Ɛbɛ pɩzɩɣ pɩsɩnɩ-ɖʋ alɩwaatʋ ndʋ lɩmaɣza naayɛ yeki nɛ pitiki-ɖʋ yɔɔɔ yɔ?

1-2. (a) Tɔm ndʋ Yehowa sɛyaa pɩzɩɣ nɛ pɔpɔzɩ pa-tɩ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

ÐA-TƖŊA payɩ paa ɖɩtɩɩkɛ pɩɣa yaa sɔsɔ yɔ, nabʋyʋ taa, ɖɩpɔzʋʋ ɖa-tɩ se ɛzɩ ɖɩwɛ wazaɣ Yehowa ɛsɩndaa, yaa ɖikpiɖiɣ lɩmaɣza wena ɖɩɩkpaɣaa nɛ pɩɖɛɛ yɔ a-yɔɔ. Kɩɖaŋ nɩɩyɩ yɔ: Pɩɣa evelaɣ nakɛyɛ pɩzɩɣ nɛ kɔpɔzɩ ka-tɩ se ɛzɩ toovenim taa lɛ, Yehowa maɣzɩɣ kɔ-yɔɔ. Lɩmaɣza ana apɩzɩɣ ayele nɛ kaahaɣ ka-tɩ se pamɩyɩsɩ-kɛ lɩm. Yaa koobu abalɩñɩnʋ nɔɔyʋ kaakpaɣ lɩmaɣzɩyɛ e-evebitu taa se ɛsɩɣ Kewiyaɣ tʋma kajalaɣ lone taa. Ɛlɛ lɛɛlɛɛyɔ ɛpaɣzɩ kpadɩyʋʋ nɛ ɛfɛyɩnɩ liidiye sakɩyɛ se ɛcɔnɩ ɛ-hɔʋ kɩcɛyɩm ɖeɖe. Ɛpɩzɩɣ nɛ ɛpɔzɩ ɛ-tɩ se ɛzɩ ɛɛkpaɣ lɩmaɣzɩyɛ kɩbanɖɛ e-evebitu taa. Yaa koobu halɩñɩnʋ akpadɩyʋ nɔɔyʋ tɩtasɩ wɛnʋʋ ɖoŋ sakɩyɛ. Pɩpɩzɩɣ nɛ pitibi-i yɔɔɔ, mbʋ pʋyɔɔ yɔ ɛɛpɩzɩɣ nɛ ɛlakɩ mbʋ ɛlakaɣ yɔ. Wiɖiyi ŋtɛm ña-tɩ pɔzʋʋ se: «Ɛzɩ toovenim taa lɛ, Yehowa maɣzɩɣ mɔ-yɔɔ? Kɩlaŋ weyi mala Yehowa sɛtʋ taa yɔ, ɛzɩ ɩwazɩ pʋyʋ? Mɛnkpɛndɩ mɛwɛ wazaɣ Yehowa ɛsɩndaa?»

² Ye ɖɩɩñakɩ pana se ɖihiɣ tɔm pɔzʋʋ mbʋ pɩ-yɔɔ cosuu yɔ, pɩpɩzɩɣ piyele nɛ ɖe-tisuu hɛɛ nɛ ɖiyele Yehowa sɛʋ. Tɔm ñʋʋ kʋnɛ kɩ-taa, ɖɩkaɣ naʋ ɛzɩma Bibl pɩzɩɣ nɛ kɩsɩnɩ-ɖʋ (1) alɩwaatʋ ndʋ pɩlakɩ-ɖʋ ɛzɩ Yehowa ɛɛmaɣzɩɣ ɖɔ-yɔɔ yɔ, (2) alɩwaatʋ ndʋ pɩlakɩ-ɖʋ ɛzɩ lɩmaɣza wena ɖɩɩkpaɣaa yɔ atɩkɛ kɩbana yɔ nɛ (3) alɩwaatʋ ndʋ pɩlakɩ-ɖʋ ɛzɩ ɖɩtɩtasɩ wɛʋ wazaɣ Yehowa ɛsɩndaa yɔ.

