se ‘Danɩyɛɛlɩ tɛ sɔsɔ’ nɛ “tiyiyu sɔsɔ [weyi ɛkaɣ] kʋyʋʋ nɛ ɛsɩŋ [Danɩyɛɛlɩ] samaɣ piya yɔɔ” yɔ. (Dan 10:13, 20, 21; 12:1) Pɩwɩlɩɣ se Mikayɛɛlɩ kaakɛnɩ Ɛsɔ tiyiyu weyi eɖiyi Izrayɛɛlɩ piya alɩwaatʋ ndʋ sɩtɛzaɣ kañɩmbusuu yɔ. (Ejl 23:20, 21, 23; 32:34; 33:2) Yuudi ñɩɣ niye tɔm ndʋ tɩ-yɔɔ alɩwaatʋ ndʋ ɛyɔɔdaa se: “Tɔm kaakɔm Ɛsɔ tiyiyu sɔsɔ Mikayɛɛlɩ nɛ Eleeu pɛ-hɛkʋ taa nɛ pɔhɔŋ tɔm Moyizi tomnaɣ yɔɔ yɔ.”—Yuudi 9.
Bibl kalʋʋ
(Ejipiti Lɩʋ 23:1-19) Taamʋ cɛtɩm tɔm, taatɩnɩ weyi ɛɖɔ wɛɛ yɔ ɛ-yɔɔ nɛ ŋhuuzi mulum tɔm yɔɔ. 2 Taatɩŋ ɛyaa sakɩyɛ se ŋsɩnɩ-wɛ kɩdɛkɛdɩm labʋ, nɛ taalɩzɩ aseɣɖe kɩdɛkɛdɩyɛ weyi ɛsʋ tɔm natʋyʋ yɔ ɛ-yɔɔ, nɛ taatɩŋ ɛyaa sakɩyɛ wayɩ se pomuli-i, 3 nɛ taasa kʋñɔndʋ weyi ɛsʋ tɔm yɔ. 4 Ye ŋkatɩnɩ ño-koyindu nɔ yaa ɛ-kpaŋaɣ yotuu yem kɔyɔ, talɩ-wɛ nɛ ŋwoni-i. 5 Ye ŋna ña-paɖa kpaŋaɣ, ko-wondu nɩ-kɛ yɔ, taaɖɛɛ, ña nɛ ɩ ɩsɩnɩ-kɛ. 6 Taacʋʋdɩ kʋñɔndʋ tɔm taa, tɔm tɩŋ tɛɛ. 7 Se cɛtɩm tɔm. Taakʋ tekpenim tʋ nɛ siɣsiɣ tʋ, mbʋ pʋyɔɔ yɔ kañatʋ tʋ caɣ-m kiniŋ. 8 Taamʋ kʋjɔʋ, mbʋ yɔ kʋjɔʋ yʋlʋsʋʋ aseɣɖe tɩnaa mba pana tɔm nɛ pɛ-ɛsa yɔ nɛ paɖʋzʋʋ ɛyaa siɣsiɣ tɩnaa. 9 Taala ñaŋ ɛgɔm. Ɩɖɩŋaa nɛ ɩna ɛgɔm kʋñɔŋ; mbʋ yɔ ɩɩcaɣ caɣyɩtʋ Ejipiti. 10 Pɩnzɩ loɖo lɛ, ŋŋɖuu ñɛ-tɛtʋ nɛ ŋcɛ nɛ ŋsuu ño-kpoŋ taa. 11 Ɛlɛ pɩnaɣ lʋbɛ ŋga taa lɛ, ŋŋyele-tʋ nɛ tɩhɛzɩ nɛ ŋyele kʋm tɩlʋlɩ mbʋ yɔ, nɛ ña-samaɣ taa kʋñɔndɩnaa kaatɔɔ; nɛ pɩkazɩ mbʋ yɔ, hayɩm taa kpɩna kaatɔɔ, ŋla mbʋ viiñi taa nɛ ña-caŋgbayʋʋ yɔɔ. 12 Ŋŋla ña-tʋma kɩyakɩŋ loɖo, ɛlɛ lʋbɛ ŋgʋ wiye lɛ, ŋhɛzɩ nɛ ŋyele ña-tʋma, ñɔ-nɔ nɛ ña-kpaŋaɣ pɛhɛzɩ, nɛ ño-yom pɩyalʋ hɛzɩ, nɛ pɩkpɛndɩnɩ ɛgɔm. 13 IIkemsi camɩyɛ ndʋ ndʋ meheyi-mɩ yɔ nɛ ɩtaayaa ɛsɔnaa nabɛyɛ hɩɖɛ: pataanɩɩ pɩlɩ ñɔ-nɔɔ taa. 14 Ŋkaɣ-m tɔɔʋ kazandʋ tam nabudozo pɩnaɣ taa. 15 Ŋŋtɔɔ kpɔnʋ kɩtɩñɩŋʋʋ kazandʋ: kɩyakɩŋ lʋbɛ, kpɔnʋ kɩtɩñɩŋʋʋ ŋkaɣ tɔɔʋ, ɛzɩ manɖʋʋ paɣtʋ yɔ, wɛɛ wena paɖʋ Abibu fenaɣ taa, ŋga ka-taa ŋlɩ Ejipiti yɔ. Taakɔɔ mɛ-ɛsɩndaa ndaakpasɩ. 16 Ŋŋtɔɔ tɔɔnaɣ kʋmtʋ kazandʋ, ŋga ŋɖʋ hayɩm taa nɛ kacalɩ labʋ yɔ nɛ tɔɔnaɣ ŋga pakʋŋ pɩnaɣ tɛm taa yɔ, alɩwaatʋ ndʋ ŋkpakɩɣ hayɩm taa nɛ ŋkɔŋnɩ ɖɩɣa tɔɔnaɣ ŋga ŋhayaa yɔ. 17 Pɩnaɣ taa tam nabudozo ña-samaɣ taa abalaa kpeekpe ɩkɔɔ Kɩbaɣlʋ Ɛsɔ ɛsɩndaa. 18 Taalaa man-kɩlaʋ kpɩnɛ calɩm nɛ kpɔnʋ ŋgʋ kɩñɩŋaa yɔ, nɛ man-kazandʋ kɩlaʋ kpɩnɛ num ɛtaakazɩ nɛ tɛʋ fe; 19 ŋŋkɔnɩ Kɩbaɣlʋ ñɛ-Ɛsɔ ɖɩɣa taa ñɛ-tɛtʋ lʋlɩ mbʋ kɩbam pɩdɩɩfɛyɩ yɔ. Taatɩzɩ mbeɣa ko-ɖoo hɩlɩm taa.
14-20 SEPTEMBRE
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 25–26
“Wonuu ŋgʋ kɩ-tɔm cɛyɩ Ɛsɔ sɛtʋ kɩɖanɖʋʋ tɛɛ yɔ”
(Ejipiti Lɩʋ 25:9) Ðɩjaɣyɛ nɛ ɖɩ-taa wondu yɔ: ŋkaɣ-tʋ labʋ ɖeyi ɖeyi ɛzɩ mɔnkɔŋʋʋ se mawɩlɩ-ŋ yɔ.
it-1 158
Ɛgbɛyɛ ɖʋʋ aɖakaɣ
Ɛzɩma pɩwɛɛ se pama-kɛ yɔ. Yehowa calɩ heyuu Moyizi ɛzɩma ɛma ɛgbɛyɛ aɖakaɣ yɔ, mbʋ pʋyɔɔ yɔ, aɖakaɣ ŋga kakaɣ kɛnʋʋ wonuu ŋgʋ kɩ-tɔm kɩlɩ cɛyʋʋ Ɛsɔ sɛtʋ kɩɖanɖʋʋ nɛ Izrayɛɛlɩ mba maalika kpeekpe taa yɔ. Yehowa yɔɔdaɣ se ka-ɖaɣlɩkɩŋ ɛkɛ nuŋgolonzi 2.5, ka-walanzɩ ɛkɛ nuŋgoloŋa 1.5 nɛ ka-kʋkʋyɩŋ ñɛkɛ nuŋgoloŋa 1.5 (111 × 67 × 67 cm mbʋ yɔ). Pɩɩwɛɛ se palabɩ-kɛ nɛ sɛya yaa akasɩya kpoŋgbolonaa nɛ pataa ka-taa nɛ ka-wayɩ sika kele kele ñɩŋga. Pɩɩwɛɛ ɖɔɖɔ se pakpaɣ sika nɛ palabɩnɩ “kɔ-nɔɔ nɛ pɩcɔɔ pɩta.” Aɖakaɣ hɔɔlʋʋ naalɛ ñɩŋgʋ lɛ, sulaɣ. Pɩwɛɛ se palabɩ-kɛ nɛ sika. Pɩfɛyɩ se pataa sika kɔ-yɔɔ kɩtaʋ yem, ɛlɛ pɩwɛɛ se palabɩnɩ-kɛ nɛ sika maɣmaɣ na. Pɩwɛɛ se kerebimwaa naalɛ mba palabɩnɩ sika yɔ, pɛwɛɛ sulaɣ ŋga ka-walanzɩ hɔɔlɩŋ naalɛ yɔɔ, papa ɖama nɛ ɛsa, poposi pe-keŋ nɛ ɛsɔdaa kiŋ nɛ pe-keŋ kɩlɛmʋʋ huuzi sulaɣ yɔɔ. (Ejl. 25:10, 11, 17-22; 37:6-9) Sulaɣ ŋga payaɣ-kɛ ɖɔɖɔ se “ceɣu sulaɣ.”—Ejl. 25:17; Ebr. 9:5. Kalɩ ɖɔɖɔ PROPITIATOIRE.
