Pɩlabɩ-ŋ wiɖiyi ɛzɩ ŋfɛyɩ nɔɔyʋ yɔ nɛ sɔɔndʋ kpa-ŋ?

Cɔnɩ abalɩbɩɣa ŋga kɛwɛ kɩlɛmʋʋ kʋnɛ kɩ-yɔɔ yɔ nɛ ŋna. Kɛ-ɛzɩdaa wɛ ɛzɩ weyi ɛfɛyɩ nɔɔyʋ nɛ sɔɔndʋ kpaɣ-ɩ yɔ, yaa we? Pɩlabɩ-ŋ wiɖiyi mbʋ nɛ ŋna?— Nabʋyʋ taa pɩlakɩ ɖa-tɩŋa mbʋ. Bibl yɔɔdʋʋ Ɛsɔ taabalaa nabɛyɛ tɔm se pɩɩlabɩ-wɛ ɛzɩ pɛfɛyɩ nɔɔyʋ yɔ nɛ sɔɔndʋ kpa-wɛ ɖɔɖɔ. Pa-taa nɔɔyʋ payaɣ se Eliya. Yele nɛ ɖɩkpɛlɩkɩ ɛ-yɔɔ tɔm pazɩ.

Eliya kaacaɣ wezuu Izrayɛɛlɩ tɛtʋ taa. Nɛ pʋwayɩ, pɩlabɩ pɩnzɩ sakɩyɛ pʋcɔ nɛ palʋlʋʋ Yesu. Izrayɛɛlɩ wiyaʋ Ahaabɩ taasɛɣ Ɛsɔ toovenim tʋ Yehowa. Ahaabɩ nɛ ɛ-halʋ Yezaabɛɛlɩ pɛsɛɣaɣ cɛtɩm Ɛsɔ weyi payaɣ se Baalɩ yɔ. Mbʋ yebina nɛ Izrayɛɛlɩ piya sakɩyɛ paɣzɩ sɛʋ Baalɩ ɖɔɖɔ. Abiɖe Yezaabɛɛlɩ kaawɛ kañatʋ pɩdɩɩfɛyɩ nɛ ɛcaɣ se ɛkʋ mba pɛsɛɣ Yehowa yɔ, pa-tɩŋa payɩ, pɩkpɛndɩnɩ Eliya! Ɛlɛ ŋsɩm mbʋ Eliya laba yɔ?—

Eliya kʋyaa nɛ ese! Ɛɖɛ ɖooo kañɩmbusuu taa nɛ ɛmɛlɩ ɛwaɣ yaa kaaʋ sɔsɔʋ nakʋyʋ tɛɛ peeɖe. Ŋmaɣzɩɣ se ɛbɛ yɔɔ ɛlabɩ mbʋ?— Sɔɔndʋ kpanɩ-ɩ. Ɛlɛ pɩtaapɔzɩ se sɔɔndʋ ɛkpa Eliya mbʋ. Ɛbɛ yɔɔ? Mbʋ pʋyɔɔ yɔ, Yehowa kaatɛmɩ-ɩ sɩnʋʋ nɛ pɩɖɛɛ. Halɩ alɩwaatʋ natʋyʋ ɛɛtɩmaa nɛ Yehowa yele nɛ miŋ lɩɩnɩ ɛsɔdaa. Ye mbʋ pɩɩpɔzaa se ɛtaa Yehowa liu se lɛɛlɛɛyɔ ɛpɩzɩɣ nɛ ɛsɩnɩ-ɩ ɖɔɖɔ.

Alɩwaatʋ ndʋ Eliya kaawɛ ɛwaɣ tɛɛ yɔ, Yehowa lɩ ɛ-yɔɔ nɛ ɛpɔzɩ-ɩ se: ‘Ɛbɛ ŋlakɩ cɩnɛ?’ Peeɖe Eliya cosaa se: ‘Men-ɖeke koŋ pɩkazaa mba pɛsɛɣ-ŋ yɔ, pa-taa. Men-ɖeke pɩkazaa nɛ sɔɔndʋ kpaɣ-m mbʋ pʋyɔɔ yɔ pacaɣ se pakʋ-m ɖɔɖɔ.’ Eliya maɣzaɣ se pakʋ mba pɛsɛɣaɣ Yehowa yɔ, pa-tɩŋa payɩ. Ɛlɛ Yehowa kitini-i se: ‘Aayɩ, pɩtɩkɛ ñe-ɖeke pɩkazaa. Pɩkazɩ ɛyaa 7 000 ɖɔɖɔ, peɖiɣni-m sɛʋ. Wɛɛ abalɩtʋ. Tʋma sakɩyɛ kazaa se ŋkaɣ labʋ.’ Ŋmaɣzɩɣ se Eliya nɩ tɔm tʋnɛ lɛ, pɩlabɩ-ɩ leleŋ na?—

Mbʋ pɩtalɩ Eliya yɔ, ɛbɛ pɩkpɛlɩkɩɣ-ŋ?— Pɩtɩpɔzɩ kaaʋ se ŋmaɣzɩ alɩwaatʋ natʋyʋ taa se ŋfɛyɩ nɔɔyʋ nɛ sɔɔndʋ kpa-ŋ. Ŋwɛnɩ taabalaa mba pɔsɔɔlɩ-ŋ nɛ pɔsɔɔlɩ Yehowa ɖɔɖɔ yɔ. Pɩtasɩ lɛ, Yehowa wɛ ɖoŋ pɩdɩɩfɛyɩ nɛ ɛkaɣ-ŋ sɩnʋʋ paa alɩwaatʋ ndʋ tɩ-taa. Ŋtɩlʋʋ lɛɛlɛɛyɔ se ŋwɛnɩ ɛyaa sakɩyɛ nɛ pamaɣzɩɣ ñɔ-yɔɔ yɔ, pɩtɩlabɩ-ŋ leleŋ yaa we?—