NATƲ NDƲ PAWƖLƖ YOHANƐƐSƖ YƆ
1 Natʋ* ndʋ tɩ-yɔɔ Yesu Krɩstʋ kulaa yɔ, ndʋ Ɛsɔ cɛlɩ-ɩ+ se ɛwɩlɩ e-yomaa+ mbʋ pɩkazɩ pazɩ lɛ, pɩwɛɛ se pɩla yɔ. Nɛ etiyi e-tiyiyu nɛ ɛtɩŋnɩ ɛ-yɔɔ nɛ ɛwɩlɩ-tʋ e-yom Yohanɛɛsɩ pɩtɩŋnɩ yʋsasɩ yɔɔ,+ 2 Yohanɛɛsɩ weyi ɛlɩzɩ aseɣɖe tɔm ndʋ Ɛsɔ cɛlaa nɛ aseɣɖe nɖɩ Yesu Krɩstʋ lɩzaa yɔ pɔ-yɔɔ yɔ, ɛɛɛ, ɛlɩzɩ aseɣɖe mbʋ payɩ ɛnawa yɔ pɩ-yɔɔ. 3 Koboyaɣ tʋ lɛ weyi ɛkalɩɣ natʋ tɔm tʋnɛ nɛ nɔɔ kɩkʋyaɣ yɔ nɛ mba pewelisiɣ-tʋ nɛ pɔɖɔŋ tɔm ndʋ pama tɩ-taa yɔ tɩ-yɔɔ yɔ,+ mbʋ pʋyɔɔ yɔ alɩwaatʋ ndʋ paɖʋwa yɔ tɩñɔtaa.
4 Ma Yohanɛɛsɩ mamaɣnɩ takayaɣ kanɛ agbaa + wena awɛ Aazii egeetiye taa yɔ:
Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ «Weyi ɛwɛɛ nɛ weyi ɛɛwɛɛ nɛ weyi eɖiɣni kɔm yɔ»+ ɛ-cɔlɔ yɔ, nɛ nɖɩ ɖɩlɩnɩ feziŋ + weyi ɩwɛ e-kewiyaɣ kpelaɣ ɛsɩndaa yɔ ɩ-cɔlɔ yɔ, 5 nɛ nɖɩ ɖɩlɩnɩ Yesu Krɩstʋ, weyi ɛkɛ Aseɣɖe tʋ siɣsiɣ tʋ,+ sɩɖaa taa kajalaɣ pɩɣa+ nɛ tɛtʋ yɔɔ awiya Ñʋʋdʋ+ yɔ ɛ-cɔlɔ yɔ.
Ɛnʋ weyi ɛsɔɔlɩ-ɖʋ+ nɛ ɛtɩŋnɩ ɛ-maɣmaɣ ɛ-calɩm yɔɔ nɛ eholi-ɖʋ ɖa-kɩwɛɛkɩm taa yɔ+— 6 nɛ ɛlabɩ-ɖʋ se ɖɩkɛ kewiyaɣ+ nakɛyɛ, nɛ cɔjɔnaa+ se ɖɩɖʋ ɛ-Caa Ɛsɔ lɩm—ɛɛɛ, ɛnʋ tɩnɩ samtʋ nɛ ɖoŋ tam tam. Amɛn.
7 Ɩna! Eɖiɣni kɔm nɛ ɛsɔmɩndʋ,+ nɛ paa ɛsɩyɛ nɖɩ lɛ ɖɩkaɣ-ɩ naʋ, pɩkpɛndɩnɩ mba paasɔbɩ-ɩ kɩgbɛzɛŋ yɔ; nɛ ɛ-yɔɔ lɛ, tɛtʋ yɔɔ cejewe kpeekpe kaɣ nɩʋ siziŋ nɛ ama a-laŋa taa.+ Ɛɛɛ, Amɛn.
8 «Mɛkɛnɩ Alɩfaa nɛ Omega,*+ Weyi ɛwɛɛ nɛ weyi ɛɛwɛɛ nɛ weyi eɖiɣni kɔm yɔ, Ðoŋ Tɩŋa Tʋ;+ Yehowa* Ɛsɔ yɔɔdʋʋna.»
9 Ma Yohanɛɛsɩ, mi-koobu nɛ weyi mɩ nɛ ɩ ɩka kʋñɔŋ+ nɛ kewiyaɣ+ nɛ laŋɩyɛ ɖɔkʋʋ+ ɖa nɛ Yesu ɖɔ-nɔɔ kʋɖʋmaɣ labʋ taa yɔ;+ maawɛ lɩm hɛkʋ taa tɛtʋ ndʋ payaɣ se Patɩmoosɩ yɔ tɩ-taa, mbʋ pʋyɔɔ yɔ mɔyɔɔdaɣ Ɛsɔ tɔm nɛ malɩzɩɣ aseɣɖe Yesu yɔɔ. 10 Pɩtɩŋnɩ fezuu yɔɔ lɛ, mana man-tɩ Kɩbaɣlʋ kɩyakʋ wiye, nɛ manɩɩ nɔɔ ɖoŋ ñɩŋga nakɛyɛ ma-wayɩ, kewiɣ ɛzɩ ɛgandɩyɛ yɔ, 11 kɔtɔŋaɣ se: «Mbʋ ŋnaɣ yɔ, ma-pʋ takayaɣ kikpiyaɣ nakɛyɛ taa nɛ ŋtiyini-kɛ agbaa 7 wena awɛ Efɛɛzɩ,+ Simiirɩnɩ,+ Pɛɛrɩgam,+ Tiyaatiiri,+ Saardɩ,+ Filaadɛlɩfii+ nɛ Lawodisee+ yɔ.»
12 Menkisi se mana se awɛɛ nɛ ɛyɔɔdʋʋnɩ-m; nɛ menkisaa lɛ, mana sika kanɖʋnaa ɖɩzɩyɛ lʋbɛ,+ 13 nɛ mana nɔɔyʋ kanɖʋnaa ɖɩzɩyɛ hɛkʋ taa, ɛwɛ ɛzɩ ɛyʋ pɩyalʋ+ yɔ, esu toko ŋgʋ kitibi ɖooo ɛ-nɩŋgbanzɩ tɛɛ yɔ nɛ ɛta sika kɩtamʋʋ nakʋyʋ ɛ-laŋɩyɛ taa. 14 Pɩtasɩ lɛ, ɛ-ñʋʋ nɛ ɛ-ñɔsɩ pahʋlʋmaa ɛzɩ heŋ hʋndʋ kʋhʋlʋmʋtʋ yɔ, ɛzɩ ɖɔmbɛɛ yɔ; nɛ ɛ-ɛsa wɛɛ ɛzɩ miŋ weyi ɩmʋʋ pelu pelu yɔ,+ 15 nɛ ɛ-nɩŋgbanzɩ wɛ ɛzɩ ñɩɣyʋʋ kɩsɛɛmʋʋ kɩbaŋʋ+ alɩwaatʋ ndʋ kɩsɛ cɩɩɩ miŋ momoɖe taa yɔ, nɛ ɛ-nɔɔ tiliɣ ɛzɩ lɩm sakɩyɛ falʋʋ yɔ. 16 Nɛ tɩɩnzɩ 7 wɛ e-nesi kɩbanzɩ taa,+ nɛ laɣɖɛ naɖɩyɛ lɩɣnɩ ɛ-nɔɔ taa, ɖɩɖaɣlaa nɛ pɛsɛyɩ-ɖɩ nɛ ɖɩwɛɛ lɔŋ ceemenje,+ nɛ ɛ-ɛsɩndaa wɛɛ ɛzɩ wɩsɩ alɩwaatʋ ndʋ sɩñakɩ siŋŋ yɔ.+ 17 Mana-ɩ lɛ, mɔntɔlɩ ɛ-nɩŋgbanzɩ tɛɛ ɛzɩ mansɩba yɔ.
Nɛ ɛtɩnɩ e-nesi kɩbanzɩ mɔ-yɔɔ nɛ ɛyɔɔdɩ se: «Sɔɔndʋ ɛtaakpa-ŋ. Mɛkɛnɩ Kajalaɣ Tʋ+ nɛ Kɛdɛzaɣ Tʋ,+ 18 nɛ ɛsadʋ,+ nɛ maasɩba,+ ɛlɛ na, mɛwɛ wezuu tam,+ nɛ mɛwɛnɩ sɩm nɛ Pɩlaʋ* ñɩma.+ 19 Pʋyɔɔ lɛ, ma mbʋ ŋnawa yɔ, mbʋ pɩwɛɛ yɔ, nɛ mbʋ pɩkaɣ labʋ pʋwayɩ yɔ. 20 Piyele nɛ tɩɩnzɩ 7 nzɩ ŋna me-nesi kɩbanzɩ taa nɛ sika kanɖʋnaa ɖɩzɩyɛ 7 yɔ, pɔ-yɔɔ mɛsaɣ tɛɛ tɔm kiɖeɖetu yɔ: Tɩɩnzɩ 7 nzɩ sɩsɩŋnɩ agbaa 7 tɛ Ɛsɔ tiyiyaa, nɛ kanɖʋnaa ɖɩzɩyɛ 7 ñasɩŋnɩ agbaa 7.+
2 «Ɛsɔ tiyiyu+ weyi ɛwɛ Efɛɛzɩ+ ɛgbɛyɛ taa yɔ, ma-ɩ se: Weyi ɛɖɔkɩ tɩɩnzɩ 7 e-nesi kɩbanzɩ taa nɛ ɛɖɔŋ sika kanɖʋnaa ɖɩzɩyɛ 7+ hɛkʋ taa yɔ, tɔm tʋnɛ ɛyɔɔdʋʋ: 2 “Mansɩm ña-lakasɩ, nɛ ña-tʋmɩyɛ ɖoŋ ñɩnɖɛ, nɛ ña-laŋɩyɛ ɖɔkʋʋ, nɛ manawa se ŋŋpɩzɩɣ nɛ ŋkatɩ ɛyaa kɩdɛkɛdaa, nɛ manawa ɖɔɖɔ se ŋtakɩ mba pɔtɔŋ se pɛkɛ apostoloowaa,+ ɛlɛ patɩkɛ yɔ, nɛ ŋna se pɛkɛ cɛtɩyaa. 3 Ŋɖiɣni ña-laŋɩyɛ ɖɔkʋʋ ɖɔɖɔ, nɛ ŋɖɔkɩ ña-tɩ kpam ma-hɩɖɛ yɔɔ+ nɛ pɩtɩnɩ-ŋ.+ 4 Paa mbʋ yɔ, man-taa wɛnɩ-ŋ nɛ tɔm tʋnɛ: ndʋ lɛ se ŋyebi sɔɔlɩm mbʋ ŋŋwɛnɩ kiɖe tɛɛ yɔ.
5 «“Pʋyɔɔ lɛ, tɔzɩ ɖenɖe ŋlɩnaa nɛ ŋtɔlɩ yɔ pɩ-yɔɔ, nɛ ŋkpiɖi+ nɛ ŋla lakasɩ nzɩ ŋŋlabɩ kiɖe tɛɛ yɔ. Ye ŋtɩla mbʋ yɔ, mankaɣ kɔm ñɔ-cɔlɔ, nɛ mankaɣ kʋsʋʋ ña-kanɖʋnaa ɖɩzɩyɛ+ ɖi-lone taa, ye ŋkpiɖaa yɔ kalɩpiyeke.+ 6 Paa mbʋ yɔ, ŋwɛɛ nɛ ŋlakɩ kɩbandʋ natʋyʋ, ndʋ yɔ: ŋpaɖɩɣ Niikolaa kɩjaʋ yɔɔ ɛgbɛyɛ lakasɩ,+ ma ɖɔɖɔ manpaɖɩɣ lakasɩ nzɩ. 7 Weyi ɛwɛnɩ nɩŋgbaŋʋʋ yɔ, ɛnɩɩ tɔm ndʋ fezuu heyiɣ agbaa yɔ:+ Weyi ɛwakɩ yɔ,+ mankaɣ-ɩ haʋ waɖɛ se ɛtɔɔ wezuu tɩʋ+ ŋgʋ kɩwɛ Ɛsɔ tɛ paradisuu taa yɔ ki-pee.”
8 «Nɛ Ɛsɔ tiyiyu weyi ɛwɛ Simiirɩnɩ ɛgbɛyɛ taa yɔ, ma-ɩ se: “Kajalaɣ Tʋ nɛ Kɛdɛzaɣ Tʋ,”+ weyi ɛɛsɩba nɛ ɛɖaɣnɩ fem yɔ,+ tɔm tʋnɛ ɛyɔɔdʋʋ: 9 “Mansɩm ña-kʋñɔŋ nɛ ña-kʋñɔndʋtʋ—ɛlɛ ŋkɛ ñɩm tʋ+—nɛ mansɩm tɔm kɩdɛkɛdɩtʋ ndʋ mba payaɣ pa-tɩ se Yuuda mba, ŋgʋ patɩkɛ mbʋ toovenim taa yɔ pɔyɔɔdʋʋ yɔ, ɛlɛ pɛkɛ Sataŋ tɛ sinaagɔɔgɩ.+ 10 Sɔɔndʋ ɛtaakpa-ŋ nɛ kʋñɔmɩŋ weyi ŋwɩzɩ tɔɔʋ yɔ.+ Na! Eleeu kaɣ wɛʋ nɛ ɛɖʋʋ mɩ-taa nabɛyɛ salaka se pɩsa nɛ pɩtakɩ-mɩ kiya, nɛ ɩkaɣ tɔɔʋ kʋñɔŋ kɩyakɩŋ 10. Wɩlɩ se ŋwɛ siɣsiɣ, halɩ pɩtalɩ sɩm taa, nɛ mankaɣ-ŋ haʋ wezuu hulaɣ.+ 11 Weyi ɛwɛnɩ nɩŋgbaŋʋʋ yɔ, ɛnɩɩ+ tɔm ndʋ fezuu heyiɣ agbaa yɔ: Weyi ɛwakɩ yɔ,+ sɩm nabʋlɛ ñɩmbʋ ɛɛkaɣ-ɩ labʋ kɩdɛkɛdɩm nabʋyʋ kaaʋ.”+
12 «Ɛsɔ tiyiyu weyi ɛwɛ Pɛɛrɩgam ɛgbɛyɛ taa yɔ, ma-ɩ se: Weyi ɛwɛnɩ laɣɖɛ nɖɩ ɖɩɖaɣlaa nɛ pasayɩ-ɖɩ nɛ ɖɩwɛɛ lɔŋ ceemenje yɔ,+ tɔm tʋnɛ ɛyɔɔdʋʋ: 13 “Mansɩm ɖenɖe ŋwɛɛ yɔ, pʋ-tɔbʋʋ se ɖenɖe Sataŋ kewiyaɣ kpelaɣ wɛɛ yɔ; paa mbʋ yɔ ŋwɛɛ nɛ ŋñɔʋnɩ ma-hɩɖɛ kpam,+ nɛ ŋtɩlɔ tisuu mbʋ ŋwɛnɩ mɔ-yɔɔ yɔ,+ halɩ pɩkpɛndɩnɩ ma-aseɣɖe tʋ siɣsiɣ tʋ+ Antipaasɩ alɩwaatʋ taa, ɛnʋ weyi pakʋ-ɩ+ mɩ-cɔlɔ, ɖenɖe Sataŋ wɛɛ yɔ.
14 «“Paa mbʋ yɔ, man-taa wɛnɩ-ŋ nɛ tɔm natʋyʋ pazɩ, ndʋ yɔ: mba pɔñɔnɩ Baalam wɩlɩtʋ yɔ+ pɛwɛ ñɔ-cɔlɔ, ɛnʋ wɩlɩnɩ Baalaakɩ+ se ɛsɩɩ Izrayɛɛlɩ piya ɛsɩndaa mbʋ pituuluu yɔ, se pɩsa nɛ sɩtɔɔ mbʋ pala sɩɩnaa yɔɔ yɔ nɛ sɩcaɣ kʋzʋʋ kɩdɛkɛdʋʋ* wezuu.+ 15 Mbʋ ɖɔɖɔ mba pɔñɔnɩ Niikolaa kɩjaʋ yɔɔ ɛgbɛyɛ wɩlɩtʋ yɔ+ pɛwɛ ñɔ-cɔlɔ. 16 Ye mbʋ, kpiɖi. Ye ŋtɩla mbʋ yɔ, mɔnkɔŋ ñɔ-cɔlɔ lɛɛ lɛɛ, nɛ mankaɣ-wɛ yonuu nɛ mɔ-nɔɔ taa laɣɖɛ nɖɩ ɖɩɖaɣlaa yɔ.+
17 «“Weyi ɛwɛnɩ nɩŋgbaŋʋʋ yɔ, ɛnɩɩ tɔm ndʋ fezuu heyiɣ agbaa yɔ:+ Weyi ɛwakɩ yɔ,+ mankaɣ-ɩ haʋ maana+ ŋgʋ pɛmɛsaa yɔ pazɩ, nɛ mankaɣ-ɩ haʋ pɩyɛ kʋhʋlʋmɩyɛ naɖɩyɛ, nɛ pama ɖɩ-yɔɔ hɩɖɛ kɩfaɖɛ nɖɩ nɔɔyʋ ɛɛsɩŋ nɛ pɩtasɩnɩ weyi ɛmʋʋ-ɖɩ yɔ.”
18 «Ɛsɔ tiyiyu weyi ɛwɛ Tiyaatiiri+ ɛgbɛyɛ taa yɔ, ma-ɩ se: Tɔm tʋnɛ Ɛsɔ Pɩyalʋ yɔɔdʋʋ, ɛnʋ weyi ɛ-ɛsa wɛ ɛzɩ miŋ weyi ɩmʋʋ pelu pelu yɔ+ nɛ ɛ-nɩŋgbanzɩ wɛɛ ɛzɩ ñɩɣyʋʋ kɩsɛɛmʋʋ kɩbaŋʋ yɔ:+ 19 “Mansɩm ña-lakasɩ nɛ ñɔ-sɔɔlɩm nɛ ñe-tisuu nɛ ñɛ-Ɛsɔ sɛtʋ tʋmɩyɛ nɛ ña-laŋɩyɛ ɖɔkʋʋ, nɛ manawa se ña-lakasɩ kɛdɛzaɣ ñɩnzɩ kɩlɩ nzɩ ŋŋlabɩ kiɖe tɛɛ yɔ.
20 «“Paa mbʋ yɔ, man-taa wɛnɩ-ŋ nɛ tɔm tʋnɛ, ndʋ lɛ se ŋhaɣ nʋmɔʋ halʋ Yezaabɛɛlɩ,+ weyi ɛyaɣ ɛ-tɩ se nayʋ yɔ, nɛ ɛwɩlɩɣ mo-yomaa nɛ epeɣziɣ-wɛ se pacaɣ kʋzʋʋ kɩdɛkɛdʋʋ* wezuu+ nɛ pɔtɔɔ mbʋ pala sɩɩnaa yɔɔ yɔ. 21 Nɛ maha-ɩ alɩwaatʋ se ekpiɖi, ɛlɛ ɛtɩsɔɔlɩ se ekpiɖi ɛ-kʋzʋʋ kɩdɛkɛdʋʋ* wezuu caɣʋ yɔɔ. 22 Na! Mawɩzɩ-ɩ pɛɖʋʋ kʋdɔŋ kaɖʋ nakʋyʋ yɔɔ, nɛ mba pa nɛ ɩ palakɩ acɛyɛ yɔ, ye patikpiɖi lakasɩ nzɩ sɩwɛ ɛzɩ ɛ-ñɩnzɩ yɔ sɩ-yɔɔ yɔ, manɖʋʋ-wɛ kʋñɔŋ sɔsɔʋ taa. 23 Nɛ mankaɣ tɩŋnʋʋ kʋdɔŋ ŋgʋ kɩhaɣ sɩm yɔ kɩ-yɔɔ nɛ mankʋ e-piya, se pɩsa nɛ agbaa tɩŋa na se mɛkɛnɩ weyi ɛtazɩɣ lɩmaɣza cukaŋ ñɩna taa* nɛ laŋa taa yɔ, nɛ mankaɣ hɛyʋʋ mɩ-taa paa weyi lɛ ɛ-lakasɩ yɔɔ.+
24 «“Ɛlɛ, meheyiɣ mɩ mba pɩkazaa nɛ ɩwɛɛ Tiyaatiiri yɔ, mba payɩ paaɖɔŋ wɩlɩtʋ tʋnɛ tɩ-yɔɔ yɔ, mba patɩñɩnɩ se patɩlɩ mbʋ ɛyaa yaɣ se ‘Sataŋ tɔm ndʋ tɩwɛ cukaŋ yɔ’+ se: Maasʋkɩ-mɩ sʋʋtʋ lɛɛtʋ. 25 Ɛlɛ ɩɖɔkɩ mbʋ ɩwɛna yɔ kpam, nɛ pɩkɔɔ nɛ pɩtalɩ alɩwaatʋ ndʋ mɔnkɔŋ yɔ.+ 26 Nɛ weyi ɛwakɩ nɛ ɛɖɔkʋʋ ma-lakasɩ nɛ pɩkɔɔ nɛ pɩtalɩ tɩnaɣ yɔɔ yɔ, mankaɣ-ɩ haʋ ɖoŋ ajɛɛ yɔɔ,+ 27 nɛ ɛkaɣ ɛyaa ɖiyuu nɛ ñɩɣyʋʋ ɖaʋ+ se pɩsa nɛ pɩpɛlɩ-wɛ hɔɔlasɩ hɔɔlasɩ ɛzɩ cʋʋ ñanzɩ yɔ, ɛzɩ man-Caa haʋ-m ɖoŋ yɔ. 28 Nɛ mankaɣ-ɩ haʋ tanaŋ tɛɛ tɩɩŋa.+ 29 Weyi ɛwɛnɩ nɩŋgbaŋʋʋ yɔ, ɛnɩɩ tɔm ndʋ fezuu heyiɣ agbaa yɔ.”
3 «Ɛsɔ tiyiyu weyi ɛwɛ Saardɩ ɛgbɛyɛ taa yɔ, ma-ɩ se: Weyi ɛwɛnɩ Ɛsɔ feziŋ + nɛ tɩɩnzɩ + yɔ, tɔm tʋnɛ ɛyɔɔdʋʋ: “Mansɩm ña-lakasɩ, mansɩm mbʋ se ña-hɩɖɛ sɛwa se ŋwɛ wezuu, ɛlɛ ŋsɩba.+ 2 Feŋ,+ nɛ ŋkpazɩ ɖoŋ mbʋ pɩkazaa nɛ pɩwɩzɩ sɩbʋ yɔ, mbʋ pʋyɔɔ yɔ mantɩna ŋlabɩ ña-tʋma pilim* mɛ-Ɛsɔ ɛsɩndaa. 3 Pʋyɔɔ lɛ, wɛɛ nɛ ŋmaɣzɩɣ* mbʋ ŋmʋwa nɛ tɔm ndʋ ŋnɩwa yɔ tɩ-yɔɔ, nɛ ŋwolo pɩ-yɔɔ nɛ ŋɖɔkɩ-tʋ, nɛ ŋkpiɖi.+ Toovenim taa lɛ, ye ŋtife yɔ, mankaɣ kɔm ɛzɩ mɩlʋ yɔ,+ nɛ ŋŋkaɣ tɩlʋʋ ñɩɣyʋʋ ŋgʋ kɩ-yɔɔ mankaɣ kɔm yɔ kaaʋ.+
4 «“Ɛlɛ ŋwɛnɩ ɛyaa nabɛyɛ pazɩ* Saardɩ, mba patipisi po-tokonaa yɔ;+ nɛ pakaɣ suu tokonaa kʋhʋlʋmaa+ nɛ ma nɛ wɛ ɖɩɖɔ, mbʋ pʋyɔɔ yɔ pamʋnaa. 5 Weyi ɛwakɩ yɔ,+ mbʋ ɛkaɣ suu tokonaa kʋhʋlʋmaa,+ nɛ maakaɣ hɩzʋʋ ɛ-hɩɖɛ wezuu takayaɣ taa kpa;+ ɛlɛ mankaɣ yɔɔdʋʋ kaɣlaa man-Caa nɛ e-tiyiyaa pɛ-ɛsɩndaa se mansɩm ɛ-hɩɖɛ.+ 6 Weyi ɛwɛnɩ nɩŋgbaŋʋʋ yɔ, ɛnɩɩ tɔm ndʋ fezuu heyiɣ agbaa yɔ.”
