LEVITIKI

1 Nɛ Yehowa yaa Moyizi nɛ ɛyɔɔdɩnɩ-ɩ nɛ kediɣzaɣ kizinziku+ tɛɛ kiŋ. Eheyi-i se: 2 «Yɔɔdɩnɩ Izrayɛɛlɩ mba* nɛ ŋheyi-wɛ se: “Ye mɩ-taa nɔɔyʋ ɛñɩnɩɣ se ɛkpaɣ ɖɩɣa kpɩna naayɛ nɛ ɛlaanɩ kɩlaʋ Yehowa yɔ, nɔ, heu yaa pʋnʋ pɩwɛɛ se ɛkpaɣ nɛ ɛlaa.+

3 «“Ye pɩkɛ kɩlaʋ kɩñaɣzʋʋ, nɛ ye nɔ ɛyʋ ɛnʋ ɛñɩnɩɣ se ɛkpaɣ nɛ ɛha yɔ, nɔ abalɩñɩnʋ weyi ɛfɛyɩnɩ ɛjandʋ natʋyʋ yɔ pɩwɛɛ se ɛkɔna.+ Pɩwɛɛ se ɛ-maɣmaɣ ɛkɔnɩ-ɩ nɛ ɛ-laŋɩyɛ faaa+ Yehowa ɛsɩndaa, kediɣzaɣ kizinziku nɔnɔɔ tɛɛ. 4 Pɩwɛɛ se ɛtɩnɩ e-nesi kɩlaʋ kɩñaɣzʋʋ kpɩnɛ ñʋʋ yɔɔ, nɛ Ɛsɔ kaɣ tisuu nɛ ɛmʋ-kʋ nɛ pihuuzi ɛ-kɩwɛɛkɩm yɔɔ.

5 «“Pʋwayɩ lɛ, pɩwɛɛ se pakʋ nɔ* abalɩñɩnʋ ɛnʋ Yehowa ɛsɩndaa, nɛ cɔjɔnaa,+ Aarɔɔnɩ pɩyalaa woni calɩm nɛ pamɩzɩ altaaru+ ŋgʋ kɩwɛ kediɣzaɣ kizinziku nɔnɔɔ tɛɛ yɔ kɩ-kpɛnzɩ tɩŋa yɔɔ. 6 Pɩwɛɛ se peliti kɩlaʋ kɩñaɣzʋʋ kpɩnɛ nɛ pɛcɛdɛlɩ-ɖɩ nanʋʋ nanʋʋ.+ 7 Cɔjɔnaa, Aarɔɔnɩ pɩyalaa ipuzi miŋ altaaru yɔɔ+ nɛ pakaa ɖasɩ miŋ yɔɔ. 8 Cɔjɔnaa, Aarɔɔnɩ pɩyalaa kaɣ pɩlʋʋ kɩlaʋ nandʋ,+ pɩkpɛndɩnɩ ñʋʋ nɛ num* ɖasɩ nzɩ paka miŋ yɔɔ altaaru yɔɔ yɔ sɩ-yɔɔ. 9 Pɩwɛɛ se pañalɩ ɖi-lotu nɛ ɖɩ-acaa nɛ lɩm, nɛ cɔjɔ ñaɣzɩ pɩtɩŋa altaaru yɔɔ nɛ ñɔsɩ kpa nɛ pɩkɛ kɩlaʋ kɩñaɣzʋʋ, kɩlaʋ ŋgʋ pañaɣzɩ-kʋ miŋ nɛ kɩ-sɔzɩŋ kɛdɩɣnɩ Yehowa yɔ.*+

10 «“Ye ɛyaʋ* yaa pʋnʋ+ ɛsɔɔlaa se ɛlaanɩ kɩlaʋ kɩñaɣzʋʋ yɔ, pɩwɛɛ se ewoni kpɩnɛ abalɩñɩnɖɛ nɖɩ ɖɩfɛyɩnɩ ɛjandʋ natʋyʋ yɔ.+ 11 Pɩwɛɛ se pakʋ-ɖɩ altaaru hayo kiŋ Yehowa ɛsɩndaa, nɛ cɔjɔnaa, Aarɔɔnɩ pɩyalaa kaɣ mɩzʋʋ ɖɩ-calɩm altaaru kpɛnzɩ tɩŋa yɔɔ.+ 12 Ɛkaɣ cɛdɛlʋʋ kpɩnɛ nɖɩ nanʋʋ nanʋʋ, nɛ cɔjɔ kaɣ pɩlʋʋ nandʋ ndʋ, nɛ pɩkpɛndɩnɩ ɖɩ-ñʋʋ nɛ ɖi-num* ɖasɩ yɔɔ miŋ yɔɔ altaaru yɔɔ. 13 Ɛkaɣ kpaɣʋ lɩm nɛ ɛñalɩnɩ lotu nɛ acaa, nɛ cɔjɔ kaɣ wonuu pɩtɩŋa nɛ ɛñaɣzɩ altaaru yɔɔ nɛ ñɔsɩ kpa. Pɩkɛ kɩlaʋ kɩñaɣzʋʋ, kɩlaʋ ŋgʋ pañaɣzɩ-kʋ miŋ nɛ kɩ-sɔzɩŋ kɛdɩɣnɩ Yehowa yɔ.*

14 «“Ɛlɛ, ye sumasɩ ɛkpakɩɣ se ɛlaanɩ kɩlaʋ kɩñaɣzʋʋ Yehowa yɔ, ɛkaɣ wonuu ehooye yaa halikuku pɩɣa.+ 15 Cɔjɔ kaɣ sumaɣ ŋga wonuu altaaru cɔlɔ nɛ ɛcɛ ke-liu tɛɛ nɛ ɛñaɣzɩ-kɛ altaaru yɔɔ nɛ ñɔsɩ kpa, ɛlɛ pɩwɛɛ se eyele nɛ ka-calɩm kpe altaaru kpɛŋa yɔɔ. 16 Pɩwɛɛ se ɛlɩzɩ ka-njanjakɩyɛ nɛ ɛkpɛzɩ-kɛ, nɛ ɛlɔ ka-njanjakɩyɛ nɛ ka-hʋndʋ altaaru cɔlɔ, wɩsɩ ɖɩlɩyɛ taa, ɖenɖe tɔlɩma* wɛɣ yɔ.+ 17 Ɛkaɣ-kɛ yasʋʋ ke-keŋ cɔlɔ, ɛlɛ ɛtaafaɣ-kɛ hɔɔlɩŋ 2 taa. Pʋwayɩ lɛ, cɔjɔ kaɣ-kɛ ñaɣzʋʋ altaaru yɔɔ ɖasɩ nzɩ paka miŋ yɔɔ yɔ sɩ-yɔɔ nɛ ñɔsɩ kpa. Pɩkɛ kɩlaʋ kɩñaɣzʋʋ, kɩlaʋ ŋgʋ pañaɣzɩ-kʋ miŋ nɛ kɩ-sɔzɩŋ kɛdɩɣnɩ Yehowa yɔ.*

2 «“Ye nɔɔyʋ* ɛsɔɔlaa se ɛkpaɣ tɔɔnaɣ pee nɛ ɛlaanɩ kɩlaʋ+ Yehowa yɔ, mʋlʋm mbʋ pɩkpɩzɩ camɩyɛ yɔ pɩwɛɛ se ɛlaa, nɛ pɩwɛɛ se ɛpɩyɩ num pɩ-yɔɔ nɛ ɛɖʋ pɩ-yɔɔ tɩlaaɖɩ kʋhʋlʋmʋʋ.+ 2 Pʋwayɩ lɛ, ewoni-pʋ cɔjɔnaa, Aarɔɔnɩ pɩyalaa cɔlɔ, nɛ cɔjɔ cozi mʋlʋm mbʋ pɩkpɩzɩ camɩyɛ yɔ nɛ num nɛ pɩ-tɛ tɩlaaɖɩ kʋhʋlʋmʋʋ tɩŋa nɛ pisu e-nikpiɖe taa, nɛ ɛñaɣzɩ-pʋ miŋ altaaru yɔɔ nɛ ñɔsɩ kpa nɛ pɩkɛ mbʋ pɩsɩŋnɩ kɩlaʋ kpeekpe yɔ,+ kɩlaʋ ŋgʋ pañaɣzɩ-kʋ miŋ nɛ kɩ-sɔzɩŋ kɛdɩɣnɩ Yehowa yɔ.* 3 Tɔɔnaɣ pee kɩlaʋ ŋgʋ kɩkazɩɣ yɔ, kɩ-tɩŋa kɩpɩsɩɣ Aarɔɔnɩ nɛ ɛ-pɩyalaa pa-pʋyʋ,+ kɩkɛ pʋyʋ kiɖeɖeu siŋŋ+ nɛ pɩlɩnɩ kɩlaŋ weyi pañaɣzɩ-ɩ miŋ Yehowa yɔ ɩ-taa.

4 «“Ye ŋsɔɔlaa se ŋkpaɣ mbʋ pɔhɔbɩ miŋ kpou taa yɔ nɛ ŋlaanɩ tɔɔnaɣ pee kɩlaʋ yɔ, mʋlʋm mbʋ pɩkpɩzɩ camɩyɛ yɔ pɩwɛɛ se ŋkpaɣ nɛ ŋlabɩnɩ-pʋ, pɩwɛɛ se pɩkɛ kpɔnɔnaa mba palabɩ-wɛ nɛ num nɛ patɩɖʋ pa-taa lɔlɔm nɛ pɛwɛ kulukulu kokoo tɩyɛ yɔ, yaa kpɔnɔnaa tatayaa tatayaawaa mba pamɩzɩ pɔ-yɔɔ num nɛ patɩɖʋ pa-taa lɔlɔm yɔ.+

5 «“Ye ŋsɔɔlaa se ŋkpaɣ mbʋ palabɩ kakandɛyʋʋ tɩyɛ yɔ*+ nɛ ŋlaanɩ tɔɔnaɣ pee kɩlaʋ yɔ, mʋlʋm mbʋ pɩkpɩzɩ camɩyɛ nɛ pesidi-pʋ nɛ num nɛ patɩɖʋ pɩ-taa lɔlɔm yɔ pɩwɛɛ se ŋkpaɣ nɛ ŋlabɩnɩ-pʋ. 6 Pɩwɛɛ se ŋpɛlɩ-pʋ hɔɔlasɩ hɔɔlasɩ nɛ ŋpɩyɩ num pɩ-yɔɔ.+ Pɩkɛ tɔɔnaɣ pee kɩlaʋ.

7 «“Ye ŋsɔɔlaa se ŋkpaɣ mbʋ poɖoŋ kasɩɖɔɔlɩ taa yɔ nɛ ŋlaanɩ tɔɔnaɣ pee kɩlaʋ yɔ, mʋlʋm mbʋ pɩkpɩzɩ camɩyɛ yɔ nɛ num pɩwɛɛ se ŋkpaɣ nɛ ŋlabɩnɩ-pʋ. 8 Pɩwɛɛ se ŋkpaɣ tɔɔnaɣ pee kɩlaʋ ŋgʋ pakpaɣ wondu ndʋ nɛ palabɩna yɔ nɛ ŋwoni Yehowa, nɛ ŋcɛlɩ-kʋ cɔjɔ, nɛ ɛlɛ kaawoni-kʋ altaaru cɔlɔ. 9 Nɛ cɔjɔ kaɣ cozuu tɔɔnaɣ pee kɩlaʋ hɔɔlʋʋ nakʋyʋ nɛ ɛñaɣzɩ-kʋ miŋ altaaru yɔɔ nɛ ñɔsɩ kpa nɛ pɩkɛ mbʋ pɩsɩŋnɩ kɩlaʋ kpeekpe yɔ,+ pɩkɛ kɩlaʋ ŋgʋ pañaɣzɩ-kʋ miŋ yɔ, nɛ kɩ-sɔzɩŋ kɛdɩɣnɩ Yehowa.*+ 10 Tɔɔnaɣ pee kɩlaʋ ŋgʋ kɩkazɩɣ yɔ, kɩpɩsɩɣ Aarɔɔnɩ nɛ ɛ-pɩyalaa pa-pʋyʋ, kɩkɛ pʋyʋ kiɖeɖeu siŋŋ nɛ pɩlɩnɩ kɩlaŋ weyi pañaɣzɩ-ɩ miŋ Yehowa yɔ ɩ-taa.+

11 «“Pɩtɩmʋna se ɩɖʋ lɔlɔm tɔɔnaɣ pee kɩlaʋ ŋgʋ ɩlaɣ Yehowa yɔ kɩ-taa nakʋyʋ taa,+ mbʋ pʋyɔɔ yɔ pɩfɛyɩ se ɩñaɣzɩ miŋ mʋtʋ ndʋ tɩkpawa yɔ yaa tʋŋ num se ñɔsɩ ɛkpa nɛ pɩkɛ kɩlaʋ ŋgʋ pañaɣzɩ-kʋ miŋ Yehowa yɔ.

12 «“Ɩpɩzɩɣ nɛ ɩkpaɣ tɔɔnasɩ nzɩ* nɛ ɩlaanɩ kajalaɣ tɔɔnaɣ ŋga kapɩwa yɔ+ ka-kɩlaŋ Yehowa, ɛlɛ pɩtɩmʋna se powoni-sɩ altaaru cɔlɔ se pɩkɛ kɩlaʋ ŋgʋ pañaɣzɩɣ miŋ nɛ kɩlɩɣ sɔzɩŋ camɩyɛ yɔ.*

13 «“Pɩwɛɛ se ŋɖʋ ɖɔm paa tɔɔnaɣ pee kɩlaʋ ŋgʋ lɛ kɩ-taa; pɩtɩmʋna se ŋyele nɛ ñɛ-Ɛsɔ ɛgbɛyɛ tɛ ɖɔm tɛɖɩ ñɔ-tɔɔnaɣ pee kɩlaʋ taa. Ŋŋlaɣ paa kɩlaʋ ŋgʋ lɛ, pɩwɛɛ se ŋɖʋ ɖɔm kɩ-taa.+

14 «“Ye ŋsɔɔlaa se ŋkpaɣ kajalaɣ tɔɔnaɣ ŋga kapɩwa yɔ nɛ ŋlaanɩ tɔɔnaɣ pee kɩlaʋ Yehowa yɔ, tɔɔnaɣ pee kɩfana wena poɖoŋ* miŋ yɔɔ yɔ, tɔɔnaɣ pee kɩfana wena pɛñɛyɩ-yɛ yɔ pɩwɛɛ se ŋkpaɣ nɛ ŋlaa, se pɩkɛ kajalaɣ tɔɔnaɣ ŋga kapɩwa yɔ+ kɔ-tɔɔnaɣ pee kɩlaʋ. 15 Pɩwɛɛ se ŋpɩyɩ num kɩ-yɔɔ nɛ ŋɖʋ tɩlaaɖɩ kʋhʋlʋmʋʋ kɩ-yɔɔ. Pɩkɛ tɔɔnaɣ pee kɩlaʋ. 16 Cɔjɔ kaɣ kpaɣʋ tɔɔnaɣ pee wena pɛñɛyaa yɔ a-hɔɔlʋʋ nakʋyʋ nɛ num, pɩkpɛndɩnɩ a-tɩlaaɖɩ kʋhʋlʋmʋʋ kpeekpe nɛ ɛñaɣzɩ miŋ nɛ ñɔsɩ kpa nɛ pɩkɛ mbʋ pɩsɩŋnɩ kɩlaʋ kpeekpe yɔ,+ pɩkɛnɩ kɩlaʋ ŋgʋ pañaɣzɩ-kʋ miŋ Yehowa yɔ.

3 «“Ye ɛ-kɩlaʋ ɛkɛ laŋhɛzɩyɛ kɩlaʋ,+ nɛ ye nɔ ɛsɔɔlɩ laʋ yɔ, paa pɩtɩɩkɛ halɩñɩnʋ yaa abalɩñɩnʋ yɔ, pɩwɛɛ se ewoni Yehowa ɛsɩndaa kpɩnɛ nɖɩ ɖɩfɛyɩnɩ ɛjandʋ natʋyʋ yɔ. 2 Pɩwɛɛ se ɛtɩnɩ e-nesi ɛ-kɩlaʋ kpɩnɛ ñʋʋ yɔɔ, nɛ pakʋ-ɖɩ kediɣzaɣ kizinziku nɔnɔɔ taa; nɛ cɔjɔnaa, Aarɔɔnɩ pɩyalaa, mɩzɩ calɩm altaaru kpɛnzɩ tɩŋa yɔɔ. 3 Ɛkaɣ ñaɣzʋʋ miŋ, laŋhɛzɩyɛ kɩlaʋ kpɩnɛ hɔɔlʋʋ nakʋyʋ se pɩkɛ kɩlaʋ ŋgʋ pañaɣzɩ-kʋ miŋ Yehowa yɔ:+ num+ mbʋ pɩpɔ lotu yɔɔ yɔ, num mbʋ payɩ pɩcɔ lotu nɛ pɩta yɔ, 4 nɛ tɩzɩsɩ nɛ num mbʋ pɩwɛ sɩ-naalɛ sɩ-yɔɔ yɔ, num mbʋ pɩwɛ tɩnaɣ taa yɔ. Pɩwɛɛ ɖɔɖɔ se ɛlɩzɩ num mbʋ pɩwɛ hɔyɛ yɔɔ yɔ nɛ ɛlɩzɩ ɖɔɖɔ tɩzɩsɩ.+ 5 Aarɔɔnɩ pɩyalaa kaɣ pɩtɩŋa miŋ ñaɣzʋʋ altaaru yɔɔ, kɩlaʋ kɩñaɣzʋʋ ŋgʋ pasɩ ɖasɩ yɔɔ miŋ taa yɔ kɩ-yɔɔ nɛ ñɔsɩ kpa;+ pɩkɛ kɩlaʋ ŋgʋ pañaɣzɩ-kʋ miŋ yɔ, nɛ kɩ-sɔzɩŋ kɛdɩɣnɩ Yehowa.*+

6 «“Ye heu yaa pʋnʋ ɛsɔɔlaa se ɛkpaɣ nɛ ɛlaanɩ laŋhɛzɩyɛ kɩlaʋ Yehowa yɔ, pɩwɛɛ se pɩkɛ kpɩnɛ abalɩñɩnɖɛ yaa halɩñɩnɖɛ nɖɩ ɖɩfɛyɩnɩ ɛjandʋ natʋyʋ yɔ.+ 7 Ye ɛsɔɔlɩ laʋ ɛyaʋ* yɔ, ɖɩnɛ ɛlɛ ewoni-kʋ Yehowa ɛsɩndaa. 8 Nɛ ɛtɩnɩ e-nesi ɛ-kɩlaʋ kpɩnɛ ñʋʋ yɔɔ nɛ pakʋ-ɖɩ kediɣzaɣ kizinziku ɛsɩndaa. Aarɔɔnɩ pɩyalaa kaamɩzɩ ɖɩ-calɩm altaaru kpɛnzɩ tɩŋa yɔɔ. 9 Pɩwɛɛ se ɛkpaɣ laŋhɛzɩyɛ kɩlaʋ kpɩnɛ num nɛ ɛlaa-pʋ nɛ pɩkɛnɩ kɩlaʋ ŋgʋ pañaɣzɩ-kʋ miŋ Yehowa yɔ.+ Pɩwɛɛ se ɛlɩzɩ suu nɛ ki-num tɩŋa siɣlɛŋgbɛŋ tɩnaɣ yɔɔ, num mbʋ pɩpɔ lotu yɔɔ yɔ, num mbʋ payɩ pɩcɔ lotu nɛ pɩta yɔ, 10 nɛ tɩzɩsɩ nzɩ sɩ-naalɛ nɛ num mbʋ pɩwɛ sɩ-yɔɔ yɔ, mbʋ pɩwɛ tɩnaɣ taa yɔ. Pɩwɛɛ ɖɔɖɔ se ɛlɩzɩ num mbʋ pɩwɛ hɔyɛ yɔɔ yɔ nɛ ɛlɩzɩ ɖɔɖɔ tɩzɩsɩ.+ 11 Nɛ cɔjɔ ñaɣzɩ pɩtɩŋa miŋ altaaru yɔɔ ɛzɩ tɔɔnaɣ* yɔ nɛ ñɔsɩ kpa, pɩkɛ kɩlaʋ ŋgʋ pañaɣzɩ-kʋ miŋ Yehowa yɔ.+

12 «“Ye pʋnʋ ɛsɔɔlaa se ɛlaa yɔ, ɖɩnɛ ɛlɛ ewoni-i Yehowa ɛsɩndaa. 13 Pɩwɛɛ se ɛtɩnɩ e-nesi pʋnʋ ñʋʋ yɔɔ, nɛ pakʋ pʋnʋ ɛnʋ kediɣzaɣ kizinziku ɛsɩndaa, nɛ Aarɔɔnɩ pɩyalaa mɩzɩ ɛ-calɩm altaaru kpɛnzɩ tɩŋa yɔɔ. 14 Hɔɔlʋʋ ŋgʋ pɩwɛɛ se ɛha nɛ pɩkɛnɩ kɩlaʋ ŋgʋ pañaɣzɩɣ-kʋ miŋ Yehowa yɔ, ŋgʋ lɛ num mbʋ pɩpɔ lotu yɔɔ yɔ, num mbʋ payɩ pɩcɔ lotu nɛ pɩta yɔ,+ 15 nɛ tɩzɩsɩ nɛ num mbʋ pɩwɛ sɩ-naalɛ sɩ-yɔɔ yɔ, mbʋ pɩwɛ tɩnaɣ taa yɔ. Pɩwɛɛ ɖɔɖɔ se ɛlɩzɩ num mbʋ pɩwɛ hɔyɛ yɔɔ yɔ nɛ ɛlɩzɩ ɖɔɖɔ tɩzɩsɩ. 16 Cɔjɔ kaɣ ñaɣzʋʋ pɩtɩŋa miŋ altaaru yɔɔ ɛzɩ tɔɔnaɣ* yɔ nɛ ñɔsɩ kpa, pɩkɛ kɩlaʋ ŋgʋ pañaɣzɩ miŋ nɛ kɩlɩɣ sɔzɩŋ camɩyɛ yɔ.* Yehowa tɩnɩ num tɩŋa.+

17 «“Pɩtɩpɔzɩ kaaʋ se ɩtɔɔ kpɩnɛ naɖɩyɛ num yaa calɩm+ nabʋyʋ. Pɩkɛnɩ tamtam paɣtʋ mɩ nɛ mɩ-lʋlʋʋ taa mba, mɩ-ɖɩjaɣyɛ kpeekpe taa.”»

4 Yehowa tasɩ heyuu Moyizi se: 2 «Heyi Izrayɛɛlɩ mba se: “Ye picoɖi nɔɔyʋ* nɛ ɛla kɩwɛɛkɩm,+ ye ɛlabɩ mbʋ Yehowa ɖʋ paɣtʋ se pataala yɔ pɩ-taa nabʋyʋ yɔ:

3 «“Ye cɔjɔ weyi pata-ɩ num yɔ+ ɛlabɩ kɩwɛɛkɩm+ nɛ piyele nɛ samaɣ ɖɔɔ wɛɛ yɔ, kɩwɛɛkɩm mbʋ ɛlaba yɔ pʋyɔɔ lɛ, pɩwɛɛ se ewoni nɔ* abalɩñɩnʋ weyi ɛfɛyɩnɩ ɛjandʋ natʋyʋ yɔ Yehowa, nɛ pɩkɛ kɩwɛɛkɩm yɔɔ kɩlaʋ.+ 4 Pɩwɛɛ se ewoni nɔ abalɩñɩnʋ ɛnʋ kediɣzaɣ kizinziku nɔnɔɔ taa+ Yehowa ɛsɩndaa nɛ ɛtɩnɩ e-nesi nɔ ñʋʋ yɔɔ, nɛ ɛkʋ nɔ ɛnʋ Yehowa ɛsɩndaa.+ 5 Pʋwayɩ lɛ, pɩwɛɛ se cɔjɔ weyi pata-ɩ num yɔ,+ ecozi nɔ ɛnʋ ɛ-calɩm nɛ ɛsʋnɩ-pʋ kediɣzaɣ kizinziku tɛɛ; 6 cɔjɔ elii e-niye calɩm taa+ nɛ ɛmɩzɩ-pʋ tam 7+ lone kiɖeɖeye taa, pɩsaʋ kikenduu ɛsɩndaa Yehowa ɛsɩndaa. 7 Pɩwɛɛ ɖɔɖɔ se cɔjɔ elizi calɩm mbʋ pɩ-hɔɔlʋʋ nakʋyʋ ŋgee tɩlaaɖɩ altaaru ŋgʋ kɩwɛ Yehowa ɛsɩndaa kediɣzaɣ kizinziku tɛɛ yɔ kɩ-hɩŋ yɔɔ;+ nɛ pɩwɛɛ se ɛpɩyɩ nɔ calɩm mbʋ pɩkazaa yɔ kɩlaʋ kɩñaɣzʋʋ altaaru tɛɛ,+ ŋgʋ kɩwɛ kediɣzaɣ kizinziku nɔnɔɔ taa yɔ.

8 «“Pʋwayɩ lɛ, pɩwɛɛ se ɛlɩzɩ nɔ weyi pakpaɣaa nɛ palaanɩ kɩwɛɛkɩm yɔɔ kɩlaʋ yɔ e-num tɩŋa, ɛlɩzɩ ɖɔɖɔ num mbʋ pɩpɔ lotu yɔɔ nɛ num mbʋ pɩcɔ lotu nɛ pɩta yɔ, 9 nɛ tɩzɩsɩ nɛ num mbʋ pɩwɛ sɩ-naalɛ sɩ-yɔɔ yɔ, num mbʋ pɩwɛ tɩnaɣ taa yɔ. Nɛ ɛlɩzɩ num mbʋ pɩwɛ hɔyɛ yɔɔ yɔ nɛ ɛlɩzɩ ɖɔɖɔ tɩzɩsɩ.+ 10 Pɩwɛɛ se ɛlɩzɩ mbʋ ɖeyi ɖeyi ɛɛlɩzɩ laŋhɛzɩyɛ kɩlaʋ nɔ taa yɔ.+ Nɛ cɔjɔ ñaɣzɩ pɩtɩŋa miŋ kɩlaʋ kɩñaɣzʋʋ altaaru yɔɔ.

11 «“Ɛlɛ nɔ tɔnɛ nɛ ɛ-nandʋ tɩŋa, pɩkpɛndɩnɩ ɛ-ñʋʋ, ɛ-acaa, e-lotu, nɛ ɛ-pɩndʋ+ lɛ, 12 pʋ-tɔbʋʋ se nɔ hɔɔlɩŋ weyi payɩ ɩkazaa yɔ, pɩwɛɛ se eyele nɛ pakpaɣ-ɩ nɛ powoni ɖigbeɣliye wayɩ, lone cɩɖɩ cɩɖɩ ñɩnɖɛ nɖɩ ɖɩ-taa pɔlɔʋ tɔlɩma* yɔ, nɛ ɛñaɣzɩ pɩtɩŋa miŋ ɖasɩ yɔɔ.+ Pɩwɛɛ se pañaɣzɩ pɩtɩŋa lone nɖɩ ɖɩ-taa pɔlɔʋ tɔlɩma yɔ.

13 «“Lɛɛlɛɛyɔ, ye Izrayɛɛlɩ samaɣ tɩŋa ɛɖɔ wɛɛ, mbʋ pʋyɔɔ yɔ picoɖi-kɛ nɛ kala kɩwɛɛkɩm nabʋyʋ,+ nɛ katɩtɩlɩ se kalabɩ* mbʋ Yehowa ɖʋ paɣtʋ se pataala yɔ,+ 14 nɛ pʋwayɩ pɔkɔɔ nɛ patɩlɩ se palabɩ kɩwɛɛkɩm yɔ, pɩwɛɛ se samaɣ* ewoni nɔ* abalɩñɩnʋ kediɣzaɣ kizinziku ɛsɩndaa nɛ pɩkɛ kɩwɛɛkɩm yɔɔ kɩlaʋ. 15 Nɛ ɛgbɛyɛ taa ɛzʋtʋyaa tɩnɩ pe-nesi nɔ ɛnʋ ɛ-ñʋʋ yɔɔ Yehowa ɛsɩndaa, nɛ pakʋ-ɩ Yehowa ɛsɩndaa.

16 «“Pʋwayɩ lɛ, pɩwɛɛ se cɔjɔ weyi pata-ɩ num yɔ, ecozi nɔ ɛnʋ ɛ-calɩm nɛ ɛsʋnɩ-pʋ kediɣzaɣ kizinziku tɛɛ. 17 Cɔjɔ elii e-niye calɩm taa nɛ ɛmɩzɩ-pʋ tam 7 pɩsaʋ kikenduu+ ɛsɩndaa Yehowa ɛsɩndaa. 18 Nɛ pʋwayɩ lɛ, elizi calɩm mbʋ, pɩ-hɔɔlʋʋ nakʋyʋ altaaru+ ŋgʋ kɩwɛ Yehowa ɛsɩndaa kediɣzaɣ kizinziku tɛɛ yɔ kɩ-hɩŋ yɔɔ; nɛ ɛpɩyɩ calɩm mbʋ pɩkazaa yɔ pɩtɩŋa kɩlaʋ kɩñaɣzʋʋ altaaru ŋgʋ kɩwɛ kediɣzaɣ kizinziku nɔnɔɔ taa yɔ kɩ-tɛɛ.+ 19 Pɩwɛɛ se ɛlɩzɩ nɔ num tɩŋa nɛ ɛñaɣzɩ-pʋ miŋ altaaru yɔɔ nɛ ñɔsɩ kpa.+ 20 Ɛla nɔ ɛnʋ ɖeyi ɖeyi ɛzɩ ɛɛlabʋ kɩwɛɛkɩm yɔɔ kɩlaʋ nɔ lɛlʋ yɔ. Mbʋ pɩwɛɛ se cɔjɔ ɛla nɔ ɛnʋ, nɛ kɩlaʋ ŋgʋ ɛlabɩ mbʋ yɔ, kɩkaɣ huuzuu pa-kɩwɛɛkɩm yɔɔ,+ nɛ pakaɣ-wɛ pʋ kpeɣu. 21 Pɩwɛɛ se eyele nɛ pakpaɣ nɔ ɛnʋ nɛ powoni ɖigbeɣliye wayɩ, nɛ ɛñaɣzɩ-ɩ miŋ ɛzɩ ɛɛñaɣzʋʋ kajalaɣ nɔ miŋ yɔ.+ Pɩkɛ ɛgbɛyɛ kɩwɛɛkɩm yɔɔ kɩlaʋ.+

22 «“Ye picoɖi ñʋʋdʋ+ nɔɔyʋ nɛ ɛla kɩwɛɛkɩm, ye ɛlabɩ mbʋ payɩ ɛ-Ɛsɔ Yehowa ɖʋ paɣtʋ se pataala yɔ pɩ-taa nabʋyʋ nɛ ɛɖɔɔ wɛɛ yɔ, 23 yaa ye ɛkɔm nɛ ɛna se ɛmanɩ paɣtʋ natʋyʋ yɔɔ nɛ ɛla kɩwɛɛkɩm yɔ, ɖɩnɛ ɛlɛ pɩwɛɛ se ewoni tuluu* ŋgʋ kɩfɛyɩnɩ ɛjandʋ natʋyʋ yɔ nɛ pɩkɛnɩ ɛ-haɖɛ. 24 Pɩwɛɛ se ɛtɩnɩ e-nesi tuluu ŋgʋ kɩ-ñʋʋ yɔɔ, nɛ ɛkʋ-kʋ lone nɖɩ ɖɩ-taa pakʋʋ kɩlaʋ kɩñaɣzʋʋ kpɩna Yehowa ɛsɩndaa yɔ.+ Pɩkɛ kɩwɛɛkɩm yɔɔ kɩlaʋ. 25 Cɔjɔ elii e-niye kɩwɛɛkɩm yɔɔ kɩlaʋ kpɩnɛ calɩm taa nɛ elizi-pʋ kɩlaʋ kɩñaɣzʋʋ altaaru hɩŋ yɔɔ,+ nɛ pɩwɛɛ se ɛpɩyɩ tuluu calɩm mbʋ pɩkazaa yɔ kɩlaʋ kɩñaɣzʋʋ altaaru tɛɛ.+ 26 Cɔjɔ ɛñaɣzɩ miŋ tuluu num tɩŋa altaaru yɔɔ nɛ ñɔsɩ kpa ɛzɩ ɛñaɣzʋʋ laŋhɛzɩyɛ kɩlaʋ num yɔ;+ nɛ kɩlaʋ ŋgʋ cɔjɔ la mbʋ yɔ, kɩkaɣ huuzuu ɛyʋ ɛnʋ ɛ-kɩwɛɛkɩm yɔɔ, nɛ pakaɣ-ɩ pʋ kpeɣu.

27 «“Ye picoɖi ɛjaɖɛ taa ɛyʋ nɔɔyʋ* nɛ ɛla kɩwɛɛkɩm, ye ɛlabɩ mbʋ Yehowa ɖʋ paɣtʋ se pataala yɔ pɩ-taa nabʋyʋ nɛ ɛɖɔɔ wɛɛ yɔ,+ 28 yaa ye ɛkɔm nɛ ɛna se ɛmanɩ paɣtʋ natʋyʋ yɔɔ nɛ ɛla kɩwɛɛkɩm yɔ, ɖɩnɛ ɛlɛ kɩwɛɛkɩm mbʋ ɛlaba yɔ pʋyɔɔ lɛ, pɩwɛɛ se ewoni pʋnʋ* halɩñɩnʋ weyi ɛfɛyɩnɩ ɛjandʋ natʋyʋ yɔ nɛ pɩkɛnɩ ɛ-haɖɛ. 29 Nɛ ɛtɩnɩ e-nesi kɩwɛɛkɩm yɔɔ kɩlaʋ kpɩnɛ ñʋʋ yɔɔ, nɛ ɛkʋ-ɖɩ lone nɖɩ ɖɩ-taa pakʋʋ kɩlaʋ kɩñaɣzʋʋ kpɩna yɔ.+ 30 Cɔjɔ elii e-niye kpɩnɛ calɩm taa nɛ elizi-pʋ kɩlaʋ kɩñaɣzʋʋ altaaru hɩŋ yɔɔ, nɛ ɛpɩyɩ kpɩnɛ calɩm mbʋ pɩkazaa yɔ pɩtɩŋa altaaru tɛɛ.+ 31 Pɩwɛɛ se ɛlɩzɩ pʋnʋ ɛnʋ e-num tɩŋa,+ ɛzɩ ɛɛlɩzʋʋ laŋhɛzɩyɛ kɩlaʋ kpɩnɛ num yɔ,+ nɛ pɩwɛɛ se cɔjɔ ɛñaɣzɩ-pʋ miŋ altaaru yɔɔ nɛ ñɔsɩ kpa nɛ pɩkɛ mbʋ pɩ-sɔzɩŋ kɛdɩɣnɩ Yehowa yɔ;* nɛ kɩlaʋ ŋgʋ cɔjɔ la mbʋ yɔ kɩkaɣ huuzuu ɛyʋ ɛnʋ ɛ-kɩwɛɛkɩm yɔɔ, nɛ pakaɣ-ɩ pʋ kpeɣu.

32 «“Ɛlɛ ye ɛsɔɔlaa se ɛlaa heɣa nɛ pɩkɛ ɛ-kɩwɛɛkɩm yɔɔ kɩlaʋ yɔ, pɩwɛɛ se ɛlaa heɣa halɩñɩŋga ŋga kɛfɛyɩnɩ ɛjandʋ natʋyʋ yɔ. 33 Pɩwɛɛ se ɛtɩnɩ e-nesi kɩwɛɛkɩm yɔɔ kɩlaʋ kpɩnɛ ñʋʋ yɔɔ, nɛ ɛkʋ-ɖɩ lone nɖɩ ɖɩ-taa pakʋʋ kɩlaʋ kɩñaɣzʋʋ kpɩna yɔ se pɩkɛnɩ kɩwɛɛkɩm yɔɔ kɩlaʋ.+ 34 Pɩwɛɛ se cɔjɔ elii e-niye kɩwɛɛkɩm yɔɔ kɩlaʋ kpɩnɛ calɩm taa nɛ elizi-pʋ kɩlaʋ kɩñaɣzʋʋ altaaru hɩŋ yɔɔ,+ nɛ ɛpɩyɩ kpɩnɛ calɩm mbʋ pɩkazaa yɔ pɩtɩŋa altaaru tɛɛ. 35 Pɩwɛɛ se ɛlɩzɩ heɣa ŋga ko-num tɩŋa, ɛzɩ ɛɛlɩzʋʋ ɛyaʋ ŋgʋ palanɩ laŋhɛzɩyɛ kɩlaʋ yɔ ki-num yɔ, nɛ cɔjɔ ñaɣzɩ pɩtɩŋa miŋ altaaru yɔɔ kɩlaŋ weyi pañaɣzɩ-ɩ miŋ Yehowa yɔ ɩ-yɔɔ, nɛ ñɔsɩ kpa;+ nɛ kɩlaʋ ŋgʋ cɔjɔ la mbʋ yɔ kɩkaɣ huuzuu kɩwɛɛkɩm mbʋ ɛyʋ ɛnʋ ɛlaba yɔ pɩ-yɔɔ, nɛ pakaɣ-ɩ pʋ kpeɣu.+

5 «“Ye nɔɔyʋ* ɛnɩwa se posusi samaɣ taa se pɩwɛɛ se palɩzɩ aseɣɖe nabʋyʋ yɔɔ,*+ nɛ ye ɛkɛ pɩ-aseɣɖe tʋ yaa ɛɛnawa se pɩlabɩ mbʋ, yaa ɛɛnɩ pɩ-tɔm nɛ ɛtɩlɩzɩ aseɣɖe yɔ, ɛlabɩ kɩwɛɛkɩm, nɛ pakaɣ-ɩ pɔzʋʋ akɔnta ɛ-kɩwɛɛkɩm yɔɔ.

2 «“Yaa ye nɔɔyʋ* etukuni mbʋ pɩfɛyɩ kele kele yɔ, paa ɛtɩtɩlɩ yɔ, paa pɩtɩɩkɛ tɛyɛ kpɩnɛ nɖɩ ɖɩfɛyɩ kele kele yɔ ɖi-tomnaɣ kɩsɩbaɣ, yaa ɖɩɣa kpɩnɛ nɖɩ ɖɩfɛyɩ kele kele yɔ ɖi-tomnaɣ kɩsɩbaɣ, yaa kpɩna wena aɖɔŋ wiii nɛ afɛyɩ kele kele yɔ a-taa naɖɩyɛ tomnaɣ kɩsɩbaɣ yɔ,+ ɛfɛyɩ kele kele nɛ ɛɖɔ wɛɛ. 3 Yaa ye nɔɔyʋ ɛtɩna pʋcɔ nɛ etukuni ɛyʋ azuluma,+ pʋ-tɔbʋʋ se azuluma wena payɩ apɩzɩɣ ayele se ɛpɩsɩ azuluma tʋ yɔ a-taa naayɛ, ɛlɛ pʋwayɩ, ɛkɔɔ nɛ eɖiɣzina yɔ, ɛɖɔ wɛɛ.

4 «“Yaa ye nɔɔyʋ* ekpedesaa nɛ eɖuu se ɛlakɩ nabʋyʋ, paa eɖuwaa se ɛlakɩ kɩbam yaa kɩdɛkɛdɩm, yaa paa pɩtɩɩkɛ ɛbɛ, nɛ ɛtaatɩlɩ, nɛ pʋwayɩ eɖiɣzina se ekpedesaa nɛ eɖuu yɔ, ɛɖɔ wɛɛ.*+

5 «“Ye ɛɖɔ wɛɛ hɔɔlɩŋ ɛnɩ ɩ-taa nakʋyʋ taa yɔ, ɖɩnɛ ɛlɛ pɩwɛɛ se ekuli kɩwɛɛkɩm mbʋ ɛlaba yɔ pɩ-yɔɔ.+ 6 Pɩwɛɛ ɖɔɖɔ se ɛkɔnɩ ɛ-wɛɛ ɖɔʋ kɩlaʋ Yehowa, kɩwɛɛkɩm mbʋ ɛlaba yɔ pɩ-yɔɔ;+ mbʋ pɩwɛɛ se ɛkɔna yɔ mbʋ yɔ: Heɣa halɩñɩŋga yaa pʋnʋ* halɩñɩnʋ nɛ pɩkɛ kɩwɛɛkɩm yɔɔ kɩlaʋ. Ðɩnɛ ɛlɛ, cɔjɔ kaɣ-kʋ laʋ nɛ pihuuzi kɩwɛɛkɩm mbʋ ɛyʋ ɛnʋ ɛlaba yɔ pɩ-yɔɔ.

7 «“Ɛlɛ ye ɛɛpɩzɩɣ se ehiɣ heu nɛ ɛlaa ɛ-kɩwɛɛkɩm yɔɔ yɔ, pɩwɛɛ se ɛkɔnɩ ahoo 2 yaa halikuku piya 2+ Yehowa nɛ pɩkɛ ɛ-wɛɛ ɖɔʋ kɩlaʋ; ɛlaa sumaɣ kʋɖʋmaɣ nɛ pɩkɛ kɩwɛɛkɩm yɔɔ kɩlaʋ nɛ ɛlaa lɛɛka nɛ pɩkɛ kɩlaʋ kɩñaɣzʋʋ.+ 8 Pɩwɛɛ se ewoni-sɩ cɔjɔ cɔlɔ, nɛ pɩwɛɛ se ɛlɛ ɛcalɩnɩ laʋ kɩwɛɛkɩm yɔɔ kɩlaʋ ñɩŋga, ɛcɛ ke-liu tɛɛ ɛlɛ ɛtaasɛtɩ ñʋʋ. 9 Pɩwɛɛ se ɛmɩzɩ altaaru kpɛŋa yɔɔ kɩwɛɛkɩm yɔɔ kɩlaʋ sumaɣ calɩm hɔɔlʋʋ nakʋyʋ, ɛlɛ calɩm mbʋ pɩkazaa yɔ, pɩwɛɛ se eyele nɛ pikpe altaaru tɛɛ.+ Pɩkɛ kɩwɛɛkɩm yɔɔ kɩlaʋ. 10 Cɔjɔ kaɣ laʋ sumaɣ lɛɛka nɛ pɩkɛ kɩlaʋ kɩñaɣzʋʋ, pɩwɛɛ se ɛlaa-kɛ ɛzɩ paɣtʋ pɔzʋʋ yɔ;+ cɔjɔ kaɣ-kɛ laʋ nɛ pihuuzi kɩwɛɛkɩm mbʋ ɛyʋ ɛnʋ ɛlaba yɔ pɩ-yɔɔ, nɛ pakaɣ-ɩ pʋ kpeɣu.+

11 «“Ɛlɛ ye ɛɛpɩzɩɣ se ehiɣ ahoo 2 yaa halikuku piya 2 yɔ, haɖɛ nɖɩ pɩwɛɛ se ewoni ɛ-kɩwɛɛkɩm yɔɔ nɛ pɩkɛ kɩwɛɛkɩm yɔɔ kɩlaʋ yɔ nɖɩ lɛ mʋlʋm mbʋ pɩkpɩzɩ camɩyɛ yɔ efa hɔɔlʋʋ 10 ñɩŋgʋ.*+ Pɩtɩmʋna se ɛsɔzɩ num pɩ-taa yaa ɛɖʋ pɩ-yɔɔ tɩlaaɖɩ kʋhʋlʋmʋʋ, mbʋ pʋyɔɔ yɔ kɩwɛɛkɩm yɔɔ kɩlaʋ pɩkɛnaa. 12 Pɩwɛɛ se ewoni-pʋ cɔjɔ, nɛ cɔjɔ cozi-pʋ nɛ pisu e-nikpiɖe taa nɛ pɩkɛnɩ mbʋ pɩsɩŋnɩ kɩlaʋ kpeekpe yɔ nɛ ɛñaɣzɩ miŋ altaaru yɔɔ, kɩlaŋ weyi pañaɣzɩɣ-ɩ miŋ Yehowa yɔ ɩ-yɔɔ, nɛ ñɔsɩ kpa. Pɩkɛ kɩwɛɛkɩm yɔɔ kɩlaʋ. 13 Mbʋ cɔjɔ kaɣ labʋ nɛ pihuuzi kɩwɛɛkɩm mbʋ ɛyʋ ɛnʋ ɛlaba yɔ pɩ-yɔɔ, kɩwɛɛkɩm pʋnɛ* pɩ-taa paa mbʋ, nɛ pakaɣ-ɩ pʋ kpeɣu.+ Kɩlaʋ hɔɔlʋʋ ŋgʋ kɩkazɩɣ yɔ kɩkaɣ pɩsʋʋ cɔjɔ pʋyʋ,+ ɛzɩ tɔɔnaɣ pee kɩlaʋ yɔ.”»+

14 Yehowa tasɩ heyuu Moyizi se: 15 «Ye picoɖi nɔɔyʋ* nɛ ɛla lakasɩ nzɩ sɩfɛyɩ siɣsiɣ yɔ, ye ɛyʋsɩnɩ Yehowa wondu kiɖeɖetu yɔ,+ pɩwɛɛ se ewoni ɛyaʋ ŋgʋ kɩfɛyɩnɩ ɛjandʋ natʋyʋ yɔ Yehowa nɛ pɩkɛ wɛɛ ɖɔʋ kɩlaʋ;+ pɩwɛɛ se ki-liidiye ɛmʋnɩ lone kiɖeɖeye taa sikli.*+ 16 Nɛ pɩwɛɛ se ɛhɛyɩ kɩwɛɛkɩm mbʋ ɛlaba nɛ ɛyʋsɩnɩ lone kiɖeɖeye yɔ pi-lone taa nɛ ɛsɔzɩ ɖɔɖɔ mbʋ ɛhɛyɩɣ yɔ pɩ-hɔɔlʋʋ 5 ñɩŋgʋ.+ Ɛkaɣ-pʋ cɛlʋʋ cɔjɔ, nɛ cɔjɔ laa wɛɛ ɖɔʋ kɩlaʋ+ ɛyaʋ nɛ pihuuzi ɛ-kɩwɛɛkɩm yɔɔ, nɛ pakaɣ-ɩ pʋ kpeɣu.+

17 «Ye nɔɔyʋ* ɛlabɩ kɩwɛɛkɩm yɔ, ye ɛlabɩ mbʋ Yehowa ɖʋ paɣtʋ se pataala yɔ pɩ-taa nabʋyʋ, nɛ paa ɛtɩtɩlɩ yɔ, ɛɖɔ wɛɛ nɛ pakaɣ-ɩ pɔzʋʋ akɔnta ɛ-kɩwɛɛkɩm yɔɔ.+ 18 Pɩwɛɛ se ɛkɔnɩ ɛyaʋ ŋgʋ kɩfɛyɩnɩ ɛjandʋ natʋyʋ yɔ cɔjɔ, nɛ pɩwɛɛ se ki-liidiye ɛmʋnɩ liidiye nɖɩ paɖʋwa yɔ, nɛ pɩkɛ wɛɛ ɖɔʋ kɩlaʋ.+ Ðɩnɛ ɛlɛ cɔjɔ kaɣ-kʋ laʋ nɛ pihuuzi kɩwɛɛkɩm mbʋ pɩyʋsɩnɩ ɛyʋ ɛnʋ nɛ ɛla nɛ ɛtaatɩlɩ yɔ pɩ-yɔɔ, nɛ pakaɣ-ɩ pʋ kpeɣu. 19 Pɩkɛ wɛɛ ɖɔʋ kɩlaʋ. Pɩtʋʋ fɛyɩ se ɛɖɔ wɛɛ, mbʋ pʋyɔɔ yɔ ɛyʋsɩnɩ Yehowa.»