ƐBƐ PƖZƖƔ PƖSƖNƖ-Ŋ ALƖWAATƲ NDƲ ŊPƆZƲƲ ÑA-TƖ TƆM YƆ?

3. Ye ɖɩpɔzʋʋ ɖa-tɩ tɔm ndʋ tiyeki nɛ pitiki-ɖʋ yɔɔɔ yɔ, ɛbɛ pɩzɩɣ pɩsɩnɩ-ɖʋ?

³ Ye ɖɩpɔzʋʋ ɖa-tɩ tɔm ndʋ tiyeki nɛ pitiki-ɖʋ yɔɔɔ yɔ, mbʋ pɩpɩzɩɣ pɩsɩnɩ-ɖʋ yɔ pɩ-taa nabʋyʋ lɛ se ɖɩñɩnɩ tɔm cosuu Bibl taa. Ye ɖɩlakɩ mbʋ yɔ ɖɩkpaɣ ɖoŋ, ɖɩpɩɣ fezuu taa nɛ «[ɖɩɖɔkʋʋ] kpam tisuu taa.»—1 Kɔr. 16:13.

4. Ɛzɩma ɖɩpɩzɩɣ nɛ «[ɖiwili] pɩtɩŋa camɩyɛ»? (1 Tesalooniiki mba 5:21)

⁴ Kalɩ 1 Tesalooniiki mba 5:21. Tɔzɩ se Bibl seɣtiɣ-ɖʋ se «[ɖiwili] pɩtɩŋa camɩyɛ.» Ɛzɩma ɖɩpɩzɩɣ nɛ ɖɩla mbʋ? Ða-taa pɩzɩɣ nɛ pɩtɛ se tɔm ndʋ tɩ-yɔɔ ɖitisiɣ yɔ tɩkɛ toovenim ye ɖɩkpakɩɣ-tʋ nɛ ɖɩmaɣzɩɣnɩ ndʋ Bibl yɔɔdʋʋ yɔ. Iyele nɛ ɖɩmaɣzɩ pɩɣa evelaɣ ŋga kɔpɔzaɣ ka-tɩ se ɛzɩ kɛwɛ wazaɣ Yehowa ɛsɩndaa yɔ kɔ-yɔɔ. Ɛzɩ pɩwɛɛ se kamaɣzɩ se kɔpɔzʋʋ ka-tɩ tɔm ndʋ yɔ, pɩwɩlɩɣ se Yehowa ɛɛmaɣzɩɣ kɔ-yɔɔ? Aayɩ, pɩwɛɛ se «[kewili] pɩtɩŋa camɩyɛ» nɛ katɩlɩ Yehowa lɩmaɣzɩyɛ tɔm ndʋ tɩ-yɔɔ.

5. Ɛbɛ pɩzɩɣ pɩsɩnɩ-ɖʋ nɛ ɖihiɣ tɔm ndʋ ɖɩpɔzʋʋ ɖa-tɩ yɔ tɩ-yɔɔ cosuu?