7 «Ɛsɔ tiyiyu weyi ɛwɛ Filaadɛlɩfii ɛgbɛyɛ taa yɔ, ma-ɩ se: Weyi ɛkɛ kiɖeɖeu yɔ,+ weyi ɛkɛ toovenim tʋ yɔ,+ weyi ɛwɛnɩ Daviid ñɩmɩyɛ yɔ,+ weyi ɛtʋlʋʋ nɛ nɔɔyʋ ɛɛkaɣ pɩzʋʋ nɛ ɛɖɩɣ nɛ ɛɖɩkɩ nɛ nɔɔyʋ ɛɛpɩzɩɣ nɛ ɛtʋlɩ yɔ, tɔm tʋnɛ ɛyɔɔdʋʋ: 8 “Mansɩm ña-lakasɩ—na! Mansɩ ñɛ-ɛsɩndaa nɔnɔɔ ŋga patʋlɩ-kɛ yɔ,+ ŋga nɔɔyʋ ɛɛpɩzɩɣ nɛ ɛɖɩɣ yɔ. Nɛ manawa se ŋwɛnɩ ɖoŋ pazɩ, nɛ ŋɖɔkɩ mɔn-tɔm nɛ ŋtikizi ma-hɩɖɛ. 9 Na! Mankaɣ labʋ nɛ mba pɛkɛ Sataŋ tɛ sinaagɔɔgɩ taa mba nɛ pɔtɔŋ se pɛkɛ Yuuda mba, ŋgʋ patɩkɛ mbʋ,+ ɛlɛ pɛcɛtɩɣ yɔ—na! Mankaɣ labʋ nɛ pɔkɔɔ nɛ poluŋ* ña-nɩŋgbanzɩ tɛɛ nɛ malakɩ nɛ patɩlɩ se mɔnsɔɔlɩ-ŋ. 10 Ŋmaɣzɩnɩ ma-laŋɩyɛ ɖɔkʋʋ kɩɖaʋ;+ pʋyɔɔ lɛ, mankaɣ-ŋ ɖɔkʋʋ ɖɔɖɔ takɩm ñɩɣyʋʋ taa,+ ŋgʋ kɩkɔŋ tɛtʋ kpeekpe yɔɔ se kɩtakɩ mba pɛwɛ tɛtʋ yɔɔ yɔ. 11 Menɖiɣni kɔm lɛɛ lɛɛ.+ Wolo pɩ-yɔɔ nɛ ŋɖɔkɩ mbʋ ŋwɛna yɔ kpam, nɛ nɔɔyʋ ɛtaapɩzɩ nɛ ɛmʋ ña-wabɩtʋ hulaɣ.+
12 «“Weyi ɛwakɩ yɔ—mankaɣ-ɩ pɩsʋʋ tilimiye mɛ-Ɛsɔ tɛ templo taa, nɛ ɛɛkaɣ tasʋʋ lɩʋ kɩ-taa kpa; nɛ mankaɣ maʋ ɛ-yɔɔ mɛ-Ɛsɔ hɩɖɛ+ nɛ mɛ-Ɛsɔ tɛtʋ hɩɖɛ, Yeruzalɛm Kɩfalʋʋ+ ŋgʋ kɩlɩnɩ ɛsɔdaa mɛ-Ɛsɔ cɔlɔ nɛ kitiki yɔ, nɛ ma-maɣmaɣ ma-hɩɖɛ kɩfaɖɛ.+ 13 Weyi ɛwɛnɩ nɩŋgbaŋʋʋ yɔ, ɛnɩɩ tɔm ndʋ fezuu heyiɣ agbaa yɔ.”
14 «Ɛsɔ tiyiyu weyi ɛwɛ Lawodisee ɛgbɛyɛ taa yɔ,+ ma-ɩ se: Tɔm tʋnɛ Amɛn+ yɔɔdʋʋ, aseɣɖe tʋ+ siɣsiɣ tʋ nɛ toovenim tʋ,+ Ɛsɔ wondu kɩlɩzɩtʋ ɖɩbazɩyɛ:+ 15 “Mansɩm ña-lakasɩ, mansɩm mbʋ se ŋfɛyɩ nikaɣ nɛ ŋfɛyɩ miŋ ɖɔɖɔ. Me-liu wɛɛ se ŋwɛɛ nikaɣ yaa ŋwɛɛ miŋ. 16 Ye mbʋ, ɛzɩma ŋwɛ tɛlɛmɛɛ nɛ ŋfɛyɩ miŋ+ nɛ ŋfɛyɩ ɖɔɖɔ nikaɣ+ yɔ pʋyɔɔ lɛ, mohokuu-ŋ nɛ mɔntɔnɩ mɔ-nɔɔ. 17 Ŋtɔŋ se: ‘Mɛnkɛ ñɩm tʋ+ nɛ mehiɣ ñɩm nɛ maatɛɖɩɣ nabʋyʋ paa ññɩɩ,’ ɛlɛ ŋŋsɩŋ se ŋwɛ tanɩm taa nɛ ŋwɛ pʋtɔdɩyɛ nɛ ŋkɛ kʋñɔndʋ nɛ yʋlʋm nɛ ŋwɛ ndaakpeɖe; pʋyɔɔ lɛ, 18 mantasɩɣ-ŋ lɔŋ se ŋya mɔn-cɔlɔ sika ŋga pekelisi-kɛ nɛ miŋ yɔ se pɩsa nɛ ŋpɩsɩ ñɩm tʋ, nɛ ŋya mɔn-cɔlɔ tokonaa kʋhʋlʋmaa se pɩsa nɛ ŋsuu nɛ pɩtaana ña-ndaakpeɖe fɛyɛ,+ nɛ ŋya mɔn-cɔlɔ ɛsa kɔyɛ nɛ ŋtaa ñɛ-ɛsa+ se pɩsa nɛ ŋna.+
19 «“Mba payɩ mɔnsɔɔlɩ-wɛ yɔ, menkiziɣni-wɛ tɔm nɛ mansɩɣzɩɣ-wɛ lɔŋ.+ Pʋyɔɔ lɛ, wɛɛ kpekpeka nɛ ŋkpiɖi.+ 20 Na! Mansɩŋ nɔnɔɔ taa nɛ mɔnkɔtʋʋ. Ye nɔɔyʋ ɛnɩ mɔ-nɔɔ nɛ ɛtʋlɩ nɔnɔɔ yɔ, mankaɣ sʋʋ ɛ-ɖɩɣa taa nɛ ɖɩtɔɔ ɖanaɣ tɔɔnaɣ, ma nɛ ɩ nɛ ɛnʋ nɛ ma. 21 Weyi ɛwakɩ yɔ,+ mankaɣ-ɩ haʋ waɖɛ se ma nɛ ɩ ɖɩcaɣ men-kewiyaɣ kpelaɣ yɔɔ,+ ɛzɩ mawabʋ nɛ ma nɛ man-Caa ɖɩcaɣ+ e-kewiyaɣ kpelaɣ yɔɔ yɔ. 22 Weyi ɛwɛnɩ nɩŋgbaŋʋʋ yɔ, ɛnɩɩ tɔm ndʋ fezuu heyiɣ agbaa yɔ.”»
4 Pʋwayɩ lɛ, mana patʋlɩ nɔnɔɔ nakɛyɛ ɛsɔdaa, nɛ kajalaɣ nɔɔ ŋga manɩwa kɛwɛɛ nɛ kɔyɔɔdʋʋnɩ-m yɔ, kewiɣ ɛzɩ ɛgandɩyɛ yɔ; kɔtɔŋaɣ se: «Kpa cɩnɛ, nɛ mankaɣ-ŋ wɩlʋʋ mbʋ pɩwɛɛ se pɩla yɔ.» 2 Pʋwayɩ lɛ, mancaŋ mana man-tɩ fezuu ɖoŋ taa, nɛ kpaagbaa mbʋ lɛ mana kewiyaɣ kpelaɣ nakɛyɛ, kaawɛ ko-lone taa ɛsɔdaa, nɛ nɔɔyʋ kaacaɣ kewiyaɣ kpelaɣ ŋga kɔ-yɔɔ.+ 3 Nɛ Weyi ɛɛcaɣ kɔ-yɔɔ yɔ, ɛ-wɛtʋ kaawɛ ɛzɩ yaasɩpɩ pɩyɛ+ nɛ sarɩdʋwaanɩ pɩyɛ* yɔ, nɛ tɩŋgaɣyʋʋ nakʋyʋ kaacɔ kewiyaɣ kpelaɣ nɛ kɩta, kɩ-wɛtʋ kaawɛ ɛzɩ emeroodi pɩyɛ yɔ.+
4 Kewiyaɣ kpelisi 24 cɔ kewiyaɣ kpelaɣ ŋga nɛ sɩta, nɛ mana ɛzʋtʋyaa 24+ pacaɣ kewiyaɣ kpelisi nzɩ sɩ-yɔɔ, posu tokonaa kʋhʋlʋmaa, nɛ pa-ñʋŋ taa nɛ sika awiya hulasɩ. 5 Tɛʋ ñɩlɩsʋʋ+ nɛ nɔsɩ tiluu nɛ tɛʋ nazʋʋ+ palɩɣaɣnɩ kewiyaɣ kpelaɣ cɔlɔ; nɛ kanɖʋnaa lʋbɛ kaawɛɛ nɛ pamʋʋ kewiyaɣ kpelaɣ ɛsɩndaa, nɛ pasɩŋnɩ Ɛsɔ feziŋ lʋbɛ.+ 6 Nabʋyʋ kaawɛ kewiyaɣ kpelaɣ ɛsɩndaa, pɩnɩɣzɩnɩ teŋgu ŋgʋ kɩwɛ ɛzɩ ñɩnʋʋ yɔ,+ ɛzɩ krisɩtaalɩ pɩyɛ yɔ.
Ɛsadɩnaa + kaawɛ kewiyaɣ kpelaɣ hɛkʋ taa nɛ kewiyaɣ kpelaɣ cɔlɔ kpɛɛɛ, ɛsa kaasu pɔ-yɔɔ ɖo, pɛ-ɛsɩndaa nɛ pa-wayɩ. 7 Ɛsadʋ kajalaɣ ñɩnʋ kaawɛ ɛzɩ mʋʋzʋʋ yɔ,+ nɛ ɛsadʋ 2 ñɩnʋ kaawɛ ɛzɩ nɔ* abalɩñɩnʋ yɔ,+ nɛ ɛsadʋ 3 ñɩnʋ+ ɛsɩndaa kaawɛ ɛzɩ ɛyʋ ɛsɩndaa yɔ, nɛ ɛsadʋ 4 ñɩnʋ+ kaawɛ ɛzɩ kpeluu* ŋgʋ kiɖiɣni kʋyʋʋ yɔ.+ 8 Piyele nɛ ɛsadɩnaa 4 mba yɔ, pa-taa paa weyi kaawɛnɩ keŋ 6; ɛsa kaasu pɔ-yɔɔ nɛ pɩcɔɔ-wɛ nɛ pɩta nɛ pɛ-tɛɛ ɖɔɖɔ.+ Nɛ pɔyɔɔdʋʋ kaahɛzaɣ, ɖoo nɛ wɩsɩ se: «Kiɖeɖeu, kiɖeɖeu, kiɖeɖeu lɛ Yehowa*+ Ɛsɔ, Ðoŋ Tɩŋa Tʋ, weyi ɛɛwɛɛ nɛ weyi ɛwɛɛ nɛ weyi eɖiɣni kɔm yɔ.»+
9 Alɩwaatʋ ndʋ payɩ ɛsadɩnaa cɛlɩɣ samtʋ nɛ hɩɖɛ ɖʋʋ nɛ sɛtʋ Weyi ɛcaɣ kewiyaɣ kpelaɣ yɔɔ, Weyi ɛwɛ wezuu tam yɔ,+ 10 ɛzʋtʋyaa 24 mba,+ poluŋuu Weyi ɛcaɣ kewiyaɣ kpelaɣ yɔɔ yɔ ɛ-ɛsɩndaa nɛ pɛsɛɣ Weyi ɛwɛ wezuu tam yɔ, nɛ pɛpɛɖɩɣ pa-awiya hulasɩ kewiyaɣ kpelaɣ ɛsɩndaa, nɛ pɔtɔŋ se: 11 «Ŋmʋnaa, ɖɛ-Ɛsɔ Yehowa,* se ŋmʋ samtʋ+ nɛ hɩɖɛ ɖʋʋ+ nɛ ɖoŋ,+ mbʋ pʋyɔɔ yɔ ŋlɩzɩ pɩtɩŋa payɩ,+ nɛ ñɔ-sɔɔlɩm yɔɔ pɩwɛɛ nɛ ñɔ-sɔɔlɩm yɔɔ ŋlɩzɩ-pʋ.»
5 Nɛ Weyi ɛcaɣ kewiyaɣ kpelaɣ yɔɔ yɔ,+ mana e-nesi kɩbanzɩ taa takayaɣ kikpiyaɣ nakɛyɛ, pama tɔm ka-taa nɛ ka-wayɩ, nɛ pataaɖɩ-kɛ nɛ kɩtaaɖɩŋ* lʋbɛ. 2 Nɛ mana Ɛsɔ tiyiyu ɖoŋ tʋ nɔɔyʋ, esusaɣni nɔɔ kɩkʋyaɣ se: «Amʋnaa se ɛkpɛzɩ takayaɣ kikpiyaɣ yɔɔ kɩtaaɖɩŋ nɛ ekuli-kɛ?» 3 Ɛlɛ nɔɔyʋ taawɛɛ ɛsɔdaa yaa tataa yaa tɛtɛɛ se ɛpɩzɩɣ nɛ ekuli takayaɣ kikpiyaɣ yaa ɛcɔnɩ ka-taa. 4 Nɛ mɛwɛɛ nɛ mewiɣ siŋŋ, mbʋ pʋyɔɔ yɔ patɩna nɔɔyʋ se ɛmʋnaa se ekuli takayaɣ kikpiyaɣ yaa ɛcɔnɩ ka-taa. 5 Ɛlɛ ɛzʋtʋyaa taa kʋɖʋm heyi-m se: «Yele wiu. Na! Yuuda cejewiye taa mʋʋzʋʋ,+ Daviid+ liɖe,+ waba+ se kikuli takayaɣ kikpiyaɣ nɛ ka-kɩtaaɖɩŋ 7.»
6 Nɛ mana heɣa+ nakɛyɛ kasɩŋ kewiyaɣ kpelaɣ hɛkʋ taa nɛ ɛsadɩnaa 4 nɛ ɛzʋtʋyaa pɛ-hɛkʋ taa;+ kaawɛ ɛzɩ pakʋ-kɛ yɔ,+ kaawɛnɩ hɩŋ 7 nɛ ɛsa 7, nɛ ɛsa sɩŋnɩ Ɛsɔ feziŋ + weyi Ɛsɔ tiyi-i tɛtʋ kpeekpe yɔɔ yɔ. 7 Kpaagbaa mbʋ lɛ, kɔkɔɔ nɛ kamʋ takayaɣ kikpiyaɣ ŋga Weyi ɛcaɣ kewiyaɣ kpelaɣ yɔɔ yɔ+ e-nesi kɩbanzɩ tɛɛ. 8 Kamʋ takayaɣ kikpiyaɣ ŋga lɛ, ɛsadɩnaa 4 nɛ ɛzʋtʋyaa 24 mba+ poluŋ Heɣa ɛsɩndaa, nɛ paa weyi ɛɛwɛnɩ cɩmʋʋ nɛ sika ñanzɩ nzɩ sɩ-taa ŋgee tɩlaaɖɩ kaasu ɖo yɔ. (Ŋgee tɩlaaɖɩ sɩŋnɩ ɛyaa kiɖeɖema adɩma.)+ 9 Nɛ peteɣ hendu kɩfatʋ natʋyʋ,+ nɛ pɔtɔŋ se: «Ŋmʋnaa se ŋmʋ takayaɣ kikpiyaɣ nɛ ŋkpɛzɩ ka-kɩtaaɖɩŋ, mbʋ pʋyɔɔ yɔ paakʋ-ŋ nɛ ŋkpaɣ ña-calɩm nɛ ŋyabɩnɩ ɛyaa mba palɩnɩ cejewe kpeekpe nɛ kʋnʋmɩŋ* kpeekpe nɛ samasɩ kpeekpe nɛ ajɛɛ kpeekpe taa yɔ+ se pɛkɛ Ɛsɔ ñɩma,+ 10 nɛ ŋlabɩ-wɛ se pɛkɛ kewiyaɣ nakɛyɛ+ nɛ cɔjɔnaa se paɖʋ ɖɛ-Ɛsɔ lɩm,+ nɛ pɩwɛɛ se pɔtɔɔ kewiyitu+ tɛtʋ yɔɔ.»
11 Nɛ mana, nɛ manɩɩ Ɛsɔ tiyiyaa sakɩyɛ nɔɔ, pɔcɔ kewiyaɣ kpelaɣ nɛ ɛsadɩnaa nɛ ɛzʋtʋyaa nɛ pata, nɛ pɛkpɛndɩ kudokiŋ hiŋ sakɩyɛ tam kudokiŋ hiŋ sakɩyɛ nɛ kudokiŋ kudokiŋ;+ 12 nɛ pɔyɔɔdaɣnɩ nɔɔ kɩkʋyaɣ se: «Heɣa ŋga paakʋ-kɛ yɔ,+ kamʋnaa se kamʋ ɖoŋ nɛ ñɩm nɛ lɔŋsɩnɖɛ nɛ hoɖe nɛ hɩɖɛ ɖʋʋ nɛ samtʋ nɛ wazaɣ.»+
13 Nɛ manɩɩ wondu kɩlɩzɩtʋ kpeekpe ndʋ tɩwɛ ɛsɔdaa nɛ tɛtʋ yɔɔ nɛ tɛtɛɛ+ nɛ teŋgu yɔɔ yɔ, nɛ mbʋ payɩ pɩwɛ pa-taa yɔ, pɔtɔŋaɣ se: «Weyi ɛcaɣ kewiyaɣ kpelaɣ yɔɔ yɔ+ nɛ Heɣa,+ mba tɩnɩ wazaɣ nɛ hɩɖɛ ɖʋʋ+ nɛ samtʋ nɛ ɖoŋ tam.»+ 14 Ɛsadɩnaa 4 mba pɔyɔɔdaɣ se: «Amɛn!» nɛ ɛzʋtʋyaa luŋ nɛ pɛsɛɛ Ɛsɔ.