(Ejipiti Lɩʋ 25:21) Ŋŋsɩɩ kuhuuzuu nɛ aɖakaɣ hayo kiŋ, nɛ ŋŋsɩɩ aɖakaɣ taa aseɣɖe tɔm ndʋ mankaɣ-ŋ cɛlʋʋ yɔ.
it-1 159 § 4
Ɛgbɛyɛ ɖʋʋ aɖakaɣ
Ɛgbɛyɛ ɖʋʋ aɖakaɣ taa pasɩɣaɣ wondu kiɖeɖetu. Mbʋ mbʋ pɩɩwɛ ka-taa yɔ, pɩ-taa sɔsɔm lɛ, aseɣɖe wonuu yaa kpatanaa naalɛ mba pɔ-yɔɔ pama Paɣtʋ Hiu yɔ. (Ejl 25:16) Ðeɣbiye nɖɩ ɖɩ-taa posu maana yɔ, nɛ Aarɔɔnɩ ɖaʋ ŋgʋ kɩkpaɣ hɛtʋ yɔ, paawɛ ɖɔɖɔ aɖakaɣ ŋga ka-taa, ɛlɛ pɔkɔm nɛ palɩzɩ-tʋ pʋcɔ nɛ pama Salomɔɔ tɛ templo. (Ebree mba 9:4; Ejipiti Lɩʋ 16:32-34; Kɩgalʋʋ 17:10; 1Aw 8:9; 4Aw 5:10) Pʋcɔ nɛ Moyizi sɩkɩ lɛ, ɛcɛlɩ “paɣtʋ takayaɣ” nakɛyɛ Leevi cɔjɔnaa, etiheyi-wɛ se pasɩɩ-kɛ aɖakaɣ taa, ɛlɛ eheyi-wɛ se: “Ɩsɩɩ-kɛ Kɩbaɣlʋ mɩ-Ɛsɔ ɛgbɛyɛ aɖakaɣ cɔlɔ nɛ kɛkɛ ñɔ-yɔɔ aseɣɖe.”—Wp. 31:24-26.
(Ejipiti Lɩʋ 25:22) Peeɖe mankaɣ-ŋ katɩnʋʋ, mankaɣ-ŋ yɔɔdɩnʋʋ kuhuuzuu yɔɔ, Kerebimwaa naalɛ hɛkʋ taa, mba pakaɣ wɛʋ aseɣɖe tɔm aɖakaɣ yɔɔ yɔ, nɛ meheyi-ŋ ndʋ ndʋ ŋŋheyi Izrayɛɛlɩ piya yɔ.
it-1 159 § 5
Ɛgbɛyɛ ɖʋʋ aɖakaɣ
Yʋsaɣ ŋga kawɩlɩɣ se Ɛsɔ wɛ ɛ-samaɣ hɛkʋ taa yɔ. Ɛgbɛyɛ ɖʋʋ aɖakaɣ wɩlaɣ se Ɛsɔ wɛ ɛ-samaɣ hɛkʋ taa. Yehowa labɩ tamaɣ se: “Peeɖe mankaɣ-ŋ katʋʋ, mankaɣ-ŋ yɔɔdɩnʋʋ kuhuuzuu yɔɔ, Kerebimwaa naalɛ hɛkʋ taa, mba pakaɣ wɛʋ aseɣɖe tɔm aɖakaɣ yɔɔ yɔ: “Mankaɣ kɔm pʋtɔdɩyɛ kɩnanaʋ yɔɔ.” (Ejl. 25:22; Lev. 16:2) Samɩyɛɛlɩ mawa se Yehowa “weyi ɛcaɣ Kerebimwaa yɔɔ yɔ” (1Sam. 4:4); ye mbʋ kerebimwaa ‘sɩŋnɩ Yehowa kɛɛkɛɛ.’ (3Aw. 28:18, nwt) Pʋyɔɔ pɔyɔɔdaa se “Moyizi wokaɣ se ɛsʋʋ kediɣzaɣ cokiye tɛɛ se ɛyɔɔdɩnɩ Kɩbaɣlʋ lɛ, ɛnɩɣ nɔɔ ŋga kɔyɔɔdaɣnɩ-ɩ ɖiwelisiye nɖɩ ɖɩwɛ Aseɣɖe aɖakaɣ yɔɔ yɔ ɖɩ-taa, Kerebimwaa naalɛ hɛkʋ taa. Ðɩnɛ ɛlɛ ɛyɔɔdɩnɩ Kɩbaɣlʋ.” (Kɩg. 7:89) Pʋwayɩ Yozuwee nɛ cɔjɔ sɔsɔ Fineyaasɩ pɔpɔzɩ Yehowa tɔm ɛgbɛyɛ ɖʋʋ aɖakaɣ ɛsɩndaa. (Yoz. 7:6-10; Th. 20:27, 28) Paa mbʋ yɔ, cɔjɔ sɔsɔ ɖeke sʋwaɣnɩ Lone Kiɖeɖee Sɔsɔɖɛ taa tam kʋɖʋmam pɩnaɣ taa nɛ ɛnaɣ ɛgbɛyɛ aɖakaɣ. Ɛɛsʋʋ se ɛyɔɔdɩnɩ Yehowa, ɛlɛ ɛsʋʋ se ɛla sɔnzɩ nzɩ palakɩ Kɩwɛɛkɩm Hɩzʋʋ Kɩyakʋ wiye yɔ.—Lev. 16:2, 3, 13, 15, 17; Ebr. 9:7.
Ðɩñɩnɩ fezuu taa ñɩm
(Ejipiti Lɩʋ. 25:20) Kerebimwaa mba pe-keŋ kaɣ posuu nɛ hayo kiŋ nɛ ihuuzi kuhuuzuu yɔɔ; pakaɣ ɖama pam nɛ ɛsa, pɛkɛzɩ ɛsa nɛ kuhuuzuu yɔɔ kiŋ.
it-1 437 § 1
Kerebim
Wondu ndɩ ndɩ ndʋ pɩɩwɛɛ se palɩzɩ Ɛsɔ sɛtʋ kɩɖanɖʋʋ ŋgʋ palabɩ kañɩmbusuu taa yɔ kɩ-tɛɛ yɔ, pɩ-taa lɛɛbʋ lɛ Kerebimwaa. Palɩzɩ-wɛ nɛ sika nɛ paawɛ Ɛgbɛyɛ aɖakaɣ sulaɣ walanzɩ hɔɔlɩŋ naalɛ yɔɔ. Papam ɖama nɛ ɛsa nɛ pe-keŋ kɩlɛmʋʋ huuzi sulaɣ yɔɔ nɛ pɩwɩlɩɣ se pɛwɛɛ pɛsɛɣ Ɛsɔ. Paa kerebim weyi ɛwɛnɩ keŋ naalɛ, eposi-i nɛ ehuuzi sulaɣ yɔɔ ɛzɩ ɛkandɩyɩɣ kɔ-yɔɔ yɔ. (Ejl. 25:10-21; 37:7-9) Pɩtasɩ lɛ, pasandɩ pɩsaʋ ŋgʋ pɔpɔ Ɛsɔ sɛtʋ kɩɖanɖʋʋ tɛɛ nɛ pɩsaʋ ŋgʋ patayɩnɩ Lone Kiɖeɖee nɛ Lone Kiɖeɖee Sɔsɔɖɛ pɛ-hɛkʋ taa yɔ nɛ kerebimwaa kɩlɛmɩŋ.—Ejl. 26:1, 31; 36:8, 35.