⁵ Ye ɖɩkalɩɣ Bibl yɔ, pɩwɛ ɛzɩ Yehowa wɛɛ nɛ ɛyɔɔdʋʋnɩ-ɖʋ yɔ. Ɛlɛ pɩsa nɛ ɖɩtɩlɩ ɛ-lɩmaɣza tɔm natʋyʋ yɔɔ lɛ, pɩpɔzʋʋ-ɖʋ pana ñaɣʋ. Pɩpɔzʋʋ se ɖɩñɩnɩ Bibl masɩ nzɩ sɩpɩzɩɣ nɛ sɩsɩnɩ-ɖʋ nɛ ɖicosi tɔm ndʋ ɖɩpɔzʋʋ ɖa-tɩ yɔ tɩ-yɔɔ nɛ ɖɩtazɩ sɩ-taa. Ðɩpɩzɩɣ ɖɩtɩŋnɩ tɔm ñɩnʋʋ wondu ndʋ Yehowa ɛgbɛyɛ lɩzaa yɔ tɩ-yɔɔ nɛ ɖɩñɩnɩ tɔm ndʋ ɖɩpɔzʋʋ ɖa-tɩ yɔ tɩ-yɔɔ tɔm. (Adu. 2:​3-6) Ðɩpɩzɩɣ nɛ ɖɩtɩmnɩ Yehowa se ɛsɩnɩ-ɖʋ nɛ ɖihiɣ tɔm ndʋ ɖɩpɔzʋʋ ɖa-tɩ yɔ tɩ-yɔɔ cosuu. Pʋwayɩ lɛ, ɖɩpɩzɩɣ nɛ ɖɩñɩnɩ Bibl paɣtʋ kila nɛ tɔm ndʋ tɩpɩzɩɣ tɩsɩnɩ-ɖʋ ɖɛ-wɛtʋ taa yɔ. Pɩtasɩ lɛ, pɩlakaɣ ɛyaa siɣsiɣ tɩnaa nabɛyɛ ɛzɩ ɖa yɔ, pɔyɔɔdɩ pɔ-tɔm Bibl taa. Pɩwɛɣ ɖeu se ɖɩkalɩ pɛ-kɛdɛsɩ.

6. Ɛzɩma kediɣzisi pɩzɩɣ sɩsɩnɩ-ɖʋ nɛ ɖihiɣ tɔm ndʋ ɖɩpɔzʋʋ ɖa-tɩ yɔ tɩ-yɔɔ cosuu?

⁶ Yehowa yɔɔdʋʋnɩ-ɖʋ ɖɔɖɔ alɩwaatʋ ndʋ ɖiwoki kediɣzisi yɔ. Ye ɖiwoki kediɣzisi ɖoŋ ɖoŋ yɔ, pɩtɩla ɖɩnɩɣ tɔm natʋyʋ tɔm yɔɔdʋʋ nabʋyʋ taa yaa tɔm ndʋ nɔɔyʋ cosaa yɔ tɩ-taa nɛ pɩsɩnɩ-ɖʋ nɛ ɖicosi tɔm ndʋ ɖɩpɔzʋʋ ɖa-tɩ yɔ tɩ-yɔɔ. (Adu. 27:17) Lɛɛlɛɛyɔ, iyele nɛ ɖɩna tɔm ndʋ ɖɩpɔzʋʋ ɖa-tɩ yɔ tɩ-yɔɔ cosuu.

ALƖWAATƲ NDƲ PƖLAKƖ-Ŋ ƐZƖ YEHOWA ƐƐMAƔZƖƔ ÑƆ-YƆƆ YƆ

7. Tɔm ndʋ ɛyaa nabɛyɛ pɩzɩɣ nɛ pɔpɔzɩ pa-tɩ?

⁷ Wiɖiyi ŋtɛm ña-tɩ pɔzʋʋ se: «Ɛzɩ toovenim taa lɛ, Yehowa maɣzɩɣ mɔ-yɔɔ?» Ye pɩlakɩ-ŋ ɛzɩ ŋtɩlɩɩ pʋyʋ yɔ, ŋpɩzɩɣ nɛ ŋmaɣzɩ se ŋŋpɩzɩɣ nɛ ŋkɛ kedeŋa kpeekpe Lɩzɩyʋ taabalʋ. Pɩtɩla, Wiyaʋ Daviid ɖɔɖɔ kaawɛnɩ lɩmaɣza ana. Pɩɩɖɩɣzɩ-ɩ se halɩ Yehowa maɣzɩɣ ɛyaa yɔɔ. Ɛyɔɔdaa se: «Hayɩ Yehowa, ɛbɛ ɛyʋ kɛnaa nɛ pɩwɛɛ se ŋna-ɩ, ɛyʋ pɩyalʋ kɛ we nɛ pɩwɛɛ se ŋkemni-i?» (Keɣ. 144:3) Le ŋpɩzɩɣ nɛ ŋna tɔm pɔzʋʋ mbʋ pɩ-yɔɔ cosuu?