6 Yehowa tasɩ heyuu Moyizi se: 2 «Ye nɔɔyʋ* ɛlabɩ kɩwɛɛkɩm, ye ɛlabɩ mbʋ pɩfɛyɩ siɣsiɣ yɔ Yehowa ɛsɩndaa+ nɛ epeɣzi e-koobu mbʋ ɛlɛ ɖʋzɩ e-nesi taa yɔ pɩ-hɔɔlʋʋ taa,+ yaa mbʋ ɛlɛ cɛlɩ-ɩ se ɛsɩɩ yɔ pɩ-hɔɔlʋʋ taa, yaa ɛmɩlɩ nabʋyʋ, yaa ɛtɩŋnɩ pɩ-tɛɛ nɛ pɩ-yɔɔ lakasɩ yɔɔ nɛ ɛmʋ nabʋyʋ e-koobu cɔlɔ yɔ, 3 yaa nabʋyʋ leba nɛ ehiɣ-pʋ ɛlɛ ɛtɩyɔɔdɩ toovenim, nɛ ye ɛlabɩ kɩwɛɛkɩm pʋnɛ yɔ pɩ-taa nabʋyʋ ɖɔndɩ ɛlɛ eɖuu cɛtɩm ɖuutu pɩ-yɔɔ yɔ,+ mbʋ pɩwɛɛ se ɛla yɔ mbʋ yɔ: 4 Ye ɛlabɩ kɩwɛɛkɩm nɛ ɛɖɔɔ wɛɛ yɔ, pɩwɛɛ se ɛpɩsɩnɩ mbʋ ɛmɩlaa yɔ, mbʋ ɛmʋnɩ ɖoŋ yɔ, mbʋ ɛtɩŋnɩ pɩ-tɛɛ nɛ pɩ-yɔɔ lakasɩ yɔɔ nɛ ɛmʋ yɔ, mbʋ paaɖʋzɩ e-nesi taa yɔ, yaa mbʋ piileba nɛ ehiɣ-pʋ yɔ, 5 yaa mbʋ payɩ pɩ-yɔɔ eɖuu cɛtɩm ɖuutu yɔ, nɛ pɩwɛɛ se ɛhɛyɩ pi-lone taa ɖeyi ɖeyi+ nɛ ɛsɔzɩ pɩ-hɔɔlʋʋ 5 ñɩŋgʋ. Ɛcɛlɩɣ-pʋ pʋyʋ tʋ evemiye nɖɩ panaɣ kaɣlaa se ɛɖɔ wɛɛ yɔ. 6 Nɛ pɩwɛɛ se ewoni cɔjɔ ɛyaʋ ŋgʋ kɩfɛyɩnɩ ɛjandʋ natʋyʋ yɔ nɛ pɩkɛnɩ ɛ-wɛɛ ɖɔʋ kɩlaʋ Yehowa; pɩwɛɛ se ɛyaʋ ŋgʋ palaɣnɩ wɛɛ ɖɔʋ kɩlaʋ yɔ kɩmʋnɩ liidiye nɖɩ paɖʋwa yɔ.+ 7 Cɔjɔ kaɣ-ɩ labʋ kɩwɛɛkɩm yɔɔ huuzuu sɔnzɩ Yehowa ɛsɩndaa, nɛ pakaɣ-ɩ kpeɣu mbʋ ɛlaba nɛ ɛɖɔɔ wɛɛ yɔ, paa pɩtɩɩkɛ ɛbɛ yɔ.»+

8 Yehowa tasɩ yɔɔdɩnʋʋ Moyizi nɛ eheyi-i se: 9 «Ðʋ paɣtʋ Aarɔɔnɩ nɛ ɛ-pɩyalaa nɛ ŋheyi-wɛ se: “Kɩlaʋ kɩñaɣzʋʋ yɔɔ paɣtʋ yɔ:+ Pɩwɛɛ se kɩlaʋ kɩñaɣzʋʋ ɛwɛɛ altaaru yɔɔ miŋ taa ɖoo kpeekpe nɛ tɛʋ kɔɔ kife, nɛ pɩwɛɛ se miŋ ɛwɛɛ mʋʋ yɔɔ altaaru yɔɔ. 10 Pɩwɛɛ se cɔjɔ esuu ɛ-cɔjɔtʋ wondu, pɩsatʋ ñɩndʋ,*+ nɛ ɛtɔɔlɩ pɩsatʋ cokodonaa*+ e-tomnaɣ yɔɔ. Nɛ pʋwayɩ lɛ, ekuu kɩlaʋ kɩñaɣzʋʋ ŋgʋ miŋ ñaɣ altaaru yɔɔ yɔ kɩ-tɔlɩma*+ nɛ ɛsɩɩ-yɛ altaaru cɔlɔ. 11 Pʋwayɩ lɛ, ɛhɔzɩ e-wondu+ nɛ esuu wondu lɛɛtʋ nɛ ɛkpaɣ tɔlɩma nɛ ewoni-yɛ lone cɩɖɩ cɩɖɩ ñɩnɖɛ naɖɩyɛ taa ɖigbeɣliye* wayɩ.+ 12 Pɩwɛɛ se miŋ ɛwɛɛ mʋʋ yɔɔ altaaru yɔɔ, ɛtaaɖɩ. Cɔjɔ ɛwɛɛ ɖasɩ ɖʋʋ yɔɔ miŋ taa+ paa tanaŋ ŋgʋ nɛ ɛtɩnɩ kɩlaʋ kɩñaɣzʋʋ, miŋ yɔɔ; nɛ ɛñaɣzɩ laŋhɛzɩyɛ kɩlaŋ num miŋ ɛnɩ ɛ-yɔɔ nɛ ñɔsɩ kpa.+ 13 Pɩwɛɛ se miŋ ɛwɛɛ mʋʋ yɔɔ altaaru yɔɔ paa ɛzɩmtaa nɛ ɛtaaɖɩ.

14 «“Lɛɛlɛɛyɔ, tɔɔnaɣ pee kɩlaʋ paɣtʋ yɔ:+ Aarɔɔnɩ pɩyalaa pɩwɛɛ se powoni-kʋ Yehowa ɛsɩndaa altaaru ɛsɩndaa. 15 Pa-taa kʋɖʋm ecozi tɔɔnaɣ pee kɩlaʋ mʋlʋm mbʋ pɩkpɩzɩ camɩyɛ yɔ nɛ ki-num nɛ tɩlaaɖɩ kʋhʋlʋmʋʋ ŋgʋ payɩ kɩwɛ tɔɔnaɣ pee kɩlaʋ yɔɔ yɔ nɛ pisu e-nikpiɖe taa, nɛ ɛñaɣzɩ miŋ altaaru yɔɔ nɛ ñɔsɩ kpa nɛ pɩkɛ mbʋ pɩsɩŋnɩ kɩlaʋ kpeekpe yɔ, nɛ kɩ-sɔzɩŋ kɛdɩɣnɩ Yehowa.*+ 16 Aarɔɔnɩ nɛ ɛ-pɩyalaa pakaɣ tɔɔʋ kɩ-hɔɔlʋʋ ŋgʋ kɩkazaa yɔ.+ Pakaɣ-kʋ tɔɔʋ ɛzɩ kpɔnɔ ŋgʋ kɩ-taa patɩɖʋ lɔlɔm yɔ lone kiɖeɖeye naɖɩyɛ taa. Pakaɣ-kʋ tɔɔʋ kediɣzaɣ kizinziku kadaɣ taa.+ 17 Pɩtɩmʋna se pɔhɔbɩ-kʋ nɛ lɔlɔm pʋyʋ.+ Maha-wɛ kʋ se pɩkɛ pe-ɖeɖe man-kɩlaŋ weyi pañaɣzɩɣ miŋ yɔ ɩ-taa.+ Kɩkɛ pʋyʋ kiɖeɖeu siŋŋ,+ kɩwɛ ɛzɩ kɩwɛɛkɩm yɔɔ kɩlaʋ nɛ wɛɛ ɖɔʋ kɩlaʋ yɔ. 18 Aarɔɔnɩ lʋlʋʋ taa abalaa kpeekpe kaɣ-kʋ tɔɔʋ.+ Kɩkɛnɩ pe-ɖeɖe tam Yehowa kɩlaŋ weyi pañaɣzɩɣ miŋ yɔ ɩ-taa, pa-kpaɖɩŋ kpeekpe taa.+ Mbʋ payɩ pitukuuni-i* yɔ, pɩpɩsɩɣ kele kele.”»

19 Yehowa tasɩ heyuu Moyizi se: 20 «Kɩyakʋ ŋgʋ pataɣ Aarɔɔnɩ nɛ ɛ-pɩyalaa pa-taa nɔɔyʋ num yɔ, mbʋ pɩwɛɛ se ɛlaa Yehowa yɔ mbʋ yɔ:+ ɛha mʋlʋm mbʋ pɩkpɩzɩ camɩyɛ yɔ efa hɔɔlʋʋ 10 ñɩŋgʋ*+ nɛ pɩkɛnɩ tɔɔnaɣ pee kɩlaʋ ŋgʋ palakɩ tam yɔ,+ palaa pɩ-hɔɔlʋʋ tanaŋ tɛɛ nɛ hɔɔlʋʋ lɛɛkʋ ɖanaɣ yɔɔ. 21 Pɩwɛɛ se palabɩ-kʋ nɛ num, palabɩ-kʋ tɛlɛm ŋgʋ kɩ-yɔɔ poɖoŋuu yɔ, kɩ-yɔɔ.+ Pɩwɛɛ se pesidi num kɩ-taa camɩyɛ nɛ pɛpɛlɩ-kʋ hɔɔlasɩ hɔɔlasɩ nɛ palaa-kʋ ɛzɩ tɔɔnaɣ pee kɩlaʋ ŋgʋ pɔhɔba nɛ kɩ-sɔzɩŋ kɛdɩɣnɩ Yehowa yɔ.* 22 Ɛ-pɩyalaa taa cɔjɔ weyi pata-ɩ num yɔ, weyi ɛlɛɣzɩɣ e-lone taa yɔ,+ ɛkaɣ labʋ mbʋ. Pɩkɛnɩ tamtam paɣtʋ: Pɩwɛɛ se pañaɣzɩ kɩlaʋ kpeekpe miŋ Yehowa nɛ ñɔsɩ kpa. 23 Ye cɔjɔ nɔɔyʋ ɛla tɔɔnaɣ pee kɩlaʋ nakʋyʋ yɔ, pɩwɛɛ se pañaɣzɩ kɩ-tɩŋa miŋ. Pɩfɛyɩ se pɔtɔɔ-kʋ.»

24 Yehowa tasɩ yɔɔdɩnʋʋ Moyizi nɛ eheyi-i se: 25 «Heyi Aarɔɔnɩ nɛ ɛ-pɩyalaa se: “Kɩwɛɛkɩm yɔɔ kɩlaʋ paɣtʋ yɔ:+ Ðenɖe pakʋʋ kɩlaʋ kɩñaɣzʋʋ kpɩna yɔ,+ peeɖe ɖɔɖɔ pɩwɛɛ se pakʋ kɩwɛɛkɩm yɔɔ kɩlaʋ kpɩna Yehowa ɛsɩndaa. Kɩkɛ pʋyʋ kiɖeɖeu siŋŋ. 26 Cɔjɔ weyi ɛlaɣ-kʋ kɩwɛɛkɩm yɔɔ yɔ, ɛkaɣ-kʋ tɔɔʋ.+ Pɩwɛɛ se ɛtɔɔ-kʋ lone kiɖeɖeye naɖɩyɛ taa, kediɣzaɣ kizinziku kadaɣ taa.+

27 «“Mbʋ payɩ pitukuuni kɩlaʋ kpɩnɛ nandʋ yɔ, pɩpɩsɩɣ kele kele; nɛ ye nɔɔyʋ ɛmɩzɩ ɖɩ-calɩm e-toko yɔɔ kɔyɔ, pɩwɛɛ se ŋcɔtɩ mbʋ pɩ-yɔɔ calɩm mɩzaa yɔ lone kiɖeɖeye naɖɩyɛ taa. 28 Cʋʋ ɖeɣbiye nɖɩ ɖɩ-taa patɩzɩ kɩlaʋ nandʋ yɔ, pɩwɛɛ se pɔyɔkɩ-ɖɩ. Ɛlɛ ye pɩkɛ ñɩɣyʋʋ kɩsɛɛmʋʋ ɖeɣbiye yɔ, ɖɩnɛ ɛlɛ pɩwɛɛ se pañalɩ-ɖɩ nɛ pekelesi-ɖɩ nɛ lɩm.

29 «“Pɩwɛɛ se abalaa mba pɛkɛ cɔjɔnaa yɔ, pa-tɩŋa pɔtɔɔ-tʋ.+ Tɩkɛ pʋyʋ kiɖeɖeu siŋŋ.+ 30 Ɛlɛ ye pasʋnɩ kɩwɛɛkɩm yɔɔ kɩlaʋ kpɩnɛ calɩm nabʋyʋ lone kiɖeɖeye taa, kediɣzaɣ kizinziku tɛɛ se pohuuzini kɩwɛɛkɩm yɔɔ kɔyɔ, pɩtɩha nʋmɔʋ se pɔtɔɔ kɩ-nandʋ.+ Pɩwɛɛ se pañaɣzɩ-tʋ miŋ.

7 «“Wɛɛ ɖɔʋ kɩlaʋ paɣtʋ yɔ:+ Kɩkɛ pʋyʋ kiɖeɖeu siŋŋ. 2 Pɩwɛɛ se pakʋ wɛɛ ɖɔʋ kɩlaʋ kpɩnɛ lone nɖɩ ɖɩ-taa pakʋʋ kɩlaŋ kɩñaɣzɩŋ kpɩna yɔ, nɛ pɩwɛɛ se pamɩzɩ ɖɩ-calɩm+ altaaru kpɛnzɩ tɩŋa yɔɔ.+ 3 Pɩwɛɛ se ewoni ɖi-num tɩŋa,+ pɩkpɛndɩnɩ suu nɛ ki-num, num mbʋ pɩpɔ lotu yɔɔ yɔ, 4 nɛ tɩzɩsɩ nɛ num mbʋ pɩwɛ sɩ-naalɛ sɩ-yɔɔ yɔ, mbʋ pɩwɛ tɩnaɣ taa yɔ. Pɩwɛɛ ɖɔɖɔ se ɛlɩzɩ num mbʋ pɩwɛ hɔyɛ yɔɔ yɔ nɛ pɩkpɛndɩnɩ tɩzɩsɩ.+ 5 Cɔjɔ kaɣ ñaɣzʋʋ pɩtɩŋa altaaru yɔɔ nɛ ñɔsɩ kpa, nɛ pɩkɛ kɩlaʋ ŋgʋ pañaɣzɩɣ-kʋ miŋ Yehowa yɔ.+ Pɩkɛ wɛɛ ɖɔʋ kɩlaʋ. 6 Cɔjɔnaa taa abalaa tɩŋa kaɣ kɩlaʋ nandʋ tɔɔʋ,+ nɛ pɩwɛɛ se pɔtɔɔ-tʋ lone kiɖeɖeye naɖɩyɛ taa. Pɩkɛ pʋyʋ kiɖeɖeu siŋŋ.+ 7 Paɣtʋ ndʋ paɖʋ kɩwɛɛkɩm yɔɔ kɩlaʋ yɔɔ yɔ, pɩwɛɛ se pɔɖɔ tɩ-yɔɔ ɖɔɖɔ wɛɛ ɖɔʋ kɩlaʋ hɔɔlʋʋ taa; cɔjɔ weyi ɛlaɣ kɩlaʋ kpɩnɛ se pihuuzi kɩwɛɛkɩm yɔɔ yɔ, ɛnʋ tɩnɩ ɖɩ-nandʋ.+

8 «“Alɩwaatʋ ndʋ cɔjɔ laɣ nɔɔyʋ kɩlaʋ kɩñaɣzʋʋ yɔ, kpɩnɛ nɖɩ powoni cɔjɔ nɛ ɛlaanɩ kɩlaʋ kɩñaɣzʋʋ yɔ, ɛnʋ tɩnɩ ɖɩ-tɔnɛ.+

9 «“Tɔɔnaɣ pee kɩlaŋ weyi payɩ pɔhɔbɩ-ɩ kpou tɛɛ yaa poɖoŋi-i kasɩɖɔɔlɩ taa yaa tɛlɛm ŋgʋ kɩ-yɔɔ poɖoŋuu yɔ+ kɩ-yɔɔ yɔ, cɔjɔ weyi ɛla-ɩ yɔ ɛnʋ tɩnɩ-ɩ. Ɩkaɣ pɩsʋʋ ɛ-pʋyʋ.+ 10 Ɛlɛ tɔɔnaɣ pee kɩlaŋ weyi payɩ pesidi-i nɛ num+ yaa ɩwɩlɩ waɣwaɣ yɔ,+ ɩkaɣ pɩsʋʋ Aarɔɔnɩ pɩyalaa tɩŋa pʋyʋ; pa-tɩŋa pakaɣ-ɩ tayʋʋ kɩmaŋ.

11 «“Lɛɛlɛɛyɔ, laŋhɛzɩyɛ kɩlaʋ ŋgʋ nɔɔyʋ pɩzɩɣ nɛ ɛlaa Yehowa yɔ, kɩ-paɣtʋ yɔ:+ 12 Ye ɛlaɣ-kʋ se ɛwɩlɩnɩ ɛ-ɛsɩmɩyɛ yɔ,+ pɩwɛɛ se eewokini ɛsɩmɩyɛ wɩlʋʋ kɩlaʋ lɛ, ɛkpɛndɩnɩ kpɔnɔnaa mba palabɩ-wɛ nɛ num nɛ patɩɖʋ pa-taa lɔlɔm nɛ pɛwɛ kulukulu kokoo tɩyɛ yɔ, nɛ kpɔnɔnaa tatayaa tatayaawaa mba pamɩzɩ pɔ-yɔɔ num nɛ patɩɖʋ pa-taa lɔlɔm yɔ, nɛ kpɔnɔnaa mba pɛwɛ kulukulu kokoo tɩyɛ nɛ palabɩ-wɛ nɛ mʋlʋm mbʋ pɩkpɩzɩ camɩyɛ yɔ, nɛ pesidi-pʋ camɩyɛ nɛ ponuuti-pʋ nɛ num yɔ. 13 Eewokini ɛ-haɖɛ lɛ, pɩwɛɛ se ɛkpɛndɩnɩ kpɔnɔnaa mba paɖʋ pa-taa lɔlɔm nɛ pɛwɛ kulukulu kokoo tɩyɛ yɔ nɛ laŋhɛzɩyɛ kɩlaʋ ŋgʋ ɛlaɣ se ɛwɩlɩnɩ ɛ-ɛsɩmɩyɛ yɔ. 14 Pɩwɛɛ se ewoni paa kpɔnɔnaa mba lɛ, pa-taa kʋɖʋmʋʋ nɛ pɩkɛ hɔɔlʋʋ kiɖeɖeu Yehowa; pɩkaɣ kɛʋ cɔjɔ weyi ɛmɩzɩɣ laŋhɛzɩyɛ kɩlaŋ kpɩna calɩm yɔ ɛ-pʋyʋ.+ 15 Ɛ-laŋhɛzɩyɛ kɩlaŋ taa, kɩlaʋ ŋgʋ kɩkɛ ɛsɩmɩyɛ kɩlaʋ yɔ, pɩwɛɛ se pɔtɔɔ kɩ-kpɩnɛ nandʋ kɩyakʋ ŋgʋ ɛla-ɖɩ yɔ. Pɩtɩmʋna se ɛkazɩ tɩ-taa natʋyʋ nɛ tɛʋ fem-tʋ.+

16 «“Ye ɛ-kɩlaʋ haɖɛ ɛkɛ ɖuutu haɖɛ+ yaa sɔɔlɩm haɖɛ+ yɔ, pɩwɛɛ se pɔtɔɔ kɩ-kpɩnɛ nandʋ kɩyakʋ ŋgʋ ɛla-ɖɩ yɔ, nɛ nandʋ ndʋ tɩkazaa nɛ tɛʋ fe yɔ, papɩzɩɣ ɖɔɖɔ nɛ pɔtɔɔ-tʋ. 17 Ɛlɛ kɩlaʋ kpɩnɛ nandʋ ndʋ payɩ tɩkazɩɣ nɛ pɩtalɩ kɩyakʋ 3 ñɩŋgʋ wiye yɔ, pɩwɛɛ se pañaɣzɩ-tʋ miŋ.+ 18 Ɛlɛ ɛ-laŋhɛzɩyɛ kɩlaʋ kpɩnɛ nandʋ ndʋ tɩkazɩɣ nɛ pɩtalɩ kɩyakʋ 3 ñɩŋgʋ wiye yɔ, ye ɛyʋ nɔɔyʋ ɛtɔɔ-tʋ yɔ, Ɛsɔ taa ɛɛkaɣ labʋ leleŋ nɛ weyi ɛla-kʋ yɔ. Paakpakɩɣ-kʋ nɛ palabɩnɩ tʋmɩyɛ, kɩkɛ mbʋ pɩɖʋʋ ɖɩwɩzɩyɛ yɔ; nɛ ɛyʋ* weyi ɛtɔkɩ nandʋ ndʋ tɩ-taa natʋyʋ yɔ, pakaɣ-ɩ pɔzʋʋ akɔnta ɛ-kɩwɛɛkɩm yɔɔ.+ 19 Pɩtɩmʋna se pɔtɔɔ nandʋ ndʋ titukuni mbʋ pɩfɛyɩ kele kele yɔ. Pɩwɛɛ se pañaɣzɩ-tʋ miŋ. Ɛyʋ weyi ɛwɛ kele kele yɔ, ɛpɩzɩɣ nɛ ɛtɔɔ nandʋ ndʋ tɩwɛ kele kele yɔ.

20 «“Ɛlɛ ye ɛyʋ* nɔɔyʋ ɛfɛyɩ kele kele nɛ ɛtɔɔ laŋhɛzɩyɛ kɩlaʋ kpɩnɛ nandʋ, ndʋ tɩkɛ Yehowa pʋyʋ yɔ, pɩwɛɛ se palɩzɩ* ɛyʋ* ɛnʋ ɛ-samaɣ taa.+ 21 Ye ɛyʋ* nɔɔyʋ etukuni mbʋ pɩfɛyɩ kele kele yɔ, paa pɩkɛ ɛyʋ nɔɔyʋ azuluma,+ yaa kpɩnɛ nɖɩ ɖɩfɛyɩ kele kele yɔ,+ yaa kʋzɔɔtʋ wonuu nakʋyʋ ŋgʋ kɩfɛyɩ kele kele yɔ,+ nɛ ɛtɔɔ laŋhɛzɩyɛ kɩlaʋ kpɩnɛ nandʋ ndʋ tɩkɛ Yehowa pʋyʋ yɔ tɩ-hɔɔlʋʋ nakʋyʋ yɔ, pɩwɛɛ se palɩzɩ* ɛyʋ* ɛnʋ ɛ-samaɣ taa.”»

22 Yehowa tasɩ yɔɔdɩnʋʋ Moyizi nɛ eheyi-i se: 23 «Heyi Izrayɛɛlɩ mba se: “Pɩtɩha nʋmɔʋ se ɩtɔɔ num nabʋyʋ:+ nɔ num, yaa ɛyaʋ num, yaa pʋnʋ num. 24 Ɩpɩzɩɣ nɛ ɩkpaɣ kpɩnɛ nɖɩ pana-ɖɩ ɖɩsɩba yɔ ɖi-num yaa nɖɩ kpɩnɛ lɛɛɖɛ kʋ-ɖɩ yɔ ɖi-num nɛ ɩlabɩnɩ mbʋ ɩsɔɔlaa yɔ, ɛlɛ pɩtɩpɔzɩ kaaʋ se ɩtɔɔ-pʋ.+ 25 Mbʋ pʋyɔɔ yɔ, ye nɔɔyʋ ɛtɔɔ kpɩnɛ nɖɩ ewonaa se pañaɣzɩ-ɖɩ miŋ Yehowa yɔ ɖi-num yɔ, pɩwɛɛ se palɩzɩ-ɩ* ɛ-samaɣ taa.

26 «“Pɩtɩmʋna se ɩtɔɔ calɩm nabʋyʋ+ mɩ-ɖɩjaɣyɛ naɖɩyɛ taa, paa pɩtɩɩkɛ sumaɣ calɩm yaa kpɩnɛ calɩm yɔ. 27 Ɛyʋ* weyi ɛtɔkɩ calɩm nabʋyʋ yɔ, pɩwɛɛ se palɩzɩ-ɩ*+ ɛ-samaɣ taa.”»

28 Yehowa tasɩ yɔɔdɩnʋʋ Moyizi nɛ eheyi-i se: 29 «Heyi Izrayɛɛlɩ mba se: “Weyi ɛlaɣ ɛ-laŋhɛzɩyɛ kɩlaʋ Yehowa yɔ, pɩwɛɛ se ɛlɩzɩ ɛ-laŋhɛzɩyɛ kɩlaʋ hɔɔlʋʋ nakʋyʋ nɛ ɛha Yehowa.+ 30 Pɩwɛɛ se ɛ-maɣmaɣ ewoni kpɩnɛ num+ nɛ ɖɩ-laŋɩyɛ nɛ pɩkɛnɩ kɩlaʋ ŋgʋ pañaɣzɩɣ-kʋ miŋ Yehowa yɔ, nɛ efiɣdi-kʋ nɛ pɩkɛ kɩlaʋ kifiɣduu+ Yehowa ɛsɩndaa. 31 Cɔjɔ kaɣ ñaɣzʋʋ num altaaru yɔɔ nɛ ñɔsɩ kpa,+ ɛlɛ laŋɩyɛ kaɣ kɛʋ Aarɔɔnɩ nɛ ɛ-pɩyalaa pa-pʋyʋ.+

32 «“Ɩkaɣ lɩzʋʋ nɩwaŋ yuye mɩ-laŋhɛzɩyɛ kɩlaŋ yɔɔ nɛ ɩcɛlɩ cɔjɔ se pɩkɛ hɔɔlʋʋ kiɖeɖeu.+ 33 Aarɔɔnɩ pɩyalʋ weyi ɛlaɣ laŋhɛzɩyɛ kɩlaŋ kpɩna calɩm nɛ num yɔ, ɛnʋ kaɣnɩ mʋʋ nɩwaŋ yuye nɛ ɖɩkɛ ɛ-pʋyʋ.+ 34 Mbʋ pʋyɔɔ yɔ, malɩzɩɣ Izrayɛɛlɩ mba laŋhɛzɩyɛ kɩlaŋ taa kɩlaʋ kifiɣduu laŋɩyɛ nɛ hɔɔlʋʋ kiɖeɖeu yuye nɛ mɛncɛlɩ cɔjɔ Aarɔɔnɩ nɛ ɛ-pɩyalaa; pɩkɛ tamtam paɣtʋ Izrayɛɛlɩ mba.+

35 «“Hɔɔlʋʋ ŋgʋ pɩwɛɛ se palɩzɩ Yehowa kɩlaŋ weyi pañaɣzɩɣ miŋ yɔ ɩ-taa, nɛ pɩwɛɛ se pasɩɩ-kʋ kɩjaʋ nɛ pɩkɛ cɔjɔnaa pʋyʋ, Aarɔɔnɩ nɛ ɛ-pɩyalaa pa-pʋyʋ, kɩyakʋ ŋgʋ ɛlɩzɩ-wɛ se pala cɔjɔtʋ tʋmɩyɛ Yehowa yɔ.+ 36 Yehowa ɖʋ paɣtʋ se palɩzɩ hɔɔlʋʋ ŋgʋ Izrayɛɛlɩ mba kɩlaŋ yɔɔ nɛ pɛcɛlɩ-wɛ, kɩyakʋ ŋgʋ ɛta-wɛ num yɔ.+ Pɩkɛnɩ tamtam paɣtʋ pa nɛ pa-lʋlʋʋ taa mba.”»

37 Paɣtʋ ndʋ paɖʋ kɩlaʋ kɩñaɣzʋʋ,+ tɔɔnaɣ pee kɩlaʋ,+ kɩwɛɛkɩm yɔɔ kɩlaʋ,+ wɛɛ ɖɔʋ kɩlaʋ,+ cɔjɔtʋ tʋmɩyɛ paɣzʋʋ kɩlaʋ+ nɛ laŋhɛzɩyɛ kɩlaʋ+ yɔɔ yɔ ndʋ lɛ, 38 ɛzɩ Yehowa ɖʋʋ Moyizi paɣtʋ Sinayii Pʋʋ taa,+ kɩyakʋ ŋgʋ ɛɖʋ paɣtʋ Izrayɛɛlɩ mba Sinayii kañɩmbusuu taa se pɔkɔnɩ pa-kɩlaŋ Yehowa yɔ.+

8 Yehowa tasɩ yɔɔdɩnʋʋ Moyizi nɛ eheyi-i se: 2 «Kpaɣ Aarɔɔnɩ nɛ ɛ-pɩyalaa,+ tokonaa,+ ŋgee num,+ kɩwɛɛkɩm yɔɔ kɩlaʋ nɔ abalɩñɩnʋ, ɛyaŋ ɛnɩ ɩ-naalɛ nɛ kpɔnɔnaa mba pa-taa patɩɖʋ lɔlɔm yɔ+ pɔ-ɖɔkʋ, 3 nɛ ŋkpeɣli samaɣ kpeekpe kediɣzaɣ kizinziku nɔnɔɔ taa.»

4 Nɛ Moyizi la ɖeyi ɖeyi ɛzɩ Yehowa ɖʋʋ-ɩ paɣtʋ yɔ, nɛ samaɣ kpeɣli kediɣzaɣ kizinziku nɔnɔɔ taa. 5 Ðɩnɛ ɛlɛ Moyizi heyi samaɣ se: «Ɛzʋnɔ Yehowa ɖʋ-ɖʋ paɣtʋ se ɖɩla.» 6 Peeɖe Moyizi ñɔtɩ Aarɔɔnɩ nɛ ɛ-pɩyalaa nɛ ɛsɔ-wɛ lɩm.+ 7 Pʋwayɩ lɛ, esuu Aarɔɔnɩ toko kɩɖaɣlʋʋ,+ ɛtamɩ-ɩ kɩtamʋʋ,+ esuu-i toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ,+ nɛ ɛlaɣyɩ efoodɩ+ ɛ-yɔɔ nɛ ɛtam-kʋ nɛ kɩ-tambaɖɛ* nɖɩ palʋwa yɔ,+ nɛ ɛhɔkɩ-kʋ camɩyɛ ɛ-yɔɔ. 8 Pʋwayɩ lɛ, ɛtɩnɩ ɛ-yɔɔ laŋɩyɛ taa kabʋa+ nɛ ɛɖʋ Uriim nɛ Tuumiim+ laŋɩyɛ taa kabʋa ŋga ka-taa. 9 Nɛ etemi-i ŋgee ñʋʋ kitemuu,+ nɛ ɛɖʋ ñʋʋ kitemuu ŋgʋ kɩ-ɛsɩndaa sika wonuu ŋgʋ kɩwɛ tayɩ nɛ kɩñɩlɩsɩɣ yɔ, ŋgʋ kɩkɛ tɩ haʋ yʋsaɣ kiɖeɖeɣa*+ yɔ, ɛzɩ Yehowa kaaɖʋʋ paɣtʋ Moyizi yɔ.

10 Pʋwayɩ lɛ, Moyizi kpaɣ ŋgee num nɛ ɛtaa Ɛsɔ sɛtʋ kɩɖanɖʋʋ nɛ mbʋ payɩ pɩɩwɛ kɩ-tɛɛ yɔ+ nɛ ɛpɩsɩ kɩ nɛ kɩ-tɛɛ wondu kele kele. 11 Pʋwayɩ lɛ, ɛmɩzɩ num mbʋ pɩ-hɔɔlʋʋ nakʋyʋ altaaru yɔɔ tam 7 nɛ ɛtaa-pʋ altaaru nɛ ki-wondu tɩŋa nɛ ñanaɣ sɔsɔɔ nɛ ka-ɖɩdɩnɩyɛ, se ɛpɩsɩ pɩtɩŋa kele kele. 12 Kɛdɛzaɣ ɖeɖe lɛ, ɛpɩyɩ ŋgee num mbʋ pɩ-hɔɔlʋʋ nakʋyʋ Aarɔɔnɩ ñʋʋ taa nɛ ɛtaa-ɩ num se ɛpɩsɩ-ɩ kele kele.+

13 Pʋwayɩ lɛ, Moyizi ñɔtɩ Aarɔɔnɩ pɩyalaa nɛ esuu-wɛ tokonaa kɩɖaɣlaa nɛ ɛtam-wɛ kɩtamɩŋ nɛ ete* pa-ñʋŋ kitemiŋ,+ ɛzɩ Yehowa kaaɖʋʋ paɣtʋ Moyizi yɔ.

14 Nɛ ɛkɔnɩ kɩwɛɛkɩm yɔɔ kɩlaʋ nɔ abalɩñɩnʋ, nɛ Aarɔɔnɩ nɛ ɛ-pɩyalaa patɩnɩ pe-nesi kɩwɛɛkɩm yɔɔ kɩlaʋ nɔ+ ɛnʋ ɛ-ñʋʋ taa. 15 Moyizi kʋ-ɩ nɛ elii e-niye ɛ-calɩm taa+ nɛ ɛtaa-pʋ altaaru hɩŋ tɩŋa yɔɔ, nɛ ɛpɩsɩ altaaru kele kele, ɛlɛ calɩm mbʋ pɩkazaa yɔ ɛpɩyɩ-pʋ altaaru tɛɛ se ɛpɩsɩ-kʋ kele kele nɛ pala kɩwɛɛkɩm yɔɔ huuzuu sɔnzɩ kɩ-yɔɔ. 16 Pʋwayɩ lɛ, Moyizi kpaɣ num mbʋ payɩ pɩwɛ lotu yɔɔ yɔ, num mbʋ pɩwɛ hɔyɛ yɔɔ yɔ, nɛ tɩzɩsɩ nɛ num mbʋ pɩwɛ sɩ-naalɛ sɩ-yɔɔ yɔ, nɛ ɛñaɣzɩ pɩtɩŋa altaaru yɔɔ nɛ ñɔsɩ kpa.+ 17 Pʋwayɩ lɛ, Moyizi yele nɛ pañaɣzɩ miŋ nɔ ɛnʋ ɛ-hɔɔlʋʋ ŋgʋ kɩkazaa yɔ, ɛ-tɔnɛ, ɛ-nandʋ nɛ ɛ-pɩndʋ ɖigbeɣliye* wayɩ,+ ɛzɩ Yehowa kaaɖʋʋ-ɩ paɣtʋ yɔ.

18 Pʋwayɩ lɛ, ɛkɔnɩ kɩlaʋ kɩñaɣzʋʋ ɛyaʋ, nɛ Aarɔɔnɩ nɛ ɛ-pɩyalaa patɩnɩ pe-nesi kɩ-ñʋʋ yɔɔ.+ 19 Ðɩnɛ ɛlɛ Moyizi kʋ-kʋ nɛ ɛmɩzɩ kɩ-calɩm altaaru kpɛnzɩ tɩŋa yɔɔ. 20 Pehizi ɛyaʋ ŋgʋ nanʋʋ nanʋʋ; nɛ Moyizi ñaɣzɩ ñʋʋ, nandʋ nɛ num* nɛ ñɔsɩ kpa. 21 Pañalɩ lotu nɛ acaa nɛ lɩm, nɛ Moyizi ñaɣzɩ ɛyaʋ tɩŋa altaaru yɔɔ nɛ ñɔsɩ kpa. Kɩɩkɛ kɩlaʋ kɩñaɣzʋʋ nɛ kɩlɩɣaɣ sɔzɩŋ camɩyɛ.* Kɩɩkɛ kɩlaʋ ŋgʋ pañaɣzɩ-kʋ miŋ Yehowa yɔ, ɛzɩ Yehowa kaaɖʋʋ paɣtʋ Moyizi yɔ.

22 Pʋwayɩ lɛ, ɛkɔnɩ ɛyaʋ 2 ñɩŋgʋ, cɔjɔtʋ tʋmɩyɛ paɣzʋʋ+ ɛyaʋ, nɛ Aarɔɔnɩ nɛ ɛ-pɩyalaa patɩnɩ pe-nesi ɛyaʋ ŋgʋ kɩ-ñʋʋ yɔɔ.+ 23 Moyizi kʋ-kʋ nɛ ecozi kɩ-calɩm nɛ ɛtaa-pʋ Aarɔɔnɩ nɩwaŋ naŋgbaɖɛɣtʋ yɔɔ, ɛ-nɩwaŋ niye abalɩñɩnɖɛ yɔɔ nɛ ɛ-nɩwaŋ nimbiye abalɩñɩnɖɛ yɔɔ. 24 Pʋwayɩ lɛ, Moyizi ñɔtɩ Aarɔɔnɩ pɩyalaa nɛ ɛtaa calɩm mbʋ pɩ-hɔɔlʋʋ nakʋyʋ pa-nɩwaŋ naŋgbaɖɛɣtʋ yɔɔ, pa-nɩwaŋ niye abalɩñɩnɖɛ yɔɔ, nɛ pa-nɩwaŋ nimbiye abalɩñɩnɖɛ yɔɔ; ɛlɛ Moyizi mɩzɩ calɩm mbʋ pɩkazaa yɔ altaaru kpɛnzɩ tɩŋa yɔɔ.+

25 Pʋwayɩ lɛ, ɛkpaɣ num, suu num ñɩŋgʋ, num mbʋ payɩ pɩɩwɛ lotu yɔɔ yɔ, hɔyɛ yɔɔ num, tɩzɩsɩ nzɩ sɩ-naalɛ nɛ sɩ-yɔɔ num nɛ nɩwaŋ yuye.+ 26 Ɛlɩzɩ kpɔnɔnaa mba pa-taa patɩɖʋ lɔlɔm yɔ pɔ-ɖɔkʋ ŋgʋ kɩɩwɛ Yehowa ɛsɩndaa yɔ kɩ-taa kpɔnɔ kʋɖʋmʋʋ ŋgʋ kɩ-taa patɩɖʋ lɔlɔm nɛ kɩwɛɛ kulukulu kokooye tɩyɛ yɔ,+ kpɔnɔ kʋɖʋmʋʋ ŋgʋ palabɩ-kʋ nɛ num nɛ kɩwɛ kulukulu kokooye tɩyɛ yɔ+ nɛ kpɔnɔ kʋɖʋmʋʋ ŋgʋ kɩwɛ tatayaa yɔ. Nɛ ɛtɩnɩ-wɛ num nɛ nɩwaŋ yuye yɔɔ. 27 Pʋwayɩ lɛ, ɛtaɣ pɩtɩŋa Aarɔɔnɩ nandasɩ taa nɛ ɛ-pɩyalaa nandasɩ taa, nɛ ɛpaɣzɩ pɩtɩŋa fiɣduu ɛzɩ kɩlaʋ kifiɣduu yɔ Yehowa ɛsɩndaa. 28 Pʋwayɩ lɛ, Moyizi kʋsɩ pɩtɩŋa pe-nesi taa nɛ ɛñaɣzɩ miŋ altaaru yɔɔ, kɩlaʋ kɩñaɣzʋʋ yɔɔ nɛ ñɔsɩ kpa. Pɩɩkɛ cɔjɔtʋ tʋmɩyɛ paɣzʋʋ kɩlaʋ nɛ kɩlɩɣaɣ sɔzɩŋ camɩyɛ.* Pɩɩkɛ kɩlaʋ ŋgʋ pañaɣzɩ-kʋ miŋ Yehowa yɔ.

29 Nɛ Moyizi kpaɣ laŋɩyɛ nɛ efiɣdi-ɖɩ ɛzɩ kɩlaʋ kifiɣduu yɔ Yehowa ɛsɩndaa.+ Cɔjɔtʋ tʋmɩyɛ paɣzʋʋ ɛyaʋ laŋɩyɛ pɩsɩ Moyizi pʋyʋ, ɛzɩ Yehowa kaaɖʋʋ paɣtʋ Moyizi yɔ.+

30 Nɛ Moyizi cozi ŋgee num+ nɛ calɩm mbʋ pɩɩwɛ altaaru yɔɔ yɔ nɛ ɛmɩzɩ-pʋ Aarɔɔnɩ nɛ e-tokonaa yɔɔ, ɛmɩzɩ-pʋ ɖɔɖɔ Aarɔɔnɩ pɩyalaa mba paawɛ ɛ-cɔlɔ yɔ pɔ-yɔɔ nɛ po-tokonaa yɔɔ. Mbʋ ɛpɩsɩ Aarɔɔnɩ nɛ e-tokonaa kele kele nɛ ɛpɩsɩ ɖɔɖɔ Aarɔɔnɩ pɩyalaa+ nɛ po-tokonaa kele kele.+

31 Nɛ Moyizi heyi Aarɔɔnɩ nɛ ɛ-pɩyalaa se: «Ɩtɩzɩ+ nandʋ kediɣzaɣ kizinziku nɔnɔɔ taa, nɛ peeɖe ɩkaɣ-tʋ tɔɔʋ, pɩkpɛndɩnɩ kpɔnɔ ŋgʋ kɩwɛ cɔjɔtʋ tʋmɩyɛ paɣzʋʋ ɖɔkʋ taa yɔ; ɛzɩ paaɖʋʋ-m paɣtʋ yɔ: “Aarɔɔnɩ nɛ ɛ-pɩyalaa pakaɣ-tʋ tɔɔʋ.”+ 32 Pɩwɛɛ se ɩsɔ miŋ nandʋ ndʋ tɩkazɩɣ yɔ nɛ kpɔnɔ ŋgʋ kɩkazɩɣ yɔ.+ 33 Pɩfɛyɩ se ɩkʋyɩnɩ kediɣzaɣ kizinziku nɔnɔɔ taa nɛ ɩlɩɩnɩ awayɩ pʋcɔ nɛ kɩyakɩŋ 7 tɛ, pɩkɔɔ pɩtalɩ alɩwaatʋ ndʋ kɩyakɩŋ weyi pɩwɛɛ se pakpaɣ nɛ pasɩɩnɩ-mɩ cɔjɔtʋ tʋmɩyɛ taa yɔ ɩtɛma yɔ, mbʋ pʋyɔɔ yɔ kɩyakɩŋ 7 pɩpɔzʋʋ se pakpaɣ nɛ pasɩɩnɩ-mɩ cɔjɔtʋ tʋmɩyɛ taa.+ 34 Yehowa ɖʋ paɣtʋ se ɖɩla mbʋ ɖɩlabɩ sɔnɔ yɔ nɛ pihuuzi mɩ-kɩwɛɛkɩm yɔɔ.+ 35 Ɩkaɣ caɣʋ kediɣzaɣ kizinziku nɔnɔɔ taa kɩyakɩŋ 7,+ wɩsɩ nɛ ɖoo, nɛ ɩla mbʋ Yehowa pɔzʋʋ-mɩ se ɩla yɔ,+ ɖɩnɛ ɛlɛ ɩɩsɩkɩ; mbʋ pʋyɔɔ yɔ mbʋ paɖʋ-m paɣtʋ.»

