Ejipiti Lɩʋ
37 Nɛ Bezaalɛɛlɩ+ kpaɣ akasɩya ɖaŋ nɛ ɛlabɩnɩ Aɖakaɣ.+ Ka-ɖaɣlɩkɩŋ kɛ nuŋgolonzi* naalɛ nɛ hɔɔlʋʋ nɛ ka-walanzɩ kɛ nuŋgoloŋa kʋɖʋmaɣ nɛ hɔɔlʋʋ nɛ ka-kʋkʋyɩŋ kɛ nuŋgoloŋa kʋɖʋmaɣ nɛ hɔɔlʋʋ.+ 2 Ɛkpaɣ sika kele kele ñɩŋga nɛ ɛtaa ka-taa nɛ ka-wayɩ, nɛ ɛkpaɣ sika nɛ ɛlabɩnɩ kɔ-nɔɔ nɛ pɩcɔɔ pɩta.+ 3 Pʋwayɩ lɛ, ɛla aɖakaɣ ŋga sika kokoo 4, ka-nɩŋgbanzɩ 4 ñʋʋ yɔɔ, nɛ kokoo 2 wɛɛ kɔ-hɔɔlʋʋ kʋɖʋmʋʋ yɔɔ nɛ kokoo 2 wɛɛ kɔ-hɔɔlʋʋ lɛɛkʋ yɔɔ. 4 Pʋwayɩ lɛ, ɛkpaɣ akasɩya ɖaŋ nɛ ɛñɔɔzɩ-ɩ nɛ ɛtaa ɩ-yɔɔ sika.+ 5 Nɛ ɛsʋzɩ ɖaŋ ɛnɩ Aɖakaɣ hɔɔlɩŋ yɔɔ kokoo taa se pakpakɩɣnɩ Aɖakaɣ ŋga.+
6 Ɛkpaɣ sika kele kele ñɩŋga nɛ ɛlabɩnɩ sulaɣ.+ Ka-ɖaɣlɩkɩŋ kɛ nuŋgolonzi naalɛ nɛ hɔɔlʋʋ nɛ ka-walanzɩ kɛ nuŋgoloŋa kʋɖʋmaɣ nɛ hɔɔlʋʋ.+ 7 Nɛ ɛkpaɣ sika ŋga pakpaɣ hama nɛ pɔñɔɔzɩna yɔ nɛ ɛlabɩnɩ kerebimwaa+ 2 sulaɣ+ walanzɩ hɔɔlɩŋ ɛnɩ ɩ-naalɛ ɩ-yɔɔ. 8 Kerebim kʋɖʋm wɛ sulaɣ walanzɩ hɔɔlʋʋ kʋɖʋmʋʋ yɔɔ, nɛ kerebim lɛlʋ wɛɛ hɔɔlʋʋ lɛɛkʋ yɔɔ. Ɛlabɩ kerebimwaa hɔɔlɩŋ ɛnɩ ɩ-naalɛ ɩ-yɔɔ. 9 Kerebimwaa mba pa-naalɛ poposi pe-keŋ nɛ ɛsɔdaa kiŋ, nɛ pe-keŋ kɩlɛmʋʋ huuzi sulaɣ yɔɔ.+ Papam ɖama nɛ ɛsa, nɛ paha pɛ-ɛsa nɛ sulaɣ.+
10 Nɛ ɛkpaɣ akasɩya ɖaŋ nɛ ɛlabɩnɩ taabɩlɩ.+ Kɩ-ɖaɣlɩkɩŋ kɛ nuŋgolonzi 2, kɩ-walanzɩ kɛ nuŋgoloŋa kʋɖʋmaɣ, nɛ kɩ-kʋkʋyɩŋ kɛ nuŋgoloŋa kʋɖʋmaɣ nɛ hɔɔlʋʋ.+ 11 Nɛ ɛkpaɣ sika kele kele ñɩŋga nɛ ɛtaa kɩ-yɔɔ nɛ ɛkpaɣ sika nɛ ɛlabɩnɩ kɩ-nɔɔ nɛ pɩcɔɔ pɩta. 12 Pʋwayɩ lɛ, ɛla kpɛŋa nɛ pɩcɔɔ-kʋ nɛ pɩta nɛ ka-walanzɩ kɛ niwee 4 walanzɩ* nɛ ɛkpaɣ sika nɛ ɛla kɔ-nɔɔ nɛ pɩcɔɔ-kɛ nɛ pɩta. 13 Pʋwayɩ lɛ, ɛkpaɣ sika nɛ ɛlabɩnɩ-kʋ kokoo 4 nɛ ɛɖʋ-yɛ kɩ-kɔnanaa 4 taa, ɖenɖe pakam kɩ-nɩŋgbanzɩ 4 yɔ. 14 Kokoo ana añɔtɩnɩ kpɛŋa, nɛ akɛ ɖɩɖɔkɩyɛ nɖɩ ɖɩ-taa pɛlɛkɩɣ ɖaŋ se pakpaɣnɩ taabɩlɩ yɔ. 15 Nɛ ɛkpaɣ akasɩya ɖaŋ nɛ ɛñɔɔzɩ-ɩ nɛ ɛtaa ɩ-yɔɔ sika nɛ pakpakɩɣnɩ taabɩlɩ. 16 Pʋwayɩ lɛ, ɛkpaɣ sika kele kele ñɩŋga nɛ ɛlabɩnɩ taabɩlɩ yɔɔ wondu—kɩ-tɛlɛmnaa, kɩ-kɔpʋnaa, nɛ kɩ-ñanzɩ nɛ ki-peeɣsi nzɩ papɩyɩɣnɩ kilizasɩ yɔ.+
