Ebree mba
4 Ye mbʋ, lidaʋ tɔm ɖaɣnɩ wɛʋ se ɖɩpɩzɩɣ nɛ ɖɩsʋʋ ɛ-hɛzɩyɛ taa; pʋyɔɔ lɛ, ɖɩkpa ɖa-tɩ* nɛ pɩtaala se nɔɔyʋ wɛ ɖa-taa nɛ ɛtɩmʋnɩ lidaʋ tɔm ndʋ.+ 2 Mbʋ pʋyɔɔ yɔ posusi-ɖʋ ɖɔɖɔ tɔm kɩbandʋ+ ɛzɩ paasusuu-wɛ tʋ yɔ; ɛlɛ tɔm ndʋ panɩwa yɔ tɩtɩwazɩ-wɛ, mbʋ pʋyɔɔ yɔ pataawɛɛnɩ tisuu ɛzɩ mba pañama yɔ. 3 Mbʋ pʋyɔɔ yɔ ɖa mba ɖɩwɛnɩ tisuu yɔ, ɖɩsʋʋ hɛzɩyɛ taa, ɛzɩ ɛyɔɔdʋʋ yɔ: «Pʋyɔɔ monɖuu man-pana taa se: “Paakaɣ sʋʋ mɛ-hɛzɩyɛ taa,”»+ paa ɛ-tʋma kaatɛma kpaɣnɩ alɩwaatʋ ndʋ pasɩ ɛjaɖɛ tigiɖe yɔ.+ 4 Mbʋ pʋyɔɔ yɔ, ɛyɔɔdɩ ɖoli evemiye 7 ñɩnɖɛ yɔɔ tɔm tʋnɛ: «Nɛ Ɛsɔ hɛzɩnɩ ɛ-tʋma tɩŋa evemiye 7 ñɩnɖɛ wiye,»+ 5 nɛ ɛtasɩ yɔɔdʋʋ ɖoŋlɛɛɖɛ se: «Paakaɣ sʋʋ mɛ-hɛzɩyɛ taa.»+
6 Ye mbʋ, waɖɛ tasɩ kazʋʋ se nabɛyɛ ɩsʋʋ ɖɩ-taa nɛ mba pacalɩ-wɛ tɔm kɩbandʋ susuu yɔ pa-kaañamtʋ yɔɔ lɛ, patɩsʋʋ ɖɩ-taa; pʋyɔɔ lɛ,+ 7 alɩwaatʋ sakɩyɛ wayɩ, ɛtasɩ ɖʋʋ kɩyakʋ nakʋyʋ alɩwaatʋ ndʋ ɛyɔɔdɩ Daviid keɣa taa se: «Sɔnɔ» yɔ; ɛzɩ maayɔɔdʋʋ nɛ pɩɖɛɛ yɔ: «Sɔnɔ, ye iwelisiɣ ɛ-nɔɔ yɔ, ɩtaala nɛ mɩ-laŋa sʋʋ kpɩzɩŋ.»+ 8 Mbʋ pʋyɔɔ yɔ, ye Yozuwee+ kaasʋnɩ-wɛ hɛzɩyɛ naɖɩyɛ taa yɔ, Ɛsɔ taayɔɔdɩ kɩyakʋ lɛɛkʋ tɔm pʋwayɩ. 9 Ye mbʋ, pɩkazɩ Ɛsɔ samaɣ sabaatɩ hɛzɩyɛ naɖɩyɛ.+ 10 Mbʋ pʋyɔɔ yɔ ɛyʋ weyi ɛsʋ Ɛsɔ hɛzɩyɛ taa yɔ, ɛhɛzɩnɩ ɖɔɖɔ ɛ-maɣmaɣ ɛ-tʋma, ɛzɩ Ɛsɔ hɛzɩnʋʋ ɛ-ñɩna yɔ.+
11 Pʋyɔɔ lɛ, ɖɩla mbʋ payɩ ɖɩpɩzɩɣ yɔ nɛ ɖɩsʋʋ hɛzɩyɛ nɖɩ ɖɩ-taa nɛ nɔɔyʋ ɛtaatɔlɩ kaañamtʋ kʋɖʋmtʋ ndʋ tɩ-taa.+ 12 Mbʋ pʋyɔɔ yɔ, Ɛsɔ tɔm wɛ wezuu nɛ tɩwɛnɩ ɖoŋ,+ nɛ tɩwɛ lɔŋ nɛ pɩkɩlɩ laɣla wena payɩ awɛ lɔŋ ceemenje yɔ,+ nɛ tɩsʋʋ nɛ halɩ tɩtayɩɣ kalɩzaɣ* nɛ fezuu* pa-taa, nɛ ɖɩdanɖɛ nɛ mɔɔ taa num pa-taa, nɛ tɩpɩzɩɣ tɩtɩlɩ lɩmaɣza nɛ ɖʋtʋ ndʋ tɩwɛ laŋɩyɛ taa yɔ. 13 Nɛ wonuu kɩlɩzʋʋ nakʋyʋ fɛyɩ se kɩmɛlaa nɛ ɛɛnaɣ-kʋ,+ ɛlɛ pɩtɩŋa pɩwɛ ndaakpeɖe nɛ pɩnaɣ kaɣlaa weyi pɩwɛɛ se ɖɩlabɩ-ɩ akɔnta yɔ ɛ-ɛsɩndaa.+
14 Ye mbʋ, ɖɩwɛnɩ cɔjɔ kɩlɩm sɔsɔ, weyi ɛkpa ɛsɔdaa yɔ, Ɛsɔ Pɩyalʋ Yesu;+ pʋyɔɔ lɛ, ɖɩɖɔkɩ tɔm ndʋ ɖɩyɔɔdʋʋ kaɣlaa se ɖɩwɛnɩ tisuu ɛ-yɔɔ yɔ kpam.+ 15 Mbʋ pʋyɔɔ yɔ, pɩtɩkɛ cɔjɔ kɩlɩm weyi ɛɛpɩzɩɣ nɛ ɛnɩɩ ɖɛ-ɛjandʋ taa yɔ ɖɩwɛna;+ ɛlɛ weyi pɩtakɩ-ɩ hɔɔlɩŋ tɩŋa taa ɛzɩ pɩtakʋʋ-ɖʋ yɔ ɛnʋ ɖɩwɛna, ɛlɛ ɛfɛyɩnɩ kɩwɛɛkɩm nabʋyʋ.+ 16 Ye mbʋ, ɖɩñɔtɩnɩ lootiye kewiyaɣ kpelaɣ nɛ ɖɩyɔɔdɩnɩ kaalɛyɩtʋ,+ nɛ papɩzɩ pana ɖa-pʋtɔdɩyɛ, palabɩ-ɖʋ lootiye nɛ piyele nɛ ɖihiɣ sɩnʋʋ alɩwaatʋ kɩbandʋ yɔɔ.