36 Nɛ Aarɔɔnɩ nɛ ɛ-pɩyalaa pɔɖɔ paɣtʋ ndʋ Yehowa tɩŋnɩ Moyizi yɔɔ nɛ ɛɖʋ yɔ tɩ-tɩŋa tɩ-yɔɔ.

9 Kɩyakʋ 8 ñɩŋgʋ wiye lɛ,+ Moyizi yaa Aarɔɔnɩ nɛ ɛ-pɩyalaa nɛ Izrayɛɛlɩ ɛzʋtʋyaa. 2 Eheyi Aarɔɔnɩ se: «Kpaɣ kɩwɛɛkɩm yɔɔ kɩlaʋ neɣye naɖɩyɛ+ nɛ kɩlaʋ kɩñaɣzʋʋ ɛyaʋ nakʋyʋ nɛ ŋkɔnɩ Yehowa ɛsɩndaa; kpɩna ana ataawɛɛnɩ ɛjandʋ natʋyʋ. 3 Ɛlɛ pɩwɛɛ se ŋheyi Izrayɛɛlɩ mba se: “Ɩkpaɣ kɩwɛɛkɩm yɔɔ kɩlaʋ tuluu nakʋyʋ. Ɩkpaɣ ɖɔɖɔ neɣye naɖɩyɛ nɛ ɛyaʋ nakʋyʋ nɛ ɩlaanɩ kɩlaʋ kɩñaɣzʋʋ, kpɩna ana a-taa paa nɖɩ ɛwɛɛnɩ pɩnaɣ kʋɖʋmaɣ, ataawɛɛnɩ ɛjandʋ natʋyʋ, 4 nɛ ɩkpaɣ ɖɔɖɔ laŋhɛzɩyɛ kɩlaʋ nɔ abalɩñɩnʋ nɔɔyʋ nɛ laŋhɛzɩyɛ kɩlaʋ+ ɛyaʋ nakʋyʋ, nɛ ɩlaa kpɩna ana Yehowa ɛsɩndaa, nɛ tɔɔnaɣ pee kɩlaʋ+ ŋgʋ pesidini num yɔ, mbʋ pʋyɔɔ yɔ Yehowa kaɣ-mɩ wɩlʋʋ ɛ-tɩ sɔnɔ.”»+

5 Ðɩnɛ ɛlɛ powoni mbʋ Moyizi ɖʋ-wɛ paɣtʋ se powona yɔ kediɣzaɣ kizinziku ɛsɩndaa. Nɛ samaɣ kpeekpe ñɔtɩ ka-tɩ nɛ kasɩŋ Yehowa ɛsɩndaa. 6 Nɛ Moyizi yɔɔdɩ se: «Pʋnɛ Yehowa ɖʋ-mɩ paɣtʋ se ɩla, se pɩsa nɛ ɩna Yehowa samtʋ.»+ 7 Pʋwayɩ lɛ, Moyizi heyi Aarɔɔnɩ se: «Ñɔtɩnɩ altaaru nɛ ŋlaa ña-kɩwɛɛkɩm yɔɔ kɩlaʋ+ nɛ ña-kɩlaʋ kɩñaɣzʋʋ, nɛ pihuuzi ña-kɩwɛɛkɩm yɔɔ+ nɛ ña-ɖɩɣa kɩwɛɛkɩm yɔɔ; nɛ ŋlaa ɖɔɖɔ samaɣ kɩlaʋ,+ nɛ pihuuzi ka-kɩwɛɛkɩm yɔɔ,+ ɛzɩ Yehowa kaaɖʋʋ paɣtʋ yɔ.»

8 Nɛ Aarɔɔnɩ ñɔtɩnɩ altaaru kpaagbaa nɛ ɛkʋ ɛ-kɩwɛɛkɩm yɔɔ kɩlaʋ neɣye.+ 9 Pʋwayɩ lɛ, Aarɔɔnɩ pɩyalaa woni-i ɖɩ-calɩm,+ nɛ elii e-niye pɩ-taa nɛ ɛtaa-pʋ altaaru hɩŋ yɔɔ, nɛ ɛpɩyɩ calɩm mbʋ pɩkazaa yɔ altaaru tɛɛ.+ 10 Nɛ ɛñaɣzɩ kɩwɛɛkɩm yɔɔ kɩlaʋ kpɩnɛ num, ɖɩ-tɩzɩsɩ nɛ ɖɩ-hɔyɛ yɔɔ num altaaru yɔɔ nɛ ñɔsɩ kpa, ɛzɩ Yehowa kaaɖʋʋ paɣtʋ Moyizi yɔ.+ 11 Nɛ ɛsɔ miŋ ɖɩ-nandʋ nɛ ɖɩ-tɔnɛ ɖigbeɣliye* wayɩ.+

12 Pʋwayɩ lɛ, ɛkʋ kɩlaʋ kɩñaɣzʋʋ kpɩnɛ, nɛ Aarɔɔnɩ pɩyalaa cɛlɩ-ɩ ɖɩ-calɩm, nɛ ɛmɩzɩ-pʋ altaaru kpɛnzɩ tɩŋa yɔɔ.+ 13 Pɛcɛlɩ-ɩ kɩlaʋ kɩñaɣzʋʋ nandʋ ndʋ pehizaa yɔ nɛ pɩkpɛndɩnɩ ñʋʋ, nɛ ɛñaɣzɩ-wɛ altaaru yɔɔ nɛ ñɔsɩ kpa. 14 Pɩtasɩ lɛ, ɛñalɩ lotu nɛ acaa nɛ ɛñaɣzɩ pɩtɩŋa kɩlaʋ kɩñaɣzʋʋ yɔɔ, altaaru yɔɔ nɛ ñɔsɩ kpa.

15 Pʋwayɩ lɛ, ɛlaa samaɣ kɩlaʋ. Ɛkpaɣ samaɣ kɩwɛɛkɩm yɔɔ kɩlaʋ pʋnʋ nɛ ɛkʋ-ɩ nɛ ɛlaanɩ kɩwɛɛkɩm yɔɔ kɩlaʋ, ɛzɩ ɛɛlabʋ kajalaɣ kpɩnɛ yɔ. 16 Nɛ ɛlaa kɩlaʋ kɩñaɣzʋʋ, ɛla-kʋ ɛzɩ paɣtʋ pɔzʋʋ yɔ.+

17 Pʋwayɩ lɛ, ɛlaa tɔɔnaɣ pee kɩlaʋ;+ ecozi-kʋ nɛ pisu e-nikpiɖe taa nɛ ɛñaɣzɩ-kʋ altaaru yɔɔ nɛ ñɔsɩ kpa, pɩtasɩnɩ tanaŋ tɛɛ kɩlaʋ kɩñaɣzʋʋ.+

18 Pʋwayɩ lɛ, ɛkʋ nɔ abalɩñɩnʋ nɛ ɛyaʋ nɛ ɛlaanɩ samaɣ laŋhɛzɩyɛ kɩlaʋ. Nɛ Aarɔɔnɩ pɩyalaa cɛlɩ-ɩ calɩm, nɛ ɛmɩzɩ-pʋ altaaru kpɛnzɩ tɩŋa yɔɔ nɛ pɩcɔɔ pɩta.+ 19 Piyele nɛ nɔ abalɩñɩnʋ ɛnʋ e-num,+ ɛyaʋ ŋgʋ ki-suu num ñɩŋgʋ, num mbʋ pɩpɔ lotu yɔɔ yɔ, tɩzɩsɩ nɛ hɔyɛ yɔɔ num lɛ,+ 20 patɩnɩ num mbʋ pɩtɩŋa laŋa yɔɔ; pʋwayɩ lɛ, ɛñaɣzɩ num mbʋ altaaru yɔɔ nɛ ñɔsɩ kpa.+ 21 Ɛlɛ Aarɔɔnɩ fiɣdi laŋa nɛ nɩwaŋ yuye ɛzɩ kɩlaʋ kifiɣduu yɔ Yehowa ɛsɩndaa, ɛzɩ Moyizi ɖʋʋ paɣtʋ yɔ.+

22 Nɛ Aarɔɔnɩ kpazɩ e-nesi nɛ samaɣ yɔɔ kiŋ nɛ ɛwazɩ-kɛ;+ ɛla kɩwɛɛkɩm yɔɔ kɩlaʋ, kɩlaʋ kɩñaɣzʋʋ nɛ laŋhɛzɩyɛ kɩlaŋ nɛ pɩtɛ lɛ, ɛɖɛɛ nɛ etii. 23 Kɛdɛzaɣ ɖeɖe lɛ, Moyizi nɛ Aarɔɔnɩ pasʋʋ kediɣzaɣ kizinziku tɛɛ nɛ palɩɩ nɛ pawazɩ samaɣ.+

Ðɩnɛ ɛlɛ, samaɣ kpeekpe na Yehowa samtʋ,+ 24 nɛ miŋ lɩɩnɩ Yehowa cɔlɔ+ nɛ ɛpaɣzɩ ñaɣʋ kɩlaʋ kɩñaɣzʋʋ nɛ num altaaru yɔɔ. Samaɣ taa ɛyaa kpeekpe na mbʋ lɛ, papaɣzɩ kubusi mabʋ nɛ poluŋ nɛ papa pɛ-ɛsa nɛ tɛtʋ.+

10 Pʋwayɩ lɛ, Aarɔɔnɩ pɩyalaa Naadaabʋ nɛ Abihu+ pa-taa paa weyi kpaɣ e-miŋ ñanaɣ nɛ ɛhaa miŋ ka-taa nɛ ɛɖʋ ŋgee tɩlaaɖɩ+ miŋ ɛnɩ ɛ-taa. Nɛ powoni Yehowa ɛsɩndaa miŋ weyi pɩtɩha-wɛ nʋmɔʋ se powona yɔ,+ miŋ weyi ɛtɩpɔzɩ-wɛ yɔ. 2 Ðɩnɛ ɛlɛ, miŋ nɩɩyɩ lɩɩnɩ Yehowa cɔlɔ nɛ ɛñaɣ-wɛ+ nɛ pasɩ Yehowa ɛsɩndaa.+ 3 Nɛ Moyizi heyi Aarɔɔnɩ se: «Tɔm tʋnɛ Yehowa kaayɔɔdaa: “Pɩwɛɛ se mba pɔñɔtɩnɩ-m yɔ pɔtɔzɩ se mɛnkɛ kiɖeɖeu,+ nɛ pakaɣ-m sam samaɣ kpeekpe ɛsɩndaa.”» Nɛ Aarɔɔnɩ su tamɩyɛ.

4 Nɛ Moyizi yaa Aarɔɔnɩ caa neu Uziyɛɛlɩ+ pɩyalaa Misaayɛɛlɩ nɛ Elzafaanɩ, nɛ eheyi-wɛ se: «Ɩkɔɔ nɛ ɩkpaɣ mi-koobiya lone kiɖeɖeye ɛsɩndaa nɛ iwoni-wɛ ɖigbeɣliye* wayɩ lone naɖɩyɛ taa.» 5 Nɛ pɔkɔɔ pakpaɣ abalaa mba, paba kaawɛ po-tokonaa kɩɖaɣlaa taa mbʋ, nɛ palɩnɩ-wɛ ɖigbeɣliye* wayɩ lone naɖɩyɛ taa, ɛzɩ Moyizi kaaheyuu-wɛ yɔ.

6 Ðɩnɛ ɛlɛ Moyizi heyi Aarɔɔnɩ nɛ ɛ-pɩyalaa lalaa, Eleyaazaarɩ nɛ Itamaarɩ se: «Itaayele mɩ-ñɔsɩ ñɔɔzʋʋ nɛ ɩtaacɩyɩ mi-tokonaa,+ ɖɩnɛ ɛlɛ ɩɩkaɣ sɩbʋ nɛ Ɛsɔ ɛɛkaɣ pana kɔʋ nɛ samaɣ kpeekpe. Mi-koobiya, Izrayɛɛlɩ ɖɩɣa kpeekpe kaɣ wiu mba Yehowa kʋ-wɛ nɛ miŋ yɔ. 7 Pɩfɛyɩ se ɩkʋyɩnɩ kediɣzaɣ kizinziku nɔnɔɔ taa nɛ ɩlɩɩnɩ awayɩ, pɩtɩkɛ mbʋ yɔ ɩkaɣ sɩbʋ, mbʋ pʋyɔɔ yɔ Yehowa ŋgee num wɛ mɩ-yɔɔ.»+ Nɛ pɔɖɔ Moyizi tɔm yɔɔ.

8 Nɛ Yehowa heyi Aarɔɔnɩ se: 9 «Ña nɛ ña-pɩyalaa ɩtaañɔɔ vɛɛ yaa sʋlʋm lɛɛbʋ nabʋyʋ mbʋ pɩkʋʋ ɛyʋ yɔ nɛ ɩkɔɔ kediɣzaɣ kizinziku tɛɛ,+ ɖɩnɛ ɛlɛ ɩɩkaɣ sɩbʋ. Pɩkɛnɩ tamtam paɣtʋ mɩ nɛ mɩ-lʋlʋʋ taa mba. 10 Piyeki nɛ ɩɖʋ tʋkaɣ pʋyʋ kiɖeɖeu nɛ mbʋ pɩtɩkɛ kiɖeɖeu yɔ pɩ-hɛkʋ taa, nɛ azuluma pʋyʋ nɛ mbʋ pɩwɛ kele kele yɔ pɩ-hɛkʋ taa,+ 11 nɛ ɩwɩlɩ Izrayɛɛlɩ mba paɣtʋ ndʋ payɩ Yehowa tɩŋnɩ Moyizi yɔɔ nɛ ɛɖʋ-wɛ yɔ.»+

12 Nɛ Moyizi heyi Aarɔɔnɩ nɛ ɛ-pɩyalaa mba pɩkazaa yɔ, Eleyaazaarɩ nɛ Itamaarɩ se: «Yehowa kɩlaŋ weyi pañaɣzɩɣ miŋ yɔ ɩ-taa lɛ, ɩkpaɣ mbʋ pɩkazɩ tɔɔnaɣ pee kɩlaʋ taa yɔ nɛ ɩtɔɔ-pʋ ɛzɩ kpɔnɔ ŋgʋ kɩ-taa patɩɖʋ lɔlɔm yɔ altaaru cɔlɔ,+ mbʋ pʋyɔɔ yɔ pɩkɛ pʋyʋ kiɖeɖeu siŋŋ.+ 13 Pɩwɛɛ se ɩtɔɔ-pʋ lone kiɖeɖeye naɖɩyɛ taa,+ mbʋ pʋyɔɔ yɔ pɩkɛ ña nɛ ña-pɩyalaa mi-ɖeɖe Yehowa kɩlaŋ weyi pañaɣzɩɣ miŋ yɔ ɩ-taa, mbʋ pʋyɔɔ yɔ paɣtʋ ndʋ paɖʋ-m. 14 Pɩwɛɛ se ña nɛ ña-pɩyalaa nɛ ñɛ-pɛlaa+ ɩtɔɔ ɖɔɖɔ kɩlaʋ kifiɣduu laŋɩyɛ nɛ hɔɔlʋʋ kiɖeɖeu yuye+ lone cɩɖɩ cɩɖɩ ñɩnɖɛ naɖɩyɛ taa, mbʋ pʋyɔɔ yɔ pɛcɛlɩ-mɩ hɔɔlɩŋ ɛnɩ se ɩkɛnɩ ña nɛ ña-pɩyalaa mi-ɖeɖe Izrayɛɛlɩ mba laŋhɛzɩyɛ kɩlaŋ taa. 15 Pakaɣ kɔnʋʋ hɔɔlʋʋ kiɖeɖeu yuye nɛ kɩlaʋ kifiɣduu laŋɩyɛ nɛ pɩkpɛndɩnɩ num kɩlaŋ weyi pañaɣzɩɣ miŋ yɔ nɛ pefiɣdi kɩlaʋ kifiɣduu Yehowa ɛsɩndaa; nɛ kɩkaɣ kɛʋ ña nɛ ña-pɩyalaa mi-ɖeɖe tam,+ ɛzɩ Yehowa ɖʋʋ paɣtʋ yɔ.»

16 Nɛ Moyizi ñɩnɩ kɩwɛɛkɩm yɔɔ kɩlaʋ pʋnʋ+ siŋŋ, nɛ ɛkɔɔ ɛna se pañaɣzɩ-ɩ miŋ. Nɛ ɛ-taa wɩɩnɩ Eleyaazaarɩ nɛ Itamaarɩ, Aarɔɔnɩ pɩyalaa mba pakazaa yɔ, nɛ ɛpɔzɩ-wɛ se: 17 «Ɛbɛ yɔɔ ɩtɩtɔɔ kɩwɛɛkɩm yɔɔ kɩlaʋ nandʋ lone kiɖeɖeye taa,+ ŋgʋ nandʋ ndʋ tɩkɛ pʋyʋ kiɖeɖeu siŋŋ nɛ ɛcɛlɩ-mɩ tʋ se pɩsa nɛ ɩsɩɣlɩ samaɣ kɩwɛɛkɩm nɛ ɩla nɛ pihuuzi ka-kɩwɛɛkɩm yɔɔ Yehowa ɛsɩndaa? 18 Ɩna! Patɩsʋnɩ kɩ-calɩm lone kiɖeɖeye taa.+ Pɩɩwɛɛ se ɩtɔɔ kɩ-nandʋ lone kiɖeɖeye taa, ɛzɩ paɖʋʋ-m paɣtʋ yɔ.» 19 Aarɔɔnɩ cosi Moyizi se: «Na! Pala pa-kɩwɛɛkɩm yɔɔ kɩlaʋ nɛ pa-kɩlaʋ kɩñaɣzʋʋ Yehowa ɛsɩndaa sɔnɔ,+ ɛlɛ pɩtɩŋa mbʋ yɔ pɩtalɩ-m. Ye maatɔɔ kɩwɛɛkɩm yɔɔ kɩlaʋ nandʋ sɔnɔ, pɩɩkɛdɩnɩ Yehowa yaa we?» 20 Moyizi nɩ mbʋ lɛ, ɛ-laŋɩyɛ hɛɛ.

11 Ðɩnɛ ɛlɛ, Yehowa heyi Moyizi nɛ Aarɔɔnɩ se: 2 «Iheyi Izrayɛɛlɩ mba se: “Tɛtʋ yɔɔ wondu ndʋ tɩwɛ wezuu yɔ tɩ-taa lɛ,* ndʋ ɩpɩzɩɣ nɛ ɩtɔɔ yɔ ndʋ yɔ:+ 3 Kpɩna wena payɩ a-acaa taa yawa, wena a-acaa taa yawa nɛ pɩkaɖɩ nɛ ahokuu tɔɔnaɣ ŋga atɔwaa yɔ nɛ aɖaɣnɩɣ-kɛ tɔɔʋ yɔ, ɩpɩzɩɣ nɛ ɩtɔɔ-yɛ.

4 «“Ɛlɛ kpɩna anɛ yɔ, wena ahokuu tɔɔnaɣ ŋga atɔwaa yɔ nɛ aɖaɣnɩɣ-kɛ tɔɔʋ yɔ, yaa wena a-acaa taa yawa yɔ, alɛ lɛ ɩtaatɔɔ-yɛ: Aɖaaɖaa, ehokuu tɔɔnaɣ nɛ ɛɖaɣnɩɣ-kɛ tɔɔʋ, ɛlɛ ɛ-acaa taa tɩya. Pɩwɛɛ se ɛkɛ-mɩ mbʋ pɩfɛyɩ kele kele yɔ.+ 5 Kaaŋ taa kozoŋa*+ ɖɔɖɔ, mbʋ pʋyɔɔ yɔ kohokuu tɔɔnaɣ ŋga kɔtɔwaa yɔ nɛ kaɖaɣnɩɣ-kɛ tɔɔʋ, ɛlɛ ka-acaa taa tɩya. Pɩwɛɛ se kɛkɛ-mɩ mbʋ pɩfɛyɩ kele kele yɔ. 6 Kozoŋa ɖɔɖɔ, mbʋ pʋyɔɔ yɔ kohokuu tɔɔnaɣ ŋga kɔtɔwaa yɔ nɛ kaɖaɣnɩɣ-kɛ tɔɔʋ, ɛlɛ ka-acaa taa tɩya. Pɩwɛɛ se kɛkɛ-mɩ mbʋ pɩfɛyɩ kele kele yɔ. 7 Afa+ ɖɔɖɔ, mbʋ pʋyɔɔ yɔ ɛ-acaa taa yawa nɛ pɩkaɖɩ, ɛlɛ eehokuu tɔɔnaɣ ŋga ɛtɔwaa yɔ nɛ ɛɖaɣnɩɣ-kɛ tɔɔʋ. Pɩwɛɛ se ɛkɛ-mɩ mbʋ pɩfɛyɩ kele kele yɔ. 8 Pɩtɩmʋna se ɩtɔɔ kpɩna ana a-taa naɖɩyɛ nandʋ yaa itukuni a-taa naɖɩyɛ tomnaɣ kɩsɩbaɣ. Pɩwɛɛ se akɛ-mɩ mbʋ pɩfɛyɩ kele kele yɔ.+

9 «“Mbʋ payɩ pɩwɛ lɩm taa yɔ pɩ-taa lɛ, mbʋ ɩpɩzɩɣ nɛ ɩtɔɔ yɔ, mbʋ yɔ: Mbʋ payɩ pɩwɛ lɩm taa yɔ, paa pɩtɩɩkɛ teŋgunaa taa yaa pɔsɩ taa, nɛ pɩwɛnɩ ɖɛɣtʋ* nɛ pɔɔyɛɛ yɔ, ɩpɩzɩɣ nɛ ɩtɔɔ-pʋ.+ 10 Ɛlɛ mbʋ pɩwɛ wezuu nɛ pɩkpɛndɩɣ nɛ pɩɖɔŋ wiii yɔ nɛ wondu lɛɛtʋ* ndʋ payɩ tɩwɛ wezuu lɩm taa teŋgunaa taa nɛ pɔsɩ taa yɔ, tɩ-taa mbʋ pɩfɛyɩnɩ ɖɛɣtʋ nɛ pɔɔyɛɛ yɔ, pɩwɛɛ se pɩkɛ-mɩ kʋzɔɔtʋ pʋyʋ. 11 Ɛɛɛ, pɩwɛɛ se kpɩna ana akɛ-mɩ kʋzɔɔtʋ pʋyʋ, nɛ pɩtɩpɔzɩ se ɩtɔɔ a-nandʋ natʋyʋ,+ pɩwɛɛ se ini a-tomnasɩ kɩsɩbasɩ. 12 Mbʋ payɩ pɩwɛ lɩm taa nɛ pɩfɛyɩnɩ ɖɛɣtʋ yaa pɔɔyɛɛ yɔ, pɩwɛɛ se pɩkɛ-mɩ kʋzɔɔtʋ pʋyʋ.

13 «“Sumasɩ nzɩ pɩwɛɛ se ini yɔ, nzɩ yɔ; pɩfɛyɩ se ɩtɔɔ-sɩ, mbʋ pʋyɔɔ yɔ sɩkɛ mbʋ pɩcaɣ kʋzɔɔtʋ yɔ: kpeluu,*+ teŋgu yɔɔ edeɣdiye, abɛntɛ kɩkpɛdʋ,+ 14 makɩyɛ kɩsɛmɖɩyɛ nɛ paa makɩyɛ kɩkpɛɛdɩyɛ nɖɩ, 15 kaŋgala tɩŋa, 16 taataa, kpizuu, teŋgu yɔɔ ehooye, paa makɩyaɣ ŋga, 17 kpizuu cikpeluu, sumaɣ kɩkpɛɛdaɣ ŋga kakpaɣ kpakpasɩ yɔ,* kpizuu ŋgʋ kɩ-nɩŋgbaaŋ ɖaɣlaa yɔ, 18 lɩm yɔɔ kpagbafɩɩ, kpakpalikiyaɣ sɔsɔɔ, abɛntɛ, 19 alɩŋgbayʋ, paa kɩlɛɛʋ ŋgʋ, sumaɣ njooye tʋ nɛ sɛmʋʋ. 20 Mbʋ payɩ pɩwɛnɩ keŋ nɛ pɩkpɛndɩɣ nɛ pɩɖɔŋ wiii nɛ pɩwɛnɩ nɩŋgbanzɩ 4 yɔ, pɩwɛɛ se pɩkɛ-mɩ kʋzɔɔtʋ pʋyʋ.

21 «“Mbʋ pɩwɛnɩ keŋ nɛ pɩkpɛndɩɣ nɛ pɩɖɔŋ wiii nɛ pɩwɛnɩ nɩŋgbanzɩ 4 yɔ pɩ-taa lɛ, mbʋ pɩwɛnɩ nɩŋgbanzɩ kɩɖaɣlɩsɩ 2 se pɩmaanɩ tataa yɔ, pi-ɖeke ɩpɩzɩɣ nɛ ɩtɔɔ. 22 Pɩ-taa mbʋ ɩpɩzɩɣ nɛ ɩtɔɔ yɔ, mbʋ yɔ: kudoloŋ ŋgʋ payɩ kɩyɛlɩɣ yɔ, kudoloŋ lɛɛkʋ ŋgʋ papɩzɩɣ nɛ pɔtɔɔ yɔ,+ nakaŋ nɛ kudoloŋ ŋgʋ kɩmaɣ yɔ. 23 Mbʋ payɩ pɩkazaa nɛ pɩwɛnɩ keŋ nɛ pɩkpɛndɩɣ nɛ pɩɖɔŋ wiii nɛ pɩwɛnɩ nɩŋgbanzɩ 4 yɔ, pɩwɛɛ se pɩkɛ-mɩ kʋzɔɔtʋ pʋyʋ. 24 Pɩkaɣ yebu nɛ ɩpɩsɩ mba pɛfɛyɩ kele kele yɔ. Weyi etukuuni pi-tomnaɣ kɩsɩbaɣ nakɛyɛ yɔ, ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ.+ 25 Weyi ɛkpakɩɣ pi-tomnaɣ kɩsɩbaɣ nakɛyɛ yɔ, pɩwɛɛ se ɛcɔtɩ e-tokonaa;+ ɛkaɣ kɛʋ azuluma tʋ pɩkɔɔ nɛ pɩtalɩ ɖanaɣ.

26 «“Kpɩna wena payɩ a-acaa taa yawa, ɛlɛ atɩya nɛ pɩkaɖɩ nɛ aahokuu a-tɔɔnaɣ nɛ aɖaɣnɩɣ-kɛ tɔɔʋ yɔ, pɩwɛɛ se akɛ-mɩ kʋzɔɔtʋ pʋyʋ. Weyi etukuuni-yɛ yɔ, ɛkaɣ kɛʋ azuluma tʋ.+ 27 Mbʋ pɩwɛ wezuu nɛ pɩɖɔŋnɩ nɩŋgbanzɩ 4 yɔ pɩ-taa lɛ, mbʋ payɩ pɩɖɔŋ pɩ-naataŋ yɔɔ yɔ,* pɩwɛɛ se pɩkɛ-mɩ kʋzɔɔtʋ pʋyʋ. Weyi etukuuni pi-tomnaɣ kɩsɩbaɣ nakɛyɛ yɔ, ɛkaɣ kɛʋ azuluma tʋ pɩkɔɔ nɛ pɩtalɩ ɖanaɣ. 28 Weyi ɛkpakɩɣ pi-tomnaɣ kɩsɩbaɣ nakɛyɛ yɔ, pɩwɛɛ se ɛcɔtɩ e-tokonaa,+ nɛ ɛkaɣ kɛʋ azuluma tʋ pɩkɔɔ nɛ pɩtalɩ ɖanaɣ.+ Pɩwɛɛ se pɩkɛ-mɩ kʋzɔɔtʋ pʋyʋ.

29 «“Mbʋ pɩwɛ wezuu nɛ pɩkpɛndɩɣ nɛ pɩɖɔŋ wiii tataa yɔ pɩ-taa lɛ, mbʋ pɩwɛɛ se pɩkɛ-mɩ kʋzɔɔtʋ pʋyʋ yɔ mbʋ yɔ: kuŋguyu,* holu,+ kamasɩ tɩŋa, 30 sɔɖɩyɛ, kamaɣ sɔsɔɔ, calɩmondoye, kañɩŋa taa kamaɣ nɛ canzɩ. 31 Kpɩna ana, wena akpɛndɩɣ nɛ aɖɔŋ wiii yɔ, pɩwɛɛ se akɛ-mɩ kʋzɔɔtʋ pʋyʋ.+ Weyi etukuuni a-tomnaɣ kɩsɩbaɣ nakɛyɛ yɔ, ɛkaɣ kɛʋ azuluma tʋ pɩkɔɔ nɛ pɩtalɩ ɖanaɣ.+

32 «“Ye a-taa naɖɩyɛ ɛsɩba nɛ ɖɩtɔlɩ wonuu nakʋyʋ yɔɔ yɔ, paa pɩtɩɩkɛ ñanaɣ ŋga pasaɣnɩ tɩʋ yɔ, toko nakʋyʋ, tɔnɛ naɖɩyɛ, yaa fɔlɔtɔ hɔɔlaɣ nakɛyɛ yɔɔ yɔ, kɩkaɣ pɩsʋʋ azuluma pʋyʋ. Pɩwɛɛ se ñanaɣ ŋga palakɩnɩ tʋmɩyɛ yɔ, paa pɩtɩɩkɛ ñanaɣ ŋga yɔ, pamɩyɩsɩ-kɛ lɩm, nɛ kakaɣ kɛʋ azuluma pʋyʋ pɩkɔɔ nɛ pɩtalɩ ɖanaɣ; pʋwayɩ lɛ, kakaɣ pɩsʋʋ kele kele. 33 Ye a-taa naɖɩyɛ ɛtɔlɩ cʋʋ wonuu nakʋyʋ taa yɔ, pɩwɛɛ se ɩyɔkɩ-kʋ, nɛ mbʋ payɩ pɩɩwɛ kɩ-taa yɔ, pɩpɩsɩɣ azuluma pʋyʋ.+ 34 Ye lɩm nabʋyʋ ɛlɩnɩ cʋʋ wonuu ŋgʋ kɩ-taa nɛ pitukuni tɔɔnaɣ nakɛyɛ yɔ, kakaɣ pɩsʋʋ azuluma pʋyʋ, nɛ ye kʋñɔñɔm nabʋyʋ ɛwɛ wonuu ŋgʋ kɩ-taa yɔ, pɩkaɣ pɩsʋʋ azuluma pʋyʋ. 35 Mbʋ payɩ pɩ-yɔɔ a-tomnaɣ kɩsɩbaɣ nakɛyɛ tɔlʋʋ yɔ, pɩkaɣ pɩsʋʋ azuluma pʋyʋ. Paa pɩtɩɩkɛ miŋ kpou yaa mɩzaɣ nakɛyɛ yɔ, pɩwɛɛ se pɔyɔkɩ-kɛ kpɛdɛlɛɛɛ. Tɩkɛ azuluma wondu, nɛ pɩwɛɛ se tɩkɛ-mɩ azuluma wondu mbʋ. 36 Lɩm hiɖe nɛ lɔkɔ* ŋgʋ kɩ-taa paɖʋʋ* lɩm yɔ pi-ɖeke pɩwɛɣnɩ kele kele, ɛlɛ weyi etukuuni a-tomnaɣ kɩsɩbaɣ nakɛyɛ yɔ, ɛkaɣ kɛʋ azuluma tʋ. 37 Ye a-tomnaɣ kɩsɩbaɣ nakɛyɛ ɛtɔlɩ ɖomaɣ ŋga pacaɣ ɖuu yɔ kɔ-yɔɔ yɔ, ɖomaɣ ŋga kɛwɛ kele kele. 38 Ɛlɛ ye papɩyɩ lɩm ɖomaɣ nakɛyɛ yɔɔ, nɛ a-tomnaɣ kɩsɩbaɣ hɔɔlʋʋ nakʋyʋ tɔlɩ kɔ-yɔɔ yɔ, ɖomaɣ ŋga, pɩwɛɛ se kɛkɛ-mɩ azuluma pʋyʋ.

39 «“Kpɩna wena ɩtɔkɩ-yɛ yɔ, ye a-taa naɖɩyɛ ɛsɩba yɔ, weyi etukuuni ɖi-tomnaɣ kɩsɩbaɣ yɔ, ɛkaɣ kɛʋ azuluma tʋ pɩkɔɔ nɛ pɩtalɩ ɖanaɣ.+ 40 Weyi ɛtɔkɩ ɖi-tomnaɣ kɩsɩbaɣ nandʋ yɔ, pɩwɛɛ se ɛcɔtɩ e-tokonaa, nɛ ɛkaɣ kɛʋ azuluma tʋ pɩkɔɔ nɛ pɩtalɩ ɖanaɣ.+ Weyi ɛkpakɩɣ ɖi-tomnaɣ kɩsɩbaɣ yɔ, pɩwɛɛ se ɛcɔtɩ e-tokonaa, nɛ ɛkaɣ kɛʋ azuluma tʋ pɩkɔɔ nɛ pɩtalɩ ɖanaɣ. 41 Mbʋ payɩ pɩwɛ wezuu nɛ pɩkpɛndɩɣ nɛ pɩɖɔŋ wiii tataa yɔ, pɩkɛ kʋzɔɔtʋ pʋyʋ.+ Pɩfɛyɩ se pɔtɔɔ-pʋ. 42 Mbʋ pɩwɛ wezuu nɛ pituu pi-lotu yɔɔ yɔ, pɩfɛyɩ se ɩtɔɔ pɩ-taa nabʋyʋ; pɩfɛyɩ se ɩtɔɔ mbʋ pɩwɛ wezuu nɛ pɩɖɔŋ nɩŋgbanzɩ 4 yɔɔ yɔ pɩ-taa nabʋyʋ; pɩfɛyɩ se ɩtɔɔ ɖɔɖɔ mbʋ pɩwɛ wezuu nɛ pɩkpɛndɩɣ nɛ pɩɖɔŋ wiii tataa nɛ pɩwɛnɩ nɩŋgbanzɩ sakɩyɛ yɔ pɩ-taa nabʋyʋ, mbʋ pʋyɔɔ yɔ pɩkɛ kʋzɔɔtʋ pʋyʋ.+ 43 Ɩtaala nɛ mbʋ pɩwɛ wezuu nɛ pɩkpɛndɩɣ nɛ pɩɖɔŋ wiii yɔ pɩ-taa nabʋyʋ yele nɛ ɩcaɣ* kʋzɔɔtʋ, nɛ itaayele nɛ pɩ-taa nabʋyʋ pisi-mɩ nɛ ɩpɩsɩ azuluma tɩnaa.+ 44 Mbʋ pʋyɔɔ yɔ mɛkɛnɩ mɩ-Ɛsɔ Yehowa,+ nɛ pɩwɛɛ se ɩpɩsɩ mɩ-tɩ kele kele nɛ ɩpɩsɩ kiɖeɖema,+ mbʋ pʋyɔɔ yɔ mɛnkɛ kiɖeɖeu.+ Pʋyɔɔ lɛ, pɩfɛyɩ se ɩla nɛ mbʋ pɩwɛ wezuu nɛ pɩkpɛndɩɣ nɛ pɩɖɔŋ wiii tataa yɔ, pɩ-taa nabʋyʋ yele nɛ ɩcaɣ* azuluma. 45 Mbʋ pʋyɔɔ yɔ mɛkɛnɩ Yehowa, weyi ɛlɩzɩ-mɩ Ejipiti ɛjaɖɛ taa se mɛnkɛ-mɩ Ɛsɔ yɔ,+ nɛ pɩwɛɛ se ɩkɛ kiɖeɖema,+ mbʋ pʋyɔɔ yɔ mɛnkɛ kiɖeɖeu.+

46 «“Kpɩna, mbʋ pɩwɛ wezuu nɛ pɩkʋyʋʋ ɛsɔdaa yɔ, mbʋ* pɩwɛ wezuu nɛ pɩɖɔŋ lɩm taa yɔ, nɛ mbʋ* payɩ pɩwɛ wezuu nɛ pɩɖɔŋ wiii tataa yɔ, pɩ-yɔɔ paɣtʋ lɛ, 47 se papɩzɩ nɛ paɖʋ tʋkaɣ mbʋ pɩfɛyɩ kele kele yɔ nɛ mbʋ pɩwɛ kele kele yɔ pɩ-hɛkʋ taa, nɛ paɖʋ tʋkaɣ ɖɔɖɔ mbʋ pɩwɛ wezuu nɛ papɩzɩɣ nɛ pɔtɔɔ-pʋ yɔ nɛ mbʋ pɩwɛ wezuu nɛ paapɩzɩɣ nɛ pɔtɔɔ-pʋ yɔ pɩ-hɛkʋ taa.”»+

12 Yehowa tasɩ heyuu Moyizi se: 2 «Heyi Izrayɛɛlɩ mba se: “Ye halʋ nɔɔyʋ ɛhaɣ hoɣa nɛ ɛlʋlɩ abalɩbɩɣa yɔ, ɛkaɣ kɛʋ azuluma tʋ kɩyakɩŋ 7, ɛzɩ ɛkɛʋ azuluma tʋ kɩyakɩŋ weyi ɩ-taa ɛnaɣ fenaɣ yɔ.+ 3 Kɩyakʋ 8 ñɩŋgʋ wiye lɛ, pakaɣ-kɛ pɛlʋʋ.*+ 4 Halʋ ɛnʋ ɛkaɣ wɛʋ nɛ ɛpɩsɩɣ ɛ-tɩ kele kele kɩyakɩŋ 33 weyi ɩkaɣ tɩŋʋʋ pʋwayɩ yɔ ɩ-taa, calɩm mbʋ pikpemni-i yɔ pʋyɔɔ. Pɩfɛyɩ se etukuni wonuu kele kele ñɩŋgʋ nakʋyʋ, nɛ pɩfɛyɩ ɖɔɖɔ se ɛkɔɔ lone kiɖeɖeye taa nɛ pɩkɔɔ pɩsɩɩnɩ alɩwaatʋ ndʋ kɩyakɩŋ weyi ɩ-taa pɩwɛɛ se ɛpɩsɩ ɛ-tɩ kele kele yɔ ɩtɛma yɔ.

5 «“Ye ɛlʋlɩ halɩbɩɣa yɔ, ɖɩnɛ ɛlɛ ɛkaɣ kɛʋ azuluma tʋ kɩyakɩŋ 14, ɛzɩ ɛkɛʋ azuluma tʋ e-fenaɣ naʋ alɩwaatʋ taa yɔ. Ɛkaɣ wɛʋ nɛ ɛpɩsɩɣ ɛ-tɩ kele kele kɩyakɩŋ 66 weyi ɩkaɣ tɩŋʋʋ pʋwayɩ yɔ ɩ-taa, calɩm mbʋ pikpemni-i yɔ pʋyɔɔ. 6 Paa ɛlʋlɩ abalɩbɩɣa yaa halɩbɩɣa yɔ, kɩyakɩŋ weyi ɩ-taa pɩwɛɛ se ɛpɩsɩ ɛ-tɩ kele kele yɔ ɩtɛŋ lɛ, ɛkaɣ wonuu ɛyaʋ ŋgʋ kɩtɩcɛzɩ pɩnaɣ kʋɖʋmaɣ yɔ cɔjɔ, kediɣzaɣ kizinziku nɔnɔɔ taa se ɛlɛ ɛlaanɩ kɩlaʋ kɩñaɣzʋʋ;+ ɛkaɣ wonuu ɖɔɖɔ halikuku pɩɣa yaa ehooye se ɛlaanɩ kɩwɛɛkɩm yɔɔ kɩlaʋ. 7 Cɔjɔ kaɣ kɔnʋʋ pɩtɩŋa Yehowa ɛsɩndaa nɛ pihuuzi halʋ ɛnʋ ɛ-kɩwɛɛkɩm yɔɔ, nɛ ɛlɛ kaɣ wɛʋ kele kele, ɛkaɣ lɩʋ calɩm mbʋ pikpemni-i yɔ pɩ-azuluma taa. Paɣtʋ ndʋ pɩwɛɛ se halʋ weyi ɛlʋlʋʋ abalɩbɩɣa yaa halɩbɩɣa yɔ, ɛña yɔ ndʋ lɛ. 8 Ɛlɛ ye halʋ ɛnʋ ɛɛpɩzɩɣ se ehiɣ heu yɔ, ɖɩnɛ ɛlɛ pɩwɛɛ se ɛkpaɣ ahoo 2 yaa halikuku piya 2,+ pakaɣ laʋ sumaɣ kʋɖʋmaɣ nɛ pɩkɛ kɩlaʋ kɩñaɣzʋʋ nɛ palaa lɛɛka nɛ pɩkɛ kɩwɛɛkɩm yɔɔ kɩlaʋ, cɔjɔ kaɣ labʋ mbʋ nɛ pihuuzi halʋ ɛnʋ ɛ-kɩwɛɛkɩm yɔɔ, nɛ ɛkaɣ wɛʋ kele kele.”»

13 Yehowa tasɩ yɔɔdɩnʋʋ Moyizi nɛ Aarɔɔnɩ nɛ eheyi-wɛ se: 2 «Ye ɛyʋ nɔɔyʋ tɔnʋʋ* hɔɔlʋʋ nakʋyʋ efema yaa ye lɩɩlɩɩtʋ yaa takʋʋ nakʋyʋ ɛlɩ ɛ-tɔnʋʋ yɔɔ nɛ pɩpɩzɩɣ nɛ pɩpɩsɩ canatʋ kʋdɔŋ*+ ɛ-tɔnʋʋ yɔɔ yɔ, ɖɩnɛ ɛlɛ pɩwɛɛ se powoni-i cɔjɔ Aarɔɔnɩ cɔlɔ yaa ɛ-pɩyalaa, cɔjɔnaa taa nɔɔyʋ cɔlɔ.+ 3 Pɩwɛɛ se cɔjɔ ewili kʋdɔŋ ŋgʋ ɛyʋ ɛnʋ ɛ-tɔnʋʋ yɔɔ. Ye hʋndʋ ndʋ tɩwɛ lone nɖɩ kʋdɔŋ kpawa yɔ ɖɩ-taa yɔ tɩhʋlʋmaa nɛ pɩnaɣ se lone nɖɩ ɖɩɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ yɔ, pɩkɛnɩ canatʋ kʋdɔŋ. Cɔjɔ kaɣ-kʋ wiluu nɛ esusi se ɛyʋ ɛnʋ ɛfɛyɩ kele kele. 4 Ɛlɛ ye takʋʋ ŋgʋ kɩlɩ ɛ-tɔnʋʋ yɔɔ yɔ kɩhʋlʋmaa nɛ pɩnaɣ se kɩtɩɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ, nɛ ye hʋndʋ ɩtɩhʋlʋmɩ yɔ, ɖɩnɛ ɛlɛ cɔjɔ kaɣ kʋdɔndʋ ɛnʋ sɩʋ kɩjaʋ kɩyakɩŋ 7.+ 5 Kɩyakʋ 7 ñɩŋgʋ wiye lɛ, cɔjɔ kaɣ-ɩ wiluu, nɛ ye ɛnawa se kʋdɔŋ ŋgʋ kɩsɩŋaa nɛ kɩtɩyɛlɩ tɔnʋʋ yɔɔ yɔ, cɔjɔ kaɣ-ɩ tasʋʋ sɩʋ kɩjaʋ kɩyakɩŋ 7.