8. Ɛzɩ 1 Samɩyɛɛlɩ 16:​6, 7, 10-12 yɔɔdʋʋ yɔ, ɛbɛ Yehowa naɣ ɛyaa yɔɔ?

⁸ Bibl wɩlɩɣ-ɖʋ se Yehowa maɣzɩɣ ɛyaa mba lalaa kpakɩɣ-wɛ se patɩlɩɩ pʋyʋ yɔ pɔ-yɔɔ. Kɩɖaʋ nakʋyʋ yɔ: Yehowa kaatiyi Samɩyɛɛlɩ se ewolo Yesee ɖɩɣa taa nɛ ɛtaa num ɛ-pɩyalʋ nɔɔyʋ nɛ ɛlɛ tɔɔ kewiyitu Izrayɛɛlɩ yɔɔ. Yesee ya ɛ-pɩyalaa 7 nɛ ɛwɩlɩ-wɛ Samɩyɛɛlɩ, ɛlɛ ɛtɩyaa ɛ-pɩyalʋ kɛdɛzaɣ ñɩnʋ Daviid.a Paa mbʋ yɔ, Daviid Yehowa kaalɩzaa. (Kalɩ 1 Samɩyɛɛlɩ 16:​6, 7, 10-12.) Yehowa naɣaɣ ɛyʋ weyi Daviid kaakɛnɩ ɖooo ɛ-taa kiŋ yɔ. Ɛɛnawa se pɩɣa evelaɣ ŋga, kɔsɔɔlɩ-ɩ siŋŋ.

9. Ɛbɛ yɔɔ ña-taa pɩzɩɣ nɛ pɩtɛ se Yehowa maɣzɩɣ ñɔ-yɔɔ? (Cɔnɩ ɖɔɖɔ kɩlɛmʋʋ.)

⁹ Maɣzɩ ɛzɩma Yehowa tɛm wɩlʋʋ se ɛmaɣzɩɣ ñɔ-yɔɔ yɔ pɩ-yɔɔ. Ɛtasɩɣ-ŋ lɔŋ kɩbaŋ weyi ɩlakɩ nɔɔ kʋɖʋmaɣ ɖeyi ɖeyi nɛ wɛtʋ ndʋ tɩ-taa ŋwɛɛ yɔ. (Keɣ. 32:8) Ɛzɩma ɛpɩzɩɣ nɛ ɛla mbʋ ye ɛtɩsɩmɩ-ŋ camɩyɛ yɔ? (Keɣ. 139:1) Ye ŋɖɔŋ Yehowa lɔŋ tasʋʋ yɔɔ nɛ ŋnaɣ ɛzɩma pɩwazɩɣ-ŋ yɔ, ña-taa kaɣ tɛm se Yehowa maɣzɩɣ ñɔ-yɔɔ. (1 Kro. 28:9; Tʋma 17:​26, 27) Yehowa naɣ pana wena payɩ ŋñakɩ se ŋsɛɛ-ɩ nɛ ŋñamɩ-ɩ yɔ. Ɛnaɣ ñɛ-wɛtʋ kɩbandʋ nɛ ɛsɔɔlaa se ɛkɛ ña-taabalʋ. (Yer. 17:10) Nɛ ɛsɔɔlaa se ña ɖɔɖɔ ŋtisi nɛ ŋkɛ ɛ-taabalʋ.—1 Yoh. 4:19.