(Ejipiti Lɩʋ 25:30) Ŋŋsɩɩ mɛ-ɛsɩndaa taabɩlɩ yɔɔ tam kɩlaʋ kpɔnʋ.
it-2 472
Kɩlaʋ kpɔnɔ
Pasɩɣaɣ kpɔnɔnaa hiu nɛ naalɛ taabɩlɩ nakʋyʋ yɔɔ Ɛsɔ sɛtʋ kɩɖanɖʋʋ yaa templo lone hɔɔlʋʋ ŋgʋ payaɣ se lone kiɖeɖee yɔ, ɖɩ-taa; nɛ pɛlɛɣzaɣ-wɛ nɛ kɩfama paa sabaatɩ ŋgʋ lɛ. (Ejl. 35:13; 39:36; 1Aw 7:48; 4Aw 13:11; Neh. 10:32, 33) Ebree tɔm piye nɖɩ pɛɖɛzaa se kɩlaʋ kpɔnɔ yɔ, papɩzɩɣ nɛ pɛɖɛzɩ-ɖɩ ɖɔɖɔ se “ɛsɩndaa kpɔnɔ.” Nabʋyʋ taa ye pɔtɔm se nabʋyʋ wɛ nɔɔyʋ “ɛsɩndaa” yɔ, pʋ-tɔbʋʋ lɛ se pɩwɛ “ɛ-cɔlɔ” (2Aw 13:23); nɛ pʋyɔɔ lɛ, kɩlaʋ kpɔnɔ kaawɛ Yehowa ɛsɩndaa nɛ pakpakaɣ-kʋ nɛ pahaɣ-ɩ haɖɛ tam. (Ejl. 25:30) Payaɣaɣ kɩlaʋ kpɔnɔ ɖɔɖɔ se “kpɔnɔnaa mba patɩnɩ-wɛ ɖama yɔɔ yɔ” (4Aw 2:4); “kpɔnɔnaa mba pasɩɣ Ɛsɔ ɛsɩndaa yɔ” (Mark 2:26); nɛ “kpɔnɔnaa” (Ebr 9:2).
Bibl kalʋʋ
(Ejipiti Lɩʋ 25: 23-40) Ŋŋla sɛya ɖasɩ taabɩlɩ, kɩ-ɖaɣlɩkɩŋ ɛkɛ nuŋgolonzi naalɛ, kɩ-walanzɩ nuŋgoloŋa kʋɖʋmaɣ nɛ kʋkʋyɩŋ nuŋgoloŋa kʋyʋmaɣ nɛ hɔɔlʋʋ. 24 Ŋŋpɔ kɩ-yɔɔ sika kele kele ŋga nɛ ŋtaa kɩ-kpɛnzɩ yɔɔ sika mʋlʋm. 25 Ŋŋɖʋ kɩ-kpɛnzɩ yɔɔ ɖaʋ ŋgʋ kɩwalɩ ɛzɩ nandaka yɔ, nɛ ŋpa kɩ-yɔɔ sika hulaɣ. 26 Ŋŋla-kʋ sika kokoo naanza nɛ ŋɖʋ-yɛ nɩŋgbanzɩ naanza kɔnawaa taa. 27 Paaka kokoo ɖaŋ cɔlɔ, weyi pakpakɩɣnɩ taabɩlɩ yɔ. 28 Ŋŋla ɖaŋ ɛnɩ nɛ sɛya ɖasɩ nɛ ŋpɔ ɩ-yɔɔ sika. Ɛnɩ pakaɣnɩ kpaɣʋ taabɩlɩ. 29 Ŋŋma ñanzɩ, kɔŋkɔŋnaa, nɛ kilizaɣ caɖasɩ ŋzɩ pɩwɛɛ se sɩwɛɛ kɩ-yɔɔ yɔ. Ŋŋma-wɛ nɛ sika ŋga kɛwɛ kele kele yɔ. 30 Ŋŋsɩɩ mɛ-ɛsɩndaa taabɩlɩ yɔɔ tam kɩlaʋ kpɔnʋ. 31 Ŋŋla fɛlɛnaa kanaɣ nɛ sika kele kele ñɩŋga: fɛlɛ kanaɣ, kɔ-tɔbʋʋ nɛ ka-ñʋʋ ɛlɛ, poluki-wɛ nɛ hama. Kɔ-yɔɔ pɔŋ, butɔŋnaa nɛ hɛtʋ pamaɣ ɖama. 32 Pilinzi loɖo ɩlɩɩ kɩjaŋ yɔɔ: naadozo hɔɔlʋʋ lɛɛkʋ yɔɔ nɛ naadozo lɛɛklʋ yɔɔ. 33 Kajalaɣ piliŋa ɛwɛɛnɩ pɔŋ naadozo ɛzɩ manɛ hɛɖʋʋ yɔ, pɩ nɛ butɔŋ nɛ hɛɖʋʋ, nɛ piliŋa naalɛ ŋga yɔɔ wɛɛ ɖɔɖɔ pɔŋ naadozo ɛzɩ manɛ hɛɖʋʋ yɔ, pɩ nɛ butɔŋ nɛ hɛɖʋʋ. Pɩkaɣ wɛʋ ɖɔɖɔ mbʋ pilinzi loɖo lɛɛsɩ yɔɔ, nzɩ sɩlɩɣnɩ fɛlɛ kanaɣ yɔɔ yɔ. 34 Fɛlɛ kanaɣ maɣmaɣ yɔ, kɔ-yɔɔ kaɣ wɛʋ pɔŋ naanza ɛzɩ manɛ hɛɖʋʋ yɔɔ yɔ, pɩ nɛ butɔŋ hɛɖʋʋ, 35 pesiɣ-wɛ ɛzʋnɔ: butɔŋ kʋɖʋmʋʋ kajalaɣ pilinzi naalɛ tɛɛ, nzɩ sɩlɩɣnɩ fɛlɛ kanaɣ yɔɔ yɔ; lɛɛkʋ naalɛ nzɩ sɩ-wayɩ nzɩ tɛɛ; nakʋyʋ wayɩ wayɩ naalɛ nzɩ tɛɛ: pɩlabɩ pilinzi loɖo, nzɩ sɩlɩɣnɩ fɛlɛ kanaɣ yɔɔ yɔ. 36 Butɔŋnaa nɛ pilinzi pakaɣ mʋnʋʋ fɛlɛ kanaɣ, nɛ pakaɣ labʋ pɩtɩŋa mbʋ yɔ nɛ sika kele kele ñɩŋga paɣyɛ nɛ polubini hama. 37 Pʋwayɩ lɛ ŋkaɣ lubu fɩtɩlanaa lʋbɛ mba paasusi fɛlɛ kanaɣ yɔɔ yɔ, nɛ pakaɣ-wɛ pɩlʋʋ se pa-mintʋsʋʋ ɛñandɩ kɩ-ɛsɩndaa. 38 Kɩ-kpɩtɩyɩsɩ nɛ kɩ-tɔlɩma tataɣ kaɣ kɛʋ sika kele kele ŋga. 39 Sika kele kele ŋga paɣyɛ ŋkaɣ labɩnʋʋ fɛlɛ kanaɣ nɛ kɔ-yɔɔ wondu kpeekpe. 40 Cɔna nɛ ŋlabɩ-wɛ ɛzɩ weyi pawɩlɩ-ŋ pʋʋ taa yɔ.
21-27 SEPTEMBRE
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 27-28
“Wondu ndʋ cɔjɔnaa suwaɣ yɔ ɛbɛ tɩkpɛlɩkɩɣ-ɖʋ?”
(Ejipiti Lɩʋ 28:30) Ŋŋtɩnɩ Uriim nɛ Tuumiim pataŋa yɔɔ, Aarɔɔnɩ kaawoki Kɩbaɣlʋ ɛsɩndaa lɛ. Mbʋ lɛ Aarɔɔnɩ kaɣ wɛnʋʋ tam ɛ-laŋɩyɛ yɔɔ, Kɩbaɣlʋ ɛsɩndaa, mbʋ ɛkaɣ hʋnʋʋ Izrayɛɛlɩ piya yɔ.
