‘Pɩwɛ-ɖʋ ɖeu se ɖɩñɔtɩnɩ Ɛsɔ’

1-2. (a) Pʋcɔ nɛ ɖa nɛ nɔɔyʋ ɖɩɖʋ taabalɩyɛ kɩbanɖɛ lɛ, ɛbɛ pɩpɔzʋʋ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

ŊWƐNƖ taabalʋ kɩbanʋ nɔɔyʋ? Ɛbɛ ŋlaba nɛ ña nɛ ɛyʋ ɛnʋ ɩpɩsɩ taabalaa? Pɩtʋʋ fɛyɩ se ña nɛ ɩ ɩkpaɣ alɩwaatʋ nɛ ɩcaɣ; pɩtasɩ lɛ, ŋñɩnaa nɛ ŋtɩlɩ e-wezuu caɣʋ yɔɔ tɔm, mbʋ ɛsɔɔlaa yɔ nɛ mbʋ ɛtɩsɔɔlɩ yɔ. Ŋkɔm nɛ ŋɖiɣzina se ɛwɛnɩ wɛtʋ kɩbandʋ nɛ ŋsɔɔlaa se ŋmaɣzɩnɩ-tʋ. Piyeba nɛ ŋsɔɔlɩ-ɩ.

² Pʋcɔ nɛ ɖa nɛ nɔɔyʋ ɖɩɖʋ taabalɩyɛ kɩbanɖɛ lɛ, pɩpɔzʋʋ alɩwaatʋ nɛ pana ñaɣʋ. Mbʋ ɖɔɖɔ pɩpɔzʋʋ alɩwaatʋ nɛ pana ñaɣʋ pʋcɔ nɛ ɖa nɛ Ɛsɔ Yehowa ɖɩɖʋ taabalɩyɛ kɩbanɖɛ. Tɔm ñʋʋ kʋnɛ kɩ-taa, ɖɩkaɣ naʋ mbʋ ɖɩpɩzɩɣ ɖɩla nɛ ɖɩñɔtɩnɩ Yehowa yɔ nɛ wazasɩ nzɩ ɖɩpɩzɩɣ nɛ ɖihiɣ ye ɖɩlabɩ mbʋ yɔ. Kajalaɣ lɛ, iyele nɛ ɖɩna mbʋ pʋyɔɔ pɩwɛ ɖeu se ɖɩñɔtɩnɩ ɖa-taabalʋ kɩbanʋ Yehowa yɔ.

3. Ɛbɛ yɔɔ pɩpɔzʋʋ se ɖɩmaɣzɩ mbʋ pʋyɔɔ pɩwɛ ɖeu se ɖɩñɔtɩnɩ Yehowa yɔ pɩ-yɔɔ? Ha kɩɖaʋ nakʋyʋ.

³ Pɩtʋʋ fɛyɩ se ŋtisiɣ se pɩwɛ ɖeu se ɛyʋ ɛñɔtɩnɩ Yehowa. Ɛlɛ ye ɖɩmaɣzɩ mbʋ pʋyɔɔ ɖeyi ɖeyi pɩwɛ ɖeu se ɖɩñɔtɩnɩ Yehowa yɔ pɩ-yɔɔ yɔ, pɩkaɣ-ɖʋ seɣtuu se ɖiwolo pɩ-yɔɔ nɛ ɖɩñɔtʋʋnɩ-ɩ. (Keɣ. 63:​6-8) Kɩɖaʋ nakʋyʋ yɔ: Ðɩnawa se ye ɖɩtɔkɩ tɔɔnaɣ kɩbaŋa, ɖɩlakɩ hola aleɣya, ɖɩhɛzɩɣ camɩyɛ nɛ ɖɩñɔʋ lɩm sakɩyɛ yɔ ɖɩwɛɣ alaafɩya. Ɛlɛ ɛyaa sakɩyɛ ɩɩlakɩ mbʋ nɛ paacɔŋnɩ po-tomnaɣ taa alaafɩya yɔɔ. Ɛlɛ ye ɖɩmaɣzɩɣ mbʋ pɩwɛɛ se ɖɩla nɛ ɖɩwɛɛnɩ tɔnʋʋ taa alaafɩya yɔ pɩ-wazasɩ yɔɔ ɖoŋ ɖoŋ yɔ, pɩtʋʋ fɛyɩ se pɩkaɣ-ɖʋ seɣtuu se ɖɩlabɩ-pʋ nɛ pɩkɩlɩ. Mbʋ ɖɔɖɔ, ɖɩpɩzɩɣ nɛ ɖɩtɩlɩ se ye ɖɩñɔtɩnɩ Yehowa yɔ pɩwɛ ɖeu, ɛlɛ ye ɖɩmaɣzɩɣ wazasɩ nzɩ pɩkɔŋnɩ-ɖʋ yɔ sɩ-yɔɔ yɔ pɩpɩzɩɣ piseɣti-ɖʋ nɛ ɖiwolo pɩ-yɔɔ nɛ ɖɩñɔtʋʋnɩ-ɩ.—Keɣ. 119:​27-30.