ALƖWAATƲ NDƲ PƖLAKƖ-Ŋ ƐZƖ LƖMAƔZA WENA ŊŊKPAƔAA YƆ ATƖKƐ KƖBANA YƆ

10. Alɩwaatʋ ndʋ ɖɩmaɣzɩɣ lɩmaɣza wena ɖɩɩkpaɣaa nɛ pɩɖɛɛ yɔ a-yɔɔ yɔ, tɔm ndʋ ɖɩpɩzɩɣ nɛ ɖɩpɔzɩ ɖa-tɩ?

¹⁰ Nabʋyʋ taa, nabɛyɛ pɩzɩɣ nɛ pamaɣzɩ lɩmaɣza wena paakpaɣaa nɛ pɩɖɛɛ yɔ a-yɔɔ nɛ pɔpɔzʋʋ pa-tɩ se ɛzɩ lɩmaɣza kɩbana paakpaɣaa. Pʋtɔma yɔ, paakpaɣ lɩmaɣzɩyɛ se peyeki yaa pekiziɣ tʋmɩyɛ kɩbanɖɛ nɖɩ ɖɩ-taa pɛhɛyɩɣ camɩyɛ yɔ nɛ pɩsa nɛ pɛsɛɛ Yehowa nɛ pɩkɩlɩ. Lɛɛlɛɛyɔ pɩnzɩ sakɩyɛ ɖɛwa. Pɩtɩla pɩlakɩ-wɛ ɛzɩ pɛ-ɛyɩsɩmaa mba paalabɩ tʋma kɩbana yɔ, pɛwɛnɩ liidiye sakɩyɛ yaa pɩwɛɛ nɛ piɖeɣni-wɛ pe-wezuu caɣʋ taa yɔ. Pɩpɩzɩɣ piyele nɛ pɔpɔzʋʋ pa-tɩ se: «Kɩlaŋ weyi mala Yehowa sɛtʋ taa yɔ, ɛzɩ ɩwazɩ pʋyʋ? Yaa iyeba nɛ melesi nabʋyʋ?»

11. Ɛbɛ kaayeba nɛ weyi ɛma Keɣa 73 yɔ ɛnɩɣzɩɣ?

¹¹ Ye ŋpɔzʋʋ ña-tɩ tɔm ndʋ yɔ, maɣzɩ ɛzɩma pɩlakaɣ weyi ɛma Keɣa 73 yɔ pɩ-yɔɔ. Ɛnaɣaɣ se ɛyaa mba pataasɛɣ Yehowa yɔ, pɛwɛ alaafɩya camɩyɛ, pɛwɛnɩ ñɩm nɛ pɩwɛ ɛzɩ pɛfɛyɩnɩ nɩɣzɛ naayɛ yɔ. (Keɣ. 73:​3-5, 12) Alɩwaatʋ ndʋ ɛnaɣaɣ se pɩwɛ ɛzɩ piɖeɣni-wɛ pe-wezuu caɣʋ taa yɔ, pɩlabɩ-ɩ ɛzɩ pana wena ɛwɛɛ nɛ ɛñakɩ se ɛsɛɛ Yehowa yɔ aawazɩɣ pʋyʋ yɔ. Lɩmaɣza ana ayeba nɛ ɛnɩɣzɩɣ «evemiye kpeekpe.» (Keɣ. 73:​13, 14) Ɛzɩma ɛlʋbɩnɩ lɩmaɣza kɩdɛkɛda ana?

12. Ɛzɩ pɔyɔɔdʋʋ Keɣa 73:​16-18 taa yɔ, ɛbɛ sɩnɩ keɣa maɖʋ nɛ ɛlʋbɩnɩ ɛ-lɩmaɣza kɩdɛkɛda?

¹² Kalɩ Keɣa 73:​16-18. Keɣa maɖʋ wobi Yehowa kooka kiɖeɖeɣa taa. Peeɖe ewoba nɛ ɛpɩzɩ nɛ ɛmaɣzɩ camɩyɛ. Ɛnɩ pɩ-taa se paa pɩwɛ ɛzɩ piɖeɣni ɛyaa nabɛyɛ yɔ, pɛfɛyɩnɩ lidaʋ nakʋyʋ cee wayɩ. Piyeba nɛ ehiɣ maɣzɩm taa laŋhɛzɩyɛ nɛ ɛ-taa tɛ se lɩmaɣzɩyɛ nɖɩ ɛkpaɣaa se ɛsɩɣ Yehowa sɛtʋ kajalaɣ ɖeɖe yɔ, ɖɩkɛ lɩmaɣzɩyɛ kɩbanɖɛ kpem. Nɛ ɛtɛm ɛ-taa se ewoki pɩ-yɔɔ nɛ ɛsɛɛ Yehowa.—Keɣ. 73:​23-28.