6 Nɛ mana alɩwaatʋ ndʋ Heɣa+ kpɛzɩ kɩtaaɖɩŋ 7 ɛnɩ ɩ-taa kʋɖʋmʋʋ yɔ,+ nɛ manɩɩ ɛsadɩnaa 4 mba+ pa-taa kʋɖʋm yɔɔdɩnɩ nɔɔ ŋga kɛwɛ ɛzɩ tɛʋ nazʋʋ yɔ se: «Kɔɔ!» 2 Nɛ mana kpaŋnʋ kʋhʋlʋm nɔɔyʋ,+ nɛ weyi ɛɛcaɣ ɛ-yɔɔ yɔ ɛɖɔkɩ tɔʋ; nɛ pɛcɛlɩ-ɩ awiya hulaɣ,+ nɛ ɛlɩɩ ɛzɩ waɖʋ yɔ se ɛtɛzɩ wabʋ.+
3 Ɛkpɛzɩ kɩtaaɖʋʋ 2 ñɩŋgʋ lɛ, manɩɩ ɛsadʋ 2 ñɩnʋ+ yɔɔdaa se: «Kɔɔ!» 4 Kpaŋnʋ lɛlʋ lɩɩ, ɛsɛwa ɛzɩ miŋ yɔ, nɛ weyi ɛɛcaɣ ɛ-yɔɔ yɔ paha-ɩ nʋmɔʋ se ɛlɩzɩ laŋhɛzɩyɛ tɛtʋ yɔɔ se pɩsa nɛ ɛyaa kʋ ɖama, nɛ paacɛlɩ-ɩ laɣɖɛ sɔsɔɖɛ naɖɩyɛ.+
5 Ɛkpɛzɩ kɩtaaɖʋʋ 3 ñɩŋgʋ lɛ,+ manɩɩ ɛsadʋ 3 ñɩnʋ+ yɔɔdaa se: «Kɔɔ!» Nɛ mana kpaŋnʋ kɩkpɛɛdʋ nɔɔyʋ, nɛ weyi ɛɛcaɣ ɛ-yɔɔ yɔ ɛɖɔkɩ kɩmaɣzʋʋ e-nesi taa. 6 Manɩ nabʋyʋ taŋ ɛzɩ nɔɔ nakɛyɛ yɔ ɛsadɩnaa 4 mba pɛ-hɛkʋ taa nɛ kɔtɔŋ se: «Payakɩ blee litri* kʋɖʋmʋʋ dinaarɩ* kʋɖʋmʋʋ,+ nɛ orjɩ litrinaa 3 dinaarɩ kʋɖʋmʋʋ; nɛ taawɛɛkɩ oliivi num nɛ vɛɛ.»+
7 Ɛkpɛzɩ kɩtaaɖʋʋ 4 ñɩŋgʋ lɛ, manɩɩ ɛsadʋ 4 ñɩnʋ+ yɔɔdaa se: «Kɔɔ!» 8 Nɛ mana kpaŋnʋ nɔɔyʋ, ɛ-yɔɔ wɛ ɛzɩ tɔlɩma yɔ, nɛ weyi ɛɛcaɣ ɛ-yɔɔ yɔ ɛ-hɩɖɛ lɛ Sɩm. Nɛ Pɩlaʋ* tɩŋaɣ ɛ-wayɩ kpam. Nɛ paha-wɛ ɖoŋ tɛtʋ hɔɔlʋʋ 4 ñɩŋgʋ yɔɔ, se patɩŋnɩ laɣɖɛ nɖɩ ɖɩɖaɣlaa yɔ ɖɩ-yɔɔ nɛ ñɔɔsɩ yɔɔ+ nɛ kʋdɔŋ ŋgʋ kɩhaɣ sɩm yɔ kɩ-yɔɔ nɛ tɛtɛgbɩna wena awɛ tɛtʋ yɔɔ yɔ a-yɔɔ nɛ pakʋ ɛyaa.+
9 Ɛkpɛzɩ kɩtaaɖʋʋ 5 ñɩŋgʋ lɛ, mana altaaru tɛɛ+ ɛyaa mba paakʋ-wɛ Ɛsɔ tɔm yɔɔ nɛ aseɣɖe nɖɩ palɩzaa yɔ ɖɩ-yɔɔ yɔ+ pa-kalɩzasɩ.*+ 10 Nɛ pama kubuka nɛ nɔɔ kɩkʋyaɣ nɛ pɔtɔŋ se: «Kɩbaɣlʋ Kɩlɩm, kiɖeɖeu nɛ toovenim tʋ,+ ŋyeki tɔm hʋnʋʋ mba pɛwɛ tɛtʋ yɔɔ yɔ nɛ ŋyeki-wɛ kpaʋ ɖa-calɩm kɩmɩyɛ nɛ pɩkɔɔ nɛ pɩsɩɩnɩ ɖooye?»+ 11 Nɛ paha pa-taa paa weyi toko kɩɖaɣlʋʋ kʋhʋlʋmʋʋ,+ nɛ peheyi-wɛ se patasɩ hɛzʋʋ alɩwaatʋ pazɩ, nɛ pɩkɔɔ pɩsɩɩnɩ alɩwaatʋ ndʋ mba pɛkɛ yomaa ɛzɩ mba yɔ nɛ po-koobiya mba pawɩzɩ-wɛ kʋʋ ɛzɩ paakʋʋ-wɛ yɔ, pa-tɩŋa poyozaa yɔ.+
12 Nɛ mana alɩwaatʋ ndʋ ɛkpɛzɩ kɩtaaɖʋʋ 6 ñɩŋgʋ yɔ, nɛ tɛtʋ ñamsɩ siŋŋ; nɛ wɩsɩ piyi ɛzɩ fɔlɔtɔ ŋgʋ palabɩ-kʋ nɛ hʋndʋ* yɔ, nɛ fenaɣ tɩŋa pɩsɩ ɛzɩ calɩm yɔ,+ 13 nɛ ɛsɔdaa tɩɩnzɩ tɔlɩ tataa ɛzɩ alɩwaatʋ ndʋ helim sɔsɔm ñamsɩɣ fiigi tɩʋ nɛ ki-pee wena atɩpɩɩ yɔ atɔʋ yɔ. 14 Nɛ ɛsɔdaa ɖɛɛ ɛzɩ takayaɣ kikpiyaɣ ŋga peɖiɣni-kɛ kpiyuu yɔ,+ nɛ pakʋsɩ paa pʋʋ ŋgʋ nɛ paa lɩm hɛkʋ taa tɛtʋ ndʋ lɛ ti-lone taa.+ 15 Ðɩnɛ ɛlɛ tɛtʋ yɔɔ awiya, kaɖɩsɩ sɔsɔsɩ, sɔɔjanaa ñʋndɩnaa, ñɩm tɩnaa, ɖoŋ tɩnaa, paa yom weyi, nɛ ɛyaa mba pɛwɛ pa-tɩ yɔɔ yɔ pa-tɩŋa pɛmɛlɩ ɛwasɩ pɔŋ taa nɛ pʋŋ yɔɔ kaaŋ hɛkɩŋ taa.+ 16 Nɛ pɛwɛɛ nɛ peheyiɣ pʋŋ nɛ kaaŋ se: «Ɩtɔlɩ ɖɔ-yɔɔ+ nɛ ɩmɛsɩ-ɖʋ nɛ Weyi ɛcaɣ kewiyaɣ kpelaɣ yɔɔ yɔ ɛtaana-ɖʋ,+ nɛ Heɣa pana ɛtaakɔɔ ɖɔ-yɔɔ,+ 17 mbʋ pʋyɔɔ yɔ pa-pana kɩyakʋ sɔsɔʋ talaa,+ nɛ apɩzɩɣ nɛ ehiɣ ñʋʋ yabʋ ki-wiye?»+
7 Pʋwayɩ lɛ, mana Ɛsɔ tiyiyaa 4, pasɩŋ tɛtʋ kɔnanaa 4 taa, pakpa tɛtʋ yɔɔ helim 4, se pɩsa nɛ helim ɛtaama tɛtʋ yɔɔ yaa teŋgu yɔɔ yaa tɩʋ nakʋyʋ yɔɔ. 2 Nɛ mana Ɛsɔ tiyiyu lɛlʋ, ɛlɩnɩ wɩsɩ ɖɩlɩyɛ nɛ ɛkpaɣ, ɛwɛnɩ Ɛsɔ ɛsadʋ mayaɣ; nɛ ɛma kubuka nɛ nɔɔ kɩkʋyaɣ Ɛsɔ tiyiyaa 4 mba paha-wɛ waɖɛ se pala tɛtʋ nɛ teŋgu kɩdɛkɛdɩm yɔ pɔ-cɔlɔ kiŋ, 3 nɛ ɛtɔŋ se: «Ɩtaala tɛtʋ yaa teŋgu yaa tɩŋ kɩdɛkɛdɩm nɛ pɩkɔɔ pɩsɩɩnɩ alɩwaatʋ ndʋ ɖɩtɛŋ ñɩɣʋ mayaɣ+ ɖɛ-Ɛsɔ yomaa kila taa yɔ.»+
4 Nɛ manɩɩ mba pañɩɣ pɔ-yɔɔ mayaɣ yɔ pa-ñʋʋ: pañɩɣ mayaɣ ɛyaa 144 000 yɔɔ,+ nɛ palɩnɩ Izrayɛɛlɩ pɩyalaa cejewe kpeekpe taa:+
5 Yuuda cejewiye taa, pañɩɣ mayaɣ ɛyaa 12 000 yɔɔ;
Rubɛɛnɩ cejewiye taa, 12 000;
Gaadɩ cejewiye taa, 12 000;
6 Asɛɛrɩ cejewiye taa, 12 000;
Naftalii cejewiye taa, 12 000;
Manaasee+ cejewiye taa, 12 000;
7 Siimeyɔɔ cejewiye taa, 12 000;
Leevi cejewiye taa, 12 000;
Isakaarɩ cejewiye taa, 12 000;
8 Zebulɔɔnɩ cejewiye taa, 12 000;
Yosɛɛfʋ cejewiye taa, 12 000;
Bɛnjamɛɛ cejewiye taa, pañɩɣ mayaɣ ɛyaa 12 000 yɔɔ.
9 Pʋwayɩ lɛ, mana samaɣ sɔsɔɔ nakɛyɛ, ŋga ɛyʋ nɔɔyʋ taapɩzɩɣ-kɛ kalʋʋ yɔ, kalɩnɩ ajɛɛ kpeekpe nɛ cejewe kpeekpe nɛ samasɩ kpeekpe nɛ kʋnʋmɩŋ* kpeekpe taa,+ kasɩŋ kewiyaɣ kpelaɣ ɛsɩndaa nɛ Heɣa ɛsɩndaa, kosu tokonaa kɩɖaɣlaa kʋhʋlʋmaa;+ nɛ paadɛtʋ kaawɛ ke-nesi taa.+ 10 Nɛ kɛwɛɛ nɛ kamakɩ kubusi nɛ nɔɔ kɩkʋyaɣ nɛ kɔtɔŋ se: «Ða-ñʋʋ yabʋ lɩnɩ ɖɛ-Ɛsɔ weyi ɛcaɣ kewiyaɣ kpelaɣ yɔɔ yɔ ɛ-cɔlɔ,+ nɛ Heɣa cɔlɔ.»+
11 Ɛsɔ tiyiyaa kpeekpe kaasɩŋaa nɛ pɔcɔɔ kewiyaɣ kpelaɣ nɛ ɛzʋtʋyaa+ nɛ ɛsadɩnaa 4 mba nɛ pata, nɛ poluŋ pa-nʋmbɔla yɔɔ nɛ papa pɛ-ɛsa kewiyaɣ kpelaɣ ɛsɩndaa nɛ pɛsɛɛ Ɛsɔ, 12 nɛ pɔtɔŋ se: «Amɛn! Ðɛ-Ɛsɔ tɩnɩ samtʋ nɛ hɩɖɛ ɖʋʋ nɛ lɔŋsɩnɖɛ nɛ sɛtʋ nɛ ñamtʋ nɛ ɖoŋ nɛ hoɖe tam.+ Amɛn.»
13 Ɛzʋtʋyaa taa kʋɖʋm pɔzɩ-m se: «Mba posu tokonaa kɩɖaɣlaa kʋhʋlʋmaa yɔ,+ mba pɛkɛnaa nɛ le palɩnaa?» 14 Peeɖe moncosi-i kpaagbaa se: «Man-kɩbaɣlʋ, ñasɩmna.» Nɛ eheyi-m se: «Mba lɛ mba palɩnɩ kʋñɔŋ sɔsɔʋ taa yɔ,+ nɛ pɔcɔtɩ po-tokonaa kɩɖaɣlaa nɛ pahʋlʋnzɩ-wɛ Heɣa calɩm taa.+ 15 Pʋyɔɔ pɛwɛ Ɛsɔ kewiyaɣ kpelaɣ ɛsɩndaa, nɛ palakɩ-ɩ tʋmɩyɛ kiɖeɖeye wɩsɩ nɛ ɖoo e-templo taa; nɛ Weyi ɛcaɣ kewiyaɣ kpelaɣ yɔɔ yɔ+ ɛkaɣ posuu e-kizinziku pɔ-yɔɔ.+ 16 Ñɔɔsɩ ɛɛkaɣ-wɛ tasʋʋ wɩʋ nɛ lɔkɔtʋ ɛɛtasɩɣ-wɛ ɖɛʋ ɖɔɖɔ, nɛ wɩsɩ ɛɛkaɣ-wɛ tasʋʋ ñaɣʋ nɛ soŋaɣ sɔsɔɔ nakɛyɛ ɛɛtasɩɣ-wɛ kʋʋ;+ 17 mbʋ pʋyɔɔ yɔ Heɣa+ ŋga kɛwɛ kewiyaɣ kpelaɣ hɛkʋ taa yɔ, kakaɣ-wɛ ɖiyuu+ nɛ kowoni-wɛ wezuu lɩm hila cɔlɔ.+ Nɛ Ɛsɔ kaɣ hɩzʋʋ ɛsɩtɛɣlɩm tɩŋa pɛ-ɛsɩndaa.»+
8 Ɛkpɛzɩ+ kɩtaaɖʋʋ 7 ñɩŋgʋ lɛ,+ pisu nimm ɛsɔdaa ɛzɩ ñɩɣyʋʋ hɔɔlʋʋ mbʋ yɔ. 2 Nɛ mana Ɛsɔ tiyiyaa + mba pasɩŋ Ɛsɔ ɛsɩndaa yɔ, nɛ pɛcɛlɩ-wɛ aganda 7.
3 Ɛsɔ tiyiyu lɛlʋ weyi ɛɖɔkɩ ŋgee tɩlaaɖɩ ñanaɣ ŋga palabɩ-kɛ nɛ sika yɔ, ɛkɔɔ nɛ ɛsɩŋ altaaru cɔlɔ,+ nɛ pɛcɛlɩ-ɩ ŋgee tɩlaaɖɩ sakɩyɛ+ se ɛsɔbɩ-kʋ miŋ sika altaaru+ ŋgʋ kɩɩwɛ kewiyaɣ kpelaɣ ɛsɩndaa yɔ kɩ-yɔɔ, alɩwaatʋ ndʋ pewelisaɣ ɛyaa kiɖeɖema tɩŋa adɩma yɔ. 4 Ŋgee tɩlaaɖɩ ŋgʋ kɩwɛ Ɛsɔ tiyiyu nesi taa yɔ, kɩ-ñɔsɩ kpa Ɛsɔ cɔlɔ, sɩ nɛ ɛyaa kiɖeɖema adɩma.+ 5 Ɛlɛ kpaagbaa mbʋ lɛ, Ɛsɔ tiyiyu kpaɣ ŋgee tɩlaaɖɩ ñanaɣ nɛ ɛhaa miŋ altaaru yɔɔ nɛ pisu ka-taa nɛ ɛlɔ-ɩ tɛtʋ yɔɔ. Nɛ tɛʋ nazɩ nɛ nɔsɩ tili nɛ tɛʋ ñɩlɩsɩ+ nɛ tɛtʋ ñamsɩ. 6 Nɛ Ɛsɔ tiyiyaa 7 mba pɔɖɔkɩ aganda 7 yɔ,+ pɔñɔɔzɩ pa-tɩ se pahʋlɩ-yɛ.
7 Kajalaɣ ñɩnʋ hʋlɩ ɛ-ɛgandɩyɛ. Nɛ ɖɔmbɛɛ nɛ miŋ pesidini calɩm, nɛ pɩtɔlɩ tɛtʋ yɔɔ;+ nɛ tɛtʋ hɔɔlʋʋ 3 ñɩŋgʋ ñaɣ, nɛ tɩŋ hɔɔlʋʋ 3 ñɩŋgʋ ñaɣ, nɛ ñɩtʋ lɛŋ ñɩndʋ tɩŋa ñaɣ.+
8 Ɛsɔ tiyiyu 2 ñɩnʋ hʋlɩ ɛ-ɛgandɩyɛ. Nɛ pɔlɔ nabʋyʋ teŋgu taa,+ pɩwɛ ɛzɩ pʋʋ sɔsɔʋ nakʋyʋ ŋgʋ kɩwɛɛ nɛ kɩmʋʋ miŋ yɔ. Nɛ teŋgu hɔɔlʋʋ 3 ñɩŋgʋ pɩsɩ calɩm;+ 9 nɛ teŋgu taa wondu ndʋ tɩwɛ wezuu yɔ* tɩ-hɔɔlʋʋ 3 ñɩŋgʋ sɩ,+ nɛ mɛlɛnaa hɔɔlʋʋ 3 ñɩŋgʋ yɔkɩ.
10 Ɛsɔ tiyiyu 3 ñɩnʋ hʋlɩ ɛ-ɛgandɩyɛ. Nɛ tɩɩŋa sɔsɔɔ nakɛyɛ, ŋga kɛwɛɛ nɛ kamʋʋ ɛzɩ kanɖʋ yɔ, kalɩɩnɩ ɛsɔdaa nɛ kɔtɔlɩ, nɛ kɔtɔlɩ pɔsɩ hɔɔlʋʋ 3 ñɩŋgʋ yɔɔ nɛ lɩm hila yɔɔ.+ 11 Tɩɩŋa ŋga, ka-hɩɖɛ lɛ Ñandʋ. Nɛ lɩm hɔɔlʋʋ 3 ñɩŋgʋ pɩsɩ ñaŋ lɩm, nɛ lɩm mbʋ pɩ-yɔɔ lɛ ɛyaa sakɩyɛ sɩ, mbʋ pʋyɔɔ yɔ pɩkpa ñaŋ.+
12 Ɛsɔ tiyiyu 4 ñɩnʋ hʋlɩ ɛ-ɛgandɩyɛ. Nɛ pɩma wɩsɩ hɔɔlʋʋ 3 ñɩŋgʋ+ nɛ fenaɣ hɔɔlʋʋ 3 ñɩŋgʋ nɛ tɩɩnzɩ hɔɔlʋʋ 3 ñɩŋgʋ, se pɩsa nɛ pɔ-hɔɔlʋʋ 3 ñɩŋgʋ yu cɩkpɛndʋʋ+ nɛ evemiye hɔɔlʋʋ 3 ñɩŋgʋ ɛtaawɛɛnɩ ñalɩmɩyɛ, nɛ ɖoo ɖɔɖɔ mbʋ.
13 Nɛ mana, nɛ manɩɩ kpeluu* nakʋyʋ ŋgʋ kɩkʋyaɣ ɛsɔdaa* yɔ, kɩyɔɔdaɣnɩ nɔɔ kɩkʋyaɣ se: «Pɩtɔɔ-wɛ, pɩtɔɔ-wɛ, pɩtɔɔ+ mba pɛwɛ tɛtʋ yɔɔ yɔ aganda wena pɩkazaa nɛ Ɛsɔ tiyiyaa 3 wɩzɩ-yɛ hʋlʋʋ yɔ a-yɔɔ!»+
9 Ɛsɔ tiyiyu 5 ñɩnʋ hʋlɩ ɛ-ɛgandɩyɛ.+ Nɛ mana tɩɩŋa nakɛyɛ ŋga kaalɩnɩ ɛsɔdaa nɛ kɔtɔlɩ tɛtʋ yɔɔ yɔ, nɛ pɛcɛlɩ-kɛ pɔʋ sɔsɔʋ lɔkɔ ñɩmɩyɛ.+ 2 Katʋlɩ pɔʋ sɔsɔʋ lɔkɔ nɔɔ, nɛ ñɔsɩ lɩɩnɩ lɔkɔ ŋgʋ kɩ-taa nɛ sɩkpa ɛzɩ miŋ momoɖe sɔsɔɖɛ naɖɩyɛ taa ñɔsɩ yɔ; nɛ lɔkɔ ŋgʋ kɩ-taa ñɔsɩ yɔɔ lɛ, wɩsɩ yu cɩkpɛndʋʋ,+ nɛ helim ɖɔɖɔ. 3 Nɛ kudoloŋ lɩɩnɩ ñɔsɩ nzɩ sɩ-taa nɛ kɩkɔɔ tɛtʋ yɔɔ,+ nɛ paha-kʋ ɖoŋ, nɛ ɖoŋ kʋɖʋmɩŋ ɛnɩ tɛtʋ yɔɔ pɩjɩsɩ wɛna. 4 Peheyi-kʋ se kɩtaala kɩdɛkɛdɩm tɛtʋ yɔɔ mbʋ pɩñɔwa yɔ yaa ñɩtʋ lɛŋ ñɩndʋ yaa tɩʋ nakʋyʋ, ɛlɛ kɩla kɩdɛkɛdɩm mba pɛfɛyɩnɩ Ɛsɔ mayaɣ pe-kila taa yɔ pe-ɖeke.+
5 Nɛ patɩha kudoloŋ nʋmɔʋ se kɩkʋ-wɛ, ɛlɛ se kɩwɩlɩ-wɛ kʋñɔŋ fenasɩ 5, nɛ pa-kʋñɔŋ wɩlʋʋ mbʋ pɩwɛ ɛzɩ kʋñɔŋ ŋgʋ ɛyʋ tɔkɩ alɩwaatʋ ndʋ pɩjɩka+ ñasɩɣ-ɩ yɔ. 6 Kɩyakɩŋ ɛnɩ ɩ-taa, ɛyaa kaɣ ñɩnʋʋ sɩm, ɛlɛ paakaɣ-pʋ naʋ kpa, nɛ pakaɣ sɔɔlʋʋ siŋŋ se pasɩ, ɛlɛ sɩm kaɣ seu nɛ piposini-wɛ.
7 Nɛ kudoloŋ ŋgʋ kɩɩwɛ ɛzɩ kpaŋnaŋ weyi pɔñɔɔzɩ-ɩ se ɩɖɛɛ you yɔ;+ nɛ nabʋyʋ kaawɛ kɩ-ñʋʋ taa nɛ pɩwɛɛ ɛzɩ sika awiya hulasɩ yɔ, nɛ kɩ-ɛsɩndaa kaawɛ ɛzɩ ɛyaa ɛsɩndaa yɔ, 8 ɛlɛ kɩ-ñɔsɩ wɛ ɛzɩ halaa ñɔsɩ yɔ. Nɛ ki-kela wɛ ɛzɩ mʋʋzɩŋ kela yɔ,+ 9 nɛ kɩwɛnɩ ñɩɣtʋ tokonaa mba pohuuzuu laŋɩyɛ yɔɔ yɔ. Nɛ ki-keŋ lakɩ kɔkɔɖɛ ɛzɩ kɔkɔɖɛ nɖɩ kpaŋnaŋ hɔŋ kɛɛkɛɛnaa nɛ pɩlakɩ alɩwaatʋ ndʋ iseɣ nɛ iwoki you yɔ.+ 10 Pɩtasɩ lɛ, kɩwɛnɩ suŋ weyi ɩwɛnɩ ɛjɔŋ ɛzɩ pɩjɩsɩ yɔ, nɛ ɖoŋ weyi kɩwɛna se kɩnazɩ ɛyaa fenasɩ 5 yɔ, ki-suŋ taa ɩwɛɛ.+ 11 Kɩwɛnɩ wiyaʋ nɔɔyʋ, pɔʋ sɔsɔʋ tɛ tiyiyu.+ Ebree taa lɛ, ɛ-hɩɖɛ lɛ Abadɔɔnɩ;* ɛlɛ Grɛɛkɩ taa lɛ, ɛ-hɩɖɛ lɛ Apoliyɔɔnɩ.*
12 Kʋñɔŋ kʋɖʋmʋʋ ɖɛwa. Na! Kʋñɔmɩŋ 2 lɛɛŋ+ kɔŋ pʋwayɩ.
13 Ɛsɔ tiyiyu 6 ñɩnʋ+ hʋlɩ ɛ-ɛgandɩyɛ.+ Nɛ manɩɩ nɔɔ nakɛyɛ, kalɩnɩ sika altaaru+ ŋgʋ kɩwɛ Ɛsɔ ɛsɩndaa yɔ kɩ-hɩŋ cɔlɔ, 14 keheyaɣ Ɛsɔ tiyiyu 6 ñɩnʋ weyi ɛɛwɛnɩ ɛgandɩyɛ yɔ se: «Hɛɖɩ Ɛsɔ tiyiyaa 4 mba pɔhɔkɩ-wɛ pɔɔ sɔsɔɔ Efraatɩ+ nɔɔ yɔ.» 15 Nɛ pɛhɛɖɩ Ɛsɔ tiyiyaa 4 mba pɔñɔɔzɩ-wɛ nɛ paɖaŋnɩ ñɩɣyʋʋ nɛ kɩyakʋ nɛ fenaɣ nɛ pɩnaɣ yɔ, se pakʋ ɛyaa hɔɔlʋʋ 3 ñɩŋgʋ.
16 Sɔɔjanaa mba pacakɩ kpaŋnaŋ yɔɔ yɔ, pɛkpɛndɩ kudokiŋ 20 tam kudokiŋ 10;* manɩ pa-ñʋʋ. 17 Nɛ ɛzʋnɔ mana kpaŋnaŋ nɛ mba pacaɣ ɩ-yɔɔ yɔ natʋ taa: Pɛwɛnɩ ñɩɣtʋ tokonaa mba pohuuzuu laŋɩyɛ yɔɔ yɔ; tokonaa mba, pɛwɛnɩ tɔlɩm kɩsɛɛmɩm ɛzɩ miŋ tɔlɩm yɔ nɛ tɔlɩm pʋlɔɔ nɛ tɔlɩm mbʋ pɩwɛ ɛzɩ tɩm tɔlɩm yɔ, nɛ kpaŋnaŋ ñʋŋ kaawɛ ɛzɩ mʋʋzɩŋ ñʋŋ yɔ,+ nɛ miŋ nɛ ñɔsɩ nɛ tɩm lɩɣaɣnɩ ɩ-nɔsɩ taa. 18 Asɛyɩŋ 3 ɛnɩ, pʋ-tɔbʋʋ se miŋ nɛ ñɔsɩ nɛ tɩm mbʋ pɩlɩɣaɣnɩ ɩ-nɔsɩ taa yɔ, ɩkʋ ɛyaa hɔɔlʋʋ 3 ñɩŋgʋ. 19 Mbʋ pʋyɔɔ yɔ kpaŋnaŋ ɛnɩ i-ɖoŋ wɛ ɩ-nɔsɩ taa nɛ i-suŋ taa, mbʋ pʋyɔɔ yɔ i-suŋ kaawɛ ɛzɩ ɖʋmaa yɔ nɛ ɩwɛnɩ ñʋŋ, nɛ ɛnɩ ɩlakɩnɩ ɛyaa kɩdɛkɛdɩm.
