ZAKARII
1 Dariyusi pɩnaɣ 2 ñɩŋga taa,+ fenaɣ 8 ñɩŋga taa, Yehowa tɔm talɩ Ido pɩyalʋ Berekiya pɩyalʋ nayʋ Zakarii*+ se: 2 «Yehowa taa kaawɩnɩ mɩ-caanaa siŋŋ.+
3 «Heyi-wɛ se: “Tɔm tʋnɛ yoyaa tɛ Yehowa yɔɔdʋʋ: ‘“Ɩpɩsɩ mɔn-cɔlɔ,” yoyaa tɛ Yehowa yɔɔdʋʋna, “nɛ mankaɣ pɩsʋʋ mɩ-cɔlɔ,”+ yoyaa tɛ Yehowa yɔɔdʋʋna.’”
4 «“Ɩtaawɛɛ* ɛzɩ mɩ-caanaa yɔ, mba kajalaɣ nayaa kaaheyi tɔm tʋnɛ yɔ: ‘Tɔm tʋnɛ yoyaa tɛ Yehowa yɔɔdʋʋ, “Mentendi-mɩ, iyele* mɩ-nʋmɔŋ kɩdɛkɛdɩŋ nɛ mɩ-lakasɩ kɩdɛkɛdɩsɩ.”’”+
«“Ɛlɛ patiwelisi, nɛ patikemni-m,”+ Yehowa yɔɔdʋʋna.
5 «“Le mɩ-caanaa wɛ sɔnɔ? Nɛ nayaa yɔ, paba wɛ tam? 6 Paa mbʋ yɔ, mɔn-tɔm nɛ man-paɣtʋ ndʋ manɖʋ ma-lɩmɖʋyaa mba pɛkɛ nayaa se posusi yɔ, tɩlabɩ mɩ-caanaa ɛsɩndaa, yaa pɩtɩkɛ mbʋ?”+ Pʋyɔɔ papɩsɩnɩ mɔ-yɔɔ nɛ pɔyɔɔdɩ se: “Yoyaa tɛ Yehowa labɩnɩ-ɖʋ ɛzɩ ɖa-nʋmɔŋ nɛ ɖa-lakasɩ pɔzʋʋ yɔ, ɛzɩ ɛɛɖʋʋ ɛ-taa se ɛlakɩ yɔ.”»+
7 Dariyusi pɩnaɣ 2 ñɩŋga taa,+ fenaɣ 11 ñɩŋga taa, pʋ-tɔbʋʋ se Sebatɩ* fenaɣ kɩyakʋ 24 ñɩŋgʋ wiye, Yehowa tɔm talɩ Ido pɩyalʋ Berekiya pɩyalʋ nayʋ Zakarii se: 8 «Mana natʋ natʋyʋ ɖoo taa. Mana abalʋ nɔɔyʋ caɣ kpaŋnʋ kɩsɛɛm yɔɔ, ɛɛsɩŋ mirɩtɩ tɩŋ hɛkʋ taa lɔɔʋ taa; nɛ kpaŋnaŋ kɩsɛɛmɩŋ, kɩsɛɛmɩŋ kpuzuyee nɛ kʋhʋlʋmɩŋ kaawɛ ɛ-wayɩ.»
9 Peeɖe mɔnpɔzaa se: «Man-kɩbaɣlʋ, mba lɛ?»
Tiyiyu weyi ɛyɔɔdaɣnɩ-m yɔ, ecosi-m se: «Mankaɣ-ŋ wɩlʋʋ mba pɛkɛnaa yɔ.»
10 Ðɩnɛ ɛlɛ abalʋ weyi ɛɛsɩŋ mirɩtɩ tɩŋ hɛkʋ taa yɔ ɛyɔɔdɩ se: «Mba Yehowa tiyaa se pɛyɛlɩ tɛtʋ yɔɔ.» 11 Nɛ peheyi Yehowa tiyiyu weyi ɛɛsɩŋ mirɩtɩ tɩŋ hɛkʋ taa yɔ se: «Ðɩyɛlɩ tɛtʋ yɔɔ, nɛ na, tɛtʋ kpeekpe wɛ ɖiɣ ɖiɣ nɛ sɔɔndʋ ɛɛkpaɣ-tʋ nɛ nabʋyʋ.»+
12 Nɛ Yehowa tiyiyu yɔɔdɩ se: «Hayɩ, yoyaa tɛ Yehowa, ŋkiziɣ Yeruzalɛm nɛ Yuuda tɛtʋ ndɩ ndɩ ndʋ ña-taa wɩnɩ-tʋ pɩnzɩ 70 yɔ, tɩ-pʋtɔdɩyɛ naʋ nɛ pɩkɔɔ pɩsɩɩnɩ ɖooye?»+
13 Yehowa cosi tiyiyu weyi ɛyɔɔdaɣnɩ-m yɔ nɛ nɔɔ kɩbaŋa nɛ tɔm pee wena ahɛzɩɣ laŋɩyɛ yɔ. 14 Peeɖe tiyiyu weyi ɛyɔɔdaɣnɩ-m yɔ eheyi-m se: «Ma kubusi nɛ ŋyɔɔdɩ se: “Tɔm tʋnɛ yoyaa tɛ Yehowa yɔɔdʋʋ: ‘Mɛntɛm man-taa se mankandɩyɩɣ Yeruzalɛm nɛ Siyɔŋ yɔɔ nɛ kpekpeka sɔsɔɔ.+ 15 Man-taa wɩnɩ ajɛɛ wena awɛ ɖiɣ ɖiɣ yɔ siŋŋ,+ mbʋ pʋyɔɔ yɔ man-taa kaawɩ pazɩ,+ ɛlɛ alɛ ñɔsɔzɩ asɛyʋʋ yɔɔ kɩsɔzʋʋ.’”+
16 «Pʋyɔɔ lɛ, tɔm tʋnɛ Yehowa yɔɔdʋʋ: “Mankaɣ tasʋʋ naʋ Yeruzalɛm pʋtɔdɩyɛ,+ nɛ pakaɣ maʋ man-ɖɩɣa kɩ-taa;+ nɛ pakaɣ posuu nimaɣ ŋga pamaɣzɩɣna yɔ Yeruzalɛm yɔɔ,”+ yoyaa tɛ Yehowa yɔɔdʋʋna.
17 «Tasɩ kubusi mabʋ nɛ ŋyɔɔdɩ se: “Tɔm tʋnɛ yoyaa tɛ Yehowa yɔɔdʋʋ: ‘Kɩbandʋ kaɣ tasʋʋ wadʋʋ mɛn-tɛtʋ ndɩ ndɩ taa; nɛ Yehowa kaɣ tasʋʋ Siyɔŋ laŋɩyɛ hɛzʋʋ+ nɛ ɛtasɩ lɩzʋʋ Yeruzalɛm.’”»+
18 Pʋwayɩ lɛ, mankpazɩ mɛ-ɛsa nɛ mana hɩŋ 4.+ 19 Peeɖe mɔnpɔzɩ tiyiyu weyi ɛyɔɔdaɣnɩ-m yɔ se: «Hɩŋ weyi lɛ?» Nɛ ecosi se: «Hɩŋ ɛnɩ ɩɩmɩzɩnɩ Yuuda,+ Izrayɛɛlɩ+ nɛ Yeruzalɛm.»+
20 Pʋwayɩ lɛ, Yehowa wɩlɩ-m wondu luɖaa naanza. 21 Peeɖe mɔnpɔzaa se: «Ɛbɛ panɛ pɔkɔŋ labʋ?»
Ecosi se: «Hɩŋ ɛnɩ ɩɩmɩzɩnɩ Yuuda nɛ halɩ nɔɔyʋ taapɩzɩɣ se ɛkpazɩ ɛ-ñʋʋ. Panɛ yɔ lɛ, paba ñɔkɔŋ se paɖʋ-ɩ* sɔɔndʋ, se pɛpɛlɩ ajɛɛ wena aakpazɩ a-hɩŋ Yuuda ɛjaɖɛ yɔɔ se pɩsa nɛ amɩzɩ-ɖɩ yɔ a-hɩŋ.»
2 Mankpazɩ mɛ-ɛsa lɛ, mana abalʋ nɔɔyʋ, ɛɖɔkɩ nimaɣ ŋga pamaɣzɩɣna yɔ.+ 2 Nɛ mɔnpɔzɩ-ɩ se: «Le ŋwoki?»
Nɛ ecosi-m se: «Mɛnɖɛɣ Yeruzalɛm maɣzʋʋ se mantɩlɩ kɩ-walanzɩ nɛ kɩ-ɖaɣlɩkɩŋ.»+
3 Peeɖe lɛ, tiyiyu weyi ɛyɔɔdaɣnɩ-m yɔ ɛɖɛɛ, nɛ tiyiyu lɛlʋ katɩ-ɩ. 4 Nɛ eheyi-i se: «Se nɛ ŋwolo peeɖeyɔ nɛ ŋheyi evebu ɛnʋ yɔ se: “‘Ɛyaa kaɣ wɛʋ Yeruzalɛm taa+ ɛzɩ tɛtʋ ndʋ tɩfɛyɩnɩ kolonzi yɔ tɩ-taa yɔ, mbʋ pʋyɔɔ yɔ ɛyaa nɛ kpɩna wena akaɣ wɛʋ tɩ-taa yɔ, aɖɔʋ siŋŋ.+ 5 Nɛ mankaɣ pɩsʋʋ miŋ koloŋa ŋga kɔcɔ-kʋ nɛ kata yɔ,+ nɛ mankaɣ pɩsʋʋ samtʋ kɩ-hɛkʋ taa,’ Yehowa yɔɔdʋʋna.”»+
6 «Ɩkɔɔ! Ɩkɔɔ! Ise nɛ ɩlɩɩ hayo kiŋ ɛjaɖɛ taa,»+ Yehowa yɔɔdʋʋna.
«Mbʋ pʋyɔɔ yɔ mamɩzɩ-mɩ ɛsɔdaa helim 4 taa,»+ Yehowa yɔɔdʋʋna.
7 «Siyɔŋ, kɔɔ! Ya ña-ñʋʋ, ña weyi ŋwɛ Babilɔɔnɩ pɛlɛ cɔlɔ yɔ.+ 8 Mbʋ pʋyɔɔ yɔ tɔm tʋnɛ yoyaa tɛ Yehowa yɔɔdʋʋ, ɛnʋ weyi pɛtɛmɩ-ɩ sam lɛ,* etiyi-m ajɛɛ wena alazaɣ-mɩ yɔ a-cɔlɔ yɔ:+ “Weyi etukuni-mɩ yɔ, etukuni mɛ-ɛsɩyɛ piye.+ 9 Mbʋ pʋyɔɔ yɔ lɛɛlɛɛyɔ lɛ, mankaɣ me-nesi kpazʋʋ pɔ-yɔɔ, nɛ pa-maɣmaɣ po-yomaa kaɣnɩ-wɛ kpaʋ yomiye.”+ Nɛ toovenim lɛ ɩkaɣ ɖiɣzinuu se yoyaa tɛ Yehowa tiyini-m.
10 «Oo Siyɔŋ pɛlɛ, ma taa leleŋ kubusi;+ mbʋ pʋyɔɔ yɔ menɖiɣni kɔm,+ nɛ mankaɣ wɛʋ ñɛ-hɛkʋ taa,+ Yehowa yɔɔdʋʋna. 11 Puwiye lɛ, ajɛɛ sakɩyɛ kaɣ kpɛndʋʋ Yehowa yɔɔ,+ nɛ akaɣ pɩsʋʋ man-samaɣ nɛ mankaɣ wɛʋ ñɛ-hɛkʋ taa.» Nɛ ŋkaɣ ɖiɣzinuu se yoyaa tɛ Yehowa tiyini-m ñɔ-cɔlɔ. 12 Yehowa kaɣ mʋʋ Yuuda nɛ kɩpɩsɩ ɛ-pʋyʋ, tɛtʋ kiɖeɖetu yɔɔ, nɛ ɛkaɣ tasʋʋ Yeruzalɛm lɩzʋʋ.+ 13 Tomnasɩ* kpeekpe, isu tamɩyɛ Yehowa ɛsɩndaa, mbʋ pʋyɔɔ yɔ eɖiɣni nabʋyʋ labʋ nɛ ɛ-ɖɩjaɣyɛ kiɖeɖeye taa kiŋ.