4. Tɔm ndʋ weyi ɛma Keɣa 73:28 yɔ ɛyɔɔdaa?

⁴ Kalɩ Keɣa 73:28. Keɣa 73 maɖʋ kaakɛ Leevi tʋ, nɛ paalɩzɩ-ɩ se ɛma minziiki Yehowa templo taa. Pɩtɩla ɛɛsɛ Yehowa siɣsiɣ pɩnzɩ sakɩyɛ. Paa mbʋ yɔ, eɖiɣzinaa se pɩwɛɛ se ɛtɔzɩ ɛ-tɩ nɛ ɛtɔzɩ ɖɔɖɔ ɛyaa lalaa se ‘pɩwɛ-ɩ ɖeu se ɛñɔtɩnɩ Ɛsɔ’ nɛ pɩwɛ ɖeu se paba ɖɔɖɔ pɔñɔtɩnɩ Ɛsɔ. Ye ɖɩtɔzʋʋ tɔm ndʋ tɩ-yɔɔ yɔ, wazasɩ nzɩ ɖihikiɣ?

YE ÐƖÑƆTƲƲNƖ ƐSƆ YƆ ÐIHIKIƔ TAA LELEŊ

5. (a) Ye ɖɩñɔtʋʋnɩ Yehowa yɔ, ɖihikiɣ taa leleŋ. Ɛbɛ yɔɔ? (b) Hɔɔlɩŋ weyi taa Yehowa lɔŋsɩnɖɛ pɩzɩɣ nɛ ɖɩwazɩ-ŋ nɛ ɖɩkandɩyɩ ñɔ-yɔɔ? (Aduwa 2:​6-16)

⁵ Ðɩwɛɣ nɛ ɖɩñɔtʋʋnɩ Yehowa nɛ pɩkɩlɩɣ lɛ, ɖihikiɣ taa leleŋ nɛ pɩkɩlɩɣ. (Keɣ. 65:4) Tɔm ndʋ tɩkɛ toovenim lɩmaɣza sakɩyɛ yɔɔ. Kɩɖaʋ nakʋyʋ yɔ: Alɩwaatʋ ndʋ ɖɩkalɩɣ tɔm ndʋ Yehowa heyiɣ-ɖʋ Bibl taa yɔ nɛ ɖɩɖɔŋ tɩ-yɔɔ yɔ ɖɩpɩsɩɣ lɔŋsɩnɖaa. Lɔŋsɩnɖɛ nɖɩ ɖɩwɛ Bibl taa yɔ, ɖɩkandɩyɩɣ ɖɔ-yɔɔ se kɩdɛkɛdɩm nabʋyʋ ɛtaatalɩ-ɖʋ nɛ ɖɩkandɩyɩɣ ɖɔ-yɔɔ ɖɔɖɔ se ɖɩtaala kɩdɛkɛdɩm sɔsɔm nabʋyʋ. (Kalɩ Aduwa 2:​6-16.) Pʋyɔɔ Bibl yɔɔdʋʋ se: «Koboyaɣ tʋ lɛ ɛyʋ weyi ehiɣ lɔŋsɩnɖɛ yɔ, nɛ koboyaɣ tʋ lɛ ɛyʋ weyi ɛwɛnɩ lɛɣtʋ yɔ.»—Adu. 3:13.