it-2 465
Uriim nɛ Tuumiim
Bibl taa tazɩyaa nabɛyɛ maɣzɩɣ se patɩŋaɣnɩ Uriim nɛ Tuumiim yɔɔ nɛ pɔpɔzʋʋ piye. Paya-wɛ James Moffatt Bibl taa se “piye pɔzʋʋ kiɖeɖem” Ejipiti Lɩʋ 28:30 taa. Nabɛyɛ maɣzɩɣ se pee ndɩ ndɩ naadozo wɛnɩ pɩ-taa, pama kajalaɣ ñɩnɖɛ yɔɔ se “ɛɛɛ” naalɛ ñɩnɖɛ yɔɔ se “aayɩ” nɛ naadozo ñɩnɖɛ ñahʋlʋmaa. Patɩŋɩɣnɩ a-yɔɔ se patɩlɩ tɔm natʋyʋ yɔɔ cosuu, ɛlɛ piye nɖɩ ɖɩhʋlʋmaa yɔ, ye nɖɩ ɛlɩnaa yɔ pɩwɩlɩɣ se paticosi tɔm ndʋ pɔpɔzaa yɔ tɩ-yɔɔ. Lalaa ñamaɣzɩɣ se pɩtɩla pɩɩkɛ pɛɛ naalɛ wena awɛ tayɩ yɔ, paa nɖɩ lɛ ɖɩ-hɔɔlʋʋ lɛɛkʋ kɛ kʋhʋlʋmʋʋ nɛ lɛɛkʋ kɛ kɩkpɛɛdʋʋ. Ye pɔlɔ pɛɛ ana a-naalɛ nɛ hɔɔlɩŋ weyi ɩhʋlʋmaa yɔ ɛnɩ ɩlɩnaa yɔ, pɩwɩlɩɣ se tɔm cosuu kɛ “ɛɛɛ” ɛlɛ ye hɔɔlɩŋ weyi ɩkɛ kɩkpɛɛdɩŋ yɔ ɛnɩ ɩlɩnaa yɔ, pɩwɩlɩɣ se tɔm cosuu kɛ “aayɩ”; nɛ ye hɔɔlʋʋ kɩkpɛɛdʋʋ nɛ hɔɔlʋʋ kʋhʋlʋmʋʋ pɛkpɛndaa nɛ palɩɩ yɔ, pɩwɩlɩɣ se paticosi tɔm ndʋ pɔpɔzaa yɔ tɩ-yɔɔ. Alɩwaatʋ natʋyʋ taa Sɔɔlɩ tɩŋnɩ cɔjɔ yɔɔ nɛ ɛpɔzɩ se ɛna se ɛnʋ ewolo eyoni Filistii mba yaa etaawolo lɛ, paticosi-i tɔm natʋyʋ. Ɛmaɣzaɣ se abalaa mba ɛ nɛ paawɛɛ yɔ, pa-taa nɔɔyʋ labɩ kɩdɛkɛdɩm lɛ ɛpɔzɩ se: “Kɩbaɣlʋ Izrayɛɛlɩ tɛ Ɛsɔ, . . . ha Tuumiim.” Palabɩ mbʋ lɛ pɩkpa Sɔɔlɩ nɛ Yonataanɩ, pʋwayɩ lɛ patasɩ pɔzʋʋ piye se pana se alabɩ kɩdɛkɛdɩm pa-naalɛ pa-taa. Pɩtɩla kɛdaɣ kanɛ ka-taa, pɔtɔm se “ha Tuumiim” yɔ, pɩtɩwɩlɩ se pañɩnaɣ se patɩlɩ tɔm natʋyʋ yɔɔ cosuu, ɛlɛ pañɩnaɣ se patɩlɩ pa-taa weyi ɛlabɩ kɩdɛkɛdɩm yɔ.—1Sam 14:36-42.
(Ejipiti Lɩʋ 28:36) “Ŋŋlu sika kele kele hʋnʋʋ nɛ ŋñɩɣ-kʋ kpeŋiye yɔɔ: ‘Ðɩpɩsɩ Kɩbaɣlʋ kpim kiɖeɖeu’
it-1 931
Kiɖe taa
Izrayɛɛlɩ cɔjɔ sɔsɔ. Izrayɛɛlɩ taa lɛ, pakpaɣ sika nɛ palabɩnɩ “kpeŋiye” yaa wonuu ŋgʋ kɩwɛ tayɩ yɔ cɔjɔ sɔsɔ ñʋʋ kitemuu nɛ pama kɩ-yɔɔ se: “Ðɩpɩsɩ Kɩbaɣlʋ kpim kiɖeɖeu” pʋ-tɔbʋʋ lɛ se Yehowa tɩnɩ kiɖeɖetu. (Ejl 28:36-38; 39:30) Izrayɛɛlɩ ñʋndɩnaa kɛ Yehowa lone taa caɣyaa kele kele sɛtʋ taa, ye mbʋ pɩmʋnaa se cɔjɔ sɔsɔ eyele nɛ ɛ-Ɛsɔ sɛtʋ wɛɛ kele kele. Pɩtasɩ lɛ, tɔm ndʋ tɩtɔzʋʋ Izrayɛɛlɩ piya se pɩpɔzʋʋ se sɩwɛɛ kele kele sɩ-Ɛsɔ sɛtʋ tʋma taa. Pɩtasɩ lɛ, yʋsaɣ ŋga kawɩlɩɣ se ɛsɩŋnɩ Cɔjɔ Sɔsɔ Yesu weyi Yehowa lɩzaa se ɛla cɔjɔtʋ tʋmɩyɛ nɖɩ ɖɩwɩlɩɣ kpayɩ kpayɩ se Yehowa wɛ kele kele yɔ.—Ebr 7:26.
(Ejipiti Lɩʋ 28:42, 43) Ŋŋñɛyɩ-wɛ anasaayɩ pɩsatʋ cokodonaa nɛ pihuuzi pa-ndaakpeɖe yɔɔ, ɖooo tɩnaɣ taa nɛ piwolo pɩtalɩ yoo yɔɔ. 43 Aarɔɔnɩ nɛ ɛ-pɩyalaa pakaɣ-wɛ tɔɔlʋʋ mbʋ na, powoki se pasʋʋ kilizaɣ kizinziku tɛɛ lɛ, yaa powoki kooka taa lizuu lɛ, nɛ pataaɖɔɔ wɛɛ naayɛ nɛ pehiɣ sɩm; pɩkɛnɩ Aarɔɔnɩ nɛ e-cejewiye taa mba tamtam paɣtʋ.
w08 15/8 15 § 17
Ðɩwɛɛnɩ wɛtʋ ndʋ tɩmʋnaa yɔ, alɩwaatʋ ndʋ ɖɩsaŋ Yehowa yɔ
17 Pɩwɛɛ se ɖɩcɔnɩ ɖa-tɩ yɔɔ camɩyɛ nɛ ɖɩwɛɛnɩ wɛtʋ ndʋ tɩmʋnaa yɔ, alɩwaatʋ ndʋ ɖɩlakɩ ɖɛ-Ɛsɔ sɛtʋ tʋma yɔ. Eklesɩyastɩ 4:17 yɔɔdaa se: “Ðaŋ ña-naatalʋʋ yɔɔ, ŋsʋʋ Ɛsɔ ɖɩɣa taa lɛ.” Paaheyi Moyizi nɛ Yozuwee se pɔhɔzɩ pa-naataŋgbala alɩwaatʋ ndʋ paawɛ lone kiɖeɖeye naɖɩyɛ taa yɔ. (Ejl 3:5; Yoz 5:15) Pɩɩwɛɛ se pala mbʋ nɛ pɩwɩlɩ se pɛwɛnɩ ñamtʋ Ɛsɔ yɔɔ. Pɩɩwɛɛ se Izrayɛɛlɩ cɔjɔnaa ɩtɔɔlɩ anasaayɩ pɩsatʋ cokodonaa “nɛ pihuuzi pa-ndaakpeɖe yɔɔ.” (Ejl 28:42, 43) Piyekaɣ se pɩtaana po-tomnaɣ hɔɔlɩŋ weyi pɩtɩmʋna se lalaa ɩna yɔ alɩwaatʋ ndʋ palaɣ kɩlaŋ altaaru yɔɔ yɔ. Pɩɩwɛɛ se paa cɔjɔ weyi lɛ ɛ-hɔʋ taa mba tɩŋa ɩwɛɛnɩ wɛtʋ ndʋ tɩmʋnaa yɔ, alɩwaatʋ ndʋ pasaŋ Yehowa yɔ.