20 Ɛlɛ ɛyaa mba pɩkazaa nɛ asɛyɩŋ ɛnɩ ɩtɩkʋ-wɛ yɔ, patikpiɖi pe-nesi tɛɛ tʋma yɔɔ; patiyele aleewaa nɛ sɩʋ kpelisi sɛʋ, nzɩ palabɩnɩ sika nɛ liidiye nɛ ñɩɣyʋʋ kɩsɛɛmʋʋ nɛ pɛɛ nɛ ɖasɩ yɔ, nzɩ sɩɩpɩzɩɣ nɛ sɩna yaa sɩnɩɩ yaa sɩɖɔ yɔ.+ 21 Nɛ patikpiɖi pɛ-ɛyaa kʋʋ yɔɔ, pe-feziŋ kɩdɛkɛdɩŋ yaʋ lakasɩ yɔɔ, pa-kʋzʋʋ kɩdɛkɛdʋʋ* wezuu caɣʋ yɔɔ nɛ pa-mɩlɩm yɔɔ.
10 Nɛ mana Ɛsɔ tiyiyu ɖoŋ tʋ lɛlʋ, ɛlɩnɩ ɛsɔdaa nɛ etiki, esu* ɛsɔmɩnʋʋ nakʋyʋ, nɛ tɩŋgaɣyʋʋ nakʋyʋ wɛ ɛ-ñʋʋ yɔɔ, nɛ ɛ-ɛsɩndaa wɛ ɛzɩ wɩsɩ yɔ,+ nɛ ɛ-nɩŋgbanzɩ* wɛ ɛzɩ miŋ tilima yɔ, 2 nɛ ɛɛɖɔkɩ takayaɣ kikpiyaɣ cikpelaɣ nakɛyɛ ŋga pokuli-kɛ yɔ e-nesi taa. Nɛ ɛsɩɩ ɛ-nɩwaŋ nɩŋgbaŋaɣ teŋgu yɔɔ, ɛlɛ ɛsɩɩ ɛ-nɩmɩyɛ ñɩŋga tɛtʋ yɔɔ, 3 nɛ ɛma kubuka ɖoŋ ñɩŋga nakɛyɛ ɛzɩ alɩwaatʋ ndʋ mʋʋzʋʋ makɩ kubusi yɔ.+ Nɛ ɛmabɩ kubuka lɛ, tɛʋ nazʋʋ + yɔɔdɩ.
4 Nɛ tɛʋ nazʋʋ 7 yɔɔdaa lɛ, mancaɣaɣ maʋ; ɛlɛ manɩɩ nɔɔ nakɛyɛ nɛ ɛsɔdaa kiŋ+ se: «Taaɖɩ* tɔm ndʋ tɛʋ nazʋʋ 7 yɔɔdaa yɔ tɩ-yɔɔ, nɛ taama-tʋ.» 5 Ɛsɔ tiyiyu weyi mana ɛsɩŋ teŋgu nɛ tɛtʋ pɔ-yɔɔ yɔ ɛkpazɩ e-nesi kɩbanzɩ ɛsɔdaa, 6 nɛ eɖuuni Weyi ɛwɛ wezuu tam yɔ,+ weyi ɛlɩzɩ ɛsɔdaa nɛ mbʋ pɩwɛ kɩ-taa yɔ nɛ tɛtʋ nɛ mbʋ pɩwɛ tɩ-yɔɔ yɔ nɛ teŋgu nɛ mbʋ pɩwɛ kɩ-taa yɔ,+ nɛ ɛtɔ se: «Pɩɩkaɣ tasʋʋ caɣʋ wayɩ. 7 Ɛlɛ kɩyakɩŋ weyi ɩ-taa Ɛsɔ tiyiyu 7 ñɩnʋ+ wɩzɩɣ hʋlʋʋ ɛ-ɛgandɩyɛ yɔ,+ mɛsaɣ tɛɛ tɔm kiɖeɖetu+ ndʋ Ɛsɔ heyi nayaa mba pɛkɛ ɛ-maɣmaɣ e-yomaa+ nɛ tɩkɛ tɔm kɩbandʋ yɔ, tɩkaɣ tɛzʋʋ labʋ.»
8 Nɛ manɩɩ nɔɔ ŋga kaayɔɔdɩnɩ-m nɛ ɛsɔdaa yɔ+ katasɩ-m yɔɔdɩnʋʋ nɛ kɔtɔŋ se: «Wolo nɛ ŋmʋ takayaɣ kikpiyaɣ ŋga pokuli-kɛ yɔ; kɛwɛ Ɛsɔ tiyiyu weyi ɛsɩŋ teŋgu nɛ tɛtʋ pɔ-yɔɔ yɔ e-nesi tɛɛ.»+ 9 Nɛ mowolo Ɛsɔ tiyiyu cɔlɔ nɛ meheyi-i se ɛcɛlɩ-m takayaɣ kikpiyaɣ cikpelaɣ ŋga. Eheyi-m se: «Mʋ-kɛ nɛ ŋtɔɔ-kɛ,+ nɛ kakaɣ labʋ nɛ ño-lotu taa kpa ñaŋ; ɛlɛ ñɔ-nɔɔ taa lɛ, kakaɣ wɛʋ leleŋ ɛzɩ tʋŋ num yɔ.» 10 Mamʋ takayaɣ kikpiyaɣ cikpelaɣ ŋga Ɛsɔ tiyiyu nesi tɛɛ nɛ mɔntɔɔ-kɛ,+ nɛ kaawɛ leleŋ mɔ-nɔɔ taa ɛzɩ tʋŋ num yɔ;+ ɛlɛ mɔntɔɔ-kɛ nɛ pɩtɛ lɛ, mo-lotu taa kpa ñaŋ. 11 Nɛ peheyi-m se: «Pɩwɛɛ se ŋtasɩ yɔɔdʋʋ natʋ tɔm samasɩ nɛ ajɛɛ nɛ kʋnʋmɩŋ* nɛ awiya sakɩyɛ yɔɔ.»
11 Nɛ pɛcɛlɩ-m kañɩŋgbayaɣ nakɛyɛ kɛwɛ ɛzɩ ɖaʋ* yɔ+ nɛ nɔɔ nakɛyɛ yɔɔdɩ se: «Kʋyɩ nɛ ŋmaɣzɩ Ɛsɔ tɛ templo kooka kiɖeɖeɣa nɛ altaaru nɛ mba pɛsɛɣ Ɛsɔ kɩ-taa yɔ. 2 Ɛlɛ kadaɣ ŋga kɛwɛ templo kooka kiɖeɖeɣa wayɩ yɔ, yebi-kɛ nɛ taamaɣzɩ-kɛ, mbʋ pʋyɔɔ yɔ paha-kɛ ajɛɛ; nɛ akaɣ tɛtʋ kiɖeɖetu+ fɛyʋʋ nɩŋgbanzɩ fenasɩ 42.+ 3 Mankaɣ yebu nɛ ma-aseɣɖe tɩnaa 2 suu fɔlɔtɔnaa nɛ pɔyɔɔdɩ natʋ tɔm kɩyakɩŋ 1 260.» 4 Ɛyaa mba oliivi tɩŋ 2+ ɛnɩ nɛ kanɖʋnaa ɖɩzɩyɛ 2+ mba pasɩŋnaa, nɛ pasɩŋ tɛtʋ Kɩbaɣlʋ ɛsɩndaa.+
5 Ye nɔɔyʋ ɛñɩnɩɣ se ɛlabɩ-wɛ kɩdɛkɛdɩm yɔ, miŋ lɩɣnɩ pɔ-nɔsɩ taa nɛ ɩñaɣ po-koyindinaa. Ye nɔɔyʋ ɛñɩnɩɣ se ɛlabɩ-wɛ kɩdɛkɛdɩm yɔ, mbʋ pɩwɛɛ se pakʋ-ɩ. 6 Pɛwɛnɩ ɖoŋ se paɖɩɣ ɛsɔdaa+ nɛ tɛʋ ɛtaanɩɩ+ kɩyakɩŋ weyi pɔyɔɔdʋʋ natʋ tɔm yɔ ɩ-taa, nɛ pɛwɛnɩ ɖoŋ lɩm yɔɔ se papɩsɩ-pʋ calɩm+ nɛ patɩŋnɩ asɛyɩŋ ndɩ ndɩ yɔɔ nɛ pɔkɔnɩ kʋñɔmɩŋ tɛtʋ yɔɔ tam sakɩyɛ ɛzɩ pɔsɔɔlʋʋ yɔ.
7 Alɩwaatʋ ndʋ pɛtɛŋ pa-aseɣɖe lɩzʋʋ yɔ, tɛtɛgbɩnɛ nɖɩ ɖɩlɩnɩ pɔʋ sɔsɔʋ taa nɛ ɖɩkpaɣ yɔ, ɖɩkaɣ-wɛ yonuu nɛ ɖɩwabɩ-wɛ nɛ ɖɩkʋ-wɛ.+ 8 Nɛ po-tomnasɩ kaɣ wɛʋ tɛtʋ sɔsɔtʋ habɩyɛ sɔsɔɖɛ yɔɔ, ɖenɖe paakam ɖɔɖɔ pa-Kɩbaɣlʋ sizika yɔɔ yɔ, nɛ Sodom nɛ Ejipiti pasɩŋnɩ tɛtʋ ndʋ. 9 Nɛ samasɩ nɛ cejewe nɛ kʋnʋmɩŋ* nɛ ajɛɛ pa-taa mba kaɣ cɔnʋʋ po-tomnasɩ kɩyakɩŋ 3 nɛ hɔɔlʋʋ,+ nɛ paakaɣ haʋ nʋmɔʋ se pahɩzɩ po-tomnasɩ pɩlaʋ nakʋyʋ taa. 10 Nɛ mba pɛwɛ tɛtʋ yɔɔ yɔ pɛmɛyɩɣ amɛya pɔ-yɔɔ nɛ pɔtɔɔ kazandʋ, nɛ pakaɣ ɖama tiyinuu kʋjɔŋ, mbʋ pʋyɔɔ yɔ nayaa mba pa-naalɛ paawɩlɩ mba pɛwɛ tɛtʋ yɔɔ yɔ kʋñɔŋ.
11 Kɩyakɩŋ 3 nɛ hɔɔlʋʋ ɛnɩ ɩ-wayɩ lɛ, wezuu fezuu ŋgʋ kɩlɩnɩ Ɛsɔ cɔlɔ yɔ kɩsʋʋ pa-taa,+ nɛ pakʋyɩ pasɩŋ pa-nɩŋgbanzɩ yɔɔ, nɛ sɔɔndʋ sɔsɔtʋ kpa mba pana-wɛ yɔ. 12 Nɛ panɩɩ nɔɔ sɔsɔɔ nakɛyɛ nɛ ɛsɔdaa, keheyaɣ-wɛ se: «Ɩkpa cɩnɛ.» Nɛ pakpa ɛsɔdaa ɛsɔmɩnʋʋ taa, nɛ po-koyindinaa na-wɛ.* 13 Ñɩɣyʋʋ ŋgʋ kɩ-yɔɔ lɛ, tɛtʋ ñamsɩ siŋŋ, nɛ tɛtʋ ndʋ tɩ-hɔɔlʋʋ 10 ñɩŋgʋ tɔlɩ; nɛ tɛtʋ ñamsʋʋ mbʋ, pɩkʋ ɛyaa 7 000, nɛ pɩkazɩ mba yɔ sɔɔndʋ kpa-wɛ nɛ paha Ɛsɔ weyi ɛwɛ ɛsɔdaa yɔ samtʋ.
14 Kʋñɔŋ 2 ñɩŋgʋ+ ɖɛwa. Na! Kʋñɔŋ 3 ñɩŋgʋ ɖiɣni kɔm lɛɛ lɛɛ.
15 Ɛsɔ tiyiyu 7 ñɩnʋ hʋlɩ ɛ-ɛgandɩyɛ.+ Nɛ nɔsɩ sɔsɔsɩ tili ɛsɔdaa nɛ sɩtɔŋ se: «Ɛjaɖɛ kewiyaɣ pɩsɩ ɖa-Kɩbaɣlʋ nɛ ɛ-tɛ Krɩstʋ pe-Kewiyaɣ,+ nɛ ɛkaɣ tɔɔʋ kewiyitu tam.»+
16 Nɛ ɛzʋtʋyaa 24 mba+ paacaɣ Ɛsɔ ɛsɩndaa pe-kewiyaɣ kpelisi yɔɔ yɔ, poluŋ pa-nʋmbɔla yɔɔ nɛ papa pɛ-ɛsa nɛ pɛsɛɛ Ɛsɔ, 17 nɛ pɔtɔŋ se: «Ðɩsɛɣ-ŋ se ŋlabaɣ lɛ, Yehowa* Ɛsɔ, Ðoŋ Tɩŋa Tʋ, weyi ɛwɛɛ+ nɛ weyi ɛɛwɛɛ yɔ, mbʋ pʋyɔɔ yɔ ŋkpaɣ ño-ɖoŋ sɔsɔŋ, nɛ ŋpaɣzɩ kewiyitu tɔɔʋ.+ 18 Ɛlɛ ajɛɛ kɔ pana, nɛ ña-maɣmaɣ ña-pana kɔɔ, nɛ alɩwaatʋ ndʋ paɖʋwa yɔ tɩtalɩ se pahʋʋnɩ sɩɖaa tɔm nɛ pɛhɛyɩ+ nayaa mba pɛkɛ ño-yomaa yɔ+ nɛ ɛyaa kiɖeɖema nɛ mba peseɣ ña-hɩɖɛ sɔɔndʋ yɔ, cikpema nɛ sɔsaa, nɛ ŋɖɩzɩ mba pɛwɛɛkɩɣ* tɛtʋ yɔ.»+
19 Nɛ patʋlɩ Ɛsɔ tɛ templo kooka kiɖeɖeɣa ɛsɔdaa, nɛ pana ɛ-ɛgbɛyɛ ɖʋʋ aɖakaɣ e-templo kooka kiɖeɖeɣa taa.+ Nɛ tɛʋ ñɩlɩsɩ nɛ nɔsɩ tili nɛ tɛʋ nazɩ nɛ tɛtʋ ñamsɩ nɛ ɖɔmbɛɛ tɔlɩ siŋŋ.
12 Ðɩnɛ ɛlɛ yʋsaɣ sɔsɔɔ nakɛyɛ lɩɩ ɛsɔdaa: Halʋ nɔɔyʋ+ su wɩsɩ, nɛ fenaɣ wɛɛ ɛ-nɩŋgbanzɩ tɛɛ, nɛ ɛ-ñʋʋ taa nɛ awiya hulaɣ nakɛyɛ ŋga palabɩ-kɛ nɛ tɩɩnzɩ 12 yɔ, 2 nɛ ɛɛhaɣ hoɣa. Nɛ ɛɛwɩzɩ lʋlʋʋ; pʋyɔɔ lɛ, ɛmakaɣ kubusi mbʋ pʋyɔɔ yɔ ɛnɩɣaɣ lʋlʋʋ wɩzasɩ.
3 Yʋsaɣ lɛɛka lɩɩ ɛsɔdaa. Na! Ðʋmanʋʋ sɔsɔʋ nakʋyʋ,+ kɩsɛ ɛzɩ miŋ yɔ, kɩwɛnɩ ñʋŋ 7 nɛ hɩŋ 10 nɛ kɩ-ñʋŋ taa nɛ ñɩɣlɩm hulasɩ lʋbɛ; 4 nɛ ki-suu hɔŋ ɛsɔdaa tɩɩnzɩ+ hɔɔlʋʋ 3 ñɩŋgʋ, nɛ kɩlɔ-sɩ tɛtʋ yɔɔ.+ Nɛ ɖʋmanʋʋ sɩŋ halʋ+ weyi ɛɛwɩzɩ lʋlʋʋ yɔ ɛ-ɛsɩndaa, se pɩsa nɛ alɩwaatʋ ndʋ ɛlʋlʋʋ yɔ, kɩpɩzɩ nɛ kɩtɔɔ ɛ-pɩɣa.
5 Nɛ ɛlʋlɩ pɩɣa nakɛyɛ,+ abalɩbɩɣa, ŋga kakaɣ ɖiyuu ajɛɛ kpeekpe nɛ ñɩɣyʋʋ ɖaʋ yɔ.+ Nɛ pico* ɛ-pɩɣa nɛ pɩkpazɩ-kɛ Ɛsɔ nɛ e-kewiyaɣ kpelaɣ pɔ-cɔlɔ. 6 Nɛ halʋ se nɛ ewolo kañɩmbusuu taa, ɖenɖe Ɛsɔ ñɔɔzɩ-ɩ lone naɖɩyɛ nɛ ɛsɩɩ nɛ ɖenɖe pacalɩɣ-ɩ kɩyakɩŋ 1 260 yɔ.+
7 Nɛ you nakʋyʋ lɩɩ ɛsɔdaa: Mikayɛɛlɩ*+ nɛ e-tiyiyaa poyoni ɖʋmanʋʋ, nɛ ɖʋmanʋʋ nɛ ki-tiyiyaa poyooni-wɛ 8 ɛlɛ patɩwa,* nɛ patɩtasɩ-wɛ hiɣu lone naɖɩyɛ ɛsɔdaa. 9 Pʋyɔɔ pɔlɔ ɖʋmanʋʋ sɔsɔʋ,+ ɖooo kiɖe tɛɛ ɖʋm,+ weyi payaɣ-ɩ se Eleeu+ nɛ Sataŋ yɔ,+ weyi eɖiɣni peɣzuu tɛtʋ tɩŋa yɔ;+ pɔlɔ-ɩ tɛtʋ yɔɔ,+ nɛ pɛkpɛndɩ ɛ nɛ e-tiyiyaa nɛ pɔlɔ. 10 Manɩɩ nɔɔ sɔsɔɔ nakɛyɛ ɛsɔdaa, kɔtɔŋaɣ se:
«Lɛɛlɛɛyɔ ɖɛ-Ɛsɔ ñʋʋ yabʋ+ nɛ e-ɖoŋ nɛ e-Kewiyaɣ+ nɛ ɛ-Krɩstʋ ɖoŋ patalaa, mbʋ pʋyɔɔ yɔ pɔlɔ weyi ɛkʋyʋʋ ɖo-koobiya yɔɔ yɔ, weyi ɛkʋyʋʋ pɔ-yɔɔ wɩsɩ nɛ ɖoo ɖɛ-Ɛsɔ ɛsɩndaa yɔ!+ 11 Nɛ patɩŋnɩ Heɣa calɩm yɔɔ+ nɛ pa-aseɣɖe tɔm yɔɔ+ nɛ pawabɩ-ɩ,+ nɛ patɩsɔɔlɩ pa-kalɩzasɩ*+ halɩ pɩkpɛndɩnɩ sɩm ɛsɩndaa. 12 Pʋyɔɔ lɛ, mɩ-taa ɛla leleŋ, ɛsɔdaa nɛ mɩ mba ɩwɛ peeɖe yɔ! Pɩtɔɔ tɛtʋ nɛ teŋgu,+ mbʋ pʋyɔɔ yɔ Eleeu tibi mɩ-cɔlɔ, nɛ ɛkɔ pana siŋŋ, mbʋ pʋyɔɔ yɔ ɛnawa se alɩwaatʋ pazɩ yem pɩkazɩ-ɩ.»+
13 Nɛ ɖʋmanʋʋ nawa se pɔlɔ-kʋ tɛtʋ yɔɔ lɛ,+ kɩnazɩ halʋ+ weyi ɛlʋlɩ abalɩbɩɣa yɔ. 14 Ɛlɛ pɛcɛlɩ halʋ kpeluu* sɔsɔʋ keŋ 2,+ se ɛpɩzɩ nɛ ɛkʋyɩ nɛ ewolo e-lone taa kañɩmbusuu taa, ɖenɖe pɩwɛɛ se pacalɩ-ɩ wɩyɛ nɛ wɛɛ nɛ wɩyɛ hɔɔlʋʋ* yɔ,+ ɖooo poliŋ nɛ ɖʋm.+
15 Nɛ ɖʋm tɔ lɩm nɛ ɛ-nɔɔ taa, pɩwɛ ɛzɩ pɔɔ yɔ halʋ wayɩ, se eyele nɛ pɔɔ ŋga kakpaɣ-ɩ. 16 Ɛlɛ tɛtʋ kɔɔ se tɩsɩnɩ halʋ, nɛ tɛtʋ haa tɩ-nɔɔ nɛ tili pɔɔ ŋga ɖʋmanʋʋ tɔnɩ kɩ-nɔɔ taa yɔ. 17 Ðɩnɛ ɛlɛ ɖʋmanʋʋ taa wɩɩnɩ halʋ siŋŋ nɛ kiwolo se kɩla you nɛ ɛ-lʋlʋʋ taa ñɩma* mba pɩkazaa yɔ,+ mba pɔɖɔŋ Ɛsɔ paɣtʋ yɔɔ nɛ paɖʋ-wɛ tʋmɩyɛ se palɩzɩ aseɣɖe Yesu yɔɔ yɔ.+