6. Ɛbɛ yeba nɛ Keɣa maɖʋ lesi ɛ-taa leleŋ?

⁶ Pɩkɛ toovenim se Yehowa taabalaa ɖɔɖɔ katɩɣ wɛtʋ ndʋ tɩhaɣ-wɛ laŋwɛɛkɩyɛ yɔ. Keɣa 73 maɖʋ kaalesi ɛ-taa leleŋ alɩwaatʋ ndʋ ɛɛpaɣzɩ wɛnʋʋ lɩmaɣza kɩdɛkɛda yɔ. Ɛɛpaɣzɩ maɣzʋʋ se piɖeɣaɣni ɛyaa kɩdɛkɛdaa mba pa-paa fɛyɩnɩ Ɛsɔ nɛ ɛ-paɣtʋ yɔ nɛ pɩkɩlɩɣ. Pɩɖʋwaɣ-ɩ ɖɩwɩzɩyɛ, nɛ halɩ ɛsʋsaɣ-wɛ. Ɛmaɣzaɣ se ɛyaa mba palakaɣ puuyaɣ lakasɩ nɛ pakpazɩɣ pa-tɩ yɔ pɛwɛnɩ mbʋ payɩ pɔsɔɔlaa yɔ nɛ pɛwɛnɩ tɔnʋʋ taa alaafɩya, nɛ halɩ paalakɩ kʋñɔŋ. (Keɣ. 73:​3-7, 12) Pɩcɛyaɣ Keɣa maɖʋ ɛnʋ siŋŋ nɛ halɩ alɩwaatʋ natʋyʋ ɛpɔzɩ ɛ-tɩ se ɛzɩ pana wena ɛñakɩ nɛ ɛsɛɣ Yehowa yɔ awazɩɣ pʋyʋ. Ɛɛwɛ laŋwɛɛkɩyɛ taa siŋŋ nɛ ɛyɔɔdɩ se: «Toovenim taa lɛ, falaa mɔnɖɔkɩ ma-laŋɩyɛ kele kele, nɛ falaa mansaŋ me-nesi se pɩwɩlɩ se mantɩɖɔɔ wɛɛ.»—Keɣ. 73:13.

7. Alɩwaatʋ ndʋ ɖɩwɛɣ laŋwɛɛkɩyɛ taa yɔ, ɛbɛ ɖɩpɩzɩɣ nɛ ɖɩla? (Cɔnɩ ɖɔɖɔ kɩlɛmʋʋ.)

⁷ Keɣa maɖʋ tiyele nɛ laŋwɛɛkɩyɛ nɖɩ ɖɩwɛɛnɩ ɖoŋ ɛ-yɔɔ. Ɛlabɩ nabʋyʋ se pɩsa nɛ ɛlɛɣzɩ ɛ-lɩmaɣza. «[Ɛsʋ] Ɛsɔ kooka kiɖeɖeɣa sɔsɔɔ taa,» nɛ peeɖe Yehowa ñɔɔzɩ ɛ-lɩmaɣza. (Keɣ. 73:​17-19) Alɩwaatʋ ndʋ ɖɩwɛɣ laŋwɛɛkɩyɛ taa yɔ, ɖa-taabalʋ kɩbanʋ Yehowa naɣ. Ye ɖɩtɩmɩɣnɩ-ɩ se eɖiyi-ɖʋ nɛ ɖitisiɣ se ɛtɩŋnɩ ɛ-tɔm nɛ ɛ-ɛgbɛyɛ yɔɔ nɛ ɛsɩnɩ-ɖʋ yɔ, ɖɩkaɣ kpaʋ ɖoŋ nɛ ɖɩlʋbɩnɩ laŋwɛɛkɩyɛ nɖɩ. Halɩ alɩwaatʋ ndʋ ɖɩkatɩɣ kʋñɔmɩŋ sakɩyɛ nɛ ɖɩɩsɩŋ mbʋ pɩwɛɛ se ɖɩla yɔ, Yehowa kaɣ-ɖʋ sɩnʋʋ nɛ ɛhɛzɩ ɖa-laŋɩyɛ.—Keɣ. 94:19.a