Ðɩñɩnɩ fezuu taa ñɩm
(Ejipiti Lɩʋ 28:15-21) Ŋŋla tɔm hʋʋ pataŋa nɛ ŋsandɩ-kɛ ɛzɩ ekusuye yulaa yɔ. Ŋŋla-kɛ nɛ sika, nɛ pɩsaʋ kɩsɛɛmʋʋ welewele nɛ kɩsɛɛmʋʋ kpaʋʋ nɛ kɩsɛɛmʋʋ ɖʋʋɖʋʋ nɛ anasaayɩ pɩsatʋ tɩɖɩɖɩ. 16 Kakaɣ wɛʋ tayɩ nɛ kɛkɛ agbaka, ka-ɖaɣlɩkɩŋ nɛ ka-walanzɩ maɣnɩ nandaka. 17 Ŋŋsandɩ-kɛ nɛ ñɩɣlɩm pɛɛ wena pasʋzɩ ka-taa yɔ, papɩlɩ-yɛ canzɩ naanza: kɔɔnɔɔ caŋa taa ñɩɣlɩm pɩyɛ kɩsɛɛmɩyɛ, pɩyɛ nɖɩ ɖɩwɛ ceuu yɔ, nɛ ñɩɣlɩm pɩyɛ aɖɔnɖɔlɛɛ. 18 Caŋa naalɛ ŋga taa pɩyɛ nɖɩ ɖɩñɩlɩsɩɣ pɩdɩɩfɛyɩ yɔ, ñɩɣlɩm pɩyɛ nɖɩ ɖɩwɛ ɛzɩ plɔɔ yɔ nɛ diamaŋ yɔ; 19 Caŋa tozo ŋga taa ñɩɣlɩm pɩyɛ kusoɖiye, pɩyɛ kɩsɛɛmɩyɛ ɖʋʋɖʋʋ nɛ ñɩɣlɩm pɩyɛ nɖɩ pɔtɔŋaɣ se ɖɩkʋʋ sʋlʋm sɔtʋ yɔ; 20 Caŋa naanza ŋga taa ñɩɣlɩm pɩyɛ nɖɩ ɖɩwɛ ceuu nɛ aɖɔnɖɔlɛɛ yɔ, ñɩɣlɩm pɩyɛ nɖɩ ɖɩsɛ kpaʋʋ yɔ, nɛ cɩkpalɩmɩyɛ nɛ amɛyamɛya. Ñɩɣlɩm pɛɛ ana yɔ, pasʋzʋʋ a-taa sika putowee. 21 Pakaɣ a-yɔɔ maʋ Izrayɛɛlɩ piya hɩla nɛ akaɣ wɛʋ hiu nɛ naalɛ, ɛzɩ pa-hɩla yɔ. Paa nɖɩ lɛ pakaɣ ɖɩ-yɔɔ maʋ Izrayɛɛlɩ cejewe hɩɖɛ naɖɩyɛ.
w12 1/8 26 § 1-3
Ŋŋsɩm-tʋ?
Ñɩɣlɩm pɛɛ wena pacanaɣnɩ Izrayɛɛlɩ cɔjɔnaa tokonaa yɔ, le palɩɣaɣ a-yɔɔ?
Izrayɛɛlɩ mba lɩnɩ Ejipiti nɛ pɛwɛɛ kañɩmbusuu taa lɛ, Ɛsɔ ɖʋ-wɛ paɣtʋ se pala pataŋa yaa laŋɩyɛ taa kabʋa kanɛ. (Ejipiti Lɩʋ 28:15-21) Ñɩɣlɩm pɛɛ wena aawɛ pataŋa yɔɔ yɔ ana yɔ: Rubii, toopaazɩ, emeroodi, turikuwaazɩ, saafiirɩ, yaasɩpɩ, lesɛm pɩyɛ, agaatɩ, ameetiistɩ, krizooliitɩ, onikisi, nɛ yaadɩ. Le Izrayɛɛlɩ piya kaɣ lɩʋ ñɩɣlɩm pɛɛ ana a-yɔɔ?
Bibl alɩwaatʋ taa ɛyaa kaasɔɔlɩ ñɩɣlɩm pɛɛ nɛ palakɩ a-tadɩyɛ. Ðɩkpaɣ kɩɖaʋ kʋnɛ: Caanaʋ taa Ejipiti mba yakaɣ ñɩɣlɩm pɛɛ ajɛɛ wena payaɣ sɔnɔ se Iraŋ, Afɩganisitaŋ yɔ a-cɔlɔ. Pɩtɩla payakaɣ-yɛ Ɛndɩ ɖɔɖɔ. Ñɩɣlɩm pɛɛ naayɛ kaawɛ Ejipiti tɛtɛɛ. Ejipiti ɛjaɖɛ ñʋndɩnaa huyaɣni ñɩɣlɩm pɛɛ ajɛɛ wena a-yɔɔ Ejipiti kaawɛnɩ ɖoŋ yɔ a-taa. Caanaʋ taa caja Yɔɔb yɔɔdɩ ɛzɩma ɛ-alɩwaatʋ taa mba huyaɣ lɔkɔnaa se pehiɣ ñɩɣlɩm pɛɛ ndɩ ndɩ yɔ pɩ-tɔm. Yɔɔb ya saafiirɩ nɛ toopaazɩ se aawɛ ñɩɣlɩm pɛɛ wena pohuyaɣ yɔ a-taa.—Yɔɔb 28:1-11, 19.
Ejipiti Lɩʋ takayaɣ yɔɔdaa se Izrayɛɛlɩ piya lɩɣaɣ Ejipiti lɛ, “sɩpɔzɩ Ejipiti mba ñɩɣlɩm nɛ sika” wondu ndɩ ndɩ. (Ejl 12:35, 36) Ye mbʋ pɩtɩla Ejipiti mba cɔlɔ Izrayɛɛlɩ piya kaamʋ ñɩɣlɩm pɛɛ wena palabɩnɩ cɔjɔ sɔsɔ tɛ pataŋa yaa laŋɩyɛ taa kabʋa yɔ.
(Ejipiti Lɩʋ 28:38) Aarɔɔnɩ kiɖe taa. Nɛ Aarɔɔnɩ kaɣ sɩɣlʋʋ kɩwɛɛkɩm mbʋ Izrayɛɛlɩ piya kaɣ labʋ sɩ-tʋma kpeekpe taa nɛ sɩ-haɖɛ taa yɔ. Hʋnʋʋ kaɣ wɛʋ e-kiɖe taa tam nɛ Kɩbaɣlʋ taa hɛɛnɩ-wɛ.
it-2 861 § 8
Kele kele wɛtʋ
Kpɩna nɛ tɔɔnasɩ. Naŋ, heŋ nɛ pʋŋ lʋlʋʋ kajalaɣ kpɩna wena yɔ, akɛ kpɩna wena awɛ kele kele Yehowa ɛsɩndaa yɔ, nɛ pɩɩpɔzaa se pɛcɛlɩ-ɩ yɛ. Pɩɩwɛɛ se pasɩɩ kpɩna ana nɛ hɔɔlʋʋ nɛ cɔjɔnaa kpaɣ-yɛ nɛ palaanɩ kɩlaŋ. (Kɩg 18:17-19) Kajalaɣ tɩŋ pee nɛ hɔɔlʋʋ hiu ñɩŋgʋ haɖɛ kaawɛ ɖɔɖɔ kele kele nɛ pɩɩwɛɛ se pakpaɣ pɩtɩŋa nɛ palaanɩ kɩlaŋ yaa palabɩnɩ haɖɛ nɛ paɖʋnɩ nesi tʋma wena palakɩ kediɣzaɣ kizinziku tɛɛ yɔ. (Ejl 28:38) Wondu ndʋ payɩ tɩɩwɛ kele kele Yehowa ɛsɩndaa yɔ, pɩɩwɛɛ se tɩwɛɛ ŋgee, pataaleɣyiɣni-tʋ nɛ pataakpakɩɣ-tʋ nɛ palakɩnɩ mbʋ pɩtɩmʋna yɔ. Ðɩkpaɣ hɔɔlʋʋ hiu ñɩŋgʋ haɖɛ kɩɖaʋ. Ye nɔɔyʋ ɛlɩzɩ ɛ-ñɩm hɔɔlʋʋ hiu se ɛlabɩnɩ hɔɔlʋʋ hiu ñɩŋgʋ haɖɛ, ɛlɛ pʋwayɩ ɛ-maɣmaɣ yaa ɛ-hɔʋ taa nɔɔyʋ kɔyɩ pɩ-yɔɔ nɛ ɛlabɩnɩ nabʋyʋ yɔ, ɛmanɩ paɣtʋ ndʋ paɖʋwa pɩlɩɩnɩ wondu kele kele ñɩndʋ yɔɔ yɔ, tɩ-yɔɔ. Paɣtʋ pɔzʋʋ se ɛhɛyɩ, nɛ mbʋ pɩpɔzʋʋ se ɛhɛyɩ yɔ, pɩwɛɛ se ɛsɔzɩ pɩ-hɔɔlʋʋ 5 ñɩŋgʋ. Pɩwɛɛ ɖɔɖɔ se ɛha e-wondu taa ɛyaʋ ŋgʋ kɩfɛyɩnɩ ɛjandʋ natʋyʋ yɔ. Ye mbʋ pɩɩcɛyɩ siŋŋ se pɛwɛɛnɩ ñamtʋ wondu ndʋ tɩwɛ kele kele Yehowa ɛsɩndaa yɔ, tɩ-yɔɔ.—Lev 5:14-16.