3 Nɛ ɛwɩlɩ-m cɔjɔ kɩlɩm Yozuwee,+ ɛɛsɩŋ Yehowa tiyiyu ɛsɩndaa, nɛ Sataŋ+ kaasɩŋ ɛ-nɩwaŋ yɔɔ se ɛkaɖɩnɩ-ɩ. 2 Nɛ Yehowa tiyiyu heyi Sataŋ se: «Oo Sataŋ, tɛtɛ nɛ Yehowa hɔ ña-nɩŋgbaŋʋʋ,+ ɛɛɛ, tɛtɛ nɛ Yehowa, weyi ɛlɩzɩ Yeruzalɛm yɔ+ ɛhɔ ña-nɩŋgbaŋʋʋ! Pɩtɩkɛ ɛnɛ yɔ ɛkɛnɩ ɖaka titiɖe nɖɩ ɖiɖiɣni mʋʋ nɛ palɩzɩ-ɖɩ nɛ miŋ taa yɔ?»
3 Yozuwee kaasu tokonaa mba pɔ-yɔɔ wɛ azuluma siŋŋ yɔ nɛ ɛsɩŋ tiyiyu ɛsɩndaa. 4 Nɛ tiyiyu heyi mba paasɩŋ ɛ-ɛsɩndaa yɔ se: «Ɩhɔzɩ azuluma tokonaa mba ɛ-yɔɔ.» Pʋwayɩ lɛ, eheyi-i se: «Na, monposini-ŋ ña-kɩwɛɛkɩm, nɛ pakaɣ-ŋ suu tokonaa kɩbama.»*+
5 Nɛ mɔyɔɔdɩ se: «Petemi-i ñʋʋ kitemuu ŋgʋ kɩwɛ cɩɖɩ cɩɖɩ yɔ.»+ Nɛ pete ɛ-ñʋʋ ñʋʋ kitemuu ŋgʋ kɩwɛ cɩɖɩ cɩɖɩ yɔ nɛ posuu-i tokonaa; Yehowa tiyiyu kaasɩŋ pɩ-cɔlɔ peeɖe. 6 Nɛ Yehowa tiyiyu heyi Yozuwee se: 7 «Tɔm tʋnɛ yoyaa tɛ Yehowa yɔɔdʋʋ: “Ye ŋɖɔm ma-nʋmɔŋ taa nɛ ŋla ña-tʋma mɛ-ɛsɩndaa yɔ, ɖɩnɛ ɛlɛ ŋkaɣ kɛʋ man-ɖɩɣa tɔm hʋyʋ+ nɛ ŋkaɣ cɔnʋʋ* man-kadasɩ yɔɔ; nɛ mankaɣ-ŋ waɖɛ haʋ nɛ ŋsʋʋ mba pasɩŋ cɩnɛ yɔ pɛ-hɛkʋ taa faaa.”
8 «“Oo Cɔjɔ Kɩlɩm Yozuwee, mentendi-ŋ welisi, ña nɛ ña-taabalaa mba pacaɣ ñɛ-ɛsɩndaa yɔ, mbʋ pʋyɔɔ yɔ abalaa panɛ pɛkɛ yʋsaɣ; na, menɖiɣni kuluu ma-lɩmɖʋyʋ+ weyi payaɣ se Yɛzʋʋ yɔ+ ɛ-yɔɔ. 9 Na pɩyɛ nɖɩ mansɩ Yozuwee ɛsɩndaa yɔ! Ɛsa 7 wɛnɩ pɩyɛ nɖɩ ɖɩ-yɔɔ; nɛ mamaɣ matʋ ɖɩ-yɔɔ, nɛ mankaɣ ɛjaɖɛ nɖɩ ɖɩ-kɩwɛɛkɩm hɩzʋʋ evemiye kʋɖʋmɖɩyɛ taa,”+ yoyaa tɛ Yehowa yɔɔdʋʋna.
10 «“Puwiye lɛ, mɩ-taa paa anɩ kaɣ yaʋ e-koobu* se ɛkɔɔ e-viiñi tɩʋ nɛ e-fiigi tɩʋ tɛɛ;”»+ yoyaa tɛ Yehowa yɔɔdʋʋna.
4 Nɛ tiyiyu weyi ɛyɔɔdaɣnɩ-m yɔ, ɛpɩsɩ ɛkɔɔ nɛ efezi-m ɛzɩ pefezuu ɛyʋ nɛ ɖom yɔɔ yɔ. 2 Nɛ ɛpɔzɩ-m se: «Ɛbɛ ŋnaɣ?»
Nɛ moncosi-i se: «Manaɣ kanɖʋnaa ɖɩzɩyɛ, sika palabɩnɩ ɖɩ-tɩŋa pilim,+ nɛ ñanaɣ nakɛyɛ wɛ ɖɩ-ñʋʋ taa. Kanɖʋnaa 7 wɛ ɖɩ-yɔɔ,+ ɛɛɛ 7, nɛ kanɖʋnaa mba pɛwɛ ɖɩ-ñʋʋ taa yɔ, pɛwɛnɩ pilinzi 7 nzɩ sɩ-taa wɛ pɔŋ yɔ. 3 Nɛ oliivi tɩŋ 2 kaawɛ ɖɩ-cɔlɔ,+ kʋɖʋmʋʋ kaawɛ ñanaɣ nɩwaŋ yɔɔ nɛ lɛɛkʋ nɩmɩyɛ yɔɔ.»
4 Ðɩnɛ ɛlɛ mɔnpɔzɩ tiyiyu weyi ɛyɔɔdaɣnɩ-m yɔ se: «Man-kɩbaɣlʋ, wondu tʋnɛ tɩ-tɔbʋʋ lɛ suwe?» 5 Peeɖe tiyiyu weyi ɛyɔɔdaɣnɩ-m yɔ, ɛpɔzaa se: «Ŋŋnɩɣ wondu ndʋ tɩ-tɔbʋʋ na?»
Nɛ moncosi-i se: «Aayɩ, man-kɩbaɣlʋ.»
6 Peeɖe eheyi-m se: «Tɔm tʋnɛ Yehowa heyiɣ Zorobabɛɛlɩ: “‘Pɩtɩŋa mbʋ yɔ, pɩɩkaɣ tɩŋnʋʋ sɔɔjanaa yaa ɛyaa ɖoŋ yɔɔ nɛ pɩla,+ ɛlɛ men-fezuu yɔɔ+ pɩkaɣ tɩŋnʋʋ nɛ pɩla,’ yoyaa tɛ Yehowa yɔɔdʋʋna. 7 Pʋʋ sɔsɔʋ, ña yɔ anɩ? Ŋkaɣ pɩsʋʋ tɛtʋ landamm*+ Zorobabɛɛlɩ ɛsɩndaa.+ Nɛ ɛkaɣ kɔnʋʋ ɖooo ñʋʋ taa pɩyɛ nɛ pɛwɛɛ nɛ pamakɩ kubusi se: ‘Ðiɖe mbʋ suwe! Ðiɖe mbʋ suwe!’”»
8 Nɛ Yehowa tɔm tasɩ-m talʋʋ se: 9 «Zorobabɛɛlɩ nesi sɩnɩ ɖɩɣa kanɛ ke-tigiɖe,+ nɛ e-nesi kaɣnɩ-kɛ tɛzʋʋ.+ Nɛ ɩkaɣ tɩlʋʋ se yoyaa tɛ Yehowa tiyini-m mɩ-cɔlɔ. 10 Anim alɩwaatʋ ndʋ wondu calɩ paɣzʋʋ ññɩɩ yɔ?*+ Mbʋ pʋyɔɔ yɔ pa-taa kaɣ labʋ leleŋ nɛ pakaɣ naʋ pɩyɛ* Zorobabɛɛlɩ nesi taa. Kanɖʋnaa mba* pa-lʋbɛ pɛkɛ Yehowa ɛsa, wena acɔʋ tɛtʋ kpeekpe yɔɔ yɔ.»+
11 Nɛ mɔnpɔzɩ-ɩ se: «Oliivi tɩŋ 2 weyi ɩwɛ kanɖʋnaa ɖɩzɩyɛ nɩwaŋ nɛ ɖɩ-nɩmɩyɛ yɔɔ yɔ, ɛbɛ ɩkɛnaa?»+ 12 Mɔnpɔzɩ-ɩ nabʋlɛ ɖeɖe se: «Ɛbɛ oliivi tɩŋ 2 pilinzi* nzɩ sɩ-taa sika num lɩɣna nɛ pɩtɩŋɩɣnɩ sika pilinzi 2 taa yɔ sɩkɛnaa?»
13 Ðɩnɛ ɛlɛ ɛpɔzɩ-m se: «Ŋŋsɩŋ mbʋ wondu ndʋ tɩkɛnaa yɔ?»
Nɛ moncosi-i se: «Aayɩ, man-kɩbaɣlʋ.»
14 Eheyi-m se: «Tɩkɛ patam numwaa 2 mba pasɩŋɩɣ tɛtʋ kpeekpe Kɩbaɣlʋ cɔlɔ yɔ.»+
5 Mantasɩ kpazʋʋ ɛsa lɛ, mana takayaɣ kikpiyaɣ nakɛyɛ, kɛwɛɛ nɛ kakʋyʋʋ ɛsɔdaa. 2 Nɛ ɛpɔzɩ-m se: «Ɛbɛ ŋnaɣ?»
Nɛ moncosi-i se: «Manaɣ takayaɣ kikpiyaɣ nakɛyɛ, kɛwɛɛ nɛ kakʋyʋʋ ɛsɔdaa; ka-ɖaɣlɩkɩŋ kɛ nuŋgolonzi* 20 nɛ ka-walanzɩ ñɛkɛ nuŋgolonzi 10.»
3 Ðɩnɛ ɛlɛ eheyi-m se: «Kɛkɛ nɔɔ kɩdɛkɛdaɣ lɔʋ mbʋ piɖiɣni cɔʋ tɛtʋ kpeekpe yɔɔ yɔ, mbʋ pʋyɔɔ yɔ ɛyʋ weyi ɛmɩlɩɣ yɔ,+ ɛzɩ pamaʋ kɔ-hɔɔlʋʋ kʋɖʋmʋʋ yɔɔ yɔ, patɩhɔ ɛ-nɩŋgbaaŋ; nɛ ɛyʋ weyi eɖuki cɛtɩm ɖuutu yɔ,+ ɛzɩ pamaʋ kɔ-hɔɔlʋʋ lɛɛkʋ yɔɔ yɔ, patɩhɔ ɛ-nɩŋgbaaŋ. 4 “Metiyini-kɛ nɛ kakaɣ sʋʋ mɩlʋ ɖɩɣa taa, nɛ weyi eɖuki cɛtɩm ɖuutu ma-hɩɖɛ taa yɔ ɛ-ɖɩɣa taa; nɛ kakaɣ caɣʋ ɖɩɣa ŋga ka-taa nɛ kañaɣ-kɛ nɛ pɩkpɛndɩnɩ ka-ɖasɩ nɛ kɛ-pɛɛ;” yoyaa tɛ Yehowa yɔɔdʋʋna.»