YE ÐƖÑƆTƲƲNƖ ƐSƆ YƆ ÐIHIKIƔ WEZUU KƖBAŊƲ LƐƐLƐƐYƆ NƐ LIDAƲ CEE WAYƖ

8. Wazasɩ sɔsɔsɩ lɛɛsɩ nzɩ yɔɔ pɩwɛ ɖeu se ɖɩñɔtɩnɩ Ɛsɔ?

⁸ Wazasɩ sɔsɔsɩ lɛɛsɩ yɔɔ pɩwɛ ɖeu se ɖɩñɔtɩnɩ Ɛsɔ. Kajalaɣ lɛ, piɖeɣni-ɖʋ ɖe-wezuu caɣʋ taa sɔnɔ sɔnɔ. Nabʋlɛ lɛ, pɩhaɣ-ɖʋ cee wayɩ lidaʋ ŋgʋ kɩkam camɩyɛ yɔ. (Yer. 29:11) Iyele nɛ ɖɩtazɩ wazasɩ nzɩ sɩ-taa nɛ pɩkɩlɩ.

9. Ye ɖɩñɔtɩnɩ Yehowa yɔ, ɛzɩma piyeki se ɖihiɣ koboyaɣ?

⁹ Ye ɖɩñɔtɩnɩ Yehowa yɔ, piɖeɣni-ɖʋ ɖe-wezuu caɣʋ taa sɔnɔ sɔnɔ. Sɔnɔ ɛyaa sakɩyɛ iitisiɣ se Ɛsɔ wɛɛ. Pamaɣzɩɣ se wezuu caɣʋ fɛyɩnɩ tɔbʋʋ nɩʋ, nɛ cee wayɩ wezuu caɣʋ kaɣ sɩʋ tɩnaɣ. Ɛlɛ ɖɩkpɛlɩkɩ Ɛsɔtɔm lɛ, ɖa-taa tɛ se Ɛsɔ «[wɛɛ] nɛ ɛhɛyɩɣ mba pañɩnɩɣ-ɩ siŋŋ yɔ.» (Ebr. 11:6) Halɩ sɔnɔ sɔnɔ, ɖɩwɛ koboyaɣ taa mbʋ pʋyɔɔ yɔ ɖɩwɛɛ nɛ ɖɩlakɩ mbʋ palɩzɩ-ɖʋ se ɖɩla yɔ. Mbʋ lɛ se ɖɩsɛɛ ɖa-Caa Yehowa, weyi ɛwɛ ɛsɔdaa yɔ.—Wp. 10:​12, 13.

10. Tamaɣ ŋga Yehowa labɩ mba pataɣ-ɩ liu yɔ Keɣa 37:29 taa?

¹⁰ Ɛyaa sakɩyɛ fɛyɩnɩ cee wayɩ lidaʋ nakʋyʋ. Pa-kaɖʋsɩ kpeekpe lɛ se pala tʋmɩyɛ, pɔɖɔkɩ nesi, palʋlɩ piya nɛ pɔñɔɔzɩ mbʋ pɩkaɣ-wɛ pɔzʋʋ se pɩsa nɛ pacaɣ wezuu alɩwaatʋ ndʋ paakaɣ tasʋʋ pɩzʋʋ nɛ pala tʋmɩyɛ yɔ. Paasɩŋ tamaɣ ŋga Ɛsɔ labɩ cee wayɩ yɔɔ yɔ. Ɛlɛ, Yehowa sɛyaa ñataɣ-ɩ liu se ɛkaɣ pɔ-yɔɔ cɔnʋʋ. (Keɣ. 25:​3-5; 1 Tim. 6:17) Ðɩtaɣ Ɛsɔ weyi ɖɩñɔtɩnaa yɔ liu nɛ ɖɩtaɣ tamaɣ ŋga ɛlabɩ-ɖʋ yɔ liu. Mbʋ ɖɩɖaŋaa se pɩkaɣ labʋ cee wayɩ yɔ pɩ-taa nabʋyʋ lɛ se ɖɩkaɣ sɛʋ Yehowa tam tam Paradisuu taa.—Kalɩ Keɣa 37:29.

