Kɔrɛntɩ mba takayaɣ naalɛ ñɩŋga

12 Pɩwɛɛ se mankʋndɩ. Pɩfɛyɩnɩ wazaɣ, ɛlɛ mɛnkɛzɩɣ ma-lɩmaɣza nɛ Kɩbaɣlʋ maamaaci natʋ+ nɛ mbʋ ekulaa nɛ ɛwɩlɩ-m yɔ pɩ-yɔɔ.+ 2 Mansɩm ɛyʋ nɔɔyʋ weyi ɛ nɛ Krɩstʋ pɛwɛ nɔɔ kʋɖʋmaɣ yɔ, pɩlakɩ pɩnzɩ 14 yɔ—ye ɛɛwɛ tomnaɣ taa yaa ɛtaawɛɛ tomnaɣ taa yɔ, maasɩŋ; Ɛsɔ sɩmna—pɩkpaɣ ɛyʋ ɛnʋ nɛ pɩkpazɩ-ɩ ɛsɔdaa 3 ñɩŋgʋ taa. 3 Ɛɛɛ, mansɩm ɛyʋ ɛnʋ—ye ɛɛwɛ tomnaɣ taa yaa ɛtaawɛɛ tomnaɣ taa yɔ, maasɩŋ; Ɛsɔ sɩmna— 4 pɩkpaɣ ɛyʋ ɛnʋ nɛ piwoni-i paradisuu taa nɛ ɛnɩɩ tɔm ndʋ paapɩzɩɣ nɛ pɔyɔɔdɩ yɔ nɛ tɔm ndʋ pɩtɩha ɛyʋ nʋmɔʋ se ɛyɔɔdɩ yɔ. 5 Mankaɣ kʋndʋʋ ɛyʋ ɛnʋ ɛ-yɔɔ, ɛlɛ maakaɣ kʋndʋʋ ma-maɣmaɣ man-tɩ yɔɔ ye pɩtɩkɛ mɛ-ɛjandʋ yɔɔ mankʋndʋʋ yɔ. 6 Mbʋ pʋyɔɔ yɔ paa mɔnsɔɔlaa se mankʋndɩ yɔ, maakaɣ kɛʋ kɩmɛlɛŋ, mbʋ pʋyɔɔ yɔ toovenim mankaɣ yɔɔdʋʋ. Ɛlɛ mankpaɣ man-tɩ se mantaala mbʋ, se pɩsa nɛ nɔɔyʋ ɛtaamaɣzɩ se malabɩ nabʋyʋ nɛ pɩkɩlɩ mbʋ ɛnaɣ malakɩ yɔ yaa pɩkɩlɩ tɔm ndʋ ɛnɩɣ mɔyɔɔdʋʋ yɔ, 7 cɛɛkɛ maamaaci natʋ ndʋ mamʋwa yɔ tɩ-yɔɔ.

Pɩsa nɛ paɖɩɣ-m nʋmɔʋ nɛ mantaakpazɩ man-tɩ kadadayaɣ lɛ, paɖʋ sɔɔyɛ naɖɩyɛ mon-tomnaɣ taa,+ Sataŋ tiyiyu nɔɔyʋ, se ɖɩwɛɛ nɛ ɖɩcɛkɩ-m kadanzɩ,* se pɩsa nɛ mantaakpazɩ man-tɩ kadadayaɣ. 8 Mentendi Kɩbaɣlʋ tam nabudozo pɩ-yɔɔ, se eposini-m ɖɩ. 9 Ɛlɛ eheyi-m se: «Mo-lootiye ɖɔ-ŋ, mbʋ pʋyɔɔ yɔ mon-ɖoŋ wɛɛ nɛ ɩlakɩ tʋmɩyɛ pilim ɛjandʋ taa.»+ Mbʋ yebina nɛ mankaɣ kʋndʋʋ mɛ-ɛjandʋ yɔɔ nɛ taa leleŋ nɛ pɩkɩlɩ, se pɩsa nɛ Krɩstʋ ɖoŋ wɛɛ mɔ-yɔɔ ɛzɩ kizinziku yɔ. 10 Pʋyɔɔ lɛ, man-taa lakɩ leleŋ ɛjandʋ taa, tʋtʋ taa, kɛdɛɖaɣ alɩwaatʋ taa, nazɩm nɛ kala taa Krɩstʋ yɔɔ. Mbʋ pʋyɔɔ yɔ alɩwaatʋ ndʋ mɛnkɛ ɛjam yɔ, ɖɩnɛ ɛlɛ mɛwɛ ɖoŋ.+

11 Manpɩsɩ kɩmɛlɛŋ. Miyebina nɛ manpɩsɩ mbʋ, mbʋ pʋyɔɔ yɔ mɩ pɩɩwɛɛ se ɩsamɩ-m. Mbʋ pʋyɔɔ yɔ paa mantɩkɛ pʋyʋ yɔ, mawɩlaa se mɩ-tɛ apostoloowaa kɩkɩlaa tɩkɩlɩ-m paa pʋyʋ kʋɖʋm taa.+ 12 Toovenim taa lɛ, ɩna yʋsasɩ nzɩ sɩwɩlɩɣ kaɣlaa se mɛnkɛ apostoloo yɔ mɩ-hɛkʋ taa pɩtɩŋnɩ laŋɩyɛ ɖɔkʋʋ sɔsɔm yɔɔ,+ nɛ pɩtɩŋnɩ yʋsasɩ nɛ piti lakasɩ nɛ maamaaci lakasɩ yɔɔ.+ 13 Mbʋ pʋyɔɔ yɔ kʋjɔʋ ŋgʋ palabɩ agbaa lɛɛna nɛ pɩkɩlɩ-mɩ, ye pɩtɩkɛ se ma-maɣmaɣ mantɩpɩsɩ-mɩ sʋʋtʋ yɔ?+ Ɩkpaɣ kɩdɛkɛdɩm mbʋ nɛ ikpeɣ-m faaa.

