Ezekɩyɛɛlɩ

34 Yehowa tɔm tasɩ-m talʋʋ se: 2 «Ɛyʋ pɩyalʋ, yɔɔdɩ mbʋ pɩkaɣ talʋʋ Izrayɛɛlɩ ninɖiɣyaa yɔ pɩ-natʋ tɔm. Yɔɔdɩ natʋ tɔm nɛ ŋheyi ninɖiɣyaa se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Pɩtɔɔ Izrayɛɛlɩ ninɖiɣyaa,+ mba pɛwɛɛ nɛ pacalɩɣ pa-tɩ yɔ! Ɛzɩ pɩtɩkɛ heŋ pɩwɛɛ se ninɖiɣyaa ɩcalɩ?+ 3 Ɩtɔkɩ kpɩna num, isuu wondu ndʋ palabɩnɩ heŋ hʋndʋ yɔ nɛ ɩkʋʋ kpɩna wena aɖʋ num camɩyɛ yɔ,+ ɛlɛ ɩɩcalɩɣ heŋ.+ 4 Ɩtɩkpazɩ ɖoŋ heŋ weyi ɩkɛ ajamaa yɔ, ɩtɩwaa weyi pɩwɩɣ-ɩ yɔ, ɩtɩhɔkɩ weyi pɩkʋ-ɩ yɔ i-heŋ taa, ɩtɩpɩsɩnɩ weyi iyotuu yɔ nɛ ɩtɩñɩnɩ weyi ileba yɔ;+ ɛlɛ iɖiyi-i nɛ kañatʋ nɛ ñʋʋ taa ɖoŋ.+ 5 Pʋyɔɔ heŋ ɛnɩ ɩmɩzɩ ɖama, mbʋ pʋyɔɔ yɔ ninɖiɣyu nɔɔyʋ taawɛɛ;+ ɩmɩzɩ ɖama nɛ ɩpɩsɩ ñɩtʋ taa tɛtɛgbɩna kpeekpe tɔɔnaɣ. 6 Me-heŋ kaawɛɛ nɛ iyotuu pʋŋ tɩŋa yɔɔ nɛ piyisi kʋkʋyɩsɩ tɩŋa yɔɔ; me-heŋ kaamɩzɩ tɛtʋ kpeekpe yɔɔ, nɛ nɔɔyʋ taañɩnɩɣ-ɩ yaa nɔɔyʋ taañakɩ pana se ɛna-ɩ.

7 «“‘Pʋyɔɔ lɛ, mɩ ninɖiɣyaa, ɩnɩɩ tɔm ndʋ Yehowa yɔɔdʋʋ yɔ: 8 “Mañɩtʋʋ nɛ mɛwɛɛ wezuu yɔ, ɖenɖe ɛzɩ me-heŋ pɩsɩ mbʋ ñɩtʋ taa tɛtɛgbɩna kpeekpe kpaɣ nɛ atɔkɩ yɔ, ɖenɖe ɛzɩ ɩpɩsɩ a-tɔɔnaɣ, mbʋ pʋyɔɔ yɔ ninɖiɣyu nɔɔyʋ taawɛɛ, nɛ me-ninɖiɣyaa tɩñɩnɩ me-heŋ; ɛlɛ pɛwɛɛ nɛ pacalɩɣ pa-maɣmaɣ pa-tɩ nɛ paacalɩɣ me-heŋ yɔ,” Kɩbaɣlʋ Kɩlɩm Yehowa yɔɔdʋʋna, 9 pʋyɔɔ lɛ, mɩ ninɖiɣyaa, ɩnɩɩ tɔm ndʋ Yehowa yɔɔdʋʋ yɔ. 10 Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mankʋyʋʋ ninɖiɣyaa yɔɔ, nɛ mankaɣ-wɛ pɔzʋʋ akɔnta me-heŋ yɔɔ,* nɛ maatasɩɣ-wɛ yebu se pacalɩ me-heŋ,*+ nɛ ninɖiɣyaa ɩɩtasɩɣ calʋʋ pa-tɩ. Mankaɣ hɔɔzʋʋ me-heŋ pɔ-nɔsɩ taa nɛ malɩzɩ, nɛ ɩɩtasɩɣ kɛʋ pɔ-tɔɔnaɣ.”’