5 Pʋwayɩ lɛ, tiyiyu weyi ɛyɔɔdaɣnɩ-m yɔ ɛkɔɔ nɛ eheyi-m se: «Mentendi-ŋ, kʋsɩ ñɛ-ɛsa nɛ ŋna mbʋ piɖiɣni lɩʋ yɔ.»
6 Nɛ mɔnpɔzɩ-ɩ se: «Ɛbɛ lɛ?»
Ecosi-m se: «Efa kɩmaɣzʋʋ* lɩɣna.» Ɛtasɩ yɔɔdʋʋ se: «Mbʋ pɛ-wɛtʋ wɛ tɛtʋ kpeekpe yɔɔ.» 7 Nɛ mana se pokuli ñɩɣtʋ* sulaɣ ŋga kɛwɛ kulukulu yɔ, nɛ halʋ nɔɔyʋ kaacaɣ kɩmaɣzʋʋ taa. 8 Nɛ ɛyɔɔdɩ se: «Halʋ ɛnʋ payaɣ se Kañatʋ.» Peeɖe etuzi-i nɛ ɛpɩsɩnɩ kɩmaɣzʋʋ taa, nɛ pʋwayɩ lɛ, ɛkpaɣ ñɩɣtʋ sulaɣ yuŋ ñɩŋga ŋga nɛ esulini kɩ-nɔɔ.
9 Nɛ mankpazɩ ɛsa nɛ mana halaa 2 peɖiɣni kɔm, nɛ pɛwɛɛ nɛ pakʋyʋʋ helim taa. Pe-keŋ wɛ ɛzɩ alɩŋgbayɩŋ keŋ yɔ. Nɛ pakpazɩ kɩmaɣzʋʋ ŋgʋ tɛtʋ nɛ ɛsɔdaa pɛ-hɛkʋ taa. 10 Peeɖe mɔnpɔzɩ tiyiyu weyi ɛyɔɔdaɣnɩ-m yɔ se: «Le powokini efa kɩmaɣzʋʋ ŋgʋ?»
11 Nɛ ecosi-m se: «Powokini-kʋ Siineyaarɩ* ɛjaɖɛ taa+ se pama halʋ ɛnʋ ɖɩɣa nakɛyɛ; nɛ kɛtɛŋ lɛ, powoni-i nɛ pasɩɩ peeɖe e-lone taa.»
6 Nɛ mantasɩ kpazʋʋ mɛ-ɛsa nɛ mana kɛɛkɛɛnaa 4, palɩnɩ pʋŋ 2 hɛkʋ taa nɛ pɔkɔŋ, nɛ pʋŋ ɛnɩ ɩɩkɛ ñɩɣyʋʋ kɩsɛɛmʋʋ pʋŋ. 2 Kpaŋnaŋ kɩsɛɛmɩŋ hɔŋaɣnɩ kajalaɣ kɛɛkɛɛ, nɛ kpaŋnaŋ kɩkpɛɛdɩŋ+ ñɔhɔŋ kɛɛkɛɛ 2 ñɩŋgʋ. 3 Kpaŋnaŋ kʋhʋlʋmɩŋ hɔŋaɣnɩ kɛɛkɛɛ tozo ñɩŋgʋ, nɛ kpaŋnaŋ weyi ɩ-yɔɔ wɛ takɩŋ takɩŋ nɛ maɖʋ maɖʋ yɔ,+ ɩlɛ ñɔhɔŋ kɛɛkɛɛ 4 ñɩŋgʋ.
4 Nɛ mɔnpɔzɩ tiyiyu weyi ɛyɔɔdaɣnɩ-m yɔ se: «Man-kɩbaɣlʋ, kɛɛkɛɛnaa mba lɛ?»
5 Tiyiyu cosi-m se: «Mba lɛ ɛsɔdaa feziŋ+ 4 weyi ɩlɩɣ yɔ, ɩsɩŋ tɛtʋ kpeekpe Kɩbaɣlʋ ɛsɩndaa+ nɛ pɩtɛ lɛ. 6 Ŋgʋ* kpaŋnaŋ kɩkpɛɛdɩŋ hɔŋ yɔ, kɩlɩɣ se kiwolo hayo kiŋ ɛjaɖɛ taa;+ kpaŋnaŋ kʋhʋlʋmɩŋ lɩɣ se iwolo teŋgu nɛ wayɩ; nɛ weyi ɩ-yɔɔ wɛ takɩŋ takɩŋ yɔ, ɩlɛ ñalɩɣ se iwolo hadɛ kiŋ ɛjaɖɛ taa. 7 Nɛ weyi ɩ-yɔɔ wɛ maɖʋ maɖʋ yɔ, ɩɩɖaŋ kpam se ɩlɩɩ nɛ ɩcɔɔ tɛtʋ yɔɔ.» Ðɩnɛ ɛlɛ ɛyɔɔdɩ se: «Ɩlɩɩ nɛ ɩcɔɔ tɛtʋ yɔɔ.» Nɛ ɩpaɣzɩ cɔʋ tɛtʋ yɔɔ.
8 Pʋwayɩ lɛ, ɛya-m nɛ ɛyɔɔdɩ se: «Na, weyi ɩlɩɣ se iwolo hayo kiŋ ɛjaɖɛ taa yɔ, ɩhɛzɩ Yehowa fezuu hayo kiŋ ɛjaɖɛ taa.»
9 Yehowa tɔm tasɩ-m talʋʋ se: 10 «Mʋ Hɛlɩdayii, Toobiya nɛ Yedaya pɔ-cɔlɔ samaɣ ŋga powoni-kɛ yomiye taa yɔ ko-wondu ndʋ pɔkɔnaa yɔ; nɛ evemiye nɖɩ ɖi-wiye lɛ, pɩwɛɛ se ŋwolo Sofonii pɩyalʋ Yoziyaasɩ ɖɩɣa taa, ña nɛ mba palɩnɩ Babilɔɔnɩ nɛ pɔkɔɔ yɔ. 11 Pɩwɛɛ se ŋkpaɣ liidiye nɛ sika nɛ ŋlubini awiya hulaɣ* nɛ ŋpam-kɛ Yehozadaakɩ pɩyalʋ Yozuwee+ weyi ɛkɛ cɔjɔ kɩlɩm yɔ. 12 Nɛ ŋheyi-i se:
«“Tɔm tʋnɛ yoyaa tɛ Yehowa yɔɔdʋʋ: ‘Abalʋ ɛnɛ payaɣ se Yɛzʋʋ.+ Ɛkaɣ yɛzʋʋ ɛ-maɣmaɣ e-lone taa, nɛ ɛkaɣ maʋ Yehowa templo.+ 13 Ɛnʋ kaɣnɩ Yehowa templo maʋ, nɛ ɛnʋ kaɣnɩ wɛnʋʋ samtʋ. Ɛkaɣ caɣʋ e-kewiyaɣ kpelaɣ taa nɛ ɛtɔɔ kewiyitu, nɛ ɛkaɣ kɛʋ ɖɔɖɔ cɔjɔ e-kewiyaɣ kpelaɣ taa,+ nɛ ɖama nɩnʋʋ kaɣ wɛʋ pɩ-naalɛ pɩ-hɛkʋ taa.* 14 Nɛ awiya hulaɣ* kaɣ wɛʋ Yehowa templo taa nɛ kɛkɛ mbʋ pɔtɔzʋʋnɩ Helɛɛm, Toobiya, Yedaya+ nɛ Sofonii pɩyalʋ Hɛɛnɩ pɔ-yɔɔ yɔ. 15 Nɛ mba pɛwɛ ɖooo poliŋ yɔ, pakaɣ kɔm nɛ paɖʋ nesi Yehowa templo maʋ tʋmɩyɛ.’ Nɛ ɩkaɣ tɩlʋʋ se yoyaa tɛ Yehowa tiyini-m mɩ-cɔlɔ. Nɛ pɩkaɣ labʋ mbʋ, ye itikizi mɩ-Ɛsɔ Yehowa nɔɔ welisuu yɔ.”»
7 Wiyaʋ Dariyusi pɩnaɣ 4 ñɩŋga taa, Yehowa tɔm talɩ Zakarii+ fenaɣ 9 ñɩŋga taa, pʋ-tɔbʋʋ se Kislev* fenaɣ, kɩyakʋ 4 ñɩŋgʋ wiye. 2 Betɛɛlɩ mba tiyi Sarezɛɛrɩ nɛ Regɛɛm-Meelɛɛkɩ nɛ ɛ-ɛyaa se powolo nɛ petendi Yehowa nɛ ɛna pa-pʋtɔdɩyɛ, 3 pɔpɔzɩ yoyaa tɛ Yehowa ɖɩɣa* cɔjɔnaa nɛ nayaa se: «Pɩwɛɛ se mewii fenaɣ 5 ñɩŋga taa+ nɛ mɛnpɛ man-tɩ tɔɔnaɣ ɛzɩ mɛntɛm labʋ pɩnzɩ sakɩyɛ yɔ?»
4 Yoyaa tɛ Yehowa tɔm tasɩ-m talʋʋ se: 5 «Pɔzɩ ɛjaɖɛ taa ɛyaa samaɣ kpeekpe nɛ cɔjɔnaa se: “Ɩɩwɛɣʋ nɛ ɩhɔkʋʋ nɔɔ nɛ iwiɣ fenaɣ 5 ñɩŋga taa nɛ fenaɣ 7 ñɩŋga taa+ pɩnzɩ 7+ yɔ, toovenim taa lɛ, mɔ-yɔɔ ɩhɔkaɣ nɔɔ na? 6 Nɛ ɩtɔkaɣ nɛ ɩñɔʋ lɛ, pɩtɩkɛ mɩ-maɣmaɣ mɩ-kɛzɛɣa yɔɔ ɩtɔkaɣ nɛ ɩñɔʋ yaa we? 7 Alɩwaatʋ ndʋ ɛyaa kaawɛ Yeruzalɛm nɛ tɛtʋ ndʋ tɩɩcɔ-kʋ nɛ tɩta yɔ tɩ-taa laŋhɛzɩyɛ taa yɔ, nɛ alɩwaatʋ ndʋ ɛyaa kaawɛ Negɛɛbʋ nɛ Seefela yɔ, tɔm ndʋ Yehowa kaatɩŋnɩ kajalaɣ nayaa yɔɔ+ nɛ esusi yɔ, pɩtɩkɛ ndʋ pɩwɛɛ se iwelisi?”»
8 Yehowa tɔm tasɩ talʋʋ Zakarii se: 9 «Tɔm tʋnɛ yoyaa tɛ Yehowa yɔɔdʋʋ: “Ɩhʋʋ tɔm siɣsiɣ,+ nɛ ɩwɩlɩ ɖama sɔɔlɩm siɣsiɣ ñɩmbʋ+ nɛ ɩna ɖama pʋtɔdɩyɛ. 10 Itaamuli lelu yaa pɩɣa ŋga kɛfɛyɩ caa yɔ,*+ ɛgɔm+ yaa kʋñɔndʋ;+ nɛ nɔɔyʋ ɛtaata tamaɣ kɩdɛkɛdaɣ lɛlʋ yɔɔ ɛ-laŋɩyɛ taa.”+ 11 Ɛlɛ paawɛɛ nɛ pekiziɣ welisuu,+ nɛ pala ñʋʋ taa ɖoŋ lakasɩ nɛ paha-m siɣye,+ nɛ paɖɩɣ pa-nɩŋgbaaŋ se paawelisiɣ.+ 12 Palaba nɛ pa-laŋɩyɛ kpa ɖoŋ ɛzɩ kaaʋ yɔ*+ nɛ patɩña paɣtʋ* nɛ tɔm ndʋ yoyaa tɛ Yehowa tɩŋnɩ kajalaɣ nayaa yɔɔ+ nɛ eheyi-wɛ pɩtɩŋnɩ e-fezuu yɔɔ yɔ. Pʋyɔɔ yoyaa tɛ Yehowa taa kaawɩnɩ-wɛ siŋŋ.»+
13 «“Alɩwaatʋ ndʋ maaya-wɛ* yɔ patiwelisi,+ mbʋ ɖɔɖɔ alɩwaatʋ ndʋ paaya-m yɔ mantiwelisi,+ yoyaa tɛ Yehowa yɔɔdʋʋna. 14 Nɛ mamɩzɩ-wɛ nɛ helim sɔsɔm ajɛɛ wena patɩtɩlɩ yɔ a-tɩŋa a-taa,+ nɛ ɛjaɖɛ pɩsɩ njɛyɛ pa-wayɩ, nɛ nɔɔyʋ taatɩŋɩɣnɩ ɖɩ-taa nɛ ɛɖɛɣ nɛ nɔɔyʋ taapɩsɩɣ;+ mbʋ pʋyɔɔ yɔ papɩsɩ ɛjaɖɛ kɩbanɖɛ sɔɔndʋ pʋyʋ.”»