14 Ɩna! Nabudozo ɖeɖe yɔ mɔñɔɔzʋʋ man-tɩ se mɔnkɔɔ mɩ-cɔlɔ yɔ, nɛ maakaɣ-mɩ pɩsʋʋ sʋʋtʋ. Mbʋ pʋyɔɔ yɔ pɩtɩkɛ mbʋ ɩwɛna yɔ mañɩnɩɣ,+ ɛlɛ mɩ-maɣmaɣ; mbʋ pʋyɔɔ yɔ pɩtɩkɛ piya+ pɩwɛɛ se sɩcazɩ nɛ sɩsɩɩ sɩ-lʋlɩyaa, ɛlɛ lʋlɩyaa pɩwɛɛ se pacazɩ nɛ pasɩɩ pe-piya. 15 Piyele nɛ ma yɔ, man-taa kaɣ labʋ leleŋ siŋŋ se menkpizi me-nesi tɛɛ cɩɖɩ cɩɖɩ nɛ mɛncɛlɩ man-tɩ pilim mɩ-yɔɔ* ɖɔɖɔ.+ Ye mɔnsɔɔlɩ-mɩ siŋŋ nɛ pɩkɩlɩ yɔ, mɩ lɛ pɩwɛɛ se ɩsɔɔlɩ-m pazɩ yaa we? 16 Ɛlɛ paa pɩtɩɩkɛ suwe yɔ, mantɩpɩsɩ-mɩ sʋʋtʋ.+ Paa mbʋ yɔ, ɩtɔŋ se maawɛ «ajitu» nɛ «mantɩŋnɩ mulum yɔɔ» nɛ mankpa-mɩ. 17 Ɛzɩ mantɩŋnɩ mba mentiyi-wɛ yɔ pa-taa nɔɔyʋ yɔɔ se mehiɣ kɛzɛɣa nakɛyɛ mɩ-cɔlɔ yaa we? 18 Menseɣti Tiiti se ɛkɔɔ mɩ-tɛ nɛ mentiyi koobu nɔɔyʋ se ɛ nɛ ɩ pɔkɔɔ. Ɛzɩ Tiiti ñɩnɩ kɛzɛɣa nakɛyɛ mɩ-cɔlɔ yaa we?+ Ɛzɩ ɖɩtɩɖɔ maɣzɩm kʋɖʋmʋm taa na? Ɛzɩ ɖɩtɩɖɔ nʋmɔʋ kʋɖʋmʋʋ taa na?

19 Ɩwɛɛ nɛ ɩmaɣzɩɣ alɩwaatʋ tʋnɛ tɩ-tɩŋa tɩ-taa se ɖiɖiɣni lʋbʋ ɖa-tɩ yɔɔ mɩ-ɛsɩndaa yaa we? Ɛsɔ ɛsɩndaa ɖɩwɛɛ nɛ ɖɩyɔɔdʋʋ ɖa nɛ Krɩstʋ ɖɔ-nɔɔ kʋɖʋmaɣ labʋ taa. Ɛlɛ man-kʋsɔɔlaa, mbʋ payɩ ɖɩlakɩ yɔ, ɖɩlakɩ-pʋ se ɖɩkpazɩ-mɩ ɖoŋ na. 20 Mbʋ pʋyɔɔ yɔ sɔɔndʋ kpaɣ-m se alɩwaatʋ ndʋ mantalɩɣ mɩ-tɛ yɔ, maamakɩnɩ-mɩ ɛzɩ mɔnsɔɔlʋʋ yɔ, nɛ ɩɩnaɣ-m ɛzɩ ɩsɔɔlʋʋ yɔ; ɛlɛ mamakɩnɩ you, sʋsɩ, pana kadadayaɣ, ɖama kɩɩnɩnʋʋ, kɔlɔmɔtʋ, ɛyaa tɔm yɔɔdʋʋ, tɩ kpazʋʋ nɛ yem yem lakasɩ. 21 Pʋtɔma yɔ alɩwaatʋ ndʋ mantasɩɣ kɔm yɔ, mɛ-Ɛsɔ ɖʋʋ-m fɛyɛ mɩ-ɛsɩndaa; nɛ pɩwɛɛ se mancaɣ kʋñɔwiye ɛyaa sakɩyɛ mba paalabɩ kɩwɛɛkɩm, ɛlɛ patikpiɖi pɩ-yɔɔ yɔ pɔ-yɔɔ: Palabɩ azuluma lakasɩ, kʋzʋʋ kɩdɛkɛdʋʋ* nɛ lakasɩ nzɩ sɩwɛ fɛyɛ yɔ.*