17 Pʋwayɩ lɛ, ɛkpaɣ sika kele kele ñɩŋga nɛ ɛlabɩnɩ kanɖʋnaa ɖɩzɩyɛ.+ Hama ɛkpaɣaa nɛ ɛlabɩnɩ kanɖʋnaa ɖɩzɩyɛ nɖɩ. Ði-tigiɖe, ɖɩ-hɛkʋ taa ɖaʋ, ɖɩ-kɔpʋnaa, ɖi-toma nɛ ɖɩ-hɛtʋ kpɛndaa nɛ pɩkɛ pʋyʋ kʋɖʋm.+ 18 Pilinzi 6 lɩnɩ hɛkʋ taa ɖaʋ yɔɔ, pilinzi 3 wɛ kanɖʋnaa ɖɩzɩyɛ hʋyʋʋ kʋɖʋmʋʋ yɔɔ nɛ pilinzi 3 wɛɛ kɩ-hʋyʋʋ lɛɛkʋ yɔɔ. 19 Kɔpʋnaa 3 mba palabɩ-wɛ ɛzɩ amandɩ hɛtʋ yɔ pɛwɛ hʋyʋʋ kʋɖʋmʋʋ pilinzi yɔɔ, nɛ toma nɛ hɛtʋ pɛlɛdɩɣ ɖama; nɛ kɔpʋnaa 3 mba palabɩ-wɛ ɛzɩ amandɩ hɛtʋ yɔ pɛwɛɛ hʋyʋʋ lɛɛkʋ pilinzi yɔɔ, nɛ toma nɛ hɛtʋ pɛlɛdɩɣ ɖama. Mbʋ palabɩ pilinzi 6 nzɩ sɩlɩɣnɩ kanɖʋnaa ɖɩzɩyɛ hɛkʋ taa ɖaʋ yɔɔ yɔ. 20 Nɛ kɔpʋnaa 4 mba palabɩ-wɛ ɛzɩ amandɩ hɛtʋ yɔ, pɛwɛ kanɖʋnaa ɖɩzɩyɛ hɛkʋ taa ɖaʋ yɔɔ, nɛ toma nɛ hɛtʋ pɛlɛdɩɣ ɖama. 21 Tomiye kʋɖʋmɖɩyɛ wɛ pilinzi 2 kajalaɣ ñɩnzɩ nzɩ sɩlɩnɩ hɛkʋ taa ɖaʋ yɔɔ yɔ sɩ-tɛɛ, nɛ tomiye lɛɛɖɛ ñɛwɛɛ pilinzi 2 nzɩ sɩtɩŋɩɣ yɔ sɩ-tɛɛ, nɛ tomiye lɛɛɖɛ ñɛwɛɛ ɖɔɖɔ pilinzi 2 lɛɛsɩ nzɩ pɩtɛzɩɣna yɔ sɩ-tɛɛ. Mbʋ pilinzi 6 nzɩ sɩlɩɣnɩ kanɖʋnaa ɖɩzɩyɛ hɛkʋ taa ɖaʋ yɔɔ yɔ sɩɩwɛɛ. 22 Palabɩ toma nɛ pilinzi nɛ kanɖʋnaa ɖɩzɩyɛ tɩŋa nɛ pɩkpɛndɩ nɛ pɩkɛ pʋyʋ kʋɖʋm, mbʋ palabɩnɩ sika kele kele ñɩŋga ŋga pakpaɣ hama nɛ pɔñɔɔzɩna yɔ. 23 Nɛ ɛkpaɣ sika kele kele ñɩŋga nɛ ɛlabɩnɩ ɖɩ-kanɖʋnaa 7+ nɛ ɖɩ-kpɩɖɩŋ* nɛ ɖi-miŋ ñanzɩ. 24 Sika kele kele ñɩŋga talaŋ* kʋɖʋmʋʋ ɛkpaɣaa nɛ ɛlabɩnɩ ɖɩ-maɣmaɣ nɛ ɖɩ-yɔɔ wondu tɩŋa.
25 Nɛ ɛkpaɣ akasɩya ɖaŋ nɛ ɛla ŋgee tɩlaaɖɩ altaaru.+ Kɩ-hɔɔlɩŋ 4 tɩŋa wɛ kɩmaŋ, kɩ-ɖaɣlɩkɩŋ kɛ nuŋgoloŋa kʋɖʋmaɣ, kɩ-walanzɩ kɛ nuŋgoloŋa kʋɖʋmaɣ, nɛ kɩ-kʋkʋyɩŋ kɛ nuŋgolonzi 2. Kɩ nɛ kɩ-hɩŋ pɛkpɛndaa nɛ pɛkɛ pʋyʋ kʋɖʋm.+ 26 Ɛta kɩ-yɔɔ sika kele kele ñɩŋga: kɩ-ñʋʋ taa, kɩ-hɔɔlɩŋ tɩŋa yɔɔ kpɛɛɛ, nɛ kɩ-hɩŋ yɔɔ; nɛ ɛkpaɣ sika nɛ ɛlabɩnɩ kɩ-nɔɔ nɛ pɩcɔɔ pɩta. 27 Ɛlabɩ sika kokoo 2 kɩ-nɔɔ tɛɛ, hɔɔlɩŋ 2 ɛnɩ ɩ-yɔɔ, se aɖɔkɩ ɖaŋ weyi pakpakɩɣnɩ-kʋ yɔ. 28 Pʋwayɩ lɛ, ɛla akasɩya ɖaŋ nɛ ɛtaa ɩ-yɔɔ sika. 29 Ɛla ɖɔɖɔ ŋgee num kiɖeɖem+ nɛ ŋgee tɩlaaɖɩ kele kele ñɩŋgʋ nɛ sɔzɩŋ ñɩŋgʋ,+ nɛ paa mbʋ lɛ pesidi-pʋ nɛ lɛɣtʋ.*