Ɛbɛ yɔɔ pɩwɛɛ se ŋkpɛlɩkɩɣ tam nɛ ŋtɩlɩ Yehowa camɩyɛ?

1. Ye ŋkpɛlɩkɩɣ Bibl tam yɔ, ɛzɩma pɩpɩzɩɣ nɛ pɩwazɩ-ŋ?

Pɩtʋʋ fɛyɩ se Bibl taa tɔm ndʋ ŋkpɛlɩkɩ hatʋ cabɩ takayaɣ kanɛ ka-taa yɔ, tɩkpazɩ ɖoŋ sɔɔlɩm mbʋ ŋwɛnɩ Yehowa yɔɔ yɔ. Ɛlɛ pɩwɛɛ se ŋñaɣ pana nɛ ñɔ-sɔɔlɩm mbʋ pɩpaɣlɩɣ tam. (1 Pɩyɛɛrɩ 2:2) Pʋcɔ nɛ ŋhiɣ wezuu maatɛŋ lɛ, pʋmʋnaa se ŋkpɛlɩkɩɣ Bibl nɛ ŋñɔtʋʋnɩ Ɛsɔ tam.​—Kalɩ Yohanɛɛsɩ 17:3; Yuudi 21.

Ye ŋñakɩ pana se ŋtɩlɩ Ɛsɔ nɛ pɩkɩlɩ yɔ, ñe-tisuu ɖɔɖɔ kaɣ ɖoŋ kpaʋ nɛ mbʋ kaɣnɩ-ŋ sɩnʋʋ nɛ ñɔ-tɔm kɛdɩnɩ Ɛsɔ. (Ebree 11:1, 6) Pɩkaɣ-ŋ sɩnʋʋ ɖɔɖɔ nɛ ŋkpiɖi ñe-kɩwɛɛkɩm yɔɔ nɛ ŋlɛɣzɩ ñe-wezuu caɣʋ nɛ pɩwazɩ-ŋ.​—Kalɩ Tʋma 3:19.

2. Ye ŋtɩlɩ Ɛsɔ yɔ, ɛzɩma pɩpɩzɩɣ nɛ pɩwazɩ lalaa?

Pɩtʋʋ fɛyɩ, pɩkaɣ-ŋ kɛdɩnʋʋ se ŋheyi lɛlaa tɔm ndʋ ŋkpɛlɩkaa yɔ​—paa weyi ɛnɩ tɔm kɩbandʋ natʋyʋ yɔ, ɛsɔɔlaa se eheyi-tʋ lɛlaa. Ŋŋkpɛlɩkɩɣ Bibl nɛ piwokini ɛzɩdaa lɛ, ŋkaɣ tɩlʋʋ ɛzɩma ŋlabɩnɩ-kʋ tʋmɩyɛ nɛ ŋwɩlɩ lɛlaa mbʋ pɩ-yɔɔ ŋtisi Yehowa nɛ laŋhɛzɩyɛ tɔm yɔɔ yɔ.​—Kalɩ Roma 10:13-15.

Ɛyaa sakɩyɛ calɩɣnɩ laŋhɛzɩyɛ tɔm heyuu pa-taabalaa nɛ pa-ñɩma na. Ɛlɛ pʋmʋnaa se ɖɩtɩlɩ yɔɔdʋʋ. Pɩfɛyɩ ɖeu se ɖiheyiɣ ɛyaa se po-cooci tɩkɛdɩnɩ Ɛsɔ, ɛlɛ ɖiheyi-wɛ mbʋ Ɛsɔ kaɣ labʋ yɔ pɩ-tɔm na. Tɔzɩ ɖɔɖɔ se ɖoŋ ɖoŋ lɛ, ña-lakasɩ kɩbanzɩ tukuuni ɛyaa nɛ pɩkɩlɩ tɔm ndʋ ŋheyiɣ-wɛ yɔ.​—Kalɩ 2 Timootee 2:24, 25.

3. Taabalɩyɛ nɖɩ kaɣ wɛʋ ña nɛ Yehowa mɩ-hɛkʋ taa?

Bibl kpɛlɩkʋʋ kaɣ-ŋ sɩnʋʋ nɛ ŋpɩɩ fezuu taa. Pɩkaɣ-ŋ sɩnʋʋ ɖɔɖɔ nɛ ña nɛ Yehowa lɛ, mɩ-taabalɩyɛ wɛɛ ŋgee. Piyeki nɛ ŋpɩsɩ ɛ-hɔʋ taa tʋ.​—Kalɩ 2 Kɔrɛntɩ 6:18.

4. Ɛbɛ yɔɔ pɩwɛɛ se ŋñakɩ pana nɛ ŋpɩɣ fezuu taa?

Ye ŋkpɛlɩkɩɣ Bibl yɔ, ŋkaɣ pɩʋ fezuu taa. (Ebree 5:13, 14) Heyi Yehowa Aseɣɖe Tʋ nɔɔyʋ se ɛsɩnɩ-ŋ nɛ ŋkpɛlɩkɩ Bibl pɩtɩŋnɩ takayaɣ ŋga payaɣ se Tɔm Ndʋ Bibl Wɩlɩɣ Toovenim Taa? yɔ, kɔ-yɔɔ. Ŋŋkpɛlɩkɩɣ Bibl nɛ piwokini ɛzɩdaa lɛ, ñe-wezuu caɣʋ kaɣ ɖɔɖɔ ñɔɔzʋʋ nɛ pɩkɩlɩ.​—Kalɩ Keɣsi 1:1-3; 72:27, 28.

Yehowa, Ɛsɔ koboyaɣ tʋ, cɔlɔ laŋhɛzɩyɛ tɔm lɩnaa. Ye ŋñɔtʋʋnɩ ña-tɩ nɛ Yehowa samaɣ nɛ pɩkɩlɩɣ yɔ, pɩsɩɣnɩ-ŋ nɛ ŋñɔtɩnɩ-ɩ kpam ɖɔɖɔ. (Ebree 10:24, 25) Ŋñakɩ pana se ñɔ-tɔm ɛkɛdɩnɩ-ɩ yɔ, ŋkaɣ hiɣu wezuu siŋŋ yaa wezuu maatɛŋ. Toovenim taa lɛ, ye ɛyʋ ɛñɔtʋʋnɩ Ɛsɔ yɔ, mbʋ kɩlɩnɩ ɖeu wezuu caɣʋ kpeekpe taa.​—Kalɩ 1 Timootee 1:11; 6:19.