Bibl kalʋʋ
(Ejipiti Lɩʋ 27:1-21) Ŋŋla kɩlaʋ altaaru nɛ sɛya ɖasɩ, kɩkaɣ wɛnʋʋ nuŋgolonzi kagbanzɩ ɖaɣlɩkɩŋ taa nɛ walanzɩ taa, pʋ-tɔbʋʋ se kɩ-kpɛnzɩ wɛɣ kɩmaŋ, ɛlɛ kɩ-kʋkʋyɩŋ wɛɣnɩ nuŋgolonzi naadozo. 2 Ŋŋsɩɩ kɩ-kɔnanaa naanza taa kɛŋgɛmɩŋ weyi ɩmʋnɩ-kʋ yɔ nɛ ŋtaa ɩ-yɔɔ ñɩɣyʋʋ matɩm. 3 Ŋŋla ñɩɣyʋʋ ñanzɩ nɛ ŋsɩɩ altaaru cɔlɔ nɛ paakuuni num tɔlɩma, tɛŋɛlɛ tuyiŋ, poyosonaa mba paacozini calɩm nɛ pamɩzɩ yɔ, kela lɔyɩsɩ nɛ mokasɩ nzɩ pefiɣdiɣni sɔzɩŋ ñɔsɩ yɔ, ŋŋla ñɩɣyʋʋ altaaru cɔlɔ wondu kpeekpe. 4 Ŋŋhuuzi altaaru yɔɔ ñɩɣyʋʋ piyuu nɛ ŋka ñɩɣyʋʋ kokoo naanza piyuu ŋkʋ kɩ-kɔnanaa naanza taa. 5 Ŋŋsɩɩ piyuu ŋgʋ altaaru cɔlɔ tendene cikpeɖe tɛɛ, hadɛ, ɛzɩ kɩkpa kɩtalɩ tendene hɛkʋ taa lɛ. 6 Ŋŋla altaaru nɛ sɛya ɖasɩ ɖaŋ nɛ ŋsuu-i ñɩɣyʋʋ. 7 Paasʋzɩ kokoo taa, nɛ ɩwɛɛ altaaru cɔlɔ ceemenje, paakɛyɩɣ-kʋ lɛ. 8 Ŋla-kʋ nɛ kpoŋgbolonaa nɛ kɩ-tɛɛ wɛɛ pɔʋ, ɛzɩ pawɩlʋʋ-ŋ kɩ-lɛzʋʋ pʋʋ taa yɔ. 9 Ŋŋla Ðɩjaɣyɛ taa kadaɣ nɛ Hadɛ hɔɔlʋʋ yɔɔ kiŋ, wɩsɩ ɖɩɖʋyɛ yɔɔ kiŋ, ɛlɛ, kɛdɛɛkasɩ nzɩ posusuu kadaɣ taa yɔ, nɛ sɩkɛ kpɛm mbʋ pehilitaa yɔ, sɩkaɣ wɛnʋʋ sɩ-ɖaɣlɩkɩŋ taa nuŋgolonzi mɩnʋʋ hɔɔlʋʋ kajalaɣ ñɩŋgʋ yɔɔ. 10 Si-nuŋgolonzi nɛɛlɛ kaɣ siɣu ñɩɣyʋʋ pɔŋ nɛɛlɛ taa, nɛ sɩ-yɔɔ wɛɛ kanasɩ cikpesi nɛ ñɩɣlɩm ɖaŋ. 11 Mbʋ ɖɔɖɔ, hayo kiŋ hɔɔlʋʋ yɔɔ, ŋŋla kɛdɛɛkasɩ cikpesi nzɩ sɩ-ɖaɣlɩkɩŋ ɩkɛ nuŋgolonzi mɩnʋʋ yɔ, nɛ tilima nɛɛlɛ, wena akaɣ siɣu ñɩɣyʋʋ pɔŋ nɛɛlɛ taa, a-yɔɔ wɛɛ kanasɩ cikpesi nɛ ñɩɣlɩm ɖaŋ yɔ. 12 Wɩsɩ ɖɩɖʋyɛ hɔɔlʋʋ yɔɔ, kadaɣ walanzɩ kaɣ kɛʋ kɛdɛɛkasɩ kɩpɔpɔsɩ nuŋgolonzi nɩɩnʋwa nzɩ pɔcɔzɩ tilima hiu yɔɔ, wena pesiɣ-yɛ ñɩɣyʋʋ pɔŋ hiu taa yɔ. 13 Kadaɣ walanzɩ, wɩsɩ ɖɩlɩyɛ hɔɔlʋʋ yɔɔ, wɩsɩ ɖɩlɩyɛ taa kɛ nuŋgolonzi nɩɩnʋwa. 14 Hɔɔlʋʋ lɛɛkʋ nɔnɔɔ kaɣ kɛʋ kɛdɛɛkasɩ kɩpɔpɔsɩ nuŋgolonzi hiu nɛ kagbanzɩ, pɩ nɛ pi-tilima naadozo nɛ a-pɔŋ naadozo. 15 Nɔnɔɔ hɔɔlʋʋ lɛɛkʋ kaɣ kɛʋ kɛdɛɛkasɩ kɩ-pɔpɔsɩ nuŋgolonzi hiu nɛ kagbanzɩ, sɩ nɛ si-tilima naadozo nɛ pɔŋ naadozo. 16 Kadaɣ nɔnɔɔ kaɣ kɛʋ kɛdɛɛka kɩ-pɔpɔwa nuŋgolonzi nɛɛlɛ, palabɩ-kɛ nɛ tɔlɩm kɩsɛɛmɩm welewele, tɔlɩ kɩsɛɛmɩm kpaʋʋ nɛ tɔlɩm kɩsɛɛmɩm ɖʋʋɖʋʋ, pɩ nɛ Anasaayɩ pɩsatʋ ndʋ pehiliti-tʋ yɔ, weyi ɛsɩm sika ɖʋʋ camɩyɛ pɩsaʋ yɔɔ yɔ, ɛ-tʋmɩyɛ lɛ, nɛ pɔpɔ kɛdɛɛka ŋga tilima naanza yɔɔ, wena pesiɣ-yɛ pɔŋ naanza taa yɔ. 17 Tilima kpeekpe wena akpɛndaa nɛ pɩlakɩ kadaɣ yɔ, patamɩsɩɣ-yɛ nɛ ɖama nɛ ñɩɣlɩm ɖaŋ; ɩ-kanasɩ cikpesi kaɣ kɛʋ ñɩɣlɩm nɛ pɔŋ kɛ ñɩɣyʋʋ. 18 Kadaɣ walanzɩ kaɣ kɛʋ nuŋgolonzi mɩnʋʋ. Ka-walanzɩ kɛɣ nuŋgolonzi nɩɩnʋwa nɛ ka-kʋkʋyɩŋ nuŋgolonzi kagbanzɩ. Kɛdɛɛkasɩ kɩpɔpɔsɩ kpeekpe kaɣ kɛʋ Anasaayɩ pɩsatʋ tɩɖɩɖɩ, ndʋ pehiliti-tʋ yɔ nɛ sɩ-pɔŋ kɛ ñɩɣyʋʋ. 19 Ðɩjaɣyɛ taa wondu kpeekpe ndʋ palakɩnɩ tʋmɩyɛ kpeekpe yɔ, ɖaŋ weyi pesiki yɔ i-kpeekpe yɔ, nɛ kadaɣ taa ɖaŋ kɛɣ ñɩɣyʋʋ. 20 Ðʋ Izrayɛɛlɩ piya se sɩkɔnɩ num kele kele mbʋ nɛ ŋɖʋ-pʋ fɩtɩla taa nɛ fɩtɩla wɛɛ nɛ kɩñandɩɣ tam 21 Kediɣzaɣ kizinziku tɛɛ, Kɛdɛɛka sɔsɔɔ nɛ ka-wayɩ, ŋga kekendi Aseɣɖe tɔm yɔɔ yɔ. Aarɔɔnɩ nɛ ɛ-pɩyalaa paañɔɔzɩ nɛ fɩtɩla wɛɛ nɛ kɩñandɩɣ ɖoo nɛ wɩsɩ Kɩbaɣlʋ ɛsɩndaa. Pɩkaɣ kɛʋ paɣtʋ Izrayɛɛlɩ piya kpaɖɩŋ kpeekpe.