13 Nɛ kɩsɩŋ* teŋgu kañɩŋa yɔɔ.
Nɛ mana tɛtɛgbɩnɛ naɖɩyɛ,+ ɖɩlɩnɩ teŋgu taa nɛ ɖɩkpaɣ,+ ɖɩwɛnɩ hɩŋ 10 nɛ ñʋŋ 7, nɛ ɖɩ-hɩŋ yɔɔ nɛ ñɩɣlɩm hulasɩ 10, ɛlɛ ɖɩ-ñʋŋ taa nɛ hɩla wena ayɔɔdʋʋ tɔm kɩdɛkɛdɩtʋ Ɛsɔ yɔɔ yɔ. 2 Nɛ tɛtɛgbɩnɛ nɖɩ manawa yɔ, ɖɩɩwɛ ɛzɩ kpou yɔ, ɛlɛ ɖɩ-nɩŋgbanzɩ kaawɛ ɛzɩ kpemtɔɔyaɣ ñɩnzɩ yɔ, nɛ ɖɩ-nɔɔ kaawɛ ɛzɩ mʋʋzʋʋ nɔɔ yɔ. Nɛ ɖʋmanʋʋ+ cɛlɩ kpɩnɛ nɖɩ ki-ɖoŋ nɛ ki-kewiyaɣ kpelaɣ nɛ ɖoŋ sɔsɔŋ.+
3 Mana ɖɩ-ñʋʋ lɛɛkʋ kɩcaɣ ɛzɩ paɖʋ-kʋ heŋ sɩm yɔɔ sɩm yɔɔ yɔ, ɛlɛ ɖi-heŋ sɔsɔŋ ɛnɩ ɛwaa,+ nɛ pɩɖɩɣzɩ tɛtʋ kpeekpe nɛ tɩtɩŋ tɛtɛgbɩnɛ wayɩ. 4 Nɛ pɛsɛɛ ɖʋmanʋʋ, mbʋ pʋyɔɔ yɔ kɩha ɖoŋ tɛtɛgbɩnɛ, nɛ pɛsɛɛ tɛtɛgbɩnɛ nɛ pɔtɔ se: «Awɛ ɛzɩ tɛtɛgbɩnɛ nɖɩ yɔ, nɛ apɩzɩɣ nɛ eyooni-ɖɩ?» 5 Paha-ɖɩ nɔɔ ŋga kɔyɔɔdʋʋ tɔm sɔsɔtʋ nɛ tɔm kɩdɛkɛdɩtʋ wondu kiɖeɖetu yɔɔ yɔ, nɛ paha-ɖɩ ɖoŋ se ɖɩla mbʋ ɖi-liu wɛɛ yɔ fenasɩ 42.+ 6 Nɛ ɖikuli ɖɩ-nɔɔ nɛ ɖɩyɔɔdɩ tɔm kɩdɛkɛdɩtʋ+ Ɛsɔ yɔɔ, ɖɩyɔɔdɩ tɔm kɩdɛkɛdɩtʋ ɛ-hɩɖɛ nɛ ɛ-ɖɩjaɣyɛ yɔɔ, pʋ-tɔbʋʋ se mba pɛwɛ ɛsɔdaa yɔ pɔ-yɔɔ.+ 7 Paha-ɖɩ nʋmɔʋ se ɖiyooni ɛyaa kiɖeɖema nɛ ɖɩwabɩ-wɛ,+ nɛ paha-ɖɩ ɖoŋ cejewe nɛ samasɩ nɛ kʋnʋmɩŋ* nɛ ajɛɛ kpeekpe yɔɔ. 8 Nɛ mba payɩ pɛwɛ tɛtʋ yɔɔ yɔ, pakaɣ-ɖɩ sɛʋ. Kpaɣnɩ ɖooo ɛjaɖɛ kiɖe tɛɛ, patɩma pa-taa nɔɔyʋ hɩɖɛ Heɣa ŋga paakʋ-kɛ yɔ+ ke-wezuu takayaɣ kikpiyaɣ taa.+
9 Ye nɔɔyʋ ɛwɛnɩ nɩŋgbaŋʋʋ yɔ, ɛnɩɩ.+ 10 Ye pɩwɛɛ se nɔɔyʋ ewolo yomiye taa yɔ, ɛkaɣ wobu yomiye taa. Ye nɔɔyʋ ɛkʋʋnɩ laɣɖɛ yɔ,* pɩwɛɛ se pakʋ-ɩ nɛ laɣɖɛ.+ Cɩnɛ pɩpɔzʋʋ ɛyaa kiɖeɖema+ laŋɩyɛ ɖɔkʋʋ+ nɛ tisuu.+
11 Pʋwayɩ lɛ mana tɛtɛgbɩnɛ lɛɛɖɛ, ɖɩlɩnɩ tɛtɛɛ nɛ ɖɩkpaɣ, nɛ ɖɩwɛnɩ hɩŋ 2 ɛzɩ heɣa yɔ, ɛlɛ ɖɩpaɣzɩ yɔɔdʋʋ ɛzɩ ɖʋmanʋʋ yɔ.+ 12 Ðɩlakɩnɩ tʋmɩyɛ kajalaɣ tɛtɛgbɩnɛ+ ɖoŋ tɩŋa ɖɩ-ɛsɩndaa. Nɛ ɖɩlakɩ se tɛtʋ nɛ mba pɛwɛ tɩ-yɔɔ yɔ pɛsɛɛ kajalaɣ tɛtɛgbɩnɛ, nɖɩ ɖi-heŋ weyi paɖʋ-ɖɩ sɩm yɔɔ sɩm yɔɔ yɔ ɛwawa yɔ.+ 13 Nɛ ɖɩlakɩ yʋsasɩ sɔsɔsɩ ɛyaa ɛsɩndaa, halɩ ɖɩlakɩ nɛ miŋ lɩɣnɩ ɛsɔdaa nɛ etiki tataa.
14 Ðipeɣziɣ ɛyaa mba pɛwɛ tɛtʋ yɔɔ yɔ, yʋsasɩ nzɩ paaha-ɖɩ nʋmɔʋ se ɖɩla tɛtɛgbɩnɛ ɛsɩndaa yɔ sɩ-yɔɔ, nɛ ɖiheyiɣ ɛyaa mba pɛwɛ tɛtʋ yɔɔ yɔ se polu tɛtɛgbɩnɛ nɖɩ paalom-ɖɩ laɣɖɛ ɛlɛ ɖɩɖaɣnɩ wɛʋ wezuu yɔ+ ɖɩ-lɛzʋʋ.+ 15 Nɛ paaha-ɖɩ nʋmɔʋ se ɖɩha fezuu tɛtɛgbɩnɛ lɛzʋʋ, se pɩsa nɛ tɛtɛgbɩnɛ lɛzʋʋ pɩzɩ kɩyɔɔdɩ nɛ kiyele ɖɔɖɔ nɛ pakʋ mba payɩ pekiziɣ se paasɛɣ tɛtɛgbɩnɛ lɛzʋʋ yɔ.
16 Ðɩñɩkɩɣ ɛyaa tɩŋa yɔɔ—cikpema nɛ sɔsaa, ñɩm tɩnaa nɛ kʋñɔndɩnaa, mba pɛwɛ pa-tɩ yɔɔ yɔ nɛ yomaa—se pɩwɛɛ se peyele nɛ payʋsɩ pe-nesi kɩbanzɩ yɔɔ yaa pe-kila taa,+ 17 nɛ ɖɔɖɔ se nɔɔyʋ ɛtaapɩzɩ nɛ ɛya yaa ɛpɛdɩ ye pɩtɩkɛ ɛyʋ weyi ɛwɛnɩ tɛtɛgbɩnɛ yʋsaɣ, ɖɩ-hɩɖɛ+ yaa ɖɩ-hɩɖɛ mayaɣ yɔ.+ 18 Cɩnɛ pɩpɔzʋʋ lɔŋsɩnɖɛ: Weyi ɛwɛnɩ lɛɣtʋ yɔ, ɛla tɛtɛgbɩnɛ mayaɣ akɔnta, mbʋ pʋyɔɔ yɔ pɩkɛ ɛyʋ mayaɣ, nɛ ɖɩ-mayaɣ lɛ 666.+
14 Pʋwayɩ lɛ, mana Heɣa+ kasɩŋ Siyɔŋ Pʋʋ yɔɔ,+ ka nɛ ɛyaa 144 000+ mba pama pe-kila taa ka-hɩɖɛ nɛ ka-Caa hɩɖɛ yɔ.+ 2 Manɩ kɔkɔɖɛ naɖɩyɛ lɩnɩ ɛsɔdaa, ɖɩwɛ ɛzɩ lɩm sakɩyɛ falʋʋ yɔ nɛ ɛzɩ tɛʋ nazʋʋ ɖoŋ nɛ pɩlakɩ kɔkɔɖɛ yɔ; nɛ kɔkɔɖɛ nɖɩ manɩwa yɔ ɖɩɩwɛ ɛzɩ hendu teyaa mba pamakɩ cɩmɩŋ pe-hendu teu taa yɔ. 3 Nɛ pɛwɛɛ nɛ peteɣ hendu natʋyʋ ndʋ tɩwɛ ɛzɩ hendu kɩfatʋ natʋyʋ yɔ+ kewiyaɣ kpelaɣ ɛsɩndaa nɛ ɛsadɩnaa + nɛ ɛzʋtʋyaa+ pɛ-ɛsɩndaa, nɛ nɔɔyʋ taapɩzɩɣ se ɛkpɛlɩkɩ hendu ndʋ nɛ pɩtasɩnɩ ɛyaa 144 000,+ mba payabɩ-wɛ nɛ tɛtʋ yɔɔ yɔ. 4 Pɛkɛ mba patipisi pa-tɩ nɛ halaa yɔ; toovenim taa lɛ, pɛwɛ ɛzɩ pɛlaa mba patɩtɩlɩ abalaa yɔ.+ Pɛkɛ mba patɩŋɩɣ Heɣa wayɩ tam paa le kowoki yɔ.+ Payabɩ-wɛ+ nɛ ɛyaa taa se pɛkɛ kajalaɣ pee+ wena pahaɣ Ɛsɔ nɛ Heɣa yɔ, 5 nɛ patɩna cɛtɩm nabʋyʋ pɔ-nɔsɩ taa; pɛfɛyɩnɩ kɩwɛɛkɩtʋ natʋyʋ.+
6 Nɛ mana Ɛsɔ tiyiyu lɛlʋ, eɖiɣni kʋyʋʋ ɛsɔdaa,* nɛ ɛɛwɛnɩ tamtam tɔm kɩbandʋ se esusi-tʋ mba pɛwɛ tɛtʋ yɔɔ yɔ, ajɛɛ kpeekpe nɛ cejewe kpeekpe nɛ kʋnʋmɩŋ* kpeekpe nɛ samasɩ kpeekpe.+ 7 Ɛyɔɔdaɣnɩ nɔɔ kɩkʋyaɣ se: «Ise Ɛsɔ sɔɔndʋ nɛ ɩha-ɩ samtʋ, mbʋ pʋyɔɔ yɔ ɛ-tɔm hʋʋ ñɩɣyʋʋ talaa,+ pʋyɔɔ lɛ ɩsɛɛ Weyi ɛlabɩ ɛsɔdaa nɛ tɛtʋ nɛ teŋgu+ nɛ lɩm hila yɔ.»
8 Ɛsɔ tiyiyu lɛlʋ, 2 ñɩnʋ, tɩŋ ɛ-wayɩ, nɛ ɛtɔŋ se: «Kɩtɔlaa! Babilɔɔnɩ Sɔsɔʋ+ tɔlaa,+ ŋgʋ kiyeba nɛ ajɛɛ tɩŋa ñɔɔ kɩ-kʋzʋʋ kɩdɛkɛdʋʋ* kɔɖɛyɩ* tɛ vɛɛ yɔ!»+
9 Ɛsɔ tiyiyu lɛlʋ, 3 ñɩnʋ, tɩŋ pa-wayɩ, nɛ ɛyɔɔdʋʋnɩ nɔɔ kɩkʋyaɣ se: «Ye nɔɔyʋ ɛsɛɣ tɛtɛgbɩnɛ+ nɛ ɖɩ-lɛzʋʋ nɛ ɛmʋʋ yʋsaɣ nakɛyɛ e-kiɖe taa yaa e-nesi yɔɔ yɔ,+ 10 ɛkaɣ ñɔʋ ɖɔɖɔ Ɛsɔ pana vɛɛ ŋgʋ papɩyɩ Ɛ-pana kɔpʋ taa+ nɛ patɩca kɩ-taa lɩm yɔ; nɛ pakaɣ kpaɣʋ miŋ nɛ tɩm nɛ pawɩlɩnɩ-ɩ kʋñɔŋ+ Ɛsɔ tiyiyaa kiɖeɖema ɛsɩndaa nɛ Heɣa ɛsɩndaa. 11 Nɛ pa-kʋñɔŋ wɩlʋʋ ñɔsɩ kpaɣ tam,+ nɛ mba pɛsɛɣ tɛtɛgbɩnɛ nɛ ɖɩ-lɛzʋʋ nɛ weyi ɛmʋʋ ɖɩ-hɩɖɛ yʋsaɣ yɔ, wɩsɩ nɛ ɖoo lɛ, pɛfɛyɩnɩ hɛzʋʋ.+ 12 Cɩnɛ pɩpɔzʋʋ ɛyaa kiɖeɖema laŋɩyɛ ɖɔkʋʋ,+ mba pɔɖɔŋ Ɛsɔ paɣtʋ yɔɔ nɛ pɔñɔʋnɩ Yesu tisuu kpam yɔ.»+
13 Nɛ manɩɩ nɔɔ nakɛyɛ kalɩnɩ ɛsɔdaa nɛ kɔtɔŋ se: «Ma se: Koboyaɣ tɩnaa kɛlɛ sɩɖaa mba pasɩkɩ pa nɛ Kɩbaɣlʋ pɔ-nɔɔ kʋɖʋmaɣ labʋ taa+ pɩkpaɣʋnɩ lɛɛlɛɛyɔ yɔ. Ɛɛɛ, fezuu yɔɔdʋʋna, pɛhɛzɩnɩ pa-tʋma ɖoŋ ñɩna labʋ, mbʋ pʋyɔɔ yɔ, mbʋ palaba yɔ pɩtɩŋɩɣ-wɛ.»
14 Pʋwayɩ lɛ, mana ɛsɔmɩnʋʋ kʋhʋlʋmʋʋ nakʋyʋ, nɛ nɔɔyʋ kaacaɣ ɛsɔmɩnʋʋ ŋgʋ kɩ-yɔɔ, ɛwɛ ɛzɩ ɛyʋ pɩyalʋ yɔ,+ sika awiya hulaɣ wɛ ɛ-ñʋʋ taa nɛ loozo ŋgʋ kɩwɛ lɔŋ yɔ kɩwɛɛ e-nesi taa.
15 Ɛsɔ tiyiyu lɛlʋ lɩɩnɩ templo kooka kiɖeɖeɣa taa, ɛma kubuka sɔsɔɔ weyi ɛcaɣ ɛsɔmɩnʋʋ yɔɔ yɔ ɛ-cɔlɔ kiŋ se: «Tisi ño-loozo nɛ ŋkʋ, mbʋ pʋyɔɔ yɔ ñɩɣyʋʋ talaa se pakʋ, mbʋ pʋyɔɔ yɔ tɛtʋ yɔɔ tɔɔnaɣ kʋkʋmaɣ pɩ camɩyɛ.»+ 16 Nɛ weyi ɛcaɣ ɛsɔmɩnʋʋ yɔɔ yɔ, etisi e-loozo tɛtʋ yɔɔ, nɛ pakʋ tɛtʋ yɔɔ tɔɔnaɣ.
17 Nɛ Ɛsɔ tiyiyu lɛlʋ ɖɔɖɔ lɩɩnɩ templo kooka kiɖeɖeɣa ŋga kɛwɛ ɛsɔdaa yɔ ka-taa, nɛ ɛɛwɛnɩ ɖɔɖɔ loozo ŋgʋ kɩwɛ lɔŋ yɔ.
18 Nɛ Ɛsɔ tiyiyu lɛlʋ ɖɔɖɔ lɩɩnɩ altaaru taa, nɛ ɛɛwɛnɩ ɖoŋ miŋ yɔɔ. Nɛ ɛma kubuka sɔsɔɔ weyi ɛɛwɛnɩ loozo ŋgʋ kɩwɛ lɔŋ yɔ ɛ-cɔlɔ kiŋ, nɛ ɛtɔ se: «Tisi ño-loozo ŋgʋ kɩwɛ lɔŋ yɔ nɛ ŋkpeɣli tɛtʋ yɔɔ viiñi tikiŋ, mbʋ pʋyɔɔ yɔ ki-pee pɩwa.»+ 19 Ɛsɔ tiyiyu tisi e-loozo tɛtʋ yɔɔ nɛ ekpeɣli viiñi ŋgʋ kɩwɛ tɛtʋ yɔɔ yɔ, nɛ ɛlɔ-kʋ Ɛsɔ pana tɛ viiñi ɖɩfɛyɩyɛ sɔsɔɖɛ taa.+ 20 Pɛfɛyɩ viiñi tɛtʋ wayɩ, nɛ calɩm lɩɩnɩ viiñi ɖɩfɛyɩyɛ taa nɛ pɩkpa nɛ pɩtalɩ kpaŋnaŋ nɔsɩ yɔɔ ñɩɣtʋ, nɛ pikpe nɛ pɩtalɩ staadɩnaa 1 600.*
15 Nɛ mana yʋsaɣ lɛɛka ɛsɔdaa, yʋsaɣ sɔsɔɔ nɛ kɛwɛ piti: Ɛsɔ tiyiyaa 7+ ɖɔkɩ asɛyɩŋ 7. Ɛnɩ kɛnɩ kɛdɛzaɣ ñɩŋ, mbʋ pʋyɔɔ yɔ ɩ-yɔɔ pɩtɩŋɩɣna nɛ Ɛsɔ pana tɛzɩ tɛm.+
2 Nɛ mana nabʋyʋ, pɩwɛ ɛzɩ teŋgu ŋgʋ kɩwɛ ɛzɩ ñɩnʋʋ yɔ,+ kisidini miŋ; nɛ mba pawabɩ+ tɛtɛgbɩnɛ nɛ ɖɩ-lɛzʋʋ+ nɛ ɖɩ-hɩɖɛ mayaɣ+ yɔ paasɩŋ teŋgu ŋgʋ kɩwɛ ɛzɩ ñɩnʋʋ yɔ kɩ-cɔlɔ, pɔɖɔkɩ Ɛsɔ cɩmɩŋ. 3 Paawɛɛ nɛ peteɣ Ɛsɔ yom Moyizi hendu+ nɛ Heɣa hendu,+ nɛ pɔtɔŋ se:
«Ña-tʋma paɣlaa nɛ awɛ piti,+ Yehowa* Ɛsɔ, Ðoŋ Tɩŋa Tʋ.+ Ña-nʋmɔŋ wɛ siɣsiɣ nɛ ɩkɛ toovenim,+ tamtam Wiyaʋ.+ 4 Yehowa,* toovenim taa lɛ, aakaɣ-ŋ sɔɔndʋ seu nɛ ɛsa ña-hɩɖɛ? Mbʋ pʋyɔɔ yɔ ñe-ɖeke ñɛkɛnɩ siɣsiɣ tʋ!+ Mbʋ pʋyɔɔ yɔ ajɛɛ tɩŋa kaɣ kɔm ñɛ-ɛsɩndaa nɛ asɛ-ŋ,+ mbʋ pʋyɔɔ yɔ palɩzɩ ña-paɣtʋ siɣsiɣ ñɩndʋ nɛ pawɩlɩ.»
5 Pʋwayɩ lɛ mana, patʋlɩ aseɣɖe lɩzʋʋ kizinziku+ tɛ kooka kiɖeɖeɣa ɛsɔdaa,+ 6 nɛ Ɛsɔ tiyiyaa 7 mba pɔɖɔkɩ asɛyɩŋ 7 yɔ,+ palɩɩnɩ kooka kiɖeɖeɣa taa, posu wondu ndʋ tɩwɛ cɩɖɩ cɩɖɩ nɛ tɩñɩlɩsɩɣ yɔ nɛ pata sika kɩtamɩŋ pa-laŋa taa. 7 Ɛsadɩnaa 4 taa kʋɖʋm cɛlɩ Ɛsɔ tiyiyaa 7 mba sika ñanzɩ 7 nzɩ Ɛsɔ pana su sɩ-taa ɖo yɔ,+ Ɛsɔ weyi ɛwɛ wezuu tam yɔ. 8 Nɛ ñɔsɩ su kooka kiɖeɖeɣa taa ɖo Ɛsɔ samtʋ yɔɔ+ nɛ e-ɖoŋ yɔɔ, nɛ nɔɔyʋ taapɩzɩɣ se ɛsʋʋ kooka kiɖeɖeɣa taa pɩkɔɔ nɛ pɩtalɩ alɩwaatʋ ndʋ Ɛsɔ tiyiyaa 7 mba pa-asɛyɩŋ + tɛma yɔ.
16 Nɛ manɩɩ nɔɔ ɖoŋ ñɩŋga nakɛyɛ, kalɩnɩ kooka kiɖeɖeɣa taa+ nɛ keheyiɣ Ɛsɔ tiyiyaa mba pa-lʋbɛ se: «Iwolo nɛ ɩpɩyɩ mbʋ pɩwɛ Ɛsɔ pana tɛ ñanzɩ 7 taa yɔ tɛtʋ yɔɔ.»+
2 Kajalaɣ ñɩnʋ wolo nɛ ɛpɩyɩ mbʋ pɩwɛ ɛ-ñanaɣ taa yɔ tɛtʋ yɔɔ.+ Nɛ heŋ kɩdɛkɛdɩŋ nɛ weyi ɩ-tɔm caɣ kaɖɛ yɔ+ ɩnazɩ ɛyaa mba paawɛnɩ tɛtɛgbɩnɛ yʋsaɣ+ nɛ pɛwɛɛ nɛ pɛsɛɣ ɖɩ-lɛzʋʋ yɔ.+
3 Naalɛ ñɩnʋ pɩyɩ mbʋ pɩwɛ ɛ-ñanaɣ taa yɔ teŋgu taa.+ Nɛ kɩpɩsɩ calɩm+ ɛzɩ sɩɖʋ calɩm yɔ, nɛ mbʋ payɩ pɩwɛ wezuu yɔ* pɩsɩ, ɛɛɛ, wondu ndʋ tɩwɛ teŋgu taa yɔ.+
4 Naadozo ñɩnʋ pɩyɩ mbʋ pɩwɛ ɛ-ñanaɣ taa yɔ pɔsɩ taa nɛ lɩm hila taa.+ Nɛ papɩsɩ calɩm.+ 5 Manɩɩ Ɛsɔ tiyiyu weyi ɛwɛnɩ ɖoŋ lɩm yɔɔ yɔ, ɛyɔɔdaa se: «Ña Weyi ŋwɛɛ nɛ ŋŋwɛɛ yɔ,+ Toovenim tʋ,+ ŋwɛ siɣsiɣ, mbʋ pʋyɔɔ yɔ ŋhʋ tɔm mbʋ,+ 6 mbʋ pʋyɔɔ yɔ pɛkpɛdɩ ɛyaa kiɖeɖema nɛ nayaa calɩm,+ nɛ ŋcɛlɩ-wɛ calɩm se pɔñɔɔ;+ pamʋnɩ mbʋ.»+ 7 Nɛ manɩɩ altaaru yɔɔdaa se: «Ɛɛɛ, Yehowa* Ɛsɔ, Ðoŋ Tɩŋa Tʋ,+ ñɔ-tɔm hʋʋ kɛ toovenim nɛ pɩwɛ siɣsiɣ.»+
8 Naanza ñɩnʋ pɩyɩ mbʋ pɩwɛ ɛ-ñanaɣ taa yɔ wɩsɩ yɔɔ,+ nɛ paha wɩsɩ nʋmɔʋ se sɩñaɣ ɛyaa nɛ miŋ. 9 Nɛ wɩsɩ ñaɣ ɛyaa siŋŋ, ɛlɛ pɔyɔɔdɩ tɔm kɩdɛkɛdɩtʋ Ɛsɔ hɩɖɛ yɔɔ, ɛnʋ weyi ɛwɛnɩ ɖoŋ asɛyɩŋ ɛnɩ ɩ-yɔɔ yɔ, nɛ patikpiɖi nɛ patɩha-ɩ samtʋ.
10 Kagbanzɩ ñɩnʋ pɩyɩ mbʋ pɩwɛ ɛ-ñanaɣ taa yɔ tɛtɛgbɩnɛ kewiyaɣ kpelaɣ yɔɔ. Nɛ ɖi-kewiyaɣ yu cɩkpɛndʋʋ,+ nɛ ɛyaa paɣzɩ pa-nzʋlʋma ñasʋʋ pa-wɩzasɩ yɔɔ, 11 ɛlɛ pɔyɔɔdɩ tɔm kɩdɛkɛdɩtʋ Ɛsɔ weyi ɛwɛ ɛsɔdaa yɔ ɛ-yɔɔ pa-wɩzasɩ nɛ pe-heŋ yɔɔ, nɛ patikpiɖi pa-tʋma yɔɔ.