8 Yoyaa tɛ Yehowa tɔm tasɩ talʋʋ se: 2 «Tɔm tʋnɛ yoyaa tɛ Yehowa yɔɔdʋʋ, “Mɛntɛm man-taa se mankandɩyɩɣ Siyɔŋ yɔɔ nɛ kpekpeka sɔsɔɔ,+ nɛ mankandɩyɩɣ kɩ-yɔɔ nɛ pana sɔsɔna.”»
3 «Tɔm tʋnɛ Yehowa yɔɔdʋʋ: “Mankaɣ pɩsʋʋ Siyɔŋ+ nɛ mankaɣ caɣʋ Yeruzalɛm;+ nɛ pakaɣ Yeruzalɛm yaʋ se toovenim* tɛtʋ,+ nɛ pakaɣ yoyaa tɛ Yehowa pʋʋ yaʋ se pʋʋ kiɖeɖeu.”»+
4 «Tɔm tʋnɛ yoyaa tɛ Yehowa yɔɔdʋʋ: “Akpadɩyaa kaɣ tasʋʋ caɣʋ Yeruzalɛm samaɣ kadasɩ taa, paa anɩ ɛ nɛ ɛ-ɖaʋ e-nesi tɛɛ, mbʋ pʋyɔɔ yɔ ɛ-pɩnzɩ ɖɔwa.*+ 5 Nɛ abalɩbiya nɛ halɩbiya pakaɣ suu tɛtʋ kadasɩ taa nɛ peleɣyiɣ peeɖe.”»+
6 «Tɔm tʋnɛ yoyaa tɛ Yehowa yɔɔdʋʋ: “Samaɣ kanɛ ka-taa mba pɩkazɩɣ kɩyakɩŋ ɛnɩ ɩ-taa yɔ, paa pɩlakɩ-wɛ ɛzɩ pɩkɩlɩ kaɖɛ yɔ, ɛzɩ pɩkaɣ ma ɖɔɖɔ labʋ ɛzɩ pɩkɩlɩ kaɖɛ yɔ?”, yoyaa tɛ Yehowa yɔɔdʋʋna.»
7 «Tɔm tʋnɛ yoyaa tɛ Yehowa yɔɔdʋʋ: “Menɖiɣni yabʋ man-samaɣ ñʋʋ wɩsɩ ɖɩlɩyɛ nɛ wɩsɩ ɖɩɖʋyɛ ajɛɛ taa.+ 8 Nɛ mankaɣ-wɛ kɔnʋʋ nɛ pacaɣ Yeruzalɛm;+ nɛ pakaɣ pɩsʋʋ man-samaɣ, nɛ mankaɣ pɩsʋʋ pɛ-Ɛsɔ, toovenim nɛ siɣsiɣ wɛtʋ taa.”»+
9 «Tɔm tʋnɛ yoyaa tɛ Yehowa yɔɔdʋʋ: “Ɩwɛɛ abalɩtʋ,*+ mɩ mba ɩnɩɣ lɛɛlɛɛyɔ nayaa nɔɔ taa tɔm tʋnɛ yɔ,+ tɔm kʋɖʋmtʋ ndʋ paatɛm-tʋ yɔɔdʋʋ kɩyakʋ ŋgʋ paasɩ yoyaa tɛ Yehowa ɖɩɣa tigiɖe se pama templo yɔ. 10 Mbʋ pʋyɔɔ yɔ pʋcɔ nɛ alɩwaatʋ ndʋ tɩtalɩɣ lɛ, pataahɛyɩɣ kɩhɛyʋʋ nakʋyʋ ɛyʋ yaa kpɩnɛ;+ nɛ koyindu yɔɔ lɛ, nɔɔyʋ taapɩzɩɣ se ewolo nɛ ɛkɔɔ laŋhɛzɩyɛ taa, mbʋ pʋyɔɔ yɔ maayeba nɛ ɛyaa kpeekpe kʋyɩ ɖama yɔɔ.”
11 «“Ɛlɛ lɛɛlɛɛyɔ lɛ, maakaɣ tasʋʋ labʋ samaɣ kanɛ yɔ ka-taa ɛyaa mba pɩkazaa yɔ ɛzɩ maalabʋ kajalaɣ kɩyakɩŋ taa yɔ,+ yoyaa tɛ Yehowa yɔɔdʋʋna. 12 Mbʋ pʋyɔɔ yɔ pakaɣ ɖuu laŋhɛzɩyɛ ɖomaɣ; viiñi tɩʋ kaɣ lʋlʋʋ ki-pee nɛ tɛtʋ ñalʋlɩ ti-pee,+ nɛ ɛsɔdaa kaɣ haʋ ki-ɖoluu; nɛ mankaɣ labʋ nɛ pɩtɩŋa payɩ mbʋ yɔ, pɩpɩsɩ samaɣ kanɛ ka-taa mba pɩkazaa yɔ pa-ñɩm.+ 13 Oo Yuuda ɖɩɣa nɛ Izrayɛɛlɩ ɖɩɣa, ɛzɩ ɩɩpɩsʋʋ nɔɔ kɩdɛkɛdaɣ lɔʋ pʋyʋ ajɛɛ hɛkʋ taa yɔ,+ mbʋ ɖɔɖɔ mankaɣ mɩ-ñʋʋ yabʋ, nɛ ɩkaɣ pɩsʋʋ wazaɣ.+ Sɔɔndʋ ɛtaakpa-mɩ!+ Ɩwɛɛ abalɩtʋ.”*+
14 «Mbʋ pʋyɔɔ yɔ tɔm tʋnɛ yoyaa tɛ Yehowa yɔɔdʋʋ: “Ɛzɩ maatɛm man-taa se mɔnkɔŋnɩ mɩ-yɔɔ asɛyʋʋ mbʋ pʋyɔɔ yɔ mɩ-cɔzɔnaa kaayeba nɛ man-pana kpa, nɛ mantɩlɛɣzɩ lɩmaɣza* yɔ,+ yoyaa tɛ Yehowa yɔɔdʋʋna, 15 mbʋ ɖɔɖɔ mɛntɛm man-taa lɛɛlɛɛyɔ se malakɩ kɩbandʋ Yeruzalɛm nɛ Yuuda ɖɩɣa.+ Sɔɔndʋ ɛtaakpa-mɩ!”+
16 «“Mbʋ mbʋ pɩwɛɛ se ɩla yɔ mbʋ yɔ: Iheyi ɖama toovenim,+ nɛ pɩwɛɛ se mɩ-nɔnɔsɩ taa tɔm hʋʋ ɛkɔnɩ toovenim nɛ laŋhɛzɩyɛ.+ 17 Ɩtaata tamasɩ kɩdɛkɛdɩsɩ ɖama yɔɔ mɩ-laŋa taa,+ ɩtaasɔɔlɩ cɛtɩm ɖuutu;+ mbʋ pʋyɔɔ yɔ manpaɖɩɣ lakasɩ nzɩ sɩ-tɩŋa payɩ,”+ Yehowa yɔɔdʋʋna.»
18 Yoyaa tɛ Yehowa tɔm tasɩ-m talʋʋ se: 19 «Tɔm tʋnɛ yoyaa tɛ Yehowa yɔɔdʋʋ: “Fenaɣ 4 ñɩŋga taa nɔsɩ hɔkʋʋ,+ fenaɣ 5 ñɩŋga taa nɔsɩ hɔkʋʋ,+ fenaɣ 7 ñɩŋga taa nɔsɩ hɔkʋʋ+ nɛ fenaɣ 10 ñɩŋga taa nɔsɩ hɔkʋʋ+ kaɣ kɛʋ amɛya nɛ taa leleŋ alɩwaatʋ Yuuda ɖɩɣa; pɩkaɣ kɛʋ taa leleŋ kazandʋ.+ Pʋyɔɔ lɛ, ɩsɔɔlɩ toovenim nɛ laŋhɛzɩyɛ.”
20 «Tɔm tʋnɛ yoyaa tɛ Yehowa yɔɔdʋʋ: “Paa mbʋ yɔ, pɩkaɣ labʋ se tɛtʋ sakɩyɛ taa mba nɛ samasɩ pakaɣ kɔm; 21 nɛ tɛtʋ natʋyʋ taa mba kaɣ wobu nɛ peheyi lɛɛtʋ taa mba se: ‘Ðiwolo nɛ ɖitendi Yehowa nɛ ɖa-laŋɩyɛ pilim nɛ ɛna ɖa-pʋtɔdɩyɛ, ɖiwolo nɛ ɖɩñɩnɩ yoyaa tɛ Yehowa. Ma ɖɔɖɔ mowoki.’+ 22 Nɛ samasɩ sakɩyɛ nɛ ajɛɛ ɖoŋ ñɩna kaɣ kɔm Yeruzalɛm se añɩnɩ yoyaa tɛ Yehowa+ nɛ atendi Yehowa se ɛna a-pʋtɔdɩyɛ.”
23 «Tɔm tʋnɛ yoyaa tɛ Yehowa yɔɔdʋʋ: “Kɩyakɩŋ ɛnɩ ɩ-taa lɛ, abalaa 10 mba palɩnɩ ajɛɛ kʋnʋmɩŋ tɩŋa taa yɔ+ pakaɣ ɖɔkʋʋ, ɛɛɛ, pakaɣ ɖɔkʋʋ Yuuda tʋ* nɔɔyʋ toko* cɩŋ cɩŋ nɛ pɔyɔɔdɩ se: ‘Ðɩsɔɔlaa se ɖa nɛ mɩ ɖiwolo,+ mbʋ pʋyɔɔ yɔ ɖɩnɩwa se Ɛsɔ wɛ mɩ-cɔlɔ.’”»+
9 Tɔm kɩcɛyɩtʋ:
«Yehowa tɔm kaɖɩnɩ Hadraakɩ ɛjaɖɛ,
—Mbʋ pʋyɔɔ yɔ Yehowa ɛsa wɛ ɛyaa yɔɔ+
Nɛ ɛ-ɛsa wɛ Izrayɛɛlɩ cejewe kpeekpe yɔɔ—
3 Tiirɩ ma kɩ-tɩ koloŋa ɖoŋ ñɩŋga.*
Kikpeɣli liidiye nɛ kɩkpazɩ huuye ɛzɩ mʋzʋʋ yɔ
Nɛ kikpeɣli sika ɛzɩ habɛɛ yɔɔ ahɔya yɔ.+
5 Askelɔɔnɩ kaɣ naʋ nɛ sɔɔndʋ kpa-kʋ;
Gaazaa kaɣ wɛʋ kʋñɔŋ sɔsɔʋ taa,
Ekrɔɔnɩ ɖɔɖɔ, mbʋ pʋyɔɔ yɔ ki-lidaʋ pɩsɩ fɛyɛ.