13. Ye pɩlakɩ-ŋ ɛzɩ lɩmaɣza wena ŋŋkpaɣaa nɛ pɩɖɛɛ yɔ atɩkɛ kɩbana yɔ, ɛzɩma ŋpɩzɩɣ nɛ ŋhiɣ maɣzɩm taa laŋhɛzɩyɛ? (Cɔnɩ ɖɔɖɔ kɩlɛmʋʋ.)

¹³ Ɛzɩ keɣa maɖʋ ɛnʋ yɔ ña ɖɔɖɔ, Ɛsɔtɔm pɩzɩɣ tɩsɩnɩ-ŋ nɛ ŋlʋbɩnɩ lɩmaɣza wena ayeki nɛ pitiki-ŋ yɔɔɔ yɔ. Ɛzɩma tɩyɛ? Maɣzɩ wondu kɩbandʋ ndʋ ŋwɛna yɔ tɩ-yɔɔ, pɩkpɛndɩnɩ ñɩm mbʋ ŋwɛnɩ ɛsɔdaa yɔ pɩ-yɔɔ nɛ ŋtɔzɩ se mba paasɛɣ Yehowa yɔ, mbʋ pɛwɛnɩ tɛtʋ yɔɔ cɩnɛ yɔ, pi-ɖeke pɩkɛnɩ pa-kɩhɛyʋʋ. Mbʋ pɛwɛnɩ pe-wezuu caɣʋ taa yɔ, mbʋ papɩzɩɣ nɛ pataa liu kiya mbʋ pʋyɔɔ yɔ pɛfɛyɩnɩ cee wayɩ lidaʋ nakʋyʋ. Ɛlɛ ña lɛ, Yehowa lakɩ-ŋ tamaɣ se ɛwazɩɣ-ŋ nɛ pɩcɛzɩ mbʋ pɩ-yɔɔ ŋpɩzɩɣ nɛ ŋmaɣzɩ yɔ. (Keɣ. 145:16) Pɩtasɩ lɛ, maɣzɩ tɔm tʋnɛ tɩ-yɔɔ nɛ ŋna: Paa ŋtaakpaɣ lɩmaɣzɩyɛ se ŋsɩɣ Yehowa sɛtʋ kajalaɣ lone taa yɔ, ŋŋpɩzaa nɛ ŋtɩlɩ ɛzɩma ñe-wezuu caɣʋ kaɣaɣ wɛʋ yɔ? Ðɩɩpɩtɩɣ tɔm tʋnɛ tɩ-yɔɔ: Ye sɔɔlɩm mbʋ ŋwɛnɩ Ɛsɔ nɛ ɛyaa lalaa pɔ-yɔɔ yɔ, mbʋ eseɣtiɣni-ŋ nɛ ŋkpakɩɣ lɩmaɣza yɔ, ŋkaɣ wɛnʋʋ mbʋ pɩhaɣ-ŋ koboyaɣ ñe-wezuu caɣʋ taa yɔ paa ɛzɩmtaa.

ALƖWAATƲ NDƲ PƖLAKƖ-Ŋ ƐZƖ ŊTƖTASƖ WƐƲ WAZAƔ YEHOWA ƐSƖNDAA YƆ

14. (a) Wɛtʋ ndʋ taa ɛyaa nabɛyɛ wɛɛ? (b) Nɛ tɔm ndʋ papɩzɩɣ nɛ pɔpɔzɩ pa-tɩ?