12 Loɖo ñɩnʋ pɩyɩ mbʋ pɩwɛ ɛ-ñanaɣ taa yɔ pɔɔ sɔsɔɔ Efraatɩ taa,+ nɛ ka-taa lɩm sɔɔ+ se pɩñɔɔzɩ nʋmɔʋ awiya+ wena alɩɣnɩ wɩsɩ ɖɩlɩyɛ taa yɔ.
13 Nɛ mana azuluma tɔm* 3 ndʋ tɩwɛ ɛzɩ saya yɔ, tɩlɩnɩ ɖʋmanʋʋ nɔɔ taa+ nɛ tɛtɛgbɩnɛ nɔɔ taa nɛ cɛtɩm nayʋ nɔɔ taa. 14 Toovenim taa lɛ, tɩkɛ tɔm ndʋ tɩlɩnɩ aleewaa cɔlɔ yɔ nɛ tɩlakɩ yʋsasɩ,+ nɛ tiwoki tɛtʋ kpeekpe yɔɔ awiya cɔlɔ, se tikpeɣli-yɛ Ɛsɔ Ðoŋ Tɩŋa Tʋ tɛ kɩyakʋ sɔsɔʋ+ you taa.+
15 «Na! Mɔnkɔŋ ɛzɩ mɩlʋ yɔ.+ Koboyaɣ tʋ lɛ weyi ɛcakɩnɩ ɛ-ɛsa+ nɛ ɛɖɔkɩ e-tokonaa kɩtɩnaa, se pɩsa nɛ ɛtaaɖɔ ndaakpeɖe nɛ ɛyaa na ɛ-fɛyɛ yɔ.»+
16 Nɛ tikpeɣli-yɛ lone nɖɩ payaɣ Ebree taa se Armaagedɔɔ* yɔ ɖɩ-taa.+
17 Lʋbɛ ñɩnʋ pɩyɩ mbʋ pɩwɛ ɛ-ñanaɣ taa yɔ helim taa. Ðɩnɛ ɛlɛ nɔɔ ɖoŋ ñɩŋga nakɛyɛ lɩɩnɩ kooka kiɖeɖeɣa taa+ kewiyaɣ kpelaɣ cɔlɔ nɛ kɔtɔŋ se: «Pɩlabɩ mbʋ!» 18 Nɛ tɛʋ ñɩlɩsɩ nɛ nɔsɩ tili nɛ tɛʋ nazɩ, nɛ tɛtʋ ñamsɩ siŋŋ, nɛ tɩtɩñamsɩ mbʋ wiɖiyi kpaɣnɩ alɩwaatʋ ndʋ ɛyaa wɛ tɛtʋ yɔɔ yɔ,+ tɛtʋ ñamsʋʋ mbʋ pɩɩtalɩ ɖooo poliŋ nɛ pɩwɛɛ ɖoŋ siŋŋ. 19 Tɛtʋ sɔsɔtʋ+ tayɩ tam nabudozo taa, nɛ ajɛɛ tɛtʋ tɔlɩ; nɛ pɔtɔzɩ Babilɔɔnɩ Sɔsɔʋ+ yɔɔ Ɛsɔ ɛsɩndaa, se pɛcɛlɩ-kʋ ɛ-pana sɔsɔna tɛ vɛɛ kɔpʋ.+ 20 Pɩtasɩ lɛ, lɩm hɛkʋ taa tɛtʋ tɩŋa sewa, nɛ patɩna pʋŋ.+ 21 Nɛ ɖɔmbɛɛ sɔsɔna lɩɩnɩ ɛsɔdaa nɛ atɔlɩ ɛyaa yɔɔ, paa nɖɩ lɛ ɖɩwɛ yuŋ ɛzɩ talaŋ kʋɖʋmʋʋ* yɔ;+ nɛ ɛyaa yɔɔdɩ tɔm kɩdɛkɛdɩtʋ Ɛsɔ yɔɔ asɛyʋʋ ŋgʋ ɖɔmbɛɛ kɔnaa yɔ kɩ-yɔɔ,+ mbʋ pʋyɔɔ yɔ asɛyʋʋ ŋgʋ kɩɩpaɣlaa pɩfɛyɩ yɔɔdʋʋ.
17 Ɛsɔ tiyiyaa 7 mba paaɖɔkɩ ñanzɩ 7 yɔ pa-taa kʋɖʋm+ kɔɔ nɛ eheyi-m se: «Kɔɔ, mankaɣ-ŋ wɩlʋʋ halʋ hayitu laɖʋ sɔsɔ weyi ɛcaɣ lɩm sakɩyɛ yɔɔ yɔ ɛ-tɔm hʋʋ,+ 2 ɛnʋ weyi ɛ nɛ tɛtʋ yɔɔ awiya pacaɣ kʋzʋʋ kɩdɛkɛdʋʋ* wezuu yɔ,+ nɛ ɛ-kʋzʋʋ kɩdɛkɛdʋʋ* tɛ vɛɛ kʋ tɛtʋ yɔɔ ɛyaa.»+
3 Nɛ ɛkpaɣ-m fezuu ɖoŋ taa nɛ ewoni kañɩmbusuu nakʋyʋ taa. Nɛ mana halʋ nɔɔyʋ ɛcaɣ tɛtɛgbɩnɛ naɖɩyɛ yɔɔ, ɖɩsɛ cɩɩɩ nɛ hɩla wena ayɔɔdʋʋ tɔm kɩdɛkɛdɩtʋ Ɛsɔ yɔɔ yɔ asu ɖɩ-yɔɔ, nɛ ɖɩwɛnɩ ñʋŋ lʋbɛ nɛ hɩŋ hiu. 4 Halʋ ɛnʋ eesu wondu kɩsɛɛmtʋ yuulee+ nɛ kɩsɛɛmtʋ cɩɩɩ, nɛ ɛɛcanɩ ɛ-tɩ nɛ sika nɛ ñɩɣlɩm pɛɛ nɛ kijisi,+ nɛ ɛɛɖɔkɩ e-nesi tɛɛ sika kɔpʋ nɛ kʋzɔɔtʋ wondu nɛ ɛ-kʋzʋʋ kɩdɛkɛdʋʋ* azuluma wondu su kɩ-taa. 5 Paama e-kiɖe taa hɩɖɛ naɖɩyɛ, tɔm kɩmɛsɩtʋ natʋyʋ: «Babilɔɔnɩ Sɔsɔʋ, halaa hayitu laɖaa nɛ tɛtʋ yɔɔ kʋzɔɔtʋ wondu ɖoo.»+ 6 Nɛ mana se ɛyaa kiɖeɖema calɩm nɛ Yesu aseɣɖe tɩnaa calɩm kʋwaɣ halʋ ɛnʋ.+
Nɛ mana-ɩ lɛ, pɩɖɩɣzɩ-m siŋŋ. 7 Ðɩnɛ ɛlɛ Ɛsɔ tiyiyu heyi-m se: «Ɛbɛ yɔɔ pɩɖɩɣzɩ-ŋ? Mankaɣ-ŋ heyuu halʋ ɛnʋ ɛ-yɔɔ tɔm kɩmɛsɩtʋ+ nɛ tɛtɛgbɩnɛ nɖɩ ɖɩ-yɔɔ ɛcaɣaa nɛ ɖɩwɛnɩ ñʋŋ 7 nɛ hɩŋ 10 yɔ ɖɩ-yɔɔ tɔm kɩmɛsɩtʋ:+ 8 Tɛtɛgbɩnɛ nɖɩ ŋnawa yɔ, ɖɩɩwɛɛ, ɛlɛ ɖɩtɩtasɩ wɛʋ, nɛ ɖɩwɩzɩ lɩnʋʋ pɔʋ sɔsɔʋ taa se ɖɩkpa,+ nɛ ɖɩkaɣ wobu ɖɩzʋʋ taa. Nɛ pɩkaɣ ɖɩɣzʋʋ tɛtʋ yɔɔ ɛyaa (mba patɩma pa-hɩla wezuu takayaɣ kikpiyaɣ taa+ kpaɣnɩ alɩwaatʋ ndʋ pasɩ ɛjaɖɛ tigiɖe yɔ) alɩwaatʋ ndʋ panaɣ ɛzɩma tɛtɛgbɩnɛ kaawɛɛ, ɛlɛ ɖɩtɩtasɩ wɛʋ, nɛ ɖɩkaɣ tasʋʋ wɛʋ yɔ.
9 «Pʋnɛ yɔ, pɩpɔzʋʋ maɣzɩm* mbʋ pɩwɛnɩ lɔŋsɩnɖɛ yɔ: Ñʋŋ 7+ sɩŋnɩ pʋŋ 7, ɖenɖe halʋ ɛnʋ ɛcaɣaa yɔ, ɖooo ñʋʋ taa. 10 Nɛ awiya 7 wɛna: Kagbanzɩ tɔlaa, kʋɖʋm wɛɛ, nɛ lɛlʋ tɩtɩɩkɔmta; ɛlɛ ɛkɔŋ lɛ, pɩwɛɛ se ɛcaɣ alɩwaatʋ pazɩ. 11 Nɛ tɛtɛgbɩnɛ nɖɩ ɖɩɩwɛɛ ɛlɛ ɖɩtɩtasɩ wɛʋ yɔ,+ ɖɩkɛ ɖɔɖɔ wiyaʋ 8 ñɩnʋ, ɛlɛ ɖɩlɩnɩ awiya 7 ana a-taa, nɛ ɖiwoki ɖɩzʋʋ taa.
12 «Hɩŋ 10 weyi ŋnawa yɔ, ɩsɩŋnɩ awiya 10 wena atɩmʋtɩ kewiyaɣ yɔ, ɛlɛ amʋʋ ɖoŋ se a nɛ tɛtɛgbɩnɛ pɛkɛ awiya ñɩɣyʋʋ kʋɖʋmʋʋ. 13 Awɛnɩ lɩmaɣzɩyɛ kʋɖʋmɖɩyɛ, pʋyɔɔ acɛlɩɣ a-ɖoŋ nɛ a-kewiyitu ɖoŋ tɛtɛgbɩnɛ. 14 Akaɣ yonuu Heɣa,+ ɛlɛ Heɣa kɛ kɩbaɣlaa taa Kɩbaɣlʋ nɛ awiya taa Wiyaʋ;+ pʋyɔɔ lɛ kakaɣ-yɛ wabʋ.+ Pɩtasɩ lɛ, mba pɛwɛ kɔ-cɔlɔ nɛ paya-wɛ nɛ palɩzɩ-wɛ nɛ pɛwɛ siɣsiɣ yɔ, pakaɣ-yɛ wabʋ ɖɔɖɔ.»+
15 Eheyi-m se: «Lɩm mbʋ ŋnawa yɔ, ɖenɖe halʋ hayitu laɖʋ caɣaa yɔ, pɩsɩŋnɩ samasɩ nɛ ɛyaa sakɩyɛ nɛ ajɛɛ nɛ kʋnʋmɩŋ.*+ 16 Nɛ hɩŋ 10+ weyi ŋnawa yɔ, nɛ tɛtɛgbɩnɛ,+ pakaɣ paɖʋʋ halʋ hayitu laɖʋ+ nɛ pakaɣ wɛɛkʋʋ ɛ-ñɩm tɩŋa nɛ peyebi-i ndaakpeɖe, nɛ pakaɣ tɔɔʋ e-tomnaɣ nɛ pañaɣzɩ-ɩ miŋ caɣ caɣ.+ 17 Mbʋ pʋyɔɔ yɔ Ɛsɔ ɖʋ pa-laŋa taa se pala ɛ-lɩmaɣzɩyɛ yɔɔ,+ ɛɛɛ, se patɩŋnɩ ɛzɩma pɛcɛlɩɣ tɛtɛgbɩnɛ pe-kewiyaɣ yɔ pɩ-yɔɔ nɛ pala pa-lɩmaɣzɩyɛ kʋɖʋmɖɩyɛ yɔɔ,+ nɛ pɩkɔɔ pɩsɩɩnɩ alɩwaatʋ ndʋ Ɛsɔ tɔm lakɩ yɔ. 18 Nɛ halʋ+ weyi ŋnawa yɔ, ɛsɩŋnɩ tɛtʋ sɔsɔtʋ ndʋ tɩtɔkɩ kewiyitu tɛtʋ yɔɔ awiya yɔɔ yɔ.»
18 Pʋwayɩ lɛ, mana Ɛsɔ tiyiyu lɛlʋ lɩnɩ ɛsɔdaa nɛ etiki, ɛɛwɛnɩ ɖoŋ sɔsɔŋ, nɛ ɛ-samtʋ ñandɩ tɛtʋ yɔɔ. 2 Nɛ ɛma kubuka sɔsɔɔ nɛ ɛtɔ se: «Kɩtɔlaa! Babilɔɔnɩ Sɔsɔʋ tɔlaa,+ nɛ kɩpɩsɩ aleewaa ɖɩjaɣyɛ nɛ ɖenɖe azuluma feziŋ tɩŋa nɛ azuluma sumasɩ nzɩ papaɖɩɣ-sɩ yɔ sɩ-tɩŋa sɩmɛlɩɣ yɔ!+ 3 Mbʋ pʋyɔɔ yɔ kɩ-kʋzʋʋ kɩdɛkɛdʋʋ* kɔɖɛyɩ* tɛ vɛɛ yɔɔ lɛ, ajɛɛ tɩŋa tɔlɩ kɩ-kpaca taa,+ nɛ kɩ nɛ tɛtʋ yɔɔ awiya pacaɣ kʋzʋʋ kɩdɛkɛdʋʋ wezuu,+ nɛ leleŋ nɩʋ kadadayaɣ wezuu ŋgʋ kɩcakɩ nɛ fɛyɛ ɛɛkpaɣ-kʋ yɔ kɩ-yɔɔ lɛ, tɛtʋ yɔɔ tadɩyɛ laɖaa* pɩsɩ ñɩm tɩnaa.»
4 Nɛ manɩɩ nɔɔ lɛɛka lɩnɩ ɛsɔdaa nɛ kɔtɔŋ se: «Ɩlɩɩ kɩ-taa, man-samaɣ,+ ye ɩtɩsɔɔlɩ se mɩ nɛ kʋ ɩkaa kɩ-kɩwɛɛkɩm yɔ, nɛ ye ɩtɩsɔɔlɩ se ihiɣ kɩ-asɛyɩŋ hɔɔlʋʋ nakʋyʋ yɔ.+ 5 Mbʋ pʋyɔɔ yɔ, kɩ-kɩwɛɛkɩm kpa huuye nɛ pɩtalɩ ɖooo ɛsɔdaa,+ nɛ Ɛsɔ tɔzɩ kɩ-lakasɩ nzɩ sɩfɛyɩ siɣsiɣ yɔ,* sɩ-yɔɔ.+ 6 Ɩhɛyɩ-kʋ ɛzɩ kɩlabʋ lalaa yɔ;+ ɛɛɛ, ɩhɛyɩ-kʋ tam nabʋlɛ mbʋ kɩlaba yɔ pɩ-yɔɔ;+ kɔpʋ+ ŋgʋ kɩ-taa kisidaa yɔ, isidi tam nabʋlɛ nɛ ɩcɛlɩ-kʋ.+ 7 Ɛzɩ kɩkpazʋʋ kɩ-tɩ nɛ kɩcaɣ leleŋ nɩʋ wezuu nɛ fɛyɛ tɩkpa-kʋ yɔ, mbʋ ɖɔɖɔ pɩwɛɛ se ɩnazɩ-kʋ nɛ kɩcaɣ kʋñɔwiye. Mbʋ pʋyɔɔ yɔ kɩwɛɛ nɛ kɩyɔɔdʋʋ kɩ-laŋɩyɛ taa se: “Mancaɣaa ɛzɩ abiɖe yɔ, nɛ mantɩkɛ lelu, nɛ maakaɣ caɣʋ kʋñɔwiye wiɖiyi.”+ 8 Pʋyɔɔ kɩ-asɛyɩŋ kaɣ kɔm kɩyakʋ kʋɖʋmʋʋ: sɩm nɛ kʋñɔwiye nɛ ñɔɔsɩ; nɛ pakaɣ-kʋ ñaɣzʋʋ miŋ caɣ caɣ,+ mbʋ pʋyɔɔ yɔ Yehowa* Ɛsɔ, weyi ɛhʋnɩ-kʋ tɔm yɔ, ɛwɛ ɖoŋ.+
9 «Nɛ tɛtʋ yɔɔ awiya wena a nɛ kʋ pacaɣ kʋzʋʋ kɩdɛkɛdʋʋ* wezuu nɛ a nɛ kʋ pacaɣ leleŋ nɩʋ wezuu nɛ fɛyɛ tɩkpa-wɛ yɔ, akaɣ wiu nɛ anɩɩ siziŋ nɛ ama a-laŋa taa kɩ-yɔɔ alɩwaatʋ ndʋ anaɣ miŋ weyi ɩñakɩ-kʋ yɔ ɩ-ñɔsɩ yɔ. 10 Kʋñɔŋ ŋgʋ kɩtalɩ-kʋ yɔ kɩ-sɔɔndʋ yɔɔ lɛ, akaɣ sɩŋʋʋ poliŋ taa nɛ ayɔɔdɩ se: “Pɩlabɩ pʋtɔdɩyɛ, pɩlabɩ pʋtɔdɩyɛ, tɛtʋ sɔsɔtʋ ña,+ Babilɔɔnɩ, tɛtʋ ɖoŋ ñɩndʋ ña, mbʋ pʋyɔɔ yɔ ñɔ-tɔm hʋʋ talɩ ñɩɣyʋʋ kʋɖʋmʋʋ taa!”
11 «Pɩtasɩ lɛ, tɛtʋ yɔɔ tadɩyɛ laɖaa wɛɛ nɛ pewiɣ nɛ pacakɩ kʋñɔwiye kɩ-yɔɔ, mbʋ pʋyɔɔ yɔ nɔɔyʋ tɩtasɩ wɛʋ se ɛya wondu ndʋ payɩ pɛpɛdɩɣ yɔ; 12 wondu ndʋ yɔ: sika, liidiye ñɩɣtʋ, ñɩɣlɩm pɛɛ, kijisi, pɩsaŋ kɩbaŋ, pɩsaŋ kɩsɛɛmɩŋ yuulee, pɩsaŋ sotu ñɩŋ nɛ pɩsaŋ kɩsɛɛmɩŋ cɩɩɩ; nɛ mbʋ payɩ palabɩnɩ sɔzɩŋ ɖasɩ yɔ; nɛ wondu ndʋ payɩ palabɩnɩ tu keɖe, nɛ ɖasɩ nzɩ sɩwɛ ñɩm, ñɩɣyʋʋ kɩsɛɛmʋʋ, ñɩɣtʋ nɛ maarɩbɩɖɩ pɛɛ yɔ; 13 nɛ kanɛɛlɩ, Ɛndɩ mba sɔzɩŋ ñɩtʋ, ŋgee tɩlaaɖɩ, sɔzɩŋ num, tɩlaaɖɩ kʋhʋlʋmʋʋ, vɛɛ, oliivi num, mʋlʋm kɩbam, blee, naŋ, heŋ, kpaŋnaŋ, kpaŋnaŋ kɛɛkɛɛnaa, yomaa nɛ ɛyaa weziŋ.* 14 Ɛɛɛ, piye kɩbanɖɛ nɖɩ ñe-liu* kaawɛ-ɖɩ yɔ, ɖɩɖɛwa nɛ ɖiyebi-ŋ; nɛ leleŋ wondu nɛ wondu kajʋka ñɩndʋ kpeekpe lebi ñɔ-cɔlɔ, paatasɩɣ-tʋ naʋ wiɖiyi.
15 «Tadɩyɛ laɖaa mba pɛpɛdaɣ wondu ndʋ yɔ, mba papɩsɩ ñɩm tɩnaa kɩ-yɔɔ yɔ, pakaɣ sɩŋʋʋ poliŋ taa kʋñɔŋ ŋgʋ kɩtalɩ-kʋ yɔ kɩ-sɔɔndʋ yɔɔ nɛ pakaɣ wiu nɛ pacaɣ kʋñɔwiye, 16 nɛ pɔyɔɔdʋʋ se: “Pɩlabɩ pʋtɔdɩyɛ, pɩlabɩ pʋtɔdɩyɛ, tɛtʋ sɔsɔtʋ, ndʋ tisu wondu kɩbandʋ, kɩsɛɛmtʋ yuulee, nɛ kɩsɛɛmtʋ cɩɩɩ, nɛ tɩcanɩ tɩ-tɩ nɛ sika ajana wondu nɛ ñɩɣlɩm pɛɛ nɛ kijisi yɔ,+ 17 mbʋ pʋyɔɔ yɔ ñɩm sɔsɔm mbʋ, pɩwɛɛkɩ ñɩɣyʋʋ kʋɖʋmʋʋ taa!”