Gaazaa ɛɛkaɣ tasʋʋ wɛnʋʋ wiyaʋ,
Nɛ ɛyaa ɩɩkaɣ caɣʋ Askelɔɔnɩ.+
6 Agbaaɣdaa tʋ pɩyalʋ kaɣ caɣʋ Asɩdoodi,
Nɛ mankaɣ yebu nɛ Filistii tʋ tɩ kpazʋʋ sɩɩ tɩnaɣ.+
7 Mankaɣ lɩzʋʋ mbʋ calɩm ta-pʋ yɔ ɛ-nɔɔ taa
Nɛ mankaɣ kpɛʋ mbʋ pɩcaɣ kiniŋ yɔ e-kela hɛkʋ taa,
Nɛ ɛ-ɛyʋ weyi pɩkaɣ kazʋʋ yɔ, ɛkaɣ kɛʋ ɖɛ-Ɛsɔ pʋyʋ;
Nɛ ɛkaɣ pɩsʋʋ ɛzɩ ñʋʋdʋ* yɔ Yuuda,+
Nɛ Ekrɔɔnɩ kaɣ pɩsʋʋ ɛzɩ Yebuusi tʋ yɔ.+
8 Mankaɣ kizinzikiŋ siɣu ɛzɩ feŋiyu yɔ* man-ɖɩɣa nɔɔ,+
Nɛ nɔɔyʋ ɛɛkaɣ tɩŋnʋʋ ka-taa nɛ nɔɔyʋ ɛɛkaɣ pɩsʋʋ;
Nɛ tʋmɩyɛ yɔɔ cɔnɩyʋ* nɔɔyʋ ɛɛkaɣ tasʋʋ ka-taa tɩŋnʋʋ,+
Mbʋ pʋyɔɔ yɔ lɛɛlɛɛyɔ lɛ mana-kʋ* nɛ mɛ-ɛsa.
9 Oo Siyɔŋ pɛlɛ, mɛyɩ kpem.
Oo Yeruzalɛm pɛlɛ, koo wabɩtʋ kogoye.
Na! Ñe-wiyaʋ ɖiɣni kɔm ñɔ-cɔlɔ.+
10 Mankaɣ mʋʋzʋʋ you kɛɛkɛɛnaa Efrayim taa
Nɛ mankaɣ mʋʋzʋʋ kpaŋnaŋ Yeruzalɛm taa.
You tɔŋ ɩɩkaɣ tasʋʋ wɛʋ.
Nɛ ɛkaɣ ajɛɛ susuu laŋhɛzɩyɛ;+
Ɛkaɣ kewiyitu tɔɔʋ kpaɣnɩ teŋgu nɛ piwolo pɩtalɩ teŋgu
11 Oo halʋ, ña lɛ, pɩtɩŋnɩ ñɛ-ɛgbɛyɛ calɩm yɔɔ lɛ,
Mankaɣ lɩzʋʋ ña-salaka tɩnaa pɔʋ ŋgʋ kɩ-taa lɩm fɛyɩ yɔ kɩ-taa.+
12 Mɩ salaka tɩnaa mba pɛwɛnɩ lidaʋ yɔ, ɩpɩsɩ tilimiye ɖoŋ ñɩnɖɛ tɛɛ.+
Sɔnɔ meheyiɣ-ŋ se:
“Oo halʋ, mankaɣ-ŋ hɛyʋʋ pi-lone taa tam nabʋlɛ.+
13 Mankaɣ kotuu* Yuuda ɛzɩ mɔn-tɔʋ yɔ.
Tɔʋ ŋgʋ kɩ-taa mankaɣ ɖʋʋ Efrayim yɔ,*
Oo Siyɔŋ, mankaɣ fezuu ña-pɩyalaa,
Nɛ pakʋyɩ ña-pɩyalaa yɔɔ, Oo Grɛɛsɩ,
Nɛ mankaɣ-ŋ labʋ nɛ ŋwɛɛ ɛzɩ you laɖʋ laɣɖɛ yɔ.”
14 Pakaɣ naʋ Yehowa pa-ñʋʋ yɔɔ,
Nɛ ɛ-tɔʋ ñɩmɩyɛ kaɣ lɩʋ ɛzɩ tɛʋ ñɩlɩsʋʋ yɔ.
Kɩbaɣlʋ Kɩlɩm Yehowa kaɣ hʋlʋʋ nɔndɔʋ,+
Nɛ ɛkaɣ kpɛndɩnʋʋ hadɛ kiŋ helim sɔsɔm nɛ ɛɖɛɛ.
15 Yoyaa tɛ Yehowa kaɣ kandɩyʋʋ pɔ-yɔɔ,
Nɛ pakaɣ pʋʋtʋʋ pʋtɔɖɛ pɛɛ nɛ pɛwɛɛnɩ ɖoŋ a-yɔɔ.+
Pakaɣ ñɔʋ nɛ paakaɣ caɣʋ ɖiɣ ɖiɣ, pakaɣ labʋ ɛzɩ vɛɛ pɔñɔwa yɔ;
Nɛ pa-taa kaɣ suu ɛzɩ ñanaɣ yɔ,
Ɛzɩ altaaru kɔnanaa yɔ.+
16 Pɛ-Ɛsɔ Yehowa kaɣ pa-ñʋʋ yabʋ kɩyakʋ ŋgʋ ki-wiye
Mbʋ pʋyɔɔ yɔ pɛkɛ e-ewiɖe, ɛ-samaɣ;+
Mbʋ pʋyɔɔ yɔ pakaɣ wɛʋ ɛzɩ awiya hulaɣ* ñɩɣlɩm pɛɛ yɔ nɛ pañɩlɩsɩɣ ɛ-tɛtʋ yɔɔ.+
17 Mbʋ pʋyɔɔ yɔ ɛ-kɩbandʋ paɣlaa kpem,+
Nɛ e-keɖeɣa paɣlaa kpem!
Tɔɔnaɣ pee kaɣ haʋ evebiya ɖoŋ,
Nɛ vɛɛ kɩfalʋʋ kaɣ haʋ pɛlaa mba patɩtɩlɩ abalaa yɔ ɖoŋ.»+
10 «Ɩpɔzɩ tɛʋ Yehowa, wayɩ wayɩ tɛŋ* alɩwaatʋ taa.
Yehowa lakɩnɩ tɛʋ sɔsɔʋ mɩndʋ,
Ɛnʋ yekina nɛ tɛʋ nɩɣ nɛ pɩwazɩɣ ɛyaa,+
Nɛ ɛhaɣ paa anɩ mbʋ pɩñɔʋnɩ tɛtɛɛ yɔ hayɩm taa.
Pɔyɔɔdʋʋ ɖoza wena aawazɩɣ pʋyʋ yɔ a-tɔm,
Nɛ pañakɩ pana se pɛhɛzɩ laŋa, ɛlɛ falaa.
Pʋyɔɔ pakaɣ yotuu ɛzɩ heŋ yɔ.
Pakaɣ labʋ kʋñɔŋ, mbʋ pʋyɔɔ yɔ ninɖiɣyu nɔɔyʋ fɛyɩ.
3 Man-pana mʋ miŋ ninɖiɣyaa yɔɔ,
Nɛ mankaɣ pɔzʋʋ akɔnta ñʋndɩnaa mba pɛkɛ nazɩyaa yɔ;*
Mbʋ pʋyɔɔ yɔ yoyaa tɛ Yehowa kɛzɩ ɛ-lɩmaɣza nɛ e-ewiɖe yɔɔ kiŋ,+ Yuuda ɖɩɣa yɔɔ,
Nɛ ɛpɩsɩ-wɛ ɛzɩ ɛ-kpaŋnʋ sɔsɔ you taa yɔ.
4 Ɛ-taa ɛyʋ weyi ɛ-tɔm cɛyaa yɔ* ɛlɩɣna,
Ɛ-taa ñʋʋdʋ weyi ɛsɩɣna yɔ* ɛlɩɣna,
Ɛ-taa you tɔʋ lɩɣna;
Ɛ-taa paa tʋmɩyɛ yɔɔ cɔnɩyʋ weyi ɛlɩɣna, pa-tɩŋa payɩ pɛkpɛndɩɣ nɛ palɩɩnɩ ɛ-taa.
5 Nɛ pakaɣ pɩsʋʋ ɛzɩ you laɖaa
Mba pɛfɛyɩɣ habɛɛ yɔɔ ahɔya taa you taa yɔ.
6 Mankaɣ labʋ nɛ Yuuda ɖɩɣa kɩlɩ,
Nɛ mankaɣ yabʋ Yosɛɛfʋ ɖɩɣa ñʋʋ.+
Mankaɣ-wɛ pɩsɩnʋʋ,
Mbʋ pʋyɔɔ yɔ mankaɣ naʋ pa-pʋtɔdɩyɛ;+
Nɛ pakaɣ wɛʋ ɛzɩ wiɖiyi mantaalɔ-wɛ yɔ;+
Mbʋ pʋyɔɔ yɔ mɛnkɛ pɛ-Ɛsɔ Yehowa, nɛ mankaɣ-wɛ cosuu.
7 Efrayim mba kaɣ pɩsʋʋ ɛzɩ you laɖʋ ɖoŋ tʋ yɔ,
Nɛ pa-laŋa taa kaɣ labʋ leleŋ ɛzɩ pɔñɔ vɛɛ yɔ.+
Pa-pɩyalaa kaɣ naʋ mbʋ, nɛ pa-taa la leleŋ;
Yehowa yɔɔ lɛ, pa-laŋa taa kaɣ labʋ leleŋ.+
8 “Mankaɣ hʋlʋʋ nɛ mayaanɩ-wɛ nɛ menkpeɣli-wɛ;
Mbʋ pʋyɔɔ yɔ mankaɣ pa-ñʋʋ yabʋ,+ nɛ pakaɣ ɖɔʋ,
Nɛ pakaɣ wɛʋ ɖɔʋ yɔɔ.
9 Paa mamɩzɩ-wɛ ɛzɩ ɖomaɣ yɔ ɛyaa samasɩ taa yɔ,
Pakaɣ mɔ-yɔɔ tɔzʋʋ poliŋ lona taa;
Pa nɛ pa-pɩyalaa pakaɣ ɖaɣnʋʋ kpaʋ ɖoŋ* nɛ papɩsɩ.
10 Mankaɣ-wɛ pɩsɩnʋʋ nɛ Ejipiti ɛjaɖɛ taa,
Nɛ malɩzɩɣ-wɛ Asiirii nɛ menkpeɣli-wɛ;+
Mankaɣ-wɛ kɔnʋʋ Galaadɩ egeetiye taa+ nɛ Libaŋ taa,
Nɛ ɖɩjaɣyɛ ɛɛkaɣ-wɛ talʋʋ.+
11 Pɩwɛɛ se ɛtɛzɩ teŋgu nɛ ɛla nɛ kɩnɩɩ siziŋ;
Nɛ teŋgu taa lɛ, ɛkaɣ mabʋ lɩm hola;+
Niili lɩm cukaŋ ñɩmbʋ tɩŋa kaɣ sɔʋ.
Nɛ pakaɣ tisuu Asiirii tɩ kpazʋʋ,
Nɛ Ejipiti kewiyaɣ ɖaʋ kaɣ kʋyʋʋ nɛ kɩɖɛɛ.+
11 «Oo Libaŋ, tʋlɩ ñɔ-nɔnɔsɩ,
Nɛ miŋ pɩzɩ nɛ ɩñaɣ ñɛ-sɛɛdrɩ tɩŋ.
2 Ña jenevriyee tɩʋ, wii, mbʋ pʋyɔɔ yɔ sɛɛdrɩ tɩʋ ɖaba;
Pakʋ tɩŋ sɔsɔŋ!
Basaanɩ tɩŋ sɔsɔŋ* mɩ, iwii,
Mbʋ pʋyɔɔ yɔ petim laʋ sɔsɔʋ!
3 Iwelisi! Ninɖiɣyaa wiɣ,
Mbʋ pʋyɔɔ yɔ paɖɩzɩ pa-samtʋ.
Iwelisi! Mʋʋzɩŋ* mʋdʋʋ,
Mbʋ pʋyɔɔ yɔ paɖɩzɩ Yɔɔrdaŋ pɔɔ nɔɔ lakɩŋ sɔsɔŋ.