6 «Pɩwɛɛ se cɔjɔ ɛtasɩ-ɩ wiluu kɩyakʋ 7 ñɩŋgʋ wiye, nɛ ye kʋdɔŋ ŋgʋ kɩpaɣzɩ tɛm nɛ kɩtɩyɛlɩ tɔnʋʋ yɔɔ yɔ, ɖɩnɛ ɛlɛ cɔjɔ esusi se ɛwɛ kele kele;+ lɩɩlɩɩtʋ yem pɩɩkɛnaa. Pʋbʋ lɛ, pɩwɛɛ se ɛyʋ ɛnʋ ɛcɔtɩ e-tokonaa nɛ ɛwɛɛ kele kele. 7 Ɛlɛ ye ɛtɛm wobu cɔjɔ cɔlɔ nɛ ɛlɛ tɛ susuu se ɛwɛ kele kele, nɛ pʋwayɩ lɩɩlɩɩtʋ ndʋ* tɩyɛlɩ ɛ-tɔnʋʋ yɔɔ kpem kɔyɔ, ɖɩnɛ ɛlɛ pɩwɛɛ se ɛtasɩ wobu* cɔjɔ cɔlɔ. 8 Cɔjɔ kaɣ lɩɩlɩɩtʋ ndʋ wiluu, nɛ ye tɩyɛlɩ tɔnʋʋ yɔɔ yɔ, ɖɩnɛ ɛlɛ ɛkaɣ susuu se ɛyʋ ɛnʋ ɛfɛyɩ kele kele. Pɩkɛnɩ canatʋ kʋdɔŋ.+

9 «Ye canatʋ kʋdɔŋ ɛkpa nɔɔyʋ yɔ, pɩwɛɛ se powoni-i cɔjɔ cɔlɔ, 10 nɛ cɔjɔ kaɣ-ɩ wiluu.+ Nɛ ye ɛ-tɔnʋʋ hɔɔlʋʋ nakʋyʋ efema nɛ kɩhʋlʋmɩ nɛ piyele nɛ peeɖe hʋndʋ hʋlʋmɩ nɛ hɔɔlʋʋ ŋgʋ kifema yɔ kɩla heŋ yɔ,+ 11 ɖɩnɛ ɛlɛ pɩkɛnɩ canatʋ ndʋ tileɖiɣ yɔ ɛ-tɔnʋʋ yɔɔ, pɩwɛɛ se cɔjɔ esusi se ɛfɛyɩ kele kele. Pɩfɛyɩ se cɔjɔ ɛsɩɩ-ɩ kɩjaʋ,+ mbʋ pʋyɔɔ yɔ ɛfɛyɩ kele kele. 12 Ɛlɛ ye canatʋ kʋdɔŋ ɛlɩ ɛyʋ ɛnʋ ɛ-tɔnʋʋ tɩŋa yɔɔ, nɛ kihu ɛ-yɔɔ kpaɣnɩ ɛ-ñʋʋ nɛ pitii ɛ-nɩŋgbanzɩ yɔɔ, ɛ-tɔnʋʋ hɔɔlʋʋ ŋgʋ payɩ cɔjɔ pɩzɩɣ nɛ ɛna yɔ kɩ-yɔɔ, 13 nɛ cɔjɔ wili-i nɛ ɛna se canatʋ kʋdɔŋ hu ɛ-tɔnʋʋ tɩŋa yɔɔ kɔyɔ, ɖɩnɛ ɛlɛ esusuu se kʋdɔndʋ wɛ kele kele.* Ɛwɛ kele kele, mbʋ pʋyɔɔ yɔ ɛ-tɔnʋʋ tɩŋa hʋlʋmaa. 14 Ɛlɛ ye pɩlaba se wiɖiyi ɛ-tɔnʋʋ paɣzɩ heŋ labʋ yɔ, ɖɩnɛ ɛlɛ ɛfɛyɩ kele kele. 15 Cɔjɔ naɣ heŋ ɛnɩ lɛ, pɩwɛɛ se esusi se kʋdɔndʋ fɛyɩ kele kele.+ Heŋ ɛnɩ ɛfɛyɩ kele kele. Pɩkɛnɩ canatʋ kʋdɔŋ.+ 16 Ɛlɛ ye pʋwayɩ, heŋ taa ɛtasɩ hʋlʋmʋʋ yɔ, pɩwɛɛ se ewolo cɔjɔ cɔlɔ. 17 Ðɩnɛ ɛlɛ cɔjɔ kaɣ-ɩ wiluu,+ nɛ ye kʋdɔŋ ɛpɩsɩ kʋhʋlʋmʋʋ yɔ, cɔjɔ kaɣ susuu se kʋdɔndʋ wɛ kele kele. Ɛwɛ kele kele.

18 «Ye mʋɖɛ naɖɩyɛ ɛlɩ nɔɔyʋ tɔnʋʋ yɔɔ nɛ pʋwayɩ lɛ ɖɩwaa, 19 ɛlɛ lone nɖɩ ɖɩ-taa mʋɖɛ kaalɩwa yɔ ɖife nɛ ɖɩhʋlʋmɩ yaa peeɖe la takʋʋ kʋhʋlʋmʋʋ nɛ pɩwɛɛ caʋʋʋ yɔ, pɩwɛɛ se ɛyʋ ɛnʋ ewolo nɛ ɛwɩlɩ ɛ-tɩ cɔjɔ. 20 Cɔjɔ kaɣ wiluu takʋʋ ŋgʋ,+ nɛ ye pɩnaɣ se takʋʋ lone taa ɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ nɛ peeɖe hʋndʋ pɩsɩ kʋhʋlʋmtʋ yɔ, ɖɩnɛ ɛlɛ cɔjɔ kaɣ susuu se ɛyʋ ɛnʋ ɛfɛyɩ kele kele. Pɩkɛ canatʋ kʋdɔŋ ŋgʋ kɩlɩ lone nɖɩ ɖɩ-taa mʋɖɛ kaalɩwa yɔ. 21 Ɛlɛ ye cɔjɔ ewili takʋʋ nɛ ɛna se hʋndʋ kʋhʋlʋmtʋ fɛyɩ kɩ-taa, kɩ-taa tɩɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ nɛ pɩnaɣ se kɩ-taa paɣzɩ waʋ yɔ, ɖɩnɛ ɛlɛ cɔjɔ sɩɣ kʋdɔndʋ kɩjaʋ kɩyakɩŋ 7.+ 22 Nɛ ye pɩna kpayɩ kpayɩ se takʋʋ yɛlɩ ɛyʋ ɛnʋ ɛ-tɔnʋʋ yɔɔ yɔ, ɖɩnɛ ɛlɛ cɔjɔ esusi se ɛfɛyɩ kele kele. Pɩkɛnɩ kʋdɔŋ. 23 Ɛlɛ ye takʋʋ ɛwɛ ki-lone taa nɛ kɩtɩyɛlɩ yɔ, ɖɩnɛ ɛlɛ ɛ-tɔnʋʋ fem kifem ɖenɖe mʋɖɛ kaalɩ-ɩ yɔ, cɔjɔ kaɣ susuu se ɛwɛ kele kele.+

24 «Yaa ye miŋ ɛñaɣ nɔɔyʋ nɛ pɩla tɔndɔlʋʋ nɛ tɔndɔlʋʋ pɩsɩ takʋʋ kʋhʋlʋmʋʋ nɛ kɩwɛɛ caʋʋʋ yaa kɩpɩsɩ takʋʋ kʋhʋlʋmʋʋ yɔ, 25 cɔjɔ kaɣ wiluu takʋʋ ŋgʋ. Ye takʋʋ taa hʋndʋ ɩpɩsɩ kʋhʋlʋmtʋ nɛ pɩnaɣ se peeɖe ɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ yɔ, canatʋ lɩnɩ tɔndɔlʋʋ taa, cɔjɔ kaɣ susuu se ɛyʋ ɛnʋ ɛfɛyɩ kele kele. Pɩkɛnɩ canatʋ kʋdɔŋ. 26 Ɛlɛ ye cɔjɔ ewili takʋʋ nɛ ɛna se hʋndʋ kʋhʋlʋmtʋ fɛyɩ kɩ-taa, ki-lone taa tɩɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ nɛ kɩ-taa paɣzɩ waʋ yɔ, ɖɩnɛ ɛlɛ pɩwɛɛ se ɛsɩɩ ɛyʋ ɛnʋ kɩjaʋ kɩyakɩŋ 7.+ 27 Cɔjɔ kaɣ-ɩ wiluu kɩyakʋ 7 ñɩŋgʋ wiye, nɛ ye pɩnaɣ kpayɩ kpayɩ se kɩyɛlɩ ɛ-tɔnʋʋ yɔɔ kɔyɔ, cɔjɔ kaɣ susuu se ɛfɛyɩ kele kele. Pɩkɛnɩ canatʋ kʋdɔŋ. 28 Ɛlɛ ye takʋʋ ɛwɛ ki-lone taa, kɩtɩyɛlɩ tɔnʋʋ yɔɔ, nɛ kɩ-taa ɛpaɣzɩ waʋ yɔ, tɔndɔlʋʋ taa fem kifem yem, cɔjɔ kaɣ susuu se ɛyʋ ɛnʋ ɛwɛ kele kele, mbʋ pʋyɔɔ yɔ tɔndɔlʋʋ taa huna.

29 «Ye kʋdɔŋ nakʋyʋ ɛlɩ abalʋ nɔɔyʋ yaa halʋ nɔɔyʋ ñʋʋ taa yaa ɛ-tamaɣ tɛɛ yɔ, 30 ɖɩnɛ ɛlɛ pɩwɛɛ se cɔjɔ ewili kʋdɔŋ ŋgʋ.+ Ye ki-lone taa ɛɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ nɛ ñɔsɩ kpaɣ sʋtʋ lɩm tɔlɩm nɛ sɩpɩsɩ ɖaɖɩɩɩ ɖaɖɩɩɩ yɔ, ɖɩnɛ ɛlɛ pɩwɛɛ se cɔjɔ esusi se ɛyʋ ɛnʋ ɛfɛyɩ kele kele; pɩkɛnɩ ñʋtɔnɛ kʋdɔŋ yaa tandaʋ kʋdɔŋ. Pɩkɛnɩ ñʋʋ yaa tamaɣ tɛɛ canatʋ. 31 Ɛlɛ ye cɔjɔ ɛnawa se kʋdɔŋ lone taa tɩɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ, nɛ ñɔsɩ kɩkpɛdɩsɩ fɛyɩ ɖɩ-taa yɔ, pɩwɛɛ se cɔjɔ ɛsɩɩ kʋdɔndʋ kɩjaʋ kɩyakɩŋ 7.+ 32 Cɔjɔ kaɣ wiluu kʋdɔŋ ŋgʋ kɩyakʋ 7 ñɩŋgʋ wiye, nɛ ye kʋdɔŋ lone ɛtɩtasɩ walʋʋ, ñɔsɩ nzɩ sɩwɛnɩ sʋtʋ lɩm tɔlɩm yɔ sɩfɛyɩ lone nɖɩ ɖɩ-taa nɛ kʋdɔŋ lone tɩɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ yɔ, 33 pɩwɛɛ se pahʋ ɛyʋ ɛnʋ, ɛlɛ hɔɔlʋʋ ŋgʋ kʋdɔŋ wɛɛ yɔ, pɩfɛyɩ se pahʋm-kʋ. Pʋwayɩ lɛ, pɩwɛɛ se cɔjɔ ɛsɩɩ kʋdɔndʋ kɩjaʋ kɩyakɩŋ 7.

34 «Cɔjɔ kaɣ tasʋʋ wiluu kʋdɔŋ lone kɩyakʋ 7 ñɩŋgʋ wiye, nɛ ye ñʋtɔnɛ kʋdɔŋ yaa tandaʋ kʋdɔŋ ɛtɩyɛlɩ tɔnʋʋ yɔɔ nɛ ki-lone ɛtɩɖʋ pɔʋ nɛ pɩkɩlɩ tɔnʋʋ hɔɔlɩŋ lɛɛŋ yɔ, ɖɩnɛ ɛlɛ cɔjɔ kaɣ susuu se ɛyʋ ɛnʋ ɛwɛ kele kele, nɛ pɩwɛɛ se ɛyʋ ɛnʋ ɛcɔtɩ e-tokonaa nɛ ɛwɛɛ kele kele. 35 Ɛlɛ ye pɛtɛm susuu se ɛwɛ kele kele, nɛ pʋwayɩ pɩna kpayɩ kpayɩ se kʋdɔŋ yɛlɩ ɛ-tɔnʋʋ yɔɔ yɔ, 36 cɔjɔ kaɣ-ɩ wiluu, nɛ ye kʋdɔŋ ɛyɛlɩ tɔnʋʋ yɔɔ yɔ, pɩtɩcɛyɩ se ɛcɔna nɛ ɛna se ñɔsɩ nzɩ sɩwɛnɩ sʋtʋ lɩm tɔlɩm yɔ sɩwɛɛ yaa sɩfɛyɩ; ɛyʋ ɛnʋ ɛfɛyɩ kele kele. 37 Ɛlɛ ye ɛcɔnaa nɛ ɛna se kʋdɔŋ tɩyɛlɩ tɔnʋʋ yɔɔ, nɛ ñɔsɩ kɩkpɛdɩsɩ ñɔ peeɖe yɔ, ɖɩnɛ ɛlɛ kʋdɔŋ wawa. Ɛyʋ ɛnʋ ɛwɛ kele kele, nɛ cɔjɔ kaɣ susuu se ɛwɛ kele kele.+

38 «Ye takɩŋ nɩɩyɩ ɩlɩ abalʋ nɔɔyʋ yaa halʋ nɔɔyʋ tɔnʋʋ yɔɔ,* nɛ takɩŋ ɛnɩ ɩkɛ kʋhʋlʋmɩŋ yɔ, 39 cɔjɔ kaɣ takɩŋ ɛnɩ wiluu.+ Ye tɔnʋʋ yɔɔ takɩŋ ɛnɩ ɩpaɣzɩ waʋ nɛ ɩhʋlʋmɩ yɔ, pɩwɩlɩɣ se pɩtɩkɛ kʋdɔŋ kaɖɛ ñɩŋgʋ nakʋyʋ lɩnɩ tɔnʋʋ yɔɔ. Ɛyʋ ɛnʋ ɛwɛ kele kele.

40 «Ye abalʋ nɔɔyʋ ñɔsɩ ɩtɔwa nɛ ɛ-ñʋʋ taa hazɩ yɔ, ɛwɛ kele kele. 41 Ye e-kiɖe taa ñɔsɩ ɩtɔna nɛ peeɖe hazɩ yɔ, ɛwɛ kele kele. 42 Ɛlɛ ye heŋ nɩɩyɩ, weyi ɛ-taa hʋlʋmaa nɛ pɩwɛɛ caʋʋʋ yɔ, ɛlabɩ ɛ-ñʋtɔnɛ hɔɔlʋʋ ŋgʋ kɩ-yɔɔ hazaa yɔ kɩ-yɔɔ yaa e-kiɖe taa yɔ, ɖɩnɛ ɛlɛ canatʋ lɩnɩ ɛ-ñʋtɔnɛ yɔɔ yaa e-kiɖe taa. 43 Cɔjɔ kaɣ-ɩ wiluu, nɛ ye ɖenɖe heŋ laba nɛ pife yɔ pɩhʋlʋmaa nɛ pɩwɛɛ caʋʋʋ ɛ-ñʋdaka taa ɖenɖe pɩhazaa yɔ yaa e-kiɖe taa, nɛ pɩwɛɛ ɛzɩ canatʋ yɔ ɛ-tɔnʋʋ yɔɔ yɔ, 44 ɖɩnɛ ɛlɛ, ɛkɛ canaɣ. Ɛfɛyɩ kele kele; kʋdɔŋ ŋgʋ kɩwɛ ɛ-ñʋʋ taa yɔ kɩ-yɔɔ lɛ, pɩwɛɛ se cɔjɔ esusi se ɛfɛyɩ kele kele. 45 Piyele nɛ weyi ɛwɛnɩ canatʋ kʋdɔŋ yɔ, pɩwɛɛ se pacɩyɩ e-tokonaa* nɛ pɩfɛyɩ se ɛñɔɔzɩ ɛ-ñɔsɩ, nɛ pɩwɛɛ se ehuuzi ɛ-hayo ndomiye yɔɔ hʋndʋ yɔɔ nɛ ɛmakɩ kubusi se: “Mɛnfɛyɩ kele kele, mɛnfɛyɩ kele kele!” 46 Alɩwaatʋ ndʋ payɩ kʋdɔŋ ŋgʋ kɩwɛɣ ɛ-yɔɔ yɔ, ɛfɛyɩ kele kele. Pɩwɛɛ se ɛlɩzɩ ɛ-tɩ nɛ hɔɔlʋʋ nɛ ɛcaɣ nɖeke, mbʋ pʋyɔɔ yɔ ɛfɛyɩ kele kele. Ɛ-ɖɩjaɣyɛ kaɣ wɛʋ ɖigbeɣliye* wayɩ.+

47 «Ye canatʋ kʋdɔŋ ɛɖɛ toko nakʋyʋ, paa pɩtɩɩkɛ heŋ hʋndʋ ñɩŋgʋ yaa pɩsatʋ ñɩŋgʋ* yɔ, 48 paa pɩtɩɩkɛ heŋ hʋndʋ yaa pɩsatʋ* ndʋ pɔcɔlɩ-tʋ ɖaɣlɩkɩŋ yɔɔ yɔ tɩ-taa yaa kɩlɛɣtɩtʋ taa, yaa tɔnɛ naɖɩyɛ yaa tɔnɛ wonuu nakʋyʋ yɔ, 49 nɛ ye kʋdɔŋ ɛɖɛ toko ŋgʋ yaa tɔnɛ naɖɩyɛ yaa pɩsatʋ ndʋ pɔcɔlɩ-tʋ ɖaɣlɩkɩŋ yɔɔ yɔ yaa pɩsatʋ kɩlɛɣtɩtʋ, yaa tɔnɛ wonuu nakʋyʋ, nɛ ɖenɖe kʋdɔŋ ɖɛwa yɔ peeɖe kpaɣ hatʋ lɩm tɔlɩm nɛ piwokini sʋtʋ lɩm tɔlɩm yɔɔ yaa pɩla sɛʋ yɔɔ yɔ, canatʋ kʋdɔŋ ɖɛnɩ-kʋ, nɛ pɩwɛɛ se pawɩlɩ-kʋ cɔjɔ. 50 Cɔjɔ kaɣ wiluu kʋdɔŋ ŋgʋ nɛ ɛkɛzɩ wonuu ŋgʋ kɩ-yɔɔ kɩwɛɛ yɔ kɩjaʋ kɩyakɩŋ 7.+ 51 Ye ewili kʋdɔŋ ŋgʋ kɩyakʋ 7 ñɩŋgʋ wiye nɛ ɛna se kɩyɛlɩ toko yɔɔ, pɩsatʋ ndʋ pɔcɔlɩ-tʋ ɖaɣlɩkɩŋ yɔɔ yɔ tɩ-yɔɔ yaa pɩsatʋ kɩlɛɣtɩtʋ yɔɔ, yaa tɔnɛ yɔɔ yɔ (paa ɛbɛ patɩɩkpaɣ tɔnɛ nɖɩ nɛ palabɩna yɔ), pɩkɛnɩ canatʋ kʋdɔŋ kaɖɛ ñɩŋgʋ, nɛ wonuu ŋgʋ kɩfɛyɩ kele kele.+ 52 Pɩwɛɛ se ɛñɔtɩ miŋ toko ŋgʋ yaa heŋ hʋndʋ yaa pɩsatʋ* ndʋ pɔcɔlɩ-tʋ ɖaɣlɩkɩŋ yɔɔ yɔ yaa kɩlɛɣtɩtʋ yaa tɔnɛ wonuu ŋgʋ kʋdɔŋ kpawa yɔ, paa pɩtɩɩkɛ tɔnɛ wonuu ŋgʋ yɔ; mbʋ pʋyɔɔ yɔ pɩkɛnɩ canatʋ kʋdɔŋ kaɖɛ ñɩŋgʋ. Pɩwɛɛ se pɔñɔtɩ wonuu ŋgʋ miŋ.

53 «Ɛlɛ ye cɔjɔ ewili-kʋ nɛ kʋdɔŋ tɩyɛlɩ toko taa yaa pɩsatʋ ndʋ pɔcɔlɩ-tʋ ɖaɣlɩkɩŋ yɔɔ yɔ tɩ-taa yaa pɩsatʋ kɩlɛɣtɩtʋ taa yaa tɔnɛ wonuu nakʋyʋ, paa pɩtɩɩkɛ ŋgʋ yɔ kɩ-taa yɔ, 54 ɖɩnɛ ɛlɛ pɩwɛɛ se cɔjɔ ɛɖʋ paɣtʋ nɛ pɔcɔtɩ wonuu ŋgʋ kʋdɔŋ ɖɛ-kʋ yɔ, nɛ cɔjɔ kaɣ-kʋ tasʋʋ sɩʋ kɩjaʋ kɩyakɩŋ lʋbɛ. 55 Pɛtɛŋ cɔtʋʋ wonuu ŋgʋ kʋdɔŋ ɖɛwa yɔ camɩyɛ lɛ, pɩwɛɛ se cɔjɔ ewili-kʋ. Ye lone nɖɩ kʋdɔŋ ɖɛwa yɔ ɖɩ-wɛtʋ ɛtɩlɛɣzɩ yɔ, paa kʋdɔŋ ɛtɩyɛlɩ yɔ, kɩfɛyɩ kele kele. Pɩwɛɛ se ŋsɔbɩ-kʋ miŋ, mbʋ pʋyɔɔ yɔ pɩtɔɔ-kʋ, paa pɩtɩɩkɛ pɩ-taa kiŋ pɩtɔɔnɩ-kʋ yaa wayɩ kiŋ yɔ.

56 «Ɛlɛ ye pɛtɛm cɔtʋʋ wonuu ŋgʋ camɩyɛ, nɛ cɔjɔ wili-kʋ nɛ ɛna se kɩ-hɔɔlʋʋ ŋgʋ kʋdɔŋ kpawa yɔ, kɩpaɣzɩ waʋ yɔ, pɩwɛɛ se ɛcɩyɩ hɔɔlʋʋ ŋgʋ toko yɔɔ yaa tɔnɛ yɔɔ yaa pɩsatʋ ndʋ pɔcɔlɩ-tʋ ɖaɣlɩkɩŋ yɔɔ yɔ tɩ-yɔɔ yaa pɩsatʋ kɩlɛɣtɩtʋ yɔɔ. 57 Ɛlɛ, ye kʋdɔŋ ɛɖaɣnɩ lɩʋ toko hɔɔlʋʋ nakʋyʋ yaa pɩsatʋ ndʋ pɔcɔlɩ-tʋ ɖaɣlɩkɩŋ yɔɔ yɔ tɩ-hɔɔlʋʋ nakʋyʋ yaa pɩsatʋ kɩlɛɣtɩtʋ hɔɔlʋʋ nakʋyʋ yaa tɔnɛ wonuu, paa pɩtɩɩkɛ ŋgʋ yɔ kɩ-hɔɔlʋʋ nakʋyʋ yɔɔ yɔ, pɩwɩlɩɣ se kʋdɔŋ ŋgʋ kiɖiɣni yɛlʋʋ, nɛ pɩwɛɛ se ŋsɔ wonuu ŋgʋ kʋdɔŋ ɖɛ-kʋ yɔ miŋ, paa pɩtɩɩkɛ wonuu ŋgʋ yɔ.+ 58 Ɛlɛ ye ŋcɔtɩ toko yaa pɩsatʋ ndʋ pɔcɔlɩ-tʋ ɖaɣlɩkɩŋ yɔɔ yɔ yaa pɩsatʋ kɩlɛɣtɩtʋ yaa paa tɔnɛ wonuu ŋgʋ, nɛ kʋdɔŋ mʋʋ kɩ-yɔɔ yɔ, pɩwɛɛ se patasɩ cɔtʋʋ wonuu ŋgʋ nabʋlɛ ɖeɖe, ɖɩnɛ ɛlɛ kɩkaɣ wɛʋ kele kele.

59 «Canatʋ kʋdɔŋ yɔɔ paɣtʋ lɛ, ye kɩwɛ heŋ hʋndʋ toko yaa pɩsatʋ* toko nakʋyʋ yɔɔ, pɩsatʋ ndʋ pɔcɔlɩ-tʋ ɖaɣlɩkɩŋ yɔɔ yɔ tɩ-yɔɔ yaa pɩsatʋ kɩlɛɣtɩtʋ yɔɔ yaa paa tɔnɛ wonuu ŋgʋ lɛ kɩ-yɔɔ yɔ; ndʋ sɩɣnɩna nɛ pana se posusi se kɩwɛ kele kele yaa kɩfɛyɩ kele kele.»

14 Yehowa tasɩ yɔɔdɩnʋʋ Moyizi nɛ eheyi-i se: 2 «Paɣtʋ tʋnɛ tɩ-yɔɔ pɩwɛɛ se pɔɖɔ kɩyakʋ ŋgʋ posusuu se canaɣ nakɛyɛ wɛ kele kele yɔ, alɩwaatʋ ndʋ powokini-kɛ cɔjɔ cɔlɔ yɔ.+ 3 Pɩwɛɛ se cɔjɔ ewolo ɖigbeɣliye* wayɩ nɛ ewili canaɣ ŋga. Ye ka-canatʋ ɛcɛba yɔ, 4 cɔjɔ kaɣ-kɛ ɖʋʋ paɣtʋ se kɔkɔnɩ sumasɩ 2 nzɩ sɩwɛnɩ sɩ-ɛsa nɛ sɩwɛ kele kele yɔ, tɩʋ ŋgʋ payaɣ se sɛɛdrɩ yɔ kɩ-ɖaka, pɩsaʋ kɩsɛɛmʋʋ cɩɩɩ nɛ ñɩtʋ ndʋ payaɣ se izɔɔpʋ* yɔ, se pɩsa nɛ papɩsɩ-kɛ kele kele.+ 5 Cɔjɔ kaɣ ɖʋʋ paɣtʋ se pakʋ sumasɩ nzɩ sɩ-taa kʋɖʋmaɣ cʋʋ ñanaɣ nakɛyɛ taa lɩm mbʋ pikpeŋ yɔ pɩ-yɔɔ. 6 Ɛlɛ pɩwɛɛ se ɛkpaɣ sumaɣ ŋga ka nɛ kɛ-ɛsa yɔ, tɩʋ ŋgʋ payaɣ se sɛɛdrɩ yɔ kɩ-ɖaka, pɩsaʋ kɩsɛɛmʋʋ cɩɩɩ nɛ ñɩtʋ ndʋ payaɣ se izɔɔpʋ* yɔ, nɛ ɛkpɛndɩ pɩtɩŋa nɛ etisi sumaɣ ŋga pakʋ lɩm mbʋ pikpeŋ yɔ pɩ-yɔɔ yɔ ka-calɩm taa. 7 Pʋwayɩ lɛ, ɛmɩzɩ-pʋ tam 7 ɛyʋ weyi canatʋ kʋdɔŋ kaakpa-ɩ nɛ ɛpɩsɩɣ ɛ-tɩ kele kele yɔ ɛ-yɔɔ, nɛ esusi se ɛwɛ kele kele, nɛ eyele sumaɣ ŋga ka nɛ kɛ-ɛsa yɔ nɛ kasʋʋ ñɩtʋ.+

8 «Weyi ɛpɩsɩɣ ɛ-tɩ kele kele yɔ, pɩwɛɛ se ɛcɔtɩ e-tokonaa nɛ ɛhʋ ɛ-ñɔsɩ nɛ ɛ-yɔɔ hʋndʋ* tɩŋa nɛ ɛsɔ lɩm, ɖɩnɛ ɛlɛ ɛkaɣ wɛʋ kele kele. Pʋwayɩ lɛ, ɛpɩzɩɣ nɛ ɛkɔɔ ɖigbeɣliye* taa, ɛlɛ pɩwɛɛ se ɛcaɣ e-kizinziku nɛ kɩ-wayɩ kɩyakɩŋ lʋbɛ. 9 Kɩyakʋ 7 ñɩŋgʋ wiye lɛ, pɩwɛɛ se ɛhʋ ñɔsɩ tɩŋa ɛ-ñʋʋ taa nɛ ɛ-tamaɣ tɛɛ nɛ ɛhʋ ɖɔɖɔ ɛ-ɛsa hutu. Ɛhʋŋ ñɔsɩ tɩŋa ɛ-yɔɔ nɛ pɩtɛ lɛ, ɛcɔtɩ e-tokonaa nɛ ɛsɔ lɩm, ɖɩnɛ ɛlɛ ɛkaɣ wɛʋ kele kele.

10 «Kɩyakʋ 8 ñɩŋgʋ wiye lɛ, pɩwɛɛ se ɛkpaɣ ɛyaŋ* 2 weyi ɩfɛyɩnɩ ɛjandʋ natʋyʋ yɔ, heɣa halɩñɩŋga kʋɖʋmaɣ, ŋga kɛfɛyɩnɩ ɛjandʋ natʋyʋ+ nɛ katɩcɛzɩ pɩnaɣ yɔ, mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ efa hɔɔlɩŋ 3 hɔɔlɩŋ 10 taa,* mʋlʋm mbʋ, pɩkɛɣnɩ tɔɔnaɣ pee kɩlaʋ,+ nɛ num lɔg kɩmaɣzʋʋ kʋɖʋmʋʋ;*+ 11 nɛ cɔjɔ weyi esusaa se ɛwɛ kele kele yɔ, ɛkaɣ wonuu weyi eɖiɣni ɛ-tɩ pɩsʋʋ kele kele yɔ Yehowa ɛsɩndaa kediɣzaɣ kizinziku nɔnɔɔ taa, ɛ nɛ ɛ-haɖɛ. 12 Cɔjɔ kaɣ kpaɣʋ ɛyaʋ kʋɖʋmʋʋ nɛ ɛlaa nɛ pɩkɛ wɛɛ ɖɔʋ kɩlaʋ,+ pɩkpɛndɩnɩ num lɔg kɩmaɣzʋʋ ŋgʋ, nɛ ɛkaɣ pɩtɩŋa fiɣduu ɛzɩ kɩlaʋ kifiɣduu yɔ Yehowa ɛsɩndaa.+ 13 Pʋwayɩ lɛ, ɛkʋ ɛyaʋ ŋgʋ ɖenɖe pakʋʋ kɩwɛɛkɩm yɔɔ kɩlaŋ nɛ kɩlaŋ kɩñaɣzɩŋ kpɩna yɔ,+ ɛkʋ-kʋ lone kiɖeɖeye naɖɩyɛ taa, mbʋ pʋyɔɔ yɔ cɔjɔ tɩnɩ wɛɛ ɖɔʋ kɩlaʋ, ɛzɩ kɩwɛɛkɩm yɔɔ kɩlaʋ ɖɔɖɔ yɔ.+ Kɩkɛ pʋyʋ kiɖeɖeu siŋŋ.+

14 «Pʋwayɩ lɛ, pɩwɛɛ se cɔjɔ ecozi wɛɛ ɖɔʋ kɩlaʋ kpɩnɛ calɩm, nɛ ɛtaa-pʋ weyi eɖiɣni ɛ-tɩ pɩsʋʋ kele kele yɔ ɛ-nɩwaŋ naŋgbaɖɛɣtʋ yɔɔ, ɛ-nɩwaŋ niye abalɩñɩnɖɛ yɔɔ nɛ ɛ-nɩwaŋ nimbiye abalɩñɩnɖɛ yɔɔ. 15 Nɛ pɩwɛɛ se cɔjɔ ecozi num lɔg kɩmaɣzʋʋ+ ŋgʋ nɛ ɛpɩyɩ ɛ-maɣmaɣ ɛ-nɩmɩyɛ nandaka taa. 16 Nɛ cɔjɔ lii ɛ-nɩwaŋ niye num mbʋ pɩwɛ ɛ-nɩmɩyɛ nandaka taa yɔ pɩ-taa nɛ ɛmɩzɩnɩ e-niye nɖɩ num mbʋ pɩ-hɔɔlʋʋ nakʋyʋ Yehowa ɛsɩndaa tam lʋbɛ. 17 Nɛ pʋwayɩ lɛ, cɔjɔ taa num mbʋ pɩkazɩ ɛ-nandaka taa yɔ pɩ-hɔɔlʋʋ nakʋyʋ weyi eɖiɣni ɛ-tɩ pɩsʋʋ kele kele yɔ ɛ-nɩwaŋ naŋgbaɖɛɣtʋ yɔɔ, ɛ-nɩwaŋ niye abalɩñɩnɖɛ yɔɔ nɛ ɛ-nɩwaŋ nimbiye abalɩñɩnɖɛ yɔɔ wɛɛ ɖɔʋ kɩlaʋ kpɩnɛ calɩm yɔɔ. 18 Num mbʋ pɩkazɩ cɔjɔ nandaka taa yɔ, ɛkaɣ-pʋ taʋ weyi eɖiɣni ɛ-tɩ pɩsʋʋ kele kele yɔ ɛ-ñʋʋ taa, nɛ cɔjɔ kaɣ-ɩ labʋ kɩwɛɛkɩm yɔɔ huuzuu sɔnzɩ Yehowa ɛsɩndaa.+

19 «Cɔjɔ kaɣ laʋ kɩwɛɛkɩm yɔɔ kɩlaʋ kpɩnɛ+ nɛ ɛla kɩwɛɛkɩm yɔɔ huuzuu sɔnzɩ weyi eɖiɣni ɛ-tɩ pɩsʋʋ kele kele ɛ-azuluma yɔɔ yɔ, nɛ pʋwayɩ lɛ ɛkʋ kɩlaʋ kɩñaɣzʋʋ kpɩnɛ. 20 Nɛ cɔjɔ kaɣ laʋ kɩlaʋ kɩñaɣzʋʋ nɛ tɔɔnaɣ pee kɩlaʋ+ altaaru yɔɔ, nɛ cɔjɔ labɩ-ɩ kɩwɛɛkɩm yɔɔ huuzuu sɔnzɩ,+ ɖɩnɛ ɛlɛ ɛkaɣ wɛʋ kele kele.+

21 «Ɛlɛ ye ɛkɛ kʋñɔndʋ nɛ e-nesi tɛɛ ɛfɛyɩ pʋyʋ yɔ, ɖɩnɛ ɛlɛ ɛkɔnɩ ɛyaʋ* kʋɖʋmʋʋ nɛ kɩkɛ wɛɛ ɖɔʋ kɩlaʋ kifiɣduu, nɛ paalabɩnɩ-ɩ kɩwɛɛkɩm yɔɔ huuzuu sɔnzɩ, ɛkɔnɩ ɖɔɖɔ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ efa hɔɔlʋʋ 10 ñɩŋgʋ* nɛ pɩkɛnɩ tɔɔnaɣ pee kɩlaʋ, num lɔg kʋɖʋmʋʋ, 22 nɛ ahoo 2 yaa halikuku piya 2, ɛzɩ e-ɖoŋ pɔzʋʋ yɔ. Pakaɣ kpaɣʋ sumaɣ kʋɖʋmaɣ nɛ palaanɩ kɩwɛɛkɩm yɔɔ kɩlaʋ nɛ pakpaɣ lɛɛka nɛ palaanɩ kɩlaʋ kɩñaɣzʋʋ.+ 23 Pɩsa nɛ cɔjɔ susi se ɛwɛ kele kele lɛ, pɩwɛɛ se ewoni-i pɩtɩŋa mbʋ yɔ kɩyakʋ 8 ñɩŋgʋ wiye+ kediɣzaɣ kizinziku nɔnɔɔ taa, Yehowa ɛsɩndaa.+

24 «Cɔjɔ kaɣ kpaɣʋ wɛɛ ɖɔʋ kɩlaʋ ɛyaʋ+ ŋgʋ nɛ num lɔg kʋɖʋmʋʋ nɛ efiɣdi nɛ pɩkɛ kɩlaʋ kifiɣduu Yehowa ɛsɩndaa.+ 25 Pʋwayɩ lɛ, ɛkʋ wɛɛ ɖɔʋ kɩlaʋ ɛyaʋ ŋgʋ, nɛ ecozi kɩ-calɩm hɔɔlʋʋ nakʋyʋ nɛ ɛtaa weyi eɖiɣni ɛ-tɩ pɩsʋʋ kele kele yɔ ɛ-nɩwaŋ naŋgbaɖɛɣtʋ yɔɔ, ɛ-nɩwaŋ niye abalɩñɩnɖɛ yɔɔ nɛ ɛ-nɩwaŋ nimbiye abalɩñɩnɖɛ yɔɔ.+ 26 Cɔjɔ kaɣ pɩyʋʋ num mbʋ pɩ-hɔɔlʋʋ nakʋyʋ ɛ-maɣmaɣ ɛ-nɩmɩyɛ nandaka taa,+ 27 nɛ pʋwayɩ lɛ, ɛmɩzɩnɩ ɛ-nɩwaŋ niye num mbʋ pɩwɛ ɛ-nɩmɩyɛ nandaka taa yɔ pɩ-hɔɔlʋʋ nakʋyʋ Yehowa ɛsɩndaa tam lʋbɛ. 28 Nɛ cɔjɔ kaɣ num mbʋ pɩwɛ ɛ-nandaka taa yɔ pɩ-hɔɔlʋʋ nakʋyʋ taʋ weyi eɖiɣni ɛ-tɩ pɩsʋʋ kele kele yɔ ɛ-nɩwaŋ naŋgbaɖɛɣtʋ yɔɔ, ɛ-nɩwaŋ niye abalɩñɩnɖɛ yɔɔ nɛ ɛ-nɩwaŋ nimbiye abalɩñɩnɖɛ yɔɔ lona wena a-taa ɛɛta wɛɛ ɖɔʋ kɩlaʋ calɩm yɔ. 29 Pʋwayɩ lɛ, num mbʋ pɩkazɩ cɔjɔ nandaka taa yɔ, ɛkaɣ-pʋ taʋ weyi eɖiɣni ɛ-tɩ pɩsʋʋ kele kele yɔ ɛ-ñʋʋ taa, nɛ ɛlabɩ-ɩ kɩwɛɛkɩm yɔɔ huuzuu sɔnzɩ Yehowa ɛsɩndaa.

30 «Ɛkaɣ laʋ ehooye kʋɖʋmɖɩyɛ yaa halikuku pɩɣa kʋɖʋmaɣ, (pɩlɩɣnɩ mbʋ ɛyʋ ɛnʋ ɛpɩzaa nɛ ehiɣ yɔ pɩ-cɔlɔ,+ 31 pʋ-tɔbʋʋ se sumasɩ nzɩ ɛpɩzɩɣ nɛ ehiɣ yɔ sɩ-cɔlɔ) nɛ pɩkɛ kɩwɛɛkɩm yɔɔ kɩlaʋ, piyele nɛ sumaɣ lɛɛka lɛ, ɛlaa-kɛ nɛ kɛkɛ kɩlaʋ kɩñaɣzʋʋ,+ nɛ pɩtasɩnɩ tɔɔnaɣ pee kɩlaʋ; nɛ cɔjɔ kaɣ labʋ kɩwɛɛkɩm yɔɔ huuzuu sɔnzɩ weyi eɖiɣni ɛ-tɩ pɩsʋʋ kele kele yɔ Yehowa ɛsɩndaa.+

32 «Ye canatʋ kʋdɔŋ ɛkpa nɔɔyʋ nɛ ɛ-yɔɔ cɛ, ɛlɛ alɩwaatʋ ndʋ posusaa se ɛwɛ kele kele yɔ e-nesi tɛɛ fɛyɩ yɔ, paɣtʋ tʋnɛ tɩ-yɔɔ pɩwɛɛ se ɛɖɔ.»

33 Pʋwayɩ lɛ, Yehowa heyi Moyizi nɛ Aarɔɔnɩ se: 34 «Ye ɩsʋ Kanaŋ ɛjaɖɛ+ nɖɩ mankaɣ-mɩ cɛlʋʋ se ɖɩkɛ mɩ-ñɩm+ yɔ ɖɩ-taa nɛ meyele nɛ canatʋ kʋdɔŋ ɖɛɛ ɖɩɣa nakɛyɛ mɩ-ɛjaɖɛ taa yɔ,+ 35 weyi ɛtɩnɩ ɖɩɣa ŋga yɔ, pɩwɛɛ se ɛkɔɔ nɛ eheyi cɔjɔ se: “Kʋdɔŋ nakʋyʋ ɖɛ man-ɖɩɣa.” 36 Ðɩnɛ ɛlɛ, pɩwɛɛ se cɔjɔ ɛɖʋ paɣtʋ nɛ palazɩ wondu tɩŋa ɖɩɣa ŋga ka-taa pʋcɔ nɛ ewolo ewili kʋdɔŋ ŋgʋ, se pɩtaakɛdɩ nɛ esusi se ɖɩɣa taa wondu tɩŋa pɩsɩ mbʋ pɩfɛyɩ kele kele yɔ; pʋwayɩ lɛ, cɔjɔ kaasʋʋ nɛ ewili ɖɩɣa ŋga. 37 Ɛkaɣ cɔnʋʋ lone nɖɩ ɖɩ-taa kʋdɔŋ wɛɛ yɔ camɩyɛ, nɛ ye pɩlaba se kʋdɔŋ ɖɛ ɖɩɣa kolonzi nɛ sɩkpaɣ hatʋ lɩm tɔlɩm nɛ piwokini sʋtʋ lɩm tɔlɩm yɔɔ yaa sɩla sɛʋ yɔɔ nɛ sɩ-hɔɔlɩŋ weyi kʋdɔŋ wɛɛ yɔ ɩɖʋ pɔŋ nɛ pɩkpaɖɩ kolonzi hɔɔlɩŋ lɛɛŋ yɔ, 38 ɖɩnɛ ɛlɛ cɔjɔ lɩɣ ɖɩɣa nɔnɔɔ taa nɛ ɛɖɩɣ-kɛ kɩyakɩŋ 7.+

39 «Kɩyakʋ 7 ñɩŋgʋ wiye lɛ, pɩwɛɛ se cɔjɔ ɛpɩsɩ nɛ ewili ɖɩɣa ŋga. Ye kʋdɔŋ ɛyɛlɩ ɖɩɣa kolonzi yɔɔ yɔ, 40 peeɖe lɛ, pɩwɛɛ se cɔjɔ ɛɖʋ paɣtʋ se pɛkpɛzɩ pɛɛ wena kʋdɔŋ ɖɛ-yɛ yɔ nɛ pɔlɔ-yɛ tɛtʋ nɛ wayɩ, azuluma lone naɖɩyɛ taa. 41 Pʋwayɩ lɛ, pɩwɛɛ se eyele nɛ pakayɩ ɖɩɣa taa caɣ caɣ, nɛ pɛɖɛnɩ tɛtʋ ndʋ pakayaa yɔ nɛ pɔlɔ tɛtʋ nɛ wayɩ, azuluma lone naɖɩyɛ taa. 42 Nɛ pɛlɛɣzɩ pɛɛ kɩfana pɛɛ wena pɛkpɛwa yɔ a-lone taa, nɛ pɩwɛɛ ɖɔɖɔ se palabɩnɩ tʋmɩyɛ lazaɣ kɩfalaɣ nɛ pɔlʋʋ kɩfalʋʋ nɛ petizini kuduyuu yɔɔ.

43 «Ye pɛtɛm pɛɛ kpɛzʋʋ, pakayɩ ɖɩɣa taa, nɛ paɖaɣnɩ-kɛ pɔlʋʋ lɛɛkʋ taʋ, nɛ pʋwayɩ kʋdɔŋ ɖaɣnɩ pɩsʋʋ nɛ kɩkpa ɖɩɣa ŋga yɔ, 44 ɖɩnɛ ɛlɛ pɩwɛɛ se cɔjɔ ɛsʋʋ ɖɩɣa ŋga ka-taa nɛ ewili-kɛ. Ye kʋdɔŋ ɛyɛlɩ ɖɩɣa ŋga ka-taa yɔ, ɖɩnɛ ɛlɛ canatʋ kʋdɔŋ kaɖɛ ñɩŋgʋ+ kpanɩ-kɛ. Ðɩɣa ŋga kɛfɛyɩ kele kele. 45 Peeɖe lɛ, pɩwɛɛ se eyele nɛ pɔyɔkɩ ɖɩɣa ŋga nɛ pokuu kɛ-pɛɛ, ka-ɖasɩ, kɔ-pɔlʋʋ nɛ ka-lazaɣ tɩŋa nɛ powoni pɔlɔ tɛtʋ nɛ wayɩ, azuluma lone naɖɩyɛ taa.+ 46 Ɛlɛ ye nɔɔyʋ ɛsʋ ɖɩɣa ŋga ka-taa kɩyakɩŋ weyi paɖɩɣ kɔ-nɔnɔɔ yɔ ɩ-taa yɔ,+ ɛkaɣ pɩsʋʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ;+ 47 nɛ ye nɔɔyʋ ɛhɩnɩ ɖɩɣa ŋga ka-taa yɔ, pɩwɛɛ se ɛcɔtɩ e-tokonaa, nɛ ye nɔɔyʋ ɛtɔɔ tɔɔnaɣ ɖɩɣa ŋga ka-taa yɔ, pɩwɛɛ se ɛcɔtɩ e-tokonaa ɖɔɖɔ.