«Nɛ paa mɛlɛ yɔɔ cɔnɩyʋ weyi, nɛ paa teŋgu yɔɔ nʋmɔɖɔnʋ weyi nɛ mɛlɛ taa tʋmlaɖaa nɛ mba payɩ palakɩ tʋmɩyɛ teŋgu yɔɔ se pehiɣ nɛ pɔtɔɔ yɔ, pasɩŋ poliŋ taa 18 nɛ pama kubuka alɩwaatʋ ndʋ pɛwɛɛ nɛ pɔcɔŋnɩ miŋ weyi ɩñakɩ-kʋ yɔ ɩ-ñɔsɩ yɔ, nɛ pɔyɔɔdɩ se: “Tɛtʋ ndʋ wɛ ɛzɩ tɛtʋ sɔsɔtʋ tʋnɛ yɔ?” 19 Paɖʋ mʋzʋʋ pa-ñʋŋ taa nɛ pama kubuka, pɛwɛɛ nɛ pewiɣ nɛ pacaɣ kʋñɔwiye, nɛ pɔyɔɔdɩ se: “Pɩlabɩ pʋtɔdɩyɛ, pɩlabɩ pʋtɔdɩyɛ, tɛtʋ sɔsɔtʋ, ndʋ tɩ-ñɩm yɔɔ lɛ, tɩ-taa ñɩma mba payɩ pɛwɛnɩ mɛlɛnaa teŋgu yɔɔ yɔ papɩsɩ ñɩm tɩnaa yɔ, mbʋ pʋyɔɔ yɔ paɖɩzɩ-tʋ ñɩɣyʋʋ kʋɖʋmʋʋ taa!”+
20 «Ña-taa ɛla leleŋ kɩ-yɔɔ, hayɩ ɛsɔdaa,+ nɛ mɩ ɖɔɖɔ ɛyaa kiɖeɖema+ nɛ apostoloowaa nɛ nayaa, mbʋ pʋyɔɔ yɔ mɩ-yɔɔ lɛ, Ɛsɔ hʋnɩ-kʋ tɔm!»+
21 Nɛ Ɛsɔ tiyiyu ɖoŋ tʋ nɔɔyʋ sɛlɩ pɩyɛ naɖɩyɛ, ɖɩwɛ ɛzɩ nem* sɔsɔ yɔ, nɛ ɛlɔ-ɖɩ teŋgu taa, nɛ ɛyɔɔdɩ se: «Mbʋ pakaɣ lɔʋ tɛtʋ sɔsɔtʋ Babilɔɔnɩ tam kʋɖʋm taa, nɛ paakaɣ-tʋ tasʋʋ naʋ wiɖiyi.+ 22 Nɛ paakaɣ tasʋʋ nɩʋ hendu teyaa mba pamakɩ cɩmɩŋ pe-hendu teu taa yɔ, minziiki maɖaa, hɩsɩ hʋlɩyaa nɛ aganda hʋlɩyaa taŋ ña-taa wiɖiyi. Nɛ paakaɣ tasʋʋ naʋ nesi tɛɛ tʋmlaɖʋ nɔɔyʋ se ɛlakɩ tʋmɩyɛ naɖɩyɛ ña-taa wiɖiyi, nɛ paakaɣ tasʋʋ nɩʋ nem taŋ ña-taa wiɖiyi. 23 Kanɖʋ nakʋyʋ tɛ ñalɩmɩyɛ ɛɛkaɣ tasʋʋ ñandʋʋ ña-taa wiɖiyi, nɛ paakaɣ tasʋʋ nɩʋ asɛyʋ walʋ nɔɔ nɛ asɛyʋ nɔɔ taŋ ña-taa wiɖiyi; mbʋ pʋyɔɔ yɔ ña-tadɩyɛ laɖaa kaakɛ tɛtʋ yɔɔ ɛyaa mba pa-hɩla sɛwa yɔ, nɛ ŋtɩŋnɩ ñe-feziŋ kɩdɛkɛdɩŋ yaʋ lakasɩ yɔɔ+ nɛ ŋpeɣzi ajɛɛ kpeekpe. 24 Ɛɛɛ, pana kɩ-taa nayaa nɛ ɛyaa kiɖeɖema nɛ ɛyaa mba payɩ pakʋ-wɛ tɛtʋ yɔɔ yɔ pa-calɩm.»+
19 Pʋwayɩ lɛ, manɩɩ nɔɔ ɖoŋ ñɩŋga nakɛyɛ ɛzɩ samaɣ sɔsɔɔ nakɛyɛ nɔɔ yɔ ɛsɔdaa. Kɔyɔɔdaɣ se: «Ɩsa Yah!*+ Ðɛ-Ɛsɔ tɩnɩ ñʋʋ yabʋ nɛ samtʋ nɛ ɖoŋ, 2 mbʋ pʋyɔɔ yɔ ɛ-tɔm hʋʋ kɛ toovenim nɛ pɩwɛ siɣsiɣ.+ Mbʋ pʋyɔɔ yɔ ɛhʋnɩ tɔm halʋ hayitu laɖʋ sɔsɔ weyi ɛwɛɛkɩ tɛtʋ nɛ ɛ-kʋzʋʋ kɩdɛkɛdʋʋ* yɔ, nɛ ɛkpa e-yomaa calɩm mbʋ pɩwɛ e-nesi tɛɛ yɔ* pɩ-kɩmɩyɛ.»+ 3 Nɛ kpaagbaa mbʋ lɛ, nɔɔ ŋga katasɩ yɔɔdʋʋ nabʋlɛ ɖeɖe se: «Ɩsa Yah!*+ Nɛ miŋ weyi ɩñaɣ halʋ ɛnʋ yɔ, ɩ-ñɔsɩ wɛɛ nɛ sɩkpaɣ tam.»+
4 Nɛ ɛzʋtʋyaa 24 mba+ nɛ ɛsadɩnaa 4 mba,+ poluŋ nɛ pɛsɛɛ Ɛsɔ weyi ɛcaɣ kewiyaɣ kpelaɣ yɔɔ yɔ nɛ pɔyɔɔdɩ se: «Amɛn! Ɩsa Yah!»*+
5 Pɩtasɩ lɛ, nɔɔ nakɛyɛ lɩnɩ kewiyaɣ kpelaɣ cɔlɔ nɛ kɔyɔɔdɩ se: «Ɩsa ɖɛ-Ɛsɔ, mɩ e-yomaa kpeekpe,+ mɩ mba iseɣ-i sɔɔndʋ yɔ, cikpema nɛ sɔsaa.»+
6 Nɛ manɩɩ nabʋyʋ taŋ ɛzɩ samaɣ sɔsɔɔ nakɛyɛ nɔɔ yɔ nɛ ɛzɩ lɩm sakɩyɛ falʋʋ yɔ nɛ ɛzɩ tɛʋ nazʋʋ ɖoŋ yɔ. Pɔyɔɔdaɣ se: «Ɩsa Yah,*+ mbʋ pʋyɔɔ yɔ Yehowa* ɖɛ-Ɛsɔ Ðoŋ Tɩŋa Tʋ+ paɣzɩ kewiyitu tɔɔʋ!+ 7 Ðɩwɛɛ amɛya taa nɛ ɖɩmɛyɩ siŋŋ nɛ ɖɩsamɩ-ɩ, mbʋ pʋyɔɔ yɔ Heɣa nesi ɖɔkʋʋ talaa nɛ ka-halʋ ñɔɔzɩ ɛ-tɩ. 8 Ɛɛɛ, paha-ɩ nʋmɔʋ se esuu wondu ndʋ tɩñɩlɩsɩɣ, tɩwɛ cɩɖɩ cɩɖɩ nɛ tɩkɛ kɩbandʋ yɔ; mbʋ pʋyɔɔ yɔ wondu kɩbandʋ sɩŋnɩ ɛyaa kiɖeɖema lakasɩ siɣsiɣ ñɩnzɩ.»+
9 Nɛ eheyi-m se: «Ma se: Koboyaɣ tɩnaa kɛlɛ mba paya-wɛ Heɣa nesi ɖɔkʋʋ tɛ ɖanaɣ tɔɔnaɣ ɖɩdɔɔyɛ yɔ.»+ Ɛtasɩ-m heyuu se: «Tɔm tʋnɛ tɩkɛ Ɛsɔ tɔm toovenim ñɩndʋ.» 10 Ðɩnɛ ɛlɛ moluŋ ɛ-nɩŋgbanzɩ tɛɛ se mɛnsɛɛ-ɩ. Ɛlɛ eheyi-m se: «Kpa ña-tɩ! Taala mbʋ!+ Mɛnkɛ yom yem ɛzɩ ña nɛ ño-koobiya mba paɖʋ-wɛ tʋmɩyɛ se palɩzɩ aseɣɖe Yesu yɔɔ yɔ.+ Sɛɛ Ɛsɔ!+ Mbʋ pʋyɔɔ yɔ Yesu yɔɔ aseɣɖe lɩzʋʋ ɖiyiɣni natʋ tɔm.»+
11 Mana ɛsɔdaa tʋlaa, nɛ na, kpaŋnʋ kʋhʋlʋm nɔɔyʋ.+ Nɛ weyi ɛcaɣ ɛ-yɔɔ yɔ, payaɣ-ɩ se Siɣsiɣ Tʋ+ nɛ Toovenim Tʋ;+ nɛ ɛhʋʋ tɔm nɛ ɛlakɩ you nɛ siɣsiɣ wɛtʋ.+ 12 Ɛ-ɛsa kɛ miŋ weyi ɩmʋʋ pelu pelu yɔ,+ nɛ ñɩɣlɩm hulasɩ sakɩyɛ wɛ ɛ-ñʋʋ taa. Pama hɩɖɛ naɖɩyɛ ɛ-yɔɔ nɛ nɔɔyʋ tɩsɩm-ɖɩ nɛ pɩtasɩnɩ ɛ-maɣmaɣ, 13 nɛ esu toko kɩtɩnʋʋ nakʋyʋ nɛ calɩm ta-kʋ,* nɛ payaɣ-ɩ se Ɛsɔ Tɔm.+ 14 Pɩtasɩ lɛ, ɛsɔdaa sɔɔjanaa kaacaɣ kpaŋnaŋ kʋhʋlʋmɩŋ yɔɔ nɛ patɩŋɩɣ ɛ-wayɩ; paasu wondu ndʋ tɩhʋlʋmaa, tɩwɛɛ cɩɖɩ cɩɖɩ nɛ tɩkɛ kɩbandʋ yɔ. 15 Nɛ laɣɖɛ naɖɩyɛ, nɖɩ ɖɩwɛ lɔŋ nɛ ɖɩɖaɣlɩ yɔ ɖɩlɩɣnɩ ɛ-nɔɔ taa,+ nɖɩ eloŋni ajɛɛ, nɛ ɛkaɣ-yɛ ɖiyuu nɛ ñɩɣyʋʋ ɖaʋ.+ Pɩtasɩ lɛ, ɛfɛyɩɣ viiñi Ɛsɔ Ðoŋ Tɩŋa Tʋ pana sɔsɔna tɛ viiñi ɖɩfɛyɩyɛ taa.+ 16 Pama hɩɖɛ naɖɩyɛ e-toko kɩtɩnʋʋ yɔɔ, ɛɛɛ, ɛ-taɖɩyɛ yɔɔ: Awiya taa Wiyaʋ nɛ kɩbaɣlaa taa Kɩbaɣlʋ.+
17 Mana ɖɔɖɔ Ɛsɔ tiyiyu nɔɔyʋ, ɛsɩŋ wɩsɩ taa, nɛ ɛma kubuka sɔsɔɔ nɛ eheyi sumasɩ nzɩ sɩkʋyʋʋ ɛsɔdaa* yɔ sɩ-tɩŋa se: «Ɩkɔɔ cɩnɛ, ikpeɣli Ɛsɔ ɖanaɣ tɔɔnaɣ sɔsɔɔ ɖɩdɔɔyɛ,+ 18 se pɩsa nɛ ɩtɔɔ awiya nandʋ nɛ sɔɔjanaa ñʋndɩnaa nandʋ nɛ ɖoŋ tɩnaa nandʋ+ nɛ kpaŋnaŋ nandʋ nɛ mba pacaɣ ɩ-yɔɔ yɔ pa-nandʋ,+ nɛ ɛyaa tɩŋa nandʋ, mba pɛwɛ pa-tɩ yɔɔ yɔ nɛ yomaa pa-nandʋ, nɛ cikpema nɛ sɔsaa pa-nandʋ.»
19 Nɛ mana tɛtɛgbɩnɛ nɛ tɛtʋ yɔɔ awiya nɛ a-sɔɔjanaa, pekpeɣlaa se poyooni weyi ɛcaɣ kpaŋnʋ yɔɔ yɔ nɛ ɛ-sɔɔjanaa.+ 20 Nɛ pakpa tɛtɛgbɩnɛ, ɖɩ nɛ cɛtɩm nayʋ+ weyi ɛlabɩ ɖɩ-ɛsɩndaa yʋsasɩ nzɩ sɩ-yɔɔ ɛtɩŋnaa nɛ epeɣzi mba pamʋ tɛtɛgbɩnɛ yʋsaɣ+ nɛ mba pɛsɛɣ ɖɩ-lɛzʋʋ yɔ.+ Pakpaɣ pa-naalɛ nɛ pɔlɔ-wɛ nɛ pɛ-ɛsa miŋ lɩyɛ nɖɩ ɖɩ-taa wɛ tɩm nɛ ɖɩmʋʋ siŋŋ yɔ ɖɩ-taa.+ 21 Ɛlɛ mba pɩkazaa yɔ, pakʋ-wɛ nɛ laɣɖɛ kɩɖaɣlɩyɛ nɖɩ ɖɩlɩɣaɣnɩ weyi ɛcaɣ kpaŋnʋ yɔɔ yɔ ɛ-nɔɔ taa yɔ.+ Nɛ sumasɩ tɩŋa tɔɔ pa-nandʋ nɛ sɩhaɣ.+
20 Nɛ mana Ɛsɔ tiyiyu nɔɔyʋ, ɛlɩnɩ ɛsɔdaa nɛ etiki, ɛɖɔkɩ pɔʋ sɔsɔʋ ñɩmɩyɛ+ nɛ kpasɩ sɔsɔsɩ nasɩyɩ e-nesi taa. 2 Ɛkpa ɖʋmanʋʋ,+ ɖooo kiɖe tɛɛ ɖʋm,+ weyi ɛkɛ Eleeu+ nɛ Sataŋ yɔ,+ nɛ ɛhɔkɩ-ɩ se pɩla pɩnzɩ 1 000. 3 Nɛ ɛlɔ-ɩ pɔʋ sɔsɔʋ taa+ nɛ ɛɖɩɣ-kʋ nɛ ɛtaaɖɩ kɩ-yɔɔ, se pɩsa nɛ ɛtaatasɩ peɣzuu ajɛɛ nɛ pɩkɔɔ pɩsɩɩnɩ alɩwaatʋ ndʋ pɩnzɩ 1 000 ŋgʋ kɩtɛŋ yɔ. Pʋwayɩ lɛ, pɩwɛɛ se peyebi-i alɩwaatʋ pazɩ.+
4 Nɛ mana kewiyaɣ kpelisi, nɛ mba pacaɣ sɩ-yɔɔ yɔ paha-wɛ ɖoŋ se pahʋʋ tɔm. Ɛɛɛ, mba pakʋ-wɛ* aseɣɖe nɖɩ palɩzɩ Yesu yɔɔ nɛ Ɛsɔ tɔm ndʋ pɔyɔɔdaa yɔ tɩ-yɔɔ yɔ, nɛ mba patɩsɛɛ tɛtɛgbɩnɛ yaa ɖɩ-lɛzʋʋ nɛ patɩmʋ yʋsaɣ pe-kiɖe taa nɛ pe-nesi yɔɔ yɔ, mana pa-kalɩzasɩ.*+ Nɛ pefe nɛ pa nɛ Krɩstʋ pɔtɔɔ kewiyitu+ pɩnzɩ 1 000. 5 (Sɩɖaa mba pɩkazaa yɔ,+ patife pɩkɔɔ nɛ pɩsɩɩnɩ alɩwaatʋ ndʋ pɩnzɩ 1 000 ŋgʋ kɩtɛma yɔ.) Kajalaɣ femtu lɛ.+ 6 Koboyaɣ tɩnaa nɛ kiɖeɖema kɛlɛ mba payɩ pefeŋ kajalaɣ femtu taa yɔ;+ sɩm nabʋlɛ ñɩmbʋ+ fɛyɩnɩ ɖoŋ pɔ-yɔɔ,+ ɛlɛ pakaɣ kɛʋ Ɛsɔ nɛ Krɩstʋ pɔ-cɔjɔnaa,+ nɛ pa nɛ ɩ pakaɣ tɔɔʋ kewiyitu pɩnzɩ 1 000.+
7 Nɛ pɩnzɩ 1 000 ŋgʋ kɩñɩtɩɣ nɛ kɩtɛ lɛ, pakaɣ lɩzʋʋ Sataŋ ɛ-salaka taa, 8 nɛ ɛkaɣ lɩʋ se epeɣzi ajɛɛ wena awɛ tɛtʋ hɔɔlɩŋ 4 taa yɔ, Gɔɔgɩ nɛ Maagɔɔgɩ, se ekpeɣli-yɛ nɛ ala you. Aɖɔ ɛzɩ teŋgu nɔɔ kañɩŋa yɔ. 9 Nɛ awadɩ tɛtʋ kpeekpe yɔɔ nɛ acɔɔ ɛyaa kiɖeɖema ɖigbeɣliye* nɛ tɛtʋ kʋsɔɔlɩtʋ nɛ ata. Ɛlɛ miŋ lɩɩnɩ ɛsɔdaa nɛ itii nɛ ɩñaɣ-yɛ.+ 10 Nɛ Eleeu weyi epeɣzaɣ-yɛ yɔ, pɔlɔ-ɩ miŋ nɛ tɩm lɩyɛ taa, ɖenɖe tɛtɛgbɩnɛ+ nɛ cɛtɩm nayʋ pa-naalɛ paatɛm wɛʋ yɔ;+ nɛ pakaɣ-wɛ kʋñɔŋ wɩlʋʋ* wɩsɩ nɛ ɖoo tam.
11 Nɛ mana kewiyaɣ kpelaɣ sɔsɔɔ kʋhʋlʋmaɣ nakɛyɛ nɛ Weyi ɛcaɣ kɔ-yɔɔ yɔ.+ Tɛtʋ nɛ ɛsɔdaa pese ɛ-ɛsɩndaa,+ nɛ patɩtasɩ-wɛ hiɣu lone naɖɩyɛ. 12 Nɛ mana sɩɖaa, sɔsaa nɛ cikpema, pasɩŋ kewiyaɣ kpelaɣ ɛsɩndaa; nɛ pokuli takayɩsɩ kikpiyisi. Ɛlɛ pokuli takayaɣ kikpiyaɣ lɛɛka; kɛkɛ wezuu takayaɣ kikpiyaɣ.+ Patɩŋnɩ tɔm ndʋ pama takayɩsɩ kikpiyisi nzɩ sɩ-taa yɔ tɩ-yɔɔ nɛ pahʋʋnɩ sɩɖaa tɔm pa-lakasɩ yɔɔ.+ 13 Nɛ teŋgu lɩzɩ sɩɖaa mba paawɛ kɩ-taa yɔ, nɛ sɩm nɛ Pɩlaʋ* palɩzɩ sɩɖaa mba paawɛ pa-taa yɔ, nɛ pahʋʋnɩ paa weyi tɔm ɛ-lakasɩ yɔɔ.+ 14 Nɛ pɔlɔ sɩm nɛ Pɩlaʋ* miŋ lɩyɛ taa.+ Miŋ lɩyɛ nɖɩ,+ ɖɩsɩŋnɩ sɩm nabʋlɛ ñɩmbʋ.+ 15 Pɩtasɩ lɛ, weyi patɩna ɛ-hɩɖɛ wezuu takayaɣ taa yɔ,+ pɔlɔ-ɩ miŋ lɩyɛ taa.+
21 Nɛ mana ɛsɔdaa kɩfalʋʋ nakʋyʋ nɛ tɛtʋ kɩfatʋ natʋyʋ;+ mbʋ pʋyɔɔ yɔ ɛsɔdaa kɩbɩnʋʋ nɛ tɛtʋ kɩbɩndʋ pamʋwaa,+ nɛ teŋgu+ tɩtasɩ wɛʋ. 2 Mana ɖɔɖɔ tɛtʋ kiɖeɖetu, Yeruzalɛm Kɩfalʋʋ, kɩlɩnɩ Ɛsɔ cɔlɔ ɛsɔdaa nɛ kitiki+ nɛ pɔñɔɔzɩ-kʋ ɛzɩ pacanʋʋ asɛyʋ se ɛkatɩ ɛ-walʋ yɔ.+ 3 Ðɩnɛ ɛlɛ manɩɩ nɔɔ ɖoŋ ñɩŋga nakɛyɛ lɩnɩ kewiyaɣ kpelaɣ cɔlɔ nɛ kɔtɔŋ se: «Na! Ɛsɔ kizinziku wɛ ɛyaa cɔlɔ, nɛ ɛkaɣ wɛʋ pɔ-cɔlɔ, nɛ pakaɣ kɛʋ ɛ-samaɣ. Nɛ Ɛsɔ maɣmaɣ kaɣ wɛʋ pɔ-cɔlɔ.+ 4 Nɛ ɛkaɣ hɩzʋʋ ɛsɩtɛɣlɩm kpeekpe pɛ-ɛsɩndaa,+ nɛ sɩm ɛɛkaɣ tasʋʋ wɛʋ,+ kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.+ Wondu kɩbɩndʋ mʋwaa.»
5 Nɛ Weyi ɛɛcaɣ kewiyaɣ kpelaɣ yɔɔ yɔ+ ɛyɔɔdɩ se: «Na! Menɖiɣni labʋ wondu tɩŋa se tɩkɛ kɩfatʋ.»+ Ɛtasɩ yɔɔdʋʋ se: «Ma tɔm ndʋ, mbʋ pʋyɔɔ yɔ tɩwɛ siɣsiɣ* nɛ tɩkɛ toovenim.» 6 Nɛ eheyi-m se: «Tɩlaba! Mɛkɛnɩ Alɩfaa nɛ Omega,* ɖɩbazɩyɛ nɛ tɩnaɣ.+ Weyi lɔkɔtʋ ɖɛ-ɩ yɔ, mankaɣ-ɩ haʋ lɩm mbʋ polu wezuu lɩm hiɖe taa yɔ falaa.*+ 7 Weyi ɛwakɩ yɔ, ɛkaɣ hiɣu pɩtɩŋa mbʋ yɔ, nɛ mankaɣ kɛʋ ɛ-Ɛsɔ nɛ ɛkaɣ kɛʋ man-pɩyalʋ. 8 Ɛlɛ sɔɔndʋ tɩnaa nɛ mba pɛfɛyɩnɩ tisuu yɔ+ nɛ kʋzɔɔtʋ tɩnaa mba palakɩ azuluma lakasɩ yɔ nɛ ɛyaa kʋyaa+ nɛ mba pacakɩ kʋzʋʋ kɩdɛkɛdʋʋ* wezuu yɔ+ nɛ mba payaɣ feziŋ kɩdɛkɛdɩŋ yɔ nɛ sɩɩnaa layaa nɛ cɛtɩyaa tɩŋa,+ pe-ɖeɖe kaɣ wɛʋ lɩyɛ nɖɩ ɖɩ-taa miŋ nɛ tɩm pɛwɛɛ yɔ ɖɩ-taa.+ Pɩsɩŋnɩ sɩm nabʋlɛ ñɩmbʋ.»+
9 Ɛsɔ tiyiyaa 7 mba paaɖɔkɩ ñanzɩ 7 nzɩ sɩ-taa kɛdɛzaɣ asɛyɩŋ 7 kaasuwa yɔ,+ pa-taa kʋɖʋm kɔɔ nɛ eheyi-m se: «Kɔɔ, nɛ mankaɣ-ŋ wɩlʋʋ asɛyʋ, Heɣa halʋ.»+ 10 Nɛ ɛkpaɣ-m fezuu ɖoŋ taa nɛ ewoni-m pʋʋ sɔsɔʋ nakʋyʋ cɔlɔ, kɩkʋyaa; nɛ ɛwɩlɩ-m tɛtʋ kiɖeɖetu Yeruzalɛm, tɩlɩnɩ Ɛsɔ cɔlɔ ɛsɔdaa nɛ titiki,+ 11 nɛ tɩwɛnɩ Ɛsɔ samtʋ.+ Tɩ-ñɩlɩsʋʋ kaawɛ ɛzɩ ñɩɣlɩm pɩyɛ nɖɩ ɖɩwɛ ñɩm siŋŋ yɔ, ɛzɩ yaasɩpɩ pɩyɛ nɖɩ ɖɩñɩlɩsɩɣ ɛzɩ krisɩtaalɩ pɩyɛ nɖɩ pɩnaɣ ɖɩ-taa kpayɩ kpayɩ yɔ.+ 12 Tɩɩwɛnɩ koloŋa sɔsɔɔ kɩkʋyaɣ nakɛyɛ, nɛ tɩɩwɛnɩ nɔnɔsɩ 12, nɛ Ɛsɔ tiyiyaa 12 kaawɛ nɔnɔsɩ nzɩ sɩ-taa, nɛ paama nɔnɔsɩ nzɩ sɩ-yɔɔ Izrayɛɛlɩ pɩyalaa cejewe 12 hɩla. 13 Nɔnɔsɩ 3 kaawɛ wɩsɩ ɖɩlɩyɛ taa, nɔnɔsɩ 3 wɛɛ hayo kiŋ, nɔnɔsɩ 3 wɛɛ hadɛ kiŋ nɛ nɔnɔsɩ 3 ñɛwɛɛ wɩsɩ ɖɩɖʋyɛ taa.+ 14 Tɛtʋ ndʋ ti-koloŋa kaawɛnɩ ɖɔɖɔ tigila pɛɛ 12, nɛ Heɣa apostoloowaa 12 mba, pa-hɩla 12 kaawɛ a-yɔɔ.+
15 Nɛ weyi ɛyɔɔdaɣnɩ-m yɔ, ɛɛɖɔkɩ sika kañɩŋgbayaɣ ɛzɩ kɩmaɣzʋʋ yɔ se ɛmaɣzɩ tɛtʋ nɛ tɩ-nɔnɔsɩ nɛ ti-koloŋa.+ 16 Nɛ tɛtʋ ndʋ tɩwɛnɩ kɔnanaa 4 nɛ pɛwɛ kɩmaŋ, nɛ tɩ-ɖaɣlɩkɩŋ nɛ tɩ-walanzɩ wɛ kɩmaŋ. Nɛ ɛkpaɣ kañɩŋgbayaɣ nɛ ɛmaɣzɩnɩ tɛtʋ, staadɩnaa 12 000;* tɩ-ɖaɣlɩkɩŋ nɛ tɩ-walanzɩ nɛ tɩ-kʋkʋyɩŋ wɛ kɩmaŋ. 17 Ɛmaɣzɩ ɖɔɖɔ ti-koloŋa, nuŋgolonzi 144;* pɩkɛ ɛyʋ kɩmaɣzʋʋ, nɛ pɩkɛ ɖɔɖɔ Ɛsɔ tiyiyu kɩmaɣzʋʋ. 18 Nɛ paama koloŋa ŋga nɛ yaasɩpɩ pɛɛ,+ nɛ tɛtʋ kaakɛ sika kele kele ñɩŋga ɛzɩ ñɩnʋʋ ŋgʋ pɩnaɣ kɩ-taa kpayɩ kpayɩ yɔ. 19 Paacanɩ tɛtʋ koloŋa ŋga ke-tigila nɛ ñɩɣlɩm pɛɛ ndɩ ndɩ: kajalaɣ tigiɖe kaakɛ yaasɩpɩ, naalɛ ñɩnɖɛ kaakɛ saafiirɩ, naadozo ñɩnɖɛ kaakɛ kalɩseduwaanɩ, naanza ñɩnɖɛ kaakɛ emeroodi, 20 kagbanzɩ ñɩnɖɛ kaakɛ saarɩdonikɩsɩ, loɖo ñɩnɖɛ kaakɛ saarɩduwaanɩ, lʋbɛ ñɩnɖɛ kaakɛ krizooliitɩ, lutozo ñɩnɖɛ kaakɛ beeriilɩ, nakʋ ñɩnɖɛ kaakɛ toopaazɩ, hiu ñɩnɖɛ kaakɛ krizoopraazɩ, hiu nɛ kʋɖʋm ñɩnɖɛ kaakɛ yaasɛntɩ, hiu nɛ naalɛ ñɩnɖɛ kaakɛ ameetiistɩ. 21 Pɩtasɩ lɛ, nɔnɔsɩ 12 nzɩ sɩkɛ kijisi 12; paa nɔnɔɔ ŋga lɛ palabɩ-kɛ nɛ kijiɣa kʋɖʋmaɣ. Nɛ tɛtʋ taa habɩyɛ sɔsɔɖɛ kaakɛ sika kele kele ñɩŋga, ɛzɩ ñɩnʋʋ ŋgʋ kɩ-taa panaɣnɩ wayɩ yɔ.