11. (a) Ye ɖɩñɔtʋʋnɩ Ɛsɔ yɔ wazasɩ nzɩ ɖihikiɣ? (b) Nɛ ɛzɩma pɩlakɩ Ɛsɔ?

¹¹ Ye ɖɩñɔtʋʋnɩ Ɛsɔ yɔ, pɩwazɩɣ-ɖʋ hɔɔlɩŋ lɛɛŋ sakɩyɛ taa. Kɩɖaŋ nɩɩyɩ yɔ: Yehowa labɩ-ɖʋ tamaɣ se ɛkpakɩɣ nɛ ekpeɣ-ɖʋ ye ɖikpiɖi ɖa-kɩwɛɛkɩm yɔɔ yɔ. (Iza. 1:18) Pʋyɔɔ lɛ, pɩɩkaɣ tasʋʋ pɔzʋʋ se ɖiwolo pɩ-yɔɔ nɛ ɖɩkʋʋ ɖa-tɩ tɔm kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ. (Keɣ. 32:​1-5) Nɛ ɖa-taa lakɩ leleŋ alɩwaatʋ ndʋ ɖiyeki se Yehowa taa ɛla leleŋ yɔ. (Adu. 23:15) Toovenim taa lɛ, ɖɩpɩzɩɣ nɛ ɖɩtasɩ hiɣu wazasɩ lɛɛsɩ ye taabalɩyɛ kɩbanɖɛ ɛwɛ ɖa nɛ Yehowa ɖɛ-hɛkʋ taa yɔ. Ɛlɛ, ɛzɩma ŋpɩzɩɣ nɛ ŋwolo pɩ-yɔɔ nɛ ŋñɔtʋʋnɩ Ɛsɔ?

ƐZƖMA ÐƖPƖZƖƔ NƐ ÐIWOLO PƖ-YƆƆ NƐ ÐƖÑƆTƲƲNƖ ƐSƆ?

12. Ɛbɛ ŋlaba se pɩsa nɛ ŋñɔtɩnɩ Ɛsɔ nɛ pɩkɩlɩ?

¹² Ye pamɩyɩsɩ-ŋ lɩm yɔ, pɩwɩlɩɣ se ŋtɛm kpɛzʋʋ nɩŋgbanzɩ sakɩyɛ se pɩsa nɛ ŋñɔtɩnɩ Yehowa. Ŋkpɛlɩkɩ Ɛsɔ Yehowa nɛ Yesu Krɩstʋ pɔ-yɔɔ toovenim tɔm sakɩyɛ, ŋkpiɖi kɩwɛɛkɩm mbʋ ŋlaba nɛ pɩɖɛɛ yɔ pɩ-yɔɔ, ŋwɩlaa se ŋwɛnɩ tisuu sɔsɔm Ɛsɔ yɔɔ, nɛ ŋñaɣ pana nɛ ŋcaɣ wezuu nɛ pɩla nɔɔ kʋɖʋmaɣ nɛ Ɛsɔ sɔɔlɩm. Ɛlɛ pɩsa nɛ ɖɩñɔtɩnɩ Ɛsɔ nɛ pɩkɩlɩ lɛ, pɩpɔzʋʋ se ɖiwolo pɩ-yɔɔ nɛ ɖɩlakɩ mbʋ.—Kol. 2:6.