48 «Ɛlɛ ye pɛtɛm pɔlʋʋ kɩfalʋʋ taʋ ɖɩɣa ŋga kɔ-yɔɔ, nɛ cɔjɔ kɔɔ nɛ ɛna se kʋdɔŋ tɩyɛlɩ ɖɩɣa taa yɔ, pɩwɛɛ se esusi se ɖɩɣa ŋga kɛwɛ kele kele, mbʋ pʋyɔɔ yɔ kʋdɔŋ ŋgʋ kɩcɛba. 49 Ɛkaɣ kpaɣʋ sumasɩ 2, tɩʋ ŋgʋ payaɣ se sɛɛdrɩ yɔ kɩ-ɖaka, pɩsaʋ kɩsɛɛmʋʋ cɩɩɩ nɛ ñɩtʋ ndʋ payaɣ se izɔɔpʋ* yɔ nɛ ɛpɩsɩnɩ ɖɩɣa ŋga kele kele.*+ 50 Pɩwɛɛ se ɛkʋ sumasɩ nzɩ sɩ-taa kʋɖʋmaɣ cʋʋ ñanaɣ nakɛyɛ taa lɩm mbʋ pikpeŋ yɔ pɩ-yɔɔ. 51 Pʋwayɩ lɛ, pɩwɛɛ se ɛkpaɣ tɩʋ ŋgʋ payaɣ se sɛɛdrɩ yɔ kɩ-ɖaka, ñɩtʋ ndʋ payaɣ se izɔɔpʋ* yɔ, pɩsaʋ kɩsɛɛmʋʋ cɩɩɩ nɛ sumaɣ ŋga kɛwɛnɩ kɛ-ɛsa yɔ nɛ etisi pɩtɩŋa sumaɣ ŋga pakʋwa yɔ, ka-calɩm taa nɛ lɩm mbʋ pikpeŋ yɔ pɩ-taa, nɛ ɛmɩzɩ-pʋ nɛ ɖɩɣa yɔɔ kiŋ tam 7.+ 52 Nɛ pɩwɛɛ se ɛkpaɣ sumaɣ ŋga ka-calɩm, lɩm mbʋ pikpeŋ yɔ, sumaɣ ŋga kɛwɛnɩ kɛ-ɛsa yɔ, tɩʋ ŋgʋ payaɣ se sɛɛdrɩ yɔ kɩ-ɖaka, ñɩtʋ ndʋ payaɣ se izɔɔpʋ* yɔ nɛ pɩsaʋ kɩsɛɛmʋʋ cɩɩɩ nɛ ɛpɩsɩnɩ ɖɩɣa ŋga kele kele.* 53 Pʋwayɩ lɛ, pɩwɛɛ se eyele sumaɣ ŋga kɛwɛnɩ kɛ-ɛsa yɔ tɛtʋ nɛ wayɩ nɛ kɛɖɛɛ ñɩtʋ taa, nɛ ɛla ɖɩɣa ŋga kɩwɛɛkɩm yɔɔ huuzuu sɔnzɩ, nɛ kapɩsɩ kele kele.

54 «Paɣtʋ tʋnɛ tɩ-yɔɔ pɩwɛɛ se pɔɖɔ paa canatʋ ndʋ lɛ tɩ-hɔɔlʋʋ taa, ñʋtɔnɛ kʋdɔŋ yaa tandaʋ kʋdɔŋ hɔɔlʋʋ taa,+ 55 toko canatʋ+ yaa ɖɩɣa canatʋ+ hɔɔlʋʋ taa, 56 nɛ tɔnʋʋ femtu,* lɩɩlɩɩtʋ yaa takɩŋ hɔɔlʋʋ taa,+ 57 se papɩzɩ nɛ peɖiɣzina alɩwaatʋ ndʋ wonuu nakʋyʋ kɛɣ azuluma wonuu nɛ alɩwaatʋ ndʋ wonuu nakʋyʋ wɛɣ kele kele yɔ.+ Canatʋ yɔɔ paɣtʋ lɛ.»+

15 Yehowa tasɩ yɔɔdɩnʋʋ Moyizi nɛ Aarɔɔnɩ nɛ eheyi-wɛ se: 2 «Ɩyɔɔdɩnɩ Izrayɛɛlɩ mba nɛ iheyi-wɛ se: “Ye lɩm nabʋyʋ ekpeŋni abalʋ nɔɔyʋ abalɩtʋ* taa yɔ, lɩm mbʋ pɩpɩsɩ-ɩ weyi ɛfɛyɩ kele kele yɔ.+ 3 Lɩm mbʋ pʋyɔɔ lɛ, ɛfɛyɩ kele kele, paa lɩm mbʋ pikpeŋni ɛ-abalɩtʋ taa yaa pɩɖɩɣ ɛ-abalɩtʋ yɔ, ɛfɛyɩ kele kele.

4 «“Ñalʋʋ* ŋgʋ kɩ-yɔɔ weyi lɩm kpeŋni-i yɔ ɛhɩnɩɣ yɔ, kɩpɩsɩɣ mbʋ pɩfɛyɩ kele kele yɔ, nɛ mbʋ payɩ pɩ-yɔɔ ɛcakɩ yɔ, pɩpɩsɩɣ mbʋ pɩfɛyɩ kele kele yɔ. 5 Ye nɔɔyʋ etukuni ɛ-ñalʋʋ* yɔ, pɩwɛɛ se ɛyʋ ɛnʋ ɛcɔtɩ e-tokonaa nɛ ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ.+ 6 Ye nɔɔyʋ ɛcaɣ wonuu ŋgʋ kɩ-yɔɔ weyi lɩm kpeŋni-i yɔ ɛɛcaɣaa yɔ kɩ-yɔɔ yɔ, pɩwɛɛ se ɛyʋ ɛnʋ ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ. 7 Ye nɔɔyʋ etukuni weyi lɩm kpeŋni-i yɔ e-tomnaɣ yɔ, pɩwɛɛ se ɛyʋ ɛnʋ ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ. 8 Ye weyi lɩm kpeŋni-i yɔ ɛtɔ ndaatʋ ɛyʋ weyi ɛwɛ kele kele yɔ ɛ-yɔɔ yɔ, pɩwɛɛ se ɛyʋ ɛnʋ ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ. 9 Weyi lɩm kpeŋni-i yɔ, ye ɛcaɣ kaɣɖɛ* naɖɩyɛ yɔɔ yɔ, ɖɩkaɣ pɩsʋʋ mbʋ pɩfɛyɩ kele kele yɔ. 10 Ye nɔɔyʋ etukuni wondu ndʋ tɩɩwɛ ɛ-tɛɛ yɔ* tɩ-taa nakʋyʋ yɔ, ɛyʋ ɛnʋ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ, nɛ weyi ɛkpakɩɣ wondu ndʋ yɔ, pɩwɛɛ se ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ. 11 Ye weyi lɩm kpeŋni-i yɔ,+ ɛtɩsaŋ e-nesi nɛ etukuni ɛyʋ nɔɔyʋ yɔ, pɩwɛɛ se ɛyʋ ɛnʋ ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ. 12 Weyi lɩm kpeŋni-i yɔ, etukuni cʋʋ ñanaɣ nakɛyɛ yɔ, pɩwɛɛ se pɔyɔkɩ-kɛ, nɛ ye pɩkɛ ñanaɣ ŋga pasaɣnɩ tɩʋ yɔ, pɩwɛɛ se pañalɩ-kɛ.+

13 «“Ye lɩm mbʋ pikpeŋaɣni ɛyʋ ɛnʋ nɛ piyele nɛ ɛfɛyɩ kele kele yɔ piyebi kpem yɔ, pɩwɛɛ se ɛkalɩ kɩyakɩŋ 7 pʋcɔ nɛ ɛtasɩ wɛʋ kele kele, pɩwɛɛ se ɛcɔtɩ e-tokonaa nɛ ɛsɔ pɔɔ ŋga kekpeŋ yɔ ka-taa lɩm, ɖɩnɛ ɛlɛ ɛkaɣ wɛʋ kele kele.+ 14 Kɩyakʋ 8 ñɩŋgʋ wiye lɛ, pɩwɛɛ se ɛkpaɣ ahoo 2 yaa halikuku piya+ 2 nɛ ɛkɔɔ Yehowa ɛsɩndaa, kediɣzaɣ kizinziku nɔnɔɔ taa nɛ ɛcɛlɩ sumasɩ nzɩ cɔjɔ. 15 Nɛ cɔjɔ kaɣ-sɩ laʋ, ɛkaɣ laʋ kʋɖʋmaɣ nɛ pɩkɛ kɩwɛɛkɩm yɔɔ kɩlaʋ, nɛ ɛlaa lɛɛka nɛ pɩkɛ kɩlaʋ kɩñaɣzʋʋ, nɛ cɔjɔ kaɣ-ɩ labʋ kɩwɛɛkɩm yɔɔ huuzuu sɔnzɩ Yehowa ɛsɩndaa, lɩm mbʋ pikpeŋaɣni-i yɔ pʋyɔɔ.

16 «“Nɛ ye kɩjabɩyʋʋ ekpemni abalʋ nɔɔyʋ yɔ, pɩwɛɛ se ɛsɔ e-tomnaɣ tɩŋa lɩm nɛ ɛkaɣ kɛʋ weyi ɛfɛyɩ kele kele yɔ nɛ pɩkɔɔ nɛ pɩtalɩ ɖanaɣ.+ 17 Ye kɩjabɩyʋʋ etukuni toko nakʋyʋ yaa tɔnɛ naɖɩyɛ yɔ, pɩwɛɛ se ɛcɔtɩ-ɖɩ, nɛ ɖɩkaɣ kɛʋ mbʋ pɩfɛyɩ kele kele yɔ pɩkɔɔ nɛ pɩtalɩ ɖanaɣ.

18 «“Ye abalʋ nɔɔyʋ nɛ halʋ nɔɔyʋ pasʋwa nɛ kɩjabɩyʋʋ kpemni abalʋ ɛnʋ yɔ, pɩwɛɛ se pɔsɔ lɩm, nɛ pakaɣ kɛʋ mba pɛfɛyɩ kele kele yɔ pɩkɔɔ nɛ pɩtalɩ ɖanaɣ.+

19 «“Ye calɩm ekpeŋni halʋ nɔɔyʋ yɔ, ɛkaɣ wɛʋ e-fenaɣ naʋ azuluma taa kɩyakɩŋ 7.+ Ye nɔɔyʋ etukuni-i yɔ, ɛyʋ ɛnʋ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ.+ 20 Mbʋ payɩ pɩ-yɔɔ ɛhɩnɩɣ e-fenaɣ naʋ azuluma alɩwaatʋ taa yɔ, pɩkaɣ kɛʋ mbʋ pɩfɛyɩ kele kele yɔ, nɛ mbʋ payɩ pɩ-yɔɔ ɛcakɩ yɔ, pɩkaɣ kɛʋ mbʋ pɩfɛyɩ kele kele yɔ.+ 21 Ye nɔɔyʋ etukuni halʋ ɛnʋ ɛ-ñalʋʋ* yɔ, pɩwɛɛ se ɛyʋ ɛnʋ ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ. 22 Ye halʋ ɛnʋ ɛɛcaɣ wonuu nakʋyʋ yɔɔ, nɛ nɔɔyʋ tukuni-kʋ yɔ, pɩwɛɛ se ɛyʋ ɛnʋ ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ. 23 Ye halʋ ɛnʋ ɛɛcaɣ ñalʋʋ* yɔɔ yaa wonuu nakʋyʋ yɔɔ nɛ nɔɔyʋ tukuni-kʋ yɔ, ɛyʋ ɛnʋ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ.+ 24 Nɛ ye abalʋ nɔɔyʋ nɛ halʋ ɛnʋ pasʋwa nɛ e-fenaɣ naʋ azuluma tukuni-i yɔ,+ ɖɩnɛ ɛlɛ abalʋ ɛnʋ ɛkaɣ kɛʋ weyi ɛfɛyɩ kele kele yɔ kɩyakɩŋ 7, nɛ ye abalʋ ɛnʋ ɛhɩnɩ ñalʋʋ nakʋyʋ yɔɔ yɔ, kɩkaɣ kɛʋ mbʋ pɩfɛyɩ kele kele yɔ.

25 «“Ye calɩm ekpeŋni halʋ nɔɔyʋ kɩyakɩŋ sakɩyɛ+ ŋgʋ pɩtɩkɛ e-fenaɣ naʋ alɩwaatʋ,+ yaa ye kɩyakɩŋ weyi calɩm kpeŋni-i yɔ ɩcɛzɩ kɩyakɩŋ weyi calɩm tiikpeŋni-i e-fenaɣ naʋ alɩwaatʋ taa yɔ, ɛkaɣ kɛʋ weyi ɛfɛyɩ kele kele yɔ kɩyakɩŋ weyi payɩ calɩm kpeŋni-i yɔ, ɛzɩ e-fenaɣ naʋ azuluma kɩyakɩŋ taa ɖɔɖɔ yɔ. 26 Ñalʋʋ* ŋgʋ kɩ-yɔɔ ɛhɩnɩɣ kɩyakɩŋ weyi calɩm kpeŋni-i yɔ, kɩkaɣ wɛʋ ɖɔɖɔ ɛzɩ ñalʋʋ ŋgʋ kɩ-yɔɔ ɛhɩnɩɣ e-fenaɣ naʋ azuluma alɩwaatʋ taa yɔ,+ nɛ ɛzɩ pɩwɛʋ e-fenaɣ naʋ azuluma alɩwaatʋ taa yɔ, wonuu ŋgʋ kɩ-yɔɔ ɛcakɩ yɔ, kɩkaɣ kɛʋ mbʋ pɩfɛyɩ kele kele yɔ. 27 Ye nɔɔyʋ etukuni wondu ndʋ yɔ, ɛkaɣ kɛʋ weyi ɛfɛyɩ kele kele yɔ, nɛ pɩwɛɛ se ɛcɔtɩ e-tokonaa, ɛsɔ lɩm, nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ.+

28 «“Ɛlɛ, ye calɩm mbʋ pikpeŋaɣni-i nɛ piyele nɛ ɛfɛyɩ kele kele yɔ, piyebi kpem yɔ, pɩwɛɛ se ɛkalɩ kɩyakɩŋ 7, nɛ pʋwayɩ lɛ ɛwɛɣ kele kele.+ 29 Kɩyakʋ 8 ñɩŋgʋ wiye lɛ, pɩwɛɛ se halʋ ɛnʋ ɛkpaɣ ahoo 2 yaa halikuku piya+ 2 nɛ ewoni sumasɩ nzɩ cɔjɔ, kediɣzaɣ kizinziku nɔnɔɔ taa.+ 30 Nɛ cɔjɔ kaɣ laʋ kʋɖʋmaɣ nɛ pɩkɛ kɩwɛɛkɩm yɔɔ kɩlaʋ, nɛ ɛlaa lɛɛka nɛ pɩkɛ kɩlaʋ kɩñaɣzʋʋ. Nɛ ɛkaɣ labʋ halʋ ɛnʋ kɩwɛɛkɩm yɔɔ huuzuu sɔnzɩ Yehowa ɛsɩndaa, calɩm mbʋ pikpeŋaɣni-i nɛ piyele nɛ ɛfɛyɩ kele kele yɔ pʋyɔɔ.+

31 «“Pɩwɛɛ se ɩsɩnɩ Izrayɛɛlɩ mba nɛ poposini pa-azuluma nɛ pɩtaakɛdɩ nɛ pepisi man-kɩɖanɖʋʋ ŋgʋ kɩwɛ pɛ-hɛkʋ taa yɔ+ nɛ pasɩ pa-azuluma yɔɔ.

32 «“Paɣtʋ tʋnɛ tɩ-yɔɔ pɩwɛɛ se pɔɖɔ ye lɩm nabʋyʋ ekpeŋni abalʋ nɔɔyʋ yɔ, ye kɩjabɩyʋʋ ekpeŋni abalʋ nɔɔyʋ nɛ piyele nɛ ɛfɛyɩ kele kele yɔ,+ 33 ye halʋ nɔɔyʋ ɛwɛ e-fenaɣ naʋ azuluma alɩwaatʋ taa yɔ,+ ye nabʋyʋ ekpeŋni abalʋ yaa halʋ nɔɔyʋ yɔ,+ nɛ ye abalʋ nɔɔyʋ nɛ halʋ weyi ɛfɛyɩ kele kele yɔ pasʋwa yɔ.”»

16 Aarɔɔnɩ pɩyalaa 2 ñɔtɩnɩ Yehowa nɛ pasɩ lɛ,+ Yehowa yɔɔdɩnɩ Moyizi pʋwayɩ. 2 Yehowa heyi Moyizi se: «Heyi ña-ɖalʋ Aarɔɔnɩ se pɩtɩmʋna se ɛsʋʋ yem yem paa ɛzɩmtaa lone kiɖeɖeye taa+ pɩsaʋ kikenduu wayɩ,+ Aɖakaɣ sulaɣ ɛsɩndaa, se pɩtaakɛdɩ nɛ ɛsɩ,+ mbʋ pʋyɔɔ yɔ mankaɣ man-tɩ wɩlʋʋ sulaɣ yɔɔ,+ mɩnʋʋ+ nakʋyʋ taa.

3 «Aarɔɔnɩ kaasʋʋ lone kiɖeɖeye taa lɛ, mbʋ pɩwɛɛ se ɛkpɛndɩna yɔ mbʋ yɔ: nɔ* abalɩñɩnʋ se pɩkɛ kɩwɛɛkɩm yɔɔ kɩlaʋ,+ nɛ ɛyaʋ se pɩkɛ kɩlaʋ kɩñaɣzʋʋ.+ 4 Pɩwɛɛ se esuu pɩsatʋ toko* kɩɖaɣlʋʋ+ kiɖeɖeu, nɛ ɛtɔɔlɩ pɩsatʋ cokodonaa*+ nɛ ehuuzini e-tomnaɣ yɔɔ, nɛ pɩwɛɛ se ɛta pɩsatʋ kɩtamʋʋ*+ nɛ ete pɩsatʋ ñʋʋ kitemuu.+ Pɩkɛ wondu kiɖeɖetu.+ Ɛkaɣ sɔʋ lɩm+ pʋcɔ nɛ esuu-tʋ.

5 «Pɩwɛɛ se ɛmʋ Izrayɛɛlɩ samaɣ cɔlɔ+ tuliŋ* 2 se pɩkɛ kɩwɛɛkɩm yɔɔ kɩlaʋ, nɛ ɛyaʋ kʋɖʋmʋʋ se pɩkɛ kɩlaʋ kɩñaɣzʋʋ.

6 «Pʋwayɩ lɛ, pɩwɛɛ se Aarɔɔnɩ ɛkɔnɩ kɩwɛɛkɩm yɔɔ kɩlaʋ nɔ abalɩñɩnʋ, weyi ɛkɛ ɛ-ñɩnʋ yɔ, nɛ ɛla kɩwɛɛkɩm yɔɔ huuzuu sɔnzɩ ɛ-maɣmaɣ ɛ-yɔɔ+ nɛ ɛ-ɖɩɣa yɔɔ.

7 «Pʋwayɩ lɛ, ɛkaɣ kpaɣʋ pʋŋ ɛnɩ ɩ-naalɛ nɛ ewoni-i Yehowa ɛsɩndaa, kediɣzaɣ kizinziku nɔnɔɔ taa. 8 Nɛ Aarɔɔnɩ tɔ pee pʋŋ ɛnɩ ɩ-naalɛ ɩ-yɔɔ, piye kʋɖʋmɖɩyɛ kɛɣ Yehowa ñɩnɖɛ nɛ lɛɛɖɛ ñɛkɛ Azazɛɛlɩ* ñɩnɖɛ. 9 Aarɔɔnɩ kaɣ kpaɣʋ pʋnʋ weyi piye tɔlɩ ɛ-yɔɔ+ se ɛkɛ Yehowa ñɩnʋ yɔ nɛ ɛlaanɩ kɩwɛɛkɩm yɔɔ kɩlaʋ. 10 Ɛlɛ pʋnʋ weyi piye tɔlɩ ɛ-yɔɔ se ɛkɛ Azazɛɛlɩ ñɩnʋ yɔ, pɩwɛɛ se powoni-i nɛ ɛ-ɛsa Yehowa ɛsɩndaa nɛ pala kɩwɛɛkɩm yɔɔ huuzuu sɔnzɩ ɛ-yɔɔ, nɛ pɩsa nɛ petiyini-i Azazɛɛlɩ, kañɩmbusuu taa.+

11 «Aarɔɔnɩ kaɣ kɔnʋʋ kɩwɛɛkɩm yɔɔ kɩlaʋ nɔ abalɩñɩnʋ, weyi ɛkɛ ɛ-maɣmaɣ ɛ-ñɩnʋ yɔ, nɛ ɛla kɩwɛɛkɩm yɔɔ huuzuu sɔnzɩ ɛ-maɣmaɣ ɛ-yɔɔ nɛ ɛ-ɖɩɣa yɔɔ; pʋwayɩ lɛ, ɛkʋ kɩwɛɛkɩm yɔɔ kɩlaʋ nɔ abalɩñɩnʋ ɛnʋ, weyi ɛkɛ ɛ-maɣmaɣ ɛ-ñɩnʋ yɔ.+

12 «Pʋwayɩ lɛ, pɩwɛɛ se ɛkpaɣ miŋ ñanaɣ+ nɛ ekuu miŋ mamala altaaru yɔɔ+ Yehowa ɛsɩndaa nɛ pisu ka-taa, nɛ ecozi ŋgee tɩlaaɖɩ+ sɔzɩŋ ñɩŋgʋ ŋgʋ kɩkpɩzɩ camɩyɛ yɔ nɛ pisu nikpila 2 nɛ ɛkɔnɩ pɩtɩŋa pɩsaʋ kikenduu wayɩ.+ 13 Nɛ ɛɖʋ ŋgee tɩlaaɖɩ ŋgʋ miŋ taa Yehowa ɛsɩndaa,+ nɛ tɩlaaɖɩ ñɔsɩ kpa nɛ sihu Aɖakaɣ sulaɣ+ yɔɔ, ŋga kɛwɛ Aseɣɖe Lɩzʋʋ+ yɔɔ yɔ, nɛ ɛtaasɩ.

14 «Pɩwɛɛ se ɛkpaɣ nɔ abalɩñɩnʋ ɛnʋ ɛ-calɩm+ hɔɔlʋʋ nakʋyʋ nɛ ɛmɩzɩ-pʋ nɛ e-niye sulaɣ ɛsɩndaa wɩsɩ ɖɩlɩyɛ hɔɔlʋʋ yɔɔ, ɛmɩzɩ calɩm mbʋ pɩ-hɔɔlʋʋ nakʋyʋ nɛ e-niye tam 7 sulaɣ ɛsɩndaa.+

15 «Pʋwayɩ lɛ, pɩwɛɛ se ɛkʋ kɩwɛɛkɩm yɔɔ kɩlaʋ pʋnʋ, weyi ɛkɛ samaɣ ñɩnʋ yɔ,+ nɛ ɛsʋnɩ ɛ-calɩm pɩsaʋ kikenduu wayɩ+ nɛ ɛlabɩ-pʋ+ ɖeyi ɖeyi ɛzɩ ɛɛlabʋ nɔ abalɩñɩnʋ calɩm yɔ; ɛmɩzɩ-pʋ nɛ sulaɣ yɔɔ kiŋ, sulaɣ ɛsɩndaa.

16 «Izrayɛɛlɩ mba azuluma lakasɩ, pa-kaañamtʋ nɛ pa-kɩdɛkɛdɩm yɔɔ lɛ, pɩwɛɛ se ɛla lone kiɖeɖeye kɩwɛɛkɩm yɔɔ huuzuu sɔnzɩ,+ nɛ mbʋ ɖɔɖɔ pɩwɛɛ se ɛla kediɣzaɣ kizinziku ŋgʋ kɩwɛ pɛ-hɛkʋ taa pa-azuluma lakasɩ hɛkʋ taa yɔ.

17 «Kpaɣnɩ alɩwaatʋ ndʋ ɛsʋʋ se ɛla kɩwɛɛkɩm yɔɔ huuzuu sɔnzɩ lone kiɖeɖeye taa nɛ piwolo pɩsɩɩnɩ alɩwaatʋ ndʋ ɛlɩɣ yɔ, pɩtɩpɔzɩ se nɔɔyʋ ɛwɛɛ kediɣzaɣ kizinziku tɛɛ. Ɛkaɣ labʋ kɩwɛɛkɩm yɔɔ huuzuu sɔnzɩ ɛ-maɣmaɣ nɛ ɛ-ɖɩɣa ñʋʋ taa+ nɛ Izrayɛɛlɩ samaɣ kpeekpe ñʋʋ taa.+

18 «Pʋwayɩ lɛ, pɩwɛɛ se ɛlɩɩ nɛ ewolo altaaru+ ŋgʋ kɩwɛ Yehowa ɛsɩndaa yɔ kɩ-cɔlɔ nɛ ɛlabɩ-kʋ kɩwɛɛkɩm yɔɔ huuzuu sɔnzɩ, pɩwɛɛ se ɛkpaɣ nɔ abalɩñɩnʋ calɩm hɔɔlʋʋ nakʋyʋ nɛ ɛkpaɣ ɖɔɖɔ pʋnʋ calɩm hɔɔlʋʋ nakʋyʋ nɛ ɛtaa-pʋ altaaru hɩŋ tɩŋa yɔɔ. 19 Pɩwɛɛ ɖɔɖɔ se ɛmɩzɩ altaaru yɔɔ calɩm mbʋ pɩ-hɔɔlʋʋ nakʋyʋ nɛ e-niye tam 7 nɛ ɛñalɩ-kʋ Izrayɛɛlɩ mba azuluma lakasɩ yɔɔ nɛ ɛpɩsɩ-kʋ kiɖeɖeu.

20 «Ɛtɛŋ lone kiɖeɖeye, kediɣzaɣ kizinziku nɛ altaaru kɩwɛɛkɩm yɔɔ huuzuu sɔnzɩ+ labʋ lɛ,+ ɛkɔnɩ ɖɔɖɔ pʋnʋ weyi ɛ nɛ ɛ-ɛsa yɔ.+ 21 Aarɔɔnɩ kaɣ tɩnʋʋ e-nesi nzɩ sɩ-naalɛ pʋnʋ weyi ɛwɛnɩ ɛ-ɛsa yɔ ɛ-ñʋʋ taa nɛ ekuli Izrayɛɛlɩ mba kpeekpe kɩwɛɛkɩm, pa-kaañamtʋ nɛ pa-kɩdɛkɛdɩm lakasɩ yɔɔ ɛ-ñʋʋ taa, nɛ ɛsʋʋ-ɩ sɩ+ nɛ ɛɖʋzɩ-ɩ abalʋ weyi ɛtɛm ɛ-tɩ ñɔɔzʋʋ nɛ ɛɖaŋ yɔ* e-nesi taa nɛ ɛlɛ ɖɛnɩ-ɩ kañɩmbusuu taa. 22 Nɛ pʋnʋ kaɣ kpaɣʋ pa-kɩwɛɛkɩm tɩŋa+ nɛ ɛɖɛnɩ kañɩmbusuu taa;+ ɛkaɣ pʋnʋ ɖɔɔnʋʋ nɛ ɛɖɛɛ kañɩmbusuu taa.+

23 «Pʋwayɩ lɛ, Aarɔɔnɩ kaɣ sʋʋ kediɣzaɣ kizinziku tɛɛ nɛ ɛhɔzɩ pɩsatʋ* wondu ndʋ eesuwa nɛ ɛsʋʋ lone kiɖeɖeye taa yɔ, nɛ ɛsɩɩ-tʋ peeɖe. 24 Nɛ pɩwɛɛ se ɛsɔ lɩm*+ lone kiɖeɖeye naɖɩyɛ taa nɛ esuu e-wondu;+ pʋwayɩ lɛ, ɛlɩɩ nɛ ɛlaa ɛ-kɩlaʋ kɩñaɣzʋʋ+ nɛ samaɣ kɩlaʋ kɩñaɣzʋʋ,+ nɛ ɛla kɩwɛɛkɩm yɔɔ huuzuu sɔnzɩ ɛ-maɣmaɣ ɛ-yɔɔ nɛ samaɣ yɔɔ.+ 25 Nɛ ɛñaɣzɩ kɩwɛɛkɩm yɔɔ kɩlaʋ num, altaaru yɔɔ nɛ ñɔsɩ kpa.

26 «Abalʋ weyi ɛɖɛnɩ Azazɛɛlɩ+ pʋnʋ yɔ, pɩwɛɛ se ɛcɔtɩ e-wondu nɛ ɛsɔ lɩm, pʋwayɩ lɛ, ɛpɩzɩɣ nɛ ɛpɩsɩ ɖigbeɣliye* taa.

27 «Piyele nɛ kɩwɛɛkɩm yɔɔ kɩlaʋ nɔ abalɩñɩnʋ nɛ kɩwɛɛkɩm yɔɔ kɩlaʋ pʋnʋ, pʋ-tɔbʋʋ se kpɩna wena pasʋnɩ a-calɩm lone kiɖeɖeye taa nɛ palabɩnɩ kɩwɛɛkɩm yɔɔ huuzuu sɔnzɩ yɔ, alɛ lɛ, pakaɣ-yɛ lɩnʋʋ ɖigbeɣliye wayɩ, nɛ pañaɣzɩ miŋ a-tɔna, a-nandʋ nɛ a-pɩndʋ.+ 28 Weyi ɛñaɣzɩɣ pɩtɩŋa mbʋ yɔ miŋ yɔ, pɩwɛɛ se ɛcɔtɩ e-wondu nɛ ɛsɔ lɩm; pʋwayɩ lɛ, ɛpɩzɩɣ nɛ ɛsʋʋ ɖigbeɣliye taa.

29 «Pʋnɛ pɩkɛɣnɩ-mɩ tamtam paɣtʋ: Fenaɣ 7 ñɩŋga, kɩyakʋ 10 ñɩŋgʋ wiye lɛ, pɩwɛɛ se ɩnazɩ mɩ-tɩ,* nɛ pɩtɩpɔzɩ se mɩ-taa nɔɔyʋ ɛla tʋmɩyɛ naɖɩyɛ,+ paa ɛyʋ ɛnʋ ɛtɩɩkɛ tɛtʋ taa pɩɣa yaa ɛgɔm weyi ɛwɛ mɩ-hɛkʋ taa yɔ. 30 Puwiye lɛ, pakaɣ-mɩ labʋ kɩwɛɛkɩm yɔɔ huuzuu sɔnzɩ+ nɛ posusi se ɩwɛ kele kele. Pakaɣ-mɩ kpeɣu mɩ-kɩwɛɛkɩm tɩŋa nɛ ɩwɛɛ kele kele Yehowa ɛsɩndaa.+ 31 Pɩkɛnɩ-mɩ hɛzʋʋ kiya sabaatɩ, nɛ pɩwɛɛ se ɩnazɩ mɩ-tɩ.*+ Pɩkɛnɩ tamtam paɣtʋ.

32 «Cɔjɔ weyi pata-ɩ num+ nɛ pakpa-ɩ cɔjɔtʋ+ ɛ-caa lone taa+ yɔ, ɛkaɣ labʋ kɩwɛɛkɩm yɔɔ huuzuu sɔnzɩ nɛ esuu e-wondu ndʋ palʋ-tʋ nɛ pɩsatʋ yɔ,*+ wondu kiɖeɖetu.+ 33 Ɛkaɣ labʋ kɩwɛɛkɩm yɔɔ huuzuu sɔnzɩ Lone Kiɖeɖeye nɖɩ ɖɩkpaɖaa yɔ,+ kediɣzaɣ kizinziku+ nɛ altaaru;+ nɛ ɛkaɣ labʋ cɔjɔnaa nɛ samaɣ taa ɛyaa kpeekpe kɩwɛɛkɩm yɔɔ huuzuu sɔnzɩ.+ 34 Pɩkaɣ-mɩ kɛnʋʋ tamtam paɣtʋ,+ se pala kɩwɛɛkɩm yɔɔ huuzuu sɔnzɩ Izrayɛɛlɩ mba tam kʋɖʋm pɩnaɣ taa, pa-kɩwɛɛkɩm tɩŋa yɔɔ.»+

Nɛ ɛla ɖeyi ɖeyi ɛzɩ Yehowa ɖʋʋ Moyizi paɣtʋ yɔ.

17 Yehowa tasɩ heyuu Moyizi se: 2 «Yɔɔdɩnɩ Aarɔɔnɩ nɛ ɛ-pɩyalaa nɛ Izrayɛɛlɩ mba kpeekpe nɛ ŋheyi-wɛ se: “Paɣtʋ tʋnɛ Yehowa ɖʋwa:

3 «“‘Ye Izrayɛɛlɩ ɖɩɣa taa tʋ nɔɔyʋ ɛkʋ nɔ abalɩñɩnʋ, yaa ɛyaʋ yaa pʋnʋ nɔɔyʋ ɖigbeɣliye* taa yaa ɖigbeɣliye wayɩ 4 mbʋ ɛzɩ ɛɛkɔnɩ kpɩnɛ nɖɩ kediɣzaɣ kizinziku nɔnɔɔ taa nɛ ɛkʋ-ɖɩ nɛ ɛlaa-ɖɩ Yehowa, Yehowa kɩɖanɖʋʋ ɛsɩndaa yɔ, ɛyʋ ɛnʋ ɛtɔɔ calɩm kpɛdʋʋ kɩmɩyɛ nɛ pakaɣ-ɩ ɖɩ pɔzʋʋ. Ɛkpɛdɩ calɩm, nɛ ɛyʋ ɛnʋ pɩwɛɛ se palɩzɩ-ɩ* ɛ-samaɣ hɛkʋ taa. 5 Manɖʋ paɣtʋ ndʋ se piyele nɛ Izrayɛɛlɩ mba kɔnɩ kpɩna wena palaɣ lɛɛlɛɛyɔ ñɩtʋ taa yɔ Yehowa; pɔkɔnɩ-yɛ cɔjɔ, kediɣzaɣ kizinziku nɔnɔɔ taa. Pɩwɛɛ se palaa kpɩna ana Yehowa nɛ akɛ laŋhɛzɩyɛ kɩlaŋ.+ 6 Nɛ pɩwɛɛ se cɔjɔ ɛmɩzɩ calɩm Yehowa altaaru yɔɔ, kediɣzaɣ kizinziku nɔnɔɔ taa nɛ ɛñaɣzɩ num nɛ ñɔsɩ kpa nɛ pɩkɛ sɔzɩŋ weyi ɛkɛdɩɣnɩ Yehowa yɔ.*+ 7 Pʋyɔɔ lɛ, pɩfɛyɩ se patasɩ kɩlaŋ laʋ aleewaa mba panɩɣzɩnɩ pʋnʋ+ yɔ,* mba pa nɛ wɛ palakɩ hayitu yɔ.+ Paɣtʋ tʋnɛ tɩkaɣ kɛʋ tamtam paɣtʋ mɩ nɛ mɩ-lʋlʋʋ taa mba* tɩŋa.’”

8 «Pɩwɛɛ se ŋheyi-wɛ se: “Ye Izrayɛɛlɩ ɖɩɣa taa tʋ nɔɔyʋ yaa ɛgɔm nɔɔyʋ, weyi ɛwɛ mɩ-hɛkʋ taa yɔ, ɛla kɩlaʋ kɩñaɣzʋʋ yaa kɩlaʋ nakʋyʋ 9 nɛ ɛtɩkɔnɩ-kʋ kediɣzaɣ kizinziku nɔnɔɔ taa se ɛlaa-kʋ Yehowa yɔ, pɩwɛɛ se palɩzɩ-ɩ* ɛ-samaɣ hɛkʋ taa.+

10 «“Ye Izrayɛɛlɩ ɖɩɣa taa tʋ nɔɔyʋ yaa ɛgɔm nɔɔyʋ, weyi ɛwɛ mɩ-hɛkʋ taa yɔ, ɛtɔɔ calɩm nabʋyʋ yɔ,+ mankaɣ ɛsa pam nɛ ɛyʋ* ɛnʋ, weyi ɛtɔkɩ calɩm yɔ, mankaɣ-ɩ kʋʋ* ɛ-samaɣ hɛkʋ taa. 11 Mbʋ pʋyɔɔ yɔ tomnaɣ wezuu* wɛ calɩm taa,+ nɛ mɛncɛlɩ-mɩ pʋ se ɩlabɩnɩ mɩ-tɩ* kɩwɛɛkɩm yɔɔ huuzuu sɔnzɩ altaaru yɔɔ,+ mbʋ pʋyɔɔ yɔ calɩm huuzuuni kɩwɛɛkɩm yɔɔ,+ mbʋ pʋyɔɔ yɔ wezuu* wɛ pɩ-taa. 12 Pʋyɔɔ meheyi Izrayɛɛlɩ mba se: ‘Pɩfɛyɩ se mɩ-taa nɔɔyʋ* ɛtɔɔ calɩm, nɛ pɩfɛyɩ ɖɔɖɔ se agɔma mba pɛwɛ mɩ-hɛkʋ taa yɔ+ pa-taa nɔɔyʋ ɛtɔɔ calɩm.’+

13 «“Ye Izrayɛɛlɩ mba taa nɔɔyʋ yaa agɔma mba pɛwɛ mɩ-hɛkʋ taa yɔ pa-taa nɔɔyʋ ewobi ɛgbandʋ nɛ ɛkpa kpɩnɛ naɖɩyɛ yaa sumaɣ nakɛyɛ ŋga pɔtɔkɩ yɔ yɔ, pɩwɛɛ se ɛpɩyɩ mbʋ ɛkpawa yɔ pɩ-calɩm tataa+ nɛ ehuuzi tɛtʋ pɩ-yɔɔ. 14 Mbʋ pʋyɔɔ yɔ paa tomnaɣ ŋga lɛ, ke-wezuu* lɛ ka-calɩm, mbʋ pʋyɔɔ yɔ wezuu* wɛ pɩ-taa. Pʋyɔɔ meheyi Izrayɛɛlɩ mba se: ‘Pɩfɛyɩ se ɩtɔɔ tomnaɣ nakɛyɛ calɩm, mbʋ pʋyɔɔ yɔ paa tomnaɣ ŋga lɛ, ke-wezuu* lɛ ka-calɩm. Weyi ɛtɔkɩ-pʋ yɔ, pakaɣ-ɩ kʋʋ.’*+ 15 Ye nɔɔyʋ,* paa pɩtɩɩkɛ tɛtʋ taa pɩɣa yaa ɛgɔm nɔɔyʋ, ehiɣ kpɩnɛ kɩsɩbɩyɛ naɖɩyɛ yaa nɖɩ tɛtɛgbɩnɛ naɖɩyɛ cɩyaa yɔ, nɛ ɛtɔɔ-ɖɩ yɔ,+ pɩwɛɛ se ɛcɔtɩ e-tokonaa nɛ ɛsɔ lɩm nɛ ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ;+ pʋwayɩ lɛ, ɛkaɣ wɛʋ kele kele. 16 Ɛlɛ ye ɛtɩcɔtɩ-wɛ nɛ ɛtɩsɔ lɩm* ɖɔɖɔ yɔ, pakaɣ-ɩ pɔzʋʋ akɔnta ɛ-kɩwɛɛkɩm yɔɔ.”»+

18 Yehowa tasɩ yɔɔdɩnʋʋ Moyizi nɛ eheyi-i se: 2 «Yɔɔdɩnɩ Izrayɛɛlɩ mba nɛ ŋheyi-wɛ se: “Mɛkɛnɩ mɩ-Ɛsɔ Yehowa.+ 3 Pɩfɛyɩ se ɩla ɛzɩ palakʋʋ Ejipiti ɛjaɖɛ taa, ɖenɖe ɩɩwɛɛ yɔ; nɛ pɩfɛyɩ se ɩla mbʋ palakɩ Kanaŋ ɛjaɖɛ taa, ɖenɖe mowokini-mɩ yɔ.+ Nɛ pɩfɛyɩ se ɩla pɔ-sɔnzɩ.* 4 Pɩwɛɛ se ɩɖɔ mɔn-tɔm hʋʋ paɣtʋ yɔɔ, nɛ pɩwɛɛ ɖɔɖɔ se ɩɖɔkɩ man-paɣtʋ nɛ ɩɖɔ tɩ-yɔɔ.+ Mɛkɛnɩ mɩ-Ɛsɔ Yehowa. 5 Pɩwɛɛ se ɩɖɔkɩ man-paɣtʋ nɛ mɔn-tɔm hʋʋ paɣtʋ; weyi ɛɖɔŋ tɩ-yɔɔ yɔ, tɩkaɣ yebu nɛ ɛwɛɛ wezuu.+ Mɛkɛnɩ Yehowa.

6 «“Pɩfɛyɩ se mɩ-taa abalʋ nɔɔyʋ ɛñɔtɩnɩ ɛ-hɔʋ taa tʋ nɔɔyʋ se ɛsʋʋnɩ-ɩ.*+ Mɛkɛnɩ Yehowa. 7 Pɩfɛyɩ se ña nɛ ña-caa ɩsʋʋnɩ ɖama, nɛ pɩfɛyɩ ɖɔɖɔ se ña nɛ ño-ɖoo ɩsʋʋnɩ ɖama. Ɛkɛ ño-ɖoo nɛ pɩfɛyɩ se ŋsʋʋnɩ-ɩ.

8 «“Pɩfɛyɩ se ŋsʋʋnɩ ña-caa halʋ.+ Pɩɖʋʋ ña-caa fɛyɛ.*

9 «“Pɩfɛyɩ se ŋsʋʋnɩ ñɔ-kɔɔ yaa ñe-neu, paa ɛtɩɩkɛ ña-caa pɛlɛ yaa ño-ɖoo pɛlɛ yɔ, paa palʋlɩ ña nɛ ɩ ɖɩɣa kʋɖʋmaɣ taa yaa palʋlɩ-ɩ nɛ agbaaɣdaa kɔyɔ.+

10 «“Pɩfɛyɩ se ŋsʋʋnɩ ña-pɩyalʋ pɛlɛ yaa ñɛ-pɛlɛ pɛlɛ, mbʋ pʋyɔɔ yɔ pɛkɛ ña-maɣmaɣ ña-ndaakpeɖe.

11 «“Pɩfɛyɩ se ŋsʋʋnɩ ña-caa halʋ pɛlɛ, ña-caa pɛlɛ, mbʋ pʋyɔɔ yɔ ɛkɛ ñɔ-kɔɔ yaa ñe-neu.

12 «“Pɩfɛyɩ se ŋsʋʋnɩ ña-caa kɔɔ yaa ña-caa neu halɩñɩnʋ. Ɛ nɛ ña-caa paka calɩm.+

13 «“Pɩfɛyɩ se ŋsʋʋnɩ ño-ɖoo kɔɔ yaa ño-ɖoo neu halɩñɩnʋ, mbʋ pʋyɔɔ yɔ ɛ nɛ ño-ɖoo paka calɩm.

14 «“Pɩfɛyɩ se ŋsʋʋnɩ ña-caa ɖalʋ halʋ yaa ña-caa neu halʋ nɛ piyele nɛ ŋɖʋ fɛyɛ ña-caa ɖalʋ yaa ña-caa neu.* Halʋ ɛnʋ ɛkɛ ñɔ-hɔʋ taa tʋ.+

15 «“Pɩfɛyɩ se ŋsʋʋnɩ ño-wolu.+ Ɛkɛ ña-pɩyalʋ halʋ, nɛ pɩfɛyɩ se ŋsʋʋnɩ-ɩ.

16 «“Pɩfɛyɩ se ŋsʋʋnɩ ña-ɖalʋ halʋ yaa ñe-neu halʋ,+ mbʋ pʋyɔɔ yɔ pɩɖʋʋ fɛyɛ ña-ɖalʋ yaa ñe-neu.*

17 «“Pɩfɛyɩ se ŋsʋʋnɩ halʋ nɛ ŋtasɩ sʋnʋʋ ɛ-pɛlɛ.+ Pɩfɛyɩ se ŋkpaɣ halʋ ɛnʋ ɛ-pɩyalʋ pɛlɛ yaa ɛ-pɛlɛ pɛlɛ nɛ ŋsʋʋnɩ-ɩ. Pɛkɛnɩ halʋ ɛnʋ ɛ-hɔʋ taa ñɩma mba pɔñɔtɩnɩ-ɩ yɔ; pɩkɛnɩ kʋzɔɔtʋ lakasɩ.*

18 «“Alɩwaatʋ ndʋ ña-halʋ wɛnɩ ɛ-ɛsa yɔ, pɩfɛyɩ se ŋkpaɣ e-neu yaa ɛ-kɔɔ nɛ ŋsɔzɩ ɛ-yɔɔ se ɛkɛ ɛ-yɔnɖɔŋ+ nɛ ŋsʋʋnɩ ɛlɛ.

19 «“Pɩfɛyɩ se ŋñɔtɩnɩ halʋ weyi ɛwɛ e-fenaɣ naʋ azuluma taa yɔ se ŋsʋʋnɩ-ɩ.+

20 «“Pɩfɛyɩ se ŋsʋʋnɩ ɛyʋ lɛlʋ* halʋ, piyeki nɛ ŋpɩsɩ weyi ɛfɛyɩ kele kele yɔ.+

21 «“Pɩfɛyɩ se ŋyele nɛ pakpaɣ ña-lʋlʋʋ taa tʋ nɔɔyʋ nɛ palaa* Molɛɛkɩ.+ Pɩfɛyɩ se ŋla mbʋ nɛ piyele nɛ ŋpisi ñɛ-Ɛsɔ hɩɖɛ.+ Mɛkɛnɩ Yehowa.

22 «“Pɩfɛyɩ se ŋsʋʋnɩ abalʋ ɛzɩ ŋsʋʋnʋʋ halʋ yɔ.+ Pɩkɛnɩ kʋzɔɔtʋ lakasɩ.

23 «“Pɩfɛyɩ se abalʋ ɛsʋʋnɩ kpɩnɛ nɛ piyele nɛ ɛpɩsɩ weyi ɛfɛyɩ kele kele yɔ; nɛ pɩfɛyɩ ɖɔɖɔ se halʋ ɛcɛlɩ ɛ-tɩ kpɩnɛ se ɛ nɛ ɖɩ pasʋʋ.+ Pɩkɛnɩ mbʋ pɩtɩmʋna yɔ.