4 «Tɔm tʋnɛ mɛ-Ɛsɔ Yehowa yɔɔdʋʋ: “Ðiyi heŋ weyi paɖʋwa se pakaɣ-ɩ kʋʋ yɔ,+ 5 weyi ɩ-yaɖaa kʋʋ-ɩ+ ɛlɛ paakʋʋ pɔ-tɔm yɔ. Nɛ mba pɛpɛdɩɣ-ɩ yɔ+ pɔyɔɔdʋʋ se: ‘Pasa Yehowa, mbʋ pʋyɔɔ yɔ mankaɣ pɩsʋʋ ñɩm tʋ.’ Nɛ i-ɖiyiyaa ɩɩnaɣ ɩ-pʋtɔdɩyɛ.”+
6 «“Mbʋ pʋyɔɔ yɔ maakaɣ tasʋʋ naʋ ɛjaɖɛ taa mba pʋtɔdɩyɛ. Pʋyɔɔ lɛ, mankaɣ labʋ nɛ paa weyi lɛ ɛtɔlɩ e-koobu* nɛ e-wiyaʋ nesi tɛɛ; nɛ pakaɣ ɛjaɖɛ pʋʋtʋʋ, nɛ maakaɣ-wɛ holuu pe-nesi tɛɛ,” Yehowa yɔɔdʋʋna.»
7 Nɛ manpaɣzɩ ɖiyuu heŋ weyi paɖʋwa se pakaɣ-ɩ kʋʋ yɔ,+ se pɩwazɩ-mɩ, mɩ heŋ weyi ɩtɔkɩ kʋñɔŋ yɔ. Nɛ mankpaɣ ɖaŋ 2, maya kʋɖʋmʋʋ se Kɩbandʋ, nɛ mayaa lɛɛkʋ se Nɔɔ Kʋɖʋmaɣ,+ nɛ manpaɣzɩ heŋ ɖiyuu. 8 Nɛ mɔnɖɔɔnɩ ninɖiɣyaa 3 fenaɣ kʋɖʋmaɣ taa, mbʋ pʋyɔɔ yɔ mantaatasɩ* wɛnʋʋ suuɖu pɔ-yɔɔ, nɛ paba ɖɔɖɔ papaɖaɣ-m.* 9 Nɛ mɔyɔɔdɩ se: «Maakaɣ-mɩ tasʋʋ ɖiyuu. Heu weyi eɖiɣni sɩbʋ yɔ ɛtɛzɩ sɩbʋ, nɛ weyi eɖiɣni tɛŋɩlʋʋ yɔ ɛtɛzɩ tɛŋɩlʋʋ. Piyele nɛ weyi ɩlɛ ñakazaa yɔ, ɩcɩyɩ ɖama.» 10 Peeɖe mankpaɣ man-ɖaʋ ŋgʋ mayaɣ se Kɩbandʋ yɔ+ nɛ mɛnsɛtɩ-kʋ, mbʋ mɛncɛbɩ mɛ-ɛgbɛyɛ nɖɩ maaɖʋnɩ ɛyaa samasɩ tɩŋa yɔ. 11 Mbʋ ɖɩcɛbɩ puwiye, nɛ heŋ weyi ɩtɔkaɣ kʋñɔŋ nɛ ɩɩwɛɛ nɛ ɩcɔŋnɩ-m yɔ, iɖiɣzina se Yehowa tɔm pɩɩkɛnaa.
12 Pʋwayɩ lɛ, meheyi-wɛ se: «Ye pɩkɛdɩnɩ-mɩ yɔ, ɩcɛlɩ-m man-kɩhɛyʋʋ; ɛlɛ ye pɩtɩkɛdɩnɩ-mɩ yɔ, kɩwɛɛ mɩ-cɔlɔ.» Nɛ pɛhɛyɩ-m* man-kɩhɛyʋʋ, liidiye pɔɔyɩsɩ 30.+
13 Nɛ Yehowa heyi-m se: «Pɛɖɩ-kʋ ñɩm ɖɩzɩyɛ taa, kɩhɛyʋʋ sɔsɔʋ ŋgʋ pamaɣzɩɣ se mamʋnaa yɔ.»+ Peeɖe mankpaɣ liidiye pɔɔyɩsɩ 30 nzɩ nɛ mɛnpɛɖɩ Yehowa ɖɩɣa taa ñɩm ɖɩzɩyɛ taa.+
14 Pʋwayɩ lɛ, mɛnsɛtɩ man-ɖaʋ 2 ñɩŋgʋ, ŋgʋ mayaɣ se Nɔɔ Kʋɖʋmaɣ yɔ,+ mbʋ meyeba nɛ koobiye nɖɩ ɖɩɩwɛ Yuuda nɛ Izrayɛɛlɩ pɛ-hɛkʋ taa yɔ ɖɩsɩɩ tɩnaɣ.+
15 Nɛ Yehowa heyi-m se: «Lɛɛlɛɛyɔ kpaɣ ninɖiɣyu weyi ɛɛwazɩɣ pʋyʋ yɔ+ e-wondu. 16 Mbʋ pʋyɔɔ yɔ mahaɣ nʋmɔʋ se ninɖiɣyu nɔɔyʋ ɛwɛɛ ɛjaɖɛ taa. Ɛɛkaɣ cɔnʋʋ heŋ weyi iɖiɣni tɛŋɩlʋʋ yɔ i-ɖeɖe;+ ɛɛkaɣ ñɩnʋʋ heɣsi nɛ ɛɛkaɣ waʋ weyi pʋkʋ-ɩ yɔ+ nɛ ɛɛkaɣ calʋʋ weyi ɩpɩzɩɣ sɩŋʋʋ yɔ. Ɛlɛ ɛcɩyɩɣ heu weyi ɛɖʋ num yɔ ɛ-nandʋ+ nɛ ɛkpɛɣ heŋ acaa.+
17 Pɩtɔɔ me-ninɖiɣyu weyi ɛɛwazɩɣ pʋyʋ yɔ,+ weyi eyeki heŋ yɔ!+
Laɣɖɛ kaɣ lom e-nesi nɛ ɛ-nɩwaŋ ɛsɩyɛ.
E-nesi kaɣ sɩbʋ cɩɖɩ cɩɖɩ,
Nɛ ɛ-nɩwaŋ ɛsɩyɛ kaɣ yʋlʋmʋʋ* cɩɖɩ cɩɖɩ.»
12 Tɔm kɩcɛyɩtʋ:
«Tɔm ndʋ Yehowa yɔɔdʋʋ Izrayɛɛlɩ yɔɔ yɔ,» Yehowa yɔɔdʋʋna,
Ɛnʋ weyi eposi ɛsɔdaa yɔ,+
Ɛnʋ weyi ɛsɩ tɛtʋ tigiɖe yɔ,+
Nɛ ɛnʋ weyi ɛlabɩ fezuu ŋgʋ kɩwɛ ɛyʋ taa yɔ.
2 «Malakɩ nɛ Yeruzalɛm kɛnɩ vɛɛ kɔpʋ* ŋgʋ kiyeki nɛ pɩcɛŋɛsɩ samasɩ nzɩ payɩ sɩcɔ-kʋ nɛ sɩta yɔ; nɛ pakaɣ cɔʋ Yuuda nɛ Yeruzalɛm nɛ pata se poyooni-wɛ.+ 3 Puwiye lɛ, mankaɣ yebu nɛ Yeruzalɛm pɩsɩ pɩyɛ yuŋ ñɩnɖɛ samasɩ kpeekpe ɛsɩndaa. Nɛ mba payɩ pañakɩ pana se pakʋsɩ-ɖɩ yɔ, pɩtʋʋ fɛyɩ se pakaɣ heŋ mʋʋ siŋŋ;+ nɛ tɛtʋ yɔɔ ajɛɛ kpeekpe kaɣ kpeɣluu se akaɖɩnɩ-kʋ.+ 4 Puwiye lɛ, mankaɣ yebu nɛ sɔɔndʋ kpa paa kpaŋnʋ weyi, nɛ mankaɣ yebu nɛ ɛ-yɔɔ caɣyʋ sʋʋ kpaaŋ. Mɛ-ɛsa kaɣ wɛʋ Yuuda ɖɩɣa yɔɔ tam, ɛlɛ mankaɣ yebu nɛ samasɩ kpaŋnaŋ tɩŋa yʋlʋmɩ; Yehowa yɔɔdʋʋna. 5 Nɛ Yuuda ñʋndɩnaa* kaɣ yɔɔdʋʋ pa-laŋa taa se: “Mba pɛwɛ Yeruzalɛm yɔ, mba kɛnɩ mon-ɖoŋ; pɛ-Ɛsɔ, yoyaa tɛ Yehowa ɖoŋ taa.”+ 6 Puwiye lɛ, mankaɣ labʋ nɛ Yuuda ñʋndɩnaa* pɩsɩ ɛzɩ ñanaɣ ŋga ka-taa miŋ ɖiɣni mʋʋ yɔ ɖasɩ hɛkʋ taa, nɛ ɛzɩ kooloŋa* ŋga ke-miŋ ɖiɣni ɖeu yɔ tɔɔnaɣ pee wena pakʋma nɛ papɩlɩ yɔ a-yɔɔ,+ nɛ pakaɣ ñaɣʋ samasɩ nzɩ payɩ sɩcɔ-wɛ nɛ sɩta yɔ nɩwaŋ yɔɔ nɛ nɩmɩyɛ yɔɔ;+ nɛ ɛyaa kaɣ tasʋʋ caɣʋ Yeruzalɛm taa ki-lone taa,* Yeruzalɛm taa.+
7 «Nɛ Yehowa kaɣ calɩnʋʋ Yuuda kizinzikiŋ ñʋʋ yabʋ, se Daviid ɖɩɣa keɖeɣa* nɛ mba pɛwɛ Yeruzalɛm yɔ pe-keɖeɣa* ɛtaakɩlɩ Yuuda ñɩŋga nɛ pɩɖɛlɛsɩ. 8 Puwiye lɛ, Yehowa kaɣ cɔʋ mba pɛwɛ Yeruzalɛm yɔ nɛ ɛta nɛ ɛlʋ pɔ-yɔɔ;+ weyi pituuluu-i* pɛ-hɛkʋ taa puwiye yɔ, ɛkaɣ wɛʋ ɛzɩ Daviid yɔ, nɛ Daviid ɖɩɣa kaɣ wɛʋ ɛzɩ Ɛsɔ yɔ, ɛzɩ Yehowa tiyiyu weyi ɛɖɛɣ-wɛ nɔɔ yɔ.+ 9 Nɛ puwiye lɛ, paa pɩɩlabɩ ɛzɩma yɔ mankaɣ ɖɩzʋʋ ajɛɛ wena payɩ akaɣ kɔm Yeruzalɛm wayɩ yɔ.+
10 «Mankaɣ pɩyʋʋ Daviid ɖɩɣa nɛ mba pɛwɛɣ Yeruzalɛm yɔ pɔ-yɔɔ pʋtɔdɩyɛ naʋ nɛ tenduu fezuu, nɛ pakaɣ cɔnʋʋ weyi pɔsɔbɩ-ɩ kɩgbɛzɛŋ yɔ,+ nɛ pakaɣ wiu ɛ-yɔɔ ɛzɩ pewiu pɩyalʋ ɛgbamɩyɛ yɔɔ yɔ; nɛ pakaɣ caɣʋ kʋñɔwiye ɛ-yɔɔ kpem ɛzɩ pacakʋʋ kʋñɔwiye pɩyalʋ kajalaɣ tʋ yɔɔ yɔ. 11 Pakaɣ wiu puwiye kpem Yeruzalɛm ɛzɩ pewiu Hadadrimɔɔnɩ, Megido Fɛɛʋ+ taa yɔ. 12 Nɛ ɛjaɖɛ kaɣ wiu, paa hɔʋ ŋgʋ nɛ ki-nɖeke; Daviid cejewiye nɛ ɖi-nɖeke, pa-halaa nɛ pe-nɖeke; Naataanɩ+ cejewiye nɛ ɖi-nɖeke, pa-halaa nɛ pe-nɖeke; 13 Leevi+ cejewiye nɛ ɖi-nɖeke, pa-halaa nɛ pe-nɖeke; Simeyii mba+ hɔʋ nɛ ki-nɖeke, pa-halaa nɛ pe-nɖeke; 14 nɛ hɔŋ weyi payɩ pɩkazaa yɔ, paa ŋgʋ lɛ nɛ ki-nɖeke, nɛ pa-halaa nɛ pe-nɖeke.