11 «“Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ma yɔ, nɛ ma-maɣmaɣ mankaɣ ñɩnʋʋ me-heŋ, nɛ mankaɣ cɔnʋʋ ɩ-yɔɔ.+ 12 Mankaɣ cɔnʋʋ me-heŋ yɔɔ ɛzɩ ninɖiɣyu weyi ɛna e-heŋ weyi ɩmɩzaa yɔ nɛ ɛwɛɛ nɛ ɛcalɩɣ-ɩ yɔ.+ Mankaɣ-ɩ holuu nɛ lona wena a-taa payɩ ɩɩmɩzɩ mɩndʋ nɛ cɩkpɛndʋʋ sɔsɔʋ kɩyakʋ wiye yɔ.+ 13 Mankaɣ-ɩ lɩzʋʋ nɛ samasɩ taa nɛ menkpeɣli-i nɛ ajɛɛ taa nɛ mowoni-i ɩ-ɛjaɖɛ taa nɛ mancalɩ-ɩ Izrayɛɛlɩ pʋŋ yɔɔ,+ lemisi cɔlɔ nɛ ɛjaɖɛ taa lona wena a-taa ɛyaa wɛɛ yɔ a-tɩŋa a-taa. 14 Mankaɣ-ɩ calʋʋ kpɩna ñɩtʋ ɖɩdɔɔyɛ kɩbanɖɛ taa, nɛ Izrayɛɛlɩ pʋŋ kʋkʋyɩŋ yɔɔ ɩkaɣ ñɩtʋ tɔɔʋ.+ Ɩkaɣ hɩnʋʋ peeɖe, ñɩtʋ ɖɩdɔɔyɛ kɩbanɖɛ taa,+ nɛ ɩkaɣ ñɩtʋ tɔɔʋ lona wena a-taa kpɩna tɔkɩ ñɩtʋ nɛ akɩlɩ ɖeu yɔ a-taa Izrayɛɛlɩ pʋŋ yɔɔ.’

15 «“‘Ma-maɣmaɣ mankaɣ calʋʋ me-heŋ,+ nɛ ma-maɣmaɣ mankaɣ labʋ nɛ ɩhɩnɩ,’+ Kɩbaɣlʋ Kɩlɩm Yehowa yɔɔdʋʋna. 16 ‘Mankaɣ ñɩnʋʋ heu weyi eleba yɔ,+ mankaɣ pɩsɩnʋʋ weyi eyotuu yɔ, mankaɣ hɔkʋʋ weyi pɩkʋ-ɩ yɔ e-heŋ taa, nɛ mankaɣ kpazʋʋ ɖoŋ weyi ɛkɛ ɛjam yɔ; ɛlɛ mankaɣ ɖɩzʋʋ heu weyi ɛɖʋ num yɔ nɛ weyi ɛwɛ ɖoŋ yɔ. Tɔm hʋʋ mankaɣ kpaɣʋ nɛ mancalɩnɩ-ɩ.’

17 «“Piyele nɛ mɩ me-heŋ yɔ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mawɩzɩ hʋʋ tɔm heu lɛlʋ nɛ lɛlʋ pɛ-hɛkʋ taa, ɛyaŋ nɛ tuliŋ pɛ-hɛkʋ taa.+ 18 Ɩtɔkʋʋ ñɩtʋ lona wena a-taa kpɩna tɔkɩ ñɩtʋ nɛ akɩlɩ ɖeu yɔ a-taa yɔ, pɩtɩmaɣ-mɩ? Pɩwɛɛ ɖɔɖɔ se ɩfɛyɩ mɩ-ñɩtʋ ɖɩdɔɔyɛ lona wena akazaa yɔ? Ɩtɛŋ ñɔʋ lɩm mbʋ pikeliti camɩyɛ yɔ lɛ, pɩwɛɛ se ɩfɛyɩ mbʋ pɩkazaa yɔ pɩ-taa nɛ pɩcʋʋ? 19 Lɛɛlɛɛyɔ, ɛzɩ ñɩtʋ ɖɩdɔɔyɛ lone nɖɩ ɩfɛyaa yɔ, ɖɩ-taa pɩwɛɛ se me-heŋ ɩtɔɔ ñɩtʋ, nɛ ɩñɔɔ lɩm mbʋ pɩ-taa ɩfɛyaa nɛ pɩcʋʋ yɔ?’