24 «“Itaayele nɛ lakasɩ nzɩ sɩ-taa nasɩyɩ la nɛ ɩpɩsɩ mba pɛfɛyɩ kele kele yɔ, mbʋ pʋyɔɔ yɔ lakasɩ nzɩ sɩ-tɩŋa ajɛɛ wena menɖiɣni ɖɔɔnʋʋ mɩ-ɛsɩndaa yɔ apisini a-tɩ.+ 25 Pʋyɔɔ ɛjaɖɛ fɛyɩ kele kele, nɛ mankaɣ ɖɩ-nɩŋgbaŋʋʋ hɔm ɖɩ-kɩwɛɛkɩm yɔɔ, nɛ ɖɩkaɣ ɖɩ-ɛyaa hoou nɛ ɖɩtɔ.+ 26 Ɛlɛ mɩ lɛ, pɩwɛɛ se ɩɖɔkɩ man-paɣtʋ nɛ mɔn-tɔm hʋʋ paɣtʋ,+ nɛ pɩfɛyɩ se mɩ-taa nɔɔyʋ ɛla kʋzɔɔtʋ lakasɩ nzɩ sɩ-taa nasɩyɩ, paa pɩtɩɩkɛ tɛtʋ taa pɩɣa yaa agɔma mba pɛwɛ mɩ-hɛkʋ taa yɔ pa-taa nɔɔyʋ yɔ.+ 27 Mbʋ pʋyɔɔ yɔ mba paalɛyɩ-mɩ wɛʋ ɛjaɖɛ nɖɩ ɖɩ-taa yɔ, paalabɩ kʋzɔɔtʋ lakasɩ nzɩ sɩ-tɩŋa+ nɛ pʋyɔɔ ɛjaɖɛ fɛyɩ kele kele. 28 Ðɩnɛ ɛlɛ iipisiɣ ɛjaɖɛ nɛ pɩpɔzɩ se ɖihoo-mɩ nɛ ɖɩtɔ ɛzɩ ɖɩkɔŋʋʋ hoou mba paalɛyɩ-mɩ wɛʋ ɖɩ-taa yɔ nɛ ɖɩtɔ yɔ. 29 Ye nɔɔyʋ ɛlabɩ kʋzɔɔtʋ lakasɩ nzɩ sɩ-taa nasɩyɩ kɔyɔ, mba* payɩ palakɩ-sɩ yɔ, pɩwɛɛ se palɩzɩ-wɛ* pa-samaɣ hɛkʋ taa. 30 Pɩwɛɛ se ɩɖɔ man-paɣtʋ yɔɔ nɛ ɩtaala kʋzɔɔtʋ sɔnzɩ nzɩ palakaɣ yɔ sɩ-taa nasɩyɩ,+ se pɩtaakɛdɩ nɛ sipisi-mɩ. Mɛkɛnɩ mɩ-Ɛsɔ Yehowa.”»

19 Yehowa tasɩ yɔɔdɩnʋʋ Moyizi nɛ eheyi-i se: 2 «Yɔɔdɩnɩ Izrayɛɛlɩ mba samaɣ kpeekpe nɛ ŋheyi-kɛ se: “Pɩwɛɛ se ɩkɛ kiɖeɖema, mbʋ pʋyɔɔ yɔ ma mɩ-Ɛsɔ Yehowa lɛ, mɛnkɛ kiɖeɖeu.+

3 «“Pɩwɛɛ se mɩ-taa paa anɩ ɛña* e-ɖoo nɛ ɛ-caa,+ nɛ pɩwɛɛ se ɩɖɔkɩ man-sabaatɩwaa.+ Mɛkɛnɩ mɩ-Ɛsɔ Yehowa. 4 Ɩtaapɩsɩnɩ ɛsɔnaa mba paawazɩɣ pʋyʋ yɔ pɔ-yɔɔ,+ nɛ itaayolisi ñɩɣtʋ nɛ ilubini mɩ-tɩ ɛsɔnaa.+ Mɛkɛnɩ mɩ-Ɛsɔ Yehowa.

5 «“Ye ɩlaɣ laŋhɛzɩyɛ kɩlaʋ Yehowa yɔ,+ pɩwɛɛ se ɩlaa-kʋ ɛzɩ pɩpɔzʋʋ yɔ nɛ piyele nɛ mɩ-tɔm kɛdɩnɩ-ɩ.+ 6 Pɩwɛɛ se ɩtɔɔ mɩ-kɩlaʋ kpɩnɛ nandʋ kɩyakʋ ŋgʋ ɩlaɣ-kʋ yɔ nɛ tɛʋ kifemuu, ɛlɛ nandʋ ndʋ tɩkazɩɣ nɛ pɩtalɩ kɩyakʋ tozo ñɩŋgʋ wiye yɔ, pɩwɛɛ se ɩsɔbɩ-tʋ miŋ.+ 7 Ɛlɛ, ye pɔtɔɔ tɩ-taa natʋyʋ kɩyakʋ tozo ñɩŋgʋ wiye yɔ, tɩkɛɣnɩ mbʋ pɩɖʋʋ ɖɩwɩzɩyɛ yɔ nɛ maakaɣ-tʋ mʋʋ. 8 Weyi ɛtɔkɩ-tʋ yɔ, pakaɣ-ɩ pɔzʋʋ akɔnta ɛ-kɩwɛɛkɩm yɔɔ, mbʋ pʋyɔɔ yɔ episi Yehowa wonuu kiɖeɖeu, nɛ pɩwɛɛ se palɩzɩ* ɛyʋ* ɛnʋ ɛ-samaɣ taa.

9 «“Ɩɩkʋŋ mɩ-ɛjaɖɛ taa tɔɔnaɣ lɛ, pɩfɛyɩ se ŋkʋ ña-hayɩm kpɛnzɩ yɔɔ cɩɖɩ cɩɖɩ nɛ pɩfɛyɩ ɖɔɖɔ se ŋcazɩ ajaza.*+ 10 Pɩtasɩ lɛ, pɩfɛyɩ se ŋcazɩ ñe-viiñi pee wena ŋkoyaa nɛ pɩkazɩ yɔ, nɛ pɩfɛyɩ ɖɔɖɔ se ŋtɔzɩ ñe-viiñi pee wena amɩzaa yɔ. Pɩwɛɛ se ŋyebini-yɛ kʋñɔndʋ*+ nɛ ɛgɔm. Mɛkɛnɩ mɩ-Ɛsɔ Yehowa.

11 «“Ɩtaamɩlɩ,+ ɩtaacɛtɩ,+ nɛ itaapeɣzi ɖɔɖɔ ɖama. 12 Itaaɖuu cɛtɩm ɖuutu ma-hɩɖɛ taa+ nɛ piyele nɛ pipisi ñɛ-Ɛsɔ hɩɖɛ. Mɛkɛnɩ Yehowa. 13 Taapeɣzi ɛyʋ lɛlʋ nɛ ŋmʋ ɛ-ñɩm,+ taamɩlɩ nɔɔyʋ wondu.+ Pɩfɛyɩ se ŋsɩɩ abaa tʋ kɩhɛyʋʋ ñɔ-cɔlɔ ɖoo pilim nɛ tɛʋ kɔɔ nɛ kife.+

14 «“Pɩfɛyɩ se ŋlɔ nɔɔ kɩdɛkɛdaɣ tandam yɔɔ, nɛ pɩfɛyɩ ɖɔɖɔ se ŋsɩɩ yʋlʋm ɛsɩndaa mbʋ pituuluu yɔ;+ pɩwɛɛ se ŋse sɔɔndʋ ñɛ-Ɛsɔ.+ Mɛkɛnɩ Yehowa.

15 «“Itaamuli tɔm hʋʋ taa. Taatɩnɩ kʋñɔndʋ yɔɔ se ɛkɛ kʋñɔndʋ,* nɛ taatɩnɩ ñɩm tʋ yɔɔ.+ Pɩwɛɛ se ŋhʋʋ ɛyʋ lɛlʋ tɔm siɣsiɣ.

16 «“Pɩfɛyɩ se ŋcɔʋ nɛ ŋlakɩ kɔlɔmɔtʋ ña-samaɣ taa.+ Pɩfɛyɩ se ŋkpɛzɩ ɛyʋ lɛlʋ se ŋkpɛdɩɣ ɛ-calɩm.*+ Mɛkɛnɩ Yehowa.

17 «“Taapaɖɩ ño-koobu ña-laŋɩyɛ taa.+ Pɩkɛnɩ kɩjɛyʋʋ se ŋkalɩ ña-taabalʋ,+ ɖɩnɛ ɛlɛ ŋŋkaɣ labʋ kɩdɛkɛdɩm ɛzɩ ɛnʋ yɔ.

18 «“Taakpa kɩmɩyɛ,+ nɛ taacaɣnɩ ña-samaɣ taa tʋ nɔɔyʋ; sɔɔlɩ ɛyʋ lɛlʋ ɛzɩ ña-maɣmaɣ yɔ.+ Mɛkɛnɩ Yehowa.

19 «“Pɩwɛɛ se ɩɖɔ man-paɣtʋ yɔɔ: Pɩfɛyɩ se ŋyele nɛ ña-ɖɩɣa kpɩna ndɩ ndɩ 2 kpa ɖama. Pɩfɛyɩ se ŋɖuu ɖomasɩ ndɩ ndɩ 2 ña-hayɩm taa,+ nɛ pɩfɛyɩ se ŋsuu toko ŋgʋ pɛkpɛndɩ pɩsatʋ ndɩ ndɩ 2 nɛ palʋʋnɩ-kʋ yɔ.+

20 «“Ye abalʋ nɔɔyʋ ɛhɩnɩ halʋ nɔɔyʋ cɔlɔ nɛ ɛsʋʋnɩ-ɩ, ŋgʋ halʋ ɛnʋ ɛkɛ nɔɔyʋ lɩmɖʋyʋ weyi pɛtɛmɩ-ɩ ɖanʋʋ abalʋ nɔɔyʋ, ɛlɛ patiholi-i yaa patɩha-ɩ tɩ-yɔɔ wɛʋ yɔ, pɔhɔŋ pa-nɩŋgbaaŋ. Ɛlɛ paakʋʋ-wɛ, mbʋ pʋyɔɔ yɔ pataayebiti halʋ se ɛwɛɛ ɛ-tɩ yɔɔ. 21 Pɩwɛɛ se abalʋ ɛnʋ ɛkɔnɩ ɛ-wɛɛ ɖɔʋ kɩlaʋ Yehowa, kediɣzaɣ kizinziku nɔnɔɔ taa, pɩkɛɣnɩ wɛɛ ɖɔʋ kɩlaʋ ɛyaʋ.+ 22 Cɔjɔ kaɣ kpaɣʋ wɛɛ ɖɔʋ kɩlaʋ ɛyaʋ nɛ ɛlabɩnɩ-ɩ kɩwɛɛkɩm yɔɔ huuzuu sɔnzɩ Yehowa ɛsɩndaa, kɩwɛɛkɩm mbʋ ɛlaba yɔ pʋyɔɔ, nɛ pakaɣ-ɩ kpeɣu kɩwɛɛkɩm mbʋ ɛlaba yɔ.

23 «“Ɩtalɩɣ ɛjaɖɛ taa lɛ, paa tɩʋ ŋgʋ ɩsɔwa se kɩkɛ-mɩ tɔɔnaɣ yɔ, pɩwɛɛ se ɩkpaɣ ki-pee se afɛyɩ kele kele nɛ ɩkpaɣ-yɛ se pekizini-mɩ yɛ. Akaɣ kɛʋ tɔɔnaɣ pee wena pekizini-mɩ yɔ* pɩnzɩ 3. Nɛ pɩfɛyɩ se ɩtɔɔ-yɛ. 24 Ɛlɛ pɩnaɣ 4 ñɩŋga taa lɛ, ki-pee tɩŋa kaɣ kɛʋ kiɖeɖena nɛ ɩkaɣ-yɛ mɛyɩnʋʋ Yehowa ɛsɩndaa.+ 25 Pʋwayɩ lɛ, pɩnaɣ 5 ñɩŋga taa lɛ, ɩpɩzɩɣ nɛ ɩtɔɔ-yɛ nɛ ɩsɔzɩ-yɛ tɔɔnasɩ nzɩ ɩkʋŋ yɔ sɩ-yɔɔ. Mɛkɛnɩ mɩ-Ɛsɔ Yehowa.

26 «“Ɩtaatɔɔ mbʋ pɩ-taa wɛ calɩm yɔ.+

«“Ɩtaapɔzɩ piye, nɛ ɩtaala ɖɔɖɔ maajiki.+

27 «“Ɩtaahʋ* mɩ-ñʋʋ kpɛnzɩ yɔɔ ñɔsɩ nɛ taawɛɛkɩ ña-tandaʋ kɩ-kpɛnzɩ yɔɔ.+

28 «“Ɩtaahɛdɩ mi-tomnasɩ nɛ ɩɖʋ-sɩ heŋ sɩɖʋ nɔɔyʋ yɔɔ,*+ nɛ pɩfɛyɩ se ɩlɩzɩ anjaʋwaa mi-tomnasɩ yɔɔ. Mɛkɛnɩ Yehowa.

29 «“Taapɩsɩ ñɛ-pɛlɛ hayitu laɖʋ, pɩɖʋʋ-ɩ fɛyɛ;+ ɖɩnɛ ɛlɛ ɛjaɖɛ ɛɛlakɩ hayitu nɛ ɖisuni wezuu kɩdɛkɛdʋʋ caɣʋ.+

30 «“Pɩwɛɛ se ɩɖɔkɩ man-sabaatɩwaa,+ nɛ pɩwɛɛ se ɩha ñamtʋ* mon-kooka kiɖeɖeɣa. Mɛkɛnɩ Yehowa.

31 «“Ɩtaapɩsɩnɩ mba pɔyɔɔdʋʋnɩ sɩɖaa yɔ pɔ-yɔɔ,+ nɛ itaawolo tɩʋ tɛ se ɩpɔzʋʋ piye,+ pɩtɩkɛ mbʋ yɔ pipisiɣ-mɩ. Mɛkɛnɩ mɩ-Ɛsɔ Yehowa.

32 «“Pɩwɛɛ se ŋkʋyɩ nɛ ŋsɩŋ ñʋʋ nɛ panzɩ tʋ ɛsɩndaa,+ nɛ pɩwɛɛ se ŋɖʋ hɩɖɛ akpadɩyʋ,+ nɛ ŋse ñɛ-Ɛsɔ sɔɔndʋ.+ Mɛkɛnɩ Yehowa.

33 «“Ye ɛgɔm nɔɔyʋ ɛkɔma nɛ ɛcaɣ mɩ-cɔlɔ mɩ-ɛjaɖɛ taa yɔ, ɩtaawɩlɩ-ɩ ñaŋ.+ 34 Ɛgɔm weyi ɛkɔma nɛ ɛcaɣ mɩ-cɔlɔ yɔ, pɩwɛɛ se ɛwɛɛ ɖɔɖɔ ɛzɩ tɛtʋ taa pɩɣa yɔ mɩ-ɛsɩndaa;+ pɩwɛɛ se ŋsɔɔlɩ-ɩ ɛzɩ ña-maɣmaɣ yɔ, mbʋ pʋyɔɔ yɔ mɩ ɖɔɖɔ ɩɩcaɣ ɛgɔndʋ Ejipiti ɛjaɖɛ taa.+ Mɛkɛnɩ mɩ-Ɛsɔ Yehowa.

35 «“Pɩfɛyɩ se ɩlabɩnɩ tʋmɩyɛ mulum kɩmaɣzɩŋ nɛ ɩmaɣzɩnɩ nabʋyʋ ɖaɣlɩkɩŋ, pi-yuŋ yaa ɛzɩma pɩɖɔwa yɔ.+ 36 Pɩwɛɛ se ɩlabɩnɩ tʋmɩyɛ kɩmaɣzɩŋ weyi ɩwɛ siɣsiɣ yɔ, yuŋ kɩmaɣzɩŋ weyi ɩwɛ siɣsiɣ yɔ, wondu kɩwɩtʋ kɩmaɣzʋʋ* ŋgʋ kɩwɛ siɣsiɣ yɔ, nɛ mbʋ pɩwɛ ɛzɩ lɩm yɔ pɩ-kɩmaɣzʋʋ* ŋgʋ kɩwɛ siɣsiɣ yɔ.+ Mɛkɛnɩ mɩ-Ɛsɔ Yehowa, weyi ɛlɩzɩ-mɩ nɛ Ejipiti ɛjaɖɛ taa yɔ. 37 Pʋyɔɔ lɛ, pɩwɛɛ se ɩɖɔkɩ man-paɣtʋ tɩŋa nɛ mɔn-tɔm hʋʋ paɣtʋ tɩŋa, nɛ pɩwɛɛ se ɩɖɔ tɩ-yɔɔ.+ Mɛkɛnɩ Yehowa.”»

20 Yehowa tasɩ yɔɔdɩnʋʋ Moyizi nɛ eheyi-i se: 2 «Pɩwɛɛ se ŋheyi Izrayɛɛlɩ mba se: “Ye Izrayɛɛlɩ tʋ nɔɔyʋ yaa agɔma mba pɛwɛ Izrayɛɛlɩ yɔ pa-taa nɔɔyʋ ɛcɛlɩ ɛ-lʋlʋʋ taa tʋ nɔɔyʋ Molɛɛkɩ yɔ, paa pɩɩla ɛzɩma yɔ, pɩwɛɛ se pakʋ ɛyʋ ɛnʋ.+ Ɛjaɖɛ taa mba kaɣ-ɩ pɛɛ yaɣʋ nɛ ɛsɩ. 3 Ma-maɣmaɣ mankaɣ ɛsa pam nɛ ɛyʋ ɛnʋ, nɛ mankaɣ-ɩ lɩzʋʋ* ɛ-samaɣ hɛkʋ taa, mbʋ pʋyɔɔ yɔ ɛcɛlɩ ɛ-lʋlʋʋ taa tʋ nɔɔyʋ Molɛɛkɩ nɛ episi mo-lone kiɖeɖeye,+ nɛ episi ma-hɩɖɛ kiɖeɖeye ɖɔɖɔ. 4 Ye ɛyʋ ɛnʋ ɛcɛlɩ ɛ-lʋlʋʋ taa tʋ nɔɔyʋ Molɛɛkɩ nɛ ɛjaɖɛ taa mba huuzi ɛsa tɔm ndʋ tɩ-yɔɔ faɖaɖa nɛ patɩkʋ pʋdʋ ɛnʋ yɔ,+ 5 ɖɩnɛ ɛlɛ paa pɩɩla ɛzɩma yɔ, ma-maɣmaɣ mankaɣ ɛsa pam nɛ ɛyʋ ɛnʋ nɛ ɛ-hɔʋ.+ Mankaɣ ɛyʋ ɛnʋ lɩzʋʋ* ɛ-samaɣ taa nɛ mɛnkpɛndɩnɩ ɖɔɖɔ mba payɩ patɩnɩ ɛ-yɔɔ nɛ pa nɛ Molɛɛkɩ pala hayitu yɔ.

6 «“Piyele nɛ ɛyʋ weyi* ewoki mba pɔyɔɔdʋʋnɩ sɩɖaa yɔ+ pɔ-cɔlɔ, yaa tɩyaa+ cɔlɔ se ɛ nɛ wɛ pala fezuu taa hayitu yɔ, paa pɩɩla ɛzɩma yɔ mankaɣ ɛsa pam nɛ ɛyʋ ɛnʋ* nɛ malɩzɩ-ɩ* ɛ-samaɣ hɛkʋ taa.+

7 «“Pɩwɛɛ se ɩpɩsɩ mɩ-tɩ kele kele nɛ ɩpɩsɩ kiɖeɖema,+ mbʋ pʋyɔɔ yɔ mɛkɛnɩ mɩ-Ɛsɔ Yehowa. 8 Nɛ pɩwɛɛ se ɩɖɔkɩ man-paɣtʋ nɛ ɩɖɔ tɩ-yɔɔ.+ Mɛkɛnɩ Yehowa, weyi ɛpɩsɩɣ-mɩ kele kele yɔ.+

9 «“Ye nɔɔyʋ ɛlɔ nɔɔ kɩdɛkɛdaɣ ɛ-caa yaa e-ɖoo yɔɔ yɔ, paa pɩɩla ɛzɩma yɔ, pɩwɛɛ se pakʋ-ɩ.+ Ɛlɔ nɔɔ kɩdɛkɛdaɣ ɛ-caa yaa e-ɖoo yɔɔ, pʋyɔɔ lɛ, ɛ-calɩm cakɩ ɛ-maɣmaɣ ɛ-ñʋʋ taa.

10 «“Piyele nɛ ye abalʋ nɔɔyʋ nɛ lɛlʋ halʋ palabɩ acɛyɛ yɔ, pɩwɛɛ se pakʋ abalʋ weyi ɛ nɛ lɛlʋ halʋ palabɩ acɛyɛ yɔ, pakʋ abalʋ acɛyɛ laɖʋ ɛnʋ nɛ halʋ acɛyɛ laɖʋ ɛnʋ.+ 11 Abalʋ weyi ɛsʋʋnɩ ɛ-caa halʋ yɔ, ɛɖʋʋ ɛ-caa fɛyɛ.*+ Paa pɩɩla ɛzɩma yɔ, pɩwɛɛ se pakʋ pa-naalɛ. Pa-calɩm cakɩ pa-maɣmaɣ pa-ñʋŋ taa. 12 Ye abalʋ nɔɔyʋ ɛsʋnɩ e-wolu yɔ, paa pɩɩla ɛzɩma yɔ, pɩwɛɛ se pakʋ pa-naalɛ. Palabɩ mbʋ pɩtɩmʋna se pala yɔ. Pa-calɩm cakɩ pa-maɣmaɣ pa-ñʋŋ taa.+

13 «“Ye abalʋ nɔɔyʋ ɛsʋnɩ abalʋ lɛlʋ ɛzɩ pasʋʋnʋʋ halʋ yɔ, pa-naalɛ palabɩ kʋzɔɔtʋ lakasɩ.+ Paa pɩɩla ɛzɩma yɔ, pɩwɛɛ se pakʋ pa-naalɛ. Pa-calɩm cakɩ pa-maɣmaɣ pa-ñʋŋ taa.

14 «“Ye abalʋ nɔɔyʋ ɛkpaɣ halʋ nɔɔyʋ nɛ halʋ ɛnʋ e-ɖoo yɔ, pɩkɛnɩ kʋzɔɔtʋ lakasɩ.*+ Pɩwɛɛ se pɔsɔ ɛ nɛ halaa mba miŋ+ nɛ kʋzɔɔtʋ lakasɩ sɩɩ tɩnaɣ mɩ-hɛkʋ taa.

15 «“Ye abalʋ nɔɔyʋ ɛsʋnɩ kpɩnɛ naɖɩyɛ yɔ, paa pɩɩla ɛzɩma yɔ, pɩwɛɛ se pakʋ abalʋ ɛnʋ, nɛ pɩwɛɛ se ɩkʋ kpɩnɛ nɖɩ ɖɔɖɔ.+ 16 Ye halʋ nɔɔyʋ ɛñɔtɩnɩ kpɩnɛ naɖɩyɛ nɛ ɛ nɛ ɖɩ pasʋʋ yɔ,+ pɩwɛɛ se ɩkʋ halʋ ɛnʋ nɛ kpɩnɛ nɖɩ. Paa pɩɩla ɛzɩma yɔ, pɩwɛɛ se pakʋ-wɛ. Pa-calɩm cakɩ pa-maɣmaɣ pa-ñʋŋ taa.

17 «“Ye abalʋ nɔɔyʋ ɛsʋnɩ e-neu yaa ɛ-kɔɔ, paa pɩtɩɩkɛ ɛ-caa pɛlɛ yaa e-ɖoo pɛlɛ, nɛ ɛna ɛlɛ ndaakpeɖe nɛ ɛlɛ ɖɔɖɔ na ɛ-ndaakpeɖe yɔ, pɩkɛnɩ fɛyɛ.+ Pɩwɛɛ se pakʋ-wɛ pa-samaɣ taa mba ɛsɩndaa. Abalʋ ɛnʋ ɛɖʋ e-neu yaa ɛ-kɔɔ fɛyɛ.* Pɩwɛɛ se pɔpɔzɩ-ɩ akɔnta ɛ-kɩwɛɛkɩm yɔɔ.

18 «“Ye abalʋ nɔɔyʋ nɛ halʋ weyi eɖiɣni fenaɣ naʋ yɔ pahɩnaa nɛ ɛsʋʋnɩ-ɩ yɔ, abalʋ ɛnʋ nɛ halʋ ɛnʋ pokuli halʋ calɩm mbʋ piɖiɣni kpem yɔ pɩ-yɔɔ.+ Pɩwɛɛ se palɩzɩ* pa-naalɛ pa-samaɣ hɛkʋ taa.

19 «“Pɩfɛyɩ se ŋsʋʋnɩ ño-ɖoo neu halɩñɩnʋ yaa ño-ɖoo kɔɔ yaa ña-caa neu halɩñɩnʋ yaa ña-caa kɔɔ, mbʋ pʋyɔɔ yɔ pɩɖʋʋ fɛyɛ ɛyʋ weyi ña nɛ ɩ ɩka calɩm yɔ.+ Pɩwɛɛ se pɔpɔzɩ-wɛ akɔnta pa-kɩwɛɛkɩm yɔɔ. 20 Abalʋ weyi ɛsʋʋnɩ ɛ-caa neu halʋ yaa ɛ-caa ɖalʋ halʋ yaa e-egbele halʋ yɔ, ɛɖʋ fɛyɛ ɛ-caa neu yaa ɛ-caa ɖalʋ yaa e-egbele.*+ Pɩwɛɛ se pɔpɔzɩ-wɛ akɔnta pa-kɩwɛɛkɩm yɔɔ. Pɩwɛɛ se pasɩ, paawɛɣnɩ pɩɣa. 21 Ye abalʋ nɔɔyʋ ɛmʋ ɛ-ɖalʋ yaa e-neu halʋ yɔ, pɩkɛnɩ kʋzɔɔtʋ lakasɩ.+ Ɛɖʋ fɛyɛ e-koobu.* Pɩwɛɛ se pasɩ, paawɛɣnɩ pɩɣa.

22 «“Pɩwɛɛ se ɩɖɔkɩ man-paɣtʋ tɩŋa nɛ mɔn-tɔm hʋʋ paɣtʋ tɩŋa+ nɛ ɩɖɔ tɩ-yɔɔ,+ pɩsa nɛ ɛjaɖɛ nɖɩ mowokini-mɩ se ɩcaɣ ɖɩ-taa yɔ, ɖitaahoo-mɩ nɛ ɖɩtɔ.+ 23 Pɩfɛyɩ se ɩɖɔ ajɛɛ wena menɖiɣni-yɛ ɖɔɔnʋʋ mɩ-ɛsɩndaa yɔ a-paɣtʋ yɔɔ;+ mbʋ pʋyɔɔ yɔ alabɩ pɩtɩŋa payɩ mbʋ yɔ nɛ manpaɖɩɣ-yɛ.+ 24 Pʋyɔɔ meheyi-mɩ se: ‘Ɩkaɣ mʋʋ pɛ-ɛjaɖɛ, nɛ mankaɣ-mɩ ɖɩ cɛlʋʋ nɛ ɖɩpɩsɩ mɩ-ñɩm, ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.+ Mɛkɛnɩ mɩ-Ɛsɔ Yehowa, weyi ɛlɩzɩ-mɩ nɛ kɩjaʋ samasɩ taa yɔ.’+ 25 Pɩwɛɛ se ɩɖʋ tʋkaɣ kpɩnɛ nɖɩ ɖɩwɛ kele kele nɛ nɖɩ ɖɩfɛyɩ kele kele yɔ a-hɛkʋ taa, nɛ sumaɣ ŋga kɛfɛyɩ kele kele nɛ ŋga kɛwɛ kele kele yɔ sɩ-hɛkʋ taa;+ pɩfɛyɩ se kpɩnɛ naɖɩyɛ yaa sumaɣ nakɛyɛ yaa nabʋyʋ mbʋ pituu tataa yɔ, mbʋ mansɩ-pʋ kɩjaʋ se ɩkpaɣ-pʋ se pɩfɛyɩ kele kele yɔ piyele nɛ ɩcaɣ* kʋzɔɔtʋ.+ 26 Pɩwɛɛ se ɩkɛ kiɖeɖema mɛ-ɛsɩndaa, mbʋ pʋyɔɔ yɔ, ma Yehowa, mɛnkɛ kiɖeɖeu,+ nɛ malɩzɩɣ-mɩ kɩjaʋ nɛ samasɩ taa se ɩpɩsɩ man-pʋyʋ.+

27 «“Ye abalʋ nɔɔyʋ yaa halʋ nɔɔyʋ ɛyɔɔdʋʋnɩ sɩɖaa yaa ɛtɩyɩɣ yɔ,* paa pɩɩla ɛzɩma yɔ, pakaɣ-ɩ kʋʋ.+ Pɩwɛɛ se samaɣ ɛyaɣ-ɩ pɛɛ nɛ ɛsɩ. Ɛ-calɩm cakɩ ɛ-maɣmaɣ ɛ-ñʋʋ taa.”»

21 Yehowa tasɩ heyuu Moyizi se: «Yɔɔdɩnɩ cɔjɔnaa, Aarɔɔnɩ pɩyalaa, nɛ ŋheyi-wɛ se: “Pɩfɛyɩ se nɔɔyʋ episi ɛ-tɩ ɛ-samaɣ taa sɩɖʋ nɔɔyʋ* yɔɔ.+ 2 Ɛlɛ ɛpɩzɩɣ nɛ episi ɛ-tɩ ɛ-hɔʋ taa tʋ weyi ɛñɔtɩnɩ-ɩ kpam yɔ ɛ-yɔɔ: e-ɖoo, ɛ-caa, ɛ-pɩyalʋ, ɛ-pɛlɛ, ɛ-ɖalʋ yaa e-neu abalɩñɩnʋ yɔɔ; 3 ɛpɩzɩɣ ɖɔɖɔ nɛ episi ɛ-tɩ ɛ-kɔɔ yaa e-neu halɩñɩnʋ weyi ɛñɔtɩnɩ-ɩ nɛ ɛtɩtɩlɩ abalʋ nɛ ɛtɩwalɩta yɔ ɛ-yɔɔ. 4 Pɩfɛyɩ se episi ɛ-tɩ nɛ ɛpɩsɩ ɛ-tɩ azuluma tʋ ɛ-samaɣ taa tʋ nɔɔyʋ halʋ yɔɔ. 5 Pɩfɛyɩ se pahʋ pa-ñʋŋ koloŋgolo+ yaa pahʋ pa-tandaŋ kpɛnzɩ yɔɔ yaa pɛhɛdɩ po-tomnasɩ nɛ paɖʋ-sɩ heŋ.+ 6 Pɩwɛɛ se pɛkɛ kiɖeɖema pɛ-Ɛsɔ ɛsɩndaa,+ nɛ pɩfɛyɩ se pepisi pɛ-Ɛsɔ hɩɖɛ,+ mbʋ pʋyɔɔ yɔ mba laɣnɩ Yehowa kɩlaŋ weyi pañaɣzɩɣ miŋ yɔ, pɛ-Ɛsɔ kpɔnɔ,* nɛ pɩwɛɛ se pɛkɛ kiɖeɖema.+ 7 Pɩfɛyɩ se pakpaɣ halʋ hayitu laɖʋ,+ halʋ weyi pepisi-i yɔ, yaa halʋ weyi ɛ-walʋ kizi-i yɔ,+ mbʋ pʋyɔɔ yɔ cɔjɔ kɛ kiɖeɖeu ɛ-Ɛsɔ ɛsɩndaa. 8 Pɩwɛɛ se ŋpɩsɩ-ɩ kele kele,+ mbʋ pʋyɔɔ yɔ ɛnʋ laɣnɩ ñɛ-Ɛsɔ kpɔnɔ. Pɩwɛɛ se ɛkɛ-ŋ kiɖeɖeu, mbʋ pʋyɔɔ yɔ, ma Yehowa, weyi ɛpɩsɩɣ-mɩ kele kele yɔ, mɛnkɛ kiɖeɖeu.+

9 «“Ye cɔjɔ pɛlɛ episiɣ ɛ-tɩ nɛ hayitu labʋ yɔ, ɛwɛɛ nɛ episiɣ ɛ-caa. Pɩwɛɛ se pañaɣzɩ-ɩ miŋ.+

10 «“Weyi ɛkɛ cɔjɔ kɩlɩm e-koobiya taa yɔ, weyi ɛ-ñʋʋ taa papɩyɩ ŋgee num yɔ,+ weyi pasɩ-ɩ se ɛkɛ cɔjɔ nɛ esuu cɔjɔtʋ wondu yɔ,+ pɩfɛyɩ se eyele ɛ-ñɔsɩ nɛ ɛtɩñɔɔzɩ-sɩ nɛ pɩfɛyɩ ɖɔɖɔ se ɛcɩyɩ e-tokonaa.+ 11 Pɩfɛyɩ se ɛñɔtɩnɩ sɩɖʋ nɔɔyʋ;*+ pɩfɛyɩ se episi ɛ-tɩ paa ɛ-caa yaa e-ɖoo yɔɔ. 12 Pɩfɛyɩ se ɛlɩɩ kooka kiɖeɖeɣa taa nɛ pɩfɛyɩ se episi ɛ-Ɛsɔ kooka kiɖeɖeɣa,+ mbʋ pʋyɔɔ yɔ tɩ haʋ yʋsaɣ, ɛ-Ɛsɔ ŋgee num,+ wɛ ɛ-yɔɔ. Mɛkɛnɩ Yehowa.

13 «“Pɛlɛ weyi ɛɛsɩŋ abalʋ yɔ pɩwɛɛ se ɛkpaɣ nɛ ɛpɩsɩ-ɩ ɛ-halʋ.+ 14 Pɩfɛyɩ se ɛkpaɣ lelu, halʋ weyi ɛ-walʋ kizi-i yɔ, halʋ weyi pepisi-i yɔ, yaa halʋ hayitu laɖʋ nɔɔyʋ; ɛlɛ pɩwɛɛ se ɛkpaɣ ɛ-samaɣ taa pɛlɛ weyi ɛɛsɩŋ abalʋ yɔ nɛ ɛpɩsɩ ɛ-halʋ. 15 Pɩfɛyɩ se episi ɛ-lʋlʋʋ taa tʋ* ɛ-samaɣ hɛkʋ taa,+ mbʋ pʋyɔɔ yɔ mɛkɛnɩ Yehowa, weyi eɖiɣni-i pɩsʋʋ kele kele yɔ.”»

16 Yehowa tasɩ yɔɔdɩnʋʋ Moyizi nɛ eheyi-i se: 17 «Heyi Aarɔɔnɩ se: “Kpaɖɩŋ kpeekpe taa lɛ, pɩfɛyɩ se ña-lʋlʋʋ* taa abalʋ nɔɔyʋ, weyi ɛwɛnɩ ɛjandʋ natʋyʋ yɔ, ɛñɔtɩ ɛ-tɩ se ɛlaɣ ɛ-Ɛsɔ kpɔnɔ. 18 Ye abalʋ nɔɔyʋ ɛwɛnɩ ɛjandʋ natʋyʋ yɔ, pɩfɛyɩ se ɛñɔtɩ ɛ-tɩ: abalʋ weyi ɛkɛ yʋlʋm yaa taɖɩyɛ tʋ yaa weyi ɛ-ɛsɩndaa wɛɛkaa yɔ* yaa weyi ɛ-nɩŋgbaŋaɣ nakɛyɛ yaa e-nesi nasɩyɩ kɩlɩ ɖaɣlʋʋ yɔ, 19 abalʋ weyi ɛ-nɩŋgbaŋaɣ pɛlaa yaa e-nesi pɛlaa yɔ, 20 siɣye tʋ yaa kaabɩɣa* yaa abalʋ weyi ɛ-ɛsa wɛnɩ ɛjandʋ natʋyʋ yɔ, yaa weyi awiza yaa kaʋ lɩ e-tomnaɣ yɔɔ yɔ, yaa weyi ɛ-ladɩwee yɔkaa yɔ.+ 21 Ye cɔjɔ Aarɔɔnɩ lʋlʋʋ* taa abalʋ nɔɔyʋ ɛwɛnɩ ɛjandʋ natʋyʋ yɔ, abalʋ ɛnʋ ɛɛkaɣ ɛ-tɩ ñɔtʋʋ se ɛlaa Yehowa kɩlaŋ weyi pañaɣzɩɣ miŋ yɔ. Ɛwɛnɩ ɛjandʋ nɛ pʋyɔɔ lɛ, pɩfɛyɩ se ɛñɔtɩ ɛ-tɩ se ɛlaɣ ɛ-Ɛsɔ kpɔnɔ. 22 Ɛpɩzɩɣ nɛ ɛtɔɔ ɛ-Ɛsɔ kpɔnɔ, pʋ-tɔbʋʋ se wondu kiɖeɖetu siŋŋ kpɔnɔ,+ nɛ wondu kiɖeɖetu kpɔnɔ.+ 23 Ɛlɛ, pɩfɛyɩ se ɛñɔtɩnɩ pɩsaʋ kikenduu,+ nɛ pɩfɛyɩ ɖɔɖɔ se ɛñɔtɩnɩ altaaru,+ mbʋ pʋyɔɔ yɔ ɛwɛnɩ ɛjandʋ; pɩfɛyɩ se episi mon-kooka kiɖeɖeɣa,+ mbʋ pʋyɔɔ yɔ mɛkɛnɩ Yehowa, weyi eɖiɣni-wɛ pɩsʋʋ kele kele yɔ.”»+

24 Nɛ Moyizi yɔɔdɩnɩ Aarɔɔnɩ nɛ ɛ-pɩyalaa nɛ Izrayɛɛlɩ mba kpeekpe.

22 Yehowa tasɩ yɔɔdɩnʋʋ Moyizi nɛ eheyi-i se: 2 «Heyi Aarɔɔnɩ nɛ ɛ-pɩyalaa se pɩwɛɛ se pakpa pa-tɩ nɛ ɛzɩma pakpakɩɣnɩ Izrayɛɛlɩ mba wondu kiɖeɖetu yɔ camɩyɛ,* nɛ pataapisi ma-hɩɖɛ kiɖeɖeye,+ wondu ndʋ papɩsɩɣ-tʋ kele kele se tɩkɛ ma-ñɩndʋ yɔ tɩ-hɔɔlʋʋ taa.+ Mɛkɛnɩ Yehowa. 3 Heyi-wɛ se: “Mɩ-kpaɖɩŋ kpeekpe taa lɛ, ye mɩ-lʋlʋʋ taa tʋ nɔɔyʋ, weyi ɛfɛyɩ kele kele yɔ, ɛñɔtɩnɩ wondu kiɖeɖetu ndʋ Izrayɛɛlɩ mba pɩsɩɣ-tʋ kele kele se tɩkɛ Yehowa pʋyʋ yɔ yɔ, ɛyʋ ɛnʋ,* pakaɣ-ɩ kʋʋ.*+ Mɛkɛnɩ Yehowa. 4 Ye Aarɔɔnɩ lʋlʋʋ taa tʋ nɔɔyʋ ɛkɛ canaɣ,+ yaa lɩm nabʋyʋ ekpeŋni ɛ-lʋlʋʋ taa tʋ nɔɔyʋ yɔ,+ ɛyʋ ɛnʋ ɛɛtɔkɩ wondu kiɖeɖetu nɛ pɩkɔɔ pɩsɩɩnɩ alɩwaatʋ ndʋ ɛɖaɣnɩ wɛʋ kele kele yɔ;+ mbʋ ɖɔɖɔ weyi etukuuni ɛyʋ weyi sɩɖʋ nɔɔyʋ* yeba nɛ ɛtɩtasɩ wɛʋ kele kele yɔ+ ɛɛtɔkɩ-tʋ, yaa weyi kɩjabɩyʋʋ kpemni-i yɔ+ ɛɛtɔkɩ-tʋ; 5 ɛyʋ weyi etukuuni mbʋ pɩwɛ wezuu nɛ pɩkpɛndɩɣ nɛ pɩɖɔŋ wiii nɛ pɩfɛyɩ kele kele yɔ+ pɩ-taa nabʋyʋ yɔ, yaa weyi etukuuni ɛyʋ weyi nabʋyʋ yɔɔ lɛ, ɛlɛ fɛyɩ kele kele nɛ ɛpɩzɩɣ nɛ episi-i yɔ,+ ɛlɛ ɖɔɖɔ ɛɛtɔkɩ-tʋ. 6 Ɛyʋ* weyi etukuuni pɩtɩŋa payɩ mbʋ yɔ pɩ-taa nabʋyʋ yɔ, ɛkaɣ kɛʋ weyi ɛfɛyɩ kele kele yɔ pɩkɔɔ nɛ pɩtalɩ ɖanaɣ, ɛɛpɩzɩɣ nɛ ɛtɔɔ wondu kiɖeɖetu, ɛlɛ pɩwɛɛ se ɛsɔ lɩm.+ 7 Nɛ wɩsɩ ɖʋʋ lɛ, ɛkaɣ wɛʋ kele kele, nɛ pʋwayɩ lɛ ɛpɩzɩɣ nɛ ɛtɔɔ wondu kiɖeɖetu, mbʋ pʋyɔɔ yɔ ndʋ kɛnɩ ɛ-tɔɔnaɣ.+ 8 Pɩtasɩ lɛ, pɩfɛyɩ se ɛtɔɔ kpɩnɛ naɖɩyɛ nɖɩ ehiɣ-ɖɩ nɛ ɖɩsɩba yɔ yaa mbʋ tɛtɛgbɩnɛ naɖɩyɛ cɩyaa yɔ, pɩ-taa nabʋyʋ nɛ pipisi-i.+ Mɛkɛnɩ Yehowa.

9 «“Pɩwɛɛ se pɔɖɔ man-paɣtʋ yɔɔ, nɛ pɩtaakɛdɩ nɛ pala kɩdɛkɛdɩm se patɩɖɔ tɩ-yɔɔ nɛ pɩkɔnɩ-wɛ sɩm mbʋ pʋyɔɔ yɔ pepisi wondu kiɖeɖetu. Mɛkɛnɩ Yehowa, weyi eɖiɣni-wɛ pɩsʋʋ kele kele yɔ.

10 «“Ɛyʋ weyi pɩtɩha-ɩ nʋmɔʋ yɔ,* ɛɛtɔkɩ wondu kiɖeɖetu.+ Agbaaɣdaa tʋ weyi ɛkɛ ɛgɔm cɔjɔ nɔɔyʋ tɛ yɔ, yaa abaa tʋ ɛɛpɩzɩɣ nɛ ɛtɔɔ wondu kiɖeɖetu. 11 Ɛlɛ ye cɔjɔ ɛkpaɣ e-liidiye nɛ ɛyabɩnɩ nɔɔyʋ* yɔ, ɛyʋ ɛnʋ ɛpɩzɩɣ nɛ ɛtɔɔ wondu kiɖeɖetu. Yomaa mba palʋlɩ-wɛ cɔjɔ ɖɩɣa taa yɔ, pa nɛ ɩ papɩzɩɣ nɛ pɔtɔɔ ɛ-tɔɔnaɣ.+ 12 Ye cɔjɔ nɔɔyʋ pɛlɛ ɛwalɩ abalʋ weyi ɛtɩkɛ cɔjɔ yɔ,* ɛ-pɛlɛ ɛnʋ ɛɛpɩzɩɣ nɛ ɛtɔɔ haɖɛ kiɖeɖeye. 13 Ɛlɛ ye cɔjɔ nɔɔyʋ pɛlɛ ɛpɩsɩ lelu yaa ɛ-walʋ kizi-i nɛ ɛfɛyɩnɩ pɩɣa, nɛ ɛpɩsɩ ɛwɛɛ ɛ-caa ɖɩɣa taa ɛzɩ ɛɛwɛʋ ɛ-pɛlɛtʋ taa yɔ yɔ, ɛpɩzɩɣ nɛ ɛtɔɔ tɔɔnaɣ ŋga ɛ-caa tɔkɩ yɔ;+ ɛlɛ ɛyʋ weyi pɩtɩha-ɩ nʋmɔʋ yɔ* ɛɛpɩzɩɣ nɛ ɛtɔɔ-kɛ.

14 «“Ye pɩlaba se picoɖi nɔɔyʋ nɛ ɛtɔɔ wondu kiɖeɖetu yɔ, pɩwɛɛ se ɛhɛyɩ-tʋ nɛ ɛsɔzɩ tɩ-hɔɔlʋʋ 5 ñɩŋgʋ, nɛ pɩkɛnɩ haɖɛ kiɖeɖeye nɖɩ ɛcɛlɩɣ cɔjɔ yɔ.+ 15 Ðɩnɛ ɛlɛ, paapisiɣ Izrayɛɛlɩ mba wondu kiɖeɖetu ndʋ pahaɣ Yehowa yɔ+ 16 nɛ pɔtɔɔ po-wondu kiɖeɖetu nɛ pɔɖɔɔ wɛɛ nɛ pɔhɔ pa-nɩŋgbaaŋ; mbʋ pʋyɔɔ yɔ mɛkɛnɩ Yehowa, weyi eɖiɣni-wɛ pɩsʋʋ kele kele yɔ.”»

