Yehowa kpazɩ Eliya ɖoŋ

Yezaabɛɛlɩ nɩ mbʋ pɩtalɩ Baalɩ nayaa yɔ lɛ, ɛkɔ pana siŋŋ. Etiyi se peheyi Eliya se: “Cee ña ɖɔɖɔ ŋkaɣ sɩbʋ ɛzɩ Baalɩ nayaa yɔ.” Sɔɔndʋ kpa Eliya siŋŋ nɛ ese ɛɖɛɛ kañɩmbusuu taa. Ɛtɩmnɩ Yehowa nɛ ɛyɔɔdɩ se: “Yehowa, pɩnɩ-m, yele nɛ mansɩ.” Nɛ Eliya hɩnɩ tɩʋ nakʋyʋ tɛɛ nɛ ɛpaɣzɩ ɖou. Pɩɩnɩ-ɩ siŋŋ.

Ɛsɔ tiyiyu nɔɔyʋ wolo nɛ efezi-i nɛ eheyi-i se: “Kʋyɩ nɛ ŋtɔɔ tɔɔnaɣ.” Eliya kʋyaa lɛ, ɛna kpɔnɔ kulukulu ñɩŋgʋ nakʋyʋ pɛɛ miŋ ñɩna naayɛ yɔɔ nɛ lɩm kokoɖe. Peeɖe ɛtɔwaa nɛ ɛñɔɔ nɛ ɛɖaɣnɩ hɩnʋʋ. Pʋwayɩ lɛ, Ɛsɔ tiyiyu ɖaɣnɩ-ɩ fezuu nɛ eheyi-i se: “Tɔɔ, mbʋ pʋyɔɔ yɔ pɩpɔzʋʋ se ŋwɛɛ ɖoŋ nɛ ŋpɩzɩ ŋɖɔ ña-nʋmɔʋ.” Nɛ Eliya tasɩ tɔɔʋ. Nɛ pʋwayɩ lɛ, ɛɖɔ nʋmɔʋ kɩyakɩŋ 40 nɛ ɖoo 40 nɛ ɛkɔɔ ɛtalɩ Orɛɛbʋ Pʋʋ cɔlɔ. Ɛtalɩ peeɖe lɛ, ɛsʋʋ ɛwaɣ pɔʋ taa nɛ ɛhɩnɩ. Nɛ Yehowa yɔɔdɩnɩ-ɩ. Ɛpɔzɩ-ɩ se: “Ŋlakɩ we cɩnɛ, Eliya?” Eliya cosi se: “Izrayɛɛlɩ mba cɛbɩ ñɛ-ɛgbɛyɛ. Pɔyɔkɩ ña-altaarunaa nɛ pakʋ ña-nayaa. Lɛɛlɛɛyɔ, pañɩnɩɣ se pakʋ-m ɖɔɖɔ.”

Yehowa heyi-i se: “Lɩɩ nɛ ŋsɩŋ pʋʋ yɔɔ.” Kajalaɣ lɛ, helim sɔsɔm nabʋyʋ maba nɛ piwolo pɩɖɛɛ ɛwaɣ pɔʋ ŋgʋ kɩ-taa ɛwɛɛ yɔ, kɩ-ɛsɩndaa. Pʋwayɩ lɛ tɛtʋ ñamsɩ, nɛ miŋ nɩɩyɩ lɩɩ. Kɛdɛzaɣ ɖeɖe lɛ, Eliya nɩɩ nɔɔ hɛɛɛ ñɩŋga nakɛyɛ taŋ. Ɛkpaɣ e-toko nɛ ehuuzi ɛ-ɛsa yɔɔ nɛ ɛlɩɩ pɔʋ taa. Peeɖe Yehowa pɔzɩ-ɩ se ɛbɛ yɔɔ esewa. Nɛ Eliya cosi se: “Men-ɖeke pɩkazɩ ñɛ-sɛyaa taa.” Ɛlɛ Yehowa heyi-i se: “Pɩtɩkɛ ñe-ɖeke pɩkazaa. Ɛyaa 7000 wɛ Izrayɛɛlɩ ɛjaɖɛ taa nɛ peɖiɣni-m sɛʋ. Wolo nɛ ŋtaa num Eliizee nɛ ɛpɩsɩ nayʋ ño-lone taa.” Eliya kʋyɩ kpaka nɛ ewolo nɛ ɛla ɛzɩ Yehowa heyuu-i yɔ. Ŋmaɣzɩɣ se ña ɖɔɖɔ ye ŋlakɩ Yehowa sɔɔlɩm yɔ, ɛkaɣ-ŋ sɩnʋʋ na? Pɩtʋʋ fɛyɩ se ɛkaɣ-ŋ sɩnʋʋ. Pʋcɔ nɛ ɖɩyɔɔdɩ mbʋ Eliya labɩ pʋwayɩ yɔ pɩ-tɔm lɛ, yele nɛ ɖɩna mbʋ pɩɩlabɩ wɩlɩŋ ɛnɩ ɛ-alɩwaatʋ taa yɔ.