13 «Puwiye lɛ, pakaɣ huyuu lɩm lɔkɔ nakʋyʋ Daviid ɖɩɣa nɛ mba pɛwɛ Yeruzalɛm yɔ, se pahɩzɩnɩ pa-kɩwɛɛkɩm nɛ pa-azuluma.+
2 «Puwiye lɛ, mankaɣ hɩzʋʋ sɩʋ kpelisi hɩla ɛjaɖɛ taa,+ nɛ paakaɣ tasʋʋ sɩ-yɔɔ tɔzʋʋ; nɛ mankaɣ hazʋʋ nayaa+ nɛ azuluma fezuu ɛjaɖɛ taa, yoyaa tɛ Yehowa yɔɔdʋʋna. 3 Nɛ ye pɩlaba se nɔɔyʋ tasɩɣ yɔɔdʋʋ natʋ tɔm yɔ, ɛ-caa nɛ e-ɖoo, mba palʋlɩ-ɩ yɔ pakaɣ-ɩ heyuu se: “Ŋŋkaɣ wezuu caɣʋ, mbʋ pʋyɔɔ yɔ ŋyɔɔdɩ cɛtɩm tɔm Yehowa hɩɖɛ taa.” Nɛ ɛ-caa nɛ e-ɖoo, mba palʋlɩ-ɩ yɔ pakaɣ-ɩ tʋlʋʋ pɔʋ* mbʋ pʋyɔɔ yɔ ɛyɔɔdʋʋ natʋ tɔm.+
4 «Paa nayʋ weyi lɛ, fɛyɛ kaɣ-ɩ kpaʋ nɛ ɛ-natʋ puwiye, alɩwaatʋ ndʋ ɛyɔɔdʋʋ natʋ tɔm yɔ; nɛ nayaa ɩɩkaɣ tasʋʋ suu tokonaa mba palabɩ-wɛ nɛ kpɩna hʋndʋ yɔ*+ se pepeɣzi ɛyaa. 5 Nɛ paa nayʋ weyi lɛ ɛkaɣ yɔɔdʋʋ se: “Mantɩkɛ nayʋ. Haɖʋ mɛnkɛnaa,* mbʋ pʋyɔɔ yɔ abalʋ nɔɔyʋ yabɩ-m alɩwaatʋ ndʋ maakɛ evebu yɔ.” 6 Nɛ ye nɔɔyʋ ɛpɔzɩ-ɩ se: “Heŋ weyi lɛ mbʋ yɔ ña-hazasɩ hɛkʋ taa?”* yɔ, ɛkaɣ cosuu se: “Man-taabalaa* ɖɩɣa taa paɖʋ-m heŋ ɛnɩ.”»
7 «Oo laɣɖɛ, kʋyɩ nɛ ŋkaɖɩnɩ me-ninɖiɣyu,+
Kaɖɩnɩ abalʋ weyi ɛkɛ mɛ-ɛgbaɣdʋ yɔ.
Lo ninɖiɣyu,+ nɛ ŋyele nɛ heŋ* mɩzɩ ɖama;+
Nɛ mankaɣ me-nesi kpazʋʋ mba patɩlɩɩ pʋyʋ yɔ pɔ-yɔɔ,» yoyaa tɛ Yehowa yɔɔdʋʋna.
8 «Nɛ ɛjaɖɛ kpeekpe taa lɛ,
Ðɩ-taa ɛyaa hɔɔlɩŋ 3 yɔɔ lɛ, pakaɣ sɛtʋʋ hɔɔlɩŋ 2 nɛ ɩsɩ;*
Nɛ hɔɔlʋʋ tozo ñɩŋgʋ pɩkaɣ kazʋʋ ɖɩ-taa; Yehowa yɔɔdʋʋna.
9 Nɛ mankaɣ yebu nɛ hɔɔlʋʋ tozo ñɩŋgʋ tɩŋnɩ miŋ taa;
Nɛ mankaɣ-wɛ kelisuu ɛzɩ pekelisuu liidiye yɔ,
Nɛ mankaɣ-wɛ takʋʋ nɛ mana ɛzɩ patakʋʋ sika yɔ.+
Pakaɣ ma-hɩɖɛ yaʋ,
Nɛ mankaɣ-wɛ cosuu.
Mankaɣ yɔɔdʋʋ se: “Pɛkɛ man-samaɣ,”+
Nɛ paba kaɣ yɔɔdʋʋ se: “Yehowa kɛnɩ ɖɛ-Ɛsɔ.”»
14 «Na! Kɩyakʋ nakʋyʋ ɖiɣni kɔm, kɩkɛ Yehowa kɩyakʋ, nɛ alɩwaatʋ ndʋ lɛ, pakaɣ tayʋʋ ño-wondu* ndʋ palazaa yɔ ñɛ-hɛkʋ taa. 2 Mankaɣ kpeɣluu ajɛɛ tɩŋa se ayooni Yeruzalɛm; pakaɣ mʋʋ tɛtʋ, pakaɣ lazʋʋ ɖɩsɩ nɛ pakaɣ kpaʋ halaa nɛ ɖoŋ nɛ pasʋʋnɩ-wɛ. Nɛ tɛtʋ hɔɔlʋʋ kʋɖʋmʋʋ kaɣ ɖɛʋ yomiye taa, ɛlɛ ɛyaa hɔɔlʋʋ ŋgʋ pɩkazɩɣ yɔ, paakaɣ-wɛ lɩzʋʋ* tɛtʋ taa.
3 «Yehowa kaɣ lɩʋ nɛ eyooni ajɛɛ ana+ ɛzɩ ɛlakʋʋ you, you kɩyakʋ wiye yɔ.+ 4 Puwiye lɛ, ɛ-nɩŋgbanzɩ kaɣ sɩŋʋʋ Oliivi Pʋʋ yɔɔ,+ ŋgʋ kɩha ɛsa nɛ Yeruzalɛm yɔ, wɩsɩ ɖɩlɩyɛ taa kiŋ; nɛ Oliivi Pʋʋ kaɣ tayʋʋ nabʋlɛ taa, kpaɣnɩ wɩsɩ ɖɩlɩyɛ nɛ piwolo wɩsɩ ɖɩɖʋyɛ,* nɛ pɩpɩsɩ fɛɛʋ sɔsɔʋ kpem; nɛ pʋʋ hɔɔlʋʋ kʋɖʋmʋʋ kaɣ ɖɛʋ nɛ hayo kiŋ nɛ hɔɔlʋʋ lɛɛkʋ ɖɛɛnɩ hadɛ kiŋ. 5 Ɩkaɣ seu se iwolo man-pʋŋ fɛɛʋ taa, mbʋ pʋyɔɔ yɔ pʋŋ fɛɛʋ kaɣ walʋʋ nɛ kɩtalɩ Azɛɛlɩ. Pɩkaɣ pɔzʋʋ se ise nɛ ɩɖɛɛ ɛzɩ iiseu alɩwaatʋ ndʋ tɛtʋ ñamsɩ Yuuda wiyaʋ Uziya alɩwaatʋ taa yɔ.+ Nɛ mɛ-Ɛsɔ Yehowa kaɣ kɔm, ɛ nɛ mba payɩ pɛkɛ kiɖeɖema yɔ.+
6 «Puwiye lɛ, ñalɩmɩyɛ nɖɩ ɖɩmʋ ñɩm yɔ ɖɩɩkaɣ wɛʋ;+ wondu kaɣ kiu ɛzɩ ɖɔmbɛɛ yɔ.* 7 Nɛ pɩkaɣ kɛʋ kɩyakʋ ŋgʋ pasɩm-kʋ se kɩkɛ Yehowa ñɩŋgʋ yɔ.+ Tɛʋ ɛɛkaɣ fem nɛ ɖoo ɛɛkaɣ yuu; nɛ ñalɩmɩyɛ kaɣ wɛʋ ɖanaɣ yɔɔ. 8 Puwiye lɛ, wezuu lɩm+ kaɣ lɩnʋʋ Yeruzalɛm nɛ pikpe;+ pɩ-hɔɔlʋʋ kaɣ ɖɛnʋʋ wɩsɩ ɖɩlɩyɛ taa teŋgu* taa kiŋ,+ nɛ pɩ-hɔɔlʋʋ lɛɛkʋ ɖɛɛnɩ wɩsɩ ɖɩɖʋyɛ taa teŋgu* taa kiŋ.+ Pɩkaɣ labʋ mbʋ soŋaɣ nɛ nikaɣ alɩwaatʋ taa. 9 Nɛ Yehowa kaɣ kɛʋ Wiyaʋ tɛtʋ kpeekpe yɔɔ.+ Nɛ puwiye lɛ, Yehowa kaɣ kɛʋ kʋɖʋm,+ nɛ ɛ-hɩɖɛ kɛ kʋɖʋmɖɩyɛ.+
10 «Ɛjaɖɛ kpeekpe kaɣ pɩsʋʋ ɛzɩ Araabaa+ yɔ, kpaɣnɩ Geba+ nɛ piwolo Rimɔɔnɩ,+ Yeruzalɛm hadɛ kiŋ; nɛ Yeruzalɛm kaɣ kʋyʋʋ, nɛ ɛyaa kaɣ caɣʋ kɩ-taa ki-lone taa,+ kpaɣnɩ Bɛnjamɛɛ Nɔnɔɔ+ nɛ piwolo Kajalaɣ Nɔnɔɔ lone taa, nɛ piwolo pɩtalɩ Kɔna taa Nɔnɔɔ, nɛ kpaɣnɩ Hananɛlɩ Tilimiye+ nɛ piwolo wiyaʋ viiñi pee ɖɩfɛyɩyɛ. 11 Nɛ ɛyaa kaɣ caɣʋ peeɖe; nɛ paakaɣ tasʋʋ lɔʋ kɩ-yɔɔ ɖɩzʋʋ nɔɔ,+ nɛ ɛyaa kaɣ wɛʋ Yeruzalɛm, pɛɛyɛ taa.+
12 «Nɛ kigiluu kʋnɛ Yehowa kaɣ hɔmnʋʋ samasɩ nzɩ siyouni Yeruzalɛm yɔ sɩ-tɩŋa sɩ-nɩŋgbaŋʋʋ:+ Po-tomnasɩ kaɣ ɖazʋʋ ŋgʋ pasɩŋ pa-nɩŋgbanzɩ yɔɔ, pɛ-ɛsa kaɣ ɖazʋʋ a-pɔŋ taa, nɛ pa-nzʋlʋma kaɣ ɖazʋʋ pɔ-nɔsɩ taa.
13 «Puwiye lɛ, Yehowa kaɣ yebu nɛ sɔɔndʋ kpa pe-kpeekpe; nɛ paa weyi lɛ, ɛkaɣ ɖɔkʋʋ ɛ-taabalʋ nesi, nɛ e-nesi kaɣ yonuu ɛ-taabalʋ nesi.*+ 14 Yuuda ɖɔɖɔ kaɣ wɛʋ you taa Yeruzalɛm; nɛ pakaɣ kpeɣluu ajɛɛ wena awɛ kɩ-cɔlɔ kpɛɛɛ yɔ a-tɩŋa a-ñɩm; sika nɛ liidiye nɛ tokonaa sakɩyɛ.+
15 «Nɛ kigiluu ŋgʋ, kɩ-ɖɔndɩ ɖɔɖɔ kaɣ kɔm kpaŋnaŋ yɔɔ, kpaŋasɩ sɔsɔsɩ yɔɔ, aɖaaɖaanaa yɔɔ, kpaŋasɩ cikpesi yɔɔ nɛ kpɩna wena payɩ awɛ koyindinaa pɩlɩŋ taa yɔ a-yɔɔ.