17 Yehowa tasɩ yɔɔdɩnʋʋ Moyizi nɛ eheyi-i se: 18 «Yɔɔdɩnɩ Aarɔɔnɩ nɛ ɛ-pɩyalaa nɛ Izrayɛɛlɩ mba kpeekpe nɛ ŋheyi-wɛ se: “Ye Izrayɛɛlɩ tʋ nɔɔyʋ yaa ɛgɔm nɔɔyʋ weyi ɛwɛ Izrayɛɛlɩ yɔ, ɛlaɣ kɩlaʋ kɩñaɣzʋʋ nakʋyʋ+ Yehowa se ɛɖɔmnɩ e-ɖuutu natʋyʋ yɔɔ yaa se ɛlabɩnɩ sɔɔlɩm haɖɛ naɖɩyɛ yɔ,+ 19 pɩwɛɛ se ɛkɔnɩ kpɩnɛ abalɩñɩnɖɛ nɖɩ ɖɩfɛyɩnɩ ɛjandʋ natʋyʋ yɔ,+ pɩwɛɛ se pɩkɛnɩ nɔ, ɛyaʋ* yaa pʋnʋ, ɖɩnɛ ɛlɛ pɩkɛdɩɣnɩ Ɛsɔ. 20 Pɩfɛyɩ se ɩkɔnɩ kpɩnɛ nɖɩ ɖɩwɛnɩ ɛjandʋ natʋyʋ yɔ,+ mbʋ pʋyɔɔ yɔ pɩɩkaɣ yebu nɛ mɩ-tɔm kɛdɩnɩ-ɩ.

21 «“Ye nɔɔyʋ ɛkɔnɩ laŋhɛzɩyɛ kɩlaʋ+ Yehowa se ɛɖɔ e-ɖuutu yɔɔ yaa ɛkɔnɩ-kʋ se pɩkɛ sɔɔlɩm haɖɛ yɔ, pɩwɛɛ se pɩkɛ nɔ yaa pʋnʋ yaa heu weyi ɛfɛyɩnɩ ɛjandʋ natʋyʋ yɔ, nɛ pɩsa nɛ ɛ-tɔm kɛdɩnɩ-ɩ. Pɩfɛyɩ se kpɩnɛ ɛwɛɛnɩ ɛjandʋ natʋyʋ kaaʋ. 22 Pɩfɛyɩ se kɩlaʋ kpɩnɛ naɖɩyɛ ɛkɛ yʋlʋm, ɖi-ɖoli ɛpɛlɩ, ɖɩmʋ heŋ, ɖɩwɛɛnɩ cobiye, ɖɩwɛɛnɩ kpiziye yaa kaʋ; pɩfɛyɩ se ɩkɔnɩ kpɩna ana a-taa naɖɩyɛ Yehowa, nɛ pɩfɛyɩ ɖɔɖɔ se ɩlaa kɩlaŋ ɛnɩ ɩ-ɖɔndɩ altaaru yɔɔ se pɩkɛnɩ Yehowa pʋyʋ. 23 Ŋpɩzɩɣ nɛ ŋkɔnɩ nɔ yaa heu weyi e-tomnaɣ piliŋa nakɛyɛ kɩlɩ ɖaɣlʋʋ yaa kɩlɩ tobi yɔ se pɩkɛnɩ sɔɔlɩm haɖɛ, ɛlɛ ye ŋlaɣ kpɩnɛ nɖɩ se ŋɖɔmnɩ ɖuutu natʋyʋ yɔɔ yɔ, ɛɛkaɣ tisuu nɛ ɛmʋ-ɖɩ nɛ ñɔ-tɔm ɛɛkaɣ-ɩ kɛdɩnʋʋ. 24 Pɩfɛyɩ se ɩkɔnɩ Yehowa kpɩnɛ nɖɩ pɩcamɩ ɖɩ-ladɩwee yaa pɩnaŋ-yɛ yaa pɛkpɛzɩ-yɛ yaa pɛsɛtɩ-yɛ yɔ, nɛ pɩfɛyɩ se ɩlaa kpɩna ana a-taa naɖɩyɛ mɩ-ɛjaɖɛ taa. 25 Nɛ pɩfɛyɩ se itisi nɛ ɩmʋ ɛgɔm nɔɔyʋ nesi taa kpɩna ana a-taa naɖɩyɛ se pɩkɛ mɩ-Ɛsɔ kpɔnɔ,* mbʋ pʋyɔɔ yɔ awɛnɩ ɛjandʋ nɛ atɩtalɩ pilim. Ɛsɔ ɛɛkaɣ-yɛ mʋʋ, nɛ mɩ-tɔm ɛɛkaɣ-ɩ kɛdɩnʋʋ.”»

26 Yehowa tasɩ yɔɔdɩnʋʋ Moyizi nɛ eheyi-i se: 27 «Alɩwaatʋ ndʋ palʋlʋʋ neɣye yaa heɣa yaa mbeɣa yɔ,* kɛwɛɣ ko-ɖoo cɔlɔ kɩyakɩŋ 7,+ ɛlɛ kpaɣnɩ kɩyakʋ 8 ŋgʋ wiye nɛ pɩɖɛɛ lɛ, papɩzɩɣ nɛ palaa kpɩna ana a-taa naɖɩyɛ kɩlaʋ nɛ petisi nɛ pamʋ-ɖɩ nɛ pɩkɛnɩ kɩlaʋ ŋgʋ pañaɣzɩɣ-kʋ miŋ Yehowa yɔ. 28 Ɛlɛ nɔ yaa heu lɛ, pɩfɛyɩ se ɩkʋ ɛ nɛ ɛ-pɩɣa kɩyakʋ kʋɖʋmʋʋ.+

29 «Ye ɩlaɣ ɛsɩmɩyɛ kɩlaʋ Yehowa yɔ,+ pɩwɛɛ se ɩlaa-kʋ ɛzɩ pɩpɔzʋʋ yɔ nɛ mɩ-tɔm kɛdɩnɩ-ɩ. 30 Pɩwɛɛ se pɔtɔɔ kɩlaʋ ŋgʋ evemiye nɖɩ. Ɩtaakazɩ kɩ-hɔɔlʋʋ nakʋyʋ nɛ tɛʋ fe.+ Mɛkɛnɩ Yehowa.

31 «Pɩwɛɛ se ɩɖɔkɩ man-paɣtʋ nɛ ɩɖɔ tɩ-yɔɔ.+ Mɛkɛnɩ Yehowa. 32 Pɩfɛyɩ se ipisi ma-hɩɖɛ kiɖeɖeye,+ pɩwɛɛ se Izrayɛɛlɩ mba ɩtɩlɩ se mɛwɛ kele kele.+ Mɛkɛnɩ Yehowa, weyi eɖiɣni-mɩ pɩsʋʋ kele kele yɔ,+ 33 weyi ɛlɩzɩ-mɩ Ejipiti ɛjaɖɛ taa se ɩtɩlɩ se mɛnkɛ-mɩ Ɛsɔ yɔ.+ Mɛkɛnɩ Yehowa.»

23 Yehowa tasɩ yɔɔdɩnʋʋ Moyizi nɛ eheyi-i se: 2 «Yɔɔdɩnɩ Izrayɛɛlɩ mba nɛ ŋheyi-wɛ se: “Yehowa kazandʋ*+ ndʋ tɩ-tɔm pɩwɛɛ se isusi yɔ,+ tɩkɛnɩ kigbeɣliŋ kiɖeɖeŋ. Man-kazandʋ yɔ:

3 «“Ɩpɩzɩɣ nɛ ɩla tʋmɩyɛ kɩyakɩŋ 6, ɛlɛ kɩyakʋ 7 ñɩŋgʋ kɛnɩ hɛzʋʋ kiya sabaatɩ,+ kigbeɣluu kiɖeɖeu. Pɩfɛyɩ se ɩla tʋmɩyɛ naɖɩyɛ. Paa le ɩtɩɩwɛɛ yɔ, kɩyakʋ ŋgʋ kɩkɛ Yehowa sabaatɩ.+

4 «“Yehowa kazandʋ, kigbeɣliŋ kiɖeɖeŋ weyi ɩ-tɔm pɩwɛɛ se isusi alɩwaatʋ ndʋ tɩ-yɔɔ paɖʋ-ɩ yɔ ɛnɩ yɔ: 5 Fenaɣ kajalaɣ ñɩŋga, kɩyakʋ 14 ñɩŋgʋ wiye,+ wɩsɩ ɖʋʋ lɛ,* pɩkɛɣnɩ Yehowa Paska.+

6 «“Fenaɣ ŋga, ka-kɩyakʋ 15 ñɩŋgʋ kɛɣnɩ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ ndʋ palakɩ Yehowa yɔ.+ Pɩwɛɛ se ɩtɔɔ kpɔnɔ ŋgʋ kɩ-taa patɩɖʋ lɔlɔm yɔ kɩyakɩŋ lʋbɛ.+ 7 Kajalaɣ kɩyakʋ wiye lɛ, pɩwɛɛ se ɩla kigbeɣluu kiɖeɖeu.+ Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ. 8 Ɛlɛ pɩwɛɛ se ɩlaa kɩlaʋ ŋgʋ pañaɣzɩɣ-kʋ miŋ yɔ Yehowa kɩyakɩŋ 7. Pɩwɛɛ se ɩla kigbeɣluu kiɖeɖeu kɩyakʋ 7 ñɩŋgʋ wiye. Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ.”»

9 Yehowa tasɩ yɔɔdɩnʋʋ Moyizi nɛ eheyi-i se: 10 «Yɔɔdɩnɩ Izrayɛɛlɩ mba nɛ ŋheyi-wɛ se: “Ɩkɔŋ nɛ ɩtalɩ ɛjaɖɛ nɖɩ mɛncɛlɩɣ-mɩ yɔ ɖɩ-taa nɛ ɩkʋ ɖɩ-taa tɔɔnaɣ lɛ, pɩwɛɛ se ɩkpaɣ kajalaɣ tɔɔnaɣ+ ŋga ɩkʋma yɔ kɔ-hɔɔyɛ naɖɩyɛ nɛ iwoni cɔjɔ.+ 11 Nɛ ɛkaɣ hɔɔyɛ nɖɩ fiɣduu Yehowa ɛsɩndaa nɛ piyele nɛ mɩ-tɔm kɛdɩnɩ-ɩ. Pɩwɛɛ se cɔjɔ efiɣdi-ɖɩ Sabaatɩ tɛʋ kifemuu. 12 Kɩyakʋ ŋgʋ efiɣdiɣ mɩ-hɔɔyɛ nɖɩ yɔ, pɩwɛɛ se ɩlaa ɛyaʋ ŋgʋ kɩfɛyɩnɩ ɛjandʋ natʋyʋ nɛ kɩtɩɖɛɛ pɩnaɣ kʋɖʋmaɣ yɔɔ yɔ nɛ pɩkɛ kɩlaʋ kɩñaɣzʋʋ Yehowa. 13 Kɩ-tɔɔnaɣ pee kɩlaʋ kaɣ kɛʋ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ efa hɔɔlɩŋ 2 hɔɔlɩŋ 10 taa,* se pɩkɛ kɩlaʋ ŋgʋ pañaɣzɩɣ-kʋ miŋ Yehowa yɔ, ŋgʋ kɩlɩɣ sɔzɩŋ camɩyɛ yɔ.* Ki-kilizaɣ kaɣ kɛʋ vɛɛ hiini* hɔɔlʋʋ 4 ñɩŋgʋ. 14 Pɩfɛyɩ se ɩtɔɔ kpɔnɔ, pee wena poɖoŋaa yɔ yaa tɔɔnaɣ pee kɩfana nɛ pɩkɔɔ nɛ pɩtalɩ evemiye nɖɩ, nɛ pɩkɔɔ nɛ pɩsɩɩnɩ alɩwaatʋ ndʋ iwoni mɩ-Ɛsɔ kɩlaʋ yɔ. Pɩkɛnɩ tamtam paɣtʋ mɩ nɛ mɩ-lʋlʋʋ taa mba kpeekpe, paa le ɩtɩɩwɛɛ yɔ.

15 «“Pɩwɛɛ se ɩkalɩ sabaatɩwaa 7, kpaɣnɩ Sabaatɩ tɛʋ kifemuu, kpaɣnɩ kɩyakʋ ŋgʋ iwoni kɩlaʋ kifiɣduu hɔɔyɛ yɔ.+ Pɩwɛɛ se pɛkɛ kpɩtaŋ pilim. 16 Pɩwɛɛ se ɩkalɩ kɩyakɩŋ 50,+ piwolo pɩtalɩ Sabaatɩ 7 ñɩŋgʋ tɛʋ kifemuu, nɛ pʋwayɩ lɛ, pɩwɛɛ se ɩlaa tɔɔnaɣ kɩfalaɣ pee kɩlaʋ Yehowa.+ 17 Pɩwɛɛ se ɩkpaɣ kpɔnɔnaa 2 ɖenɖe ɩwɛɛ yɔ nɛ ɩkɔna nɛ pɩkɛnɩ kɩlaʋ kifiɣduu. Mʋlʋm mbʋ pɩkpɩzɩ camɩyɛ yɔ efa hɔɔlɩŋ 2 hɔɔlɩŋ 10 taa* pɩwɛɛ se pakpaɣ nɛ palabɩnɩ-wɛ. Pɩwɛɛ se paɖʋ pa-taa lɔlɔm,+ nɛ pɩkɛnɩ Yehowa kajalaɣ tɔɔnaɣ pee wena apɩwa yɔ.+ 18 Nɛ pɩwɛɛ se ɩkpaɣ heɣsi abalɩñɩnzɩ 7 nzɩ sɩfɛyɩnɩ ɛjandʋ natʋyʋ nɛ paa ŋga lɛ kɛwɛnɩ pɩnaɣ kʋɖʋmaɣ yɔ, nɔ* abalɩñɩnʋ kʋɖʋm nɛ ɛyaŋ 2 nɛ ɩkpɛndɩ kpɔnɔnaa yɔɔ nɛ ɩlaa.+ Ɩlaɣ kɩlaʋ ŋgʋ nɛ pɩkɛnɩ kɩlaʋ kɩñaɣzʋʋ Yehowa, kɩ nɛ kɩ-tɔɔnaɣ pee kɩlaʋ nɛ ki-kilizasɩ, pɩkɛɣnɩ kɩlaʋ ŋgʋ pañaɣzɩ-kʋ miŋ yɔ, ŋgʋ kɩ-sɔzɩŋ kɛdɩɣnɩ Yehowa yɔ.* 19 Nɛ pɩwɛɛ se ɩlaa pʋnʋ* nɛ pɩkɛnɩ kɩwɛɛkɩm yɔɔ kɩlaʋ,+ nɛ heɣsi abalɩñɩnzɩ 2, paa ŋga lɛ kɛwɛɛnɩ pɩnaɣ kʋɖʋmaɣ, nɛ pɩkɛnɩ laŋhɛzɩyɛ kɩlaʋ.+ 20 Cɔjɔ kaɣ fiɣduu heɣsi abalɩñɩnzɩ 2 nzɩ, pɩkpɛndɩnɩ kajalaɣ tɔɔnaɣ pee wena apɩwa yɔ a-kpɔnɔnaa nɛ pɩkɛnɩ kɩlaʋ kifiɣduu Yehowa ɛsɩndaa. Pɩkɛɣnɩ Yehowa mbʋ pɩwɛ kele kele yɔ, nɛ pɩkaɣ kɛʋ cɔjɔ pʋyʋ.+ 21 Puwiye lɛ, pɩwɛɛ se isusi kigbeɣluu tɔm,+ pɩkɛɣnɩ-mɩ kigbeɣluu kiɖeɖeu. Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ. Pɩkɛnɩ tamtam paɣtʋ mɩ nɛ mɩ-lʋlʋʋ taa mba kpeekpe mɩ-ɖɩjaɣyɛ kpeekpe taa.

22 «“Ɩɩkʋŋ mɩ-ɛjaɖɛ taa tɔɔnaɣ lɛ, pɩfɛyɩ se ŋkʋ ña-hayɩm kpɛnzɩ yɔɔ cɩɖɩ cɩɖɩ nɛ pɩfɛyɩ se ŋcazɩ mbʋ ŋkʋma nɛ pɩkazɩ yɔ.+ Pɩwɛɛ se ŋyebini-pʋ kʋñɔndʋ*+ nɛ ɛgɔm.+ Mɛkɛnɩ mɩ-Ɛsɔ Yehowa.”»

23 Yehowa tasɩ yɔɔdɩnʋʋ Moyizi nɛ eheyi-i se: 24 «Heyi Izrayɛɛlɩ mba se: “Fenaɣ 7 ñɩŋga taa, pɩwɛɛ se kɩyakʋ kajalaɣ ñɩŋgʋ ɛkɛnɩ-mɩ hɛzʋʋ kiya; pakaɣ ɛgandɩyɛ hʋlʋʋ nɛ posusuni kɩyakʋ ŋgʋ+ nɛ ɩtɔzɩ se kɩkɛ kigbeɣluu kiɖeɖeu. 25 Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ, nɛ ɩkaɣ laʋ kɩlaʋ ŋgʋ pañaɣzɩɣ-kʋ miŋ yɔ Yehowa.”»

26 Yehowa tasɩ yɔɔdɩnʋʋ Moyizi nɛ eheyi-i se: 27 «Ɛlɛ fenaɣ 7 ñɩŋga ŋga, ka-kɩyakʋ 10 ñɩŋgʋ kɛɣ Kɩwɛɛkɩm yɔɔ Huuzuu Kɩyakʋ.+ Pɩwɛɛ se ɩla kigbeɣluu kiɖeɖeu, nɛ pɩwɛɛ ɖɔɖɔ se ɩnazɩ mɩ-tɩ*+ nɛ ɩlaa kɩlaʋ ŋgʋ pañaɣzɩɣ miŋ yɔ Yehowa. 28 Pɩfɛyɩ se ɩla tʋmɩyɛ naɖɩyɛ ŋgee kɩyakʋ ŋgʋ ki-wiye, mbʋ pʋyɔɔ yɔ kɩwɛɛkɩm yɔɔ huuzuu kɩyakʋ pɩkɛnaa, se palabɩ-mɩ kɩwɛɛkɩm yɔɔ huuzuu sɔnzɩ+ mɩ-Ɛsɔ Yehowa ɛsɩndaa. 29 Ye nɔɔyʋ* ɛtɩnazɩ ɛ-tɩ* kɩyakʋ ŋgʋ ki-wiye yɔ, pakaɣ-ɩ lɩzʋʋ* ɛ-samaɣ taa.+ 30 Nɛ weyi* ɛlakɩ tʋmɩyɛ naɖɩyɛ kɩyakʋ ŋgʋ ki-wiye yɔ, mankaɣ-ɩ ɖɩzʋʋ ɛ-samaɣ taa. 31 Pɩfɛyɩ se ɩla tʋmɩyɛ naɖɩyɛ. Pɩkɛnɩ tamtam paɣtʋ mɩ nɛ mɩ-lʋlʋʋ taa mba kpeekpe, paa le ɩtɩɩwɛɛ yɔ. 32 Pɩkɛnɩ-mɩ hɛzʋʋ kiya sabaatɩ, nɛ ɩkaɣ mɩ-tɩ* nazʋʋ+ fenaɣ kɩyakʋ 9 ñɩŋgʋ wiye ɖanaɣ yɔɔ. Ɩkaɣ mɩ-sabaatɩ tɔɔʋ kpaɣ ɖanaɣ nɛ ŋwolo ɖanaɣ.»

33 Yehowa tasɩ yɔɔdɩnʋʋ Moyizi nɛ eheyi-i se: 34 «Heyi Izrayɛɛlɩ mba se: “Fenaɣ 7 ñɩŋga ŋga, ka-kɩyakʋ 15 ñɩŋgʋ kɛɣnɩ Coka* Kazandʋ, ɩtɔkɩ-tʋ Yehowa kɩyakɩŋ 7.+ 35 Pɩwɛɛ se ɩla kigbeɣluu kiɖeɖeu kajalaɣ kɩyakʋ wiye, nɛ pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ. 36 Pɩwɛɛ se ɩlaa kɩlaʋ ŋgʋ pañaɣzɩɣ miŋ yɔ Yehowa kɩyakɩŋ 7. Kɩyakʋ 8 ñɩŋgʋ wiye lɛ, pɩwɛɛ se ɩla kigbeɣluu kiɖeɖeu,+ nɛ pɩwɛɛ se ɩlaa kɩlaʋ ŋgʋ pañaɣzɩɣ miŋ yɔ Yehowa. Pɩkɛnɩ ŋgee kigbeɣluu. Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ.

37 «“Yehowa kazandʋ+ lɛ, kazandʋ ndʋ pɩwɛɛ se isusi se tɩkɛ kigbeɣliŋ kiɖeɖeŋ+ nɛ ɩlaa kɩlaʋ ŋgʋ pañaɣzɩɣ-kʋ miŋ yɔ Yehowa: kɩlaʋ kɩñaɣzʋʋ+ nɛ tɔɔnaɣ pee kɩlaʋ+ nɛ kilizasɩ,+ ɛzɩ paa ɖooye ɖʋtʋ pɔzʋʋ yɔ. 38 Ɩlaɣ-ɩ nɛ pɩtasɩnɩ mbʋ palaɣ Yehowa tɛ sabaatɩwaa+ yɔɔ yɔ, nɛ mɩ-haɖɛ,+ mi-ɖuutu kɩlaŋ+ nɛ mɩ-sɔɔlɩm haɖɛ+ nɖɩ pɩwɛɛ se ɩcɛlɩ Yehowa yɔ. 39 Ɛlɛ fenaɣ 7 ñɩŋga kɩyakʋ 15 ñɩŋgʋ wiye, ɩtɛŋ ɛjaɖɛ taa tɔɔnaɣ kpeɣluu lɛ, pɩwɛɛ se ɩtɔɔ Yehowa kazandʋ kɩyakɩŋ 7.+ Kɩyakʋ kajalaɣ ñɩŋgʋ kɛɣnɩ hɛzʋʋ kiya, nɛ kɩyakʋ 8 ñɩŋgʋ kɛɣ ɖɔɖɔ hɛzʋʋ kiya.+ 40 Kɩyakʋ kajalaɣ ñɩŋgʋ wiye lɛ, ɩkaɣ kpaɣʋ tɩŋ weyi ɩwɛ kajʋka yɔ i-pee, paadɛtʋ,+ tɩŋ weyi ɩwɛ hatʋ camɩyɛ yɔ i-pilinzi nɛ fɛɛʋ* taa tɩŋ* pilinzi, nɛ ɩkaɣ mɛyʋʋ+ mɩ-Ɛsɔ Yehowa ɛsɩndaa kɩyakɩŋ 7.+ 41 Ɩkaɣ-tʋ tɔɔʋ kɩyakɩŋ 7 pɩnaɣ taa+ nɛ tɩkɛ Yehowa kazandʋ. Pɩwɛɛ se ɩtɔɔ-tʋ fenaɣ 7 ñɩŋga taa, pɩkɛɣnɩ tamtam paɣtʋ mɩ nɛ mɩ-lʋlʋʋ taa mba kpeekpe. 42 Pɩwɛɛ se ɩcaɣ coka tɛɛ kɩyakɩŋ 7.+ Pɩwɛɛ se Izrayɛɛlɩ lʋlʋʋ taa mba tɩŋa ɩcaɣ coka tɛɛ, 43 nɛ piyele nɛ mɩ-kpaɖɩŋ weyi ɩkɔŋ yɔ ɩtɩlɩ+ se coka tɛɛ maayeba nɛ Izrayɛɛlɩ mba caɣ alɩwaatʋ ndʋ malɩzaɣ-wɛ Ejipiti ɛjaɖɛ taa yɔ.+ Mɛkɛnɩ mɩ-Ɛsɔ Yehowa.”»

44 Mbʋ Moyizi heyi Izrayɛɛlɩ mba Yehowa kazandʋ tɔm.

24 Yehowa tasɩ yɔɔdɩnʋʋ Moyizi nɛ eheyi-i se: 2 «Ðʋ paɣtʋ Izrayɛɛlɩ mba se pɔkɔnɩ-ŋ oliivi num kɩbam nɛ paaɖʋ-pʋ kanɖʋnaa taa se pɩsa nɛ pɛwɛɛ mʋʋ yɔɔ tam.+ 3 Pɩwɛɛ se Aarɔɔnɩ ɛcɔnɩ kanɖʋnaa mba pɛwɛ kediɣzaɣ kizinziku tɛɛ Aseɣɖe Lɩzʋʋ pɩsaʋ kikenduu ɛsɩndaa yɔ pe-ɖeɖe nɛ pɛwɛɛ mʋʋ yɔɔ tam Yehowa ɛsɩndaa, kpaɣnɩ ɖanaɣ nɛ tɛʋ kɔɔ kife. Pɩkɛnɩ tamtam paɣtʋ mɩ nɛ mɩ-lʋlʋʋ taa mba kpeekpe. 4 Pɩwɛɛ se ɛñɔɔzʋʋ kanɖʋnaa camɩyɛ nɛ ɛsɩɣ-wɛ kanɖʋnaa ɖɩzɩyɛ+ nɖɩ palabɩnɩ sika kɩbaŋa yɔ ɖɩ-yɔɔ Yehowa ɛsɩndaa tam.

5 «Pɩwɛɛ se ŋkpaɣ mʋlʋm mbʋ pɩkpɩzɩ camɩyɛ yɔ nɛ ŋlabɩnɩ kpɔnɔnaa 12, mba pɛwɛ kulukulu kokooye tɩyɛ yɔ. Mʋlʋm efa hɔɔlɩŋ 2 hɔɔlɩŋ 10 taa* pɩwɛɛ se ŋkpaɣ nɛ ŋlabɩnɩ paa kpɔnɔ ŋgʋ. 6 Ŋkaɣ-wɛ tɩnʋʋ ɖama yɔɔ tindima 2 taa, kpɔnɔnaa 6 paa tindimiye nɖɩ lɛ ɖɩ-taa,+ taabɩlɩ ŋgʋ palabɩnɩ sika kɩbaŋa yɔ kɩ-yɔɔ Yehowa ɛsɩndaa.+ 7 Pɩwɛɛ se ŋɖʋ tɩlaaɖɩ kʋhʋlʋmʋʋ kɩbaŋʋ paa tindimiye nɖɩ lɛ ɖɩ-yɔɔ, nɛ pakaɣ-kʋ ñaɣzʋʋ kpɔnɔ lone taa,* nɛ pɩkɛ kɩlaʋ+ ŋgʋ pañaɣzɩɣ-kʋ miŋ yɔ Yehowa. 8 Paa Sabaatɩ kɩyakʋ ŋgʋ lɛ, pɩwɛɛ se ɛtɩnɩɣ kpɔnɔnaa ɖama yɔɔ Yehowa ɛsɩndaa.+ Pɩkɛnɩ tamtam ɛgbɛyɛ ɖʋʋ ma nɛ Izrayɛɛlɩ mba ɖɛ-hɛkʋ taa. 9 Pakaɣ kɛʋ Aarɔɔnɩ nɛ ɛ-pɩyalaa pa-pʋyʋ,+ nɛ pakaɣ-wɛ tɔɔʋ lone kiɖeɖeye naɖɩyɛ taa,+ mbʋ pʋyɔɔ yɔ pɛkɛnɩ-ɩ pʋyʋ kiɖeɖeu siŋŋ, palɩnɩ Yehowa kɩlaŋ weyi pañaɣzɩ miŋ yɔ ɩ-taa, nɛ pɩkɛnɩ tamtam paɣtʋ.»

10 Abalʋ nɔɔyʋ kaawɛ Izrayɛɛlɩ mba hɛkʋ taa, e-ɖoo kaakɛ Izrayɛɛlɩ tʋ nɛ ɛ-caa ñaakɛ Ejipiti tʋ.+ Nɛ you lɩɩ abalʋ ɛnʋ nɛ Izrayɛɛlɩ abalʋ nɔɔyʋ pɛ-hɛkʋ taa ɖigbeɣliye* taa. 11 Nɛ halʋ Izrayɛɛlɩ tʋ pɩyalʋ paɣzɩ Hɩɖɛ* tʋʋ nɛ ɛlɔʋ ɖɩ-yɔɔ nɔɔ kɩdɛkɛdaɣ.+ Peeɖe powoni-i Moyizi cɔlɔ.+ Payaɣaɣ abalʋ ɛnʋ e-ɖoo se Selomitɩ, ɛlɛ kaakɛ Dibiri pɛlɛ, Daanɩ cejewiye taa tʋ. 12 Nɛ pakpa abalʋ ɛnʋ nɛ pasɩɩ nɛ pɩkɔɔ pɩsɩɩnɩ alɩwaatʋ ndʋ patɩlɩ Yehowa lɩmaɣza kpayɩ kpayɩ yɔ.+

13 Pʋwayɩ lɛ, Yehowa heyi Moyizi se: 14 «Lɩnɩ weyi ɛlɔ nɔɔ kɩdɛkɛdaɣ yɔ ɖigbeɣliye* wayɩ, nɛ pɩwɛɛ se mba payɩ panɩ tɔm ndʋ ɛyɔɔdaa yɔ patɩnɩ pe-nesi ɛ-ñʋʋ taa nɛ samaɣ kpeekpe yaɣ-ɩ pɛɛ.+ 15 Nɛ pɩwɛɛ se ŋheyi Izrayɛɛlɩ mba se: “Ye nɔɔyʋ ɛlɔ nɔɔ kɩdɛkɛdaɣ ɛ-Ɛsɔ yɔɔ yɔ, pakaɣ-ɩ pɔzʋʋ akɔnta ɛ-kɩdɛkɛdɩm yɔɔ. 16 Weyi ɛtʋʋ Yehowa hɩɖɛ yɔ, paa pɩɩlabɩ ɛzɩma yɔ, pakaɣ-ɩ kʋʋ.+ Paa pɩtɩɩkɛ suwe yɔ, pɩwɛɛ se samaɣ kpeekpe ɛyaɣ-ɩ pɛɛ. Ye ɛgɔm nɔɔyʋ ɛtʋ Hɩɖɛ yɔ, pakaɣ-ɩ kʋʋ, ɛzɩ pɩwɛʋ Izrayɛɛlɩ tʋ maɣmaɣ weyi ɛlakɩ mbʋ yɔ ɛ-hɔɔlʋʋ taa yɔ.

17 «“Ye nɔɔyʋ ɛlɩzɩ ɛyʋ wezuu yɔ,* paa pɩɩla ɛzɩma yɔ, pɩwɛɛ se pakʋ-ɩ.+ 18 Weyi ɛmakɩ ɖɩɣa kpɩnɛ naɖɩyɛ nɛ ɛkʋ-ɖɩ yɔ,* pɩwɛɛ se ɛhɛyɩ ɖi-lone taa, wezuu wezuu lone taa.* 19 Ye ɛyʋ nɔɔyʋ ɛɖʋ ɛyʋ lɛlʋ heŋ yɔ, mbʋ ɛlaba yɔ, pɩwɛɛ se palabɩ-ɩ pʋ.+ 20 Mɔɔyɛ pɛlʋʋ mɔɔyɛ pɛlʋʋ lone taa, ɛsɩyɛ ɛsɩyɛ lone taa, keɖe keɖe lone taa, heŋ weyi ɖeyi ɖeyi ɛɖʋ lɛlʋ yɔ, pɩwɛɛ se paɖʋ ɛ-maɣmaɣ heŋ ɛnɩ.+ 21 Ɛyʋ weyi ɛmakɩ kpɩnɛ naɖɩyɛ nɛ ɛkʋ-ɖɩ yɔ, pɩwɛɛ se ɛhɛyɩ ɖi-lone taa,+ ɛlɛ weyi ɛmakɩ ɛyʋ nɔɔyʋ nɛ ɛkʋ-ɩ yɔ, pɩwɛɛ se pakʋ-ɩ ɖɔɖɔ.+

22 «“Tɔm hʋʋ hɔɔlʋʋ taa lɛ, pɩwɛɛ se paɣtʋ kʋɖʋmtʋ eɖiyini-mɩ, paa pɩtɩɩkɛ ɛgɔm yaa Izrayɛɛlɩ tʋ maɣmaɣ yɔ,+ mbʋ pʋyɔɔ yɔ mɛkɛnɩ mɩ-Ɛsɔ Yehowa.”»

23 Pʋwayɩ lɛ, Moyizi yɔɔdɩnɩ Izrayɛɛlɩ mba, nɛ palɩnɩ weyi ɛlɔ nɔɔ kɩdɛkɛdaɣ yɔ ɖigbeɣliye* wayɩ, nɛ payaɣ-ɩ pɛɛ.+ Mbʋ Izrayɛɛlɩ mba labɩ ɖeyi ɖeyi ɛzɩ Yehowa kaaɖʋʋ paɣtʋ Moyizi yɔ.

25 Yehowa tasɩ yɔɔdɩnʋʋ Moyizi, Sinayii Pʋʋ yɔɔ, nɛ eheyi-i se: 2 «Yɔɔdɩnɩ Izrayɛɛlɩ mba nɛ ŋheyi-wɛ se: “Ɩkɔŋ nɛ ɩtalɩ ɛjaɖɛ nɖɩ mɛncɛlɩɣ-mɩ yɔ ɖɩ-taa lɛ,+ pɩwɛɛ se iyele nɛ tɛtʋ hɛzɩ nɛ pɩkɛnɩ Yehowa sabaatɩ.+ 3 Ŋpɩzɩɣ nɛ ŋɖuu ɖomaɣ pɩnzɩ 6 ña-hayɩm taa, nɛ ŋpɩzɩɣ ɖɔɖɔ nɛ ŋkpalɩ ñe-viiñi pilinzi pɩnzɩ 6, nɛ ŋkpeɣli hayɩm taa tɔɔnaɣ.+ 4 Ɛlɛ pɩnaɣ 7 ñɩŋga kaɣ kɛʋ tɛtʋ hɛzʋʋ kiya sabaatɩ, Yehowa sabaatɩ. Pɩfɛyɩ se ŋɖuu ɖomaɣ ña-hayɩm taa yaa ŋkpalɩ ñe-viiñi pilinzi. 5 Tɔɔnaɣ ŋga ŋŋkʋma nɛ pɩkazɩ nɛ kɔñɔ ka-tɩ yɔɔ yem yɔ, taakʋm-kɛ, nɛ viiñi ŋgʋ ŋtɩkpalɩ ki-pilinzi yɔ, taakpeɣli ki-pee. Pɩwɛɛ se pɩkɛ tɛtʋ hɛzʋʋ kiya pɩnaɣ. 6 Paa mbʋ yɔ, ɩpɩzɩɣ nɛ ɩtɔɔ tɔɔnaɣ ŋga kalabɩ tɛtʋ yɔɔ tɩ-sabaatɩ alɩwaatʋ taa yɔ; ña nɛ ño-yomaa abalɩñɩma, ño-yomaa halɩñɩma, ña-abaa tʋ nɛ agɔma mba pɔkɔma nɛ pacaɣ ñɔ-cɔlɔ yɔ ɩpɩzɩɣ nɛ ɩtɔɔ-kɛ, 7 ɖɩɣa kpɩna nɛ tɛtɛgbɩna wena awɛ ñɛ-ɛjaɖɛ taa yɔ, apɩzɩɣ ɖɔɖɔ nɛ atɔɔ-kɛ. Mbʋ payɩ tɛtʋ lʋlʋʋ yɔ, papɩzɩɣ nɛ pɔtɔɔ-pʋ.

8 «“Pɩwɛɛ se ŋkalɩ pɩnzɩ 7 sabaatɩwaa, pɩnzɩ 7 tam 7, nɛ pɩnzɩ 7 sabaatɩwaa mba pa-kɩyakɩŋ kaɣ kpɛndʋʋ pɩnzɩ 49. 9 Nɛ fenaɣ 7 ñɩŋga taa, ka-kɩyakʋ 10 ñɩŋgʋ wiye lɛ, ŋkaɣ hʋlʋʋ nɔndɔʋ ɖoŋ; pɩwɛɛ se iyele nɛ panɩɩ nɔndɔʋ taŋ mɩ-ɛjaɖɛ kpeekpe taa Kɩwɛɛkɩm yɔɔ Huuzuu Kɩyakʋ wiye.+ 10 Pɩwɛɛ se ɩpɩsɩ pɩnaɣ 50 ñɩŋga kele kele nɛ isusi ɛjaɖɛ taa mba tɩŋa se pɛwɛ pa-tɩ yɔɔ.+ Kakaɣ-mɩ kɛʋ Tɩ-yɔɔ wɛʋ pɩnaɣ, nɛ mɩ-taa paa weyi kaɣ mʋʋ tɛtʋ ndʋ tɩɩkɛ ɛ-ñɩm yɔ,* nɛ pɩwɛɛ se mɩ-taa paa anɩ ɛpɩsɩ ɛ-hɔʋ taa.+ 11 Pɩnaɣ 50 ñɩŋga ŋga, kakaɣ-mɩ kɛʋ Tɩ-yɔɔ wɛʋ pɩnaɣ. Pɩfɛyɩ se iɖuu ɖomaɣ yaa ɩkʋ tɔɔnaɣ ŋga paakʋma nɛ pɩkazɩ nɛ kɔñɔ ka-tɩ yɔɔ yem yɔ, nɛ pɩfɛyɩ ɖɔɖɔ se ikpeɣli viiñi ŋgʋ patɩkpalɩ ki-pilinzi yɔ ki-pee.+ 12 Mbʋ pʋyɔɔ yɔ Tɩ-yɔɔ wɛʋ pɩnaɣ pɩkɛnaa. Pɩwɛɛ se kɛkɛ-mɩ pɩnaɣ kiɖeɖeɣa. Tɔɔnaɣ ŋga tɛtʋ lʋlɩ tɩ-tɩ yɔɔ yem yɔ ke-ɖeke ɩpɩzɩɣ nɛ ɩtɔɔ.+

13 «“Tɩ-yɔɔ wɛʋ pɩnaɣ ŋga ka-taa lɛ, pɩwɛɛ se mɩ-taa paa weyi ɛmʋ tɛtʋ ndʋ tɩɩkɛ ɛ-ñɩm yɔ.*+ 14 Ye ŋpɛdɩɣnɩ ɛyʋ lɛlʋ nabʋyʋ yaa ye ŋyakɩ nabʋyʋ ɛ-cɔlɔ yɔ, itaamuli ɖama.+ 15 Ye ŋyakɩ tɛtʋ* ɛyʋ lɛlʋ cɔlɔ yɔ, pɩnzɩ nzɩ sɩtɛm ɖɛʋ Tɩ-yɔɔ wɛʋ pɩnaɣ wayɩ yɔ, nzɩ pɩwɛɛ se ɩcɔna. Nɛ ye ɛpɛdɩɣnɩ-ŋ tɛtʋ yɔ, kʋmtʋ pɩnzɩ nzɩ sɩkazaa yɔ sɩ-nɔɔ taa pɩwɛɛ se ɛpɛdɩnɩ-ŋ tʋ.+ 16 Ye pɩnzɩ nzɩ sɩkazaa yɔ sɩɖɔwa yɔ, ɖɩnɛ ɛlɛ ɛpɩzɩɣ nɛ ɛkpazɩ ti-liidiye, ɛlɛ ye pɩnzɩ pazɩ yem ɩkazɩna yɔ, pɩwɛɛ se ɛpasɩ ti-liidiye, mbʋ pʋyɔɔ yɔ pɩnzɩ nzɩ sɩkazaa yɔ sɩ-kʋmtʋ ɛpɛdɩɣnɩ-ŋ. 17 Pɩfɛyɩ se mɩ-taa nɔɔyʋ emuli lɛlʋ,+ pɩwɛɛ se ise mɩ-Ɛsɔ sɔɔndʋ,+ mbʋ pʋyɔɔ yɔ mɛkɛnɩ mɩ-Ɛsɔ Yehowa.+ 18 Ye ɩɖɔŋ man-paɣtʋ yɔɔ nɛ ɩɖɔkʋʋ mɔn-tɔm hʋʋ paɣtʋ yɔ, ɩkaɣ caɣʋ pɛɛyɛ taa ɛjaɖɛ taa.+ 19 Tɛtʋ kaɣ lʋlʋʋ tɩ-tɔɔnaɣ,+ nɛ ɩkaɣ tɔɔʋ nɛ ɩhaɣ nɛ ɩcaɣ tɩ-yɔɔ pɛɛyɛ taa.+

20 «“Ɛlɛ ye ɩpɔzʋʋ mɩ-tɩ se: ‘Ye ɖitiɖuu ɖomaɣ nɛ ɖitikpeɣli ɖɔɖɔ ɖɔ-tɔɔnaɣ yɔ, ɛbɛ ɖɩkaɣ tɔɔʋ pɩnaɣ 7 ñɩŋga taa?’ yɔ,+ 21 ɩtɩlɩ se mankaɣ-mɩ wazʋʋ pɩnaɣ 6 ñɩŋga taa, nɛ tɛtʋ kaɣ lʋlʋʋ tɔɔnaɣ ŋga katalɩɣ-mɩ pɩnzɩ 3 yɔ.+ 22 Nɛ pɩnaɣ 8 ñɩŋga taa lɛ, ɩkaɣ ɖuu ɖomaɣ nɛ ɩwɛɣ tɔɔnaɣ kɩbɩnaɣ tɔɔʋ yɔɔ nɛ pɩkɔɔ nɛ pɩtalɩ pɩnaɣ 9 ñɩŋga taa. Ɩwɛɣ tɔɔnaɣ kɩbɩnaɣ tɔɔʋ yɔɔ nɛ kɩfalaɣ kɔɔ nɛ kapɩɩ.

23 «“Pɩfɛyɩ se pɛpɛdɩ tɛtʋ tamtam pɛdʋʋ,+ mbʋ pʋyɔɔ yɔ matɩnɩ tɛtʋ.+ Mbʋ pʋyɔɔ yɔ mɛ-ɛsɩndaa lɛ, agɔma nɛ caɣyaa ɩkɛnaa.+ 24 Mɩ-ɛjaɖɛ kpeekpe taa lɛ, ye nɔɔyʋ ɛpɛdɩ tɛtʋ natʋyʋ yɔ, pɩwɛɛ se ɛwɛɛnɩ waɖɛ se ɛɖaɣnɩ-tʋ yabʋ.

25 «“Ye ño-koobu ɛpɩsɩ kʋñɔndʋ nɛ ɛpɛdɩ ɛ-tɛtʋ natʋyʋ yɔ, ɛ-hɔʋ taa tʋ weyi ɛñɔtɩnɩ-ɩ kpam yɔ, ɛnʋ pɩwɛɛ se ɛɖaɣnɩ yabʋ tɛtʋ ndʋ e-koobu pɛdaa yɔ.+ 26 Ye nɔɔyʋ ɛfɛyɩnɩ nɔɔyʋ se pʋdʋ ɛɖaɣnɩ yabʋ tɛtʋ ndʋ ɛɛpɛdaa yɔ, ɛlɛ ɛ-maɣmaɣ ɛpɩsɩ ñɩm tʋ nɛ ɛpɩzɩɣ se ɛɖaɣnɩ tɛtʋ ndʋ yabʋ yɔ, 27 pɩwɛɛ se ɛtʋʋzɩ pɩnzɩ nzɩ sɩɖɛwa kpaɣnɩ alɩwaatʋ ndʋ ɛɛpɛdɩ-tʋ yɔ si-liidiye, nɛ ɛpɩsɩnɩ nzɩ sɩkazaa yɔ si-liidiye nɛ ɛcɛlɩ weyi ɛɛyabɩ tɛtʋ ndʋ yɔ. Ðɩnɛ ɛlɛ, ɛpɩzɩɣ nɛ ɛɖaɣnɩ mʋʋ ɛ-tɛtʋ.*+

28 «“Ɛlɛ ye ɛɛpɩzɩɣ se ɛɖaɣnɩ-tʋ yabʋ yaɖʋ cɔlɔ yɔ, tɛtʋ ndʋ ɛpɛdaa yɔ, tɩkaɣ kɛʋ yaɖʋ ñɩm nɛ piwolo nɛ pɩtalɩ Tɩ-yɔɔ wɛʋ pɩnaɣ;+ nɛ Tɩ-yɔɔ wɛʋ pɩnaɣ taa lɛ, tɩkaɣ pɩsʋʋ pɛdɩyʋ ñɩm, ɛkaɣ ɖaɣnʋʋ mʋʋ ɛ-tɛtʋ.+

29 «“Ye nɔɔyʋ ɛpɛdɩ ɖɩɣa nakɛyɛ tɛtʋ ndʋ pɔcɔzɩ-tʋ koloŋa yɔ tɩ-taa yɔ, ɛwɛnɩ waɖɛ ɖɔɖɔ se ɛɖaɣnɩ ɖɩɣa ŋga yabʋ, pɩnaɣ kʋɖʋmaɣ taa kpaɣnɩ kɩyakʋ ŋgʋ ɛpɛdɩ-kɛ yɔ; ɛwɛnɩ waɖɛ pɩnaɣ nɛ kɛ-tɛɛ se ɛɖaɣnɩ ɖɩɣa ŋga yabʋ.+ 30 Ɛlɛ ye pɩnaɣ kiya ɛɖɛwa nɛ ɛtɩɖaɣnɩ yabʋ tɛtʋ ndʋ pɔcɔzɩ-tʋ koloŋa yɔ tɩ-taa ɖɩɣa ŋga yɔ, kakaɣ pɩsʋʋ yaɖʋ nɛ ɛ-lʋlʋʋ taa mba ñɩm tam. Pɩfɛyɩ se peyebini-kɛ pɛdɩyʋ Tɩ-yɔɔ wɛʋ pɩnaɣ taa. 31 Ɛlɛ ɖɩsɩ nzɩ sɩwɛ tɛtʋ cikpetu ndʋ patɩcɔzɩ-tʋ kolonzi yɔ tɩ-taa yɔ, pakaɣ-sɩ kpaɣʋ ɛzɩ hayɩm sɩkɛnaa yɔ. Weyi ɛpɛdɩɣ ɖɩsɩ nzɩ sɩ-taa nakɛyɛ yɔ ɛwɛnɩ waɖɛ tam se ɛɖaɣnɩ-kɛ yabʋ, nɛ Tɩ-yɔɔ wɛʋ pɩnaɣ taa lɛ, pɩwɛɛ se peyebini-i kɛ.