¹⁴ Yehowa sɛyaa nabɛyɛ ɩɩpɩzɩɣ nɛ palakɩ tʋma sakɩyɛ ɛzɩ patɩɩlakʋʋ yɔ, mbʋ pʋyɔɔ yɔ pakpadɩyaa, pɛfɛyɩnɩ tɔnʋʋ taa alaafɩya yaa pɛwɛnɩ ɛjandʋ natʋyʋ. Pɩpɩzɩɣ piyele nɛ pɩlakɩ-wɛ ɛzɩ patɩtasɩ wɛnʋʋ wazaɣ Yehowa ɛsɩndaa yɔ. Papɩzɩɣ nɛ pɔpɔzɩ pa-tɩ se: «Ɛzɩ mantasɩ wɛʋ wazaɣ Yehowa ɛsɩndaa?»

15. Ɛbɛ weyi ɛma Keɣa 71 yɔ ɛ-taa kaatɛmnaa?

¹⁵ Weyi ɛma Keɣa 71 yɔ, ɛɛwɛnɩ lɩmaɣza kʋɖʋma ana ɖɔɖɔ. Ɛtɩmaa se: «Taayebi-m alɩwaatʋ ndʋ mon-ɖoŋ tɛŋ yɔ.» (Keɣ. 71:​9, 18) Ɛlɛ ɛ-taa kaatɛma se ye ɛsɛɣ Yehowa siɣsiɣ yɔ, Yehowa kaɣ-ɩ ɖiyuu nɛ ɛsɩnɩ-ɩ. Keɣa maɖʋ kpɛlɩkaa se paa nɔɔyʋ ɖoŋ ɛwɛnɩ kamaɣ ɛlɛ ɛñakɩ pana se ɛsɛɛ Yehowa yɔ, ɛ-tɔm kɛdɩɣnɩ Yehowa.—Keɣ. 37:​23-25.

16. Hɔɔlɩŋ weyi taa koobiya akpadɩyaa wɛ wazaɣ Yehowa ɛsɩndaa? (Keɣa 92:​12-15)

¹⁶ Koobiya akpadɩyaa, ɩwɛɛnɩ lɩmaɣza wena Yehowa wɛnɩ mɩ-wɛtʋ yɔɔ yɔ. Ɛpɩzɩɣ nɛ ɛsɩnɩ-mɩ nɛ ɩsɛɛ-ɩ siɣsiɣ paa mi-ɖoŋ ɛwɛnɩ kamaɣ yɔ. (Kalɩ Keɣa 92:​12-15.) Ɩtaaka mɩ-lɩmaɣza mbʋ ɩɩpɩzɩɣ nɛ ɩtasɩ labʋ yɔ pɩ-yɔɔ, ɛlɛ ɩkamɩ-yɛ mbʋ ɩpɩzɩɣ nɛ ɩla yɔ pɩ-yɔɔ. Ɩpɩzɩɣ nɛ ɩtɩŋnɩ mɩ-kɩɖaʋ kɩbaŋʋ yɔɔ nɛ ɛzɩma ɩwɩlɩɣ se ɩmaɣzɩɣ lalaa yɔɔ yɔ pɩ-yɔɔ nɛ ɩkpazɩ-wɛ ɖoŋ. Ɩpɩzɩɣ nɛ iheyi lalaa ɛzɩma Yehowa sɩnɩ-mɩ pɩnzɩ sakɩyɛ yɔ pɩ-tɔm, nɛ Bibl tamasɩ nzɩ ɩɖaŋ kpam se sɩla cee wayɩ yɔ sɩ-tɔm. Pɩtasɩ lɛ, ɩtaasɔɔ kpa se adɩma wena ɩlakɩ lalaa yɔɔ yɔ, awɛnɩ ɖoŋ sɔsɔŋ. (1 Pɩy. 3:12) Paa wɛtʋ ndʋ taa ɖɩtɩɩwɛɛ yɔ, ɖa-tɩŋa ɖɩpɩzɩɣ nɛ ɖɩha nabʋyʋ Yehowa nɛ ɛyaa lalaa.

