Kroniiki takayaɣ naalɛ ñɩŋga
3 Nɛ Salomɔɔ paɣzɩ Yehowa ɖɩɣa maʋ+ Yeruzalɛm, Moriya Pʋʋ yɔɔ,+ ɖenɖe Yehowa kaalɩ ɛ-caa Daviid yɔɔ yɔ,+ lone nɖɩ Daviid kaañɔɔzɩ Yebuusi tʋ Orɩnaanɩ+ tɔɔnaɣ ɖɩmaɖɛ kadaɣ taa yɔ ɖɩ-taa. 2 Ɛpaɣzɩ-kɛ maʋ fenaɣ 2 ñɩŋga tɛ kɩyakʋ 2 ñɩŋgʋ wiye, e-kewiyitu tɔɔʋ pɩnaɣ 4 ñɩŋga taa. 3 Nɛ tigiɖe nɖɩ Salomɔɔ kaasɩwa se ɛma ɖɩ-yɔɔ Ɛsɔ toovenim tʋ ɖɩɣa yɔ, ɖɩ-ɖaɣlɩkɩŋ kaakɛ nuŋgolonzi 60 nɛ ɖɩ-walanzɩ nuŋgolonzi 20,+ kɩmaɣzʋʋ kɩbɩnʋʋ* pamaɣzɩnaa. 4 Ɛsɩndaa kʋjɔŋ ɖaɣlɩkɩŋ kaakɛ nuŋgolonzi 20, ɛzɩ ɖɩɣa walanzɩ yɔ,* kɩ-kʋkʋyɩŋ kaakɛ 120;* nɛ ɛpɔ kɩ-taa sika kele kele ñɩŋga.+ 5 Ɛkpaɣ jenevriyee ɖasɩ nɛ ɛpɔ ɖɩɣa sɔsɔɔ yɔɔ, pʋwayɩ lɛ, ɛtaa kɔ-yɔɔ sika kɩbaŋa;+ nɛ pʋwayɩ lɛ ɛcanɩ-kɛ nɛ paŋ kɩlɛmɩŋ+ nɛ kpasɩ.+ 6 Pɩtasɩ lɛ, ɛpɔ ñɩɣlɩm pɛɛ wena awɛ kajʋka yɔ ɖɩɣa yɔɔ;+ nɛ sika+ ŋga ɛlabɩnɩ tʋmɩyɛ yɔ kaakɛ sika ŋga kalɩnɩ Parɩvayim yɔ. 7 Ɛpɔ sika+ ɖɩɣa yɔɔ, ɖasɩ yɔɔ, nɔnɔsɩ taa, ko-kolonzi yɔɔ, nɛ kɔ-pɔɔyɩŋ yɔɔ; nɛ ɛlɩzɩ kerebimwaa kolonzi yɔɔ.+
8 Nɛ ɛla ɖɩɣa hɔɔlʋʋ ŋgʋ payaɣ se Lone Kiɖeɖeye nɖɩ ɖɩkpaɖaa yɔ;*+ kɩ-ɖaɣlɩkɩŋ nɛ ɖɩɣa walanzɩ paawɛ kɩmaŋ, nuŋgolonzi 20; nɛ kɩ-walanzɩ kaakɛ nuŋgolonzi 20. Ɛkpaɣ sika kɩbaŋa talaŋwaa* 600 nɛ ɛpɔ kɩ-yɔɔ.+ 9 Sika ŋga palabɩnɩ tʋmɩyɛ ñɩma hɔɔlʋʋ taa yɔ ko-yuŋ kaakɛ siklinaa* 50; nɛ ɛpɔ sika ñʋʋ taa kuduyuŋ yɔɔ.
10 Nɛ ɛsaɣ kerebimwaa 2 ɖɩɣa hɔɔlʋʋ ŋgʋ payaɣ se Lone Kiɖeɖeye nɖɩ ɖɩkpaɖaa yɔ kɩ-taa, nɛ ɛpɔ pɔ-yɔɔ sika.+ 11 Kerebimwaa mba pe-keŋ+ tɩŋa ɖaɣlɩkɩŋ kaakɛ nuŋgolonzi 20; kerebim kajalaɣ ñɩnʋ keluu kʋɖʋmʋʋ ɖaɣlɩkɩŋ kaakɛ nuŋgolonzi 5 nɛ kitukuuni ɖɩɣa koloŋa, nɛ e-keluu lɛɛkʋ ɖaɣlɩkɩŋ kaakɛ nuŋgolonzi 5 nɛ kitukuuni kerebim lɛlʋ keŋ taa kʋɖʋmʋʋ. 12 Nɛ kerebim lɛlʋ keluu kʋɖʋmʋʋ ɖaɣlɩkɩŋ kaakɛ nuŋgolonzi 5 nɛ kitukuuni ɖɩɣa koloŋa lɛɛka, nɛ e-keluu lɛɛkʋ ɖaɣlɩkɩŋ kaakɛ nuŋgolonzi 5 nɛ kitukuuni kerebim kajalaɣ ñɩnʋ keŋ taa kʋɖʋmʋʋ. 13 Kerebimwaa mba, pe-keŋ kaaposaa nɛ pɩtalɩ nuŋgolonzi 20; nɛ paasɩŋ pa-nɩŋgbanzɩ yɔɔ nɛ paha ɛsa nɛ pɩ-taa kiŋ.*
14 Ɛkpaɣ ɖɔɖɔ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ, nɛ pɩsaŋ kɩbaŋ nɛ ɛlabɩnɩ pɩsaʋ kikenduu,+ nɛ ɛlɩzɩ kerebimwaa kɩ-yɔɔ.+
15 Nɛ ɛla tilima+ 2 ɖɩɣa ɛsɩndaa, a-ɖaɣlɩkɩŋ kɛ nuŋgolonzi 35, nɛ paa tilimiye nɖɩ lɛ, ɖɩ-ñʋʋ yɔɔ hokuu kaakɛ nuŋgolonzi kagbanzɩ.+ 16 Nɛ ɛla kpasɩ nzɩ sɩwɛ ɛzɩ lɩyɩŋ yɔ nɛ ɛɖʋ-sɩ tilima ñʋŋ yɔɔ, nɛ ɛla girenaadɩ pee 100 nɛ ɛɖʋ-yɛ kpasɩ yɔɔ. 17 Esiɣ tilima templo ɛsɩndaa, kʋɖʋmɖɩyɛ nɩwaŋ yɔɔ* nɛ kʋɖʋmɖɩyɛ nɩmɩyɛ yɔɔ;* ɛya nɖɩ ɖɩwɛ nɩwaŋ yɔɔ yɔ se Yakiini* nɛ ɛyaa nɖɩ ɖɩwɛ nɩmɩyɛ yɔɔ yɔ se Bowaazɩ.*