32 «“Piyele nɛ Leevi mba tɛtʋ ndɩ ndɩ+ taa ɖɩsɩ lɛ, Leevi mba wɛɣnɩ waɖɛ tam se ye pɛpɛdɩ sɩ-taa nakɛyɛ yɔ, paɖaɣnɩ-kɛ yabʋ. 33 Ye Leevi tʋ nɔɔyʋ ɛpɛdɩ ɛ-ɖɩɣa Leevi mba tɛtʋ taa nɛ ɛtɩɖaɣnɩ-kɛ yabʋ yɔ, pɩwɛɛ se papɩsɩnɩ-ɩ kɛ Tɩ-yɔɔ wɛʋ pɩnaɣ taa,+ mbʋ pʋyɔɔ yɔ Leevi mba tɛtʋ ndɩ ndɩ taa ɖɩsɩ kɛnɩ pa-ñɩm Izrayɛɛlɩ mba hɛkʋ taa.+ 34 Pɩtasɩ lɛ, hayɩm*+ mbʋ pɩcɔ pɛ-tɛtʋ ndɩ ndɩ nɛ pɩta yɔ, paapɩzɩɣ nɛ pɛpɛdɩ-pʋ, mbʋ pʋyɔɔ yɔ pɩkɛnɩ pa-ñɩm tam.

35 «“Ye ño-koobu weyi ɛwɛ ñɔ-cɔlɔ yɔ, ɛpɩsɩ kʋñɔndʋ nɛ ɛɛpɩzɩɣ se ɛcɔnɩ ɛ-tɩ yɔɔ yɔ, pɩwɛɛ se ŋɖʋ-ɩ nesi+ ɛzɩ ŋɖʋʋ nesi ɛgɔm nɛ caɣyʋ yɔ,+ se pɩsa nɛ ɛtaatɛŋɩlɩ mɩ-hɛkʋ taa. 36 Taañɩnɩ se ŋhiɣ kɛzɛɣa ɛ-yɔɔ nɛ taatɔɔ ɛ-yɔɔ.*+ Pɩwɛɛ se ŋse ñɛ-Ɛsɔ sɔɔndʋ,+ nɛ ño-koobu wɛɛ wezuu mɩ-hɛkʋ taa. 37 Pɩfɛyɩ se ŋkɩndɩ-ɩ ñe-liidiye se ɛhɛyɩnɩ kɛzɛɣa+ yaa ŋcɛlɩ-ɩ ñɔ-tɔɔnaɣ se ŋhiɣ kɛzɛɣa. 38 Mɛkɛnɩ mɩ-Ɛsɔ Yehowa, weyi ɛlɩzɩ-mɩ nɛ Ejipiti ɛjaɖɛ taa+ se ɛcɛlɩ-mɩ Kanaŋ ɛjaɖɛ yɔ, se mawɩlɩ se mɛnkɛ mɩ-Ɛsɔ.+

39 «“Ye ño-koobu weyi ɛwɛ ñɔ-cɔlɔ yɔ, ɛpɩsɩ kʋñɔndʋ nɛ ɛpɛdɩnɩ-ŋ ɛ-tɩ yɔ,+ pɩfɛyɩ se ŋñɩɣ ɛ-yɔɔ se ɛla yom tʋmɩyɛ.+ 40 Pɩwɛɛ se ŋlabɩ-ɩ ɛzɩ ŋlakʋʋ abaa tʋ yɔ,+ ɛzɩ ŋlakʋʋ caɣyʋ yɔ. Ɛkaɣ tʋmɩyɛ labʋ ñɔ-cɔlɔ nɛ piwolo nɛ pɩsɩɩnɩ Tɩ-yɔɔ wɛʋ pɩnaɣ. 41 Pʋwayɩ lɛ, ɛkaɣ kʋyʋʋ ñɔ-cɔlɔ, ɛ nɛ e-piya,* nɛ ɛpɩsɩ ɛ-hɔʋ taa. Pɩwɛɛ se ɛpɩsɩ ɛ-cɔzɔnaa tɛtʋ yɔɔ.+ 42 Mbʋ pʋyɔɔ yɔ mba malɩzɩnɩ Ejipiti ɛjaɖɛ taa yɔ, pɛkɛ mo-yomaa.+ Pɩfɛyɩ se pɛpɛdɩ pa-tɩ ɛzɩ ɛyʋ pɛdʋʋ yom yɔ. 43 Pɩfɛyɩ se ŋwɩlɩ-ɩ ñaŋ,+ pɩwɛɛ se ŋse ñɛ-Ɛsɔ sɔɔndʋ.+ 44 Ajɛɛ wena acɔ-ŋ nɛ ata yɔ a-taa pɩwɛɛ se ño-yomaa abalɩñɩma nɛ halɩñɩma ɩlɩɩna; a-taa ŋpɩzɩɣ nɛ ŋya yom abalɩñɩnʋ yaa halɩñɩnʋ. 45 Agɔma mba pɛwɛ mɩ-hɛkʋ taa yɔ, ɩpɩzɩɣ ɖɔɖɔ nɛ ɩya yomaa pa-pɩyalaa taa,+ pa nɛ pa-lʋlʋʋ taa ñɩma mba palʋlɩ-wɛ mɩ-ɛjaɖɛ taa yɔ pa-taa nɛ papɩsɩ mɩ-ñɩm. 46 Mɩ-wayɩ lɛ, papɩzɩɣ nɛ papɩsɩ mɩ-pɩyalaa pʋyʋ tam nɛ palakɩ yomaa tʋmɩyɛ mɩ-pɩyalaa. Ɩpɩzɩɣ nɛ ɩpɩsɩ-wɛ tʋmlaɖaa, ɛlɛ pɩfɛyɩ se ɩwɩlɩ ñaŋ mi-koobiya Izrayɛɛlɩ mba.+

47 «“Ɛlɛ ye mɩ-hɛkʋ taa ɛgɔm nɔɔyʋ yaa caɣyʋ nɔɔyʋ ɛpɩsɩ ñɩm tʋ nɛ ño-koobu pɩsɩ kʋñɔndʋ ɛ-cɔlɔ nɛ ɛlɛ pɛdɩ ɛ-tɩ nɛ ɛgɔm ɛnʋ yaa caɣyʋ weyi ɛwɛ mɩ-hɛkʋ taa yɔ, yaa ɛgɔm ɛnʋ ɛ-hɔʋ taa tʋ nɔɔyʋ yɔ, 48 weyi ɛpɛdɩɣ ɛ-tɩ yɔ, ɛtɛŋ ɛ-tɩ pɛdʋʋ lɛ, ɛwɛnɩ waɖɛ se paɖaɣnɩ-ɩ yabʋ. E-koobiya taa nɔɔyʋ pɩzɩɣ nɛ ɛɖaɣnɩ-ɩ yabʋ,+ 49 yaa ɛ-caa neu yaa ɛ-caa ɖalʋ yaa pa-taa nɔɔyʋ pɩyalʋ pɩzɩɣ nɛ ɛɖaɣnɩ-ɩ yabʋ, yaa ɛ-hɔʋ taa tʋ weyi ɛñɔtɩnɩ-ɩ kpam yɔ,* ɛpɩzɩɣ nɛ ɛɖaɣnɩ-ɩ yabʋ.

«“Yaa ye ɛ-maɣmaɣ ɛpɩsɩ ñɩm tʋ yɔ, ɛpɩzɩɣ ɖɔɖɔ nɛ ɛɖaɣnɩ ɛ-tɩ yabʋ.+ 50 Pɩwɛɛ se ɛ nɛ weyi ɛɛyabɩ-ɩ yɔ, pakalɩ pɩnzɩ, kpaɣnɩ pɩnaɣ ŋga ɛpɛdɩnɩ-ɩ ɛ-tɩ yɔ nɛ piwolo Tɩ-yɔɔ wɛʋ pɩnaɣ,+ nɛ ɛ-pɛdʋʋ liidiye lakɩ nɔɔ kʋɖʋmaɣ nɛ pɩnzɩ ɖɔ ɖɔʋ mbʋ yɔ.+ Kɩyakɩŋ weyi ɛlabɩ tʋmɩyɛ alɩwaatʋ ndʋ tɩ-taa yɔ, patʋʋzʋʋ i-liidiye ɛzɩ patʋʋzʋʋ abaa tʋ kɩyakɩŋ liidiye yɔ.+ 51 Ye pɩnzɩ nzɩ sɩkazaa yɔ sɩɖɔwa yɔ, liidiye nɖɩ ɛhɛyɩɣ se ɛɖaɣnɩnɩ ɛ-tɩ yabʋ yɔ, pɩwɛɛ se ɖɩmʋnɩ pɩnzɩ nzɩ sɩkazaa yɔ. 52 Ye pɩnzɩ pazɩ yem ɩkazɩna se pʋcɔ nɛ Tɩ-yɔɔ wɛʋ pɩnaɣ talɩ yɔ, ɖɩnɛ ɛlɛ, pɩwɛɛ se ɛla akɔnta, nɛ liidiye nɖɩ ɛhɛyɩɣ se ɛɖaɣnɩnɩ ɛ-tɩ yabʋ yɔ, ɖɩmʋnɩ pɩnzɩ nzɩ sɩkazaa yɔ. 53 Ɛwɛɣ nɛ ɛlakɩ weyi ɛyabɩ-ɩ yɔ tʋmɩyɛ paa pɩnaɣ ŋga, ɛzɩ abaa tʋ yɔ; pɩwɛɛ se ŋcɔnɩ camɩyɛ nɛ ɛlɛ ɛtaawɩlɩ-ɩ ñaŋ.+ 54 Ɛlɛ ye ɛɛpɩzɩɣ se ɛɖaɣnɩ ɛ-tɩ yabʋ mbʋ yɔ, ɖɩnɛ ɛlɛ pakaɣ-ɩ yebu Tɩ-yɔɔ wɛʋ pɩnaɣ taa,+ ɛ nɛ e-piya.*

55 «“Mbʋ pʋyɔɔ yɔ ma-maɣmaɣ mo-yomaa Izrayɛɛlɩ mba kɛnaa. Pɛkɛ mo-yomaa mba malɩzɩnɩ Ejipiti ɛjaɖɛ taa yɔ.+ Mɛkɛnɩ mɩ-Ɛsɔ Yehowa.

26 «“Pɩfɛyɩ se ɩla mɩ-tɩ ɛsɔnaa mba paawazɩɣ pʋyʋ yɔ,+ nɛ pɩfɛyɩ ɖɔɖɔ se isiɣ mɩ-tɩ sɩʋ kpeliɣa nakɛyɛ ŋga pasaɣaa yɔ+ yaa tilimiye kiɖeɖeye naɖɩyɛ, nɛ pɩfɛyɩ se ɩsɩɩ pɩyɛ naɖɩyɛ nɖɩ pasaɣaa yɔ+ mɩ-ɛjaɖɛ taa se iluŋ ɖɩ-tɛɛ;+ mbʋ pʋyɔɔ yɔ mɛkɛnɩ mɩ-Ɛsɔ Yehowa. 2 Pɩwɛɛ se ɩña man-sabaatɩ paɣtʋ nɛ ɩña* ɖɔɖɔ mon-kooka kiɖeɖeɣa. Mɛkɛnɩ Yehowa.

3 «“Ye itiyele ɖɔm man-kpalɩtʋ yɔɔ nɛ ye ɩɖɔkʋʋ man-paɣtʋ nɛ ɩɖɔŋ tɩ-yɔɔ yɔ,+ 4 ɖɩnɛ ɛlɛ mankaɣ-mɩ haʋ tɛʋ alɩwaatʋ yɔɔ,+ nɛ tɛtʋ kaɣ lʋlʋʋ tɩ-tɔɔnaɣ,+ nɛ hayɩm taa tɩŋ ɖɔɖɔ kaɣ lʋlʋʋ i-pee. 5 Mɩ-tɔɔnaɣ mabʋ alɩwaatʋ kaɣ ɖaɣlʋʋ nɛ pɩkɔɔ nɛ pɩtalɩ mi-viiñi pee koyuu alɩwaatʋ, nɛ viiñi pee koyuu alɩwaatʋ kaɣ ɖaɣlʋʋ nɛ pɩkɔɔ pɩtalɩ ɖomaɣ alɩwaatʋ; ɩkaɣ tɔɔʋ mɩ-kpɔnɔ nɛ ɩhaɣ nɛ ɩcaɣ pɛɛyɛ taa mɩ-ɛjaɖɛ taa.+ 6 Mankaɣ yebu nɛ laŋhɛzɩyɛ wɛɛ ɛjaɖɛ taa,+ nɛ ɩkaɣ hɩnʋʋ nɛ nɔɔyʋ ɛɛkaɣ labʋ nɛ sɔɔndʋ kpa-mɩ;+ nɛ mankaɣ ɖɔɔnʋʋ tɛtɛgbɩna wena awɛ patʋ yɔ ɛjaɖɛ taa, nɛ you laɣɖɛ naɖɩyɛ ɛɛkaɣ tɩŋnʋʋ mɩ-ɛjaɖɛ taa. 7 Ɩkaɣ ɖʋʋ mi-koyindinaa wayɩ, nɛ ɩkaɣ-wɛ kʋʋ nɛ laɣɖɛ mɩ-ɛsɩndaa. 8 Mɩ-taa ɛyaa 5 kaɣ ɖʋʋ koyindinaa 100 wayɩ, nɛ mɩ-taa ɛyaa 100 kaɣ ɖʋʋ koyindinaa 10 000 wayɩ, nɛ ɩkaɣ mi-koyindinaa kʋʋ nɛ laɣɖɛ mɩ-ɛsɩndaa.+

9 «“Mankaɣ-mɩ labʋ lootiye* nɛ meyele nɛ ɩlʋlɩ nɛ ihuu,+ nɛ mankaɣ ɖɔkʋʋ mɛ-ɛgbɛyɛ nɖɩ ɖɩwɛ ma nɛ mɩ ɖɛ-hɛkʋ taa yɔ.+ 10 Alɩwaatʋ ndʋ iɖiɣni tɔɔʋ tɔɔnaɣ kɩbɩnaɣ ŋga ɩkʋm pɩnaɣ ŋga kɛɖɛwa yɔ ka-taa lɛ, pɩkaɣ pɔzʋʋ se ɩlɔ tɔɔnaɣ kɩbɩnaɣ ŋga nɛ ihiɣ lone nɛ ɩsɩɩ kɩfalaɣ. 11 Mankaɣ siɣu man-kɩɖanɖʋʋ mɩ-hɛkʋ taa,+ nɛ maakaɣ-mɩ lɔʋ.* 12 Mankaɣ ɖɔm mɩ-hɛkʋ taa nɛ mɛnkɛ mɩ-Ɛsɔ,+ piyele nɛ mɩ lɛ, ɩkaɣ kɛʋ man-samaɣ.+ 13 Mɛkɛnɩ mɩ-Ɛsɔ Yehowa, weyi ɛlɩzɩ-mɩ nɛ Ejipiti ɛjaɖɛ taa se ɩtaatasɩ kɛʋ Ejipiti mba yomaa yɔ, nɛ mɛnpɛlɩ mɩ-sʋʋtʋ ɖaŋ nɛ meyele nɛ ɩkpazɩ mɩ-ñʋŋ nɛ ɩɖɔ.*

14 «“Ɛlɛ ye itiwelisini-m nɛ ye ɩtɩɖɔ paɣtʋ tʋnɛ tɩ-tɩŋa tɩ-yɔɔ,+ 15 nɛ ye ikizi man-kpalɩtʋ,+ ye inim* mɔn-tɔm hʋʋ paɣtʋ nɛ ɩtɩɖɔ man-paɣtʋ tɩŋa yɔɔ, nɛ ye ɩcɛbɩ mɛ-ɛgbɛyɛ yɔ,+ 16 ɖɩnɛ ɛlɛ ma ɖɔɖɔ, mbʋ mankaɣ-mɩ labʋ yɔ, mbʋ yɔ: Mankaɣ-mɩ kʋñɔŋ ɖʋʋ, mankaɣ yebu nɛ kpeziwɩlaɣ kpa-mɩ nɛ ɩsaa miŋ nɛ mɔhɔmnɩ mɩ-nɩŋgbaaŋ, nɛ piyele nɛ mɩ-ɛsa yɔɔ piyi nɛ mi-wezuu* lɩɩ-mɩ sɔŋ. Ɩkaɣ ɖuu mɩ-tɔɔnaɣ falaa yem, mbʋ pʋyɔɔ yɔ mi-koyindinaa kaɣnɩ-kɛ tɔɔʋ.+ 17 Mankaɣ-mɩ pam nɛ ɛsa, nɛ mi-koyindinaa kaɣ-mɩ wabʋ;+ mba papaɖɩɣ-mɩ yɔ, pakaɣ mɩ-yɔɔ fɛyʋʋ,*+ nɛ ɩkaɣ seu, ŋgʋ nɔɔyʋ ɛɛtaŋ-mɩ.+

18 «“Ɛlɛ ye pɩtɩŋa payɩ mbʋ yɔ pitiyele nɛ iwelisini-m yɔ, mankaɣ tasʋʋ mɩ-nɩŋgbaaŋ hɔm tam 7 mɩ-kɩdɛkɛdɩm yɔɔ. 19 Mankaɣ labʋ nɛ iyele mɩ-ñʋʋ taa ɖoŋ nɛ mɩ-tɩ kpazʋʋ nɛ meyele nɛ mɩ-ɛsɔdaa wɛɛ ɛzɩ ñɩɣyʋʋ yɔ+ nɛ mɩ-tɛtʋ wɛɛ ɛzɩ ñɩɣyʋʋ kɩsɛɛmʋʋ yɔ. 20 Mi-ɖoŋ kaɣ tɛm falaa yem, mbʋ pʋyɔɔ yɔ mɩ-tɛtʋ ɛɛkaɣ tɩ-tɔɔnaɣ lʋlʋʋ,+ nɛ ɛjaɖɛ taa tɩŋ ɩɩkaɣ pee lʋlʋʋ.

21 «“Ɛlɛ ye itiyebi-m kaɖɩnʋʋ nɛ ye ikizaa se iiwelisiɣni-m yɔ, mankaɣ-mɩ tasʋʋ mabʋ tam 7, ɛzɩ mɩ-kɩdɛkɛdɩm pɔzʋʋ yɔ. 22 Mankaɣ tiyinuu tɛtɛgbɩna mɩ-hɛkʋ taa,+ nɛ akaɣ mi-piya tɔɔʋ+ nɛ aɖɩzɩ mɩ-ɖɩɣa kpɩna nɛ apɩsɩ-mɩ ññɩɩ, nɛ mɩ-habɛɛ yɔɔ kaɣ wɩlʋʋ.+

23 «“Ye pɩtɩŋa payɩ mbʋ yɔ pitiyele nɛ ɩmʋ mɔ-lɔŋ sɩɣzʋʋ+ nɛ itiyebi-m kaɖɩnʋʋ yɔ, 24 ɖɩnɛ ɛlɛ ma ɖɔɖɔ mankaɣ-mɩ kaɖɩnʋʋ, nɛ mankaɣ-mɩ mabʋ tam 7 mɩ-kɩdɛkɛdɩm yɔɔ. 25 Mankaɣ tiyinuu kɩmɩyɛ kpaʋ laɣɖɛ mɩ-hɛkʋ taa, mbʋ pʋyɔɔ yɔ ɩcɛbɩ ɛgbɛyɛ.+ Ye ikpeɣli ɖama mɩ-tɛtʋ ndɩ ndɩ taa yɔ, mankaɣ tiyinuu kʋdɔŋ mɩ-hɛkʋ taa,+ mankaɣ-mɩ ɖʋzʋʋ koyindu nesi taa.+ 26 Mɔyɔkʋʋ mɩ-kpɔnɔnaa* ɖɩzɩyɛ*+ lɛ, halaa 10 kaɣ hɔbʋ mɩ-kpɔnɔ kpou kʋɖʋmʋʋ koŋ tɛɛ nɛ pakaɣ kpɔnɔ ŋgʋ maɣzʋʋ nɛ patayɩ-mɩ kɩ-hɔɔlasɩ;+ ɩkaɣ tɔɔʋ, ɛlɛ ɩɩkaɣ haɣʋ.+

27 «“Ye pɩtɩŋa payɩ mbʋ yɔ pʋwayɩ ɖɔɖɔ ikizaa se iiwelisiɣni-m, nɛ ɩtɛ mɩ-taa kpem se ɩkaɖɩɣnɩ-m yɔ, 28 mankaɣ-mɩ kaɖɩnʋʋ nɛ pɩkɩlɩ,+ nɛ mankaɣ mɩ-nɩŋgbaaŋ hɔm tam 7 mɩ-kɩdɛkɛdɩm yɔɔ. 29 Nɛ ɩkaɣ tɔɔʋ mɩ-pɩyalaa nɛ mɩ-pɛlaa nandʋ.+ 30 Mankaɣ ɖɩzʋʋ mi-lona kʋkʋya kiɖeɖena+ nɛ mɛnsɛtɩ mi-ŋgee tɩlaaɖɩ tilima nɛ menkpeɣli mi-tomnasɩ kɩsɩbasɩ mɩ-sɩʋ kpelisi nzɩ sɩcaɣ kiniŋ yɔ* sɩ-hɔɔlasɩ yɔɔ,+ nɛ ɩkaɣ-m caɣʋ kiniŋ* nɛ mɔlɔ-mɩ.+ 31 Mankaɣ mɩ-tɛtʋ ndɩ ndɩ cɛlʋʋ laɣɖɛ+ nɛ meyele nɛ mi-kookasɩ kiɖeɖesi pɩsɩ njɛyɛ, maakaɣ tasʋʋ nɩʋ mɩ-kɩlaŋ sɔzɩŋ.* 32 Mankaɣ yebu nɛ ɛjaɖɛ pɩsɩ njɛyɛ,+ nɛ mi-koyindinaa mba pɛwɛ ɖɩ-taa yɔ, pakaɣ-ɖɩ cɔnʋʋ nɛ pɩɖɩɣzɩ-wɛ.+ 33 Mankaɣ-mɩ mɩzʋʋ ajɛɛ taa,+ nɛ mankaɣ kpɛʋ laɣɖɛ nɛ ɖɩɖʋ mɩ-wayɩ;+ mɩ-ɛjaɖɛ kaɣ pɩsʋʋ njɛyɛ,+ nɛ pakaɣ mɩ-tɛtʋ ndɩ ndɩ yɔkʋʋ.

34 «“Alɩwaatʋ ndʋ payɩ mɩ-ɛjaɖɛ kaɣ pɩsʋʋ njɛyɛ yɔ, ɩwɛɣ mi-koyindinaa ɛjaɖɛ taa lɛ, tɛtʋ kaɣ hɛyʋʋ tɩ-sabaatɩwaa. Alɩwaatʋ ndʋ tɩ-taa lɛ, tɛtʋ kaɣ hɛzʋʋ,* mbʋ pʋyɔɔ yɔ pɩwɛɛ se tɩhɛyɩ tɩ-sabaatɩwaa.+ 35 Kɩyakɩŋ weyi payɩ ɩ-taa ɛjaɖɛ pɩsɩɣ njɛyɛ yɔ, tɛtʋ kaɣ hɛzʋʋ, mbʋ pʋyɔɔ yɔ alɩwaatʋ ndʋ ɩɩwɛ ɖɩ-taa yɔ, tɛtʋ taahɛzɩ mɩ-sabaatɩwaa yɔɔ.

36 «“Piyele nɛ mba pakaɣ tʋlʋʋ yɔ,+ paba lɛ, mankaɣ yebu nɛ pɔlɔ lidaʋ po-koyindinaa ajɛɛ taa; nɛ helim kpakɩɣ tɩʋ hayʋʋ nakʋyʋ nɛ panɩɩ kɩ-taŋ lɛ, pakaɣ seu, pakaɣ seu ɛzɩ nɔɔyʋ seɣu laɣɖɛ yɔ nɛ pɔtɔlɩ, ŋgʋ nɔɔyʋ ɛɛtaŋ-wɛ.+ 37 Paa nɔɔyʋ ɛɛtaŋ-wɛ yɔ, pakaɣ ɖama tuuluu ɛzɩ mba peseɣ laɣɖɛ ɛsɩndaa yɔ. Ɩɩkaɣ pɩzʋʋ nɛ ɩkaɖɩnɩ mi-koyindinaa.+ 38 Ɩkaɣ sɩbʋ ajɛɛ taa,+ nɛ mi-koyindinaa tɛtʋ kaɣnɩ-mɩ tɔɔʋ. 39 Mɩ-taa mba pakazɩɣ yɔ, pakaɣ ɖazʋʋ mi-koyindinaa ajɛɛ taa+ mɩ-kɩwɛɛkɩm yɔɔ. Ɛɛɛ, pa-caanaa kɩwɛɛkɩm yɔɔ lɛ, pakaɣ ɖazʋʋ.+ 40 Ðɩnɛ ɛlɛ pakaɣ kuluu pa-maɣmaɣ pa-kɩwɛɛkɩm yɔɔ+ nɛ pa-caanaa kɩwɛɛkɩm nɛ pa-caanaa lakasɩ nzɩ sɩfɛyɩ siɣsiɣ yɔ sɩ-yɔɔ nɛ petisi se pakaɖɩnʋʋ-m yɔ, palabɩ mbʋ pɩfɛyɩ siɣsiɣ yɔ.+ 41 Mbʋ yebina nɛ ma ɖɔɖɔ mankaɖɩnɩ-wɛ+ nɛ mowoni-wɛ po-koyindinaa ɛjaɖɛ taa.+

«“Pɩtɩla yɔ, ɖɩnɛ ɛlɛ pa-laŋɩyɛ kɩdɩbɛlɩyɛ* kaɣ ɖɩ-tɩ luzuu,+ nɛ pakaɣ hɛyʋʋ pa-kɩwɛɛkɩm yɔɔ. 42 Nɛ mankaɣ tɔzʋʋ mɛ-ɛgbɛyɛ nɖɩ ɖɩwɛ ma nɛ Yakɔɔb ɖɛ-hɛkʋ taa yɔ ɖɩ-yɔɔ,+ mɛ-ɛgbɛyɛ nɖɩ ɖɩwɛ ma nɛ Izaakɩ ɖɛ-hɛkʋ taa yɔ ɖɩ-yɔɔ,+ nɛ mankaɣ tɔzʋʋ mɛ-ɛgbɛyɛ nɖɩ ɖɩwɛ ma nɛ Abraham ɖɛ-hɛkʋ taa yɔ ɖɩ-yɔɔ,+ nɛ mankaɣ tɔzʋʋ ɛjaɖɛ yɔɔ. 43 Peyeki ɛjaɖɛ lɛ, ɖɩhɛyɩɣ ɖɩ-sabaatɩwaa+ alɩwaatʋ ndʋ ɖɩpɩsɩɣ njɛyɛ nɛ paawɛɣ ɖɩ-taa yɔ, nɛ pakaɣ hɛyʋʋ pa-kɩwɛɛkɩm yɔɔ, mbʋ pʋyɔɔ yɔ pɔlɔ mɔn-tɔm hʋʋ paɣtʋ nɛ papaɖɩ* man-kpalɩtʋ.+ 44 Ɛlɛ paa pɩtɩŋa payɩ mbʋ yɔ pɩtalɩɣ-wɛ yɔ, alɩwaatʋ ndʋ pɛwɛɣ po-koyindinaa ɛjaɖɛ taa yɔ, wiɖiyi maakaɣ-wɛ lɔʋ caɣ caɣ+ nɛ maakaɣ-wɛ paɖʋʋ nɛ manɖɩzɩ-wɛ, ye malabɩ mbʋ yɔ pɩkɛɣnɩ mɛ-ɛgbɛyɛ nɖɩ ɖɩwɛ ma nɛ wɛ ɖɛ-hɛkʋ taa yɔ ɖɩ-paɣtʋ yɔɔ maʋ,+ mbʋ pʋyɔɔ yɔ mɛkɛnɩ pɛ-Ɛsɔ Yehowa. 45 Pɔ-yɔɔ lɛ, mankaɣ tɔzʋʋ ɛgbɛyɛ nɖɩ ɖɩwɛ ma nɛ pɔ-cɔzɔnaa ɖɛ-hɛkʋ taa yɔ ɖɩ-yɔɔ,+ pɔ-cɔzɔnaa mba malɩzɩ-wɛ nɛ Ejipiti ɛjaɖɛ taa ajɛɛ ɛsɩndaa,+ se mawɩlɩ se mɛkɛnɩ pɛ-Ɛsɔ yɔ. Mɛkɛnɩ Yehowa.”»

46 Ðʋtʋ, tɔm hʋʋ paɣtʋ nɛ paɣtʋ ndʋ Yehowa tɩŋnɩ Moyizi yɔɔ nɛ ɛɖʋ ɛ nɛ Izrayɛɛlɩ mba pɛ-hɛkʋ taa Sinayii Pʋʋ taa yɔ, ndʋ lɛ.+

27 Yehowa tasɩ yɔɔdɩnʋʋ Moyizi nɛ eheyi-i se: 2 «Yɔɔdɩnɩ Izrayɛɛlɩ mba nɛ ŋheyi-wɛ se: “Ye nɔɔyʋ eɖuu ŋgee ɖuutu+ natʋyʋ se ɛhaɣ Yehowa mbʋ pɩwɛɛ se pɛhɛyɩ ɛyʋ* ñʋʋ taa yɔ yɔ, 3 ye weyi pɛhɛyɩɣ ɛ-ñʋʋ taa yɔ, ɛkɛ abalʋ weyi ɛwɛnɩ pɩnzɩ kpaɣnɩ 20 nɛ piwolo 60 yɔ, pɩwɛɛ se pɛhɛyɩ ɛ-ñʋʋ taa liidiye siklinaa* 50, pɩwɛɛ se ɖɩmʋnɩ lone kiɖeɖeye taa sikli.* 4 Ɛlɛ ye pɩkɛ halʋ yɔ, siklinaa 30 pɩwɛɛ se pɛhɛyɩ ɛ-ñʋʋ taa. 5 Ye ɛwɛnɩ pɩnzɩ kpaɣnɩ 5 nɛ piwolo 20 nɛ ɛkɛ abalʋ yɔ, siklinaa 20 pɩwɛɛ se pɛhɛyɩ ɛ-ñʋʋ taa; ɛlɛ ye ɛkɛ halʋ yɔ, siklinaa 10 pɩwɛɛ se pɛhɛyɩ. 6 Ye ɛwɛnɩ kpaɣnɩ fenaɣ kʋɖʋmaɣ nɛ piwolo pɩnzɩ 5 nɛ ɛkɛ abalʋ yɔ, liidiye siklinaa 5 pɩwɛɛ se pɛhɛyɩ ɛ-ñʋʋ taa; ɛlɛ ye ɛkɛ halʋ yɔ, liidiye siklinaa 3 pɩwɛɛ se pɛhɛyɩ.

7 «“Ye ɛwɛnɩ pɩnzɩ 60 yaa ɛcɛzɩ sɩ-yɔɔ nɛ ɛkɛ abalʋ yɔ, siklinaa 15 pɩwɛɛ se pɛhɛyɩ ɛ-ñʋʋ taa; ɛlɛ ye ɛkɛ halʋ yɔ, siklinaa 10 pɩwɛɛ se pɛhɛyɩ. 8 Ɛlɛ ye weyi eɖuu ɖuutu yɔ ɛkɛ kʋñɔndʋ siŋŋ nɛ ɛɛpɩzɩɣ se ɛhɛyɩ mbʋ pɩwɛɛ se ɛhɛyɩ yɔ yɔ,+ weyi pɩwɛɛ se pɛhɛyɩ ɛ-ñʋʋ taa yɔ, pɩwɛɛ se powoni-i cɔjɔ ɛsɩndaa, nɛ cɔjɔ ɖʋ liidiye nɖɩ pɩwɛɛ se pɛhɛyɩ ɛ-yɔɔ yɔ. Mbʋ weyi eɖuu ɖuutu yɔ ɛpɩzɩɣ se ɛhɛyɩ yɔ, mbʋ cɔjɔ cɔŋna nɛ ɛɖʋ liidiye nɖɩ.+

9 «“Ye mbʋ eɖuwaa se ɛcɛlɩɣ yɔ, pɩkɛ kpɩnɛ nɖɩ papɩzɩɣ nɛ palaa Yehowa yɔ, mbʋ payɩ ɛcɛlɩɣ Yehowa yɔ, pɩkaɣ pɩsʋʋ pʋyʋ kiɖeɖeu. 10 Ɛɛpɩzɩɣ nɛ ɛlɛɣzɩ kpɩnɛ nɖɩ nɛ lɛɛɖɛ yaa ɛɛpɩzɩɣ nɛ ɛkpaɣ kɩbanɖɛ nɛ ɛlɛɣzɩnɩ kɩdɛkɛdɩyɛ yaa ɛkpaɣ kɩdɛkɛdɩyɛ nɛ ɛlɛɣzɩnɩ kɩbanɖɛ. Ɛlɛ ye pɩpɔzʋʋ se ɛlɛɣzɩ kpɩnɛ naɖɩyɛ lɛɛɖɛ lone taa yɔ, nɖɩ eeɖuwaa se ɛcɛlɩɣ yɔ, nɛ nɖɩ ɛlɛɣzɩɣnɩ-ɖɩ yɔ a-naalɛ apɩsɩɣ kiɖeɖena. 11 Ye pɩkɛ kpɩnɛ nɖɩ ɖɩfɛyɩ kele kele+ nɛ paapɩzɩɣ nɛ pakpaɣ-ɖɩ nɛ palaa kɩlaʋ Yehowa yɔ, ɖɩnɛ ɛlɛ pɩwɛɛ se ewoni kpɩnɛ nɖɩ cɔjɔ ɛsɩndaa. 12 Nɛ cɔjɔ kaɣ cɔnʋʋ nɛ ɛna se kpɩnɛ nɖɩ ɖɩwɛ ɖeu yaa ɖɩfɛyɩ ɖeu nɛ ɛɖʋ liidiye nɖɩ ɖɩmʋnaa yɔ. Liidiye nɖɩ cɔjɔ ɖʋʋ se pɛhɛyɩ yɔ paakaɣ-ɖɩ lɛɣzʋʋ. 13 Ɛlɛ ye pɩlaba se ɛsɔɔlaa se ɛɖaɣnɩ-ɖɩ yabʋ yɔ, pɩwɛɛ se ɛhɛyɩ liidiye nɖɩ paɖʋwa se pɛhɛyɩ kpɩnɛ nɖɩ ɖɩ-yɔɔ yɔ nɛ ɛsɔzɩ ɖɩ-hɔɔlʋʋ 5 ñɩŋgʋ.+

14 «“Ye nɔɔyʋ ɛpɩsɩ ɛ-ɖɩɣa kele kele se kɛkɛ Yehowa pʋyʋ kiɖeɖeu yɔ, ɖɩnɛ ɛlɛ cɔjɔ kaɣ cɔnʋʋ nɛ ɛna se kɛwɛ ɖeu yaa kɛfɛyɩ ɖeu nɛ ɛɖʋ ke-liidiye. Liidiye nɖɩ cɔjɔ ɖʋʋ se pɛhɛyɩ kɔ-yɔɔ yɔ, nɖɩ kaɣnɩ kɛʋ ke-liidiye.+ 15 Ɛlɛ weyi ɛpɩsɩ ɛ-ɖɩɣa kele kele yɔ, ye ɛsɔɔlaa se ɛɖaɣnɩɣ-kɛ yabʋ yɔ, ɖɩnɛ ɛlɛ pɩwɛɛ se ɛhɛyɩ liidiye nɖɩ paɖʋwa se pɛhɛyɩ kɔ-yɔɔ yɔ nɛ ɛsɔzɩ ɖɩ-hɔɔlʋʋ 5 ñɩŋgʋ, ɖɩnɛ ɛlɛ kapɩsɩɣ ɛ-ñɩm.

16 «“Ye nɔɔyʋ ɛpɩsɩ ɛ-hayɩm hɔɔlʋʋ nakʋyʋ kele kele Yehowa yɔ, ɖomaɣ ŋga pɩpɔzʋʋ se poɖuu hayɩm hɔɔlʋʋ ŋgʋ kɩ-taa yɔ, kɔɖɔʋ ɖɔʋ mbʋ yɔ pɔcɔŋna nɛ paɖʋ pi-liidiye: Ye orjɩ pee homɛr kʋɖʋmʋʋ* pɩpɔzʋʋ se poɖuu yɔ, hayɩm liidiye kɛɣnɩ liidiye siklinaa 50. 17 Ye ɛpɩsɩ ɛ-hayɩm kele kele kpaɣnɩ Tɩ-yɔɔ wɛʋ pɩnaɣ+ yɔ, liidiye nɖɩ paɖʋwa se pɛhɛyɩ pɩ-yɔɔ yɔ ɖɩɩlɛɣzɩɣ. 18 Ye Tɩ-yɔɔ wɛʋ pɩnaɣ ɛɖɛwa pʋcɔ nɛ ɛpɩsɩ ɛ-hayɩm kele kele yɔ, pɩnzɩ nzɩ sɩkazaa pʋcɔ nɛ pɩtalɩ Tɩ-yɔɔ wɛʋ pɩnaɣ lɛɛka yɔ nzɩ cɔjɔ kaɣ cɔnʋʋ nɛ ɛɖʋ pi-liidiye, liidiye nɖɩ paaɖʋwa se pɛhɛyɩ pɩ-yɔɔ yɔ, pakaɣ ɖɩ-yɔɔ pasʋʋ.+ 19 Ɛlɛ ye pɩlaba se weyi ɛpɩsɩ hayɩm mbʋ kele kele yɔ ɛñɩnɩɣ se ɛɖaɣnɩ-pʋ yabʋ yɔ, pɩwɛɛ se ɛhɛyɩ liidiye nɖɩ paɖʋwa se pɛhɛyɩ pɩ-yɔɔ yɔ nɛ ɛsɔzɩ ɖɩ-hɔɔlʋʋ 5 ñɩŋgʋ, ɖɩnɛ ɛlɛ pɩɖaɣnɩɣ kɛʋ ɛ-ñɩm. 20 Ɛlɛ ye ɛtɩɖaɣnɩ hayɩm mbʋ yabʋ, nɛ pɛpɛdɩnɩ-pʋ nɔɔyʋ yɔ, ɖɩnɛ ɛlɛ ɛɛkaɣ pɩzʋʋ nɛ ɛtasɩ-pʋ yabʋ. 21 Weyi ɛyabɩ-pʋ yɔ, pɩlɩɣ e-nesi tɛɛ Tɩ-yɔɔ wɛʋ pɩnaɣ taa lɛ, pɩpɩsɩɣ pʋyʋ kiɖeɖeu Yehowa, pɩpɩsɩɣ hayɩm mbʋ pasɩ-pʋ kɩjaʋ se pɩkɛ ɛ-ñɩm yɔ. Pɩpɩsɩɣ cɔjɔnaa pʋyʋ.+

22 «“Ye nɔɔyʋ ɛyabɩ tɛtʋ natʋyʋ kɩyabʋ, nɛ tɩtɩkɛ ñɩm mbʋ ɛ-caanaa yebini-i yɔ,+ nɛ ɛpɩsɩ-tʋ kele kele Yehowa yɔ, 23 pɩnzɩ nzɩ sɩkazaa pʋcɔ nɛ pɩtalɩ Tɩ-yɔɔ wɛʋ pɩnaɣ yɔ, nzɩ cɔjɔ kaɣ cɔnʋʋ nɛ ɛtʋʋzɩ-ɩ hayɩm mbʋ pi-liidiye, nɛ ɛkaɣ liidiye nɖɩ hɛyʋʋ evemiye nɖɩ.+ Ðɩkɛ Yehowa pʋyʋ kiɖeɖeu. 24 Tɩ-yɔɔ wɛʋ pɩnaɣ taa lɛ, hayɩm mbʋ pɩkaɣ pɩsʋʋ weyi ɛ-cɔlɔ ɛɛyabɩ-pʋ yɔ ɛ-pʋyʋ, pɩpɩsɩɣ tɛtʋ tʋ pʋyʋ.+

25 «“Liidiye nɖɩ payɩ paɖʋʋ se pɛhɛyɩ yɔ, pɩwɛɛ se ɖɩmʋnɩ lone kiɖeɖeye taa sikli. Sikli kʋɖʋmʋʋ kɛɣnɩ gerawaa* 20.

26 «“Ɛlɛ pɩfɛyɩ se nɔɔyʋ ɛpɩsɩ kpɩnɛ naɖɩyɛ kajalaɣ pɩɣa kele kele, mbʋ pʋyɔɔ yɔ kajalaɣ pɩɣa kɛ Yehowa pʋyʋ.+ Paa pɩtɩɩkɛ nɔ abalɩñɩnʋ yaa heu yɔ, ɛtɛm kɛʋ Yehowa pʋyʋ.+ 27 Ye pɩkɛ kpɩnɛ nɖɩ ɖɩfɛyɩ kele kele yɔ, nɛ ye ɛhɛyɩɣ liidiye nɖɩ paɖʋwa se pɛhɛyɩ ɖɩ-yɔɔ yɔ se ɛɖaɣnɩ-ɖɩ yabʋ yɔ, pɩwɛɛ se ɛsɔzɩ liidiye nɖɩ ɖɩ-hɔɔlʋʋ 5 ñɩŋgʋ.+ Ɛlɛ ye ɛtɩɖaɣnɩ kpɩnɛ nɖɩ yabʋ yɔ, pɩwɛɛ se pɛpɛdɩ-ɖɩ liidiye nɖɩ paaɖʋwa se pɛhɛyɩ ɖɩ-yɔɔ yɔ.

28 «“Ɛlɛ ye nɔɔyʋ ɛsɩ ɛ-ñɩm nabʋyʋ kɩjaʋ nɛ ɛha-pʋ Yehowa tam* yɔ, paapɩzɩɣ nɛ pɛpɛdɩ-pʋ yaa paɖaɣnɩ-pʋ yabʋ, paa pɩtɩɩkɛ ɛyʋ yaa kpɩnɛ yaa ɛ-hayɩm yɔ. Mbʋ payɩ pasɩ kɩjaʋ yɔ, pɩkɛnɩ Yehowa pʋyʋ kiɖeɖeu siŋŋ.+ 29 Pɩtasɩ lɛ, weyi pakʋ ɛ-tɔm nɛ pasɩɩ-ɩ kɩjaʋ se ɛmʋnɩ sɩm yɔ, paapɩzɩɣ nɛ paya ɛ-ñʋʋ.+ Pɩwɛɛ se pakʋ-ɩ.+

30 «“Yehowa tɩnɩ mbʋ payɩ tɛtʋ lʋlʋʋ yɔ pɩ-hɔɔlʋʋ 10 ñɩŋgʋ,+ paa pɩtɩɩkɛ hayɩm taa tɔɔnaɣ yaa tɩŋ pee yɔ. Pɩkɛ pʋyʋ kiɖeɖeu Yehowa. 31 Ye pɩlaba se nɔɔyʋ ñɩnɩɣ se ɛɖaɣnɩ yabʋ ɛ-hɔɔlʋʋ 10 ñɩŋgʋ nakʋyʋ yɔ, pɩwɛɛ se ɛhɛyɩ-kʋ nɛ ɛsɔzɩ kɩ-hɔɔlʋʋ 5 ñɩŋgʋ. 32 Piyele nɛ paa naŋ yaa heŋ hɔɔlʋʋ 10 ñɩŋgʋ ŋgʋ lɛ, mbʋ payɩ pɩtɩŋɩɣ ninɖiɣyu ɖaʋ tɛɛ yɔ, kpɩnɛ* 10 ñɩnɖɛ kɛɣnɩ pʋyʋ kiɖeɖeu Yehowa. 33 Pɩfɛyɩ se ɛcɔna nɛ ɛna se ɖɩwɛ ɖeu yaa ɖɩfɛyɩ ɖeu, nɛ pɩfɛyɩ se ɛlɛɣzɩ-ɖɩ ɖɔɖɔ. Ɛlɛ ye pɩlaba se ɛñɩnɩɣ se ɛlɛɣzɩ-ɖɩ yɔ, ɖɩ nɛ nɖɩ ɛlɛɣzɩɣnɩ-ɖɩ yɔ, a-naalɛ apɩsɩɣ kiɖeɖena.+ Paapɩzɩɣ nɛ paɖaɣnɩ-yɛ yabʋ.”»

34 Paɣtʋ tʋnɛ Yehowa tɩŋnɩ Moyizi yɔɔ nɛ ɛɖʋ Izrayɛɛlɩ mba Sinayii Pʋʋ yɔɔ.+