20 «“Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa heyiɣ-i: ‘Ma yɔ, nɛ ma-maɣmaɣ mankaɣ hʋʋ tɔm heu weyi ɛwɛ num nɛ weyi ɛtɛm ɖanzɩ yɔ pɛ-hɛkʋ taa, 21 mbʋ pʋyɔɔ yɔ ɩwɛɛ nɛ ituzuu weyi pɩwɩɣ-ɩ yɔ ɩ-tɩŋa nɛ mɩ-hʋyɩŋ nɛ mɩ-hazasɩ, ɩwɛɛ nɛ ɩyɔkʋʋ-ɩ nɛ mɩ-hɩŋ nɛ pɩkɔɔ pɩsɩɩnɩ alɩwaatʋ ndʋ ɩmɩzɩ-ɩ agbaaɣdaa yɔ. 22 Nɛ mankaɣ yabʋ me-heŋ ñʋʋ, nɛ ɩɩtasɩɣ kɛʋ mbʋ kpɩna kpaɣ nɛ atɔkɩ yɔ;+ nɛ mankaɣ hʋʋ tɔm heu lɛlʋ nɛ lɛlʋ pɛ-hɛkʋ taa. 23 Mankaɣ lɩzʋʋ ninɖiɣyu kʋɖʋm nɔɔyʋ se ɛcɔnɩ ɩ-yɔɔ,+ ma-lɩmɖʋyʋ Daviid,+ nɛ ɛkaɣ-ɩ calʋʋ. Ɛ-maɣmaɣ ɛkaɣ-ɩ calʋʋ nɛ ɛpɩsɩ i-ninɖiɣyu.+ 24 Nɛ ma Yehowa, mankaɣ pɩsʋʋ ɩ-Ɛsɔ,+ nɛ ma-lɩmɖʋyʋ Daviid kaɣ pɩsʋʋ ɩ-ñʋʋdʋ.+ Ma Yehowa, ma-maɣmaɣ mɔyɔɔdɩna.

25 «“‘Nɛ mankaɣ-ɩ ɖʋnʋʋ laŋhɛzɩyɛ ɛgbɛyɛ,+ nɛ mankaɣ labʋ nɛ tɛtɛgbɩna wena awɛ kañatʋ pɩdɩɩfɛyɩ yɔ aatasɩɣ wɛʋ ɛjaɖɛ taa,+ piyeki nɛ ɩwɛɛ pɛɛyɛ taa kañɩmbusuu taa nɛ ɩhɩnɩ laŋ tɛɛ.+ 26 Mankaɣ labʋ nɛ ɩ nɛ lona wena acɔ men-piyaɣ nɛ ata yɔ pɛkɛ wazaɣ,+ nɛ mankaɣ labʋ nɛ tɛʋ nɩɩ alɩwaatʋ kɩbandʋ yɔɔ. Wazasɩ kaɣ tibu ɛzɩ tɛʋ nɩɣʋ yɔ.+ 27 Hayɩm taa tɩŋ kaɣ lʋlʋʋ i-pee, nɛ tɛtʋ kaɣ lʋlʋʋ tɩ-tɔɔnaɣ,+ nɛ ɩkaɣ wɛʋ pɛɛyɛ taa ɛjaɖɛ taa. Nɛ toovenim taa lɛ ɩkaɣ tɩlʋʋ se ma lɛ Yehowa alɩwaatʋ ndʋ mɛnpɛlɩɣ ɩ-sʋʋtʋ ɖaŋ+ nɛ moholi-i mba paapɩsɩ-ɩ yomaa yɔ pe-nesi tɛɛ yɔ. 28 Ɩɩtasɩɣ kɛʋ mbʋ ajɛɛ kpaɣ nɛ atɔkɩ yɔ, nɛ tɛtʋ yɔɔ tɛtɛgbɩna ɩɩkaɣ-ɩ tɔɔʋ, nɛ ɩkaɣ wɛʋ pɛɛyɛ taa, nɛ nɔɔyʋ ɛɛkaɣ-ɩ ɖʋʋ sɔɔndʋ.+

29 «“‘Mankaɣ-ɩ ɖʋʋ hayɩm mbʋ pɩ-hɩɖɛ kaɣ sɛʋ yɔ, nɛ ñɔɔsɩ ɛɛkaɣ-ɩ tasʋʋ kʋʋ ɛjaɖɛ taa,+ nɛ ajɛɛ ɩɩkaɣ-ɩ tasʋʋ ɖʋʋ fɛyɛ.+ 30 “Ðɩnɛ ɛlɛ, pakaɣ tɩlʋʋ toovenim taa se ma pɛ-Ɛsɔ Yehowa mɛwɛ pɔ-cɔlɔ, nɛ mba, Izrayɛɛlɩ ɖɩɣa lɛ, pɛkɛ man-samaɣ,”+ Kɩbaɣlʋ Kɩlɩm Yehowa yɔɔdʋʋna.’”

31 «“Piyele nɛ mɩ me-heŋ lɛ,+ heŋ weyi mɔncɔŋnɩ ɩ-yɔɔ yɔ, ɛyaa yem ɩkɛnaa, nɛ ma lɛ mɛnkɛ mɩ-Ɛsɔ,” Kɩbaɣlʋ Kɩlɩm Yehowa yɔɔdʋʋna.»