13. Nɩŋgbanzɩ 3 nzɩ pɩwɛɛ se ɖɩkpɛzɩ nɛ ɖiwolo pɩ-yɔɔ nɛ ɖɩñɔtʋʋnɩ Yehowa?

¹³ Ɛbɛ kaɣ-ɖʋ sɩnʋʋ nɛ ɖiwolo pɩ-yɔɔ nɛ ɖɩñɔtʋʋnɩ Yehowa? (1) Pɩwɛɛ se ɖiwolo pɩ-yɔɔ nɛ ɖɩkalɩɣ Bibl nɛ ɖɩkpɛlɩkɩɣ-kʋ. Alɩwaatʋ ndʋ ɖɩkpɛlɩkɩɣ Bibl yɔ, ɖa-kaɖʋwa ɛtaakɛna se ɖɩkpɛlɩkɩɣ nɛ ɖɩtɩlɩ Ɛsɔ yɔɔ tɔm yem. Ɛlɛ pɩwɛɛ se ɖɩñaɣ pana nɛ ɖɩtɩlɩ mbʋ Ɛsɔ sɔɔlaa se ɖɩla yɔ, nɛ ɖiyele nɛ ɛ-paɣtʋ kila wena awɛ Bibl taa yɔ aɖiyi-ɖʋ. (Efɛz. 5:​15-17) (2) Pɩwɛɛ se ɖɩkpaɣ alɩwaatʋ nɛ ɖɩmaɣzɩɣ ɛzɩma ɛwɩlɩɣ-ɖʋ sɔɔlɩm yɔ pɩ-yɔɔ nɛ pɩcɛyɩsɩ ɖe-tisuu. (3) Pɩwɛɛ se ɖiwolo pɩ-yɔɔ nɛ ɖɩpaɖɩɣ lakasɩ nzɩ sɩɖʋʋ Yehowa ɖɩwɩzɩyɛ yɔ, nɛ pɩfɛyɩ se ɖɩɖʋ taabalɩyɛ nɛ ɛyaa mba palakɩ lakasɩ nzɩ yɔ.—Keɣ. 1:1; 101:3.

14. Ɛzɩ 1 Kɔrɛntɩ mba 10:31 yɔɔdʋʋ yɔ, ɛbɛ ɖɩpɩzɩɣ ɖɩla paa evemiye nɖɩ se pɩsa nɛ ɖɔ-tɔm kɛdɩnɩ Yehowa? (Cɔnɩ ɖɔɖɔ kɩlɛmɩŋ.)

¹⁴ Kalɩ 1 Kɔrɛntɩ mba 10:31. Pɩcɛyaa se ɖiwolo pɩ-yɔɔ nɛ ɖɩlakɩ mbʋ pɩkɛdɩɣnɩ Ɛsɔ yɔ. Pɩtɩkɛ tɔm susuu nɛ kediɣzisi wobu ɖeke wɩlɩɣna se ɖɩlakɩ mbʋ pɩkɛdɩɣnɩ Ɛsɔ yɔ. Ɛlɛ mbʋ ɖɩlakɩ paa evemiye nɖɩ yɔ, pɩwɛɛ se pɩkɛdɩnɩ Yehowa. Kɩɖaŋ nɩɩyɩ yɔ: Ye ɖɩwɛ toovenim pɩtɩŋa pɩ-taa, nɛ ɖɩhaɣ ɛyaa mbʋ ɖɩwɛna yɔ, ɖiyeki se Yehowa taa ɛla leleŋ. (2 Kɔr. 8:21; 9:7) Ɛsɔɔlaa ɖɔɖɔ se ɖɩwɩlɩ se ɖɩwɛnɩ ɛsɩmɩyɛ wezuu ŋgʋ ɛha-ɖʋ yɔ kɩ-yɔɔ. Ye ɖɩɩɖɛlɩsɩɣ niye tɔkɩyɛ nɛ ñɔtʋ taa, nɛ ɖɩlakɩ mbʋ pɩpɔzʋʋ yɔ nɛ ɖɩcɔŋnɩ ɖɔ-tɔnʋʋ taa alaafɩya yɔɔ yɔ, ɖɩñɔtʋʋnɩ ɖɛ-Ɛsɔ weyi ɛha-ɖʋ wezuu yɔ nɛ pɩkɩlɩ. Pana wena payɩ ɖɩñakɩ se ɖɔ-tɔm ɛkɛdɩnɩ Yehowa pɩtɩŋa pɩ-taa yɔ amʋ ñɩm ɛ-ɛsɩndaa.—Luka 16:10.