17. Ɛbɛ yɔɔ pɩfɛyɩ se ɖɩkpakɩɣ mbʋ ɖɩlakɩ yɔ nɛ ɖɩmaɣzɩɣnɩ mbʋ lalaa lakɩ yɔ?

¹⁷ Ye pɩcɛyɩɣ-ŋ se ŋŋpɩzɩɣ nɛ ŋlakɩ sakɩyɛ Yehowa sɛtʋ taa yɔ, ña-taa ɛtɛ se ɛ-taa lakɩ leleŋ nɛ mbʋ payɩ ŋpɩzɩɣ nɛ ŋlakɩ yɔ. Pɩtɩla ŋwɛɛ nɛ ŋkpakɩɣ mbʋ ŋlakɩ yɔ nɛ ŋmaɣzɩɣnɩ mbʋ lalaa lakɩ yɔ. Ɛlɛ taala mbʋ! Ɛbɛ yɔɔ? Mbʋ pʋyɔɔ yɔ Yehowa ɛɛlakɩ mbʋ. (Gal. 6:4) Kɩɖaʋ nakʋyʋ yɔ: Maarɩɩ kaakpaɣ sɔzɩŋ num mbʋ pɩwɛ liidiye siŋŋ yɔ nɛ ɛlabɩnɩ Yesu kʋjɔʋ. (Yoh. 12:​3-5) Ɛlɛ, lelu kʋñɔndʋ ñaaɖʋ templo taa liidiye pɔɔyɩsɩ cikpesi 2 nzɩ sɩtɩlɩɩ pʋyʋ yɔ. (Luka 21:​1-4) Paa mbʋ yɔ, Yesu tɩkpaɣ halaa mba pa-naalɛ nɛ ɛmaɣzɩnɩ ɖama, ɛlɛ ɛnawa se pa-kʋjɔŋ ɛnɩ ɩwɩlaa se pɛwɛnɩ tisuu. Yesu Caa Yehowa taa wɛ leleŋ siŋŋ nɛ mbʋ payɩ tisuu nɛ sɔɔlɩm mbʋ ŋwɛnɩ ɛ-yɔɔ yɔ piseɣtiɣ-ŋ nɛ ŋlakɩ yɔ, paa pɩlakɩ-ŋ ɛzɩ pɩtɩlɩɩ pʋyʋ yɔ.

18. Ɛbɛ kaɣ-ɖʋ sɩnʋʋ nɛ ɖɩwa ɖa-nɩɣzɛ? (Kalɩ ɖɔɖɔ aɖakaɣ «Yehowa Tɔm pɩzɩɣ nɛ tɩsɩnɩ-ŋ nɛ ŋwa ña-nɩɣzɛ.»)

¹⁸ Nabʋyʋ taa, ɖa-tɩŋa ɖɩnɩɣzɩɣ tɔm natʋyʋ yɔɔ. Ɛlɛ, ɛzɩ ɖɩnaʋ yɔ, Bibl pɩzɩɣ nɛ kɩsɩnɩ-ɖʋ nɛ ɖɩlʋbɩnɩ nɩɣzɛ ana. Pʋyɔɔ lɛ, ñaɣ pana nɛ ŋwa ña-nɩɣzɛ, piyeki nɛ ŋtaa ña-tɩ liu nɛ pɩkɩlɩ nɛ pɩɩtasɩɣ-ŋ tibu yɔɔɔ. Yehowa sɩmɩ-ŋ camɩyɛ. Ɛ-taa wɛ leleŋ nɛ kɩlaŋ weyi ŋlaɣ yɔ, nɛ ɛkaɣ ɖɔm tamaɣ ŋga ɛlaba se ɛwazɩɣ-ŋ yɔ kɔ-yɔɔ. Ña-taa ɛtɛ se Yehowa sɔɔlɩ ɛ-sɛyaa siɣsiɣ tɩnaa tɩŋa nɛ ɛmaɣzɩɣ pɔ-yɔɔ.