16 «Ajɛɛ wena payɩ akɔm Yeruzalɛm wayɩ yɔ, a-taa mba payɩ pɩkazɩɣ yɔ, paa pɩnaɣ ŋga lɛ,+ pakaɣ kpaʋ nɛ poluŋ* Wiyaʋ tɛɛ, yoyaa tɛ Yehowa tɛɛ,+ nɛ pɔtɔɔ Coka* Kazandʋ.+ 17 Ɛlɛ ye tɛtʋ yɔɔ hɔʋ nakʋyʋ taa tʋ nɔɔyʋ ɛtɩkpa Yeruzalɛm se eluŋ Wiyaʋ tɛɛ, yoyaa tɛ Yehowa tɛɛ yɔ, ɛɛkaɣ hiɣu tɛʋ.+ 18 Nɛ ye Ejipiti mba* ɩtɩkpa, nɛ patɩsʋʋ* tɛtʋ taa yɔ, paakaɣ hiɣu tɛʋ. Ɛlɛ kigiluu kaɣ-wɛ talʋʋ, kigiluu ŋgʋ Yehowa hɔŋnɩ ajɛɛ wena atɩkpa se atɔɔ Coka Kazandʋ yɔ a-nɩŋgbaŋʋʋ yɔ. 19 Pʋnɛ pakaɣ hɔmnʋʋ Ejipiti nɛ ajɛɛ wena payɩ atɩkpa se atɔɔ Coka Kazandʋ yɔ a-nɩŋgbaŋʋʋ a-kɩwɛɛkɩm yɔɔ.
20 «Puwiye lɛ, pakaɣ maʋ tɔm pee “Yehowa tɩnɩ kele kele wɛtʋ!”+ kpaŋnaŋ agaŋgala yɔɔ. Nɛ Yehowa ɖɩɣa taa ɖeɣsi*+ kaɣ wɛʋ ɛzɩ ñanzɩ+ nzɩ sɩwɛ altaaru ɛsɩndaa yɔ. 21 Nɛ Yeruzalɛm nɛ Yuuda ɖeɣsi* tɩŋa kaɣ wɛʋ kele kele, nɛ sɩkaɣ kɛʋ yoyaa tɛ Yehowa ñɩnzɩ, nɛ mba payɩ palaɣ kɩlaŋ yɔ, pakaɣ sʋʋ nɛ patɩzɩ sɩ-taa nasɩyɩ taa. Nɛ puwiye lɛ, Kanaŋ tʋ* nɔɔyʋ ɛɛkaɣ tasʋʋ wɛʋ yoyaa tɛ Yehowa ɖɩɣa taa.»+
Pʋ-tɔbʋʋ se «Yehowa tɔzaa.»
Yaa «Ɩtaapɩsɩ.»
Yaa «ɩha siɣye.»
Cɔnɩ Tɔm kɩsɔzɩtʋ B15.
Yaa «paɖʋ hɩŋ.»
Piye piye, «samtʋ wayɩ lɛ.»
Yaa «Ɛyaa.»
Yaa «tokonaa kɩɖaɣlaa mba pacanɩ-wɛ yɔ.»
Yaa «ŋkaɣ feŋuu.»
Yaa «ɛ-cɔlɔ tʋ.»
Yaa «kɛdɛɛŋa.»
Yaa «Anim wondu cikpetu alɩwaatʋ?»
Yaa «pʋlɔŋ nimaɣ,» pɩkɛ nimaɣ ŋga posusuu kɔ-nɔɔ yɔɔ wonuu yuŋ ñɩŋgʋ nakʋyʋ ɛzɩ ñɩɣyʋʋ yaa pɩyɛ mbʋ yɔ nɛ kawɩlɩɣ se nabʋyʋ tʋʋzɩ camɩyɛ kʋkʋyɩŋ taa yɔ.
Pɩpɩzɩɣ pɩkɛ, «Ɛsa ana.»
Pʋ-tɔbʋʋ se pilinzi nzɩ sɩlʋlɩ pee nɛ sisusi yɔ.
Nuŋgoloŋa kʋɖʋmaɣ kɛ santimɛtawaa 44 nɛ hɔɔlʋʋ (santimɛtawaa 44,5). Cɔnɩ Tɔm kɩsɔzɩtʋ B14.
Piye piye, «Efa,» cɩnɛ lɛ, pɩkɛ kɩmaɣzʋʋ yaa ɖɔkʋ ŋgʋ kɩmaɣnɩ efa kʋɖʋmʋʋ yɔ. Efa kʋɖʋmʋʋ kɛ litrinaa 22. Cɔnɩ Tɔm kɩsɔzɩtʋ B14.
Yaa «ñɩɣtʋ ndʋ payaɣ se pʋlɔŋ yɔ.»
Pʋ-tɔbʋʋ se Babilɔɔnɩya.
Kɛɛkɛɛ pɔtɔŋ.
Yaa «awiya hulaɣ sɔsɔɔ.»
Pʋ-tɔbʋʋ se e-kewiyitu tɔɔʋ nɛ ɛ-cɔjɔtʋ tʋmɩyɛ hɛkʋ taa.
Yaa «awiya hulaɣ sɔsɔɔ.»
Cɔnɩ Tɔm kɩsɔzɩtʋ B15.
Yaa «templo.»
Yaa «soliɣa.»
Ebree tɔm piye nɖɩ palabɩnɩ tʋmɩyɛ yɔ, ɖɩpɩzɩɣ ɖɩkɛ kaaʋ ŋgʋ payaɣ se diyaamaa, yaa kaaʋ ŋgʋ payaɣ se emeri yɔ, yaa kaaʋ ɖoŋ ñɩŋgʋ nakʋyʋ.
Yaa «wɩlɩtʋ.»
Piye piye, «ɛɛya-wɛ.»
Yaa «siɣsiɣ wɛtʋ.»
Piye piye, «mbʋ pʋyɔɔ yɔ ɛ-kɩyakɩŋ ɖɔwa.»
Yaa «Iyele nɛ mi-nesi kpa ɖoŋ.»
Yaa «Iyele nɛ mi-nesi kpa ɖoŋ.»
Yaa «nɛ mantikpiɖi.»
Piye piye, «abalʋ Yuuda tʋ.»
Yaa «toko nɔɔ.»
Piye piye, «Nɛ Damaasɩ kɛnɩ tɩ-ɖɩhɛzɩyɛ.»
Pɩpɩzɩɣ pɩkɛ, «Hadraakɩ ɛjaɖɛ» yaa «Damaasɩ.»
Yaa «ma kɩ-tɩ lone ɖoŋ ñɩnɖɛ.»
Pɩpɩzɩɣ pɩkɛ, «teŋgu yɔɔ.»
Yaa «cɛɛkɩ.» Cejewiye ñʋʋdʋ payaɣaɣ se cɛɛkɩ.
Yaa «ɛzɩ sɔɔjanaa tikaɣ ŋga kefeŋiɣ yɔ.»
Yaa «Nɛ ɛyaa nazɩyʋ.»
Pɩtʋʋ fɛyɩ se ɛ-samaɣ kʋñɔŋ ɛnawa.
Yaa «nɛ ɛkɛ waɖʋ; nɛ payabɩ ɛ-ñʋʋ.»
Yaa «kpaŋaɣ abalɩñɩŋga.»
Pʋ-tɔbʋʋ se Efraatɩ.
Piye piye, «Mankaɣ ñɩɣʋ nɩŋgbaŋaɣ.»
Pʋ-tɔbʋʋ se ɛzɩ tɔʋ ñɩmɩyɛ yɔ.
Yaa «awiya hulaɣ ŋga kɔ-yɔɔ wɛ ñɩɣlɩm pɛɛ yɔ.»
Wayɩ wayɩ tɛŋ paɣzaɣ Ðomaɣ fenaɣ hɛkʋ taa mbʋ yɔ. Cɔnɩ Tɔm kɩsɔzɩtʋ B15.
Yaa «hɔʋ ɛsɔnaa.» Piye piye, «terafim.»
Yaa «yɔɔdɩ kawɩlasɩ tɔm; yɔɔdɩ tɔm ndʋ ɛyʋ ɛɛpɩzɩɣ nɛ ɛnɩɩ tɩ-taa yɔ.»
Piye piye, «mankaɣ pɔzʋʋ akɔnta tuliŋ.»
Piye piye, «kʋlɔmʋʋ taa tilimiye,» pɩkɛ tɔm ndʋ palakɩnɩ tʋmɩyɛ nɛ pɩwɩlɩɣ abalʋ weyi ɛmʋ ñɩm yaa ɛ-tɔm cɛyaa yɔ; wiyaʋ.
Piye piye, «kaŋgamaɣ,» pɩkɛ tɔm ndʋ palakɩnɩ tʋmɩyɛ nɛ pɩwɩlɩɣ ɛyʋ weyi eteɣliɣ yɔ; ñʋʋdʋ.
Yaa «ɖaɣnʋʋ caɣʋ wezuu.»
Yaa «Basaanɩ sɛɛnɩ tɩŋ.»
Yaa «Mʋʋzɩŋ weyi ɩwɛnɩ kpɛm i-pondona yɔɔ yɔ.»
Yaa «ɛ-cɔlɔ tʋ.»
Yaa «man-kalɩzaɣ taatasɩ.»
Yaa «pa-kalɩzaɣ paɖaɣ-m.»
Piye piye, «pamaɣzɩ-m.»
Piye piye, «kaɣ yuu cɩkpɛndʋʋ.»
Yaa «ñanaɣ.»
Yaa «cɛɛkɩwaa.» Cejewe ñʋndɩnaa payaɣaɣ mbʋ.
Yaa «cɛɛkɩwaa.»
Pɩkɛnɩ ɖaʋ ŋgʋ ɖoŋ ɖoŋ lɛ pɔɖɔkʋʋ-kʋ nesi taa nɛ paɖʋʋ miŋ kɩ-nɔɔ taa yɔ.
Yaa «ki-lone nɖɩ ɖɩmʋnaa yɔ ɖɩ-taa.»
Yaa «kajʋka.»
Yaa «pa-kajʋka.»
Yaa «weyi ɛkɛɣ ɛjam.»
Yaa «pakaɣ-ɩ sɔbʋ laɣɖɛ.»
Yaa «tokonaa mba nayaa suu nɛ palabɩ-wɛ nɛ kpɩna hʋndʋ yɔ.»
Piye piye, «Abalʋ weyi ɛhayɩɣ tɛtʋ yɔ mɛnkɛnaa.»
Piye piye, «ñe-nesi hɛkʋ taa?» Pʋ-tɔbʋʋ se laŋɩyɛ taa yaa siɣye taa.
Yaa «Mba pɔsɔɔlɩ-m yɔ.»
Piye piye, «ewiɖe.»
Yaa «ɩɖɩ.»
Tɛtʋ ndʋ pɔyɔɔdɩ tɩ-tɔm kalɩtʋ 2 taa yɔ ti-wondu.
Piye piye, «sɛtʋʋ.»
Piye piye, «piwolo teŋgu.»
Yaa «wondu kaɣ wɛʋ ti-ɖeɖe,» ɛzɩ nikaɣ kpaʋ wondu nɛ tikiɣ yɔ.
Pʋ-tɔbʋʋ se Teŋgu Kɩsɩbʋʋ.
Pʋ-tɔbʋʋ se Mediiteraanee Teŋgu.
Yaa «nɛ abalʋ kaɣ yonuu abalʋ lɛlʋ.»
Yaa «pɛsɛɛ.»
Yaa «Ðɩjɔzɩyɛ lona wena pesiki nɛ pʋwayɩ lɛ pɛkpɛzɩ-yɛ yɔ.»
Piye piye, «hɔʋ.»
Yaa «patiwolo.»
Yaa «ɖeɣsi nzɩ sɩ-nɔsɩ walaa yɔ.»
Yaa «ɖeɣsi nzɩ sɩ-nɔsɩ walaa yɔ.»
Pɩpɩzɩɣ pɩkɛ, «tadɩyɛ laɖʋ.»