15. Ɛbɛ Yehowa sɔɔlaa se ɖɩla ɛyaa lalaa?

¹⁵ Yehowa lakɩ kɩbandʋ ɛyaa kɩbama nɛ ɛyaa kɩdɛkɛdaa. (Mat. 5:45) Ɛsɔɔlaa se ɖa ɖɔɖɔ ɖɩla ɛyaa lalaa kɩbandʋ. Kɩɖaʋ nakʋyʋ yɔ: ‘Ðɩtaayɔɔdɩ tɔm kɩdɛkɛdɩtʋ nɔɔyʋ yɔɔ, ɖɩtaakɛ tɔm cayaa; ɖɩwɛɛnɩ hɛɛɛ wɛtʋ ɛyaa tɩŋa yɔɔ.’ (Tiiti 3:2) Ye mbʋ, paa ɛyaa nabɛyɛ iitisiɣ Yehowa yɔɔ yɔ ɖiiniŋ-wɛ. (2 Tim. 2:​23-25) Ye ɖɩlakɩ ɛyaa lalaa kɩbandʋ paa ɛzɩmtaa nɛ ɖɩmaɣzɩɣ pɔ-yɔɔ yɔ, ɖɩñɔtʋʋnɩ Yehowa nɛ pɩkɩlɩ.

ÐƖPƖZƖƔ NƐ ÐƖÑƆTƖNƖ ƐSƆ PAA PICOÐI-ÐƲ YƆ

16. Lɩmaɣza wena Keɣa 73 maɖʋ kaapaɣzɩ wɛnʋʋ alɩwaatʋ natʋyʋ?

¹⁶ Ɛlɛ ye alɩwaatʋ natʋyʋ taa, ɖɩpaɣzɩ maɣzʋʋ se ɖɩtɩmʋna se Yehowa ɛsɔɔlɩ-ɖʋ yɔ, ɛbɛ pɩwɛɛ se ɖɩla? Tɔzɩ se wɛtʋ ndʋ tɩɩtalɩ ɖɔɖɔ Keɣa 73 maɖʋ. Ɛyɔɔdaa se: «Pɩɩkazɩ pazɩ, ma-nɩŋgbanzɩ lekaɣ nʋmɔʋ; pɩɩkazɩ ññɩɩ yem se pituu ma-nɩŋgbanzɩ.» (Keɣ. 73:2) Ɛ-maɣmaɣ eetisaa se ɛ-laŋɩyɛ taa kaawɛ «ñɩmɩŋ» nɛ ɛɛkɛ «kɩmɛlɛŋ» «ɛzɩ kpɩnɛ nɖɩ ɖɩɩsɩŋ lɔŋ yɔ» Yehowa ɛsɩndaa. (Keɣ. 73:​21, 22) Ɛzɩ ɛkɔ tɔm ñʋʋ se ɛzɩma picoɖi-i yɔ pʋyɔɔ lɛ, ɛ-tɔm tɛma nɛ ɛtɩmʋna se Yehowa ɛsɔɔlɩ-ɩ?

17. (a) Alɩwaatʋ ndʋ Keɣa maɖʋ kaawɛ laŋwɛɛkɩyɛ taa kpem yɔ, ɛbɛ ɛlaba? (b) Lɔŋ weyi ɛ-kɩɖaʋ kpɛlɩkɩɣ-ɖʋ? (Cɔnɩ ɖɔɖɔ kɩlɛmɩŋ.)