28 SEPTEMBRE–4 OCTOBRE
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 29-30
“Haɖɛ nɖɩ palabɩ Yehowa yɔ”
(Ejipiti Lɩʋ 30:11, 12) Kɩbaɣlʋ yɔɔdɩnɩ Moyizi nɛ eheyi-i se: 12 “Ŋŋkalɩɣ Izrayɛɛlɩ piya se ŋtɩlɩ sɩ-ñʋʋ lɛ, paa weyi lɛ ɛkaɣ hɛyʋʋ lambuu Kɩbaɣlʋ e-wezuu yɔɔ, nɛ kʋñɔŋ nakʋyʋ ɛtaalɩɩ pɔ-yɔɔ, pa-kɩgalʋʋ yɔɔ.
it-1 767
Kɩgalʋʋ
Sinayii. Izrayɛɛlɩ piya kaakpeɣli Sinayii cɔlɔ lɛ, Yehowa kaapɔzaa se pala kajalaɣ kɩgalʋʋ. Pʋbʋ taa lɛ, palɩ Ejipiti nɛ pɩla pɩnzɩ naalɛ nɛ paawɛ fenaɣ naalɛ ñɩŋga taa. Pɩsa nɛ Moyizi pɩzɩ nɛ ɛla tʋmɩyɛ nɖɩ lɛ, paapɔzɩ paa cejewiye nɖɩ lɛ ɖɩ-ñʋʋdʋ se ɛcɔnɩ kɩgalʋʋ tʋmɩyɛ yɔɔ e-cejewiye taa. Pɩɩwɛ se pakalɩ abalaa mba payɩ pɛwɛnɩ pɩnzɩ 20 yaa pɩcɛzɩ mbʋ yɔ, pʋ-tɔbʋʋ se mba papɩzɩɣ powolo you yɔ. Pɩtasɩ lɛ, mba payɩ pakalɩ-wɛ yɔ, pɩpɔzʋʋ se pɛhɛyɩ lambuu sikli hɔɔlʋʋ ($ 1.10) nɛ paɖʋnɩ nesi tʋma wena palakɩ Ɛsɔ sɛtʋ kɩɖanɖʋʋ tɛɛ yɔ. (Ejl 30:11-16; Kɩg 1:1-16, 18, 19) Ɛyaa mba paakalaa yɔ, paakpɛndɩ 603550, ɛlɛ pataakalɩ Leevi mba. Paatayɩɣnɩ-wɛ tɛtʋ, paahɛyɩɣ lambuu Ɛsɔ sɛtʋ kɩɖanɖʋʋ tʋma yɔɔ nɛ paawoki ɖɔɖɔ you.—Kɩg 1:44-47; 2:32, 33; 18:20, 24.
(Ejipiti Lɩʋ 30:13-15) Weyi pakalɩɣ-ɩ yɔ, ɛkaɣ hɛyʋʋ templo yɔɔ lambuu hɔɔlʋʋ, ŋgʋ kɩkɛ geranaa liidiye nɛɛlɛ yɔ. Kɩbaɣlʋ pɛhɛyɩɣ lambuu hɔɔlʋʋ ŋgʋ. 14 Pakalɩɣ weyi yɔ, pʋ-tɔbʋʋ se weyi ɛwɛnɩ pɩnzɩ nɛɛlɛ nɛ pɩɖɛɛ pɩ-yɔɔ yɔ, pɩwɛnɩ-ɩ se ɛhɛyɩ lambuu Kɩbaɣlʋ. 15 Ñɩm tʋ ɛɛkaɣ haʋ nɛ pɩɖɛɛ pɩ-yɔɔ nɛ kʋñɔndʋ ɛtaapasɩ hɔɔlʋʋ yɔɔ, nɛ ɩhɛyɩ Kɩbaɣlʋ mi-weziŋ yɔɔ lambuu.
it-1 517
Haɖɛ
Palakaɣ haɖɛ ndɩ ndɩ Moyizi paɣtʋ alɩwaatʋ taa. Moyizi kalɩ Izrayɛɛlɩ piya nɛ pɩtɛ lɛ, pɔpɔzɩ mba payɩ pɛwɛnɩ pɩnzɩ 20 yaa pɩcɛzɩ mbʋ yɔ se pɛhɛyɩ lambuu pa-ciyam yɔɔ, pɩɩwɛɛ se pɛhɛyɩ sikli yaa “lambuu hɔɔlʋʋ [pɩtɩla $ 1.10], ŋgʋ kɩkɛ geranaa liidiye nɛɛlɛ yɔ.” Yehowa palakaɣ haɖɛ nɖɩ se pɩsa nɛ pekpeɣ-wɛ pa-kɩwɛɛkɩm nɛ paya pe-weziŋ. (Ejl 30:11-16) Yuuda mba caanaʋ taa tɔm mayʋ Josèphe (Guerre des Juifs, VII, 218 [VI, 6]), yɔɔdaa se pʋwayɩ lɛ, pɛhɛyaɣ “kele kele lambuu” ŋgʋ tam kʋɖʋmam pɩnaɣ taa.—4Aw 24:6-10; Mt 17:24; kalɩ ɖɔɖɔ IMPÔT.
(Ejipiti Lɩʋ 30:16) Lambuu liidiye nɖɩ ŋmʋ-ɖɩ Izrayɛɛlɩ piya yɔ, ŋcɛlɩ-ɩ nɛ ɖɩwazɩ Kediɣzaɣ kizinziku yɔɔ cɔnʋʋ tʋmɩyɛ. Ðɩ-yɔɔ lɛ, Kɩbaɣlʋ kaɣ tɔzʋʋ Izrayɛɛlɩ piya yɔɔ, nɛ ɖɩkaɣ kɛʋ mi-wezuu lambuu.”
w11 1/11 12 § 1-2
Ŋŋsɩm-tʋ?
Liidiye nɖɩ ɖɩsɩɣaɣnaɣ se pala tʋma ndɩ ndɩ Yeruzalɛm Templo taa yɔ, le palɩɣaɣ ɖɩ-yɔɔ?
Samaɣ hɛyaɣ lambuu nɛ kalakɩ ɖɔɖɔ hɔɔlɩŋ hiu haɖɛ. Haɖɛ nɖɩ, nɖɩ pakpakaɣ nɛ palakɩnɩ templo taa tʋma ndɩ ndɩ. Ɛlɛ pɩtɩkɛ haɖɛ nɖɩ ɖi-ɖeke paɣtʋ pɔzaɣ se paha. Kɩɖaʋ nakʋyʋ yɔ: Alɩwaatʋ ndʋ pamaɣaɣ Ɛsɔ sɛtʋ kɩɖanɖʋʋ yɔ, Yehowa heyi Moyizi se eyele nɛ ɛyaa mba payɩ pakalɩ-wɛ yɔ pa-taa paa weyi lɛ, ɛha sikli hɔɔlʋʋ nɛ pɩkɛnɩ ‘haɖɛ Yehowa.’—Ejipiti Lɩʋ 30:12-16.
Paa Yuuda tʋ weyi lɛ, ɛhɛyaɣ Templo taa lambuu paa pɩnaɣ ŋga. Lambuu ŋgʋ Yesu kaaheyi Pɩyɛɛrɩ se ɛkpaɣ liidiye pɔɔyaɣ ŋga ɛkaɣ naʋ kpakpayaɣ nɔɔ taa yɔ nɛ ɛhɛyɩna.—Maatiyee 17:24-27.
Ðɩñɩnɩ fezuu taa ñɩm
(Ejipiti Lɩʋ 29:10) “Ŋwoni naaʋ kediɣzaɣ kizinziku cɔlɔ; nɛ Aarɔɔnɩ nɛ ɛ-pɩyalaa pakpazɩ nesi kɩ-ñʋʋ yɔɔ.
it-2 185 § 2
Nesi
Nesi tɩnʋʋ nɔɔyʋ yɔɔ yaa nabʋyʋ yɔɔ. Lɩmaɣza ndɩ ndɩ yɔɔ patɩnaɣ nesi ɛyʋ nɔɔyʋ yɔɔ yaa wonuu nakʋyʋ yɔɔ. Ɛlɛ ɖoŋ ɖoŋ lɛ, patɩnɩɣ nesi nɔɔyʋ yɔɔ yaa nabʋyʋ yɔɔ se pawɩlɩ se palɩzɩ ɛyʋ ɛnʋ se ɛla ŋgee tʋmɩyɛ naɖɩyɛ yaa palɩzɩ wonuu ŋgʋ se palabɩnɩ-kʋ ŋgee tʋmɩyɛ naɖɩyɛ. Alɩwaatʋ ndʋ palɩzaɣ cɔjɔnaa Izrayɛɛlɩ yɔ, Aarɔɔnɩ nɛ ɛ-pɩyalaa patɩnɩ pe-nesi kpɩna wena palɩzaa se palaɣ kɩlaʋ yɔ a-yɔɔ; ana lɛ naaʋ nɛ ɛyaŋ naalɛ. Lakasɩ nzɩ sɩwɩlaɣ se Yehowa tisaa se palaa kpɩna ana ɛyaa mba palɩzaa yɔ pɔ-yɔɔ, nɛ pɛkɛ ɛ-cɔjɔnaa. (Ejl 29:10, 15, 19; Lev 8:14, 18, 22) Alɩwaatʋ ndʋ Yehowa heyi Moyizi se ɛlɩzɩ Yozuwee nɛ ɛlɛ lɛɣzɩ ɛ-lone taa yɔ, Moyizi kaatɩnɩ e-nesi Yozuwee yɔɔ nɛ piyele nɛ “lɔŋ fezuu su . . . Yozuwee taa ɖo” se pɩsɩnɩ-ɩ nɛ eɖiyi Izrayɛɛlɩ samaɣ camɩyɛ. (Wp 34:9) Patɩnɩɣ nesi ɛyaa yɔɔ alɩwaatʋ ndʋ palɩzɩɣ-wɛ se pamʋ wazasɩ nasɩyɩ yɔ. (Kiɖe 48:14; Mk 10:16) Ɛyaa mba Yesu kaawawa yɔ, ɛɛtɩnɩ nesi pa-taa nabɛyɛ yɔɔ. (Mt 8:3; Mk 6:5; Lk 13:13) Alɩwaatʋ natʋyʋ taa, apostoloowaa tɩnaɣ pe-nesi ɛyaa yɔɔ nɛ paba mʋʋ fezuu kiɖeɖeu.—Tʋm 8:14-20; 19:6.