22 Mantɩna templo tɩ-taa, mbʋ pʋyɔɔ yɔ Yehowa* Ɛsɔ Ðoŋ Tɩŋa Tʋ+ kɛnɩ ti-templo, nɛ Heɣa ɖɔɖɔ. 23 Nɛ pɩtɩcɛyɩ se wɩsɩ yaa fenaɣ ɛñandɩ tɛtʋ ndʋ tɩ-yɔɔ, mbʋ pʋyɔɔ yɔ Ɛsɔ samtʋ ñandɩ tɩ-yɔɔ,+ nɛ Heɣa kaakɛnɩ tɩ-kanɖʋ.+ 24 Nɛ tɩ-ñalɩmɩyɛ kaɣ ajɛɛ ñandʋʋ nɛ aɖɔ,+ nɛ tɛtʋ yɔɔ awiya kaɣ kɔnʋʋ a-samtʋ tɩ-taa. 25 Paakaɣ tɩ-nɔnɔsɩ ɖɩɣʋ evemiye taa kpa, mbʋ pʋyɔɔ yɔ ɖoo ɛɛkaɣ yuu peeɖe.+ 26 Nɛ pakaɣ kɔnʋʋ ajɛɛ samtʋ nɛ a-hɩɖɛ ɖʋʋ tɩ-taa.+ 27 Ɛlɛ azuluma pʋyʋ nɛ ɛyʋ weyi ɛlakɩ kʋzɔɔtʋ lakasɩ nɛ ɛkɛ cɛtɩyʋ yɔ, paakaɣ sʋʋ tɩ-taa kpa;+ mba pama pa-hɩla Heɣa wezuu takayaɣ kikpiyaɣ taa yɔ, pe-ɖeke pakaɣnɩ sʋʋ tɩ-taa.+
22 Nɛ ɛwɩlɩ-m wezuu lɩm pɔɔ nakɛyɛ,+ ka-taa lɩm wɛ kele kele ɛzɩ krisɩtaalɩ pɩyɛ yɔ, kalɩɣaɣnɩ Ɛsɔ nɛ Heɣa+ pe-kewiyaɣ kpelaɣ cɔlɔ nɛ kekpeŋ 2 nɛ ketiki tɛtʋ habɩyɛ sɔsɔɖɛ hɛkʋ taa. Pɔɔ ŋga ke-kidiilimiŋ 2 ɛnɩ ɩ-yɔɔ kaawɛ wezuu tɩŋ weyi ɩlʋlʋʋ pee tam 12 pɩnaɣ taa yɔ, ɩlʋlʋʋ pee paa fenaɣ ŋga. Nɛ tɩŋ ɛnɩ, ɩ-hatʋ yekaɣ se ajɛɛ yɔɔ ɛcɛ.+
3 Nɛ nɔɔ kɩdɛkɛdaɣ lɔʋ ɛɛkaɣ tasʋʋ wɛʋ peeɖe kpa. Ɛlɛ Ɛsɔ nɛ Heɣa pe-kewiyaɣ kpelaɣ+ kaɣ wɛʋ tɛtʋ ndʋ tɩ-taa, nɛ Ɛsɔ yomaa kaɣ-ɩ labʋ tʋmɩyɛ kiɖeɖeye; 4 nɛ pakaɣ naʋ ɛ-ɛsɩndaa,+ nɛ ɛ-hɩɖɛ kaɣ wɛʋ pe-kila taa.+ 5 Pɩtasɩ lɛ, ɖoo ɛɛkaɣ tasʋʋ yuu,+ nɛ pɩɩkaɣ-wɛ tasʋʋ pɔzʋʋ kanɖʋ ñalɩmɩyɛ yaa wɩsɩ ñalɩmɩyɛ, mbʋ pʋyɔɔ yɔ Yehowa* Ɛsɔ kaɣ ñalɩmɩyɛ ñandʋʋ pɔ-yɔɔ,+ nɛ pakaɣ kewiyitu tɔɔʋ tam.+
6 Eheyi-m se: «Tɔm ndʋ tɩwɛ siɣsiɣ* nɛ tɩkɛ toovenim;+ ɛɛɛ, Yehowa,* Ɛsɔ weyi e-fezuu ɖiyi nayaa yɔ,+ etiyi e-tiyiyu se ɛwɩlɩ e-yomaa mbʋ pɩkazɩ pazɩ lɛ, pɩwɛɛ se pɩla yɔ. 7 Na! Menɖiɣni kɔm lɛɛ lɛɛ.+ Koboyaɣ tʋ lɛ ɛyʋ weyi ɛɖɔŋ natʋ tɔm ndʋ tɩwɛ takayaɣ kikpiyaɣ kanɛ ka-taa yɔ tɩ-yɔɔ yɔ.»+
8 Ma Yohanɛɛsɩ, mɛkɛnɩ weyi ɛnɩɣaɣ nɛ ɛnaɣ wondu ndʋ yɔ. Manɩwa nɛ mana-tʋ lɛ, moluŋ Ɛsɔ tiyiyu weyi ɛwɩlaɣ-m wondu ndʋ yɔ ɛ-nɩŋgbanzɩ tɛɛ se mɛnsɛɛ-ɩ. 9 Ɛlɛ eheyi-m se: «Kpa ña-tɩ! Taala mbʋ! Mɛnkɛ yom yem ɛzɩ ña nɛ ño-koobiya nayaa nɛ mba pɔɖɔŋ tɔm ndʋ tɩwɛ takayaɣ kikpiyaɣ kanɛ ka-taa yɔ tɩ-yɔɔ yɔ. Sɛɛ Ɛsɔ.»+
10 Ɛtasɩ-m heyuu se: «Taataaɖɩ natʋ tɔm ndʋ tɩwɛ takayaɣ kikpiyaɣ kanɛ ka-taa yɔ tɩ-yɔɔ, mbʋ pʋyɔɔ yɔ alɩwaatʋ ndʋ paɖʋwa yɔ tɩñɔtaa. 11 Weyi ɛlakɩ mbʋ pɩfɛyɩ siɣsiɣ yɔ, ɛwɛɛ mbʋ pɩfɛyɩ siɣsiɣ yɔ pɩ-labʋ yɔɔ; nɛ weyi ɛkɛ azuluma tʋ yɔ, ewolo pɩ-yɔɔ nɛ ɛwɛɛ ɛ-azuluma taa; ɛlɛ weyi ɛkɛ siɣsiɣ tʋ yɔ, ewolo pɩ-yɔɔ nɛ ɛwɛɛ siɣsiɣ; nɛ weyi ɛkɛ kiɖeɖeu yɔ, ewolo pɩ-yɔɔ nɛ ɛkɛ kiɖeɖeu.
12 «“Na! Menɖiɣni kɔm lɛɛ lɛɛ, nɛ kɩhɛyʋʋ ŋgʋ mɛhɛyɩɣ yɔ kɩwɛ mɔn-cɔlɔ, se mɛhɛyɩ paa weyi lɛ ɛzɩ ɛ-tʋmɩyɛ pɔzʋʋ yɔ.+ 13 Mɛkɛnɩ Alɩfaa nɛ Omega,*+ kajalaɣ tʋ nɛ kɛdɛzaɣ tʋ, ɖɩbazɩyɛ nɛ tɩnaɣ. 14 Koboyaɣ tɩnaa lɛ mba pɔcɔtʋʋ po-tokonaa kɩɖaɣlaa,+ se pɩsa nɛ pɛwɛɛnɩ ɖoŋ se powolo wezuu tɩŋ cɔlɔ+ nɛ papɩzɩ patɩŋnɩ tɛtʋ nɔnɔsɩ nɛ pasʋʋ tɩ-taa yɔ.+ 15 Hasɩ* nɛ mba payaɣ feziŋ kɩdɛkɛdɩŋ yɔ nɛ mba pacakɩ kʋzʋʋ kɩdɛkɛdʋʋ* wezuu yɔ nɛ ɛyaa kʋyaa nɛ sɩɩnaa layaa nɛ mba payɩ pɔsɔɔlɩ cɛtʋʋ nɛ cɛtɩm malɩnɩ-wɛ yɔ, paba ñɛwɛ awayɩ.”+
16 «“Ma Yesu, mentiyi men-tiyiyu se ɛlɩzɩ-mɩ aseɣɖe tɔm ndʋ tɩ-yɔɔ se pɩwazɩ agbaa. Mɛkɛnɩ Daviid liɖe nɛ ɛ-lʋlʋʋ taa tʋ+ nɛ tanaŋ tɛɛ tɩɩŋa ŋga kañɩlɩsɩɣ yɔ.”»+
17 Nɛ fezuu nɛ asɛyʋ+ pɛwɛɛ nɛ pɔyɔɔdʋʋ se: «Kɔɔ!» nɛ weyi ɛnɩɣ yɔ, ɛyɔɔdɩ se: «Kɔɔ!» nɛ weyi lɔkɔtʋ ɖɛ-ɩ yɔ, ɛkɔɔ;+ weyi e-liu wɛɛ yɔ, ɛmʋ wezuu lɩm falaa.+
18 «Mɛwɛɛ nɛ malɩzɩɣ aseɣɖe paa weyi ɛnɩɣ natʋ tɔm ndʋ tɩwɛ takayaɣ kikpiyaɣ kanɛ ka-taa yɔ se: Ye nɔɔyʋ ɛsɔzɩ tɔm natʋyʋ tɔm tʋnɛ tɩ-yɔɔ yɔ,+ Ɛsɔ kaɣ-ɩ sɔzʋʋ asɛyɩŋ weyi pama takayaɣ kikpiyaɣ kanɛ ka-taa yɔ;+ 19 nɛ ye nɔɔyʋ ɛlɩzɩ tɔm natʋyʋ natʋ tɔm ndʋ tɩwɛ takayaɣ kikpiyaɣ kanɛ ka-taa yɔ tɩ-yɔɔ yɔ, Ɛsɔ kaɣ lɩzʋʋ e-ɖeɖe wezuu tɩŋ taa+ nɛ tɛtʋ kiɖeɖetu taa;+ pɩ-tɔm pama takayaɣ kikpiyaɣ kanɛ ka-taa.
20 «Weyi ɛlɩzɩɣ aseɣɖe tɔm tʋnɛ tɩ-yɔɔ yɔ, ɛyɔɔdʋʋ se: “Ɛɛɛ, menɖiɣni kɔm lɛɛ lɛɛ.”»+
«Amɛn! Kɔɔ, Kɩbaɣlʋ Yesu.»
21 Tɛtɛ nɛ Kɩbaɣlʋ Yesu lootiye wɛɛ ɛyaa kiɖeɖema cɔlɔ.
Yaa «Kuluu.»
Yaa «A nɛ Z.» Alɩfaa nɛ Omega pɛkɛ Grɛɛkɩ kʋnʋŋ masɩ taa kajalaɣ nɛ kɛdɛzaɣ ñɩnzɩ.
Cɔnɩ Tɔm kɩsɔzɩtʋ A5.
Yaa «Hadɛɛsɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
Piye piye, «ɛtazɩɣ kataŋgayɩsɩ taa.»
Yaa «mantɩna ŋlabɩ ña-tʋma nɛ ŋtɛm-yɛ.»
Yaa «ŋtɔzʋʋ.»
Piye piye, «ŋwɛnɩ hɩla naayɛ pazɩ.»
Yaa «paha-ŋ ñamtʋ.»
Yaa «nɛ ñɩɣlɩm pɩyɛ kɩsɛmɖɩyɛ.»
Nɔ weyi ɛ nɛ e-ɖoŋ nɛ ɛtɩkpadɩyɩ yɔ ɛ-tɔm pɔyɔɔdʋʋ.
Yaa «keziye.»
Cɔnɩ Tɔm kɩsɔzɩtʋ A5.
Cɔnɩ Tɔm kɩsɔzɩtʋ A5.
Yaa «nzʋlʋma.»
Piye piye, «kuart.» Cɔnɩ Tɔm kɩsɔzɩtʋ B14.
Roma mba liidiye pɔɔyaɣ ŋga kamaɣnɩ liidiye nɖɩ pɛhɛyɩɣ tʋmlaɖʋ evemiye taa yɔ. Cɔnɩ Tɔm kɩsɔzɩtʋ B14.
Yaa «Hadɛɛsɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
Pɩtʋʋ fɛyɩ se pa-calɩm mbʋ paakpɛdɩ altaaru yɔɔ yɔ, pɩ-tɔm pɔyɔɔdʋʋ. Cɔnɩ Tɔm pee sɔsɔna tɔbʋʋ lɩzʋʋ.
Pʋtɔma pɩkɛ pʋnʋ hʋndʋ.
Yaa «nzʋlʋma.»
Yaa «wondu kɩlɩzɩtʋ ndʋ tɩwɛnɩ kalɩzasɩ yɔ.»
Yaa «keziye.»
Yaa «ɛsɔdaa hɛkʋ taa.» Grɛɛkɩ tɔm piye nɖɩ palabɩnɩ tʋmɩyɛ yɔ, ɖɩwɩlɩɣ se pɩkɛ ɛsɔdaa ɖenɖe sumasɩ kʋyʋʋ yɔ.
Pʋ-tɔbʋʋ se «Ðɩzʋʋ.»
Pʋ-tɔbʋʋ se «Ðɩzɩyʋ.»
Pʋ-tɔbʋʋ se 200 000 000.
Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
Yaa «ɛhɔkɩ ɛ-tɩ nɛ.»
Piye piye, «ɛ-naataŋ.»
Yaa «Mɛsɩ.»
Yaa «nzʋlʋma.»
Yaa «ɖaʋ ŋgʋ pamaɣzɩɣna yɔ.»
Yaa «nzʋlʋma.»
Yaa «wɛɛ nɛ pɔcɔŋna.»
Cɔnɩ Tɔm kɩsɔzɩtʋ A5.
Yaa «paɖɩzɩɣ.»
Yaa «pɩkpaɣ.»
Pʋ-tɔbʋʋ se «Awɛ ɛzɩ Ɛsɔ?»
Pɩpɩzɩɣ pɩkɛ, «ɛlɛ pawabɩ-kʋ [pʋ-tɔbʋʋ se ɖʋmanʋʋ].»
Yaa «pe-weziŋ.» Cɔnɩ Tɔm pee sɔsɔna tɔbʋʋ lɩzʋʋ.
Yaa «keziye.»
Pʋ-tɔbʋʋ se wɛɛ 3 nɛ hɔɔlʋʋ.
Piye piye, «e-ɖomaɣ.»
Pʋ-tɔbʋʋ se ɖʋmanʋʋ.
Yaa «nzʋlʋma.»
Pɩpɩzɩɣ pɩkɛ, «Ye pɩwɛɛ se pakʋ nɔɔyʋ nɛ laɣɖɛ yɔ.»
Yaa «ɛsɔdaa hɛkʋ taa; ma-ñʋʋ yɔɔ.» Grɛɛkɩ tɔm piye nɖɩ palabɩnɩ tʋmɩyɛ yɔ, ɖɩwɩlɩɣ se pɩkɛ ɛsɔdaa ɖenɖe sumasɩ kʋyʋʋ yɔ.
Yaa «nzʋlʋma.»
Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
Yaa «pana.»
Pɩkɛ kilomɛtanaa ɛzɩ 296 mbʋ yɔ. Staadɩ kʋɖʋmʋʋ maɣnɩ mɛtanaa 185. Cɔnɩ Tɔm kɩsɔzɩtʋ B14.
Cɔnɩ Tɔm kɩsɔzɩtʋ A5.
Cɔnɩ Tɔm kɩsɔzɩtʋ A5.
Yaa «nɛ paa kalɩzaɣ ŋga.»
Cɔnɩ Tɔm kɩsɔzɩtʋ A5.
Piye piye, «azuluma feziŋ.»
Grɛɛkɩ taa lɛ Harmaagedɔɔnɩ, palɩzɩ-ɖɩ nɛ Ebree tɔm piye naɖɩyɛ taa, nɛ ɖɩ-tɔbʋʋ lɛ se «Megido Pʋʋ.»
Grɛɛkɩ mba tɛ talaŋ kʋɖʋmʋʋ maɣnɩ ɛzɩ kilonaa 20 nɛ hɔɔlʋʋ mbʋ yɔ (kilonaa 20,4). Cɔnɩ Tɔm kɩsɔzɩtʋ B14.
Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
Yaa «lɛɣtʋ.»
Yaa «nzʋlʋma.»
Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
Yaa «pana.»
Yaa «tadɩyɛ laɖaa nʋmɔɖɔnaa.»
Yaa «Ɛsɔ tɔzɩ kɩ-kɩdɛkɛdɩm.»
Cɔnɩ Tɔm kɩsɔzɩtʋ A5.
Yaa «kalɩzasɩ.»
Yaa «ña-kalɩzaɣ liu.»
Yaa «Aleluyah!» Hɩɖɛ «Yehowa» potobiyaa nɛ pɩkɛ «Yah.»
Grɛɛkɩ taa lɛ pɔrɩneya. Cɔnɩ Tɔm pee sɔsɔna tɔbʋʋ lɩzʋʋ.
Piye piye, «mbʋ pɩlɩnɩ e-nesi tɛɛ yɔ.»
Yaa «Aleluyah!» Hɩɖɛ «Yehowa» potobiyaa nɛ pɩkɛ «Yah.»
Yaa «Aleluyah!» Hɩɖɛ «Yehowa» potobiyaa nɛ pɩkɛ «Yah.»
Yaa «Aleluyah!» Hɩɖɛ «Yehowa» potobiyaa nɛ pɩkɛ «Yah.»
Cɔnɩ Tɔm kɩsɔzɩtʋ A5.
Pɩpɩzɩɣ pɩkɛ, «mɩzɩ kɩ-yɔɔ.»
Yaa «ɛsɔdaa hɛkʋ taa; ma-ñʋʋ yɔɔ.» Grɛɛkɩ tɔm piye nɖɩ palabɩnɩ tʋmɩyɛ yɔ, ɖɩwɩlɩɣ se pɩkɛ ɛsɔdaa ɖenɖe sumasɩ kʋyʋʋ yɔ.
Piye piye, «mba pakʋ-wɛ nɛ laɖɩyɛ.»
Cɔnɩ Tɔm pee sɔsɔna tɔbʋʋ lɩzʋʋ nɛ Natʋ 6:9 tɛ pɩ-tɛɛ tɔm.
Yaa «maalika.»
Yaa «pakaɣ-wɛ nʋmɔʋ ɖɩɣʋ; pakaɣ-wɛ salaka ɖʋʋ.»
Yaa «Hadɛɛsɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
Yaa «Hadɛɛsɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
Yaa «tɔm ndʋ tɩmʋnaa se pataa-tʋ liu.»
Yaa «A nɛ Z.» Alɩfaa nɛ Omega pɛkɛ Grɛɛkɩ kʋnʋŋ masɩ taa kajalaɣ nɛ kɛdɛzaɣ ñɩnzɩ.
Yaa «ɛɛhɛyɩɣ nabʋyʋ.»
Pɩkɛ kilomɛtanaa ɛzɩ 2 220 mbʋ yɔ. Staadɩ kʋɖʋmʋʋ maɣnɩ mɛtanaa 185. Cɔnɩ Tɔm kɩsɔzɩtʋ B14.
Pɩkɛ ɛzɩ mɛtanaa 64 mbʋ yɔ. Cɔnɩ Tɔm kɩsɔzɩtʋ B14.
Cɔnɩ Tɔm kɩsɔzɩtʋ A5.
Cɔnɩ Tɔm kɩsɔzɩtʋ A5.
Yaa «Tɔm ndʋ tɩmʋnaa se pataa-tʋ liu.»
Cɔnɩ Tɔm kɩsɔzɩtʋ A5.
Yaa «A nɛ Z.» Alɩfaa nɛ Omega pɛkɛ Grɛɛkɩ kʋnʋŋ masɩ taa kajalaɣ nɛ kɛdɛzaɣ ñɩnzɩ.
Pʋ-tɔbʋʋ se ɛyaa mba pa-lakasɩ wɛ kʋzɔɔtʋ Ɛsɔ ɛsɩndaa yɔ.