¹⁷ Paa Keɣa maɖʋ kaamaɣzaa se Yehowa lɔ-ɩ yɔ, pɩtʋʋ fɛyɩ se lɩmaɣza ana atileɖi. Halɩ alɩwaatʋ ndʋ ɛɛwɛ laŋwɛɛkɩyɛ taa kpem yɔ, ɛɛnawa se pɩpɔzʋʋ se ɛñɔtɩnɩ Yehowa. Ɛmawa se: «Ɛlɛ lɛɛlɛɛyɔ, mɛwɛ ñɔ-cɔlɔ tam; ŋɖɔkɩ me-nesi kɩbanzɩ kpam. Ŋɖiyiɣ-m nɛ ñɔ-lɔŋ tasʋʋ, nɛ pʋwayɩ lɛ, ŋkaɣ-m wonuu samtʋ taa.» (Keɣ. 73:​23, 24) Ða ɖɔɖɔ, pɩwɛɛ se ɖɩkpaɣ Yehowa ɛzɩ kaaʋ ŋgʋ ɖɩpɩzɩɣ nɛ ɖɩmalɩna alɩwaatʋ ndʋ pɩlakɩ-ɖʋ ɛzɩ ɖo-ɖoŋ tɛma yɔ yaa alɩwaatʋ ndʋ pitiki-ɖʋ yɔɔɔ yɔ. (Keɣ. 73:26; 94:18) Halɩ paa picoɖi-ɖʋ nɛ ɖɩla kɩwɛɛkɩm sɔsɔm yɔ, ɖɩpɩzɩɣ nɛ ɖɩɖaɣnɩ pɩsʋʋ Yehowa cɔlɔ mbʋ pʋyɔɔ yɔ ɖa-taa tɛma se ‘ɛsɔɔlɩ kpeɣu.’ (Keɣ. 86:5) Kɔzɩ kɔzɩ alɩwaatʋ ndʋ ɖɩwɛɣ laŋwɛɛkɩyɛ taa kpem yɔ pɩwɛɛ se ɖɩñɔtɩnɩ ɖɛ-Ɛsɔ.—Keɣ. 103:​13, 14.

ÐƖÑƆTƲƲNƖ ƐSƆ TAM

18. Ɛbɛ yɔɔ ɖɩpɩzɩɣ ɖiwolo pɩ-yɔɔ nɛ ɖɩñɔtʋʋnɩ Yehowa tam?

¹⁸ Ðɩpɩzɩɣ ɖiwolo pɩ-yɔɔ nɛ ɖɩñɔtʋʋnɩ Yehowa tam. Ðɩɩkaɣ pɩzʋʋ nɛ ɖɩkpɛlɩkɩ ɛ-yɔɔ tɔm tɩŋa nɛ ɖɩtɛ kpa. Bibl yɔɔdʋʋ se Yehowa nʋmɔŋ, ɛ-lɔŋsɩnɖɛ nɛ ɛ-sɩmtʋ «wɛ cukaŋ» siŋŋ.—Roma 11:33.

19. Suwe Keɣsi yɔɔdʋʋ cee wayɩ yɔɔ?

¹⁹ Keɣa 79:13 yɔɔdʋʋ se: «Ða mba ɖɩkɛ ña-samaɣ nɛ ña-kpɩna ñɩtʋ ɖɩdɔɔyɛ taa heŋ yɔ, ɖɩkaɣ-ŋ sɛʋ tam se ŋlabaɣ lɛ; nɛ ɖɩkaɣ susuu ña-samtʋ kpaɣ kpaɖʋʋ nɛ piwolo kpaɖʋʋ.» Ña ɖɔɖɔ ye ŋwobi pɩ-yɔɔ nɛ ŋñɔtʋʋnɩ Yehowa yɔ, ña-taa pɩzɩɣ nɛ pɩtɛ se ɛkaɣ-ŋ wazʋʋ tam; nɛ ŋpɩzɩɣ nɛ ŋyɔɔdɩnɩ kaalɛyɩtʋ se: «Ɛsɔ kɛnɩ ma-laŋɩyɛ kaaʋ nɛ men-ɖeɖe tam.»—Keɣ. 73:26.