(Ejipiti Lɩʋ 30:31-33) Ŋŋheyi Izrayɛɛlɩ piya ɖɔɖɔ se: Ɩkaɣ cɔnʋʋ num kɩtatam se pɩkɛ-mɩ kiɖeɖem, waaɣ nɛ waaɣ. 32 Pataataa-pʋ ɛyʋ yem tomnaɣ, ɩtaala nabʋyʋ ɛzɩ mbʋ yɔm, ɛzɩ pakpaɣ mbʋ nɛ palabɩnɩ-pʋ yɔ, mbʋ pʋyɔɔ yɔ pɩkɛ kiɖeɖem nɛ ɩɩcɔnɩ-pʋ se pɩkɛ kiɖeɖem. 33 Weyi ɛlabɩ nabʋyʋ mbʋ yɔ nɛ ɛtaa ɛyʋ yem kɔyɔ, pakaɣ-ɩ lɩzʋʋ ɛ-samaɣ taa nɛ pakʋ-ɩ.”
it-2 437 § 1
Patam num, num taʋ
Paɣtʋ taa Yehowa kaawɩlɩ Moyizi ɛzɩma pala num kiɖeɖem yɔ. Pɩɩkɛ num mbʋ pɩɩwɛ ŋgee yɔ, nɛ mbʋ mbʋ palakaɣnɩ-pʋ yɔ, mbʋ yɔ: Miiri, kanɛɛlɩ ŋgʋ kɩlɩɣ sɔzɩŋ camɩyɛ yɔ, kañɩŋgbayaɣ ŋga kalɩɣ sɔzɩŋ camɩyɛ yɔ, kaasɩ nɛ oliivi num. (Ejl 30:22-25) Ye ɛyʋ nɔɔyʋ ɛlabɩ num mbʋ nɛ ɛkpaɣ-pʋ nɛ ɛlabɩnɩ mbʋ ɛ-maɣmaɣ ɛsɔɔlaa yɔ yaa mbʋ paɣtʋ tɩha nʋmɔʋ se pala yɔ, pɩɩkɛ kɩwɛɛkɩm sɔsɔm kpem. (Ejl 30:31-33) Ye palɩzɩ nɔɔyʋ se ɛla tʋmɩyɛ naɖɩyɛ nɛ pataa-ɩ num mbʋ yɔ, pɩwɩlɩɣ se tʋmɩyɛ nɖɩ paɖʋʋ-ɩ yɔ, ɖɩ-tɔm cɛyɩ siŋŋ nɛ ɖɩwɛ kele kele Ɛsɔ ɛsɩndaa.
Bibl kalʋʋ
(Ejipiti Lɩʋ 29:31-46) Ŋŋkpaɣ ɛyaʋ ŋgʋ pala-kʋ cɔjɔtʋ kpaʋ wiye yɔ nɛ ŋtɩzɩ kɩ-nandʋ lone kiɖeɖee taa. 32 Nɛ Aarɔɔnɩ nɛ ɛ-pɩyalaa paatɔɔ ɛyaʋ nandʋ nɛ kpɔnʋ ŋgʋ kɩwɛ ɖɔkʋ taa, Kediɣzaɣ kizinziku nɔnɔɔ taa yɔ. 33 Paatɔɔ mbʋ pala-pʋ pa-kɩwɛɛkɩm yɔɔ, pakpaɣaɣ-wɛ cɔjɔnaa nɛ papɩsaɣ-wɛ kiɖeɖema lɛ. Ɛyʋ yem ɛɛkaɣ tɔɔʋ, mbʋ pʋyɔɔ yɔ pɩkɛ tɔɔnaɣ kiɖeɖeɣa. 34 Kɩlaʋ nandʋ ndʋ tɩkazaa yɔ, nɛ kpɔnʋ ŋgʋ kɩkazaa nɛ tɛʋ fe yɔ, ŋŋñaɣzɩ-wɛ miŋ; pataatɔɔ, mbʋ yɔ pɩkɛ pʋyʋ kiɖeɖeu. 35 Manɖʋ-ŋ paɣtʋ ndʋ Aarɔɔnɩ nɛ ɛ-pɩyalaa pɔ-yɔɔ yɔ, ŋŋɖɔ tɩ-yɔɔ: ŋŋla-wɛ cɔjɔ tokonaa suu sɔnzɩ kɩyakɩŋ lʋbɛ. 36 Nɛ paa kɩyakʋ ŋgʋ lɛ, ŋŋlaa neɣye kɩwɛɛkɩm yɔɔ nɛ ŋtaa-kʋ num nɛ ŋpɩsɩ-kʋ kiɖeɖeu. 37 Kɩyakɩŋ lʋbɛ lɛ, ŋŋwɛɛ nɛ ŋkpɛyɩɣ laŋɩyɛ hɛzʋʋ kɩgbɛyʋʋ altaaru yɔɔ nɛ ŋpɩsɩ-kʋ kiɖeɖeu. Ðɩnɛ ɛlɛ kɩkɛɣ kiɖeɖeu pɩŋŋ nɛ mbʋ pitukuni-kʋ yɔ, pɩkaɣ pɩsʋʋ kiɖeɖeu. 38 Mbʋ ŋŋlaa altaaru yɔɔ lɛ yɔ: pɩnaɣ kʋyʋmaɣ heɣsi naalɛ, paa kɩyakʋ ŋgʋ lɛ tam, 39 heɣa kʋyʋmaɣ tanaŋ tɛɛ nɛ lɛɛka ɖanaɣ. 40 Ŋŋlaɣ kɔɔnɔɔ heɣa lɛ, ŋkpɛndɩnɩ mʋlʋm kɩkpɩzɩm ɖɔfɩɩ mbʋ ponuuti-pʋ nɛ num kɩfam pazɩ nɛ sʋlʋm pazɩ yɔ. 41 Heɣa naalɛ ŋga yɔ, ŋŋlaa-kɛ ɖanasɩ naalɛ hɛkʋ taa, pɩ nɛ haɖɛ nɛ kilizaɣ, ɛzɩ tanaŋ tɛɛ yɔ: pɩkɛ tɩlaaɖɩ ŋgʋ kɩhɛzɩɣ laŋɩyɛ yɔ, tɔɔnaɣ ŋga kañaɣaa se pɩɖʋ Kɩbaɣlʋ hɩɖɛ yɔ. 42 Pɩkɛ kɩlaʋ miŋ kɩñaɣzʋʋ ŋgʋ kɩkaɣ wɛʋ paa ɖooye yɔ, waaɣ nɛ waaɣ, Kediɣzaɣ kizinziku nɔnɔɔ taa, Kɩbaɣlʋ ɛsɩndaa, ɖenɖe mankaɣ-ŋ katɩnʋʋ se meheyi-ŋ tɔm yɔ. 43 Mankaɣ Izrayɛɛlɩ piya katɩnʋʋ lone ɖɩnɛ yɔ ɖɩ-taa, nɖɩ mo-yuŋ kaɣ pɩsʋʋ kiɖeɖee yɔ. 44 Mankaɣ pɩsʋʋ Kediɣzaɣ kizinziku nɛ altaaru kiɖeɖema. Mankaɣ ɖɔɖɔ pɩsʋʋ kiɖeɖema Aarɔɔnɩ nɛ ɛ-pɩyalaa nɛ pala mɔn-cɔjɔtʋ tʋmɩyɛ. 45 Mankaɣ caɣʋ Izrayɛɛlɩ piya hɛkʋ taa nɛ mɛnkɛ pɛ-Ɛsɔ. 46 Ðɩnɛ ɛlɛ pakaɣ ɖiɣzinuu se ma, Kɩbaɣlʋ pɛ-Ɛsɔ, malɩzɩnɩ-wɛ Ejipiti tɛtʋ taa, se mɛwɛɛ pɛ-hɛkʋ taa: ma Kɩbaɣlʋ Ɛsɔ.